ஸமுட்டா²னஸீஸகதா²வண்ணனா

325-6. மஹேஸினா த்³வீஸு விப⁴ங்கே³ஸு பஞ்ஞத்தானி யானி பாராஜிகாதீ³னி ஸிக்கா²பதா³னி உபோஸதே² உத்³தி³ஸந்தி, தேஸம் ஸிக்கா²பதா³னம் ஸமுட்டா²னம் பி⁴க்கூ²னம் பாடவத்தா²ய இதோ பரம் பவக்கா²மி, தம் ஸமாஹிதா ஸுணாதா²தி யோஜனா.

327. காயோ ச வாசா ச காயவாசா சாதி அசித்தகானி யானி தீணி ஸமுட்டா²னானி, தானேவ சித்தேன பச்சேகம் யோஜிதானி ஸசித்தகானி தீணி ஸமுட்டா²னானி ஹோந்தீதி ஏவமேவ ஸமுட்டா²னம் புரிமானம் த்³வின்னம் வஸேன ஏகங்கி³கம், ததியசதுத்த²பஞ்சமானம் வஸேன த்³வங்கி³கம், ச²ட்ட²ஸ்ஸ வஸேன திவங்கி³கஞ்சாதி ஏவம் ச²தா⁴ ஸமுட்டா²னவிதி⁴ம் வத³ந்தீதி யோஜனா. காயோ, வாசாதி ஏகங்கி³கம் த்³வயம், காயவாசா, காயசித்தம், வாசாசித்தந்தி து³வங்கி³கத்தயம், காயவாசாசித்தந்தி அங்க³பே⁴தே³ன திவித⁴ம்பி அவயவபே⁴தே³ன ஸமுட்டா²னபே⁴த³விதி⁴ம் ச²ப்பகாரம் வத³ந்தீதி அதி⁴ப்பாயோ.

328. தேஸு ச²ஸு ஸமுட்டா²னேஸு ஏகேன வா ஸமுட்டா²னேன த்³வீஹி வா தீஹி வா சதூஹி வா ச²ஹி வா ஸமுட்டா²னேஹி நானா ஆபத்தியோ ஜாயரேதி ஸம்ப³ந்தோ⁴.

329. தத்த² தாஸு நானாபத்தீஸு. பஞ்ச ஸமுட்டா²னானி ஏதிஸ்ஸாதி பஞ்சஸமுட்டா²னா, ஏவரூபா காசி ஆபத்தி ந விஜ்ஜதி. ஏகமேகம் ஸமுட்டா²னம் யாஸந்தி விக்³க³ஹோ. பச்சி²மேஹேவ தீஹிபீதி ஸசித்தகேஹேவ தீஹி ஸமுட்டா²னேஹி, யா ஆபத்தி ஏகஸமுட்டா²னா ஹோதி, ஸா ஸசித்தகானம் திண்ணமஞ்ஞதரேன ஹோதீதி அதி⁴ப்பாயோ.

330-1. ததியச்ச²ட்ட²தோபி சாதி காயவாசதோ, காயவாசாசித்ததோ ச. சதுத்த²ச்ச²ட்ட²தோ சேவாதி காயசித்ததோ காயவாசாசித்ததோ ச. பஞ்சமச்ச²ட்ட²தோபி சாதி வாசாசித்ததோ காயவாசாசித்ததோ ச. ‘‘காயதோ காயசித்ததோ’’தி பட²மம் த்³விஸமுட்டா²னம், ‘‘வாசதோ வாசாசித்ததோ’’தி து³தியம், ‘‘காயவாசதோ காயவாசாசித்ததோ’’தி ததியம், ‘‘காயசித்ததோ காயவாசாசித்ததோ’’தி சதுத்த²ம், ‘‘வாசாசித்ததோ காயவாசாசித்ததோ’’தி பஞ்சமம் த்³விஸமுட்டா²னந்தி ஏவம் பஞ்சதா⁴ ஏவ டி²தேஹி த்³வீஹி ஸமுட்டா²னேஹி ஏஸா த்³விஸமுட்டா²னாபத்தி ஜாயதே ஸமுட்டா²தி. ந அஞ்ஞதோதி காயதோ வாசதோதி ஏகம், வாசதோ காயவாசதோதி ஏகந்தி ஏவம் யதா²வுத்தக்கமவிபரியாயேன யோஜிதேஹி அஞ்ஞேஹி ஸமுட்டா²னேஹி ந ஸமுட்டா²தி.

