3. ஓவாத³வக்³கோ³

1. ஓவாத³ஸிக்கா²பத³வண்ணனா

144. பி⁴க்கு²னிவக்³க³ஸ்ஸ பட²மஸிக்கா²பதே³ கதா²னுஸாரேனாதி ‘‘ஸோ தே²ரோ கிம்ஸீலோ கிம்ஸமாசாரோ கதரகுலா பப்³ப³ஜிதோ’’திஆதி³னா புச்ச²ந்தானம் புச்சா²கதா²னுஸாரேன. கதே²தும் வட்டந்தீதி நிராமிஸேனேவ சித்தேன கதே²தும் வட்டந்தி. அனிய்யானிகத்தா ஸக்³க³மோக்க²மக்³கா³னம் திரச்சா²னபூ⁴தா கதா² திரச்சா²னகதா²தி ஆஹ ‘‘ஸக்³க³மக்³க³க³மனேபீ’’திஆதி³. அபி-ஸத்³தே³ன பகே³வ மோக்க²மக்³க³க³மனேதி தீ³பேதி. திரச்சா²னபூ⁴தந்தி திரோகரணபூ⁴தம், பா³தி⁴கந்தி வுத்தம் ஹோதி. லத்³தா⁴ஸேவனா ஹி திரச்சா²னகதா² ஸக்³க³மோக்கா²னம் பா³தி⁴காவ ஹோதி. ஸமித்³தோ⁴தி பரிபுண்ணோ. ஸஹிதத்தோ²தி யுத்தத்தோ². அத்த²க³ம்பீ⁴ரதாதி³யோக³தோ க³ம்பீ⁴ரோ. ப³ஹுரஸோதி அத்த²ரஸாதி³ப³ஹுரஸோ. லக்க²ணபடிவேத⁴ஸம்யுத்தோதி அனிச்சாதி³லக்க²ணபடிவேத⁴ரஸஆவஹனதோ லக்க²ணபடிவேத⁴ஸம்யுத்தோ.

145-147. பரதோதி பரத்த², உத்தரிந்தி அத்தோ². கரோந்தோவாதி பரிபா³ஹிரே கரோந்தோயேவ. பாதிமோக்கோ²தி சாரித்தவாரித்தப்பபே⁴த³ம் ஸிக்கா²பத³ஸீலம். தஞ்ஹி யோ நம் பாதி ரக்க²தி, தம் மோக்கே²தி மோசேதி ஆபாயிகாதீ³ஹி து³க்கே²ஹி, தஸ்மா ‘‘பாதிமோக்க²’’ந்தி வுச்சதி. ஸம்வரணம் ஸம்வரோ, காயவசீத்³வாரானம் பித³ஹனம். யேன ஹி தே ஸம்வுதா பிஹிதா ஹோந்தி, ஸோ ஸம்வரோ, காயிகவாசஸிகஸ்ஸ அவீதிக்கமஸ்ஸேதம் நாமம். பாதிமோக்க²ஸம்வரேன ஸம்வுதோதி பாதிமோக்க²ஸம்வரேன பிஹிதகாயவசீத்³வாரோ. ததா²பூ⁴தோ ச யஸ்மா தேன ஸமங்கீ³ நாம ஹோதி, தஸ்மா வுத்தம் ‘‘ஸமன்னாக³தோ’’தி. வத்ததீதி அத்தபா⁴வம் பவத்தேதி. விஹரதீதி இமினா பாதிமோக்க²ஸம்வரஸீலே டி²தஸ்ஸ பி⁴க்கு²னோ இரியாபத²விஹாரோ த³ஸ்ஸிதோ.

ஸங்கே²பதோ வுத்தமத்த²ம் வித்தா²ரதோ பாளியா விபா⁴வேதும் ‘‘வுத்தஞ்ஹேத’’ந்திஆதி³ ஆரத்³த⁴ம். தத்த² விப⁴ங்கே³தி ஜா²னவிப⁴ங்கே³. ஸீலம் பதிட்டா²திஆதீ³னி பாதிமோக்க²ஸ்ஸேவ வேவசனானி. தத்த² (விப⁴. அட்ட². 511) ஸீலந்தி காமஞ்சேதம் ஸஹ கம்மவாசாபரியோஸானேன இஜ்ஜ²னகஸ்ஸ பாதிமோக்க²ஸ்ஸேவ வேவசனம், ஏவம் ஸந்தேபி த⁴ம்மதோ ஏதம் ஸீலம் நாம பாணாதிபாதாதீ³ஹி வா விரமந்தஸ்ஸ வத்தபடிபத்திம் வா பூரேந்தஸ்ஸ சேதனாத³யோ த⁴ம்மா வேதி³தப்³பா³. யஸ்மா பன பாதிமோக்க²ஸீலேன பி⁴க்கு² ஸாஸனே பதிட்டா²தி நாம, தஸ்மா தம் ‘‘பதிட்டா²’’தி வுத்தம். பதிட்ட²ஹதி வா ஏத்த² பி⁴க்கு², குஸலத⁴ம்மா ஏவ வா ஏத்த² பதிட்ட²ஹந்தீதி பதிட்டா². அயமத்தோ² ‘‘ஸீலே பதிட்டா²ய நரோ ஸபஞ்ஞோ’’தி (ஸம். நி. 1.23, 192) ச ‘‘பதிட்டா², மஹாராஜ, ஸீலம் ஸப்³பே³ஸம் குஸலானம் த⁴ம்மான’’ந்தி (மி. ப. 2.1.9) ச ‘‘ஸீலே பதிட்டி²தஸ்ஸ கோ², மஹாராஜ, ஸப்³பே³ குஸலா த⁴ம்மா ந பரிஹாயந்தீ’’தி ச ஆதி³ஸுத்தவஸேன வேதி³தப்³போ³.

ததே³தம் புப்³பு³ப்பத்திஅத்தே²ன ஆதி³. வுத்தம்பி சேதம் –

‘‘தஸ்மாதிஹ த்வம், உத்திய, ஆதி³மேவ விஸோதே⁴ஹி குஸலேஸு த⁴ம்மேஸு. கோ சாதி³ குஸலானம் த⁴ம்மானம்? ஸீலஞ்ச ஸுவிஸுத்³த⁴ம் தி³ட்டி² ச உஜுகா’’தி (ஸம். நி. 5.382).

யதா² ஹி நக³ரவட்³ட⁴கீ நக³ரம் மாபேதுகாமோ பட²மம் நக³ரட்டா²னம் ஸோதே⁴தி, ததோ அபரபா⁴கே³ வீதி²சதுக்கஸிங்கா⁴டகாதி³பரிச்சே²தே³ன விப⁴ஜித்வா நக³ரம் மாபேதி, ஏவமேவ யோகா³வசரோ ஆதி³ம்ஹி ஸீலம் ஸோதே⁴தி, ததோ அபரபா⁴கே³ ஸமாதி⁴விபஸ்ஸனாமக்³க³ப²லனிப்³பா³னானி ஸச்சி²கரோதி. யதா² வா பன ரஜகோ பட²மம் தீஹி கா²ரேஹி வத்த²ம் தோ⁴வித்வா பரிஸுத்³தே⁴ வத்தே² யதி³ச்ச²கம் ரங்க³ஜாதம் உபனேதி, யதா² வா பன சே²கோ சித்தகாரோ ரூபம் லிகி²துகாமோ ஆதி³தோ பி⁴த்திபரிகம்மம் கரோதி, ததோ அபரபா⁴கே³ ரூபம் ஸமுட்டா²பேதி, ஏவமேவ யோகா³வசரோ ஆதி³தோவ ஸீலம் விஸோதே⁴த்வா அபரபா⁴கே³ ஸமத²விபஸ்ஸனாத³யோ த⁴ம்மே ஸச்சி²கரோதி. தஸ்மா ஸீலம் ‘‘ஆதீ³’’தி வுத்தம்.

ததே³தம் சரணஸரிக்க²தாய சரணம். ‘‘சரணா’’தி பாதா³ வுச்சந்தி. யதா² ஹி சி²ன்னசரணஸ்ஸ புரிஸஸ்ஸ தி³ஸம்க³மனாபி⁴ஸங்கா²ரோ ந ஜாயதி, பரிபுண்ணபாத³ஸ்ஸேவ ஜாயதி, ஏவமேவ யஸ்ஸ ஸீலம் பி⁴ன்னம் ஹோதி க²ண்ட³ம் அபரிபுண்ணம், தஸ்ஸ நிப்³பா³னக³மனாய ஞாணக³மனம் ந ஸம்பஜ்ஜதி. யஸ்ஸ பன தம் அபி⁴ன்னம் ஹோதி அக²ண்ட³ம் பரிபுண்ணம், தஸ்ஸ நிப்³பா³னக³மனாய ஞாணக³மனம் ஸம்பஜ்ஜதி. தஸ்மா ஸீலம் ‘‘சரண’’ந்தி வுத்தம்.

ததே³தம் ஸம்யமனவஸேன ஸம்யமோ, ஸம்வரணவஸேன ஸம்வரோதி உப⁴யேனபி ஸீலஸம்யமோ சேவ ஸீலஸம்வரோ ச கதி²தோ. வசனத்தோ² பனேத்த² ஸம்யமேதி வீதிக்கமவிப்ப²ந்த³னம், புக்³க³லம் வா ஸம்யமேதி வீதிக்கமவஸேன தஸ்ஸ விப்ப²ந்தி³தும் ந தே³தீதி ஸம்யமோ, வீதிக்கமஸ்ஸ பவேஸனத்³வாரம் ஸம்வரதி பித³ஹதீதி ஸம்வரோ. மோக்க²ந்தி உத்தமம் முக²பூ⁴தம் வா. யதா² ஹி ஸத்தானம் சதுப்³பி³தோ⁴ ஆஹாரோ முகே²ன பவிஸித்வா அங்க³மங்கா³னி ப²ரதி, ஏவம் யோகி³னோபி சதுபூ⁴மககுஸலம் ஸீலமுகே²ன பவிஸித்வா அத்த²ஸித்³தி⁴ம் ஸம்பாதே³தி. தேன வுத்தம் ‘‘மோக்க²’’ந்தி. பமுகே² ஸாதூ⁴தி பமோக்க²ம், புப்³ப³ங்க³மம் ஸேட்ட²ம் பதா⁴னந்தி அத்தோ². குஸலானம் த⁴ம்மானம் ஸமாபத்தியாதி சதுபூ⁴மககுஸலானம் படிலாப⁴த்தா²ய பமோக்க²ம் புப்³ப³ங்க³மம் ஸேட்ட²ம் பதா⁴னந்தி வேதி³தப்³ப³ம்.

