4. போ⁴ஜனவக்³கோ³

1. ஆவஸத²பிண்ட³ஸிக்கா²பத³வண்ணனா

206. போ⁴ஜனவக்³க³ஸ்ஸ பட²மஸிக்கா²பதே³ அத்³த⁴யோஜனம் வா யோஜனம் வா க³ந்தும் ஸக்கோதீதி ஏத்த² தத்தகம் க³ந்தும் ஸக்கோந்தஸ்ஸபி தாவதகம் க³ந்த்வா அலத்³த⁴பி⁴க்க²ஸ்ஸ இதோ பு⁴ஞ்ஜிதும் வட்டதி. இமேஸம்யேவாதி இமேஸம் பாஸண்டா³னம்யேவ. ஏத்தகானந்தி இமஸ்மிம் பாஸண்டே³ ஏத்தகானம். ஏகதி³வஸம் பு⁴ஞ்ஜிதப்³ப³ந்தி ஏகதி³வஸம் ஸகிம்யேவ பு⁴ஞ்ஜிதப்³ப³ம். ‘‘ஏகதி³வஸம் பு⁴ஞ்ஜிதப்³ப³’’ந்தி வசனதோ பன ஏகஸ்மிம் தி³வஸே புனப்புனம் பு⁴ஞ்ஜிதும் வட்டதீதி ந க³ஹேதப்³ப³ம். புன ஆதி³தோ பட்டா²ய பு⁴ஞ்ஜிதும் ந வட்டதீதி இமினா பட²மம் பு⁴த்தட்டா²னேஸு புன ஏகஸ்மிம்பி டா²னே பு⁴ஞ்ஜிதும் ந வட்டதீதி த³ஸ்ஸேதி.

208. ‘‘க³ச்ச²ந்தோ வா ஆக³ச்ச²ந்தோ வாதி இத³ம் அத்³த⁴யோஜனவஸேன க³ஹேதப்³ப³’’ந்தி வத³ந்தி. அந்தராமக்³கே³ க³தட்டா²னேதி ஏகஸ்ஸேவ ஸந்தகம் ஸந்தா⁴ய வுத்தம். ‘‘ஆக³ச்ச²ந்தேபி ஏஸேவ நயோ’’தி ஸங்கே²பேன வுத்தமேவத்த²ம் விபா⁴வேந்தோ ‘‘க³ந்த்வா பச்சாக³ச்ச²ந்தோ’’திஆதி³மாஹ. ஆபத்திட்டா²னேயேவ புன பு⁴ஞ்ஜந்தஸ்ஸ அனாபத்தி வத்தப்³பா³தி க³மனே ஆக³மனே ச பட²மம் போ⁴ஜனம் அவத்வா அந்தராமக்³கே³ ஏகதி³வஸம் க³தட்டா²னே ச ஏகதி³வஸந்தி புனப்புனம் போ⁴ஜனமேவ த³ஸ்ஸிதம், க³மனதி³வஸே பன ஆக³மனதி³வஸே ச ‘‘க³மிஸ்ஸாமி ஆக³மிஸ்ஸாமீ’’தி பு⁴ஞ்ஜிதும் வட்டதியேவ. ஸுத்³த⁴சித்தேன புனப்புனம் பு⁴ஞ்ஜந்தஸ்ஸபி புனப்புனம் போ⁴ஜனே அனாபத்தி. அஞ்ஞஸ்ஸத்தா²ய உத்³தி³ஸித்வா பஞ்ஞத்தம் பி⁴க்கு²னோ க³ஹேதுமேவ ந வட்டதீதி ஆஹ ‘‘பி⁴க்கூ²னம்யேவ அத்தா²யா’’தி. ஸேஸமேத்த² உத்தானமேவ. ஆவஸத²பிண்ட³தா, அகி³லானதா, அனுவஸித்வா போ⁴ஜனந்தி இமானி பனேத்த² தீணி அங்கா³னி.

ஆவஸத²பிண்ட³ஸிக்கா²பத³வண்ணனா நிட்டி²தா.

2. க³ணபோ⁴ஜனஸிக்கா²பத³வண்ணனா

209. து³தியே அபி⁴மாரேதி அபி⁴க³ந்த்வா ப⁴க³வதோ மாரணத்தா²ய நியோஜிதே த⁴னுத்³த⁴ரே. கு³ள்ஹபடிச்ச²ன்னோதி அபாகடோ. பவிஜ்ஜீ²தி விஸ்ஸஜ்ஜேஸி. நனு ராஜானம்பி மாராபேஸீதி வசனதோ இத³ம் ஸிக்கா²பத³ம் அஜாதஸத்துனோ காலே பஞ்ஞத்தந்தி ஸித்³த⁴ம், ஏவஞ்ச ஸதி பரதோ அனுபஞ்ஞத்தியம் –

‘‘தேன கோ² பன ஸமயேன ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ ஞாதிஸாலோஹிதோ ஆஜீவகேஸு பப்³ப³ஜிதோ ஹோதி. அத² கோ² ஸோ ஆஜீவகோ யேன ராஜா மாக³தோ⁴ ஸேனியோ பி³ம்பி³ஸாரோ தேனுபஸங்கமி, உபஸங்கமித்வா ராஜானம் மாக³த⁴ம் ஸேனியம் பி³ம்பி³ஸாரம் ஏதத³வோச…பே… குக்குச்சாயந்தா நாதி⁴வாஸேந்தீ’’தி –

இத³ம் கஸ்மா வுத்தந்தி? ஸோ கிர ஆஜீவகோ தம் தா³னம் தே³ந்தோ பி³ம்பி³ஸாரகாலதோ பட்டா²ய அதா³ஸி, பச்சா² அஜாதஸத்துகாலே ஸிக்கா²பத³பஞ்ஞத்திதோ பட்டா²ய பி⁴க்கூ² குக்குச்சாயந்தா தம் தா³னம் ந படிக்³க³ண்ஹிம்ஸு, தஸ்மா ஆதி³தோ பட்டா²ய தம் வத்து² த³ஸ்ஸிதந்தி வேதி³தப்³ப³ம். ‘‘அத² கோ² ஸோ ஆஜீவகோ பி⁴க்கூ²னம் ஸந்திகே தூ³தம் பாஹேஸீ’’தி இத³ஞ்ச ததோ பபு⁴தி ஸோ ஆஜீவகோ அந்தரந்தரா பி⁴க்கூ² நிமந்தேத்வா தா³னம் தே³ந்தோ அஜாதஸத்துகாலே ஸிக்கா²பதே³ பஞ்ஞத்தே யம் பி⁴க்கூ²னம் ஸந்திகே தூ³தம் பாஹேஸி, தம் ஸந்தா⁴ய வுத்தம்.

215. அஞ்ஞமஞ்ஞவிஸிட்ட²த்தா விஸதி³ஸம் ரஜ்ஜம் விரஜ்ஜம், ததோ ஆக³தா, தத்த² வா ஜாதா, ப⁴வாதி வா வேரஜ்ஜா, தே ஏவ வேரஜ்ஜகா. தே பன யஸ்மா கோ³த்தசரணாதி³விபா⁴கே³ன நானப்பகாரா, தஸ்மா வுத்தம் ‘‘நானாவேரஜ்ஜகே’’தி. அட்ட²கதா²யம் பன நானாவிதே⁴ஹி அஞ்ஞரஜ்ஜேஹி ஆக³தேதி ரஜ்ஜானம்யேவ வஸேன நானப்பகாரதா வுத்தா.

217-218. இமஸ்ஸ ஸிக்கா²பத³ஸ்ஸ விஞ்ஞத்திம் கத்வா பு⁴ஞ்ஜனவத்து²ஸ்மிம் பஞ்ஞத்தத்தா விஞ்ஞத்திதோ க³ணபோ⁴ஜனம் வத்து²வஸேனேவ பாகடந்தி தம் அவத்வா ‘‘க³ணபோ⁴ஜனம் நாம யத்த²…பே… நிமந்திதா பு⁴ஞ்ஜந்தீ’’தி நிமந்தனவஸேனேவ பத³பா⁴ஜனே க³ணபோ⁴ஜனம் வுத்தம். ‘‘கிஞ்சி பன ஸிக்கா²பத³ம் வத்து²அனனுரூபம்பி ஸியாதி பத³பா⁴ஜனே வுத்தனயேன நிமந்தனவஸேனேவ க³ணபோ⁴ஜனம் ஹோதீதி கேஸஞ்சி ஆஸங்கா ப⁴வேய்யா’’தி தம்னிவத்தனத்த²ம் ‘‘தம் பனேதம் க³ணபோ⁴ஜனம் த்³வீஹாகாரேஹி பஸவதீ’’தி வுத்தம். பஞ்சன்னம் போ⁴ஜனானம் நாமம் க³ஹேத்வாதி ஏத்த² ‘‘போ⁴ஜனம் க³ண்ஹதா²தி வுத்தேபி க³ணபோ⁴ஜனம் ஹோதியேவா’’தி வத³ந்தி. ‘‘ஹேட்டா² அத்³தா⁴னக³மனவத்து²ஸ்மிம் நாவாபி⁴ருஹனவத்து²ஸ்மிஞ்ச ‘இதே⁴வ, ப⁴ந்தே, பு⁴ஞ்ஜதா²’தி வுத்தே யஸ்மா குக்குச்சாயந்தா ந படிக்³க³ண்ஹிம்ஸு, தஸ்மா ‘பு⁴ஞ்ஜதா²’தி வுத்தேபி க³ணபோ⁴ஜனம் ந ஹோதியேவா’’தி தீஸுபி க³ண்டி²பதே³ஸு வுத்தம். ‘‘பஞ்சன்னம் போ⁴ஜனானம் நாமம் க³ஹேத்வா நிமந்தேதீ’’தி வுத்தத்தா பன ‘‘ஓத³னம் பு⁴ஞ்ஜதா²’’தி வா ‘‘ப⁴த்தம் பு⁴ஞ்ஜதா²’’தி வா போ⁴ஜனனாமம் க³ஹேத்வாவ வுத்தே க³ணபோ⁴ஜனம் ஹோதி, ந அஞ்ஞதா². ‘‘இதே⁴வ, ப⁴ந்தே, பு⁴ஞ்ஜதா²’’தி ஏத்தா²பி ‘‘ஓத³ன’’ந்தி வா ‘‘ப⁴த்த’’ந்தி வா வத்வாவ தே ஏவம் நிமந்தேஸுந்தி க³ஹேதப்³ப³ம். க³ணவஸேன வா நிமந்திதத்தா தே பி⁴க்கூ² அபகதஞ்ஞுதாய குக்குச்சாயந்தா ந படிக்³க³ண்ஹிம்ஸூதி அயம் அம்ஹாகம் க²ந்தி, வீமம்ஸித்வா யுத்ததரம் க³ஹேதப்³ப³ம்.

ஏகதோ க³ண்ஹந்தீதி ஏத்த² அஞ்ஞமஞ்ஞஸ்ஸ த்³வாத³ஸஹத்த²ம் அமுஞ்சித்வா டி²தா ஏகதோ க³ண்ஹந்தி நாமாதி க³ஹேதப்³ப³ம். ‘‘அம்ஹாகம் சதுன்னம்பி ப⁴த்தம் தே³ஹீதி வா விஞ்ஞாபேய்யு’’ந்தி வசனதோ ஹேட்டா² ‘‘த்வம் ஏகஸ்ஸ பி⁴க்கு²னோ ப⁴த்தம் தே³ஹி, த்வம் த்³வின்னந்தி ஏவம் விஞ்ஞாபேத்வா’’தி வசனதோ ச அத்தனோ அத்தா²ய அஞ்ஞேஹி விஞ்ஞத்தம்பி ஸாதி³யந்தஸ்ஸ க³ணபோ⁴ஜனம் ஹோதியேவாதி த³ட்ட²ப்³ப³ம். ஏவம் விஞ்ஞத்திதோ பஸவதீதி ஏத்த² விஞ்ஞத்தியா ஸதி க³ண்ஹந்தஸ்ஸ ஏகதோ ஹுத்வா க³ஹணே இமினா ஸிக்கா²பதே³ன ஆபத்தி, விஸும் க³ஹணே பணீதபோ⁴ஜனஸூபோத³னவிஞ்ஞத்தீஹி ஆபத்தி வேதி³தப்³பா³.

விசாரேதீதி பஞ்சக²ண்டா³தி³வஸேன ஸம்வித³ஹதி. க⁴ட்டேதீதி அனுவாதம் சி²ந்தி³த்வா ஹத்தே²ன த³ண்ட³கேன வா க⁴ட்டேதி. ஸுத்தம் கரோதீதி ஸுத்தம் வட்டேதி. வலேதீதி த³ண்ட³கே வா ஹத்தே² வா ஆவட்டேதி. ‘‘அபி⁴னவஸ்ஸேவ சீவரஸ்ஸ கரணம் இத⁴ சீவரகம்மம் நாம, புராணசீவரே ஸூசிகம்மம் நாம ந ஹோதீ’’தி வத³ந்தி. ‘‘சதுத்தே² ஆக³தே ந யாபேந்தீதி வசனதோ ஸசே அஞ்ஞோ கோசி ஆக³ச்ச²ந்தோ நத்தி², சத்தாரோயேவ ச தத்த² நிஸின்னா யாபேதும் ந ஸக்கோந்தி, ந வட்டதீ’’தி வத³ந்தி.

