6. து³தியஸஹஸேய்யஸிக்கா²பத³வண்ணனா

55. ச²ட்டே² ‘‘பட²மஸிக்கா²பதே³ ‘பி⁴க்கு²ம் ட²பேத்வா அவஸேஸோ அனுபஸம்பன்னோ நாமா’தி வுத்தத்தா ‘மாதுகா³மோபி அனுபஸம்பன்னக்³க³ஹணேன க³ஹிதோயேவா’தி சதுத்த²தி³வஸே மாதுகா³மேன ஸத்³தி⁴ம் ஸயந்தஸ்ஸ த்³வீஹி ஸிக்கா²பதே³ஹி த்³வே பாசித்தியானி ஹோந்தீ’’தி வத³ந்தி. க³ண்டி²பதே³ஸு பன தீஸுபி ‘‘இமஸ்மிம் ஸிக்கா²பதே³ மாதுகா³மஸ்ஸ விஸும் வுச்சமானத்தா பட²மஸிக்கா²பதே³ ‘பி⁴க்கு²ம் ட²பேத்வா அவஸேஸோ அனுபஸம்பன்னோ நாமா’தி புரிஸஸ்ஸேவ க³ஹணம் அனுச்ச²விக’’ந்தி வுத்தம், ததே³வ ச யுத்ததரம்.

யஞ்ச இத⁴ ‘‘பட²மதி³வஸேபீதி பி-ஸத்³தே³ன சதுத்த²தி³வஸேபீதி வுத்தம் ஹோதீ’’தி காரணம் வத³ந்தி, தம்பி அகாரணம் பி-ஸத்³தோ³ ஸம்பிண்ட³னத்தோ²யேவாதி நியமாபா⁴வதோ அவதா⁴ரணத்த²ஸ்ஸ ச ஸம்ப⁴வதோ. ஸம்பா⁴வனே வா பி-ஸத்³தோ³ த³ட்ட²ப்³போ³. தேன இத⁴ பட²மதி³வஸேபி தாவ ஆபத்தி, து³தியாதி³தி³வஸே கிமேவ வத்தப்³ப³ந்தி இமமத்த²ம் தீ³பேதி. ஸம்பிண்ட³னத்தே²பி பி-ஸத்³தே³ க³ய்ஹமானே இமினாவ ஸிக்கா²பதே³ன ஆபஜ்ஜிதப்³பா³பத்தியா அஞ்ஞஸ்மிம்பி தி³வஸே ஆபஜ்ஜனம் தீ³பேதி, ந பட²மஸிக்கா²பதே³ன ஆபஜ்ஜிதப்³பா³பத்தியாதி அகாரணமேவ தந்தி த³ட்ட²ப்³ப³ம். ‘‘மதித்தீ² பாராஜிகவத்து²பூ⁴தாபி அனுபாதி³ன்னபக்கே² டி²தத்தா ஸஹஸேய்யாபத்திம் ந ஜனேதீ’’தி வத³ந்தி. ‘‘அத்த²ங்க³தே ஸூரியே மாதுகா³மே நிபன்னே பி⁴க்கு² நிபஜ்ஜதீ’’தி வசனதோ தி³வா ஸயந்தஸ்ஸ ஸஹஸேய்யாபத்தி ந ஹோதியேவாதி த³ட்ட²ப்³ப³ம். பாசித்தியவத்து²கஸேனாஸனம், தத்த² மாதுகா³மேன ஸஹ நிபஜ்ஜனம், ஸூரியத்த²ங்க³மனந்தி இமானேத்த² தீணி அங்கா³னி.

து³தியஸஹஸேய்யஸிக்கா²பத³வண்ணனா நிட்டி²தா.