2. பூ⁴தகா³மவக்³கோ³

1. பூ⁴தகா³மஸிக்கா²பத³வண்ணனா

89. ஸேனாஸனவக்³க³ஸ்ஸ பட²மே நிக்³க³ஹேதும் அஸக்கோந்தோதி ஸந்தா⁴ரேதும் அஸக்கோந்தோ. இமினா பன வசனேன தா³ரகஸ்ஸ தத்த² உபனீதபா⁴வோ தேன ச தி³ட்ட²பா⁴வோ வுத்தோயேவாதி த³ட்ட²ப்³ப³ம். தேன ஹி பி⁴க்கு²னா தம் ருக்க²ம் சி²ந்தி³தும் ஆரத்³தே⁴ தத்த² நிப்³ப³த்தா ஏகா தருணபுத்தா தே³வதீ⁴தா புத்தம் அங்கேனாதா³ய டி²தா தம் யாசி ‘‘மா மே ஸாமி விமானம் சி²ந்தி³, ந ஸக்கி²ஸ்ஸாமி புத்தகம் ஆதா³ய அனாவாஸா விசரிது’’ந்தி. ஸோ ‘‘அஹம் அஞ்ஞத்த² ஈதி³ஸம் ருக்க²ம் ந லபி⁴ஸ்ஸாமீ’’தி தஸ்ஸா வசனம் நாதி³யி. ஸா ‘‘இமம்பி தாவ தா³ரகம் ஓலோகேத்வா ஓரமிஸ்ஸதீ’’தி புத்தம் ருக்க²ஸாகா²ய ட²பேஸி. ஸோ பி⁴க்கு² உக்கி²த்தம் ப²ரஸும் ஸந்தா⁴ரேதும் அஸக்கோந்தோ தா³ரகஸ்ஸ பா³ஹம் சி²ந்தி³. ஏவஞ்ச ஸயிதோ விமானே ஸயிதோ நாம ஹோதீதி கத்வா வுத்தம் ‘‘ருக்க²ட்ட²கதி³ப்³ப³விமானே நிபன்னஸ்ஸா’’தி.

ருக்க²ட்ட²கதி³ப்³ப³விமானேதி ச ஸாக²ட்ட²கவிமானம் ஸந்தா⁴ய வுத்தம். ருக்க²ஸ்ஸ உபரி நிப்³ப³த்தஞ்ஹி விமானம் ருக்க²படிப³த்³த⁴த்தா ‘‘ருக்க²ட்ட²கவிமான’’ந்தி வுச்சதி. ஸாக²ட்ட²கவிமானம் பன ஸப்³ப³ஸாகா²ஸன்னிஸ்ஸிதம் ஹுத்வா திட்ட²தி. தத்த² யம் ருக்க²ட்ட²கவிமானம் ஹோதி, தம் யாவ ருக்க²ஸ்ஸ மூலமத்தம்பி திட்ட²தி, தாவ ந நஸ்ஸதி. ஸாக²ட்ட²கவிமானம் பன ஸாகா²ஸு பி⁴ஜ்ஜமானாஸு தத்த² தத்தே²வ பி⁴ஜ்ஜித்வா ஸப்³ப³ஸாகா²ஸு பி⁴ன்னாஸு ஸப்³ப³ம் பி⁴ஜ்ஜதி, இத³ம்பி ச விமானம் ஸாக²ட்ட²கம், தஸ்மா ருக்கே² சி²ன்னே தம் விமானம் ஸப்³ப³ஸோ வினட்ட²ம், தேனேவ ஸா தே³வதா ப⁴க³வதோ ஸந்திகா லத்³தே⁴ அஞ்ஞஸ்மிம் விமானே வஸி. பா³ஹும் த²னமூலேயேவ சி²ந்தீ³தி அம்ஸேன ஸத்³தி⁴ம் பா³ஹம் சி²ந்தி³. இமினா ச ருக்க²தே³வதானம் க³த்தானி சி²ஜ்ஜந்தி, ந சாதுமஹாராஜிகாதீ³னம் விய அச்சே²ஜ்ஜானீதி த³ட்ட²ப்³ப³ம். ருக்க²த⁴ம்மேதி ருக்க²பகதியம், ருக்க²ஸபா⁴வேதி அத்தோ². ருக்கா²னம் விய சே²த³னாதீ³ஸு அகுப்பனஞ்ஹி ருக்க²த⁴ம்மோ நாம.

உப்பதிதந்தி உப்பன்னம். ப⁴ந்தந்தி தா⁴வந்தம். வாரயேதி நிக்³க³ண்ஹேய்ய. இத³ம் வுத்தம் ஹோதி – யதா² நாம சே²கோ ஸாரதி² அதிவேகே³ன தா⁴வந்தம் ரத²ம் நிக்³க³ஹேத்வா யதி²ச்ச²கம் பேஸேதி, ஏவம் யோ புக்³க³லோ உப்பன்னம் கோத⁴ம் வாரயே நிக்³க³ண்ஹிதும் ஸக்கோதி, தமஹம் ஸாரதி²ம் ப்³ரூமி. இதரோ பன ராஜஉபராஜாதீ³னம் ரத²ஸாரதி²ஜனோ ரஸ்மிக்³கா³ஹோ நாம ஹோதி, ந உத்தமஸாரதீ²தி.

து³தியகா³தா²ய பன அயமத்தோ² – யோதி (ஸு. நி. அட்ட². 1.1) யோ யாதி³ஸோ க²த்தியகுலா வா பப்³ப³ஜிதோ ப்³ராஹ்மணகுலா வா பப்³ப³ஜிதோ நவோ வா மஜ்ஜி²மோ வா தே²ரோ வா. உப்பதிதந்தி உத்³த⁴முத்³த⁴ம் பதிதம், க³தம் பவத்தந்தி அத்தோ², உப்பன்னந்தி வுத்தம் ஹோதி. கோத⁴ந்தி ‘‘அனத்த²ம் மே சரதீதி ஆகா⁴தோ ஜாயதீ’’திஆதி³னா (தீ³. நி. 3.340; அ. நி. 9.29) நயேன ஸுத்தே வுத்தானம் நவன்னம், ‘‘அத்த²ம் மே ந சரதீ’’திஆதீ³னஞ்ச தப்படிபக்க²தோ ஸித்³தா⁴னம் நவன்னமேவாதி அட்டா²ரஸன்னம் கா²ணுகண்டகாதி³னா அட்டா²னேன ஸத்³தி⁴ம் ஏகூனவீஸதியா ஆகா⁴தவத்தூ²னம் அஞ்ஞதராகா⁴தவத்து²ஸம்ப⁴வம் ஆகா⁴தம். விஸடந்தி வித்த²தம். ஸப்பவிஸந்தி ஸப்பஸ்ஸ விஸம். இவாதி ஓபம்மவசனம். இ-காரலோபம் கத்வா வ-இச்சேவ வுத்தம். ஓஸதே⁴ஹீதி அக³தே³ஹி. இத³ம் வுத்தம் ஹோதி – யதா² விஸதிகிச்ச²கோ வேஜ்ஜோ ஸப்பேன த³ட்டோ² ஸப்³ப³ம் காயம் ப²ரித்வா டி²தம் விஸடம் ஸப்பவிஸம் மூலக²ந்த⁴தசபத்தபுப்பா²தீ³னம் அஞ்ஞதரேஹி, நானாபே⁴ஸஜ்ஜேஹி பயோஜேத்வா கதேஹி வா ஓஸதே⁴ஹி கி²ப்பமேவ வினேய்ய, ஏவமேவ யோ யதா²வுத்தேன ஆகா⁴தவத்து²னா உப்பதிதம் சித்தஸந்தானம் ப்³யாபேத்வா டி²தம் கோத⁴ம் வினயனுபாயேஸு தத³ங்க³வினயாதீ³ஸு யேன கேனசி உபாயேன வினேதி நாதி⁴வாஸேதி பஜஹதி வினோதே³தி ப்³யந்திம் கரோதி, ஸோ பி⁴க்கு² ஜஹாதி ஓரபாரம். ஸோ ஏவம் கோத⁴ம் வினேந்தோ பி⁴க்கு² யஸ்மா கோதோ⁴ ததியமக்³கே³ன ஸப்³ப³ஸோ பஹீயதி, தஸ்மா ஓரபாரஸஞ்ஞிதானி பஞ்சோரம்பா⁴கி³யஸம்யோஜனானி ஜஹாதீதி. அவிஸேஸேன ஹி பாரந்தி தீரஸ்ஸ நாமம், தஸ்மா ஓரானி ச தானி ஸம்ஸாரஸாக³ரஸ்ஸ பாரபூ⁴தானி சாதி கத்வா ‘‘ஓரபார’’ந்தி வுச்சதி.

அத² வா யோ உப்பதிதம் வினேதி கோத⁴ம் விஸடம் ஸப்பவிஸம்வ ஓஸதே⁴ஹி, ஸோ ததியமக்³கே³ன ஸப்³ப³ஸோ கோத⁴ம் வினேத்வா அனாகா³மிப²லே டி²தோ பி⁴க்கு² ஜஹாதி ஓரபாரம். தத்த² ஓரந்தி ஸகத்தபா⁴வோ. பாரந்தி பரத்தபா⁴வோ. ஓரம் வா ச² அஜ்ஜ²த்திகானி ஆயதனானி, பாரம் ச² பா³ஹிராயதனானி. ததா² ஓரம் மனுஸ்ஸலோகோ, பாரம் தே³வலோகோ. ஓரம் காமதா⁴து, பாரம் ரூபாரூபதா⁴து. ஓரம் காமரூபப⁴வோ, பாரம் அரூபப⁴வோ. ஓரம் அத்தபா⁴வோ, பாரம் அத்தபா⁴வஸுகு²பகரணானி. ஏவமேதஸ்மிம் ஓரபாரே சதுத்த²மக்³கே³ன ச²ந்த³ராக³ம் பஜஹந்தோ ‘‘ஜஹாதி ஓரபார’’ந்தி வுச்சதி. ஏத்த² ச கிஞ்சாபி அனாகா³மினோ காமராக³ஸ்ஸ பஹீனத்தா இத⁴த்தபா⁴வாதீ³ஸு ச²ந்த³ராகோ³ ஏவ நத்தி², அபிச கோ² பனஸ்ஸ வண்ணப்பகாஸனத்த²ம் ஸப்³ப³மேதம் ஓரபாரபே⁴த³ம் ஸங்க³ஹேத்வா தத்த² ச²ந்த³ராக³ப்பஹானேன ‘‘ஜஹாதி ஓரபார’’ந்தி வுத்தம்.