220. க³ணபோ⁴ஜனாபத்திஜனகனிமந்தனபா⁴வதோ ‘‘அகப்பியனிமந்தன’’ந்தி வுத்தம். ஸம்பவேஸேத்வாதி நிஸீதா³பேத்வா. க³ணோ பி⁴ஜ்ஜதீதி க³ணோ ஆபத்திம் ந ஆபஜ்ஜதீதி அதி⁴ப்பாயோ. ‘‘யத்த² சத்தாரோ பி⁴க்கூ²…பே… பு⁴ஞ்ஜந்தீ’’தி இமாய பாளியா ஸம்ஸந்த³னதோ ‘‘இதரேஸம் பன க³ணபூரகோ ஹோதீ’’தி வுத்தம். அவிஸேஸேனாதி ‘‘கி³லானோ வா சீவரகாரகோ வா’’தி அவிஸேஸேத்வா ஸப்³ப³ஸாதா⁴ரணவசனேன. தஸ்மாதி அவிஸேஸிதத்தா. பு⁴த்வா க³தேஸூதி ஏத்த² அக³தேஸுபி போ⁴ஜனகிச்சே நிட்டி²தே க³ண்ஹிதும் வட்டதி. தானி ச தேஹி ஏகதோ ந க³ஹிதானீதி யேஹி போ⁴ஜனேஹி விஸங்கேதோ நத்தி², தானி போ⁴ஜனானி தேஹி பி⁴க்கூ²ஹி ஏகதோ ந க³ஹிதானி ஏகேன பச்சா² க³ஹிதத்தா. மஹாதே²ரேதி பி⁴க்கூ² ஸந்தா⁴ய வுத்தம். தூ³தஸ்ஸ புன படிபத²ம் ஆக³ந்த்வா ‘‘ப⁴த்தம் க³ண்ஹதா²’’தி வசனப⁴யேன ‘‘கா³மத்³வாரே அட்ட²த்வாவா’’தி வுத்தம். தத்த² தத்த² க³ந்த்வாதி அந்தரவீதி²ஆதீ³ஸு தத்த² தத்த² டி²தானம் ஸந்திகம் க³ந்த்வா. பி⁴க்கூ²னம் அத்தா²ய க⁴ரத்³வாரே ட²பேத்வா தி³ய்யமானேபி ஏஸேவ நயோ. நிவத்ததா²தி வுத்தபதே³ நிவத்திதும் வட்டதீதி ‘‘நிவத்ததா²’’தி விச்சி²ந்தி³த்வா பச்சா² ‘‘ப⁴த்தம் க³ண்ஹதா²’’தி வுத்தத்தா வட்டதி. ஸேஸமேத்த² உத்தானமேவ. க³ணபோ⁴ஜனதா, ஸமயாபா⁴வோ, அஜ்ஜோ²ஹரணந்தி இமானி பனேத்த² தீணி அங்கா³னி.

க³ணபோ⁴ஜனஸிக்கா²பத³வண்ணனா நிட்டி²தா.

3. பரம்பரபோ⁴ஜனஸிக்கா²பத³வண்ணனா

221. ததியே குலபடிபாடியா அப்³போ³ச்சி²ன்னம் கத்வா நிரந்தரம் தி³ய்யமானத்தா ‘‘ப⁴த்தபடிபாடி அட்டி²தா ஹோதீ’’தி பாளியம் வுத்தம், அந்தரா அட்ட²த்வா நிரந்தரம் பவத்தாதி வுத்தம் ஹோதி. உபசாரவஸேனாதி வோஹாரவஸேன. ந ஹி ஸோ ப³த³ரமத்தமேவ தே³தி, உபசாரவஸேன பன ஏவம் வத³தி. ப³த³ரசுண்ணஸக்க²ராதீ³ஹி பயோஜிதம் ‘‘ப³த³ரஸாளவ’’ந்தி வுச்சதி.

226. விகப்பனாவஸேனேவ தம் ப⁴த்தம் அஸந்தம் நாம ஹோதீதி அனுபஞ்ஞத்திவஸேன விகப்பனம் அட்ட²பேத்வா யதா²பஞ்ஞத்தம் ஸிக்கா²பத³மேவ ட²பிதம். பரிவாரே பன விகப்பனாய அனுஜானனம்பி அனுபஞ்ஞத்திஸமானந்தி கத்வா ‘‘சதஸ்ஸோ அனுபஞ்ஞத்தியோ’’தி வுத்தம். மஹாபச்சரிஆதீ³ஸு வுத்தனயம் பச்சா² வத³ந்தோ பாளியா ஸம்ஸந்த³னதோ பரம்முகா²விகப்பனமேவ பதிட்டா²பேஸி. கேசி பன ‘‘ததா³ அத்தனோ ஸந்திகே ட²பேத்வா ப⁴க³வந்தம் அஞ்ஞஸ்ஸ அபா⁴வதோ தே²ரோ ஸம்முகா²விகப்பனம் நாகாஸி, ப⁴க³வதா ச விஸும் ஸம்முகா²விகப்பனா ந வுத்தா, ததா²பி ஸம்முகா²விகப்பனாபி வட்டதீ’’தி வத³ந்தி. தேனேவ மாதிகாஅட்ட²கதா²யம்பி (கங்கா². அட்ட². பரம்பரபோ⁴ஜனஸிக்கா²பத³வண்ணனா) ‘‘யோ பி⁴க்கு² பஞ்சஸு ஸஹத⁴ம்மிகேஸு அஞ்ஞதரஸ்ஸ ‘மய்ஹம் ப⁴த்தபச்சாஸம் துய்ஹம் த³ம்மீ’தி வா ‘விகப்பேமீ’தி வா ஏவம் ஸம்முகா² வா ‘இத்த²ன்னாமஸ்ஸ த³ம்மீ’தி வா ‘விகப்பேமீ’தி வா ஏவம் பரம்முகா² வா பட²மனிமந்தனம் அவிகப்பேத்வா பச்சா² நிமந்திதகுலே லத்³த⁴பி⁴க்க²தோ ஏகஸித்த²ம்பி அஜ்ஜோ²ஹரதி, பாசித்திய’’ந்தி வுத்தம்.

229. பஞ்சஹி போ⁴ஜனேஹி நிமந்திதஸ்ஸ யேன யேன பட²மம் நிமந்திதோ, தஸ்ஸ தஸ்ஸ போ⁴ஜனதோ உப்படிபாடியா அவிகப்பேத்வா வா பரஸ்ஸ பரஸ்ஸ போ⁴ஜனம் பரம்பரபோ⁴ஜனந்தி ஆஹ ‘‘ஸசே பன மூலனிமந்தனம் ஹேட்டா² ஹோதி, பச்சி²மம் பச்சி²மம் உபரி, தம் உபரிதோ பட்டா²ய பு⁴ஞ்ஜந்தஸ்ஸ ஆபத்தீ’’தி. ஹத்த²ம் அந்தோ பவேஸேத்வா ஸப்³ப³ஹேட்டி²மம் க³ண்ஹந்தஸ்ஸ மஜ்ஜே² டி²தம்பி அந்தோஹத்த²க³தம் ஹோதீதி ஆஹ ‘‘ஹத்த²ம் பன…பே… யதா² ததா² வா பு⁴ஞ்ஜந்தஸ்ஸ அனாபத்தீ’’தி. கீ²ரஸ்ஸ ரஸஸ்ஸ ச ப⁴த்தேன அமிஸ்ஸம் ஹுத்வா உபரி டி²தத்தா ‘‘கீ²ரம் வா ரஸம் வா பிவதோ அனாபத்தீ’’தி வுத்தம்.

மஹாஉபாஸகோதி கே³ஹஸாமிகோ. ‘‘மஹாஅட்ட²கதா²யம் ‘ஆபத்தீ’தி வசனேன குருந்தி³யம் ‘வட்டதீ’தி வசனம் விருத்³த⁴ம் விய தி³ஸ்ஸதி, த்³வின்னம்பி அதி⁴ப்பாயோ மஹாபச்சரியம் விபா⁴விதோ’’தி மஹாக³ண்டி²பதே³ஸு வுத்தம். ஸப்³பே³ நிமந்தேந்தீதி அகப்பியனிமந்தனேன நிமந்தேந்தி. ‘‘பரம்பரபோ⁴ஜனம் நாம பஞ்சன்னம் போ⁴ஜனானம் அஞ்ஞதரேன போ⁴ஜனேன நிமந்திதோ, தம் ட²பேத்வா அஞ்ஞம் பஞ்சன்னம் போ⁴ஜனானம் அஞ்ஞதரம் போ⁴ஜனம் பு⁴ஞ்ஜதி, ஏதம் பரம்பரபோ⁴ஜனம் நாமா’’தி வுத்தத்தா ஸதிபி பி⁴க்கா²சரியாய பட²மம் லத்³த⁴பா⁴வே ‘‘பிண்டா³ய சரித்வா லத்³த⁴ப⁴த்தம் பு⁴ஞ்ஜதி, ஆபத்தீ’’தி வுத்தம். அவிகப்பவஸேன ‘‘வசீகம்ம’’ந்தி வுத்தம். ஸேஸமேத்த² உத்தானமேவ. பரம்பரபோ⁴ஜனதா, ஸமயாபா⁴வோ, அஜ்ஜோ²ஹரணந்தி இமானி பனேத்த² தீணி அங்கா³னி.

பரம்பரபோ⁴ஜனஸிக்கா²பத³வண்ணனா நிட்டி²தா.

4. காணமாதாஸிக்கா²பத³வண்ணனா

230-231. சதுத்தே² காணாய மாதாதி காணாதி லத்³த⁴னாமாய தா³ரிகாய மாதா. கஸ்மா பனேஸா காணா நாம ஜாதாதி ஆஹ ‘‘ஸா கிரஸ்ஸா’’திஆதி³. இமிஸ்ஸா த³ஹரகாலே மாதாபிதரோ ஸினேஹவஸேன ‘‘அம்ம காணே, அம்ம காணே’’தி வோஹரிம்ஸு, ஸா தது³பாதா³ய காணா நாம ஜாதா, தஸ்ஸா ச மாதா ‘‘காணமாதா’’தி பாகடா அஹோஸீதி ஏவமேத்த² காரணம் வத³ந்தி. படியாலோகந்தி பச்சி²மம் தி³ஸம், பச்சாதி³ச்சந்தி வுத்தம் ஹோதி.

233. பூவக³ணனாய பாசித்தியந்தி முக²வட்டியா ஹேட்டி²மலேக²தோ உபரிட்டி²தபூவக³ணனாய பாசித்தியம். ‘‘த்³வத்திபத்தபூரா படிக்³க³ஹேதப்³பா³’’தி ஹி வசனதோ முக²வட்டியா ஹேட்டி²மலேக²ம் அனதிக்கந்தே த்³வே வா தயோ வா பத்தபூரே க³ஹேதும் வட்டதி.

235. அட்ட²கதா²ஸு பன…பே… வுத்தந்தி இத³ம் அட்ட²கதா²ஸு ததா² ஆக³தபா⁴வமத்ததீ³பனத்த²ம் வுத்தம், ந பன தஸ்ஸ வாத³ஸ்ஸ பதிட்டா²பனத்த²ம். அட்ட²கதா²ஸு வுத்தஞ்ஹி பாளியா ந ஸமேதி. ததுத்தரிக³ஹணே அனாபத்தித³ஸ்ஸனத்த²ஞ்ஹி ‘‘ஞாதகானம் பவாரிதான’’ந்தி வுத்தம். அஞ்ஞதா² ‘‘அனாபத்தி த்³வத்திபத்தபூரே படிக்³க³ண்ஹாதீ’’தி இமினாவ பமாணயுத்தக்³க³ஹணே அனாபத்திஸித்³தி⁴தோ ‘‘ஞாதகானம் பவாரிதான’’ந்தி விஸும் ந வத்தப்³ப³ம். யதி³ ஏவம் ‘‘தம் பாளியா ந ஸமேதீ’’தி கஸ்மா ந வுத்தந்தி? ஹேட்டா² ததுத்தரிஸிக்கா²பதே³ வுத்தனயேனேவ ஸக்கா விஞ்ஞாதுந்தி ந வுத்தம். வுத்தஞ்ஹி தத்த² (பாரா. அட்ட². 2.526) ‘‘அட்ட²கதா²ஸு பன ஞாதகபவாரிதட்டா²னே பகதியாவ ப³ஹும்பி வட்டதி, அச்சி²ன்னகாரணா பமாணமேவ வட்டதீதி வுத்தம், தம் பாளியா ந ஸமேதீ’’தி. ‘‘அபாதே²ய்யாதி³அத்தா²ய படியாதி³த’’ந்தி ஸஞ்ஞாய க³ண்ஹந்தஸ்ஸபி ஆபத்தியேவ அசித்தகத்தா ஸிக்கா²பத³ஸ்ஸ. அத்தனோயேவ க³ஹணத்த²ம் ‘‘இமஸ்ஸ ஹத்தே² தே³ஹீ’’தி வசனேனபி ஆபஜ்ஜனதோ ‘‘வசீகம்ம’’ந்தி வுத்தம். ஸேஸம் உத்தானமேவ. வுத்தலக்க²ணபூவமந்த²தா, அஸேஸகதா, அபடிப்பஸ்ஸத்³த⁴க³மனதா, ந ஞாதகாதி³தா, அதிரேகபடிக்³க³ஹணந்தி இமானி பனேத்த² பஞ்ச அங்கா³னி.

காணமாதாஸிக்கா²பத³வண்ணனா நிட்டி²தா.