332. பட²மேஹி ச தீஹீதி ‘‘காயதோ, வாசதோ, காயவாசதோ’’தி பட²மம் நித்³தி³ட்டே²ஹி தீஹி அசித்தகஸமுட்டா²னேஹி. பச்சி²மேஹி சாதி ‘‘காயசித்ததோ, வாசாசித்ததோ, காயவாசாசித்ததோ’’தி ஏவம் பச்சா² வுத்தேஹி ஸசித்தகேஹி தீஹி ஸமுட்டா²னேஹி. ந அஞ்ஞதோதி ‘‘காயதோ, வாசதோ, காயசித்ததோ, வாசதோ, காயவாசதோ, காயசித்ததோ’’தி ஏவம் வுத்தவிபல்லாஸதோ அஞ்ஞேஹி தீஹி ஸமுட்டா²னேஹி ந ஸமுட்டா²தி.

333-4. பட²மா ததியா சேவ, சதுத்த²ச்ச²ட்ட²தோபி சாதி காயதோ, காயவாசதோ, காயசித்ததோ, காயவாசாசித்ததோதி ஏதேஹி சதூஹி ஸமுட்டா²னேஹி சேவ. து³தியா…பே… ச்ச²ட்ட²தோபி சாதி வாசதோ, காயவாசதோ, வாசாசித்ததோ, காயவாசாசித்ததோதி இமேஹி சதூஹி சாதி சதுஸமுட்டா²னேனாபத்தி.

ஸா ஏவம் த்³விதா⁴ டி²தேஹி சதூஹி ஸமுட்டா²னேஹி ஜாயதே. ந பனஞ்ஞதோதி ‘‘காயதோ, வாசதோ, காயவாசதோ, காயசித்ததோ’’தி ஏவமாதி³னா விபல்லாஸனயேன யோஜிதேஹி சதூஹி ஸமுட்டா²னேஹி ந ஸமுட்டா²தி. ச² ஸமுட்டா²னானி யஸ்ஸா ஸா ச²ஸமுட்டா²னா. ஸசித்தகேஹி தீஹி, அசித்தகேஹி தீஹீதி ச²ஹி ஏவ ஸமுட்டா²னேஹி ஸமுட்டா²தீதி. பகாரந்தராபா⁴வா இத⁴ ‘‘ந அஞ்ஞதோ’’தி ந வுத்தம்.

ஆஹ ச அட்ட²கதா²சரியோ மாதிகட்ட²கதா²யம்.

335. ஸமுட்டா²தி ஏதஸ்மாதி ஸமுட்டா²னம், காயாதி³ ச²ப்³பி³த⁴ம், ஏகம் ஸமுட்டா²னம் காரணம் யஸ்ஸா ஸா ஏகஸமுட்டா²னா. பகாரந்தராபா⁴வா திதா⁴. கத²ம்? ஸசித்தகானம் திண்ணம் ஸமுட்டா²னானம் வஸேன திவிதா⁴. த்³வீஹி ஸமுட்டா²னேஹி ஸமுட்டி²தா த்³விஸமுட்டி²தா, த்³விஸமுட்டா²னாபத்தீதி அத்தோ². பஞ்சதா⁴தி வுத்தனயேன பஞ்சப்பகாரா. தீணி ஸமுட்டா²னானி யஸ்ஸா ஸா திஸமுட்டா²னா, சத்தாரி ஸமுட்டா²னானி யஸ்ஸா ஸா சதுருட்டா²னா, திஸமுட்டா²னா ச சதுருட்டா²னா ச திசதுருட்டா²னாதி ஏகதே³ஸஸரூபேகஸேஸோ, திஸமுட்டா²னா த்³விதா⁴ விப⁴த்தா, சதுஸமுட்டா²னா ச த்³விதா⁴ ஏவ விப⁴த்தாதி அத்தோ². ச²ஹி ஸமுட்டா²னேஹி ஸமுட்டி²தா ச²ஸமுட்டி²தா, ச²ஸமுட்டா²னாதி அத்தோ². ஏகதா⁴தி பகாரந்தராபா⁴வா ஏகதா⁴வ டி²தாதி அதி⁴ப்பாயோ.

336. ஸப்³பா³ ஆபத்தியோ ஸமுட்டா²னவிஸேஸதோ ஏவம் தேரஸதா⁴ டி²தானம் ஸமுட்டா²னபே⁴தா³னம் நானத்ததோ தேஹி ஸமுட்டி²தானம் பட²மம் பஞ்ஞத்தத்தா ஸீஸபூ⁴தானம் ஸிக்கா²பதா³னம் வஸேன தேரஸேவ நாமானி லப⁴ந்தி, தானி இதோ பரம் வக்கா²மீதி யோஜனா.