இதா³னி தஸ்ஸத்த²ஸ்ஸ விபா⁴வனத்தா²ய உபமம் ஆஹ ‘‘உரகோ³ ஜிண்ணமிவத்தசம் புராண’’ந்தி. தத்த² உரேன க³ச்ச²தீதி உரகோ³, ஸப்பஸ்ஸேதம் அதி⁴வசனம். ஸோ து³விதோ⁴ காமரூபீ ச அகாமரூபீ ச. காமரூபீபி து³விதோ⁴ ஜலஜோ த²லஜோ ச. ஜலஜோ ஜலே ஏவ காமரூபம் லப⁴தி, ந த²லே ஸங்க²பாலஜாதகே (ஜா. 2.17.143 ஆத³யோ) ஸங்க²பாலனாக³ராஜா விய. த²லஜோ த²லே ஏவ, ந ஜலே. ஸோ ஜஜ்ஜரபா⁴வேன ஜிண்ணம், சிரகாலதாய புராணஞ்சாதி ஸங்க²ம் க³தம் தசம் ஜஹந்தோ சதுப்³பி³தே⁴ன ஜஹதி ஸஜாதியம் டி²தோ ஜிகு³ச்ச²ந்தோ நிஸ்ஸாய தா²மேனாதி. ஸஜாதி நாம ஸப்பஜாதி தீ³க⁴த்தபா⁴வோ. உரகா³ ஹி பஞ்சஸு டா²னேஸு ஸஜாதிம் நாதிவத்தந்தி உபபத்தியம் சுதியம் விஸ்ஸட்ட²னித்³தோ³க்கமனே ஸஜாதியா மேது²னபடிஸேவனே ஜிண்ணதசாபனயனே சாதி. தஸ்மா யதா³ தசம் ஜஹதி, ததா³ ஸஜாதியம்யேவ ட²த்வா ஜஹதி. ஸஜாதியம் டி²தோபி ச ஜிகு³ச்ச²ந்தோ ஜஹதி. ஜிகு³ச்ச²ந்தோ நாம யதா³ உபட்³ட⁴ட்டா²னே முத்தோ ஹோதி, உபட்³ட⁴ட்டா²னே அமுத்தோ ஓலம்ப³தி, ததா³ நம் அட்டீயந்தோ ஜஹதி, ஏவம் ஜிகு³ச்ச²ந்தோபி ச த³ண்ட³ந்தரம் வா மூலந்தரம் வா பாஸாணந்தரம் வா நிஸ்ஸாய ஜஹதி. நிஸ்ஸாய ஜஹந்தோபி ச தா²மம் ஜனேத்வா உஸ்ஸாஹம் கரித்வா வீரியேன வங்கம் நங்கு³ட்ட²ம் கத்வா பஸ்ஸஸந்தோவ ப²ணம் கரித்வா ஜஹதி. ஏவம் ஜஹித்வா யேனகாமம் பக்கமதி.

ஏவமேவ அயம்பி பி⁴க்கு² ஓரபாரம் ஜஹிதுகாமோ சதுப்³பி³தே⁴ன ஜஹதி ஸஜாதியம் டி²தோ ஜிகு³ச்ச²ந்தோ நிஸ்ஸாய தா²மேனாதி. ஸஜாதி நாம பி⁴க்கு²னோ ‘‘அரியாய ஜாதியா ஜாதோ’’தி (ம. நி. 2.351) வசனதோ ஸீலம். தேனேவாஹ ‘‘ஸீலே பதிட்டா²ய நரோ ஸபஞ்ஞோ’’தி (ஸம். நி. 1.23, 192). ஏவமேதிஸ்ஸம் ஸஜாதியம் டி²தோ பி⁴க்கு² தம் ஸகத்தபா⁴வாதி³பே⁴த³ம் ஓரபாரம் ஜிண்ணபுராணத்தசமிவ தம் து³க்க²ம் ஜனேந்தம் தத்த² தத்த² ஆதீ³னவத³ஸ்ஸனேன ஜிகு³ச்ச²ந்தோ கல்யாணமித்தே நிஸ்ஸாய அதி⁴மத்தஸம்மாவாயாமஸங்கா²தம் தா²மம் ஜனேத்வா ‘‘தி³வஸம் சங்கமேன நிஸஜ்ஜாய ஆவரணீயேஹி த⁴ம்மேஹி சித்தம் பரிஸோதே⁴தீ’’தி (அ. நி. 3.16; 4.37) வுத்தனயேன ரத்திந்தி³வம் ச²தா⁴ விப⁴ஜித்வா க⁴டேந்தோ வாயமந்தோ உரகோ³ விய வங்கம் நங்கு³ட்ட²ம் பல்லங்கம் ஆபு⁴ஜித்வா உரகோ³ விய பஸ்ஸஸந்தோ அயம்பி அஸிதி²லபரக்கமதாய வாயமந்தோ உரகோ³வ ப²ணம் கரித்வா அயம்பி ஞாணவிப்பா²ரம் ஜனேத்வா உரகோ³வ தசம் ஓரபாரம் ஜஹதி, ஜஹித்வா ச உரகோ³ விய ஓஹிததசோ யேனகாமம் பக்கமதி, அயம்பி ஓஹிதபா⁴ரோ அனுபாதி³ஸேஸனிப்³பா³னதா⁴துதி³ஸம் பக்கமதீதி.

90. ப⁴வந்தீதி இமினா விருள்ஹமூலே நீலபா⁴வம் ஆபஜ்ஜித்வா வட்³ட⁴மானகே தருணக³ச்சே² த³ஸ்ஸேதி. அஹுவுந்தி இமினா பன வட்³டி⁴த்வா டி²தே மஹந்தே ருக்க²க³ச்சா²தி³கே த³ஸ்ஸேதி. ப⁴வந்தீதி இமஸ்ஸ விவரணம் ‘‘ஜாயந்தி வட்³ட⁴ந்தீ’’தி, அஹுவுந்தி இமஸ்ஸ ‘‘ஜாதா வட்³டி⁴தா’’தி. ராஸீதி ஸுத்³த⁴ட்ட²கத⁴ம்மஸமூஹோ. பூ⁴தானந்தி ததா²லத்³த⁴ஸமஞ்ஞானம் அட்ட²த⁴ம்மானம். ‘‘பூ⁴தானம் கா³மோ’’தி வுத்தேபி அவயவவினிமுத்தஸ்ஸ ஸமுதா³யஸ்ஸ அபா⁴வதோ பூ⁴தஸஞ்ஞிதா தேயேவ திணருக்க²லதாத³யோ க³ய்ஹந்தி. ‘‘பூ⁴மியம் பதிட்ட²ஹித்வா ஹரிதபா⁴வமாபன்னா ருக்க²க³ச்சா²த³யோ தே³வதாஹி பரிக்³க³ய்ஹந்தி, தஸ்மா பூ⁴தானம் நிவாஸட்டா²னதாய பூ⁴தானம் கா³மோ’’திபி வத³ந்தி. ருக்கா²தீ³னந்தி ஆதி³-ஸத்³தே³ன ஓஸதி⁴க³ச்ச²லதாத³யோ வேதி³தப்³பா³.

நனு ச ருக்கா²த³யோ சித்தரஹிததாய ந ஜீவா, சித்தரஹிததா ச பரிப்ப²ந்தா³பா⁴வதோ சி²ன்னேபி ருஹனதோ விஸதி³ஸஜாதிகபா⁴வதோ சதுயோனிஅபரியாபன்னதோ ச வேதி³தப்³பா³, வுட்³டி⁴ பன பவாளஸிலாலவணானம்பி விஜ்ஜதீதி ந தேஸம் ஜீவபா⁴வே காரணம், விஸயக்³க³ஹணஞ்ச நேஸம் பரிகப்பனாமத்தம் ஸுபனம் விய சிஞ்சாதீ³னம், ததா² தோ³ஹளாத³யோ, தத்த² கஸ்மா பூ⁴தகா³மஸ்ஸ சே²த³னாதி³பச்சயா பாசித்தியம் வுத்தந்தி? ஸமணஸாருப்பதோ தம்னிவாஸஸத்தானுரக்க²ணதோ ச. தேனேவாஹ ‘‘ஜீவஸஞ்ஞினோ ஹி மோக⁴புரிஸா மனுஸ்ஸா ருக்க²ஸ்மி’’ந்திஆதி³.

91. ‘‘மூலே ஜாயந்தீ’’திஆதீ³ஸு அத்தோ² உபரி அத்தனா வுச்சமானப்பகாரேன ஸீஹளட்ட²கதா²யம் வுத்தோதி ஆஹ ‘‘ஏவம் ஸந்தேபி…பே… ந ஸமேந்தீ’’தி. விஜாத-ஸத்³தோ³ இத⁴ வி-ஸத்³த³லோபம் கத்வா நித்³தி³ட்டோ²தி ஆஹ ‘‘விஜாதானீ’’தி. விஜாத-ஸத்³தோ³ ச ‘‘விஜாதா இத்தீ²’’திஆதீ³ஸு விய பஸூதவசனோதி ஆஹ ‘‘பஸூதானீ’’தி. பஸூதி ச நாமேத்த² நிப்³ப³த்தபண்ணமூலதாதி ஆஹ ‘‘நிப்³ப³த்தபண்ணமூலானீ’’தி. இமினா இமம் தீ³பேதி ‘‘நிப்³ப³த்தபண்ணமூலானி பீ³ஜானி பூ⁴தகா³மஸங்க²மேவ க³ச்ச²ந்தி, தேஸு ச வத்தமானோ பீ³ஜஜாத-ஸத்³தோ³ ருள்ஹீவஸேன ருக்கா²தீ³ஸுபி வத்ததீ’’தி. புரிமஸ்மிம் அத்த²விகப்பே பன பீ³ஜேஹி ஜாதானம் ருக்க²லதாதீ³னம்யேவ பூ⁴தகா³மதா வுத்தா.

தானி த³ஸ்ஸேந்தோதி தானி பீ³ஜானி த³ஸ்ஸேந்தோ. மூலபீ³ஜந்திஆதீ³ஸு மூலமேவ பீ³ஜம் மூலபீ³ஜம். ஸேஸேஸுபி ஏஸேவ நயோ. ப²ளுபீ³ஜந்தி பப்³ப³பீ³ஜம். பச்சயந்தரஸமவாயே ஸதி³ஸப²லுப்பத்தியா விஸேஸகாரணபா⁴வதோ விருஹனஸமத்தே² ஸாரப²லே நிருள்ஹோ பீ³ஜ-ஸத்³தோ³. தத³த்த²ஸம்ஸித்³தி⁴யா மூலாதீ³ஸுபி கேஸுசி பவத்ததீதி மூலாதி³தோ நிவத்தனத்த²ம் ஏகேன பீ³ஜஸத்³தே³ன விஸேஸேத்வா வுத்தம் ‘‘பீ³ஜபீ³ஜ’’ந்தி ‘‘ரூபரூபம், து³க்க²து³க்க²’’ந்தி ச யதா². பீ³ஜதோ நிப்³ப³த்தேன பீ³ஜம் த³ஸ்ஸிதந்தி காரியோபசாரேன காரணம் த³ஸ்ஸிதந்தி தீ³பேதி.