5. பட²மபவாரணாஸிக்கா²பத³வண்ணனா

236. பஞ்சமே பு⁴த்தாவீதி பு⁴த்தாவினோ பு⁴த்தவந்தோ, கதப⁴த்தகிச்சாதி வுத்தம் ஹோதி. பவாரிதாதி ஏத்த² சதூஸு பவாரணாஸு யாவத³த்த²பவாரணா படிக்கே²பபவாரணா ச லப்³ப⁴தீதி ஆஹ ‘‘ப்³ராஹ்மணேன…பே… படிக்கே²பபவாரணாய பவாரிதா’’தி. சதுப்³பி³தா⁴ ஹி பவாரணா வஸ்ஸம்வுத்த²பவாரணா, பச்சயபவாரணா, படிக்கே²பபவாரணா, யாவத³த்த²பவாரணாதி. தத்த² ‘‘அனுஜானாமி, பி⁴க்க²வே, வஸ்ஸம்வுத்தா²னம் பி⁴க்கூ²னம் தீஹி டா²னேஹி பவாரேது’’ந்தி (மஹாவ. 209) அயம் வஸ்ஸம்வுத்த²பவாரணா. பகாரேஹி தி³ட்டா²தீ³ஹி வாரேதி ஸங்கா⁴தி³கே ப⁴ஜாபேதி ப⁴த்தே கரோதி ஏதாயாதி பவாரணா, ஆபத்திவிஸோத⁴னாய அத்தவோஸ்ஸக்³கோ³காஸதா³னம். ஸா பன யஸ்மா யேபு⁴ய்யேன வஸ்ஸம்வுத்தே²ஹி காதப்³பா³ வுத்தா, தஸ்மா ‘‘வஸ்ஸம்வுத்த²பவாரணா’’தி வுச்சதி. ‘‘இச்சா²மஹம், ப⁴ந்தே, ஸங்க⁴ம் சாதுமாஸம் பே⁴ஸஜ்ஜேன பவாரேது’’ந்தி (பாசி. 303) ச, ‘‘அஞ்ஞத்ர புன பவாரணாய அஞ்ஞத்ர நிச்சபவாரணாயா’’தி (பாசி. 306) ச அயம் பச்சயபவாரணா பவாரேதி பச்சயே இச்சா²பேதி ஏதாயாதி கத்வா, சீவராதீ³ஹி உபனிமந்தனாயேதம் அதி⁴வசனம். ‘‘பவாரிதோ நாம அஸனம் பஞ்ஞாயதி, போ⁴ஜனம் பஞ்ஞாயதி, ஹத்த²பாஸே டி²தோ அபி⁴ஹரதி, படிக்கே²போ பஞ்ஞாயதி, ஏஸோ பவாரிதோ நாமா’’தி (பாசி. 239) அயம் படிக்கே²பபவாரணா. விப்பகதபோ⁴ஜனதாதி³பஞ்சங்க³ஸஹிதோ போ⁴ஜனபடிக்கே²போயேவ ஹேத்த² பகாரயுத்தா வாரணாதி பவாரணா. ‘‘பணீதேன கா²த³னீயேன போ⁴ஜனீயேன ஸஹத்தா² ஸந்தப்பேஸி ஸம்பவாரேஸீ’’தி (ம. நி. 1.363) அயம் யாவத³த்த²பவாரணா. யாவத³த்த²ம் போ⁴ஜனஸ்ஸ பவாரணா யாவத³த்த²பவாரணா.

237. தி-காரம் அவத்வா…பே… வத்தும் வட்டதீதி இத³ம் வத்தப்³பா³காரத³ஸ்ஸனத்த²ம் வுத்தம். ‘‘தி-காரே பன வுத்தேபி அகதம் நாம ந ஹோதீ’’தி தீஸுபி க³ண்டி²பதே³ஸு வுத்தம்.

238-239. பவாரிதோதி படிக்கே²பிதோ. யோ ஹி பு⁴ஞ்ஜந்தோ பரிவேஸகேன உபனீதம் போ⁴ஜனம் அனிச்ச²ந்தோ படிக்கி²பதி, ஸோ தேன பவாரிதோ படிக்கே²பிதோ நாம ஹோதி. ப்³யஞ்ஜனம் பன அனாதி³யித்வா அத்த²மத்தமேவ த³ஸ்ஸேதும் ‘‘கதபவாரணோ கதபடிக்கே²போ’’தி வுத்தம். யஸ்மா ‘‘அஸன’’ந்தி இமினாவ பதே³ன ‘‘பு⁴த்தாவீ’’தி இமஸ்ஸ அத்தோ² வுத்தோ, தஸ்மா ந தஸ்ஸ கிஞ்சி பயோஜனம் விஸும் உபலப்³ப⁴தி. யதி³ ஹி உபலப்³பே⁴ய்ய, பவாரணா ச²ளங்க³ஸமன்னாக³தா ஆபஜ்ஜேய்யாதி மனஸி கத்வா பஞ்சஸமன்னாக³தத்தம்யேவ த³ஸ்ஸேதும் ‘‘வுத்தம்பி சேத’’ந்திஆதி³னா பாளிம் ஆஹரதி. கேசி பன ‘‘ஹத்த²பாஸே டி²தோ அபி⁴ஹரதீ’’தி ஏகமேவ அங்க³ம் கத்வா ‘‘சதுரங்க³ஸமன்னாக³தா பவாரணா’’திபி வத³ந்தி.

அம்பி³லபாயாஸாதீ³ஸூதி ஆதி³-ஸத்³தே³ன கீ²ரபாயாஸாதி³ம் ஸங்க³ண்ஹாதி. தத்த² அம்பி³லபாயாஸக்³க³ஹணேன தக்காதி³அம்பி³லஸம்யுத்தா க⁴னயாகு³ வுத்தா. கீ²ரபாயாஸக்³க³ஹணேன கீ²ரஸம்யுத்தா யாகு³ ஸங்க³ய்ஹதி. பவாரணம் ந ஜனேதீதி அனதிரித்தபோ⁴ஜனாபத்தினிப³ந்த⁴னம் படிக்கே²பம் ந ஸாதே⁴தி. கதோபி படிக்கே²போ அனதிரித்தபோ⁴ஜனாபத்தினிப³ந்த⁴னோ ந ஹோதீதி அகதட்டா²னேயேவ திட்ட²தீதி ஆஹ ‘‘பவாரணம் ந ஜனேதீ’’தி. ‘‘யாகு³-ஸத்³த³ஸ்ஸ பவாரணஜனகயாகு³யாபி ஸாதா⁴ரணத்தா ‘யாகு³ம் க³ண்ஹதா²’தி வுத்தேபி பவாரணா ஹோதீதி பவாரணம் ஜனேதியேவாதி வுத்த’’ந்தி தீஸுபி க³ண்டி²பதே³ஸு வுத்தம், தம் பரதோ தத்தே²வ ‘‘ப⁴த்தமிஸ்ஸகம் யாகு³ம் ஆஹரித்வா’’தி ஏத்த² வுத்தகாரணேன ந ஸமேதி. வுத்தஞ்ஹி தத்த² ‘‘ஹேட்டா² அயாகு³கே நிமந்தனே உத³ககஞ்ஜிககீ²ராதீ³ஹி ஸத்³தி⁴ம் மத்³தி³தம் ப⁴த்தமேவ ஸந்தா⁴ய ‘யாகு³ம் க³ண்ஹதா²’தி வுத்தத்தா பவாரணா ஹோதி, ‘ப⁴த்தமிஸ்ஸகம் யாகு³ம் ஆஹரித்வா’தி ஏத்த² பன விஸும் யாகு³யா விஜ்ஜமானத்தா பவாரணா ந ஹோதீ’’தி. தஸ்மா தத்த² வுத்தனயேனேவ கீ²ராதீ³ஹி ஸம்மத்³தி³தம் ப⁴த்தமேவ ஸந்தா⁴ய ‘‘யாகு³ம் க³ண்ஹதா²’’தி வுத்தத்தா யாகு³யா ச தத்த² அபா⁴வதோ பவாரணா ஹோதீதி ஏவமேத்த² காரணம் வத்தப்³ப³ம். ஏவஞ்ஹி ஸதி பரதோ ‘‘யேனாபுச்சி²தோ, தஸ்ஸ அத்தி²தாயா’’தி அட்ட²கதா²யம் வுத்தகாரணேனபி ஸம்ஸந்த³தி, அஞ்ஞதா² க³ண்டி²பதே³ஸுயேவ புப்³பா³பரவிரோதோ⁴ ஆபஜ்ஜதி. அட்ட²கதா²வசனேன ச ந ஸமேதி. ஸசே…பே… பஞ்ஞாயதீதி இமினா வுத்தப்பமாணஸ்ஸ மச்ச²மம்ஸக²ண்ட³ஸ்ஸ நஹாருனோ வா ஸப்³பா⁴வமத்தம் த³ஸ்ஸேதி. தாஹீதி புது²காஹி.

ஸாலிவீஹியவேஹி கதஸத்தூதி யேபு⁴ய்யனயேன வுத்தம், ஸத்த த⁴ஞ்ஞானி பன ப⁴ஜ்ஜித்வா கதோபி ஸத்துயேவ. தேனேவாஹ ‘‘கங்கு³வரக…பே… ஸத்துஸங்க³ஹமேவ க³ச்ச²தீ’’தி. ஸத்துமோத³கோதி ஸத்துயோ பிண்டே³த்வா கதோ அபக்கோ ஸத்துகு³ளோ. பஞ்சன்னம் போ⁴ஜனானம் அஞ்ஞதரவஸேன விப்பகதபோ⁴ஜனபா⁴வஸ்ஸ உபச்சி²ன்னத்தா ‘‘முகே² ஸாஸபமத்தம்பி…பே… ந பவாரேதீ’’தி வுத்தம். ‘‘அகப்பியமம்ஸம் படிக்கி²பதி, ந பவாரேதீ’’தி வசனதோ ஸசே ஸங்கி⁴கம் லாப⁴ம் அத்தனோ அபாபுணந்தம் ஜானித்வா வா அஜானித்வா வா படிக்கி²பதி, ந பவாரேதி படிக்கி²பிதப்³ப³ஸ்ஸேவ படிக்கி²த்தத்தா. அலஜ்ஜிஸந்தகம் படிக்கி²பந்தோபி ந பவாரேதி. அவத்து²தாயாதி அனதிரித்தாபத்திஸாதி⁴காய பவாரணாய அவத்து²பா⁴வதோ. ஏதேன படிக்கி²பிதப்³ப³ஸ்ஸேவ படிக்கி²த்தபா⁴வம் தீ³பேதி. யஞ்ஹி படிக்கி²பிதப்³ப³ம் ஹோதி, தஸ்ஸ படிக்கே²போ ஆபத்திஅங்க³ம் ந ஹோதீதி தம் ‘‘பவாரணாய அவத்தூ²’’தி வுச்சதி.

உபனாமேதீதி இமினா காயாபி⁴ஹாரம் த³ஸ்ஸேதி. ஹத்த²பாஸதோ ப³ஹி டி²தஸ்ஸ ஸதிபி தா³துகாமாபி⁴ஹாரே படிக்கி²பந்தஸ்ஸ தூ³ரபா⁴வேனேவ பவாரணாய அபா⁴வதோ தே²ரஸ்ஸபி தூ³ரபா⁴வமத்தம் க³ஹேத்வா பவாரணாய அபா⁴வம் த³ஸ்ஸேந்தோ ‘‘தே²ரஸ்ஸ தூ³ரபா⁴வதோ’’தி ஆஹ, ந பன தே²ரஸ்ஸ அபி⁴ஹாரஸப்³பா⁴வதோ. ஸசேபி க³ஹேத்வா க³தோ ஹத்த²பாஸே டி²தோ ஹோதி, கிஞ்சி பன அவத்வா ஆதா⁴ரகட்டா²னே டி²தத்தா அபி⁴ஹாரோ நாம ந ஹோதீதி ‘‘தூ³தஸ்ஸ ச அனபி⁴ஹரணதோ’’தி வுத்தம். ‘‘க³ஹேத்வா க³தேன ‘ப⁴த்தம் க³ண்ஹதா²’தி வுத்தே அபி⁴ஹாரோ நாம ஹோதீதி ‘ஸசே பன க³ஹேத்வா ஆக³தோ பி⁴க்கு²…பே… பவாரணா ஹோதீ’தி வுத்த’’ந்தி தீஸுபி க³ண்டி²பதே³ஸு வுத்தம். கேசி பன ‘‘பத்தம் கிஞ்சி உபனாமேத்வா ‘இமம் ப⁴த்தம் க³ண்ஹதா²’தி வுத்தந்தி க³ஹேதப்³ப³’’ந்தி வத³ந்தி, தம் யுத்தம் விய தி³ஸ்ஸதி வாசாபி⁴ஹாரஸ்ஸ இத⁴ அனதி⁴ப்பேதத்தா.

பரிவேஸனாயாதி ப⁴த்தக்³கே³. அபி⁴ஹடாவ ஹோதீதி பரிவேஸகேனேவ அபி⁴ஹடா ஹோதி. ததோ தா³துகாமதாய க³ண்ஹந்தம் படிக்கி²பந்தஸ்ஸ பவாரணா ஹோதீதி ஏத்த² அக³ண்ஹந்தம்பி படிக்கி²பதோ பவாரணா ஹோதியேவ. கஸ்மா? தா³துகாமதாய அபி⁴ஹடத்தா. ‘‘தஸ்மா ஸா அபி⁴ஹடாவ ஹோதீ’’தி ஹி வுத்தம். தேனேவ தீஸுபி க³ண்டி²பதே³ஸு ‘‘தா³துகாமாபி⁴ஹாரே ஸதி கேவலம் ‘த³ஸ்ஸாமீ’தி க³ஹணமேவ அபி⁴ஹாரோ நாம ந ஹோதி, ‘த³ஸ்ஸாமீ’தி க³ண்ஹந்தேபி அக³ண்ஹந்தேபி தா³துகாமாபி⁴ஹாரோவ அபி⁴ஹாரோ நாம ஹோதி, தஸ்மா க³ஹணஸமயே வா அக்³க³ஹணஸமயே வா தம் படிக்கி²பதோ பவாரணா ஹோதீ’’தி வுத்தம். இதா³னி அஸதி தஸ்ஸ தா³துகாமாபி⁴ஹாரே க³ஹணஸமயேபி படிக்கி²பதோ பவாரணா ந ஹோதீதி த³ஸ்ஸேதும் ‘‘ஸசே பனா’’திஆதி³ வுத்தம்.