337. பட²மந்திமவத்து²ஞ்சாதி பட²மபாராஜிகஸமுட்டா²னம். து³தியந்தி அதி³ன்னாதா³னஸமுட்டா²னம். ஸஞ்சரித்தகந்தி ஸஞ்சரித்தஸமுட்டா²னம். ஸமனுபா⁴ஸனந்தி ஸமனுபா⁴ஸனஸமுட்டா²னம். ‘‘கதி²னம் ஏளகலோமக’’ந்தி பத³ச்சே²தோ³, கதி²னஸமுட்டா²னம் ஏளகலோமஸமுட்டா²னஞ்ச.

338. பத³ஸோத⁴ம்மந்தி பத³ஸோத⁴ம்மஸமுட்டா²னம். அத்³தா⁴னம் தே²ய்யஸத்த²ந்தி அத்³தா⁴னஸமுட்டா²னம் தே²ய்யஸத்த²ஸமுட்டா²னம். தே³ஸனாதி த⁴ம்மதே³ஸனாஸமுட்டா²னம். பூ⁴தாரோசனகந்தி பூ⁴தாரோசனஸமுட்டா²னம். சோரிவுட்டா²பனந்தி சோரிவுட்டா²பனஸமுட்டா²னம்.

339. அனனுஞ்ஞாதகஞ்சாதி அனனுஞ்ஞாதகஸமுட்டா²னஞ்சாதி ஏதானி தேரஸ தேஹி ஸமுட்டா²னேஹி ஸமுட்டி²தானம் தேஸம் ஸிக்கா²பதா³னம் பட²மம் பட²மம் நித்³தி³ட்டா²னம் பட²மபாராஜிகாதி³ஸிக்கா²பத³ஸமுட்டா²னானம் இதரேஸம் புப்³ப³ங்க³மபா⁴வதோ ‘‘ஸீஸானீ’’தி வுத்தானி. யதா²ஹ பரிவாரட்ட²கதா²யம் ‘‘பட²மபாராஜிகம் நாம ஏகம் ஸமுட்டா²னஸீஸம், ஸேஸானி தேன ஸதி³ஸானீ’’திஆதி³ (பரி. அட்ட². 258). தேரஸேதே ஸமுட்டா²னனயாதி ஏதே ஸீஸவஸேன த³ஸ்ஸிதா தேரஸ ஸமுட்டா²னனயா. விஞ்ஞூஹி உபாலித்தே²ராதீ³ஹி.

340. தத்த² தேரஸஸு ஸமுட்டா²னஸீஸேஸு. யாதி யா பன ஆபத்தி. ஆதி³பாராஜிகுட்டா²னாதி பட²மபாராஜிகஸமுட்டா²னா.

341. அதி³ன்னாதா³ன-ஸத்³தோ³ புப்³ப³கோ பட²மோ ஏதிஸ்ஸா தம்ஸமுட்டா²னாபத்தியாதி அதி³ன்னாதா³னபுப்³ப³கா, அதி³ன்னாதா³னஸமுட்டா²னாதி உத்³தி³ட்டா²தி யோஜனா.

342. ஜாதூதி ஏகம்ஸேன.

343. அயம் ஸமுட்டா²னவஸேன ‘‘ஸமனுபா⁴ஸனாஸமுட்டா²னா’’தி வுத்தாதி யோஜனா.

344. கதி²ன-ஸத்³தோ³ உபபதோ³ யஸ்ஸா தம்ஸமுட்டா²னாய ஆபத்தியா ஸா கதி²னுபபதா³, கதி²னஸமுட்டா²னாதி மதா ஞாதா, அயம் ஸமுட்டா²னவஸேன ‘‘கதி²னஸமுட்டா²னா’’தி ஞாதாதி அத்தோ².

345. ஏளகலோம-ஸத்³தோ³ ஆதி³ யஸ்ஸா தம்ஸமுட்டா²னாபத்தியா ஸா ஏளகலோமாதி³ஸமுட்டா²னாதி அத்தோ².

349. ஏத்த² ஸமுட்டா²னேஸு.

350. பூ⁴தாரோசன-ஸத்³தோ³ புப்³ப³பா⁴கோ³ ஏதிஸ்ஸா தம்ஸமுட்டா²னாய ஆபத்தியாதி பூ⁴தாரோசனபுப்³ப³கா, பூ⁴தாரோசனஸமுட்டா²னாதி அத்தோ².