92. பீ³ஜே பீ³ஜஸஞ்ஞீதி ஏத்த² காரணூபசாரேன காரியம் வுத்தந்தி த³ஸ்ஸேந்தோ ‘‘தத்த² யதா²’’திஆதி³மாஹ. பூ⁴தகா³மபரிமோசனம் கத்வாதி பூ⁴தகா³மதோ மோசேத்வா, வியோஜேத்வாதி அத்தோ². யம் பீ³ஜம் பூ⁴தகா³மோ நாம ஹோதீதி பீ³ஜானி ச தானி ஜாதானி சாதி வுத்தமத்த²ம் ஸந்தா⁴ய வத³தி. தத்த² யம் பீ³ஜந்தி யம் நிப்³ப³த்தபண்ணமூலம் பீ³ஜம். தஸ்மிம் பீ³ஜேதி தஸ்மிம் பூ⁴தகா³மஸஞ்ஞிதே பீ³ஜே. ஏத்த² ச பீ³ஜஜாத-ஸத்³த³ஸ்ஸ விய ருள்ஹீவஸேன ருக்கா²தீ³ஸு பீ³ஜ-ஸத்³த³ஸ்ஸபி பவத்தி வேதி³தப்³பா³. யதா²ருதந்தி யதா²பாளி.

யத்த² கத்த²சீதி மூலே அக்³கே³ மஜ்ஜே² வா. ஸஞ்சிச்ச உக்கி²பிதும் ந வட்டதீதி ஏத்த² ஸசேபி ஸரீரே லக்³க³பா⁴வம் ஜானந்தோவ உத³கதோ உட்ட²ஹதி, ‘‘தம் உத்³த⁴ரிஸ்ஸாமீ’’தி ஸஞ்ஞாய அபா⁴வதோ வட்டதி. உப்பாடிதானீதி உத்³த⁴டானி. பீ³ஜகா³மே ஸங்க³ஹம் க³ச்ச²ந்தீதி பூ⁴தகா³மதோ பரிமோசிதத்தா வுத்தம். அனந்தக-க்³க³ஹணேன ஸாஸபமத்திகா க³ஹிதா. நாமஞ்ஹேதம் தஸ்ஸா ஸேவாலஜாதியா. மூலபண்ணானம் அஸம்புண்ணத்தா ‘‘அஸம்புண்ணபூ⁴தகா³மோ நாமா’’தி வுத்தம். அபூ⁴தகா³மமூலத்தாதி ஏத்த² பூ⁴தகா³மோ மூலம் காரணம் ஏதஸ்ஸாதி பூ⁴தகா³மமூலோ, பூ⁴தகா³மஸ்ஸ வா மூலம் காரணந்தி பூ⁴தகா³மமூலம். பீ³ஜகா³மோ ஹி நாம பூ⁴தகா³மதோ ஸம்ப⁴வதி, பூ⁴தகா³மஸ்ஸ ச காரணம் ஹோதி, அயம் பன தாதி³ஸோ ந ஹோதீதி ‘‘அபூ⁴தகா³மமூலத்தா’’தி வுத்தம். தத்ரட்ட²கத்தா வுத்தம் ‘‘ஸோ பீ³ஜகா³மேன ஸங்க³ஹிதோ’’தி. இத³ஞ்ச ‘‘அபூ⁴தகா³மமூலத்தா’’தி ஏத்த² பட²மம் வுத்தஅத்த²ஸம்ப⁴வதோ வுத்தம். கிஞ்சாபி ஹி தாலனாளிகேராதீ³னம் கா²ணு உத்³த⁴ம் அவட்³ட⁴னதோ பூ⁴தகா³மஸ்ஸ காரணம் ந ஹோதி, ததா²பி பூ⁴தகா³மஸங்க்²யுபக³தனிப்³ப³த்தபண்ணமூலபீ³ஜதோ ஸம்பூ⁴தத்தா பூ⁴தகா³மதோ உப்பன்னோ நாம ஹோதீதி பீ³ஜகா³மேன ஸங்க³ஹம் க³ச்ச²தி.

‘‘அங்குரே ஹரிதே’’தி வத்வா தமேவ விபா⁴வேதி ‘‘நீலபண்ணவண்ணே ஜாதே’’தி, நீலபண்ணஸ்ஸ வண்ணஸதி³ஸே வண்ணே ஜாதேதி அத்தோ². ‘‘நீலவண்ணே ஜாதே’’தி வா பாடோ² க³ஹேதப்³போ³. அமூலகபூ⁴தகா³மே ஸங்க³ஹம் க³ச்ச²தீதி நாளிகேரஸ்ஸ ஆவேணிகம் கத்வா வத³தி. ‘‘பானீயக⁴டாதீ³னம் ப³ஹி ஸேவாலோ உத³கே அட்டி²தத்தா பீ³ஜகா³மானுலோமத்தா ச து³க்கடவத்தூ²’’தி வத³ந்தி. கண்ணகம்பி அப்³போ³ஹாரிகமேவாதி நீலவண்ணம்பி அப்³போ³ஹாரிகமேவ. ஸேலேய்யகம் நாம ஸிலாய ஸம்பூ⁴தா ஏகா ஸுக³ந்த⁴ஜாதி. ‘‘ருக்க²த்தசம் விகோபேதீதி வுத்தத்தா ருக்கே² ஜாதம் யம் கிஞ்சி ச²த்தகம் ருக்க²த்தசம் அவிகோபேத்வா மத்த²கதோ சி²ந்தி³த்வா க³ஹேதும் வட்டதீ’’தி வத³ந்தி. ருக்க²தோ முச்சித்வா திட்ட²தீதி ஏத்த² ‘‘யதி³பி கிஞ்சிமத்தம் ருக்கே² அல்லீனா ஹுத்வா திட்ட²தி, ருக்க²தோ க³ய்ஹமானோ பன ருக்க²ச்ச²விம் ந விகோபேதி, வட்டதீ’’தி வத³ந்தி. அல்லருக்க²தோ ந வட்டதீதி ஏத்தா²பி ருக்க²த்தசம் அவிகோபேத்வா மத்த²கதோ தச்சே²த்வா க³ஹேதும் வட்டதீதி வேதி³தப்³ப³ம். ஹத்த²குக்குச்சேனாதி ஹத்தா²னம் அஸம்யதபா⁴வேன, ஹத்த²சாபல்லேனாதி வுத்தம் ஹோதி. பானீயம் ந வாஸேதப்³ப³ந்தி இத³ம் அத்தனோ அத்தா²ய நாமிதம் ஸந்தா⁴ய வுத்தம். கேவலம் அனுபஸம்பன்னஸ்ஸ அத்தா²ய நாமிதே பன பச்சா² ததோ லபி⁴த்வா ந வாஸேதப்³ப³ந்தி நத்தி². ‘‘யேஸம் ருக்கா²னம் ஸாகா² ருஹதீதி வுத்தத்தா யேஸம் ஸாகா² ந ருஹதி, தத்த² கப்பியகரணகிச்சம் நத்தீ²’’தி வத³ந்தி.

93. பஞ்சஹி ஸமணகப்பேஹீதி பஞ்சஹி ஸமணவோஹாரேஹி. கிஞ்சாபி ஹி பீ³ஜானம் அக்³கி³னா பு²ட்ட²மத்தேன நகா²தீ³ஹி விலிக²னமத்தேன ச அவிருள்ஹீத⁴ம்மதா ந ஹோதி, ததா²பி ஏவம் கதேயேவ ஸமணானம் கப்பதீதி அக்³கி³பரிஜிதாத³யோ ஸமணவோஹாரா நாம ஜாதா, தஸ்மா தேஹி ஸமணவோஹாரேஹி கரணபூ⁴தேஹி ப²லம் பரிபு⁴ஞ்ஜிதும் அனுஜானாமீதி அதி⁴ப்பாயோ. அபீ³ஜனிப்³ப³ட்டபீ³ஜானிபி ஸமணானம் கப்பந்தீதி பஞ்ஞத்தபண்ணத்திபா⁴வதோ ஸமணவோஹாராஇச்சேவ ஸங்க²ம் க³தானி. அத² வா அக்³கி³பரிஜிதாதீ³னம் பஞ்சன்னம் கப்பியபா⁴வதோயேவ பஞ்சஹி ஸமணகப்பியபா⁴வஸங்கா²தேஹி காரணேஹி ப²லம் பரிபு⁴ஞ்ஜிதும் அனுஜானாமீதி ஏவமேத்த² அதி⁴ப்பாயோ வேதி³தப்³போ³. அக்³கி³பரிஜிதந்திஆதீ³ஸு ‘‘பரிசித’’ந்திபி பட²ந்தி. அபீ³ஜம் நாம தருணம்ப³ப²லாதி³. நிப்³ப³ட்டபீ³ஜம் நாம அம்ப³பனஸாதி³, யம் பீ³ஜம் நிப்³ப³ட்டேத்வா விஸும் கத்வா பரிபு⁴ஞ்ஜிதும் ஸக்கா ஹோதி. ‘‘கப்பிய’’ந்தி வத்வாவ காதப்³ப³ந்தி யோ கப்பியம் கரோதி, தேன கத்தப்³பா³காரஸ்ஸேவ வுத்தத்தா பி⁴க்கு²னா அவுத்தேபி காதும் வட்டதீதி ந க³ஹேதப்³ப³ம். புன ‘‘கப்பியம் காரேதப்³ப³’’ந்தி காராபனஸ்ஸ பட²மமேவ கதி²தத்தா பி⁴க்கு²னா ‘‘கப்பியம் கரோஹீ’’தி வுத்தேயேவ அனுபஸம்பன்னேன ‘‘கப்பிய’’ந்தி வத்வா அக்³கி³பரிஜிதாதி³ காதப்³ப³ந்தி க³ஹேதப்³ப³ம். ‘‘கப்பியந்தி வசனம் பன யாய காயசி பா⁴ஸாய வத்தும் வட்டதீ’’தி வத³ந்தி. ‘‘கப்பியந்தி வத்வாவ காதப்³ப³’’ந்தி வசனதோ பட²மம் ‘‘கப்பிய’’ந்தி வத்வா பச்சா² அக்³கி³ஆதி³னா பு²ஸனாதி³ காதப்³ப³ந்தி வேதி³தப்³ப³ம். ‘‘பட²மம் அக்³கி³ம் நிக்கி²பித்வா நகா²தி³னா வா விஜ்ஜி²த்வா தம் அனுத்³த⁴ரித்வாவ ‘கப்பிய’ந்தி வத்தும்பி வட்டதீ’’தி வத³ந்தி.