‘‘ரஸம் க³ண்ஹதா²’’தி அபவாரணஜனகஸ்ஸ நாமம் க³ஹேத்வா வுத்தத்தா ‘‘தம் ஸுத்வா படிக்கி²பதோ பவாரணா நத்தீ²’’தி வுத்தம். மச்ச²ரஸம் மம்ஸரஸந்தி ஏத்த² பன ந கேவலம் மச்ச²ஸ்ஸ ரஸம் மச்ச²ரஸமிச்சேவ விஞ்ஞாயதி, அத² கோ² மச்சோ² ச மச்ச²ரஸஞ்ச மச்ச²ரஸந்தி ஏவம் பவாரணஜனகஸாதா⁴ரணனாமவஸேனபி விஞ்ஞாயமானத்தா தம் படிக்கி²பதோ பவாரணாவ ஹோதி. பரதோ மச்ச²ஸூபந்தி ஏத்தா²பி ஏஸேவ நயோ. ‘‘இத³ம் க³ண்ஹதா²’’தி வுத்தேபீதி ஏத்த² ஏவம் அவத்வாபி பவாரணபஹோனகம் யம்கிஞ்சி அபி⁴ஹடம் படிக்கி²பதோ பவாரணா ஹோதியேவாதி த³ட்ட²ப்³ப³ம். கரம்ப³கோதி மிஸ்ஸகாதி⁴வசனமேதம். யஞ்ஹி அஞ்ஞேனஞ்ஞேன மிஸ்ஸேத்வா கரோந்தி, ஸோ ‘‘கரம்ப³கோ’’தி வுச்சதி. ஸோ ஸசேபி மம்ஸேன மிஸ்ஸேத்வா கதோவ ஹோதி, ‘‘கரம்ப³கம் க³ண்ஹதா²’’தி அபவாரணாரஹஸ்ஸ நாமேன வுத்தத்தா படிக்கி²பதோ பவாரணா ந ஹோதி. ‘‘மம்ஸகரம்ப³கம் க³ண்ஹதா²’’தி வுத்தே பன மம்ஸமிஸ்ஸகம் க³ண்ஹதா²தி வுத்தம் ஹோதி, தஸ்மா பவாரணாவ ஹோதி.

‘‘உத்³தி³ஸ்ஸகத’’ந்தி மஞ்ஞமானோதி ஏத்த² ‘‘வத்து²னோ கப்பியத்தா அகப்பியஸஞ்ஞாய படிக்கி²பதோபி அசித்தகத்தா இமஸ்ஸ ஸிக்கா²பத³ஸ்ஸ பவாரணா ஹோதீ’’தி வத³ந்தி. ‘‘ஹேட்டா² அயாகு³கே நிமந்தனே உத³ககஞ்ஜிககீ²ராதீ³ஹி ஸத்³தி⁴ம் மத்³தி³தம் ப⁴த்தமேவ ஸந்தா⁴ய ‘யாகு³ம் க³ண்ஹதா²’தி வுத்தத்தா பவாரணா ஹோதி, ‘ப⁴த்தமிஸ்ஸகம் யாகு³ம் ஆஹரித்வா’தி ஏத்த² பன விஸும் யாகு³யா விஜ்ஜமானத்தா பவாரணா ந ஹோதீ’’தி வத³ந்தி. அயமேத்த² அதி⁴ப்பாயோதி ‘‘யேனாபுச்சி²தோ’’திஆதி³னா வுத்தமேவத்த²ம் ஸந்தா⁴ய வத³தி. காரணம் பனேத்த² து³த்³த³ஸந்தி ஏத்த² ஏகே தாவ வத³ந்தி ‘‘யஸ்மா யாகு³மிஸ்ஸகம் நாம ப⁴த்தமேவ ந ஹோதி, கீ²ராதி³கம்பி ஹோதியேவ, தஸ்மா கரம்ப³கே விய பவாரணாய ந ப⁴விதப்³ப³ம். ஏவஞ்ச ஸதி யாகு³ ப³ஹுதரா வா ஹோதி ஸமஸமா வா, ந பவாரேதி. ‘யாகு³ மந்தா³, ப⁴த்தம் ப³ஹுதரம், பவாரேதீ’தி ஏத்த² காரணம் து³த்³த³ஸ’’ந்தி. கேசி பன வத³ந்தி ‘‘யாகு³மிஸ்ஸகம் நாம ப⁴த்தம், தஸ்மா தம் படிக்கி²பதோ பவாரணாய ஏவ ப⁴விதப்³ப³ம். ஏவஞ்ச ஸதி ‘இத⁴ பவாரணா ஹோதி ந ஹோதீ’தி ஏத்த² காரணம் து³த்³த³ஸ’’ந்தி.

யதா² சேத்த² காரணம் து³த்³த³ஸம், ஏவம் பரதோ ‘‘மிஸ்ஸகம் க³ண்ஹதா²’’தி ஏத்தா²பி காரணம் து³த்³த³ஸமேவாதி வேதி³தப்³ப³ம். ந ஹி பவாரணப்பஹோனகஸ்ஸ அப்பப³ஹுபா⁴வோ பவாரணாய பா⁴வாபா⁴வனிமித்தம், கிஞ்சரஹி பவாரணஜனகஸ்ஸ நாமக்³க³ஹணமேவேத்த² பமாணம், தஸ்மா ‘‘இத³ஞ்ச கரம்ப³கேன ந ஸமானேதப்³ப³’’ந்திஆதி³னா யம்பி காரணம் வுத்தம், தம்பி புப்³பே³ வுத்தேன ஸம்ஸந்தி³யமானம் ந ஸமேதி. யதி³ ஹி ‘‘மிஸ்ஸக’’ந்தி ப⁴த்தமிஸ்ஸகேயேவ ருள்ஹம் ஸியா, ஏவம் ஸதி யதா² ‘‘ப⁴த்தமிஸ்ஸகம் க³ண்ஹதா²’’தி வுத்தே ப⁴த்தம் ப³ஹுதரம் வா ஸமம் வா அப்பதரம் வா ஹோதி, பவாரேதியேவ, ஏவம் ‘‘மிஸ்ஸகம் க³ண்ஹதா²’’தி வுத்தேபி அப்பதரேபி ப⁴த்தே பவாரணாய ப⁴விதப்³ப³ம் மிஸ்ஸகந்தி ப⁴த்தமிஸ்ஸகேயேவ ருள்ஹத்தா. ததா² ஹி ‘‘மிஸ்ஸகந்தி ப⁴த்தமிஸ்ஸகேயேவ ருள்ஹவோஹாரத்தா இத³ம் பன ‘ப⁴த்தமிஸ்ஸகமேவா’தி வுத்த’’ந்தி தீஸுபி க³ண்டி²பதே³ஸு வுத்தம். அத² ‘‘மிஸ்ஸக’’ந்தி ப⁴த்தமிஸ்ஸகே ருள்ஹம் ந ஹோதி, மிஸ்ஸகப⁴த்தம் பன ஸந்தா⁴ய ‘‘மிஸ்ஸகம் க³ண்ஹதா²’’தி வுத்தந்தி. ஏவம்பி யதா² அயாகு³கே நிமந்தனே கீ²ராதீ³ஹி ஸத்³தி⁴ம் மத்³தி³தம் ப⁴த்தமேவ ஸந்தா⁴ய ‘‘யாகு³ம் க³ண்ஹதா²’’தி வுத்தே பவாரணா ஹோதி, ஏவமிதா⁴பி மிஸ்ஸகப⁴த்தமேவ ஸந்தா⁴ய ‘‘மிஸ்ஸகம் க³ண்ஹதா²’’தி வுத்தே ப⁴த்தம் அப்பம் வா ஹோது ப³ஹு வா, பவாரணா ஏவ ஸியா. தஸ்மா ‘‘மிஸ்ஸக’’ந்தி ப⁴த்தமிஸ்ஸகே ருள்ஹம் வா ஹோது ஸந்தா⁴யபா⁴ஸிதம் வா, உப⁴யத்தா²பி புப்³பே³னாபரம் ந ஸமேதீதி கிமேத்த² காரணசிந்தாய, ஈதி³ஸேஸு பன டா²னேஸு அட்ட²கதா²பமாணேனேவ க³ந்தப்³ப³ந்தி அயம் அம்ஹாகம் க²ந்தி.

‘‘விஸும் கத்வா தே³தீதி ப⁴த்தஸ்ஸ உபரி டி²தம் ரஸாதி³ம் விஸும் க³ஹேத்வா தே³தீ’’தி தீஸுபி க³ண்டி²பதே³ஸு வுத்தம். கேனசி பன ‘‘யதா² ப⁴த்தஸித்த²ம் ந பததி, ததா² கா³ள்ஹம் ஹத்தே²ன பீளேத்வா பரிஸ்ஸாவேத்வா தே³தீ’’தி வுத்தம். ததா²பி காரணம் ந தி³ஸ்ஸதி. யதா² ஹி ப⁴த்தமிஸ்ஸகம் யாகு³ம் ஆஹரித்வா ‘‘யாகு³ம் க³ண்ஹதா²’’தி வத்வா யாகு³மிஸ்ஸகம் ப⁴த்தம்பி தே³ந்தம் படிக்கி²பதோ பவாரணா ந ஹோதி, ஏவமிதா⁴பி ப³ஹுகீ²ரரஸாதீ³ஸு ப⁴த்தேஸு ‘‘கீ²ரம் க³ண்ஹதா²’’திஆதீ³னி வத்வா கீ²ராதீ³னி வா தே³து கீ²ராதி³மிஸ்ஸகப⁴த்தம் வா, உப⁴யதா²பி பவாரணாய ந ப⁴விதப்³ப³ம், தஸ்மா ‘‘விஸும் கத்வா தே³தீ’’தி தேனாகாரேன தே³ந்தம் ஸந்தா⁴ய வுத்தம், ந பன ப⁴த்தமிஸ்ஸகம் கத்வா தி³ய்யமானம் படிக்கி²பதோ பவாரணா ஹோதீதி த³ஸ்ஸனத்த²ந்தி க³ஹேதப்³ப³ம். யதி³ பன ப⁴த்தமிஸ்ஸகம் கத்வா தி³ய்யமானே பவாரணா ஹோதீதி அதி⁴ப்பாயேன அட்ட²கதா²யம் ‘‘விஸும் கத்வா தே³தீ’’தி வுத்தம், ஏவம் ஸதி அட்ட²கதா²யேவேத்த² பமாணந்தி க³ஹேதப்³ப³ம், ந பன காரணந்தரம் க³வேஸிதப்³ப³ம்.

ஸசே உக்குடிகம் நிஸின்னோ பாதே³ அமுஞ்சித்வாபி பூ⁴மியம் நிஸீத³தி, இரியாபத²ம் விகோபேந்தோ நாம ஹோதீதி உக்குடிகாஸனம் அவிகோபேத்வாவ ஸுகே²ன நிஸீதி³தும் ‘‘தஸ்ஸ பன ஹேட்டா²…பே… நிஸீத³னகம் தா³தப்³ப³’’ந்தி வுத்தம். ‘‘ஆஸனம் அசாலேத்வாதி பீடே² பு²ட்டோ²காஸதோ ஆனிஸத³மம்ஸம் அமோசேத்வா, அனுட்ட²ஹித்வாதி வுத்தம் ஹோதி, அதி³ன்னாதா³னே விய டா²னாசாவனம் ந க³ஹேதப்³ப³’’ந்தி தீஸுபி க³ண்டி²பதே³ஸு வுத்தம்.

அகப்பியகதந்தி ஏத்த² அகப்பியகதஸ்ஸேவ அனதிரித்தபா⁴வதோ கப்பியம் அகாராபேத்வா தஸ்மிம் பத்தே பக்கி²த்தமூலப²லாதி³யேவ அதிரித்தம் ந ஹோதி, ஸேஸம் பன பத்தபரியாபன்னம் அதிரித்தமேவ ஹோதி, பரிபு⁴ஞ்ஜிதும் வட்டதி. தம் பன மூலப²லாதி³ம் பரிபு⁴ஞ்ஜிதுகாமேன ததோ நீஹரித்வா கப்பியம் காராபேத்வா அஞ்ஞஸ்மிம் பா⁴ஜனே ட²பேத்வா அதிரித்தம் காராபேத்வா பு⁴ஞ்ஜிதப்³ப³ம்.

ஸோ புன காதும் ந லப⁴தீதி தஸ்மிம்யேவ பா⁴ஜனே கரியமானம் பட²மம் கதேன ஸத்³தி⁴ம் கதம் ஹோதீதி புன ஸோயேவ காதும் ந லப⁴தி, அஞ்ஞோ லப⁴தி. அஞ்ஞஸ்மிம் பன பா⁴ஜனே தேன வா அஞ்ஞேன வா காதும் வட்டதி. தேனாஹ ‘‘யேன அகதம், தேன காதப்³ப³ம். யஞ்ச அகதம், தம் காதப்³ப³’’ந்தி. தேனபீதி ஏத்த² பி-ஸத்³தோ³ ந கேவலம் அஞ்ஞேன வாதி இமமத்த²ம் தீ³பேதி. ஏவம் கதந்தி அஞ்ஞஸ்மிம் பா⁴ஜனே கதம். பேஸேத்வாதி அனுபஸம்பன்னஸ்ஸ ஹத்தே² பேஸேத்வா. இமஸ்ஸ வினயகம்மபா⁴வதோ ‘‘அனுபஸம்பன்னஸ்ஸ ஹத்தே² டி²தம் ந காரேதப்³ப³’’ந்தி வுத்தம்.