காயிகோ அவீதிக்கமோதி திவித⁴ம் காயஸுசரிதம். வாசஸிகோதி சதுப்³பி³த⁴ம் வசீஸுசரிதம். காயிகவாசஸிகோதி தது³ப⁴யம். இமினா ஆஜீவட்ட²மகஸீலம் பரியாதா³ய த³ஸ்ஸேதி. ஸம்வுதோதி பிஹிதோ, ஸம்வுதிந்த்³ரியோ பிஹிதிந்த்³ரியோதி அத்தோ². யதா² ஹி ஸம்வுதத்³வாரம் கே³ஹம் ‘‘ஸம்வுதகே³ஹம் பிஹிதகே³ஹ’’ந்தி வுச்சதி, ஏவமித⁴ ஸம்வுதிந்த்³ரியோ ‘‘ஸம்வுதோ’’தி வுத்தோ. பாதிமோக்க²ஸம்வரேனாதி பாதிமோக்க²ஸங்கா²தேன ஸம்வரேன. உபேதோதிஆதீ³னி ஸப்³பா³னி அஞ்ஞமஞ்ஞவேவசனானி.

இரியதீதிஆதீ³ஹி ஸத்தஹிபி பதே³ஹி பாதிமோக்க²ஸம்வரஸீலே டி²தஸ்ஸ பி⁴க்கு²னோ இரியாபத²விஹாரோ கதி²தோ. தத்த² இரியதீதி சதுன்னம் இரியாபதா²னம் அஞ்ஞதரஸமங்கி³பா⁴வதோ இரியதி. தேஹி இரியாபத²சதுக்கேஹி காயஸகடவத்தனேன வத்ததி. ஏகம் இரியாபத²து³க்க²ம் அபரேன இரியாபதே²ன விச்சி²ந்தி³த்வா சிரட்டி²திபா⁴வேன ஸரீரரக்க²ணதோ பாலேதி. ஏகஸ்மிம் இரியாபதே² அஸண்ட²ஹித்வா ஸப்³ப³இரியாபதே² வத்தனதோ யபேதி. தேன தேன இரியாபதே²ன ததா² ததா² காயஸ்ஸ யாபனதோ யாபேதி. சிரகாலவத்தாபனதோ சரதி. இரியாபதே²ன இரியாபத²ம் விச்சி²ந்தி³த்வா ஜீவிதஹரணதோ விஹரதி.

மிச்சா²ஜீவபடிஸேத⁴கேனாதி –

‘‘இதே⁴கச்சோ வேளுதா³னேன வா பத்ததா³னேன வா புப்ப² ப²ல ஸினானத³ந்தகட்ட²தா³னேன வா சாடுகம்யதாய வா முக்³க³ஸூப்யதாய வா பாரிப⁴டயதாய வா ஜங்க⁴பேஸனிகேன வா அஞ்ஞதரஞ்ஞதரேன வா பு³த்³த⁴படிகுட்டே²ன மிச்சா²ஆஜீவேன ஜீவிகம் கப்பேதி, அயம் வுச்சதி அனாசாரோ’’தி (விப⁴. 513) –

ஏவம் வுத்தஅனாசாரஸங்கா²தமிச்சா²ஜீவபடிபக்கே²ன.

ந வேளுதா³னாதி³னா ஆசாரேனாதி –

‘‘இதே⁴கச்சோ ந வேளுதா³னேன ந பத்த ந புப்ப² ந ப²ல ந ஸினான ந த³ந்தகட்ட² ந சாடுகம்யதாய ந முக்³க³ஸூப்யதாய ந பாரிப⁴டயதாய ந ஜங்க⁴பேஸனிகேன ந அஞ்ஞதரஞ்ஞதரேன பு³த்³த⁴படிகுட்டே²ன மிச்சா²ஆஜீவேன ஜீவிகம் கப்பேதி, அயம் வுச்சதி ஆசாரோ’’தி (விப⁴. 513) –

ஏவம் வுத்தேன ந வேளுதா³னாதி³னா ஆசாரேன.

வேஸியாதி³அகோ³சரம் பஹாயாதி –

‘‘இதே⁴கச்சோ வேஸியகோ³சரோ வா ஹோதி வித⁴வ து²ல்லகுமாரி பண்ட³க பி⁴க்கு²னி பானாகா³ரகோ³சரோ வா, ஸம்ஸட்டோ² விஹரதி ராஜூஹி ராஜமஹாமத்தேஹி தித்தி²யேஹி தித்தி²யஸாவகேஹி அனனுலோமிகேன ஸம்ஸக்³கே³ன, யானி பன தானி குலானி அஸ்ஸத்³தா⁴னி அப்பஸன்னானி அனோபானபூ⁴தானி அக்கோஸகபரிபா⁴ஸகானி அனத்த²காமானி அஹிதகாமானி அபா²ஸுககாமானி அயோக³க்கே²மகாமானி பி⁴க்கூ²னம் பி⁴க்கு²னீனம் உபாஸகானம் உபாஸிகானம், ததா²ரூபானி குலானி ஸேவதி ப⁴ஜதி பயிருபாஸதி, அயம் வுச்சதி அகோ³சரோ’’தி (விப⁴. 514) –

ஏவமாக³தம் வேஸியாதி³அகோ³சரம் பஹாய.

ஸத்³தா⁴ஸம்பன்னகுலாதி³னாதி ஏத்த² ஆதி³-ஸத்³தே³ன உபனிஸ்ஸயகோ³சராதி³ம் ஸங்க³ண்ஹாதி. திவிதோ⁴ ஹி கோ³சரோ உபனிஸ்ஸயகோ³சரோ ஆரக்க²கோ³சரோ உபனிப³ந்த⁴கோ³சரோதி. கதமோ உபனிஸ்ஸயகோ³சரோ? த³ஸகதா²வத்து²கு³ணஸமன்னாக³தோ கல்யாணமித்தோ, யம் நிஸ்ஸாய அஸுதம் ஸுணாதி, ஸுதம் பரியோத³பேதி, கங்க²ம் விதரதி, தி³ட்டி²ம் உஜும் கரோதி, சித்தம் பஸாதே³தி. யஸ்ஸ வா பன அனுஸிக்க²மானோ ஸத்³தா⁴ய வட்³ட⁴தி, ஸீலேன ஸுதேன சாகே³ன பஞ்ஞாய வட்³ட⁴தி, அயம் உபனிஸ்ஸயகோ³சரோ. கதமோ ஆரக்க²கோ³சரோ? இத⁴ பி⁴க்கு² அந்தரக⁴ரம் பவிட்டோ² வீதி²ம் படிபன்னோ ஓக்கி²த்தசக்கு² யுக³மத்தத³ஸ்ஸாவீ ஸம்வுதோ க³ச்ச²தி, ந ஹத்தி²ம் ஓலோகேந்தோ, ந அஸ்ஸம், ந ரத²ம், ந பத்திம், ந இத்தி²ம், ந புரிஸம் ஓலோகேந்தோ, ந உத்³த⁴ம் ஓலோகேந்தோ, ந அதோ⁴ ஓலோகேந்தோ, ந தி³ஸாவிதி³ஸம் விபேக்க²மானோ க³ச்ச²தி, அயம் ஆரக்க²கோ³சரோ. கதமோ உபனிப³ந்த⁴கோ³சரோ? சத்தாரோ ஸதிபட்டா²னா, யத்த² சித்தம் உபனிப³ந்த⁴தி. வுத்தஞ்ஹேதம் ப⁴க³வதா ‘‘கோ ச, பி⁴க்க²வே, பி⁴க்கு²னோ கோ³சரோ ஸகோ பேத்திகோ விஸயோ? யதி³த³ம் சத்தாரோ ஸதிபட்டா²னா’’தி (ஸம். நி. 5.372), அயம் உபனிப³ந்த⁴கோ³சரோ. இதி அயம் திவிதோ⁴ கோ³சரோ இத⁴ ஆதி³-ஸத்³தே³ன ஸங்க³ஹிதோதி த³ட்ட²ப்³போ³.

அப்பமத்தகேஸு வஜ்ஜேஸூதி அஸஞ்சிச்ச ஆபன்னஸேகி²யஅகுஸலசித்துப்பாதா³தி³பே⁴தே³ஸு வஜ்ஜேஸு. ப⁴யதோ த³ஸ்ஸனஸீலோதி பரமாணுமத்தம் வஜ்ஜம் அட்ட²ஸட்டி²யோஜனஸதஸஹஸ்ஸுப்³பே³த⁴ஸினேருபப்³ப³தஸதி³ஸம் கத்வா த³ஸ்ஸனஸபா⁴வோ, ஸப்³ப³லஹுகம் வா து³ப்³பா⁴ஸிதமத்தம் பாராஜிகஸதி³ஸம் கத்வா த³ஸ்ஸனஸபா⁴வோ. ஸம்மா ஆதா³யாதி ஸம்மதே³வ ஸக்கச்சம் ஸப்³ப³ஸோ வா ஆதி³யித்வா.

வட்டது³க்க²னிஸ்ஸரணத்தி²கேஹி ஸோதப்³ப³தோ ஸுதம், பரியத்தித⁴ம்மோ. தம் தா⁴ரேதீதி ஸுதத⁴ரோ, ஸுதஸ்ஸ ஆதா⁴ரபூ⁴தோ. யஸ்ஸ ஹி இதோ க³ஹிதம் ஏத்தோ பலாயதி, சி²த்³த³க⁴டே உத³கம் விய ந திட்ட²தி, பரிஸமஜ்ஜே² ஏகம் ஸுத்தம் வா ஜாதகம் வா கதே²தும் வா வாசேதும் வா ந ஸக்கோதி, அயம் ந ஸுதத⁴ரோ நாம. யஸ்ஸ பன உக்³க³ஹிதம் பு³த்³த⁴வசனம் உக்³க³ஹிதகாலஸதி³ஸமேவ ஹோதி, த³ஸபி வீஸதிபி வஸ்ஸானி ஸஜ்ஜா²யம் அகரோந்தஸ்ஸ ந நஸ்ஸதி, அயம் ஸுதத⁴ரோ நாம. தேனேவாஹ ‘‘யத³ஸ்ஸ த’’ந்திஆதி³. ஏகபத³ம்பி ஏகக்க²ரம்பி அவினட்ட²ம் ஹுத்வா ஸன்னிசியதீதி ஸன்னிசயோ, ஸுதம் ஸன்னிசயோ ஏதஸ்மிந்தி ஸுதஸன்னிசயோதி ஆஹ ‘‘ஸுதம் ஸன்னிசிதம் அஸ்மிந்தி ஸுதஸன்னிசயோ’’தி. யஸ்ஸ ஹி ஸுதம் ஹத³யமஞ்ஜுஸாயம் ஸன்னிசிதம் ஸிலாய லேகா² விய ஸுவண்ணக⁴டே பக்கி²த்தா ஸீஹவஸா விய ச ஸாது⁴ திட்ட²தி, அயம் ஸுதஸன்னிசயோ நாம. தேனாஹ ‘‘ஏதேன…பே… அவினாஸம் த³ஸ்ஸேதீ’’தி.