ஏகஸ்மிம் பீ³ஜே வாதிஆதீ³ஸு ‘‘ஏகம்யேவ காரேமீதி அதி⁴ப்பாயே ஸதிபி ஏகாப³த்³த⁴த்தா ஸப்³ப³ம் கதமேவ ஹோதீ’’தி வத³ந்தி. தா³ரும் விஜ்ஜ²தீதி ஏத்த² ‘‘ஜானித்வாபி விஜ்ஜ²தி வா விஜ்ஜா²பேதி வா, வட்டதியேவா’’தி வத³ந்தி. ப⁴த்தஸித்தே² விஜ்ஜ²தீதி ஏத்தா²பி ஏஸேவ நயோ. ‘‘தம் விஜ்ஜ²தி, ந வட்டதீதி ரஜ்ஜுஆதீ³னம் பா⁴ஜனக³திகத்தா’’தி வத³ந்தி. மரிசபக்காதீ³ஹி மிஸ்ஸேத்வாதி ஏத்த² ப⁴த்தஸித்த²ஸம்ப³ந்த⁴வஸேன ஏகாப³த்³த⁴தா வேதி³தப்³பா³, ந ப²லானம்யேவ அஞ்ஞமஞ்ஞம் ஸம்ப³ந்த⁴வஸேன. பி⁴ந்தா³பேத்வா கப்பியம் காராபேதப்³ப³ந்தி பீ³ஜதோ முத்தஸ்ஸ கடாஹஸ்ஸ பா⁴ஜனக³திகத்தா வுத்தம்.

நிக்கா²மேதுந்தி தம் பி⁴க்கு²ம் நிக்கா²மேதும். ‘‘ஸசே ஏதஸ்ஸ அனுலோம’’ந்தி ஸேனாஸனரக்க²ணத்தா²ய அனுஞ்ஞாதம்பி படக்³கி³தா³னாதி³ம் அத்தனாபி காதும் வட்டதீதி ஏத்தகேனேவ இத³ம்பி ஏதஸ்ஸ அனுலோமந்தி ஏவமதி⁴ப்பாயோ ஸியா. படக்³கி³தா³னம் பரித்தகரணஞ்ச அத்தனோ பரஸ்ஸ வா ஸேனாஸனரக்க²ணத்தா²ய வட்டதியேவ. தஸ்மா ஸசே தஸ்ஸ ஸுத்தஸ்ஸ ஏதம் அனுலோமம் ஸியா, அத்தனோ ந வட்டதி, அஞ்ஞஸ்ஸ வட்டதீதி அயம் விஸேஸோ குதோ லப்³ப⁴தீதி ஆஹ ‘‘அத்தனோ ந வட்டதி…பே… ந ஸக்கா லத்³து⁴’’ந்தி. ஸேஸமேத்த² உத்தானமேவ. பூ⁴தகா³மோ, பூ⁴தகா³மஸஞ்ஞிதா, விகோபனம் வா விகோபாபனம் வாதி இமானி பனேத்த² தீணி அங்கா³னி.

பூ⁴தகா³மஸிக்கா²பத³வண்ணனா நிட்டி²தா.

2. அஞ்ஞவாத³கஸிக்கா²பத³வண்ணனா

94-98. து³தியே அஞ்ஞம் வசனந்தி யம் சோத³கேன சுதி³தகஸ்ஸ தோ³ஸவிபா⁴வனவசனம் வுத்தம், தம் ததோ அஞ்ஞேனேவ வசனேன படிசரதி. அத² வா அஞ்ஞேனஞ்ஞம் படிசரதீதி அஞ்ஞேன காரணேன அஞ்ஞம் காரணம் படிசரதீதி ஏவமேத்த² அத்தோ² வேதி³தப்³போ³, யம் சோத³கேன சுதி³தகஸ்ஸ தோ³ஸவிபா⁴வனகாரணம் வுத்தம், ததோ அஞ்ஞேன சோத³னாய அமூலகபா⁴வதீ³பகேன காரணேன படிசரதீதி வுத்தம் ஹோதி. படிசரதீதி ச படிச்சா²த³னவஸேன சரதி, பவத்ததீதி அத்தோ². படிச்சா²த³னத்தோ² ஏவ வா சரதி-ஸத்³தோ³ அனேகத்த²த்தா தா⁴தூனம். தேனாஹ ‘‘படிச்சா²தே³தீ’’தி. கோ ஆபன்னோதிஆதி³னா பாளியம் சோத³னம் அவிஸ்ஸஜ்ஜேத்வா விக்கே²பாபஜ்ஜனவஸேன அஞ்ஞேன அஞ்ஞம் படிசரணம் த³ஸ்ஸிதம். அபரம்பி பன சோத³னம் விஸ்ஸஜ்ஜேத்வா ப³ஹித்³தா⁴ கதா²அபனாமவஸேன பவத்தம் பாளிமுத்தகம் அஞ்ஞேனஞ்ஞம் படிசரணம் வேதி³தப்³ப³ம். ‘‘இத்த²ன்னாமம் ஆபத்திம் ஆபன்னோஸீ’’தி புட்டோ² ‘‘பாடலிபுத்தம் க³தோம்ஹீ’’தி வத்வா புன ‘‘ந தவ பாடலிபுத்தக³மனம் புச்சா²ம, ஆபத்திம் புச்சா²மா’’தி வுத்தே ‘‘ததோ ராஜக³ஹம் க³தோம்ஹீ’’தி வத்வா ‘‘ராஜக³ஹம் வா யாஹி ப்³ராஹ்மணக³ஹம் வா, ஆபத்திம் ஆபன்னோஸீ’’தி வுத்தே ‘‘தத்த² மே ஸூகரமம்ஸம் லத்³த⁴’’ந்திஆதீ³னி வத்வாவ கத²ம் ப³ஹித்³தா⁴ விக்கி²பந்தோபி ஹி ‘‘அஞ்ஞேனஞ்ஞம் படிசரதி’’ச்சேவ ஸங்க²ம் க³ச்ச²தி.

யதே³தம் அஞ்ஞேன அஞ்ஞம் படிசரணவஸேன பவத்தவசனம், ததே³வ புச்சி²தமத்த²ம் ட²பேத்வா அஞ்ஞம் வத³தீதி அஞ்ஞவாத³கந்தி ஆஹ ‘‘அஞ்ஞேனஞ்ஞம் படிசரணஸ்ஸேதம் நாம’’ந்தி. துண்ஹீபூ⁴தஸ்ஸேதம் நாமந்தி துண்ஹீபா⁴வஸ்ஸேதம் நாமம், அயமேவ வா பாடோ². அஞ்ஞவாத³கம் ஆரோபேதூதி அஞ்ஞவாத³ககம்மம் ஆரோபேது, அஞ்ஞவாத³கத்தம் வா இதா³னி கரியமானேன கம்மேன ஆரோபேதூதி அத்தோ². விஹேஸகம் ஆரோபேதூதி ஏத்தா²பி விஹேஸககம்மம் விஹேஸகபா⁴வம் வா ஆரோபேதூதி ஏவமத்தோ² த³ட்ட²ப்³போ³.

அனாரோபிதே அஞ்ஞவாத³கே வுத்தது³க்கடம் பாளியம் ஆக³தஅஞ்ஞேனஞ்ஞம்படிசரணவஸேன யுஜ்ஜதி. அட்ட²கதா²யம் ஆக³தேன பன பாளிமுத்தகஅஞ்ஞேனஞ்ஞம்படிசரணவஸேன அனாரோபிதே அஞ்ஞவாத³கே முஸாவாதே³ன பாசித்தியம், ஆரோபிதே இமினாவ பாசித்தியந்தி வேதி³தப்³ப³ம். கேசி பன ‘‘ஆரோபிதே அஞ்ஞவாத³கே முஸாவாதே³ன இமினா ச பாசித்தியத்³வயம் ஹோதீ’’தி வத³ந்தி, தம் வீமம்ஸித்வா க³ஹேதப்³ப³ம். யா ஸா ஆதி³கம்மிகஸ்ஸ அனாபத்தி வுத்தா, ஸாபி பாளியம் ஆக³தஅஞ்ஞேனஞ்ஞம்படிசரணவஸேன வுத்தாதி த³ட்ட²ப்³பா³, இமினா ஸிக்கா²பதே³ன அனாபத்தித³ஸ்ஸனத்த²ம் வா. ஸேஸம் உத்தானமேவ. த⁴ம்மகம்மேன ஆரோபிததா, ஆபத்தியா வா வத்து²னா வா அனுயுஞ்ஜியமானதா, சா²தே³துகாமதாய அஞ்ஞேனஞ்ஞம் படிசரணம் வா துண்ஹீபா⁴வோ வாதி இமானி பனேத்த² தீணி அங்கா³னி.

அஞ்ஞவாத³கஸிக்கா²பத³வண்ணனா நிட்டி²தா.

3. உஜ்ஜா²பனகஸிக்கா²பத³வண்ணனா

103. ததியே தா⁴துபாடே² ஜே²-ஸத்³தோ³ சிந்தாயம் படி²தோதி ஆஹ ‘‘லாமகதோ வா சிந்தாபேந்தீ’’திஆதி³. அயமேவ ச அனேகத்த²த்தா தா⁴தூனம் ஓலோகனத்தோ²பி ஹோதீதி த³ட்ட²ப்³ப³ம். ‘‘அக்க²ராய வாசேதீ’’திஆதீ³ஸு (பாசி. 46) விய ‘‘ச²ந்தா³யா’’தி லிங்க³விபல்லாஸவஸேன வுத்தந்தி ஆஹ ‘‘ச²ந்தே³னா’’தி.

105. யேன வசனேனாதி யேன ‘‘ச²ந்தா³ய இத்த²ன்னாமோ இத³ம் நாம கரோதீ’’திஆதி³வசனேன. யேன ச கி²ய்யந்தீதி யேன ‘‘ச²ந்தா³ய இத்த²ன்னாமோ’’திஆதி³வசனேன தத்த² தத்த² பி⁴க்கூ²னம் ஸவனூபசாரே ட²த்வா அவண்ணம் பகாஸேந்தி.