ஸசே பன ஆமிஸஸம்ஸட்டா²னீதி ஏத்த² ஸசே முக²க³தேனபி அனதிரித்தேன ஆமிஸேன ஸம்ஸட்டா²னி ஹோந்தி, பாசித்தியமேவாதி வேதி³தப்³ப³ம். தஸ்மா பவாரிதேன போ⁴ஜனம் அதிரித்தம் காராபேத்வா பு⁴ஞ்ஜந்தேனபி யதா² அகதேன மிஸ்ஸம் ந ஹோதி, ஏவம் முக²ஞ்ச ஹத்த²ஞ்ச ஸுத்³த⁴ம் கத்வா பு⁴ஞ்ஜிதப்³ப³ம். கிஞ்சாபி அப்பவாரிதஸ்ஸ புரேப⁴த்தம் யாமகாலிகாதீ³னி ஆஹாரத்தா²ய பரிபு⁴ஞ்ஜதோபி அனாபத்தி, பவாரிதஸ்ஸ பன பவாரணமூலகம் து³க்கடம் ஹோதியேவாதி ‘‘யாமகாலிகம்…பே… அஜ்ஜோ²ஹாரே ஆபத்தி து³க்கடஸ்ஸா’’தி பாளியம் வுத்தம்.

241. காயேன பு⁴ஞ்ஜனதோ வாசாய ஆணாபேத்வா அதிரித்தம் அகாராபனதோ ச ஆபஜ்ஜதீதி ‘‘காயவாசதோ’’தி வுத்தம். ஸேஸமேத்த² உத்தானமேவ. பவாரிதபா⁴வோ, ஆமிஸஸ்ஸ அனதிரித்ததா, காலே அஜ்ஜோ²ஹரணந்தி இமானி பனேத்த² தீணி அங்கா³னி.

பட²மபவாரணாஸிக்கா²பத³வண்ணனா நிட்டி²தா.

6. து³தியபவாரணாஸிக்கா²பத³வண்ணனா

243. ச²ட்டே² ஸாதா⁴ரணமேவாதி ‘‘ஹந்த³ பி⁴க்கு² கா²த³ வா’’திஆதி³னா வுத்தபவாரணாய ஸாதா⁴ரணம். ‘‘பு⁴த்தஸ்மிம் பாசித்திய’’ந்தி மாதிகாயம் வுத்தத்தா போ⁴ஜனபரியோஸானே ஆபத்தி, ந அஜ்ஜோ²ஹாரே அஜ்ஜோ²ஹாரே. அபி⁴ஹட்டு²ம் பவாரேதி, ஆபத்தி பாசித்தியஸ்ஸாதி இத³ஞ்ச போ⁴ஜனபரியோஸானம்யேவ ஸந்தா⁴ய வுத்தந்தி வேதி³தப்³ப³ம். ஸேஸமேத்த² உத்தானமேவ. பவாரிததா, பவாரிதஸஞ்ஞிதா, ஆஸாத³னாபேக்க²தா, அனதிரித்தேன அபி⁴ஹட்டு²ம் பவாரணா, போ⁴ஜனபரியோஸானந்தி இமானி பனேத்த² பஞ்ச அங்கா³னி.

து³தியபவாரணாஸிக்கா²பத³வண்ணனா நிட்டி²தா.

7. விகாலபோ⁴ஜனஸிக்கா²பத³வண்ணனா

247. ஸத்தமே அக்³க³ஸமஜ்ஜோதி உத்தமம் நச்சம். தம் கிர பப்³ப³தமத்த²கே ட²த்வா ஏகம் தே³வதம் உத்³தி³ஸ்ஸ கரோந்தி. நடானம் நாடகானி நடனாடகானி, ஸீதாஹரணாதீ³னி. அபஞ்ஞத்தே ஸிக்கா²பதே³தி ஊனவீஸதிவஸ்ஸஸிக்கா²பதே³ அபஞ்ஞத்தே. அத³ம்ஸூதி ‘‘விஹாரம் நேத்வா கா²தி³ஸ்ஸதா²’’தி அத³ம்ஸு.

248-249. மூலகமூலாதீ³னி உபதே³ஸதோயேவ வேதி³தப்³பா³னி. ந ஹி தானி பரியாயந்தரேன வுச்சமானானிபி ஸக்கா விஞ்ஞாதும். பரியாயந்தரேபி ஹி வுச்சமானே தம் தம் நாமம் அஜானந்தானம் ஸம்மோஹோயேவ ஸியா, தஸ்மா தத்த² ந கிஞ்சி வக்கா²ம. கா²த³னீயத்த²ந்தி கா²த³னீயேன கத்தப்³ப³கிச்சம். நேவ ப²ரந்தீதி ந நிப்பா²தே³ந்தி. தேஸு தேஸு ஜனபதே³ஸூதி ஏத்த² ‘‘ஏகஸ்மிம் ஜனபதே³ ஆஹாரகிச்சம் ஸாதே⁴ந்தம் ஸேஸஜனபதே³ஸுபி ந கப்பதீ’’தி வத³ந்தி. ருக்க²வல்லிஆதீ³னந்தி ஹேட்டா² வுத்தமேவ ஸம்பிண்டே³த்வா வுத்தம். அந்தோபத²வீக³தோதி ஸாலகல்யாணீக²ந்த⁴ம் ஸந்தா⁴ய வுத்தம். ஸப்³ப³கப்பியானீதி மூலக²ந்த⁴தசபத்தாதி³வஸேன ஸப்³ப³ஸோ கப்பியானி. தேஸம்பி நாமவஸேன ந ஸக்கா பரியந்தம் த³ஸ்ஸேதுந்தி ஸம்ப³ந்தோ⁴. அச்சி²வாதீ³னம் அபரிபக்கானேவ ப²லானி யாவஜீவிகானீதி த³ஸ்ஸேதும் ‘‘அபரிபக்கானீ’’தி வுத்தம்.

ஹரீதகாதீ³னம் அட்டீ²னீதி ஏத்த² மிஞ்ஜம் படிச்சா²தே³த்வா டி²தகபாலானி யாவஜீவிகானீதி ஆசரியா. மிஞ்ஜம்பி யாவஜீவிகந்தி ஏகே. ஹிங்கூ³தி ஹிங்கு³ருக்க²தோ பக்³க⁴ரிதனிய்யாஸோ. ஹிங்கு³ஜதுஆத³யோபி ஹிங்கு³விகதியோ ஏவ. தத்த² ஹிங்கு³ஜது நாம ஹிங்கு³ருக்க²ஸ்ஸ த³ண்ட³பத்தானி பசித்வா கதனிய்யாஸோ, ஹிங்கு³ஸிபாடிகம் நாம ஹிங்கு³பத்தானி பசித்வா கதனிய்யாஸோ. ‘‘அஞ்ஞேன மிஸ்ஸேத்வா கதோ’’திபி வத³ந்தி. தகந்தி அக்³க³கோடியா நிக்க²ந்தஸிலேஸோ. தகபத்திந்தி பத்ததோ நிக்க²ந்தஸிலேஸோ. தகபண்ணிந்தி பலாஸே ப⁴ஜ்ஜித்வா கதஸிலேஸோ. ‘‘த³ண்ட³தோ நிக்க²ந்தஸிலேஸோ திபி வத³ந்தி. ஸேஸமேத்த² உத்தானமேவ. விகாலதா, யாவகாலிகதா, அஜ்ஜோ²ஹரணந்தி இமானி பனேத்த² தீணி அங்கா³னி.

விகாலபோ⁴ஜனஸிக்கா²பத³வண்ணனா நிட்டி²தா.

8. ஸன்னிதி⁴காரகஸிக்கா²பத³வண்ணனா

252-3. அட்ட²மே தாதி³ஸந்தி அஸூபப்³யஞ்ஜனம். யம்கிஞ்சி யாவகாலிகம் வா யாமகாலிகம் வாதி ஏத்த² ‘‘யாமகாலிக’’ந்தி இமினா ந கேவலம் யாவகாலிகே ஏவ ஸன்னிதி⁴பச்சயா பாசித்தியம், அத² கோ² யாமகாலிகேபீதி த³ஸ்ஸேதி. நனு ச யாமகாலிகம் நேவ கா²த³னீயேஸு அந்தோக³த⁴ம், ந போ⁴ஜனீயேஸு. தேனேவ பத³பா⁴ஜனீயே ‘‘கா²த³னீயம் நாம பஞ்ச போ⁴ஜனானி யாமகாலிகம் ஸத்தாஹகாலிகம் யாவஜீவிகம் ட²பேத்வா அவஸேஸம் கா²த³னீயம் நாம. போ⁴ஜனீயம் நாம பஞ்ச போ⁴ஜனானீ’’தி வுத்தம், ‘‘யோ பன பி⁴க்கு² ஸன்னிதி⁴காரகம் கா²த³னீயம் வா போ⁴ஜனீயம் வா கா²தே³ய்ய வா பு⁴ஞ்ஜேய்ய வா, பாசித்திய’’ந்தி ச வுத்தம், தஸ்மா யாமகாலிகே பாசித்தியேன ப⁴விதப்³ப³ந்தி கத²ம் விஞ்ஞாயதீதி? வுச்சதே – பத³பா⁴ஜனே கா²த³னீய-ஸத்³த³ஸ்ஸ அத்த²த³ஸ்ஸனத்த²ம் ‘‘யாமகாலிகம் ட²பேத்வா’’தி வுத்தம், ந பன ஸன்னிதி⁴பச்சயா அனாபத்தித³ஸ்ஸனத்த²ம். கா²தி³தப்³ப³ஞ்ஹி யம்கிஞ்சி கா²த³னீயந்தி அதி⁴ப்பேதம், ந ச யாமகாலிகேஸு கிஞ்சி கா²தி³தப்³ப³ம் அத்தி² பாதப்³யபா⁴வதோ. தஸ்மா கிஞ்சாபி யாமகாலிகம் கா²த³னீயபோ⁴ஜனீயேஹி ந ஸங்க³ஹிதம், ததா²பி அனாபத்திம் த³ஸ்ஸேந்தேன ‘‘அனாபத்தி யாமகாலிகம் யாமே நித³ஹித்வா பு⁴ஞ்ஜதீ’’தி வசனதோ யாமாதிக்கமே ஸன்னிதி⁴பச்சயா பாசித்தியேன ப⁴விதப்³ப³ந்தி விஞ்ஞாயதி. ‘‘யாமகாலிகேன, பி⁴க்க²வே, ஸத்தாஹகாலிகம் யாவஜீவிகம் தத³ஹுபடிக்³க³ஹிதம் யாமே கப்பதி, யாமாதிக்கந்தே ந கப்பதீ’’தி (மஹாவ. 305) இமினாபி சாயமத்தோ² ஸித்³தோ⁴. தேனேவ ப⁴க³வதோ அதி⁴ப்பாயஞ்ஞூஹி அட்ட²கதா²சரியேஹி யாமகாலிகே பாசித்தியமேவ வுத்தம்.

படிக்³க³ஹணேதி க³ஹணமேவ ஸந்தா⁴ய வுத்தம். படிக்³க³ஹிதமேவ ஹி தம், புன படிக்³க³ஹணகிச்சம் நத்தி². தேனேவ ‘‘அஜ்ஜோ²ஹரிதுகாமதாய க³ண்ஹந்தஸ்ஸ படிக்³க³ஹணே’’தி வுத்தம். மாதிகாட்ட²கதா²யம் (கங்கா². அட்ட². ஸன்னிதி⁴காரகஸிக்கா²பத³வண்ணனா) பன ‘‘அஜ்ஜோ²ஹரிஸ்ஸாமீதி க³ண்ஹந்தஸ்ஸ படிக்³க³ஹணே’’இச்சேவ வுத்தம். யந்தி யம் பத்தம். ஸந்தி³ஸ்ஸதீதி யாகு³யா உபரி ஸந்தி³ஸ்ஸதி. தேலவண்ணே பத்தே ஸதிபி நிஸ்னேஹபா⁴வே அங்கு³லியா க⁴ம்ஸந்தஸ்ஸ வண்ணவஸேனேவ லேகா² பஞ்ஞாயதி, தஸ்மா தத்த² அனாபத்தீதி த³ஸ்ஸனத்த²ம் ‘‘ஸா அப்³போ³ஹாரிகா’’தி வுத்தம். ஸயம் படிக்³க³ஹேத்வா அபரிச்சத்தமேவ ஹி து³தியதி³வஸே ந வட்டதீதி ஏத்த² படிக்³க³ஹணே அனபேக்க²விஸ்ஸஜ்ஜனேன அனுபஸம்பன்னஸ்ஸ நிரபேக்க²தா³னேன வா விஜஹிதபடிக்³க³ஹணம் பரிச்சத்தமேவ ஹோதீதி ‘‘அபரிச்சத்த’’ந்தி இமினா உப⁴யதா²பி அவிஜஹிதபடிக்³க³ஹணமேவ வுத்தம். தஸ்மா யம் பரஸ்ஸ பரிச்சஜித்வா அதி³ன்னம்பி ஸசே படிக்³க³ஹணே நிரபேக்க²விஸ்ஸஜ்ஜனேன விஜஹிதபடிக்³க³ஹணம் ஹோதி, தம்பி து³தியதி³வஸே வட்டதீதி வேதி³தப்³ப³ம்.