தா⁴தாதி பகு³ணா வாசுக்³க³தா. ஏகஸ்ஸ ஹி உக்³க³ஹிதபு³த்³த⁴வசனம் நிச்சகாலிகம் ந ஹோதி, ‘‘அஸுகஸுத்தம் வா ஜாதகம் வா கதே²ஹீ’’தி வுத்தே ‘‘ஸஜ்ஜா²யித்வா அஞ்ஞேஹி ஸம்ஸந்தி³த்வா பரிபுச்சா²வஸேன அத்த²ம் ஓகா³ஹித்வா ஜானிஸ்ஸாமீ’’தி வத³தி. ஏகஸ்ஸ பகு³ணம் பப³ந்த⁴விச்சே²தா³பா⁴வதோ க³ங்கா³ஸோதஸதி³ஸம் ப⁴வங்க³ஸோதஸதி³ஸஞ்ச அகித்திமம் ஸுக²ப்பவத்தி ஹோதி, ‘‘அஸுகஸுத்தம் வா ஜாதகம் வா கதே²ஹீ’’தி வுத்தே உத்³த⁴ரித்வா தமேவ கதே²தி. தம் ஸந்தா⁴ய வுத்தம் ‘‘தா⁴தா’’தி. வாசாய பகு³ணா கதாதி ஸுத்தத³ஸகவக்³க³த³ஸகபண்ணாஸத³ஸகவஸேன வாசாய ஸஜ்ஜா²யிதா, த³ஸ ஸுத்தானி க³தானி, த³ஸ வக்³கா³னி க³தானீதிஆதி³னா ஸல்லக்கே²த்வா வாசாய ஸஜ்ஜா²யிதாதி அத்தோ². ஸுத்தேகதே³ஸஸ்ஸ ஹி ஸுத்தமத்தஸ்ஸ ச வசஸா பரிசயோ இத⁴ நாதி⁴ப்பேதோ, அத² கோ² வக்³கா³தி³வஸேனேவ. மனஸா அனுபேக்கி²தாதி மனஸா அனு அனு பேக்கி²தா, பா⁴க³ஸோ நிஜ்ஜா²யிதா சிந்திதாதி அத்தோ². ஆவஜ்ஜந்தஸ்ஸாதி வாசாய ஸஜ்ஜா²யிதும் பு³த்³த⁴வசனம் மனஸா சிந்தேந்தஸ்ஸ. ஸுட்டு² படிவித்³தா⁴தி நிஜ்ஜடம் நிக்³கு³ம்ப³ம் கத்வா ஸுட்டு² யாதா²வதோ படிவித்³தா⁴.

த்³வே மாதிகாதி பி⁴க்கு²மாதிகா பி⁴க்கு²னீமாதிகா ச. வாசுக்³க³தாதி புரிமஸ்ஸேவ வேவசனம். திஸ்ஸோ அனுமோத³னாதி ஸங்க⁴ப⁴த்தே தா³னானிஸம்ஸபடிஸம்யுத்தஅனுமோத³னா, விஹாராதி³மங்க³லே மங்க³லஸுத்தாதி³அனுமோத³னா, மதகப⁴த்தாதி³அவமங்க³லே திரோகுட்டாதி³அனுமோத³னாதி இமா திஸ்ஸோ அனுமோத³னா. கம்மாகம்மவினிச்ச²யோதி பரிவாராவஸானே கம்மவக்³கே³ வுத்தவினிச்ச²யோ. ‘‘விபஸ்ஸனாவஸேன உக்³க³ண்ஹந்தேன சதுதா⁴துவவத்தா²னமுகே²ன உக்³க³ஹேதப்³ப³’’ந்தி தீஸுபி க³ண்டி²பதே³ஸு வுத்தம். சதூஸு தி³ஸாஸு அப்படிஹதத்தா சதஸ்ஸோ தி³ஸா ஏதஸ்ஸாதி சதுத்³தி³ஸோ, சதுத்³தி³ஸோயேவ சாதுத்³தி³ஸோ, சதஸ்ஸோ வா தி³ஸா அரஹதி, சதூஸு வா தி³ஸாஸு ஸாதூ⁴தி சாதுத்³தி³ஸோ.

அபி⁴வினயேதி ஸகலே வினயபிடகே. வினேதுந்தி ஸிக்கா²பேதும். ‘‘த்³வே விப⁴ங்கா³ பகு³ணா வாசுக்³க³தா காதப்³பா³தி இத³ம் பரிபுச்சா²வஸேன உக்³க³ஹணம்பி ஸந்தா⁴ய வுத்த’’ந்தி வத³ந்தி. ஏகஸ்ஸ பமுட்ட²ம், இதரஸ்ஸ பகு³ணம் ஹோதீதி ஆஹ ‘‘தீஹி ஜனேஹி ஸத்³தி⁴ம் பரிவத்தனக்க²மா காதப்³பா³’’தி. அபி⁴த⁴ம்மேதி நாமரூபபரிச்சே²தே³. ஹேட்டி²மா வா தயோ வக்³கா³தி மஹாவக்³க³தோ ஹேட்டா² ஸகா³த²கவக்³கோ³ நிதா³னவக்³கோ³ க²ந்த⁴கவக்³கோ³தி இமே தயோ வக்³கா³. ‘‘த⁴ம்மபத³ம்பி ஸஹ வத்து²னா உக்³க³ஹேதும் வட்டதீ’’தி மஹாபச்சரியம் வுத்தத்தா ஜாதகபா⁴ணகேன ஸாட்ட²கத²ம் ஜாதகம் உக்³க³ஹேத்வாபி த⁴ம்மபத³ம்பி ஸஹ வத்து²னா உக்³க³ஹேதப்³ப³மேவ.

கல்யாணா ஸுந்த³ரா பரிமண்ட³லபத³ப்³யஞ்ஜனா வாசா அஸ்ஸாதி கல்யாணவாசோ. தேனாஹ ‘‘ஸிதி²லத⁴னிதாதீ³னம்…பே… வாசாய ஸமன்னாக³தோ’’தி. தத்த² பரிமண்ட³லபத³ப்³யஞ்ஜனாயாதி டா²னகரணஸம்பத்தியா ஸிக்கா²ஸம்பத்தியா ச கத்த²சிபி அனூனதாய பரிமண்ட³லபதா³னி ப்³யஞ்ஜனானி அக்க²ரானி ஏதிஸ்ஸாதி பரிமண்ட³லபத³ப்³யஞ்ஜனா, பத³மேவ வா அத்த²ஸ்ஸ ப்³யஞ்ஜனதோ பத³ப்³யஞ்ஜனம், தம் அக்க²ரபாரிபூரிம் கத்வா ஸிதி²லத⁴னிதாதி³த³ஸவித⁴ம் ப்³யஞ்ஜனபு³த்³தி⁴ம் அபரிஹாபேத்வா வுத்தம் பரிமண்ட³லம் நாம ஹோதி. அக்க²ரபாரிபூரியா ஹி பத³ப்³யஞ்ஜனஸ்ஸ பரிமண்ட³லதா. தேன வுத்தம் ‘‘ஸிதி²லத⁴னிதாதீ³னம் யதா²விதா⁴னவசனேனா’’தி, பரிமண்ட³லம் பத³ப்³யஞ்ஜனம் ஏதிஸ்ஸாதி பரிமண்ட³லபத³ப்³யஞ்ஜனா. அத² வா பஜ்ஜதி ஞாயதி அத்தோ² ஏதேனாதி பத³ம், நாமாதி³. யதா²தி⁴ப்பேதமத்த²ம் ப்³யஞ்ஜேதீதி ப்³யஞ்ஜனம், வாக்யம். தேஸம் பரிபுண்ணதாய பரிமண்ட³லபத³ப்³யஞ்ஜனா.

அபிச யோ பி⁴க்கு² பரிஸதி த⁴ம்மம் தே³ஸேந்தோ ஸுத்தம் வா ஜாதகம் வா நிக்கி²பித்வா அஞ்ஞம் உபாரம்ப⁴கரம் ஸுத்தம் ஆஹரதி, தஸ்ஸ உபமம் கதே²தி, தத³த்த²ம் ஓதாரேதி, ஏவம் இத³ம் க³ஹேத்வா ஏத்த² கி²பந்தோ ஏகபஸ்ஸேனேவ பரிஹரந்தோ காலம் ஞத்வா வுட்ட²ஹதி, நிக்கி²த்தஸுத்தம் பன நிக்கி²த்தமத்தமேவ ஹோதி, தஸ்ஸ கதா² அபரிமண்ட³லா நாம ஹோதி அத்த²ஸ்ஸ அபரிபுண்ணபா⁴வதோ. யோ பன ஸுத்தம் வா ஜாதகம் வா நிக்கி²பித்வா ப³ஹி ஏகபத³ம்பி அக³ந்த்வா யதா²னிக்கி²த்தஸ்ஸ ஸுத்தஸ்ஸ அத்த²ஸம்வண்ணனாவஸேனேவ ஸுத்தந்தரம்பி ஆனேந்தோ பாளியா அனுஸந்தி⁴ஞ்ச புப்³பா³பரஞ்ச அபேக்க²ந்தோ ஆசரியேஹி தி³ன்னனயே ட²த்வா துலிகாய பரிச்சி²ந்த³ந்தோ விய தம் தம் அத்த²ம் ஸுவவத்தி²தம் கத்வா த³ஸ்ஸேந்தோ க³ம்பீ⁴ரமாதிகாய உத³கம் பேஸேந்தோ விய க³ம்பீ⁴ரமத்த²ம் க³மேந்தோ வக்³கி³ஹாரிக³தியா பதே³ பத³ம் கோட்டேந்தோ ஸிந்த⁴வாஜானீயோ விய ஏகம்யேவ பத³ம் அனேகேஹி பரியாயேஹி புனப்புனம் ஸம்வண்ணந்தோ க³ச்ச²தி, தஸ்ஸ கதா² பரிமண்ட³லா நாம ஹோதி த⁴ம்மதோ அத்த²தோ அனுஸந்தி⁴தோ புப்³பா³பரதோ ஆசரியுக்³க³ஹதோதி ஸப்³ப³ஸோ பரிபுண்ணபா⁴வதோ. ஏவரூபம்பி கத²ம் ஸந்தா⁴ய ‘‘பரிமண்ட³லபத³ப்³யஞ்ஜனாயா’’தி வுத்தம்.