106. அஞ்ஞம் அனுபஸம்பன்னம் உஜ்ஜா²பேதீதி அஞ்ஞேன அனுபஸம்பன்னேன உஜ்ஜா²பேதி. தஸ்ஸ வா தம் ஸந்திகே கி²ய்யதீதி தஸ்ஸ அனுபஸம்பன்னஸ்ஸ ஸந்திகே தம் ஸங்கே⁴ன ஸம்மதம் உபஸம்பன்னம் கி²ய்யதி, அவண்ணம் வத³ந்தோ வா பகாஸேதி. அனுபஸம்பன்னம் ஸங்கே⁴ன ஸம்மதந்தி ஏத்த² ஸம்மதபுப்³போ³ ஸம்மதோதி வுத்தோ. தேனாஹ ‘‘கிஞ்சாபீ’’திஆதி³. யஸ்மா உஜ்ஜா²பனம் கி²ய்யனஞ்ச முஸாவாத³வஸேனேவ பவத்தம், தஸ்மா ஆதி³கம்மிகஸ்ஸ அனாபத்தீதி பாசித்தியட்டா²னே து³க்கடட்டா²னே ச இமினாவ அனாபத்தித³ஸ்ஸனத்த²ம் வுத்தந்தி க³ஹேதப்³ப³ம். ஏவஞ்ச கத்வா உஜ்ஜா²பேந்தஸ்ஸ கி²ய்யந்தஸ்ஸ ச ஏகக்க²ணே த்³வே த்³வே ஆபத்தியோ ஹோந்தீதி ஆபன்னம். அத² வா ஈதி³ஸம் ஸிக்கா²பத³ம் முஸாவாத³தோ பட²மம் பஞ்ஞத்தந்தி க³ஹேதப்³ப³ம். ஸேஸமேத்த² உத்தானமேவ. த⁴ம்மகம்மேன ஸம்மததா, உபஸம்பன்னதா, அக³திக³மனாபா⁴வோ, தஸ்ஸ அவண்ணகாமதா, யஸ்ஸ ஸந்திகே வத³தி, தஸ்ஸ உபஸம்பன்னதா, உஜ்ஜா²பனம் வா கி²ய்யனம் வாதி இமானி பனேத்த² ச² அங்கா³னி.

உஜ்ஜா²பனகஸிக்கா²பத³வண்ணனா நிட்டி²தா.

4. பட²மஸேனாஸனஸிக்கா²பத³வண்ணனா

108-110. சதுத்தே² ஹிமவஸ்ஸேனாதி ஹிமமேவ வுத்தம். அபஞ்ஞாதேதி அப்பதீதே, அப்பஸித்³தே⁴தி அத்தோ². ‘‘மண்ட³பே வா ருக்க²மூலே வாதி வசனதோ விவடங்க³ணேபி நிக்கி²பிதும் வட்டதீ’’தி தீஸுபி க³ண்டி²பதே³ஸு வுத்தம். கோ³சரப்பஸுதாதி கோ³சரட்டா²னம் படிபன்னா. ‘‘அட்ட² மாஸே’’தி இமினா வஸ்ஸானம் சாதுமாஸம் சேபி தே³வோ ந வஸ்ஸதி, படிக்கி²த்தமேவாதி ஆஹ ‘‘அட்ட² மாஸேதி வசனதோ…பே… நிக்கி²பிதும் ந வட்டதியேவா’’தி. தத்த² சத்தாரோ மாஸேதி வஸ்ஸானஸ்ஸ சத்தாரோ மாஸே. அவஸ்ஸிகஸங்கேதேதி இமினா அனுஞ்ஞாதேபி அட்ட² மாஸே யத்த² ஹேமந்தே தே³வோ வஸ்ஸதி, தத்த² அபரேபி சத்தாரோ மாஸா படிக்கி²த்தாதி ஆஹ ‘‘அவஸ்ஸிகஸங்கேதேதி வசனதோ’’திஆதி³. இமினா இமம் தீ³பேதி ‘‘யஸ்மிம் தே³ஸே ஹேமந்தே தே³வோ வஸ்ஸதி, தத்த² அட்ட² மாஸே படிக்கி²பித்வா சத்தாரோ மாஸா அனுஞ்ஞாதா. யத்த² பன வஸ்ஸானேயேவ வஸ்ஸதி, தத்த² சத்தாரோ மாஸே படிக்கி²பித்வா அட்ட² மாஸா அனுஞ்ஞாதா’’தி.

இமினாவ நயேன மஜ்ஜி²மபதே³ஸே யத்த² ஹேமந்தே ஹிமவஸ்ஸம் வஸ்ஸதி, தத்தா²பி அட்டே²வ மாஸா படிக்கி²த்தாதி வேதி³தப்³பா³. தஸ்மா வஸ்ஸானகாலே பகதிஅஜ்ஜோ²காஸே ஓவஸ்ஸகமண்ட³பே ருக்க²மூலே ச ஸந்த²ரிதும் ந வட்டதி, ஹேமந்தகாலே பகதிஅஜ்ஜோ²காஸே ஓவஸ்ஸகமண்ட³பாதீ³ஸுபி வட்டதி. தஞ்ச கோ² யத்த² ஹிமவஸ்ஸேன ஸேனாஸனம் ந தேமதி, கி³ம்ஹகாலேபி பகதிஅஜ்ஜோ²காஸாதீ³ஸு வட்டதியேவ, தஞ்ச கோ² அகாலமேகா⁴த³ஸ்ஸனே, காகாதீ³னம் நிப³த்³த⁴வாஸருக்க²மூலே பன கதா³சிபி ந வட்டதீதி ஏவமேத்த² வினிச்ச²யோ வேதி³தப்³போ³.

இமஞ்ச பன அத்த²விஸேஸம் க³ஹேத்வா ப⁴க³வதா பட²மமேவ ஸிக்கா²பத³ம் பஞ்ஞத்தந்தி விஸும் அனுபஞ்ஞத்தி ந வுத்தா. தேனேவ ஹி மாதிகாட்ட²கதா²யம் (கங்கா². அட்ட². பட²மஸேனாஸனஸிக்கா²பத³வண்ணனா) வுத்தம் ‘‘இதி யத்த² ச யதா³ ச ஸந்த²ரிதும் ந வட்டதி, தம் ஸப்³ப³மித⁴ அஜ்ஜோ²காஸஸங்க²மேவ க³த’’ந்தி. அத² வா அவிஸேஸேன அஜ்ஜோ²காஸே ஸந்த²ரணஸந்த²ராபனானி படிக்கி²பித்வா ‘‘ஈதி³ஸே காலே ஈதி³ஸே ச பதே³ஸே ட²பேதா²’’தி அனுஜானனமத்தேனேவ அலந்தி ந ஸிக்கா²பதே³ விஸும் அனுபஞ்ஞத்தி உத்³த⁴டாதி வேதி³தப்³பா³. பரிவாரே (பரி. 65-67) பன இமஸ்ஸேவ ஸிக்கா²பத³ஸ்ஸ அனுரூபவஸேன பஞ்ஞத்தத்தா ‘‘ஏகா அனுபஞ்ஞத்தீ’’தி வுத்தம்.

நவவாயிமோ ஸீக⁴ம் ந நஸ்ஸதீதி ஆஹ ‘‘நவவாயிமோ வா’’தி. ஓனத்³த⁴கோதி சம்மேன ஓனத்³தோ⁴. உக்கட்ட²அப்³போ⁴காஸிகோதி இத³ம் தஸ்ஸ பரிவிதக்கத³ஸ்ஸனமத்தம், உக்கட்ட²அப்³போ⁴காஸிகஸ்ஸ பன சீவரகுடி ந வட்டதீதி நத்தி². காயானுக³திகத்தாதி பி⁴க்கு²னோ தத்தே²வ ஸன்னிஹிதபா⁴வம் ஸந்தா⁴ய வுத்தம். இமினா ச தஸ்மிம்யேவ காலே அனாபத்தி வுத்தா, சீவரகுடிதோ நிக்க²மித்வா பன அஞ்ஞத்த² க³ச்ச²ந்தஸ்ஸ பிண்டா³ய பவிஸந்தஸ்ஸபி ஆபத்தியேவ. ‘‘யஸ்மா பன தா³யகேஹி தா³னகாலேயேவ ஸஹஸ்ஸக்³க⁴னகம்பி கம்ப³லம் ‘பாத³புஞ்ச²னிம் கத்வா பரிபு⁴ஞ்ஜதா²’தி தி³ன்னம் ததே²வ பரிபு⁴ஞ்ஜிதும் வட்டதி, தஸ்மா ‘இமம் மஞ்சபீடா²தி³ஸேனாஸனம் அப்³போ⁴காஸேபி யதா²ஸுக²ம் பரிபு⁴ஞ்ஜதா²’தி தா³யகேஹி தி³ன்னம் சே, ஸப்³ப³ஸ்மிம்பி காலே அப்³போ⁴காஸே நிக்கி²பிதும் வட்டதீ’’தி வத³ந்தி. பேஸேத்வா க³ந்தப்³ப³ந்தி ஏத்த² ‘‘யோ பி⁴க்கு² இமம் டா²னம் ஆக³ந்த்வா வஸதி, தஸ்ஸ தே³தா²’’தி வத்வா பேஸேதப்³ப³ம்.

வலாஹகானம் அனுட்டி²தபா⁴வம் ஸல்லக்கே²த்வாதி இமினா ச கி³ம்ஹானேபி மேகே⁴ உட்டி²தே மஞ்சபீடா²தி³ம் யம்கிஞ்சி ஸேனாஸனம் அஜ்ஜோ²காஸே நிக்கி²பிதும் ந வட்டதீதி தீ³பிதந்தி வேதி³தப்³ப³ம். ‘‘பாத³ட்டா²னாபி⁴முகா²தி நிஸீத³ந்தானம் பாத³பதனட்டா²னாபி⁴முக²’’ந்தி கேசி. ‘‘ஸம்மஜ்ஜந்தஸ்ஸ பாத³ட்டா²னாபி⁴முக²’’ந்தி அபரே. ‘‘ப³ஹி வாலுகாய அக³மனனிமித்தம் பாத³ட்டா²னாபி⁴முகா² வாலிகா ஹரிதப்³பா³தி வுத்த’’ந்தி ஏகே. கசவரம் ஹத்தே²ஹி க³ஹேத்வா ப³ஹி ச²ட்டேதப்³ப³ந்தி இமினா கசவரம் ச²ட்³டே³ஸ்ஸாமீதி வாலிகா ந ச²ட்³டே³தப்³பா³தி தீ³பேதி.