யதி³ ஏவம் ‘‘பத்தோ து³த்³தோ⁴தோ ஹோதீ’’திஆதீ³ஸு கஸ்மா ஆபத்தி வுத்தாதி? ‘‘படிக்³க³ஹணம் அவிஸ்ஸஜ்ஜேத்வாவ ஸயம் வா அஞ்ஞேன வா துச்ச²ம் கத்வா ந ஸம்மா தோ⁴வித்வா நிட்டா²பிதே பத்தே லக்³க³ம்பி அவிஜஹிதபடிக்³க³ஹணமேவ ஹோதீதி தத்த² ஆபத்தீ’’தி தீஸுபி க³ண்டி²பதே³ஸு வுத்தம். கேசி பன ‘‘ஸாமணேரானம் பரிச்சஜந்தீதி இமஸ்மிம் அதி⁴காரே ட²த்வா ‘அபரிச்சத்தமேவா’தி வுத்தத்தா அனுபஸம்பன்னஸ்ஸ பரிச்சத்தமேவ வட்டதி, அபரிச்சத்தம் ந வட்டதீதி ஆபன்னம், தஸ்மா நிராலயபா⁴வேன படிக்³க³ஹணே விஜஹிதேபி அனுபஸம்பன்னஸ்ஸ அபரிச்சத்தம் ந வட்டதீ’’தி வத³ந்தி, தம் யுத்தம் விய ந தி³ஸ்ஸதி. யத³க்³கே³ன ஹி படிக்³க³ஹணம் விஜஹதி, தத³க்³கே³ன ஸன்னிதி⁴ம்பி ந கரோதி விஜஹிதபடிக்³க³ஹணஸ்ஸ அப்படிக்³க³ஹிதஸதி³ஸத்தா. படிக்³க³ஹேத்வா நித³ஹிதேயேவ ச ஸன்னிதி⁴பச்சயா ஆபத்தி வுத்தா. ‘‘படிக்³க³ஹேத்வா ஏகரத்தம் வீதினாமிதஸ்ஸேதம் அதி⁴வசன’’ந்தி ஹி வுத்தம்.

பாளியம் ‘‘ஸத்தாஹகாலிகம் யாவஜீவிகம் ஆஹாரத்தா²ய படிக்³க³ண்ஹாதி, ஆபத்தி து³க்கடஸ்ஸா’’திஆதி³னா ஸன்னிஹிதேஸு ஸத்தாஹகாலிகயாவஜீவிகேஸு புரேப⁴த்தம்பி ஆஹாரத்தா²ய அஜ்ஜோ²ஹரணேபி து³க்கடஸ்ஸ வுத்தத்தா யாமகாலிகேபி ஆஹாரத்தா²ய அஜ்ஜோ²ஹரணே விஸும் து³க்கடேனபி ப⁴விதப்³ப³ந்தி ஆஹ ‘‘ஆஹாரத்தா²ய அஜ்ஜோ²ஹரதோ து³க்கடேன ஸத்³தி⁴ம் பாசித்திய’’ந்தி. பகதிஆமிஸேதி ஓத³னாதி³கப்பியாமிஸே. யாமகாலிகம் ஸதி பச்சயே ஸாமிஸேன முகே²ன அஜ்ஜோ²ஹரதோ த்³வேதி ஹிய்யோ படிக்³க³ஹிதயாமகாலிகம் அஜ்ஜ புரேப⁴த்தம் ஸாமிஸேன முகே²ன பு⁴ஞ்ஜதோ ஸன்னிஹிதயாமகாலிகபச்சயா ஏகம் பாசித்தியம், ஸன்னிஹிதேன ஸம்ஸட்ட²ஆமிஸபச்சயா ஏகந்தி த்³வே பாசித்தியானி. விகப்பத்³வயேபீதி ஸாமிஸேன நிராமிஸேனாதி வுத்தவிதா⁴னத்³வயே. து³க்கடம் வட்³ட⁴தீதி ஆஹாரத்தா²ய அஜ்ஜோ²ஹரணபச்சயா து³க்கடம் வட்³ட⁴தி. து²ல்லச்சயஞ்ச து³க்கடஞ்ச வட்³ட⁴தீதி மனுஸ்ஸமம்ஸே து²ல்லச்சயம், ஸேஸஅகப்பியமம்ஸேஸு து³க்கடம் வட்³ட⁴தி.

255. படிக்³க³ஹணபச்சயா தாவ து³க்கடந்தி ஏத்த² ஸன்னிஹிதத்தா புரேப⁴த்தம்பி து³க்கடமேவ. ஸதி பச்சயே பன ஸன்னிஹிதம்பி ஸத்தாஹகாலிகம் யாவஜீவிகம் பே⁴ஸஜ்ஜத்தா²ய க³ண்ஹந்தஸ்ஸ பரிபு⁴ஞ்ஜந்தஸ்ஸ ச அனாபத்தியேவ. ஸேஸமேத்த² உத்தானமேவ. யாவகாலிகயாமகாலிகதா, ஸன்னிதி⁴பா⁴வோ, தஸ்ஸ அஜ்ஜோ²ஹரணந்தி இமானி பனேத்த² தீணி அங்கா³னி.

ஸன்னிதி⁴காரகஸிக்கா²பத³வண்ணனா நிட்டி²தா.

9. பணீதபோ⁴ஜனஸிக்கா²பத³வண்ணனா

257-259. நவமே பணீதஸம்ஸட்டா²னி போ⁴ஜனானி பணீதபோ⁴ஜனானி. யதா² ஹி ஆஜஞ்ஞயுத்தோ ரதோ² ‘‘ஆஜஞ்ஞரதோ²’’தி வுச்சதி, ஏவமிதா⁴பி பணீதஸம்ஸட்டா²னி ஸத்தத⁴ஞ்ஞனிப்³ப³த்தானி போ⁴ஜனானி ‘‘பணீதபோ⁴ஜனானீ’’தி வுத்தானி. யேஹி பன பணீதேஹி ஸம்ஸட்டா²னி, தானி ‘‘பணீதபோ⁴ஜனானீ’’தி வுச்சந்தி, தேஸம் பபே⁴த³த³ஸ்ஸனத்த²ம் ‘‘ஸேய்யதி²த³ம், ஸப்பி நவனீத’’ந்திஆதி³ பாளியம் வுத்தம். ‘‘யேஸம் மம்ஸம் கப்பதீ’’தி இத³ஞ்ச பாசித்தியவத்து²பரிச்சே²த³த³ஸ்ஸனத்த²ம் வுத்தம், ந பன கப்பியவத்து²பரிச்சே²த³த³ஸ்ஸனத்த²ம். ந ஹி அகப்பியமம்ஸஸத்தானம் ஸப்பிஆதீ³னி ந கப்பந்தி. ஏகஞ்ஹி மனுஸ்ஸவஸாதேலம் ட²பேத்வா ஸப்³பே³ஸம் கீ²ரஸப்பினவனீதவஸாதேலேஸு அகப்பியம் நாம நத்தி². ஸப்பிப⁴த்தந்தி ஏத்த² கிஞ்சாபி ஸப்பிஸம்ஸட்ட²ம் ப⁴த்தம் ஸப்பிப⁴த்தம், ஸப்பி ச ப⁴த்தஞ்ச ஸப்பிப⁴த்தந்திபி விஞ்ஞாயதி, அட்ட²கதா²ஸு பன ‘‘ஸாலிப⁴த்தம் விய ஸப்பிப⁴த்தம் நாம நத்தீ²’’தி காரணம் வத்வா து³க்கடஸ்ஸேவ த³ள்ஹதரம் கத்வா வுத்தத்தா ந ஸக்கா அஞ்ஞம் வத்தும். அட்ட²கதா²சரியா ஏவ ஹி ஈதி³ஸேஸு டா²னேஸு பமாணம்.

மூலந்தி கப்பியப⁴ண்ட³ம் ஸந்தா⁴ய வுத்தம். அனாபத்தீதி விஸங்கேதத்தா ஸப்³பா³ஹியேவ ஆபத்தீஹி அனாபத்தி. கேசி பன ‘‘பாசித்தியேனேவ அனாபத்தி வுத்தா, ஸூபோத³னவிஞ்ஞத்திது³க்கடம் பன ஹோதியேவா’’தி வத³ந்தி, தம் ந க³ஹேதப்³ப³ம். கப்பியஸப்பினா அகப்பியஸப்பினாதி ச இத³ம் கப்பியாகப்பியமம்ஸானம் வஸேன வுத்தம், தஸ்மா கப்பியமம்ஸஸப்பினா அகப்பியமம்ஸஸப்பினாதி ஏவமேத்த² அத்தோ² க³ஹேதப்³போ³. நானாவத்து²கானீதி ஸப்பினவனீதாதீ³னம் வஸேன வுத்தம்.

261. மஹானாமஸிக்கா²பதே³ன காரேதப்³போ³தி ஏத்த² –

‘‘அகி³லானேன பி⁴க்கு²னா சதுமாஸபச்சயபவாரணா ஸாதி³தப்³பா³ அஞ்ஞத்ர புனபவாரணாய அஞ்ஞத்ர நிச்சபவாரணாய, ததோ சே உத்தரி ஸாதி³யேய்ய, பாசித்திய’’ந்தி (பாசி. 306) –

இத³ம் மஹானாமஸிக்கா²பத³ம் நாம. இமினா ச ஸிக்கா²பதே³ன ஸங்க⁴வஸேன கி³லானபச்சயபவாரணாய பவாரிதட்டா²னே ஸசே தத்த² ரத்தீஹி வா பே⁴ஸஜ்ஜேஹி வா பரிச்சே²தோ³ கதோ ஹோதி, ஏத்தகாயேவ ரத்தியோ ஏத்தகானி வா பே⁴ஸஜ்ஜானி விஞ்ஞாபேதப்³பா³னீதி. அத² ததோ ரத்திபரியந்ததோ வா பே⁴ஸஜ்ஜபரியந்ததோ வா உத்தரி ந பே⁴ஸஜ்ஜகரணீயேன வா பே⁴ஸஜ்ஜம் அஞ்ஞபே⁴ஸஜ்ஜகரணீயேன வா அஞ்ஞம் பே⁴ஸஜ்ஜம் விஞ்ஞாபேந்தஸ்ஸ பாசித்தியம் வுத்தம். தஸ்மா அகி³லானோ கி³லானஸஞ்ஞீ ஹுத்வா பஞ்ச பே⁴ஸஜ்ஜானி விஞ்ஞாபேந்தோ ந பே⁴ஸஜ்ஜகரணீயேன பே⁴ஸஜ்ஜம் விஞ்ஞாபேந்தோ நாம ஹோதீதி ‘‘மஹானாமஸிக்கா²பதே³ன காரேதப்³போ³’’தி வுத்தம். ஏதானி பாடிதே³ஸனீயவத்தூ²னீதி பாளியம் ஆக³தஸப்பிஆதீ³னி ஸந்தா⁴ய வுத்தம். பாளியம் அனாக³தானி பன அகப்பியஸப்பிஆதீ³னி பி⁴க்கு²னீனம்பி து³க்கடவத்தூ²னீதி வேதி³தப்³ப³ம். ஸூபோத³னவிஞ்ஞத்தியந்தி பி⁴க்கூ²னம் பாசித்தியவத்தூ²னி பி⁴க்கு²னீனம் பாடிதே³ஸனீயவத்தூ²னி ச ட²பேத்வா அவஸேஸவிஞ்ஞத்திம் ஸந்தா⁴ய வுத்தம். ஸேஸமேத்த² உத்தானமேவ. பணீதபோ⁴ஜனதா, அகி³லானதா, அகதவிஞ்ஞத்தியா படிலாபோ⁴, அஜ்ஜோ²ஹரணந்தி இமானி பனேத்த² சத்தாரி அங்கா³னி.

பணீதபோ⁴ஜனஸிக்கா²பத³வண்ணனா நிட்டி²தா.

10. த³ந்தபோனஸிக்கா²பத³வண்ணனா

263. த³ஸமே அய்யவோஸாடிதகானீதி பிதுபிண்ட³ஸ்ஸேதம் அதி⁴வசனம். உம்மாரேதி ஸுஸானே கதகே³ஹஸ்ஸ அத்தனோ கே³ஹஸ்ஸ வா உம்மாரே. க⁴னப³த்³தோ⁴தி க⁴னமம்ஸேன ஸம்ப³த்³தோ⁴, கதி²னஸம்ஹதஸரீரோதி வுத்தம் ஹோதி.

264. முக²த்³வாரந்தி க³லனாளிகம். ஆஹாரந்தி அஜ்ஜோ²ஹரிதப்³ப³ம் யம்கிஞ்சி யாவகாலிகாதி³ம். ஆஹரேய்யாதி முக²த்³வாரம் பவேஸேய்ய. முகே²ன வா பவிட்ட²ம் ஹோது நாஸிகாய வா, க³லேன அஜ்ஜோ²ஹரணீயத்தா ஸப்³ப³ம்பி தம் முக²த்³வாரம் பவேஸிதமேவ ஹோதி. யஸ்மா பன தே பி⁴க்கூ² அனாஹாரேபி உத³கே ஆஹாரஸஞ்ஞாய த³ந்தபோனே ச முக²த்³வாரம் ஆஹடம் இத³ந்தி ஸஞ்ஞாய குக்குச்சாயிம்ஸு, தஸ்மா வுத்தம் ‘‘தே பி⁴க்கூ² அதி³ன்னம்…பே… ஸம்மா அத்த²ம் அஸல்லக்கே²த்வா குக்குச்சாயிம்ஸூ’’தி. உத³கஞ்ஹி யதா²ஸுக²ம் பாதும் த³ந்தகட்ட²ஞ்ச த³ந்தபோனபரிபோ⁴கே³ன பரிபு⁴ஞ்ஜிதும் வட்டதி, தஸ்ஸ பன ரஸம் கி³லிதும் ந வட்டதி. ஸசேபி த³ந்தகட்ட²ரஸோ அஜானந்தஸ்ஸ அந்தோ பவிஸதி, பாசித்தியமேவ. அனஜ்ஜோ²ஹரந்தேன பன த³ந்தகட்ட²ம் வா ஹோது அஞ்ஞம் வா, கிஞ்சி முகே² பக்கி²பிதும் வட்டதி.