351. ஸமுட்டா²னம் ஸமுட்டி²தம், சோரிவுட்டா²பனம் ஸமுட்டி²தம் யஸ்ஸா ஸா சோரிவுட்டா²பனஸமுட்டி²தா, சோரிவுட்டா²பனஸமுட்டா²னாதி அத்தோ².

353. தத்தா²தி தேரஸஸமுட்டா²னஸீஸேஸு, ‘‘ஸமுட்டா²னம் ஸசித்தக’’ந்தி இத³ம் ‘‘பட²ம’’ந்திஆதீ³ஹி பச்சேகம் யோஜேதப்³ப³ம். பட²மம் ஸமுட்டா²னந்தி பட²மபாராஜிகஸமுட்டா²னம். து³தியம் ஸமுட்டா²னந்தி அதி³ன்னாதா³னஸமுட்டா²னம். சதுத்த²ம் ஸமுட்டா²னந்தி ஸமனுபா⁴ஸனஸமுட்டா²னம். நவமம் ஸமுட்டா²னந்தி தே²ய்யஸத்த²ஸமுட்டா²னம். த³ஸமம் ஸமுட்டா²னந்தி த⁴ம்மதே³ஸனாஸமுட்டா²னம். த்³வாத³ஸமம் ஸமுட்டா²னந்தி சோரிவுட்டா²பனஸமுட்டா²னம்.

354. ஸமுட்டா²னேதி ஸமுட்டா²னஸீஸே. ஸதி³ஸாதி தேன தேன ஸமுட்டா²னஸீஸேன ஸமுட்டா²னா ஆபத்தியோ. இதா⁴தி இமஸ்மிம் ஸமுட்டா²னவினிச்ச²யே. தி³ஸ்ஸரேதி தி³ஸ்ஸந்தே, தி³ஸ்ஸந்தீதி அத்தோ². அத² வா இத⁴ தி³ஸ்ஸரேதி இத⁴ உப⁴தோவிப⁴ங்கே³ ஏதேஸு தேரஸஸமுட்டா²னேஸு ஏகேகஸ்மிம் அஞ்ஞானிபி ஸதி³ஸானி ஸமுட்டா²னானி தி³ஸ்ஸந்தீதி அத்தோ². இதா³னி தானி ஸரூபதோ நித³ஸ்ஸேதுமாஹ ‘‘ஸுக்கஞ்சா’’திஆதி³. தத்த² ஸுக்கந்தி ஸுக்கவிஸ்ஸட்டி²ஸிக்கா²பத³ம். ஏஸ நயோ ‘‘காயஸம்ஸக்³கோ³’’திஆதீ³ஸுபி. யதே³த்த² து³விஞ்ஞேய்யம், தம் வக்கா²ம.

355. புப்³பு³பபரிபாகோ சாதி ‘‘ஜானம் புப்³பு³பக³தம் பி⁴க்கு²’’ந்தி (பாசி. 120) ஸிக்கா²பத³ஞ்ச ‘‘பி⁴க்கு²னிபரிபாசித’’ந்தி (பாசி. 192, 194) பிண்ட³பாதஸிக்கா²பத³ஞ்ச. ரஹோ பி⁴க்கு²னியாஸஹாதி பி⁴க்கு²னியா ஸத்³தி⁴ம் ரஹோ நிஸஜ்ஜஸிக்கா²பத³ஞ்ச. ஸபோ⁴ஜனே, ரஹோ த்³வே சாதி ஸபோ⁴ஜனே குலே அனுபக²ஜ்ஜஸிக்கா²பத³ஞ்ச த்³வே ரஹோனிஸஜ்ஜஸிக்கா²பதா³னி ச. அங்கு³லீ உத³கே ஹஸந்தி அங்கு³லிபதோத³ஞ்ச உத³கஹஸத⁴ம்மஸிக்கா²பத³ஞ்ச.