கு³ணபரிபுண்ணபா⁴வேன புரே ப⁴வாதி போரீ, தஸ்ஸ பி⁴க்கு²னோ தேனேதம் பா⁴ஸிதப்³ப³ம் அத்த²ஸ்ஸ கு³ணபரிபுண்ணபா⁴வேன புரே புண்ணபா⁴வே ப⁴வாதி அத்தோ². புரே வா ப⁴வத்தா போரியா நாக³ரிகித்தி²யா ஸுகு²மாலத்தனேன ஸதி³ஸாதி போரீ, புரே ஸம்வட்³ட⁴னாரீ விய ஸுகுமாராதி அத்தோ². புரஸ்ஸ ஏஸாதிபி போரீ, புரஸ்ஸ ஏஸாதி நக³ரவாஸீனம் கதா²தி அத்தோ². நக³ரவாஸினோ ஹி யுத்தகதா² ஹோந்தி பிதிமத்தம் ‘‘பிதா’’தி, பா⁴திமத்தம் ‘‘பா⁴தா’’தி வத³ந்தி. ஏவரூபீ ஹி கதா² ப³ஹுனோ ஜனஸ்ஸ கந்தா ஹோதி மனாபா, தாய போரியா.

விஸ்ஸட்டா²யாதி பித்தஸேம்ஹாதீ³ஹி அபலிபு³த்³தா⁴ய ஸந்தி³ட்ட²விலம்பி³தாதி³தோ³ஸரஹிதாய. அத² வா நாதிஸீக⁴ம் நாதிஸணிகம் நிரந்தரம் ஏகரஸஞ்ச கத்வா பரிஸாய அஜ்ஜா²ஸயானுரூபம் த⁴ம்மம் கதே²ந்தஸ்ஸ வாசா விஸ்ஸட்டா² நாம. யோ ஹி பி⁴க்கு² த⁴ம்மம் கதே²ந்தோ ஸுத்தம் வா ஜாதகம் வா ஆரபி⁴த்வா ஆரத்³த⁴காலதோ பட்டா²ய துரிததுரிதோ அரணிம் மந்தே²ந்தோ விய உண்ஹகா²த³னீயம் கா²த³ந்தோ விய பாளியா அனுஸந்தி⁴புப்³பா³பரேஸு க³ஹிதம் க³ஹிதமேவ, அக்³க³ஹிதம் அக்³க³ஹிதமேவ கத்வா புராணபண்ணந்தரேஸு சரமானம் கோ³த⁴ம் உட்டா²பேந்தோ விய தத்த² தத்த² பஹரந்தோ ஓஸாபேத்வா உட்டா²ய க³ச்ச²தி. புராணபண்ணந்தரேஸு ஹி பரிபாதியமானா கோ³தா⁴ கதா³சி தி³ஸ்ஸதி கதா³சி ந தி³ஸ்ஸதி, ஏவமேகச்சஸ்ஸ அத்த²வண்ணனா கத்த²சி தி³ஸ்ஸதி கத்த²சி ந தி³ஸ்ஸதி. யோபி த⁴ம்மம் கதே²ந்தோ காலேன ஸீக⁴ம், காலேன ஸணிகம், காலேன மந்த³ம், காலேன மஹாஸத்³த³ம், காலேன கு²த்³த³கஸத்³த³ம் கரோதி, யதா² நிஜ்ஜா²மதண்ஹிகபேதஸ்ஸ முக²தோ நிச்ச²ரணகஅக்³கி³ காலேன ஜலதி காலேன நிப்³பா³யதி, ஏவம் பேதத⁴ம்மகதி²கோ நாம ஹோதி, பரிஸாய உட்டா²துகாமாய புன ஆரப⁴தி. யோபி கதே²ந்தோ தத்த² தத்த² வித்தா²யதி, அப்படிபா⁴னதாய ஆபஜ்ஜதி, கேனசி ரோகே³ன நித்து²னந்தோ விய கந்த³ந்தோ விய கதே²தி, இமேஸம் ஸப்³பே³ஸம்பி கதா² விஸ்ஸட்டா² நாம ந ஹோதி ஸுகே²ன அப்பவத்தபா⁴வதோ. யோ பன ஸுத்தம் ஆஹரித்வா ஆசரியேஹி தி³ன்னனயே டி²தோ ஆசரியுக்³க³ஹம் அமுஞ்சந்தோ யதா² ச ஆசரியா தம் தம் ஸுத்தம் ஸம்வண்ணேஸும், தேனேவ நயேன ஸம்வண்ணேந்தோ நாதிஸீக⁴ம் நாதிஸணிகந்திஆதி³னா வுத்தனயேன கதா²பப³ந்த⁴ம் அவிச்சி²ன்னம் கத்வா நதீ³ஸோதோ விய பவத்தேதி, ஆகாஸக³ங்கா³தோ ப⁴ஸ்ஸமானஉத³கம் விய நிரந்தரகத²ம் பவத்தேதி, தஸ்ஸ கதா² விஸ்ஸட்டா² நாம ஹோதி. தம் ஸந்தா⁴ய வுத்தம் ‘‘விஸ்ஸட்டா²யா’’தி.

அனேலக³ளாயாதி ஏலக³ளவிரஹிதாய. கஸ்ஸசி ஹி கதே²ந்தஸ்ஸ ஏலம் க³ளதி, லாலா பக்³க⁴ரதி, கே²ளபு²ஸிதானி வா நிக்க²மந்தி, தஸ்ஸ வாசா ஏலக³ளா நாம ஹோதி, தப்³பி³பரீதாயாதி அத்தோ². அத்த²ஸ்ஸ விஞ்ஞாபனியாதி ஆதி³மஜ்ஜ²பரியோஸானம் பாகடம் கத்வா பா⁴ஸிதத்த²ஸ்ஸ விஞ்ஞாபனஸமத்த²தாய அத்த²ஞாபனே ஸாத⁴னாய.

வாசாவ கரணந்தி வாக்கரணம், உதா³ஹாரகோ⁴ஸோ. கல்யாணம் மது⁴ரம் வாக்கரணம் அஸ்ஸாதி கல்யாணவாக்கரணோ. தேனேவாஹ ‘‘மது⁴ரஸ்ஸரோ’’தி. ஹீளேதீதி அவஜானாதி. மாதுகா³மோதி ஸம்ப³ந்தோ⁴. மனம் அபாயதி வட்³டே⁴தீதி மனாபோ. தேனாஹ ‘‘மனவட்³ட⁴னகோ’’தி. வட்டப⁴யேன தஜ்ஜேத்வாதி யோப்³ப³னமதா³தி³மத்தா பி⁴க்கு²னியோ ஸம்ஸாரப⁴யேன தாஸேத்வா. கி³ஹிகாலேதி அத்தனோ கி³ஹிகாலே. பி⁴க்கு²னியா மேது²னேன பி⁴க்கு²னீதூ³ஸகோ ஹோதீதி பி⁴க்கு²னியா காயஸம்ஸக்³க³மேவ வத³தி. ஸிக்க²மானாஸாமணேரீஸு பன மேது²னேனபி பி⁴க்கு²னீதூ³ஸகோ ந ஹோதீதி ஆஹ ‘‘ஸிக்க²மானாஸாமணேரீஸு மேது²னத⁴ம்ம’’ந்தி. ‘‘காஸாயவத்த²வஸனாயா’’தி வசனதோ து³ஸ்ஸீலாஸு பி⁴க்கு²னீஸிக்க²மானாஸாமணேரீஸு க³ருத⁴ம்மம் அஜ்ஜா²பன்னபுப்³போ³ படிக்கி²த்தோயேவாதி த³ட்ட²ப்³ப³ம். தஸ்ஸா பி⁴க்கு²னியா அபா⁴வேபி யா யா தஸ்ஸா வசனம் அஸ்ஸோஸும், தா தா ததே²வ மஞ்ஞந்தீதி ஆஹ ‘‘மாதுகா³மோ ஹீ’’திஆதி³.

இதா³னி அட்ட² அங்கா³னி ஸமோதா⁴னேத்வா த³ஸ்ஸேதும் ‘‘ஏத்த² சா’’திஆதி³ ஆரத்³த⁴ம். இமேஹி பன அட்ட²ஹங்கே³ஹி அஸமன்னாக³தம் ஞத்திசதுத்தே²ன கம்மேன ஸம்மன்னேந்தோ து³க்கடம் ஆபஜ்ஜதி, பி⁴க்கு² பன ஸம்மதோயேவ ஹோதி.

148. க³ருகேஹீதி க³ருகாதப்³பே³ஹி. ஏகதோஉபஸம்பன்னாயாதி உபயோக³த்தே² பு⁴ம்மவசனம். ‘‘ஓவத³தீ’’தி வா இமஸ்ஸ ‘‘வத³தீ’’தி அத்தே² ஸதி ஸம்பதா³னவசனம்பி யுஜ்ஜதி. பி⁴க்கூ²னம் ஸந்திகே உபஸம்பன்னா நாம பரிவத்தலிங்கா³ வா பஞ்சஸதஸாகியானியோ வா.

149. ஆஸனம் பஞ்ஞபேத்வாதி ஏத்த² ‘‘ஸசே பூ⁴மி மனாபா ஹோதி, ஆஸனம் அபஞ்ஞாபேதும்பி வட்டதீ’’தி தீஸுபி க³ண்டி²பதே³ஸு வுத்தம். மாதுகா³மக்³க³ஹணேன பி⁴க்கு²னீபி ஸங்க³ஹிதாதி ஆஹ ‘‘த⁴ம்மதே³ஸனாபத்திமோசனத்த²’’ந்தி. ஸம்மதஸ்ஸ பி⁴க்கு²னோ ஸந்திகம் பாடிபதே³ ஓவாத³த்தா²ய ஸப்³பா³ஹி பி⁴க்கு²னீஹி ஆக³ந்தப்³ப³தோ ‘‘ஸமக்³கா³த்த² ப⁴கி³னியோ’’தி இமினா ஸப்³பா³ஸம் ஆக³மனம் புச்ச²தீதி ஆஹ ‘‘ஸப்³பா³ ஆக³தாத்தா²’’தி. கி³லானாஸு அனாக³தாஸுபி கி³லானானம் அனாக³மனஸ்ஸ அனுஞ்ஞாதத்தா ஆக³ந்தும் ஸமத்தா²ஹி ச ஸப்³பா³ஹி ஆக³தத்தா ‘‘ஸமக்³கா³ம்ஹய்யா’’தி வத்தும் வட்டதி. அந்தோகா³மே வாதிஆதீ³ஸு யத்த² பஞ்ச அங்கா³னி பூ⁴மியம் பதிட்டா²பேத்வா வந்தி³தும் ந ஸக்கா ஹோதி, தத்த² டி²தாய ஏவ காயம் புரதோ நாமேத்வா ‘‘வந்தா³மி அய்யா’’தி அஞ்ஜலிம் பக்³க³ய்ஹ க³ந்தும்பி வட்டதி. அந்தரக⁴ரந்தி கத்த²சி நக³ரத்³வாரஸ்ஸ ப³ஹிஇந்த³கீ²லதோ பட்டா²ய அந்தோகா³மோ வுச்சதி, கத்த²சி க⁴ரும்மாரதோ பட்டா²ய அந்தோகே³ஹம். இத⁴ பன ‘‘அந்தோகா³மே வா’’தி விஸும் வுத்தத்தா ‘‘அந்தரக⁴ரே வா’’தி அந்தோகே³ஹம் ஸந்தா⁴ய வுத்தந்தி த³ட்ட²ப்³ப³ம். யத்த² கத்த²சீதி அந்தோகா³மாதீ³ஸு யத்த² கத்த²சி.