265. அகல்லகோதி கி³லானோ ஸஹத்தா² பரிபு⁴ஞ்ஜிதும் அஸக்கோந்தோ முகே²ன படிக்³க³ண்ஹாதி. உச்சாரணமத்தந்தி உக்கி²பனமத்தம். ஏகதே³ஸேனபீதி அங்கு³லியாபி பு²ட்ட²மத்தேன. தம் சே படிக்³க³ண்ஹாதி, ஸப்³ப³ம் படிக்³க³ஹிதமேவாதி வேணுகோடியா ப³ந்தி⁴த்வா ட²பிதத்தா. ஸசேபி பூ⁴மியம் டி²தமேவ க⁴டம் தா³யகேன ஹத்த²பாஸே ட²த்வா க⁴டம் த³ஸ்ஸாமீதி தி³ன்னவேணுகோடிக்³க³ஹணவஸேன படிக்³க³ண்ஹாதி, உப⁴யகோடிப³த்³த⁴ம் ஸப்³ப³ம்பி படிக்³க³ஹிதமேவ ஹோதி. பி⁴க்கு²ஸ்ஸ அத்தா²ய அபீளேத்வா பகதியா பீளியமானஉச்சு²ரஸம் ஸந்தா⁴ய ‘‘க³ண்ஹதா²’’தி வுத்தத்தா ‘‘அபி⁴ஹாரோ ந பஞ்ஞாயதீ’’தி வுத்தம். ஹத்த²பாஸே டி²தஸ்ஸ பன பி⁴க்கு²ஸ்ஸ அத்தா²ய பீளியமானா உச்சு²தோ பக்³க⁴ரந்தம் ரஸம் க³ண்ஹிதும் வட்டதி, தோ³ணிகாய ஸயம் பக்³க⁴ரந்தம் உச்சு²ரஸம் மஜ்ஜே² ஆவரித்வா ஆவரித்வா விஸ்ஸஜ்ஜிதம்பி க³ண்ஹிதும் வட்டதி. கத்த²சி அட்ட²கதா²ஸு.

அஸம்ஹாரிமேதி தா²மமஜ்ஜி²மேன புரிஸேன அஸம்ஹாரியே. ‘‘திந்திணிகாதி³பண்ணேஸூ’’தி வசனதோ ஸாகா²ஸு படிக்³க³ஹணம் ருஹதீதி த³ட்ட²ப்³ப³ம். புஞ்சி²த்வா படிக்³க³ஹேத்வாதி ஏத்த² ‘‘புஞ்சி²தே படிக்³க³ஹணகிச்சம் நத்தி², தஸ்மா புஞ்சி²த்வா க³ஹேத்வாதி ஏவமத்தோ² க³ஹேதப்³போ³’’தி வத³ந்தி. புஞ்சி²த்வா படிக்³க³ஹேத்வா வாதி ஏவமேத்த² அத்தோ² த³ட்ட²ப்³போ³. பத்தே பதிதரஜனசுண்ணஞ்ஹி அப்³ப⁴ந்தரபரிபோ⁴க³த்தா²ய அபரிஹடபா⁴வதோ படிக்³க³ஹேத்வா பரிபு⁴ஞ்ஜிதும் வட்டதி. புப்³பா³போ⁴க³ஸ்ஸ அனுரூபேன ‘‘அனுபஸம்பன்னஸ்ஸ த³த்வா…பே… வட்டதீ’’தி வுத்தம். யஸ்மா பன தம் ‘‘அஞ்ஞஸ்ஸ த³ஸ்ஸாமீ’’தி சித்துப்பாத³மத்தேன பரஸந்தகம் நாம ந ஹோதி, தஸ்மா தஸ்ஸ அத³த்வாபி படிக்³க³ஹேத்வா பரிபு⁴ஞ்ஜிதும் வட்டதி.

பி⁴க்கு²ஸ்ஸ தே³தீதி அஞ்ஞஸ்ஸ பி⁴க்கு²ஸ்ஸ தே³தி. கஞ்ஜிகந்தி கீ²ரரஸாதி³ம் யம்கிஞ்சி த்³ரவம் ஸந்தா⁴ய வுத்தம். ஹத்த²தோ மோசேத்வா புன க³ண்ஹாதி, உக்³க³ஹிதகம் ஹோதீதி ஆஹ ‘‘ஹத்த²தோ அமோசேந்தேனேவா’’தி. ஆலுலேந்தானந்தி ஆலோலேந்தானம், அயமேவ வா பாடோ². ஆஹரித்வா பூ⁴மியம் ட²பிதத்தா அபி⁴ஹாரோ நத்தீ²தி ஆஹ ‘‘பத்தோ படிக்³க³ஹேதப்³போ³’’தி. பட²மதரம் உளுங்கதோ தே²வா பத்தே பதந்தீதி ஏத்த² ‘‘யதா² பட²மதரம் பதிததே²வே தோ³ஸோ நத்தி², ததா² ஆகிரித்வா அபனேந்தானம் பச்சா² பதிததே²வேபி அபி⁴ஹடத்தா நேவத்தி² தோ³ஸோ’’தி வத³ந்தி. சருகேனாதி கு²த்³த³கபா⁴ஜனேன. முக²வட்டியாபி க³ஹேதும் வட்டதீதி முக²வட்டிம் உக்கி²பித்வா ஹத்தே² பு²ஸாபிதே க³ண்ஹிதும் வட்டதி. கேசீதி அப⁴யகி³ரிவாஸினோ. ஏஸ நயோதி காயபடிப³த்³த⁴படிப³த்³த⁴ம்பி காயபடிப³த்³த⁴மேவாதி அயம் நயோ. ததா² ச தத்த² காயபடிப³த்³தே⁴ தம்படிப³த்³தே⁴ ச து²ல்லச்சயமேவ வுத்தம்.

தேனாதி யஸ்ஸ பி⁴க்கு²னோ ஸந்திகம் க³தம், தேன. தஸ்மாதி யஸ்மா மூலட்ட²ஸ்ஸேவ பரிபோ⁴கோ³ அனுஞ்ஞாதோ, தஸ்மா. தம் தி³வஸம் ஹத்தே²ன க³ஹேத்வா து³தியதி³வஸே படிக்³க³ஹேத்வா பரிபு⁴ஞ்ஜந்தஸ்ஸ உக்³க³ஹிதகபடிக்³க³ஹிதம் ஹோதீதி ஆஹ ‘‘அனாமஸித்வா’’தி. அப்படிக்³க³ஹிதத்தா ‘‘ஸன்னிதி⁴பச்சயா அனாபத்தீ’’தி வுத்தம். அப்படிக்³க³ஹேத்வா பரிபு⁴ஞ்ஜந்தஸ்ஸ அதி³ன்னமுக²த்³வாராபத்தி ஹோதீதி ஆஹ ‘‘படிக்³க³ஹேத்வா பன பரிபு⁴ஞ்ஜிதப்³ப³’’ந்தி. ‘‘தம் தி³வஸம்…பே… ந ததோ பர’’ந்தி வசனதோ தம் தி³வஸம் ஹத்தே²ன க³ஹேத்வா வா அக்³க³ஹேத்வா வா ட²பிதம் து³தியதி³வஸே அப்படிக்³க³ஹேத்வா பரிபு⁴ஞ்ஜந்தஸ்ஸ அதி³ன்னமுக²த்³வாராபத்தி ஹோதி, ஹத்தே²ன க³ஹேத்வா ட²பிதம் து³தியதி³வஸே படிக்³க³ஹேத்வா பரிபு⁴ஞ்ஜந்தஸ்ஸ பன உக்³க³ஹிதகபடிக்³க³ஹிதம் ஹோதி. அப்படிக்³க³ஹிதமேவ ஹி ஹத்தே²ன க³ஹேத்வா ட²பிதம். ‘‘ஸாமம் க³ஹேத்வா பரிபு⁴ஞ்ஜிது’’ந்தி ஹி வசனதோ அப்படிக்³க³ஹிதஸ்ஸேவ தஸ்மிம் தி³வஸே பரிபோ⁴கோ³ அனுஞ்ஞாதோ. தஸ்மா யம் வுத்தம் க³ண்டி²பதே³ ‘‘தம் தி³ய்யமானம் பததீதி ஏத்த² யதா² க³ணபோ⁴ஜனாதீ³ஸு கி³லானாதீ³னம் குக்குச்சாயந்தானம் க³ணபோ⁴ஜனம் அனுஞ்ஞாதம், ஏவமிதா⁴பி ப⁴க³வதா படிக்³க³ஹிதமேவ குக்குச்சவினோத³னத்த²ம் அனுஞ்ஞாத’’ந்தி, தம் ந க³ஹேதப்³ப³ம். ‘‘தம் தி³ய்யமானம் பததீ’’தி அவிஸேஸேன வுத்தத்தா சதூஸுபி காலிகேஸு அயம் நயோ வேதி³தப்³போ³.

ஸத்த²கேனாதி படிக்³க³ஹிதஸத்த²கேன. கஸ்மா பனேத்த² உக்³க³ஹிதபச்சயா ஸன்னிதி⁴பச்சயா வா தோ³ஸோ ந ஸியாதி ஆஹ ‘‘ந ஹி தம் பரிபோ⁴க³த்தா²ய பரிஹரந்தீ’’தி. இமினாவ பா³ஹிரபரிபோ⁴க³த்த²ம் ஸாமம் க³ஹேத்வா அனுபஸம்பன்னேன தி³ன்னம் வா க³ஹேத்வா பரிஹரிதும் வட்டதீதி தீ³பேதி. தஸ்மா பத்தஸம்மக்க²னாதி³அத்த²ம் ஸாமம் க³ஹேத்வா பரிஹடதேலாதி³ம் ஸசே பரிபு⁴ஞ்ஜிதுகாமோ ஹோதி, படிக்³க³ஹேத்வா பரிபு⁴ஞ்ஜந்தஸ்ஸ அனாபத்தி. அப்³ப⁴ந்தரபரிபோ⁴க³த்த²ம் பன ஸாமம் க³ஹிதம் படிக்³க³ஹேத்வா பரிபு⁴ஞ்ஜந்தஸ்ஸ உக்³க³ஹிதகபடிக்³க³ஹிதம் ஹோதி, அப்படிக்³க³ஹேத்வா பரிபு⁴ஞ்ஜந்தஸ்ஸ அதி³ன்னமுக²த்³வாராபத்தி ஹோதி, அப்³ப⁴ந்தரபரிபோ⁴க³த்த²மேவ அனுபஸம்பன்னேன தி³ன்னம் க³ஹேத்வா பரிஹரந்தஸ்ஸ ஸிங்கீ³லோணகப்போ விய ஸன்னிதி⁴பச்சயா ஆபத்தி ஹோதி. கேசி பன ‘‘தா²மமஜ்ஜி²மஸ்ஸ புரிஸஸ்ஸ உச்சாரணமத்தம் ஹோதீதிஆதி³னா வுத்தபஞ்சங்க³ஸம்பத்தியா படிக்³க³ஹணஸ்ஸ ருஹனதோ பா³ஹிரபரிபோ⁴க³த்த²ம்பி ஸசே அனுபஸம்பன்னேன தி³ன்னம் க³ண்ஹாதி, படிக்³க³ஹிதமேவா’’தி வத³ந்தி. ஏவம் ஸதி இத⁴ பா³ஹிரபரிபோ⁴க³த்த²ம் அனுபஸம்பன்னேன தி³ன்னம் க³ஹேத்வா பரிஹரந்தஸ்ஸ ஸன்னிதி⁴பச்சயா ஆபத்தி வத்தப்³பா³ ஸியா, ‘‘ந ஹி தம் பரிபோ⁴க³த்தா²ய பரிஹரந்தீ’’தி ச ந வத்தப்³ப³ம், தஸ்மா பா³ஹிரபரிபோ⁴க³த்த²ம் க³ஹிதம் படிக்³க³ஹிதம் நாம ந ஹோதீதி வேதி³தப்³ப³ம். யதி³ ஏவம் பஞ்சஸு படிக்³க³ஹணங்கே³ஸு ‘‘பரிபோ⁴க³த்தா²யா’’தி விஸேஸனம் வத்தப்³ப³ந்தி? ந வத்தப்³ப³ம். படிக்³க³ஹணஞ்ஹி பரிபோ⁴க³த்த²மேவ ஹோதீதி ‘‘பரிபோ⁴க³த்தா²யா’’தி விஸும் அவத்வா ‘‘தஞ்சே பி⁴க்கு² காயேன வா காயபடிப³த்³தே⁴ன வா படிக்³க³ண்ஹாதீ’’தி ஏத்தகமேவ வுத்தம். அபரே பன ‘‘ஸதிபி படிக்³க³ஹணே ‘ந ஹி தம் பரிபோ⁴க³த்தா²ய பரிஹரந்தீ’தி இத⁴ அபரிபோ⁴க³த்தா²ய பரிஹரணே அனாபத்தி வுத்தா’’தி வத³ந்தி. உது³க்க²லமுஸலானி கி²ய்யந்தீதி ஏத்த² உது³க்க²லமுஸலானம் க²யேன பிஸிதகோட்டிதபே⁴ஸஜ்ஜேஸு ஸசே ஆக³ந்துகவண்ணோ பஞ்ஞாயதி, ந வட்டதி.