111. அந்தோ ஸம்வேடே²த்வா ப³த்³த⁴ந்தி ஏரகபத்தாதீ³ஹி வேணிம் கத்வா தாய வேணியா உபோ⁴ஸு பஸ்ஸேஸு வித்த²தட்டா²னேஸு ப³ஹும் வேடே²த்வா ததோ பட்டா²ய யாவ மஜ்ஜ²ட்டா²னம், தாவ அந்தோ ஆகட்³ட⁴னவஸேன வேடே²த்வா மஜ்ஜே² ஸங்கி²பித்வா திரியம் தத்த² தத்த² ப³ந்தி⁴த்வா கதம். கப்பம் லபி⁴த்வாதி க³ச்சா²தி வுத்தவசனேன கப்பம் லபி⁴த்வா. தே²ரஸ்ஸ ஹி ஆணத்தியா க³ச்ச²ந்தஸ்ஸ அனாபத்தி. புரிமனயேனேவாதி ‘‘நிஸீதி³த்வா ஸயம் க³ச்ச²ந்தோ’’திஆதி³னா புப்³பே³ வுத்தனயேனேவ. அஞ்ஞத்த² க³ச்ச²தீதி தம் மக்³க³ம் அதிக்கமித்வா அஞ்ஞத்த² க³ச்ச²தி. லேட்³டு³பாதுபசாரதோ ப³ஹி டி²தத்தா ‘‘பாது³த்³தா⁴ரேன காரேதப்³போ³’’தி வுத்தம், அஞ்ஞத்த² க³ச்ச²ந்தஸ்ஸ பட²மபாது³த்³தா⁴ரே து³க்கடம், து³தியபாது³த்³தா⁴ரே பாசித்தியந்தி அத்தோ². பாகதிகம் அகத்வாதி அப்படிஸாமேத்வா. அந்தரஸன்னிபாதேதி அந்தரந்தரா ஸன்னிபாதே.

ஆவாஸிகானம்யேவ பலிபோ³தோ⁴தி ஏத்த² ஆக³ந்துகேஹி ஆக³ந்த்வா கிஞ்சி அவத்வா தத்த² நிஸின்னேபி ஆவாஸிகானம்யேவ பலிபோ³தோ⁴தி அதி⁴ப்பாயோ. மஹாபச்சரிவாதே³ பன ‘‘அஞ்ஞேஸு ஆக³ந்த்வா நிஸின்னேஸூ’’தி இத³ம் அம்ஹாகந்தி வத்வா வா அவத்வா வா நிஸின்னேஸூதி அதி⁴ப்பாயோ. மஹாஅட்ட²கதா²வாதே³ ‘‘ஆபத்தீ’’தி பாசித்தியமேவ வுத்தம். மஹாபச்சரியம் பன ஸந்த²ரணஸந்த²ராபனே ஸதி பாசித்தியேன ப⁴விதப்³ப³ந்தி அனாணத்தியா பஞ்ஞத்தத்தா து³க்கடம் வுத்தம். ‘‘இத³ம் உஸ்ஸாரகஸ்ஸ, இத³ம் த⁴ம்மகதி²கஸ்ஸா’’தி விஸும் பஞ்ஞத்தத்தா அனாணத்தியா பஞ்ஞத்தேபி பாசித்தியேனேவ ப⁴விதப்³ப³ந்தி அதி⁴ப்பாயேன ‘‘தஸ்மிம் ஆக³ந்த்வா நிஸின்னே தஸ்ஸ பலிபோ³தோ⁴’’தி வுத்தம். கேசி பன வத³ந்தி ‘‘அனாணத்தியா பஞ்ஞத்தேபி த⁴ம்மகதி²கஸ்ஸ அனுட்டா²பனீயத்தா பாசித்தியேன ப⁴விதப்³ப³ம், ஆக³ந்துகஸ்ஸ பன பச்சா² ஆக³தேஹி வுட்³ட⁴தரேஹி உட்டா²பேதப்³ப³த்தா து³க்கடம் வுத்த’’ந்தி.

112. பூ⁴மியம் அத்த²ரிதப்³பா³தி சிமிலிகாய ஸதி தஸ்ஸா உபரி, அஸதி ஸுத்³த⁴பூ⁴மியம் அத்த²ரிதப்³பா³. ஸீஹசம்மாதீ³னம் பரிஹரணேயேவ படிக்கே²போ வேதி³தப்³போ³தி இமினா –

‘‘ந, பி⁴க்க²வே, மஹாசம்மானி தா⁴ரேதப்³பா³னி ஸீஹசம்மம் ப்³யக்³க⁴சம்மம் தீ³பிசம்மம், யோ தா⁴ரேய்ய, ஆபத்தி து³க்கடஸ்ஸா’’தி (மஹாவ. 255) –

ஏவம் வுத்தாய க²ந்த⁴கபாளியா அதி⁴ப்பாயம் விபா⁴வேதி. இத³ம் வுத்தம் ஹோதி – ‘‘அந்தோபி மஞ்சே பஞ்ஞத்தானி ஹோந்தி, ப³ஹிபி மஞ்சே பஞ்ஞத்தானி ஹோந்தீ’’தி இமஸ்மிம் வத்து²ஸ்மிம் ஸிக்கா²பத³ஸ்ஸ பஞ்ஞத்தத்தா மஞ்சபீடே²ஸு அத்த²ரித்வா பரிபோ⁴கோ³யேவ படிக்கி²த்தோ, பூ⁴மத்த²ரணவஸேன பரிபோ⁴கோ³ பன அப்படிக்கி²த்தோதி. யதி³ ஏவம் ‘‘பரிஹரணேயேவ படிக்கே²போ’’தி இத³ம் கஸ்மா வுத்தந்தி? யதா² ‘‘அனுஜானாமி, பி⁴க்க²வே, ஸப்³ப³ம் பாஸாத³பரிபோ⁴க³’’ந்தி (சூளவ. 320) வசனதோ புக்³க³லிகேபி ஸேனாஸனே ஸேனாஸனபரிபோ⁴க³வஸேன நியமிதம் ஸுவண்ணக⁴டாதி³கம் பரிபு⁴ஞ்ஜிதும் வட்டமானம்பி கேவலம் அத்தனோ ஸந்தகம் கத்வா பரிபு⁴ஞ்ஜிதும் ந வட்டதி, ஏவமித³ம் பூ⁴மத்த²ரணவஸேன பரிபு⁴ஞ்ஜியமானம்பி அத்தனோ ஸந்தகம் கத்வா தம் தம் விஹாரம் ஹரித்வா பரிபு⁴ஞ்ஜிதும் ந வட்டதீதி த³ஸ்ஸனத்த²ம் ‘‘பரிஹரணேயேவ படிக்கே²போ வேதி³தப்³போ³’’தி வுத்தம். தா³ருமயபீட²ந்தி ப²லகமயமேவ பீட²ம் வுத்தம். பாத³கத²லிகந்தி அதோ⁴தபாத³ட்ட²பனகம். அஜ்ஜோ²காஸே ரஜனம் பசித்வா…பே… படிஸாமேதப்³ப³ந்தி ஏத்த² தே²வே அஸதி ரஜனகம்மே நிட்டி²தே படிஸாமேதப்³ப³ம்.

113. ‘‘பி⁴க்கு² வா ஸாமணேரோ வா ஆராமிகோ வா லஜ்ஜீ ஹோதீதி வுத்தத்தா அலஜ்ஜிம் ஆபுச்சி²த்வா க³ந்தும் ந வட்டதீ’’தி வத³ந்தி. ஓதாபேந்தோ க³ச்ச²தீதி ஏத்த² ‘‘கிஞ்சாபி ‘ஏத்தகம் தூ³ரம் க³ந்தப்³ப³’ந்தி பரிச்சே²தோ³ நத்தி², ததா²பி லேட்³டு³பாதம் அதிக்கம்ம நாதிதூ³ரம் க³ந்தப்³ப³’’ந்தி வத³ந்தி. ஸேஸமேத்த² உத்தானமேவ. மஞ்சாதீ³னம் ஸங்கி⁴கதா, வுத்தலக்க²ணே தே³ஸே ஸந்த²ரணம் வா ஸந்த²ராபனம் வா, அபலிபு³த்³த⁴தா, ஆபதா³ய அபா⁴வோ, லேட்³டு³பாதாதிக்கமோதி இமானி பனேத்த² பஞ்ச அங்கா³னி.

மாதிகாட்ட²கதா²யம் (கங்கா². அட்ட². பட²மஸேனாஸனஸிக்கா²பத³வண்ணனா) பன அனாபுச்ச²ம் வா க³ச்சே²ய்யாதி ஏத்த² ‘‘யோ பி⁴க்கு² வா ஸாமணேரோ வா ஆராமிகோ வா லஜ்ஜீ ஹோதி, அத்தனோ பலிபோ³த⁴ம் விய மஞ்ஞதி, ததா²ரூபம் அனாபுச்சி²த்வா தம் ஸேனாஸனம் தஸ்ஸ அனிய்யாதேத்வா நிரபேக்கோ² க³ச்ச²தி, தா²மமஜ்ஜி²மஸ்ஸ புரிஸஸ்ஸ லேட்³டு³பாதம் அதிக்கமேய்ய, ஏகேன பாதே³ன லேட்³டு³பாதாதிக்கமே து³க்கடம், து³தியபாதா³திக்கமே பாசித்திய’’ந்தி வத்வா அங்கே³ஸுபி நிரபேக்க²தாய ஸத்³தி⁴ம் ச² அங்கா³னி வுத்தானி. பாளியம் பன அட்ட²கதா²யஞ்ச ‘‘நிரபேக்கோ² க³ச்ச²தீ’’தி அயம் விஸேஸோ ந தி³ஸ்ஸதி. ‘‘ஓதாபேந்தோ க³ச்ச²தீ’’தி ச ஓதாபனவிஸயே ஏவ ஸாபேக்க²க³மனே அனாபத்தி வுத்தா. யதி³ அஞ்ஞத்தா²பி ஸாபேக்க²க³மனே அனாபத்தி ஸியா, ‘‘அனாபத்தி ஸாபேக்கோ² க³ச்ச²தீ’’தி அவிஸேஸேன வத்தப்³ப³ம் ப⁴வேய்ய, தஸ்மா வீமம்ஸித்வா யுத்ததரம் க³ஹேதப்³ப³ந்தி.

பட²மஸேனாஸனஸிக்கா²பத³வண்ணனா நிட்டி²தா.

5. து³தியஸேனாஸனஸிக்கா²பத³வண்ணனா

116. து³தியஸேனாஸனஸிக்கா²பதே³ ஏத்தகமேவ வுத்தந்தி அட்ட²கதா²ஸு வுத்தம். ‘‘இத³ஞ்ச அட்ட²கதா²ஸு ததா²வுத்தபா⁴வத³ஸ்ஸனத்த²ம் வுத்தம், அஞ்ஞம்பி தாதி³ஸம் மஞ்சபீடே²ஸு அத்த²ரிதம் பச்சத்த²ரணமேவா’’தி தீஸுபி க³ண்டி²பதே³ஸு வுத்தம். மாதிகாட்ட²கதா²யம் பன ‘‘பச்சத்த²ரணம் நாம பாவாரோ கோஜவோதி ஏத்தகமேவா’’தி நியமேத்வா வுத்தம், தஸ்மா க³ண்டி²பதே³ஸு வுத்தம் இமினா ந ஸமேதி, வீமம்ஸித்வா க³ஹேதப்³ப³ம். ஸேனாஸனதோதி ஸப்³ப³பச்சி²மஸேனாஸனதோ. யோ கோசீதி தஸ்ஸ ஞாதகோ வா அஞ்ஞாதகோ வா யோ கோசி.