வட்டதீதி ‘‘வஸத² அய்யே, மயம் பி⁴க்கூ² ஆனேஸ்ஸாமா’’தி வுத்தவசனம் ஸத்³த³ஹந்தீஹி வஸிதும் வட்டதி. ந நிமந்திதா ஹுத்வா க³ந்துகாமாதி மனுஸ்ஸேஹி நிமந்திதா ஹுத்வா க³ந்துகாமா ந ஹோந்தீதி அத்தோ², தத்தே²வ வஸ்ஸம் உபக³ந்துகாமா ஹோந்தீதி அதி⁴ப்பாயோ. யதோதி பி⁴க்கு²னுபஸ்ஸயதோ. யாசித்வாதி ‘‘தும்ஹேஹி ஆனீதஓவாதே³னேவ மயம்பி வஸிஸ்ஸாமா’’தி யாசித்வா. தத்தா²தி தஸ்மிம் பி⁴க்கு²னுபஸ்ஸயே. ஆக³தானம் ஸந்திகே ஓவாதே³ன வஸிதப்³ப³ந்தி பச்சி²மிகாய வஸ்ஸம் வஸிதப்³ப³ம். அபி⁴க்கு²காவாஸே வஸந்தியா ஆபத்தீதி சோத³னாமுகே²ன ஸாமஞ்ஞதோ ஆபத்திப்பஸங்க³ம் வத³தி, ந பன தஸ்ஸா ஆபத்தி. வஸ்ஸச்சே²த³ம் கத்வா க³ச்ச²ந்தியாபி ஆபத்தீதி வஸ்ஸானுபக³மமூலம் ஆபத்திம் வத³தி. இதராய ஆபத்தியா அனாபத்திகாரணஸப்³பா⁴வதோ ‘‘ஸா ரக்கி²தப்³பா³’’தி வுத்தம், ஸா வஸ்ஸானுபக³மமூலா ஆபத்தி ரக்கி²தப்³பா³தி அத்தோ², அபி⁴க்கு²கேபி ஆவாஸே ஈதி³ஸாஸு ஆபதா³ஸு வஸ்ஸம் உபக³ந்தப்³ப³ந்தி அதி⁴ப்பாயோ. தேனாஹ ‘‘ஆபதா³ஸு ஹி…பே… அனாபத்தி வுத்தா’’தி. இதராய பன ஆபத்தியா அனாபத்தி, காரணே அஸதி பச்சி²மிகாயபி வஸ்ஸம் ந உபக³ந்தப்³ப³ம். ஸந்தேஸு ஹி பி⁴க்கூ²ஸு வஸ்ஸம் அனுபக³ச்ச²ந்தியா ஆபத்தி. தத்த² க³ந்த்வா பவாரேதப்³ப³ந்தி ஏத்த² அபவாரேந்தீனம் ஆபத்திஸம்ப⁴வதோ. ஸசே தூ³ரேபி பி⁴க்கூ²னம் வஸனட்டா²னம் ஹோதி, ஸக்கா ச ஹோதி நவமியம் க³ந்த்வா பவாரேதும், தத்த² க³ந்த்வா பவாரேதப்³ப³ம். ஸசே பன நவமியம் நிக்க²மித்வா ஸம்பாபுணிதும் ந ஸக்கா ஹோதி, அக³ச்ச²ந்தீனம் அனாபத்தி.

உபோஸத²ஸ்ஸ புச்ச²னம் உபோஸத²புச்சா², ஸாயேவ க-ப்பச்சயம் ரஸ்ஸத்தஞ்ச கத்வா உபோஸத²புச்ச²கந்தி வுத்தாதி ஆஹ ‘‘உபோஸத²புச்ச²ன’’ந்தி. உபோஸதோ² புச்சி²தப்³போ³தி ‘‘கதா³, அய்ய, உபோஸதோ²’’தி புச்சி²தப்³போ³. பி⁴க்கு²னாபி ‘‘ஸ்வே, ப⁴கி³னி, உபோஸதோ²’’தி வத்தப்³ப³ம். பி⁴க்கூ² கதா³சி கேனசி காரணேன பன்னரஸிகம் வா சாதுத்³த³ஸீஉபோஸத²ம், சாதுத்³த³ஸிகம் வா பன்னரஸீஉபோஸத²ம் கரோந்தி, யஸ்மிஞ்ச தி³வஸே பி⁴க்கூ²ஹி உபோஸதோ² கதோ, தஸ்மிம்யேவ பி⁴க்கு²னீஹிபி உபோஸதோ² காதப்³போ³தி அதி⁴ப்பாயேன ‘‘பக்க²ஸ்ஸ தேரஸியம்யேவ க³ந்த்வா’’திஆதி³ வுத்தம். ஏவம் புச்சி²தேன பி⁴க்கு²னா ஸசே சாதுத்³த³ஸியம் உபோஸத²ம் கரோந்தி, ‘‘சாதுத்³த³ஸிகோ ப⁴கி³னீ’’தி வத்தப்³ப³ம். ஸசே பன பன்னரஸியம் கரோந்தி, ‘‘பன்னரஸிகோ ப⁴கி³னீ’’தி ஆசிக்கி²தப்³ப³ம். ஓவாத³த்தா²யாதி ஓவாத³யாசனத்தா²ய. பாடிபத³தி³வஸதோ பன பட்டா²ய த⁴ம்மஸவனத்தா²ய க³ந்தப்³ப³ந்தி பாடிபத³தி³வஸே ஓவாத³க்³க³ஹணத்தா²ய து³தியதி³வஸதோ பட்டா²ய அந்தரந்தரா த⁴ம்மஸவனத்தா²ய க³ந்தப்³ப³ம். ஓவாத³க்³க³ஹணம்பி ஹி ‘‘த⁴ம்மஸவனமேவா’’தி அபே⁴தே³ன வுத்தம். நிரந்தரம் விஹாரம் உபஸங்கமிம்ஸூதி யேபு⁴ய்யேன உபஸங்கமனம் ஸந்தா⁴ய வுத்தம். வுத்தஞ்ஹேதந்திஆதி³னா யதா²னுஸிட்ட²ம் படிபஜ்ஜிஸ்ஸாமாதி ஸப்³பா³ஸம்யேவ பி⁴க்கு²னீனம் உபஸங்கமனதீ³பனத்த²ம் பாளி நித³ஸ்ஸிதா. ஓவாத³ம் க³ச்ச²தீதி ஓவாத³ம் யாசிதும் க³ச்ச²தி. த்³வே திஸ்ஸோதி த்³வீஹி தீஹி. கரணத்தே² சேதம் பச்சத்தவசனம்.

பாஸாதி³கேனாதி பஸாத³ஜனகேன நித்³தோ³ஸேன காயகம்மாதி³னா. ஸம்பாதே³தூதி திவித⁴ம் ஸிக்க²ம் ஸம்பாதே³து. ஸசே பாதிமோக்கு²த்³தே³ஸகம்யேவ தி³ஸ்வா தாஹி பி⁴க்கு²னீஹி ஓவாதோ³ யாசிதோ ப⁴வேய்ய, தேன கிம் காதப்³ப³ந்தி? உபோஸத²க்³கே³ ஸன்னிபதிதே பி⁴க்கு²ஸங்கே⁴ புப்³ப³கிச்சவஸேன ‘‘அத்தி² காசி பி⁴க்கு²னியோ ஓவாத³ம் யாசமானா’’தி புச்சி²யமானே ‘‘ஏவம் வதே³ஹீ’’தி ஓவாத³படிக்³கா³ஹகேன வத்தப்³ப³வசனம் அஞ்ஞேன பி⁴க்கு²னா கதா²பேத்வா பாதிமோக்கு²த்³தே³ஸகேன வத்தப்³ப³வசனம் அத்தனா வத்வா புன ஸயமேவ க³ந்த்வா பி⁴க்கு²னீனம் ஆரோசேதப்³ப³ம், அஞ்ஞேன வா பி⁴க்கு²னா தஸ்மிம் தி³வஸே பாதிமோக்க²ம் உத்³தி³ஸாபேதப்³ப³ம். ஏதம் வுத்தந்தி ‘‘தாஹீ’’தி ஏதம் ப³ஹுவசனம் வுத்தம்.

ஏகா பி⁴க்கு²னீ வாதி இத³ம் ப³ஹூஹி பி⁴க்கு²னுபஸ்ஸயேஹி ஏகாய ஏவ பி⁴க்கு²னியா ஸாஸனபடிக்³க³ஹணம் ஸந்தா⁴ய வுத்தம், ந பன து³தியிகாய அபா⁴வம் ஸந்தா⁴ய. ப³ஹூஹி பி⁴க்கு²னுபஸ்ஸயேஹீதி அந்தராமக்³கே³ வா தஸ்மிம்யேவ வா கா³மே ப³ஹூஹி பி⁴க்கு²னுபஸ்ஸயேஹி. ‘‘பி⁴க்கு²னிஸங்கோ⁴ ச அய்ய பி⁴க்கு²னியோ ச பி⁴க்கு²னீ சா’’தி இமினா நானாஉபஸ்ஸயேஹி ஸாஸனம் க³ஹேத்வா ஆக³தபி⁴க்கு²னியா வத்தப்³ப³வசனம் த³ஸ்ஸேதி. இத³ஞ்ச ஏகேன பகாரேன முக²மத்தனித³ஸ்ஸனத்த²ம் வுத்தம், தஸ்மிம் தஸ்மிம் பன பி⁴க்கு²னுபஸ்ஸயே பி⁴க்கு²னீனம் பமாணம் ஸல்லக்கே²த்வா தத³னுரூபேன நயேன வத்தப்³ப³ம். பி⁴க்கு²ஸங்க⁴ஸ்ஸ அய்யானம் அய்யஸ்ஸாதி இத³ம் ஸங்கி²பித்வா வுத்தம்.