356. பஹாரே உக்³கி³ரே சேவாதி பஹாரதா³னஸிக்கா²பத³ஞ்ச தலஸத்திஉக்³கி³ரணஸிக்கா²பத³ஞ்ச. தேபஞ்ஞாஸா ச ஸேகி²யாதி பஞ்சஸத்ததிஸேகி²யாஸு வக்க²மானானி உஜ்ஜக்³கி⁴காதீ³னி ஸமனுபா⁴ஸனஸமுட்டா²னானி த³ஸ, ச²த்தபாணிஆதீ³னி த⁴ம்மதே³ஸனாஸமுட்டா²னானி ஏகாத³ஸ, தே²ய்யஸத்த²ஸமுட்டா²னம், ஸூபோத³னவிஞ்ஞத்திஸிக்கா²பத³ஞ்சாதி பா³வீஸதி ஸிக்கா²பதா³னி ட²பேத்வா பரிமண்ட³லனிவாஸனாதீ³னி இதரானி தேபஞ்ஞாஸ ஸேகி²யஸிக்கா²பதா³னி ச. அத⁴க்க²குப்³ப⁴ஜாணுஞ்சாதி பி⁴க்கு²னீனம் அத⁴க்க²கஉப்³ப⁴ஜாணுஸிக்கா²பத³ஞ்ச. கா³மந்தரமவஸ்ஸுதாதி கா³மந்தரக³மனம், அவஸ்ஸுதஸ்ஸ ஹத்த²தோ கா²த³னீயக்³க³ஹணஸிக்கா²பத³ஞ்ச.

357-8. தலமட்டு²த³ஸுத்³தி⁴ சாதி தலகா⁴தம், ஜதுமட்ட²ம், உத³கஸுத்³தி⁴காதி³யனஞ்ச. வஸ்ஸம்வுத்தா²தி ‘‘வஸ்ஸம்வுத்தா²…பே… ச²ப்பஞ்சயோஜனானீ’’தி (பாசி. 974) ஸிக்கா²பத³ஞ்ச. ஓவாதா³ய ந க³ச்ச²ந்தீதி ஓவாதா³ய அக³மனஸிக்கா²பத³ஞ்ச. நானுப³ந்தே⁴ பவத்தினிந்தி ‘‘வுட்டா²பிதம் பவத்தினிம் த்³வே வஸ்ஸானி நானுப³ந்தே⁴ய்யா’’தி (பாசி. 1112) ஸிக்கா²பத³ஞ்சாதி உப⁴தோவிப⁴ங்கே³ நித்³தி³ட்டா² இமே பஞ்சஸத்ததி த⁴ம்மா காயசித்தஸமுட்டி²தா மேது²னேன ஸமா ஏகஸமுட்டா²னா மதாதி யோஜனா.

ஏத்த² ச பாளியம் ‘‘ச²ஸத்ததீ’’தி க³ணனபரிச்சே²தோ³ ஸமுட்டா²னஸிக்கா²பதே³ன ஸஹ த³ஸ்ஸிதோ. இத⁴ பன தம் வினா தம்ஸதி³ஸானமேவ க³ணனா த³ஸ்ஸிதா. தேனேவ பட²மம் ஸமுட்டா²னஸீஸம் பாளியம் க³ணனாயபி த³ஸ்ஸிதம், இதே⁴வ ந த³ஸ்ஸிதம். உபரி கத்த²சி ஸமுட்டா²னஸீஸஸ்ஸ த³ஸ்ஸனம் பனேத்த² வக்க²மானானம் தம்ஸதி³ஸபா⁴வத³ஸ்ஸனத்த²ம், க³ணனாய வக்க²மானாய அந்தோக³த⁴பா⁴வத³ஸ்ஸனத்த²ம். தேனேவ தத்த²பி தம் வினா க³ணனம் வக்க²தி.

பட²மபாராஜிகஸமுட்டா²னவண்ணனா.

359. விக்³க³ஹந்தி மனுஸ்ஸவிக்³க³ஹஸிக்கா²பத³ம். உத்தரி சேவாதி உத்தரிமனுஸ்ஸத⁴ம்மஸிக்கா²பத³ஞ்ச. து³ட்டு²ல்லந்தி து³ட்டு²ல்லவாசாஸிக்கா²பத³ம். அத்தகாமதாதி அத்தகாமபாரிசரியஸிக்கா²பத³ஞ்ச. து³ட்ட²தோ³ஸா து³வே சேவாதி த்³வே து³ட்ட²தோ³ஸஸிக்கா²பதா³னி ச. து³தியானியதோபி சாதி து³தியஅனியதஸிக்கா²பத³ஞ்ச.

360. அச்சி²ந்த³னஞ்சாதி ஸாமம் சீவரம் த³த்வா அச்சி²ந்த³னஞ்ச. பரிணாமோதி ஸங்கி⁴கலாப⁴ஸ்ஸ அத்தனோ பரிணாமனஞ்ச. முஸாஓமஸபேஸுணாதி முஸாவாதோ³ ச ஓமஸவாதோ³ ச பி⁴க்கு²பேஸுஞ்ஞஞ்ச. து³ட்டு²ல்லாரோசனஞ்சேவாதி து³ட்டு²ல்லாபத்திஆரோசனஸிக்கா²பத³ஞ்ச. பத²வீக²ணனம்பி சாதி பத²வீக²ணனஸிக்கா²பத³ஞ்ச.