ஸுத்³த⁴ம் உத³கம் ஹோதீதி ருக்க²ஸாகா²தீ³ஹி க³ளித்வா பதனஉத³கம் ஸந்தா⁴ய வுத்தம். பத்தோ வாஸ்ஸ படிக்³க³ஹேதப்³போ³தி ஏத்தா²பி பத்தக³தம் சு²பித்வா தே³ந்தஸ்ஸ ஹத்த²லக்³கே³ன ஆமிஸேன தோ³ஸாபா⁴வத்த²ம் பத்தபடிக்³க³ஹணந்தி அப்³ப⁴ந்தரபரிபோ⁴க³த்த²மேவ படிக்³க³ஹணம் வேதி³தப்³ப³ம். யம் ஸாமணேரஸ்ஸ பத்தே பததி…பே… படிக்³க³ஹணம் ந விஜஹதீதி ஏத்த² புனப்புனம் க³ண்ஹந்தஸ்ஸ அத்தனோ பத்தே பக்கி²த்தமேவ ‘‘அத்தனோ ஸந்தக’’ந்தி ஸன்னிட்டா²னகரணதோ ஹத்த²க³தம் படிக்³க³ஹணம் ந விஜஹதி, பரிச்சி²ந்தி³த்வா தி³ன்னம் பன க³ண்ஹந்தஸ்ஸ க³ஹணஸமயேயேவ ‘‘அத்தனோ ஸந்தக’’ந்தி ஸன்னிட்டா²னஸ்ஸ கதத்தா ஹத்த²க³தம் படிக்³க³ஹணம் விஜஹதி. கேஸஞ்சி அத்தா²ய ஓத³னம் பக்கி²பதீதி ஏத்த² அனுபஸம்பன்னஸ்ஸ அத்தா²ய பக்கி²பந்தேபி ‘‘ஆக³ந்த்வா க³ண்ஹிஸ்ஸதீ’’தி ஸயமேவ பக்கி²பித்வா ட²பனதோ படிக்³க³ஹணம் ந விஜஹதி, அனுபஸம்பன்னஸ்ஸ ஹத்தே² பக்கி²த்தம் பன அனுபஸம்பன்னேனேவ ட²பிதம் நாம ஹோதீதி படிக்³க³ஹணம் விஜஹதி பரிச்சத்தபா⁴வதோ. தேன வுத்தம் ‘‘ஸாமணேர…பே… பரிச்சத்தத்தா’’தி.

படிக்³க³ஹணூபக³ம் பா⁴ரம் நாம தா²மமஜ்ஜி²மஸ்ஸ புரிஸஸ்ஸ உக்கே²பாரஹம். கிஞ்சாபி அவிஸ்ஸஜ்ஜேத்வாவ அஞ்ஞேன ஹத்தே²ன பித³ஹந்தஸ்ஸ தோ³ஸோ நத்தி², ததா²பி ந பித³ஹிதப்³ப³ந்தி அட்ட²கதா²பமாணேனேவ க³ஹேதப்³ப³ம். மச்சி²கவாரணத்த²ந்தி ஏத்த² ‘‘ஸசேபி ஸாகா²ய லக்³க³ரஜம் பத்தே பததி, ஸுகே²ன பரிபு⁴ஞ்ஜிதும் ஸக்காதி ஸாகா²ய படிக்³க³ஹிதத்தா அப்³ப⁴ந்தரபரிபோ⁴க³த்த²மேவித⁴ படிக்³க³ஹணந்தி மூலபடிக்³க³ஹணமேவ வட்டதீ’’தி வுத்தம். அபரே பன ‘‘மச்சி²கவாரணத்த²ந்தி ஏத்த² வசனமத்தம் க³ஹேத்வா பா³ஹிரபரிபோ⁴க³த்த²ம் க³ஹித’’ந்தி வத³ந்தி. தஸ்மிம்பி அஸதீதி சாடியா வா குண்ட³கே வா அஸதி. அனுபஸம்பன்னம் கா³ஹாபேத்வாதி தம்யேவ அஜ்ஜோ²ஹரணீயப⁴ண்ட³ம் அனுபஸம்பன்னேன கா³ஹாபேத்வா. தே²ரஸ்ஸ பத்தம் அனுதே²ரஸ்ஸாதி தே²ரஸ்ஸ பத்தம் அத்தனா க³ஹேத்வா அனுதே²ரஸ்ஸ தே³தி. துய்ஹம் யாகு³ம் மய்ஹம் தே³ஹீதி ஏத்த² ஏவம் வத்வா ஸாமணேரஸ்ஸ பத்தம் க³ஹேத்வா அத்தனோபி பத்தம் தஸ்ஸ தே³தி. ஏத்த² பனாதி பண்டி³தோ ஸாமணேரோதிஆதி³பத்தபரிவத்தனகதா²ய. காரணம் உபபரிக்கி²தப்³ப³ந்தி யதா² மாதுஆதீ³னம் தேலாதீ³னி ஹரந்தோ ததா²ரூபே கிச்சே அனுபஸம்பன்னேன அபரிவத்தேத்வாவ பரிபு⁴ஞ்ஜிதும் லப⁴தி, ஏவமித⁴ பத்தபரிவத்தனம் அகத்வா பரிபு⁴ஞ்ஜிதும் ந லப⁴தீதி ஏத்த² காரணம் வீமம்ஸிதப்³ப³ந்தி அத்தோ².

ஏத்த² பன ‘‘ஸாமணேரேஹி க³ஹிததண்டு³லேஸு பரிக்கீ²ணேஸு அவஸ்ஸம் அம்ஹாகம் ஸாமணேரா ஸங்க³ஹம் கரோந்தீதி விதக்குப்பத்தி ஸம்ப⁴வதி, தஸ்மா தம் பரிவத்தேத்வாவ பரிபு⁴ஞ்ஜிதப்³ப³ம். மாதாபிதூனம் அத்தா²ய பன சா²யத்தா²ய வா க³ஹணே பரிபோ⁴கா³ஸா நத்தி², தஸ்மா தம் வட்டதீ’’தி காரணம் வத³ந்தி. தேனேவ ஆசரியபு³த்³த⁴த³த்தத்தே²ரேனபி வுத்தம் –

‘‘மாதாபிதூனமத்தா²ய, தேலாதி³ஹரதோபி ச;

ஸாக²ம் சா²யாதி³அத்தா²ய, இமேஸம் ந விஸேஸதி.

‘‘தஸ்மா ஹிஸ்ஸ விஸேஸஸ்ஸ, சிந்தேதப்³ப³ம் து காரணம்;

தஸ்ஸ ஸாலயபா⁴வம் து, விஸேஸம் தக்கயாம த’’ந்தி.

இத³மேவேத்த² யுத்ததரம் அவஸ்ஸம் ததா²வித⁴விதக்குப்பத்தியா ஸம்ப⁴வதோ. ந ஸக்கா ஹி ஏத்த² விதக்கம் ஸோதே⁴துந்தி. மாதாதீ³னம் அத்தா²ய ஹரணே பன நாவஸ்ஸம் ததா²வித⁴விதக்குப்பத்தீதி ஸக்கா விதக்கம் ஸோதே⁴தும். யத்த² ஹி விதக்கம் ஸோதே⁴தும் ஸக்கா, தத்த² நேவத்தி² தோ³ஸோ. தேனேவ வக்க²தி ‘‘ஸசே பன ஸக்கோதி விதக்கம் ஸோதே⁴தும், ததோ லத்³த⁴ம் கா²தி³தும்பி வட்டதீ’’தி.

நிச்சாலேதும் ந ஸக்கோதீதி நிச்சாலேத்வா ஸக்க²ரா அபனேதும் ந ஸக்கோதி. ஆதா⁴ரகே பத்தோ ட²பிதோ ஹோதீதி படிக்³க³ஹேதப்³ப³பத்தம் ஸந்தா⁴ய வுத்தம். சாலேதீதி வினா காரணம் சாலேதி. ஸதிபி காரணே பி⁴க்கூ²னம் பரிபோ⁴கா³ரஹம் சாலேதும் ந வட்டதி. கிஞ்சாபி ‘‘அனுஜானாமி, பி⁴க்க²வே, அமனுஸ்ஸிகாபா³தே⁴ ஆமகமம்ஸம் ஆமகலோஹித’’ந்தி (மஹாவ. 264) தாதி³ஸே ஆபா³தே⁴ அத்தனோ அத்தா²ய ஆமகமம்ஸபடிக்³க³ஹணம் அனுஞ்ஞாதம், ‘‘ஆமகமம்ஸபடிக்³க³ஹணா படிவிரதோ ஹோதீ’’தி ச ஸாமஞ்ஞதோ படிக்கி²த்தம், ததா²பி அத்தனோ அஞ்ஞஸ்ஸ வா பி⁴க்கு²னோ அத்தா²ய அக்³க³ஹிதத்தா ‘‘ஸீஹவிகா⁴ஸாதி³ம்…பே… வட்டதீ’’தி வுத்தம். ஸக்கோதி விதக்கம் ஸோதே⁴துந்தி மய்ஹம்பி தே³தீதி விதக்கஸ்ஸ அனுப்பன்னபா⁴வம் ஸல்லக்கே²தும் ஸக்கோதி, ஸாமணேரஸ்ஸ த³ஸ்ஸாமீதி ஸுத்³த⁴சித்தேன மயா க³ஹிதந்தி வா ஸல்லக்கே²தும் ஸக்கோதி.

ஸசே பன மூலேபி படிக்³க³ஹிதம் ஹோதீதி ஏத்த² ‘‘க³ஹேத்வா க³தே மய்ஹம்பி த³தே³ய்யுந்தி ஸஞ்ஞாய ஸசே படிக்³க³ஹிதம் ஹோதீ’’தி வத³ந்தி. கோட்டா²ஸே கரோதீதி பி⁴க்கு²ஸாமணேரா ச அத்தனோ அத்தனோ அபி⁴ருசிதம் கோட்டா²ஸம் க³ண்ஹந்தூதி ஸப்³பே³ஸம் ஸமகே கோட்டா²ஸே கரோதி. க³ஹிதாவஸேஸந்தி ஸாமணேரேஹி க³ஹிதகோட்டா²ஸதோ அவஸேஸம். க³ண்ஹித்வாதி ‘‘மய்ஹம் இத³ம் க³ண்ஹிஸ்ஸாமீ’’தி க³ஹேத்வா. இத⁴ க³ஹிதாவஸேஸம் நாம தேன க³ண்ஹித்வா புன ட²பிதம். படிக்³க³ஹேத்வாதி தத³ஹு படிக்³க³ஹேத்வா. தேனேவ ‘‘யாவகாலிகேன யாவஜீவிகஸம்ஸக்³கே³ தோ³ஸோ நத்தீ²’’தி வுத்தம். ஸசே பன புரிமதி³வஸே படிக்³க³ஹேத்வா ட²பிதா ஹோதி, ஸாமிஸேன முகே²ன தஸ்ஸா வட்டியா தூ⁴மம் பிவிதும் ந வட்டதி. ஸமுத்³தோ³த³கேனாதி அப்படிக்³க³ஹிதஸமுத்³தோ³த³கேன. யஸ்மா கதகட்டி² உத³கம் பஸாதே³த்வா விஸும் திட்ட²தி, தஸ்மா ‘‘அப்³போ³ஹாரிக’’ந்தி வுத்தம். லக்³க³தீதி முகே² ஹத்தே² ச உத³கே ஸுக்கே² ஸேதவண்ணம் த³ஸ்ஸேந்தம் லக்³க³தி. பானீயம் க³ஹேத்வாதி அத்தனோயேவ அத்தா²ய க³ஹேத்வா. ஸசே பன பீதாவஸேஸம் தத்தே²வ ஆகிரிஸ்ஸாமீதி க³ண்ஹாதி, புன படிக்³க³ஹணகிச்சம் நத்தி². விக்க²ம்பே⁴த்வாதி வியூஹித்வா, அபனேத்வாதி அத்தோ².

மஹாபூ⁴தேஸூதி ஸரீரனிஸ்ஸிதேஸு மஹாபூ⁴தேஸு. பததீதி விச்சி²ந்தி³த்வா பததி. விச்சி²ந்தி³த்வா பதிதமேவ ஹி படிக்³க³ஹேதப்³ப³ம், ந இதரம். அல்லதா³ரும் ருக்க²தோ சி²ந்தி³த்வாபி காதும் வட்டதீதி ஏத்த² மத்திகத்தா²ய பத²விம் க²ணிதும்பி வட்டதீதி வேதி³தப்³ப³ம். ஸப்பத³ட்ட²க்க²ணேயேவ வட்டதீதி அஸதி கப்பியகாரகே ஸாமம் க³ஹேத்வா பரிபு⁴ஞ்ஜிதும் வட்டதி, அஞ்ஞதா³ படிக்³க³ஹாபேத்வா பரிபு⁴ஞ்ஜிதப்³ப³ம். ஸேஸமேத்த² உத்தானமேவ. அப்படிக்³க³ஹிததா, அனனுஞ்ஞாததா, தூ⁴மாதி³அப்³போ³ஹாரிகாபா⁴வோ, அஜ்ஜோ²ஹரணந்தி இமானி பனேத்த² சத்தாரி அங்கா³னி.

த³ந்தபோனஸிக்கா²பத³வண்ணனா நிட்டி²தா.

நிட்டி²தோ போ⁴ஜனவக்³கோ³ சதுத்தோ².