பாதிமோக்கு²த்³தே³ஸகேனபீதி இத³ம் ஸங்கு⁴போஸத²வஸேனேவ த³ஸ்ஸிதம். யத்த² பன திண்ணம் த்³வின்னம் வா வஸனட்டா²னே பாதிமோக்கு²த்³தே³ஸோ நத்தி², தத்தா²பி ஞத்திட²பனகேன இதரேன வா பி⁴க்கு²னா இமினாவ நயேன வத்தப்³ப³ம். ஏகபுக்³க³லேனபி உபோஸத²தி³வஸே ஓவாத³யாசனம் ஸம்படிச்சி²த்வா பாடிபதே³ ஆக³தானம் பி⁴க்கு²னீனம் ‘‘நத்தி² கோசீ’’திஆதி³ வத்தப்³ப³மேவ. ஸசே ஸயமேவ, ‘‘ஸம்மதோ அஹ’’ந்தி வத்தப்³ப³ம். இமம் விதி⁴ம் அஜானந்தோ இத⁴ பா³லோதி அதி⁴ப்பேதோ.

150. அத⁴ம்மகம்மே அத⁴ம்மகம்மஸஞ்ஞீ வக்³க³ம் பி⁴க்கு²னிஸங்க⁴ம் வக்³க³ஸஞ்ஞீ ஓவத³தி, ஆபத்தி பாசித்தியஸ்ஸாதிஆதீ³ஸு விஜ்ஜமானேஸுபி வக்³கா³தி³பா⁴வனிமித்தேஸு து³க்கடேஸு அத⁴ம்மகம்மமூலகம் பாசித்தியமேவ பாளியம் ஸப்³ப³த்த² வுத்தந்தி ஆஹ ‘‘அத⁴ம்மகம்மே த்³வின்னம் நவகானம் வஸேன அட்டா²ரஸ பாசித்தியானீ’’தி. ஸேஸமேத்த² உத்தானமேவ. அஸம்மததா, பி⁴க்கு²னியா பரிபுண்ணூபஸம்பன்னதா, ஓவாத³வஸேன அட்ட²க³ருத⁴ம்மப⁴ணனந்தி இமானி பனேத்த² தீணி அங்கா³னி.

ஓவாத³ஸிக்கா²பத³வண்ணனா நிட்டி²தா.

2. அத்த²ங்க³தஸிக்கா²பத³வண்ணனா

153. து³தியே குஸலானம் த⁴ம்மானம் ஸாதச்சகிரியாயாதி புப்³ப³பா⁴க³ப்படிபத்திவஸேன வுத்தம். முனாதீதி ஜானாதி. தேன ஞாணேனாதி தேன அரஹத்தப²லபஞ்ஞாஸங்கா²தேன ஞாணேன. பதே²ஸூதி உபாயமக்³கே³ஸு. அரஹதோ பரினிட்டி²தஸிக்க²த்தா ஆஹ ‘‘இத³ஞ்ச…பே… வுத்த’’ந்தி. அத² வா ‘‘அப்பமஜ்ஜதோ ஸிக்க²தோ’’தி இமேஸம் பதா³னம் ஹேதுஅத்த²தா த³ட்ட²ப்³பா³, தஸ்மா அப்பமஜ்ஜனஹேது ஸிக்க²னஹேது ச அதி⁴சேதஸோதி அத்தோ². ஸோகாதி சித்தஸந்தாபா. ஏத்த² ச அதி⁴சேதஸோதி இமினா அதி⁴சித்தஸிக்கா², அப்பமஜ்ஜதோதி இமினா அதி⁴ஸீலஸிக்கா², முனினோ மோனபதே²ஸு ஸிக்க²தோதி ஏதேஹி அதி⁴பஞ்ஞாஸிக்கா², முனினோதி வா ஏதேன அதி⁴பஞ்ஞாஸிக்கா², மோனபதே²ஸு ஸிக்க²தோதி ஏதேன தாஸம் லோகுத்தரஸிக்கா²னம் புப்³ப³பா⁴க³ப்படிபதா³, ஸோகா ந ப⁴வந்தீதிஆதீ³ஹி ஸிக்கா²பாரிபூரியா ஆனிஸம்ஸா பகாஸிதாதி வேதி³தப்³ப³ம்.

கோகனுத³ந்தி பது³மவிஸேஸனம் யதா² ‘‘கோகாஸய’’ந்தி, தம் கிர ப³ஹுபத்தம் வண்ணஸம்பன்னம் அதிவிய ஸுக³ந்த⁴ஞ்ச ஹோதி. ‘‘கோகனுத³ம் நாம ஸேதபது³ம’’ந்திபி வத³ந்தி. பாதோதி பகே³வ. அயஞ்ஹேத்த² அத்தோ² – யதா² கோகனுத³ஸங்கா²தம் பது³மம் பாதோ ஸூரியுக்³க³மனவேலாயம் பு²ல்லம் விகஸிதம் அவீதக³ந்த⁴ம் ஸியா விரோசமானம், ஏவம் ஸரீரக³ந்தே⁴ன கு³ணக³ந்தே⁴ன ச ஸுக³ந்த⁴ம் ஸரத³காலே அந்தலிக்கே² ஆதி³ச்சமிவ அத்தனோ தேஜஸா தபந்தம் அங்கே³ஹி நிச்ச²ரணஜுதிதாய அங்கீ³ரஸம் ஸம்மாஸம்பு³த்³த⁴ம் பஸ்ஸாதி.

அப⁴ப்³போ³தி படிபத்திஸாரமித³ம் ஸாஸனம், படிபத்தி ச பரியத்திமூலிகா, த்வஞ்ச பரியத்திம் உக்³க³ஹேதும் அஸமத்தோ², தஸ்மா அப⁴ப்³போ³தி அதி⁴ப்பாயோ. ஸுத்³த⁴ம் பிலோதிகக²ண்ட³ந்தி இத்³தி⁴யா அபி⁴ஸங்க²தம் பரிஸுத்³த⁴ம் சோளக²ண்ட³ம். ததா³ கிர ப⁴க³வா ‘‘ந ஸஜ்ஜா²யம் காதும் அஸக்கோந்தோ மம ஸாஸனே அப⁴ப்³போ³ நாம ஹோதி, மா ஸோசி பி⁴க்கூ²’’தி தம் பா³ஹாயம் க³ஹேத்வா விஹாரம் பவிஸித்வா இத்³தி⁴யா பிலோதிகக²ண்ட³ம் அபி⁴னிம்மினித்வா ‘‘ஹந்த³, பி⁴க்கு², இமம் பரிமஜ்ஜந்தோ ‘ரஜோஹரணம் ரஜோஹரண’ந்தி புனப்புனம் ஸஜ்ஜா²யம் கரோஹீ’’தி வத்வா அதா³ஸி தத்த² புப்³பே³கதாதி⁴காரத்தா.

ஸோ கிர புப்³பே³ ராஜா ஹுத்வா நக³ரம் பத³க்கி²ணம் கரோந்தோ நலாடதோ ஸேதே³ முச்சந்தே பரிஸுத்³தே⁴ன ஸாடகேன நலாடம் புஞ்சி², ஸாடகோ கிலிட்டோ² அஹோஸி. ஸோ ‘‘இமம் ஸரீரம் நிஸ்ஸாய ஏவரூபோ பரிஸுத்³த⁴ஸாடகோ பகதிம் ஜஹித்வா கிலிட்டோ² ஜாதோ, அனிச்சா வத ஸங்கா²ரா’’தி அனிச்சஸஞ்ஞம் படிலப⁴தி, தேன காரணேனஸ்ஸ ரஜோஹரணமேவ பச்சயோ ஜாதோ. ரஜம் ஹரதீதி ரஜோஹரணம். ஸம்வேக³ம் படிலபி⁴த்வாதி அஸுப⁴ஸஞ்ஞம் அனிச்சஸஞ்ஞஞ்ச உபட்ட²பேந்தோ ஸம்வேக³ம் படிலபி⁴த்வா. ஸோ ஹி யோனிஸோ உம்மஜ்ஜந்தோ ‘‘பரிஸுத்³த⁴ம் வத்த²ம், நத்தே²த்த² தோ³ஸோ, அத்தபா⁴வஸ்ஸ பனாயம் தோ³ஸோ’’தி அஸுப⁴ஸஞ்ஞம் அனிச்சஸஞ்ஞஞ்ச படிலபி⁴த்வா நாமரூபபரிக்³க³ஹாதி³னா பஞ்சஸு க²ந்தே⁴ஸு ஞாணம் ஓதாரேத்வா கலாபஸம்மஸனாதி³க்கமேன விபஸ்ஸனம் வட்³டே⁴த்வா உத³யப்³ப³யஞாணாதி³பஅபாடியா விபஸ்ஸனம் அனுலோமகோ³த்ரபு⁴ஸமீபம் பாபேஸி. தம் ஸந்தா⁴ய வுத்தம் ‘‘விபஸ்ஸனம் ஆரபீ⁴’’தி. ஓபா⁴ஸகா³த²ம் அபா⁴ஸீதி ஓபா⁴ஸவிஸ்ஸஜ்ஜனபுப்³ப³கபா⁴ஸிதகா³தா² ஓபா⁴ஸகா³தா², தம் அபா⁴ஸீதி அத்தோ².

ஏத்த² ச ‘‘அதி⁴சேதஸோதி இமம் ஓபா⁴ஸகா³த²ம் அபா⁴ஸீ’’தி இதே⁴வ வுத்தம். விஸுத்³தி⁴மக்³கே³ (விஸுத்³தி⁴. 2.386) பன த⁴ம்மபத³ட்ட²கதா²யம் (த⁴. ப. அட்ட². 1.சூளபந்த²கத்தே²ரவத்து²) தே²ரகா³தா²ஸம்வண்ணனாயஞ்ச (தே²ரகா³. அட்ட². 2.566) –

‘‘ராகோ³ ரஜோ ந ச பன ரேணு வுச்சதி;

ராக³ஸ்ஸேதம் அதி⁴வசனம் ரஜோதி;

ஏதம் ரஜம் விப்பஜஹித்வா பண்டி³தா;

விஹரந்தி தே விக³தரஜஸ்ஸ ஸாஸனே.

‘‘தோ³ஸோ…பே… ஸாஸனே.