117. பரிவேணந்தி ஏகேகஸ்ஸ விஹாரஸ்ஸ பரிக்கே²பப்³ப⁴ந்தரம். குருந்த³ட்ட²கதா²யம் வுத்தமேவத்த²ம் ஸவிஸேஸம் கத்வா த³ஸ்ஸேதும் ‘‘கிஞ்சாபி வுத்தோ’’திஆதி³ ஆரத்³த⁴ம். ‘‘அபரிச்ச²ன்னே மண்ட³பே’’தி விஸும் யோஜேதப்³ப³ம். தேனேவ மாதிகாட்ட²கதா²யம் (கங்கா². அட்ட². து³தியஸேனாஸனஸிக்கா²பத³வண்ணனா) ‘‘அபரிச்ச²ன்னமண்ட³பே வா பரிச்ச²ன்னே வாபி ப³ஹூனம் ஸன்னிபாதபூ⁴தே’’தி வுத்தம். போ⁴ஜனஸாலாயம்பி அயம் விஸேஸோ லப்³ப⁴தியேவ. வத்தப்³ப³ம் நத்தீ²தி விஸேஸேத்வா கிஞ்சி வத்தப்³ப³ம் நத்தி². பலுஜ்ஜதீதி வினஸ்ஸதி. நஸ்ஸேய்யாதி சோராதீ³ஹி வினஸ்ஸேய்ய.

118. யேன மஞ்சம் வா பீட²ம் வா வினந்தி, தம் மஞ்சபீட²கவானம். ஸிலுச்சயலேணந்தி ஸிலுச்சயே லேணம், பப்³ப³தகு³ஹாதி அத்தோ². ‘‘ஸேனாஸனம் உபசிகாஹி கா²யித’’ந்தி இமஸ்மிம் வத்து²ஸ்மிம் பஞ்ஞத்தத்தா வத்து²அனுரூபவஸேன அட்ட²கதா²யம் உபசிகாஸங்காய அபா⁴வே அனாபத்தி வுத்தா. வத்தக்க²ந்த⁴கே க³மிகவத்தம் பஞ்ஞபேந்தேன ‘‘ஸேனாஸனம் ஆபுச்சி²தப்³ப³’’ந்தி வுத்தத்தா கேவலம் இதிகத்தப்³பா³காரமத்தத³ஸ்ஸனத்த²ம் ‘‘ஆபுச்ச²னம் பன வத்த’’ந்தி வுத்தம், ந பன வத்தபே⁴தே³ன து³க்கடந்தி த³ஸ்ஸனத்த²ம். தேனேவ அந்த⁴கட்ட²கதா²யம் ‘‘ஸேனாஸனம் ஆபுச்சி²தப்³ப³’’ந்தி ஏத்த² ‘‘யம் பாஸாணபிட்டி²யம் வா பாஸாணத்த²ம்பே⁴ஸு வா கதஸேனாஸனம் யத்த² உபசிகா நாரோஹந்தி, தம் அனாபுச்ச²ந்தஸ்ஸபி அனாபத்தீ’’தி வக்க²தி, தஸ்மா யம் வுத்தம் க³ண்டி²பதே³ ‘‘தாதி³ஸே ஸேனாஸனே அனாபுச்சா² க³ச்ச²ந்தஸ்ஸ பாசித்தியம் நத்தி², க³மிகவத்தவஸேன பன அனாபுச்சா² க³ச்ச²தோ வத்தபே⁴தோ³ ஹோதி, தஸ்மா து³க்கடம் ஆபஜ்ஜதீ’’தி, தம் ந க³ஹேதப்³ப³ம்.

பச்சி²மஸ்ஸ ஆபோ⁴கே³ன முத்தி நத்தீ²தி தஸ்ஸ பச்ச²தோ க³ச்ச²ந்தஸ்ஸ அஞ்ஞஸ்ஸ அபா⁴வதோ வுத்தம். ஏகம் வா பேஸேத்வா ஆபுச்சி²தப்³ப³ந்தி ஏத்த² க³மனசித்தஸ்ஸ உப்பன்னட்டா²னதோ அனாபுச்சி²த்வா க³ச்ச²தோ து³தியபாது³த்³தா⁴ரே பாசித்தியம். கிஞ்சாபி மஞ்சம் வா பீட²ம் வா அஜ்ஜோ²காஸே நிக்கி²பித்வா க³ச்ச²ந்தஸ்ஸ இத⁴ விஸும் ஆபத்தி ந வுத்தா, ததா²பி அகாலே அஜ்ஜோ²காஸே மஞ்சபீடா²னி பஞ்ஞபேத்வா க³ச்ச²ந்தஸ்ஸ லேட்³டு³பாதாதிக்கமே புரிமஸிக்கா²பதே³ன பாசித்தியம், பரிக்கே²பாதிக்கமே இமினா து³க்கடந்தி வேதி³தப்³ப³ம். ‘‘மண்ட³பே வா ருக்க²மூலே வா’’தி இமினா அஜ்ஜோ²காஸோபி ஸங்க³ஹிதோயேவாதி தத்தா²பி து³க்கடம் இத⁴ வுத்தமேவாதி த³ட்ட²ப்³ப³ம். ஸேய்யம் பன அஜ்ஜோ²காஸே ஸந்த²ரித்வா க³ச்ச²ந்தஸ்ஸ உப⁴யேனபி து³க்கடமேவ. ‘‘ஸங்கி⁴கே விஹாரே ஸங்கி⁴கம்யேவ ஸேய்யம் ஸந்த²ரித்வா பக்கமந்தஸ்ஸ பாசித்தியம் வுத்தந்தி உபோ⁴ஸு ஏகேகஸ்மிம் ஸங்கி⁴கே து³க்கட’’ந்தி வத³ந்தி. ஸேஸமேத்த² உத்தானமேவ. வுத்தலக்க²ணஸேய்யா, தஸ்ஸா ஸங்கி⁴கதா, வுத்தலக்க²ணே விஹாரே ஸந்த²ரணம் வா ஸந்த²ராபனம் வா, அபலிபு³த்³த⁴தா, ஆபதா³ய அபா⁴வோ, அனபேக்க²ஸ்ஸ தி³ஸாபக்கமனம், உபசாரஸீமாதிக்கமோதி இமானி பனேத்த² ஸத்த அங்கா³னி.

து³தியஸேனாஸனஸிக்கா²பத³வண்ணனா நிட்டி²தா.

6. அனுபக²ஜ்ஜஸிக்கா²பத³வண்ணனா

119-121. ச²ட்டே² அனுபவிஸித்வாதி ஸமீபம் பவிஸித்வா. ப³ஹூபகாரதம் கு³ணவிஸிட்ட²தஞ்ச ஸல்லக்கே²ந்தோதி ப⁴ண்டா³கா³ரிகஸ்ஸ ப³ஹூபகாரதம் த⁴ம்மகதி²காதீ³னம் கு³ணவிஸிட்ட²தஞ்ச ஸல்லக்கே²ந்தோ. ஸமந்தா தி³யட்³டோ⁴ ஹத்தோ²தி மஜ்ஜே² பஞ்ஞத்தமஞ்சபீட²ம் ஸந்தா⁴ய வுத்தம்.

122. உபசாரம் ட²பேத்வாதி வுத்தலக்க²ணம் உபசாரம் ட²பேத்வா. ஏகவிஹாரேதி ஏகஸ்மிம் ஸேனாஸனே. ஏகபரிவேணேதி தஸ்ஸ விஹாரஸ்ஸ பரிக்கே²பப்³ப⁴ந்தரே. ‘‘கி³லானோ பவிஸதீதிஆதீ³ஸு அனாபத்திகாரணஸப்³பா⁴வதோ கி³லானாதி³தாய பவிஸிஸ்ஸாமீதி உபசாரம் பவிஸந்தஸ்ஸ ஸதிபி ஸம்பா³தே⁴துகாமதாய அனாபத்தி வுத்தாயேவா’’தி தீஸுபி க³ண்டி²பதே³ஸு வுத்தம். ஏவஞ்ச ஸதி அகி³லானாதி³பா⁴வோபி விஸும் அங்கே³ஸு வத்தப்³போ³ ஸியா, மாதிகாட்ட²கதா²யம் (கங்கா². அட்ட². அனுபக²ஜ்ஜஸிக்கா²பத³வண்ணனா) பன ‘‘ஸங்கி⁴கவிஹாரதா, அனுட்டா²பனீயபா⁴வஜானனம், ஸம்பா³தே⁴துகாமதா, உபசாரே நிஸீத³னம் வா நிபஜ்ஜனம் வாதி இமானி பனேத்த² சத்தாரி அங்கா³னீ’’தி ஏத்தகமேவ வுத்தம், தஸ்மா வீமம்ஸிதப்³ப³ம்.

அனுபக²ஜ்ஜஸிக்கா²பத³வண்ணனா நிட்டி²தா.

7. நிக்கட்³ட⁴னஸிக்கா²பத³வண்ணனா

126. ஸத்தமே கோட்ட²கானீதி த்³வாரகோட்ட²கானி. ‘‘நிக்க²மாதி வசனம் ஸுத்வாபி அத்தனோ ருசியா நிக்க²மதி, அனாபத்தீ’’தி வத³ந்தி.

128. அலஜ்ஜிம் நிக்கட்³ட⁴தீதிஆதீ³ஸு பட²மம் அலஜ்ஜீஆதி³பா⁴வேன நிக்கட்³டி⁴ஸ்ஸாமீதி சிந்தேத்வா நிக்கட்³ட⁴ந்தஸ்ஸ சித்தஸ்ஸ லஹுபரிவத்திதாய கோபே உப்பன்னேபி அனாபத்தி. ஸேஸமேத்த² உத்தானமேவ. ஸங்கி⁴கவிஹாரோ, உபஸம்பன்னஸ்ஸ ப⁴ண்ட³னகாரகபா⁴வாதி³வினிமுத்ததா, கோபேன நிக்கட்³ட⁴னம் வா நிக்கட்³டா⁴பனம் வாதி இமானி பனேத்த² தீணி அங்கா³னி.

நிக்கட்³ட⁴னஸிக்கா²பத³வண்ணனா நிட்டி²தா.

8. வேஹாஸகுடிஸிக்கா²பத³வண்ணனா

129-131. அட்ட²மே உபரிமதலே பத³ரானம் அஸந்த²ரிதத்தா ‘‘உபரிஅச்ச²ன்னதலாயா’’தி வுத்தம். புப்³பே³ வுத்தனயேனேவாதி அனுபக²ஜ்ஜஸிக்கா²பதே³ வுத்தனயேனேவ. ஸேஸம் ஸுவிஞ்ஞேய்யமேவ. ஸங்கி⁴கோ விஹாரோ, அஸீஸக⁴ட்டா வேஹாஸகுடி, ஹேட்டா² ஸபரிபோ⁴க³தா, அபடாணிதி³ன்னே ஆஹச்சபாத³கே நிஸீத³னம் வா நிபஜ்ஜனம் வாதி இமானி பனேத்த² சத்தாரி அங்கா³னி.