‘‘மோஹோ ரஜோ ந ச பன ரேணு வுச்சதி;

மோஹஸ்ஸேதம் அதி⁴வசனம் ரஜோதி;

ஏதம் ரஜம் விப்பஜஹித்வா பண்டி³தா;

விஹரந்தி தே விக³தரஜஸ்ஸ ஸாஸனேதி. –

இமா திஸ்ஸோ ஓபா⁴ஸகா³தா² அபா⁴ஸீ’’தி வுத்தம். அதி⁴சேதஸோதி ச அயம் சூளபந்த²கத்தே²ரஸ்ஸ உதா³னகா³தா²தி இமிஸ்ஸாயேவ பாளியா ஆக³தம். தே²ரகா³தா²யம் பன சூளபந்த²கத்தே²ரஸ்ஸ உதா³னகா³தா²ஸு அயம் அனாருள்ஹா, ‘‘ஏகுதா³னியத்தே²ரஸ்ஸ பன அயம் உதா³னகா³தா²’’தி (தே²ரகா³. அட்ட². 1.ஏகுதா³னியத்தே²ரகா³தா²வண்ணனா) தத்த² வுத்தம். ஏவம் ஸந்தேபி இமிஸ்ஸா பாளியா அட்ட²கதா²ய ச ஏவமாக³தத்தா சூளபந்த²கத்தே²ரஸ்ஸபி அயம் உதா³னகா³தா² ஓபா⁴ஸகா³தா²வஸேன ச ப⁴க³வதா பா⁴ஸிதாதி க³ஹேதப்³ப³ம். அரஹத்தம் பாபுணீதி அபி⁴ஞ்ஞாபடிஸம்பி⁴தா³பரிவாரம் அரஹத்தம் பாபுணி. அப⁴ப்³போ³ த்வந்திஆதி³வசனதோ அனுகம்பாவஸேன ஸத்³தி⁴விஹாரிகாதி³ம் ஸங்கி⁴கவிஹாரா நிக்கட்³டா⁴பேந்தஸ்ஸ அனாபத்தி விய தி³ஸ்ஸதி. அப⁴ப்³போ³ ஹி தே²ரோ ஸஞ்சிச்ச தம் காதும், நிக்கட்³ட⁴னஸிக்கா²பதே³ வா அபஞ்ஞத்தே தே²ரேன ஏவம் கதந்தி க³ஹேதப்³ப³ம்.

156. ஓவத³ந்தஸ்ஸ பாசித்தியந்தி அத்த²ங்க³தே ஸூரியே க³ருத⁴ம்மேஹி வா அஞ்ஞேன வா த⁴ம்மேனேவ ஓவத³ந்தஸ்ஸ ஸம்மதஸ்ஸபி பாசித்தியம். ஸேஸமேத்த² உத்தானமேவ. அத்த²ங்க³தஸூரியதா, பரிபுண்ணூபஸம்பன்னதா, ஓவத³னந்தி இமானி பனேத்த² தீணி அங்கா³னி.

அத்த²ங்க³தஸிக்கா²பத³வண்ணனா நிட்டி²தா.

3. பி⁴க்கு²னுபஸ்ஸயஸிக்கா²பத³வண்ணனா

162. ததியம் உத்தானத்த²மேவ. உபஸ்ஸயூபக³மனம், பரிபுண்ணூபஸம்பன்னதா, ஸமயாபா⁴வோ, க³ருத⁴ம்மேஹி ஓவத³னந்தி இமானி பனேத்த² சத்தாரி அங்கா³னி.

பி⁴க்கு²னுபஸ்ஸயஸிக்கா²பத³வண்ணனா நிட்டி²தா.

4. ஆமிஸஸிக்கா²பத³வண்ணனா

164. சதுத்தே² ‘‘உபஸம்பன்னம்…பே… பி⁴க்கு²னோவாத³க’’ந்தி இமேஸம் ‘‘மங்குகத்துகாமோ’’தி இமினா ஸம்ப³ந்தோ⁴. ‘‘அவண்ணம் கத்துகாமோ அயஸம் கத்துகாமோ’’தி இமேஸம் பன வஸேன ‘‘உபஸம்பன்ன’’ந்திஆதீ³ஸு ‘‘உபஸம்பன்னஸ்ஸா’’தி விப⁴த்திவிபரிணாமோ காதப்³போ³தி இமமத்த²ம் ஸந்தா⁴ய ‘‘உஜ்ஜா²பனகே வுத்தனயேனேவத்தோ² வேதி³தப்³போ³’’தி வுத்தம். ‘‘சீவரஹேது ஓவத³தீ’’திஆதி³னா ப⁴ணந்தஸ்ஸ ஏகேகஸ்மிம் வசனே நிட்டி²தே பாசித்தியம் வேதி³தப்³ப³ம். ‘‘உபஸம்பன்னம் ஸங்கே⁴ன அஸம்மத’’ந்தி பாளிவசனதோ ‘‘ஸம்மதேன வா ஸங்கே⁴ன வா பா⁴ரம் கத்வா ட²பிதோ’’தி அட்ட²கதா²வசனதோ ச அட்ட²ஹி அங்கே³ஹி ஸமன்னாக³தோ ஸம்மதேன வா விப்பவஸிதுகாமேன ‘‘யாவாஹம் ஆக³மிஸ்ஸாமி, தாவ தே பா⁴ரோ ஹோதூ’’தி யாசித்வா ட²பிதோ தஸ்ஸாபா⁴வதோ ஸங்கே⁴ன வா ததே²வ பா⁴ரம் கத்வா ட²பிதோ அட்ட²ஹி க³ருத⁴ம்மேஹி அஞ்ஞேன வா த⁴ம்மேன ஓவதி³தும் லப⁴தீதி வேதி³தப்³ப³ம். தஸ்மா ‘‘யோ பன, பி⁴க்கு², அஸம்மதோ பி⁴க்கு²னியோ ஓவதே³ய்ய, பாசித்திய’’ந்தி இத³ம் பகே³வ பா⁴ரம் கத்வா அட்ட²பிதம் ஸந்தா⁴ய வுத்தந்தி க³ஹேதப்³ப³ம்.

168. அனாபத்தி பகதியா சீவரஹேது…பே… ஓவத³ந்தம் ப⁴ணதீதி ஏத்த² ஆமிஸஹேது ஓவத³ந்தம் ‘‘ஆமிஸஹேது ஓவத³தீ’’தி ஸஞ்ஞாய ஏவம் ப⁴ணந்தஸ்ஸ அனாபத்தி, ‘‘ந ஆமிஸஹேது ஓவத³தீ’’தி ஸஞ்ஞினோ பன து³க்கடம், ந ஆமிஸஹேது ஓவத³ந்தம் பன ‘‘ஆமிஸஹேது ஓவத³தீ’’தி ஸஞ்ஞாய ப⁴ணந்தஸ்ஸபி அனாபத்தி ஸசித்தகத்தா ஸிக்கா²பத³ஸ்ஸ. ஸேஸமேத்த² உத்தானமேவ. உபஸம்பன்னதா, த⁴ம்மேன லத்³த⁴ஸம்முதிதா, அனாமிஸந்தரதா, அவண்ணகாமதாய ஏவம் ப⁴ணனந்தி இமானி பனேத்த² சத்தாரி அங்கா³னி.

ஆமிஸஸிக்கா²பத³வண்ணனா நிட்டி²தா.

169. பஞ்சமம் உத்தானத்த²மேவ.

6. சீவரஸிப்³பா³பனஸிக்கா²பத³வண்ணனா

175. ச²ட்டே² ஸசே ஸா பி⁴க்கு²னீ தம் சீவரம் ஆதி³தோவ பாருபேய்ய, அஞ்ஞா பி⁴க்கு²னியோ தி³ஸ்வா உஜ்ஜா²பேய்யும், ததோ மஹாஜனோ பஸ்ஸிதும் ந லப⁴தீதி மஞ்ஞமானோ ‘‘யதா²ஸம்ஹடம் ஹரித்வா நிக்கி²பித்வா’’திஆதி³மாஹ.

176. நீஹரதீதி ஸகிம் நீஹரதி. யேபி தேஸம் நிஸ்ஸிதகாதி ஸம்ப³ந்தோ⁴. கதி²னவத்தந்தி ‘‘ஸப்³ரஹ்மசாரீனம் காதும் வட்டதீ’’தி இதிகத்தப்³ப³தாவஸேன ஸூசிகம்மகரணம். ஆசரியுபஜ்ஜா²யானம் து³க்கடந்தி அகப்பியஸமாதா³னவஸேன து³க்கடம். வஞ்சேத்வாதி ‘‘தவ ஞாதிகாயா’’தி அவத்வா ‘‘ஏகிஸ்ஸா பி⁴க்கு²னியா’’தி ஏத்தகமேவ வத்வா. ‘‘ஏகிஸ்ஸா பி⁴க்கு²னியா’’தி ஸுத்வா தே அஞ்ஞாதிகஸஞ்ஞினோ ப⁴வேய்யுந்தி ஆஹ ‘‘அகப்பியே நியோஜிதத்தா’’தி. ‘‘இத³ம் தே மாது சீவர’’ந்திஆதீ³னி அவத்வாபி ‘‘இத³ம் சீவரம் ஸிப்³பே³ஹீ’’தி ஸுத்³த⁴சித்தேன ஸிப்³பா³பேந்தஸ்ஸபி அனாபத்தி.

179. உபாஹனத்த²விகாதி³ந்தி ஆதி³-ஸத்³தே³ன யம் சீவரம் நிவாஸேதும் வா பாருபிதும் வா ந ஸக்கா ஹோதி, தம்பி ஸங்க³ண்ஹாதி. ஸேஸமேத்த² உத்தானமேவ. அஞ்ஞாதிகாய பி⁴க்கு²னியா ஸந்தகதா, நிவாஸனபாருபனூபக³தா, வுத்தனயேன ஸிப்³ப³னம் வா ஸிப்³பா³பனம் வாதி இமானி பனேத்த² தீணி அங்கா³னி.

சீவரஸிப்³பா³பனஸிக்கா²பத³வண்ணனா நிட்டி²தா.