வேஹாஸகுடிஸிக்கா²பத³வண்ணனா நிட்டி²தா.

9. மஹல்லகவிஹாரஸிக்கா²பத³வண்ணனா

135. நவமே ‘‘மஹல்லகோ நாம விஹாரோ ஸஸாமிகோ’’தி வுத்தத்தா ஸஞ்ஞாசிகாய குடியா அனாபத்தி. ‘‘அட்³ட⁴தேய்யஹத்த²ம்பீ’’தி உக்கட்ட²பரிச்சே²தே³ன வுத்தவசனம் பாளியா ஸமேதீதி ஆஹ ‘‘தம் ஸுவுத்த’’ந்தி. ‘‘பாளியம் அட்ட²கதா²யஞ்ச உக்கட்ட²பரிச்சே²தே³ன அட்³ட⁴தேய்யஹத்த²ப்பமாணஸ்ஸ ஓகாஸஸ்ஸ த³ஸ்ஸிதத்தா கவாடம் அட்³ட⁴தேய்யஹத்த²வித்தா²ரதோ ஊனகம் வா ஹோது அதி⁴கம் வா, அட்³ட⁴தேய்யஹத்த²ப்பமாணம்யேவ ஓகாஸோ’’தி வத³ந்தி.

யஸ்ஸ வேமஜ்ஜே²தி யஸ்ஸ விஹாரஸ்ஸ வேமஜ்ஜே². ஸா அபரிபூரஉபசாராபி ஹோதீதி விவரியமானம் கவாடம் யம் பி⁴த்திம் ஆஹனதி, ஸா ஸமந்தா கவாடவித்தா²ரப்பமாணஉபசாரரஹிதாபி ஹோதீதி அத்தோ². ஆலோகம் ஸந்தே⁴தி பிதே⁴தீதி ஆலோகஸந்தி⁴. ‘‘புனப்புனம் சா²தா³பேஸி, புனப்புனம் லிம்பாபேஸீதி இமஸ்மிம் வத்து²ஸ்மிம் உப்பன்னதோ³ஸேன ஸிக்கா²பத³ஸ்ஸ பஞ்ஞத்தத்தா லேபம் அனுஜானந்தேன ச த்³வாரப³ந்த⁴ஸ்ஸ ஸமந்தா அட்³ட⁴தேய்யஹத்த²ப்பமாணேயேவ பதே³ஸே புனப்புனம் லேபஸ்ஸ அனுஞ்ஞாதத்தா ததோ அஞ்ஞத்த² புனப்புனம் லிம்பேந்தஸ்ஸ வா லிம்பாபேந்தஸ்ஸ வா பி⁴த்தியம் மத்திகாய கத்தப்³ப³கிச்சம் நிட்டா²பேத்வா புன சதுத்த²லேபே தி³ன்னே பாசித்தியேன ப⁴விதப்³ப³’’ந்தி வத³ந்தி. க³ண்டி²பதே³ஸு பன தீஸுபி ‘‘புனப்புனம் லேபதா³னஸ்ஸ வுத்தப்பமாணதோ அஞ்ஞத்த² படிக்கி²த்தமத்தம் ட²பேத்வா பாசித்தியஸ்ஸ அவுத்தத்தா து³க்கடம் அனுரூப’’ந்தி வுத்தம்.

அதி⁴ட்டா²தப்³ப³ந்தி ஸம்விதா⁴தப்³ப³ம். அப்பஹரிதேதி ஏத்த² அப்ப-ஸத்³தோ³ ‘‘அப்பிச்சோ²’’திஆதீ³ஸு விய அபா⁴வத்தோ²தி ஆஹ ‘‘அஹரிதே’’தி. பதனோகாஸோதி பதனோகாஸத்தா தத்ர டி²தஸ்ஸ பி⁴க்கு²னோ உபரி பதேய்யாதி அதி⁴ப்பாயோ. ஸசே ஹரிதே டி²தோ அதி⁴ட்டே²தி, ஆபத்தி து³க்கடஸ்ஸாதி வசனேன இமமத்த²ம் தீ³பேதி – ஸசே விஹாரஸ்ஸ ஸமந்தா வுத்தப்பமாணே பரிச்சே²தே³ புப்³ப³ண்ணாதீ³னி ந ஸந்தி, தத்த² விஹாரோ காரேதப்³போ³. யத்த² பன ஸந்தி, தத்த² காராபேந்தஸ்ஸ து³க்கடந்தி.

136. ஏகேகம் மக்³க³ம் உஜுகமேவ உட்ட²பேத்வா சா²த³னம் மக்³கே³ன சா²த³னம் நாம ஹோதீதி த³ஸ்ஸேதும் ‘‘மக்³கே³ன சா²தே³ந்தஸ்ஸா’’தி வுத்தம். இமினா பன நயேன ஸப்³ப³ஸ்மிம் விஹாரே ஏகவாரம் சா²தி³தே தம் ச²த³னம் ஏகமக்³க³ந்தி க³ஹேத்வா ‘‘த்³வே மக்³கே³’’திஆதி³ வுத்தம். ‘‘பரியாயேன சா²த³னேபி இமினாவ நயேன யோஜேதப்³ப³’’ந்தி தீஸுபி க³ண்டி²பதே³ஸு வுத்தம், தம் ‘‘புனப்புனம் சா²தா³பேஸீ’’தி இமாய பாளியா ‘‘ஸப்³ப³ம்பி சேதம் ச²த³னம் ச²த³னூபரி வேதி³தப்³ப³’’ந்தி இமினா அட்ட²கதா²வசனேன ச ஸமேதி, தஸ்மா த்³வே மக்³கே³ அதி⁴ட்ட²ஹித்வா ததியாய மக்³க³ம் ஆணாபேத்வா பக்கமிதப்³ப³ந்தி ஏத்த² த்³வே ச²த³னானி அதி⁴ட்ட²ஹித்வா ததியம் ச²த³னம் ‘‘ஏவம் சா²தே³ஹீ’’தி ஆணாபேத்வா பக்கமிதப்³ப³ந்தி ஏவமத்தோ² க³ஹேதப்³போ³.

கேசி பன ‘‘பட²மம் தாவ ஏகவாரம் அபரிஸேஸம் சா²தே³த்வா புன ச²த³னத³ண்ட³கே ப³ந்தி⁴த்வா து³தியவாரம் ததே²வ சா²தே³தப்³ப³ம், ததியவாரசதுத்த²வாரே ஸம்பத்தே த்³வே மக்³கே³ அதி⁴ட்ட²ஹித்வா ஆணாபேத்வா பக்கமிதப்³ப³’’ந்தி வத³ந்தி. அபரே பன ‘‘பட²மவாரேயேவ தயோபி மக்³கே³ அதி⁴ட்டா²தும் வட்டதி, சதுத்த²தோ பட்டா²ய ஆபத்தி பாசித்திய’’ந்தி வத³ந்தி. தது³ப⁴யம்பி பாளியா அட்ட²கதா²ய ச ந ஸமேதி. ததியாய மக்³க³ந்தி ஏத்த² ததியாயாதி உபயோக³த்தே² ஸம்பதா³னவசனம், ததியம் மக்³க³ந்தி அத்தோ². திண்ணம் மக்³கா³னந்தி மக்³க³வஸேன சா²தி³தானம் திண்ணம் ச²த³னானம். திண்ணம் பரியாயானந்தி ஏத்தா²பி ஏஸேவ நயோ. சதுத்தே² மக்³கே³ வா பரியாயே வாதி ச ததா² சா²தே³ந்தானம் சதுத்த²ம் சா²த³னமேவ வுத்தம். ஸேஸம் உத்தானமேவ. மஹல்லகவிஹாரதா, அத்தனோ வாஸாகா³ரதா, உத்தரி அதி⁴ட்டா²னந்தி இமானி பனேத்த² தீணி அங்கா³னி.

மஹல்லகவிஹாரஸிக்கா²பத³வண்ணனா நிட்டி²தா.

10. ஸப்பாணகஸிக்கா²பத³வண்ணனா

140. த³ஸமே இமஸ்ஸ ஸிக்கா²பத³ஸ்ஸ ‘‘ஸிஞ்சேய்ய வா ஸிஞ்சாபேய்ய வா’’தி பா³ஹிரபரிபோ⁴க³வஸேன பட²மம் பஞ்ஞத்தத்தா ‘‘ஸப்பாணகம் உத³கம் பரிபு⁴ஞ்ஜேய்யா’’தி ஸிக்கா²பத³ம் அத்தனோ நஹானபானாதி³பரிபோ⁴க³வஸேன பஞ்ஞத்தந்தி வேதி³தப்³ப³ம். தஸ்மிம் வா பட²மம் பஞ்ஞத்தேபி அத்தனோ பரிபோ⁴க³வஸேனேவ பஞ்ஞத்தத்தா புன இமம் ஸிக்கா²பத³ம் பா³ஹிரபரிபோ⁴க³வஸேனேவ பஞ்ஞத்தந்தி க³ஹேதப்³ப³ம்.

ஸப்பாணகஸஞ்ஞிஸ்ஸ ‘‘பரிபோ⁴கே³ன பாணகா மரிஸ்ஸந்தீ’’தி புப்³ப³பா⁴கே³ ஜானந்தஸ்ஸபி ஸிஞ்சனஸிஞ்சாபனம் ‘‘பதீ³பே நிபதித்வா படங்கா³தி³பாணகா மரிஸ்ஸந்தீ’’தி ஜானந்தஸ்ஸ பதீ³புஜ்ஜலனம் விய வினாபி வத⁴கசேதனாய ஹோதீதி ஆஹ ‘‘பண்ணத்திவஜ்ஜ’’ந்தி. ஸேஸம் உத்தானத்த²மேவ. உத³கஸ்ஸ ஸப்பாணகதா, ‘‘ஸிஞ்சனேன பாணகா மரிஸ்ஸந்தீ’’தி ஜானனம், தாதி³ஸமேவ ச உத³கம், வினா வத⁴கசேதனாய கேனசிதே³வ கரணீயேன திணாதீ³னம் ஸிஞ்சனந்தி இமானி பனேத்த² சத்தாரி அங்கா³னி.

ஸப்பாணகஸிக்கா²பத³வண்ணனா நிட்டி²தா.

நிட்டி²தோ ஸேனாஸனவக்³கோ³ து³தியோ.

பூ⁴தகா³மவக்³கோ³திபி இமஸ்ஸேவ நாமம்.