7. ஸம்வித³ஹனஸிக்கா²பத³வண்ணனா

181. ஸத்தமே ‘‘பச்சா² க³ச்ச²ந்தீனம் சோரா அச்சி²ந்தி³ம்ஸூ’’தி ஏத்த² ‘‘பத்தசீவர’’ந்தி பாட²ஸேஸோதி ஆஹ ‘‘பச்சா² க³ச்ச²ந்தீனம் பத்தசீவர’’ந்தி. தா பி⁴க்கு²னியோதி பச்சா² க³ச்ச²ந்தியோ பி⁴க்கு²னியோ. ‘‘பச்சா² க³ச்ச²ந்தீன’’ந்தி ச விப⁴த்திவிபரிணாமேனேத்த² ஸம்ப³ந்தோ⁴ வேதி³தப்³போ³. பாளியம் ‘‘க³ச்சா²ம ப⁴கி³னி, க³ச்சா²ம அய்யா’’தி பி⁴க்கு²புப்³ப³கம் ஸம்விதா⁴னம் வுத்தம், ‘‘க³ச்சா²ம அய்ய, க³ச்சா²ம ப⁴கி³னீ’’தி பி⁴க்கு²னீபுப்³ப³கம். ஏகத்³தா⁴னமக்³க³ந்தி ஏகம் அத்³தா⁴னஸங்கா²தம் மக்³க³ம், ஏகதோ வா அத்³தா⁴னமக்³க³ம். ஹிய்யோதி ஸுவே. பரேதி ததியதி³வஸே.

182-183. த்³விதா⁴ வுத்தப்பகாரோதி பாத³க³மனவஸேன பக்க²க³மனவஸேன வாதி த்³விதா⁴ வுத்தப்பபே⁴தோ³. சதுன்னம் மக்³கா³னம் ஸம்ப³ந்த⁴ட்டா²னம் சதுக்கம், திண்ணம் மக்³கா³னம் ஸம்ப³ந்த⁴ட்டா²னம் ஸிங்கா⁴டகம். ‘‘கா³மந்தரே கா³மந்தரே’’தி ஏத்த² அஞ்ஞோ கா³மோ கா³மந்தரந்தி ஆஹ ‘‘நிக்க²மனே அனாபத்தி…பே… பி⁴க்கு²னோ பாசித்திய’’ந்தி. ‘‘ஸம்விதா⁴யா’’தி பாளியம் அவிஸேஸேன வுத்தத்தா ‘‘நேவ பாளியா ஸமேதீ’’தி வுத்தம், ‘‘ஏத்த²ந்தரே ஸம்வித³ஹிதேபி பி⁴க்கு²னோ து³க்கட’’ந்தி வுத்தத்தா ‘‘ந ஸேஸஅட்ட²கதா²ய ஸமேதீ’’தி வுத்தம். அத்³த⁴யோஜனம் அதிக்கமந்தஸ்ஸாதி அஸதி கா³மே அத்³த⁴யோஜனம் அதிக்கமந்தஸ்ஸ. யத்த² ஹி அத்³த⁴யோஜனப்³ப⁴ந்தரே அஞ்ஞோ கா³மோ ந ஹோதி, தம் இத⁴ அகா³மகம் அரஞ்ஞந்தி அதி⁴ப்பேதம், அத்³த⁴யோஜனப்³ப⁴ந்தரே பன கா³மே ஸதி கா³மந்தரக³ணனாய ஏவ ஆபத்தி.

185. ரட்ட²பே⁴தே³தி ரட்ட²விலோபே. சக்கஸமாருள்ஹாதி இரியாபத²சக்கம் ஸகடசக்கம் வா ஸமாருள்ஹா. ஸேஸம் உத்தானமேவ. த்³வின்னம்பி ஸம்வித³ஹித்வா மக்³க³ப்படிபத்தி, அவிஸங்கேதம், ஸமயாபா⁴வோ, அனாபதா³, கா³மந்தரோக்கமனம் வா அத்³த⁴யோஜனாதிக்கமோ வாதி இமானி பனேத்த² பஞ்ச அங்கா³னி. ஏகதோஉபஸம்பன்னாதீ³ஹி ஸத்³தி⁴ம் க³ச்ச²ந்தஸ்ஸ பன மாதுகா³மஸிக்கா²பதே³ன ஆபத்தி.

ஸம்வித³ஹனஸிக்கா²பத³வண்ணனா நிட்டி²தா.

8. நாவாபி⁴ருஹனஸிக்கா²பத³வண்ணனா

188. அட்ட²மே லோகஸ்ஸாத³மித்தஸந்த²வவஸேன கீளாபுரேக்கா²ரா ஸம்வித³ஹித்வாதி அயம் விஸேஸோ ‘‘ஏவமிமே…பே… பி⁴க்கு²னீஹி ஸத்³தி⁴ம் நாவாய கீளந்தீ’’தி இமினா ‘‘உத்³த⁴ம்கா³மினிம் வா அதோ⁴கா³மினிம் வா’’தி இமினா ச ஸித்³தோ⁴.

189. நதி³யா குதோ கா³மந்தரந்தி ஆஹ ‘‘யஸ்ஸா நதி³யா’’திஆதி³. ‘‘தஸ்ஸா ஸகா³மகதீரபஸ்ஸேன…பே… அத்³த⁴யோஜனக³ணனாயாதி ஏகேகபஸ்ஸேனேவ க³மனம் ஸந்தா⁴ய வுத்தத்தா தாதி³ஸிகாய நதி³யா மஜ்ஜே²ன க³ச்ச²ந்தஸ்ஸ கா³மந்தரக³ணனாய அத்³த⁴யோஜனக³ணனாய ச ஆபத்தீ’’தி வத³ந்தி. ஸப்³ப³அட்ட²கதா²ஸூதிஆதி³னா அத்தனா வுத்தமேவத்த²ம் ஸமத்தே²தி. ‘‘கீளாபுரேக்கா²ரதாய பி⁴க்கு²னியா ஸத்³தி⁴ம் ஸம்விதா⁴ய நாவம் அபி⁴ருஹந்தஸ்ஸ நதி³யம்யேவ பாசித்தியஸ்ஸ வுத்தத்தா வாபிஸமுத்³தா³தீ³ஸு கீளாபுரேக்கா²ரதாய து³க்கடமேவ, ந பாசித்திய’’ந்தி வத³ந்தி. ‘‘லோகஸ்ஸாத³மித்தஸந்த²வவஸேன கீளாபுரேக்கா²ரா ஸம்வித³ஹித்வா’’தி வசனதோ கேசி ‘‘இமம் ஸிக்கா²பத³ம் அகுஸலசித்தம் லோகவஜ்ஜ’’ந்தி வத³ந்தி, தம் ந க³ஹேதப்³ப³ம். கீளாபுரேக்கா²ரதாய ஹி அபி⁴ருஹித்வாபி கா³மந்தரோக்கமனே அத்³த⁴யோஜனாதிக்கமே வா குஸலாப்³யாகதசித்தஸமங்கீ³பி ஹுத்வா ஆபத்திம் ஆபஜ்ஜதி. யதி³ ஹி ஸோ ஸம்வேக³ம் படிலபி⁴த்வா அரஹத்தம் வா ஸச்சி²கரேய்ய, நித்³த³ம் வா ஓக்கமேய்ய, கம்மட்டா²னம் வா மனஸி கரோந்தோ க³ச்சே²ய்ய, குதோ தஸ்ஸ அகுஸலசித்தஸமங்கி³தா, யேனித³ம் ஸிக்கா²பத³ம் அகுஸலசித்தம் லோகவஜ்ஜந்தி வுச்சதி, தஸ்மா பண்ணத்திவஜ்ஜம் திசித்தந்தி ஸித்³த⁴ம். ஸேஸமேத்த² உத்தானமேவ.

நாவாபி⁴ருஹனஸிக்கா²பத³வண்ணனா நிட்டி²தா.

9. பரிபாசிதஸிக்கா²பத³வண்ணனா

194. நவமே படியாதி³தந்தி பி⁴க்கூ²னம் அத்தா²ய ஸம்பாதி³தம். ஞாதகா வா ஹோந்தி பவாரிதா வாதி ஏத்த² ஸசேபி பி⁴க்கு²னோ அஞ்ஞாதகா அப்பவாரிதா ச ஸியும், பி⁴க்கு²னியா ஞாதகா பவாரிதா சே, வட்டதி.

197. பாபபி⁴க்கூ²னம் பக்கு²பச்சே²தா³ய இத³ம் பஞ்ஞத்தம், தஸ்மா பஞ்சபோ⁴ஜனேயேவ ஆபத்தி வுத்தா. பஞ்ச போ⁴ஜனானி ட²பேத்வா ஸப்³ப³த்த² அனாபத்தீதி இத³ம் பன இமினா ஸிக்கா²பதே³ன அனாபத்தித³ஸ்ஸனத்த²ம் வுத்தம். விஞ்ஞத்தியா உப்பன்னம் பரிபு⁴ஞ்ஜந்தஸ்ஸ ஹி அஞ்ஞத்த² வுத்தனயேன து³க்கடம். ஸேஸம் உத்தானமேவ. பி⁴க்கு²னிபரிபாசிதபா⁴வோ, ஜானனம், கி³ஹிஸமாரம்பா⁴பா⁴வோ, ஓத³னாதீ³னம் அஞ்ஞதரதா, தஸ்ஸ அஜ்ஜோ²ஹரணந்தி இமானி பனேத்த² பஞ்ச அங்கா³னி.

பரிபாசிதஸிக்கா²பத³வண்ணனா நிட்டி²தா.

10. ரஹோனிஸஜ்ஜஸிக்கா²பத³வண்ணனா

198. த³ஸமே உபனந்த³ஸ்ஸ சதுத்த²ஸிக்கா²பதே³னாதி அப்படிச்ச²ன்னே மாதுகா³மேன ஸத்³தி⁴ம் ரஹோனிஸஜ்ஜஸிக்கா²பத³ம் ஸந்தா⁴ய வுத்தம். கிஞ்சாபி தம் அசேலகவக்³கே³ பஞ்சமஸிக்கா²பத³ம் ஹோதி, உபனந்த³த்தே²ரம் ஆரப்³ப⁴ பஞ்ஞத்தேஸு பன சதுத்த²பா⁴வதோ ‘‘உபனந்த³ஸ்ஸ சதுத்த²ஸிக்கா²பதே³னா’’தி வுத்தம். சதுத்த²ஸிக்கா²பத³ஸ்ஸ வத்து²தோ இமஸ்ஸ ஸிக்கா²பத³ஸ்ஸ வத்து²னோ பட²மம் உப்பன்னத்தா இத³ம் ஸிக்கா²பத³ம் பட²மம் பஞ்ஞத்தம். இமினா ச ஸிக்கா²பதே³ன கேவலம் பி⁴க்கு²னியா ஏவ ரஹோனிஸஜ்ஜாய ஆபத்தி பஞ்ஞத்தா, உபரி மாதுகா³மேன ஸத்³தி⁴ம் ரஹோனிஸஜ்ஜாய ஆபத்தி விஸும் பஞ்ஞத்தாதி த³ட்ட²ப்³ப³ம்.

ரஹோனிஸஜ்ஜஸிக்கா²பத³வண்ணனா நிட்டி²தா.

நிட்டி²தோ பி⁴க்கு²னிவக்³கோ³ ததியோ.