361. பூ⁴தகா³மஞ்ச வாதோ³ சாதி பூ⁴தகா³மஸிக்கா²பத³ம், அஞ்ஞவாத³கஸிக்கா²பத³ஞ்ச. உஜ்ஜா²பனகமேவ சாதி உஜ்ஜா²பனகஸிக்கா²பத³ஞ்ச. நிக்கட்³டோ⁴ ஸிஞ்சனஞ்சேவாதி விஹாரதோ நிக்கட்³ட⁴னஞ்ச உத³கே திணாதி³ஸிஞ்சனஞ்ச. ஆமிஸஹேது சாதி ஆமிஸஹேது பி⁴க்கு²னியோ ஓவாத³ஸிக்கா²பத³ஞ்ச.

362. பு⁴த்தாவிந்தி பு⁴த்தாவிம் அனதிரித்தேன கா²த³னீயாதி³னா பவாரணஸிக்கா²பத³ஞ்ச. ஏஹனாத³ரிந்தி ‘‘ஏஹாவுஸோ, கா³மம் வா’’தி (பாசி. 275) வுத்தஸிக்கா²பத³ஞ்ச அனாத³ரியஸிக்கா²பத³ஞ்ச. பி⁴ம்ஸாபனமேவ சாதி பி⁴க்கு²பி⁴ம்ஸனகஞ்ச. அபனிதே⁴ய்யாதி பத்தாதி³அபனிதா⁴னஸிக்கா²பத³ஞ்ச. ஸஞ்சிச்ச பாணந்தி ஸஞ்சிச்ச பாணம் ஜீவிதாவோரோபனஞ்ச. ஸப்பாணகம்பி சாதி ஜானம் ஸப்பாணகஉத³கஸிக்கா²பத³ஞ்ச.

363. உக்கோடனஞ்சாதி புனகம்மாய உக்கோடனஞ்ச. ஊனோதி ஊனவீஸதிவஸ்ஸஸிக்கா²பத³ஞ்ச. ஸம்வாஸோதி உக்கி²த்தகேன ஸத்³தி⁴ம் ஸம்வாஸஸிக்கா²பத³ஞ்ச. நாஸனே சாதி நாஸிதகஸாமணேரஸம்போ⁴க³ஸிக்கா²பத³ஞ்ச. ஸஹத⁴ம்மிகந்தி ஸஹத⁴ம்மிகம் வுச்சமானஸிக்கா²பத³ஞ்ச. விலேகா² சாதி ‘‘விலேகா²ய ஸம்வத்தந்தீ’’தி (பாசி. 439) ஆக³தஸிக்கா²பத³ஞ்ச. மோஹனாதி மோஹனஸிக்கா²பத³ஞ்ச. அமூலகேன சாதி அமூலகேன ஸங்கா⁴தி³ஸேஸேன அனுத்³த⁴ம்ஸனஸிக்கா²பத³ஞ்ச.

364. குக்குச்சம் கீ²யனம் த³த்வாதி குக்குச்சஉப்பாத³னஞ்ச த⁴ம்மிகானம் கம்மானம் ச²ந்த³ம் த³த்வா கீ²யனஞ்ச சீவரம் த³த்வா கீ²யனஞ்ச. பரிணாமேய்ய புக்³க³லேதி ஸங்கி⁴கம் லாப⁴ம் புக்³க³லஸ்ஸ பரிணாமனஸிக்கா²பத³ஞ்ச. கிம் தே, அகாலம், அச்சி²ந்தே³தி ‘‘கிம் தே, அய்யே, ஏஸோ புரிஸபுக்³க³லோ கரிஸ்ஸதீ’’தி (பாசி. 705) ஆக³தஸிக்கா²பத³ஞ்ச அகாலசீவரம் ‘‘காலசீவர’’ந்தி அதி⁴ட்ட²ஹித்வா பா⁴ஜனஸிக்கா²பத³ஞ்ச பி⁴க்கு²னியா ஸத்³தி⁴ம் சீவரம் பரிவத்தேத்வா அச்சி²ந்த³னஸிக்கா²பத³ஞ்ச. து³க்³க³ஹனிரயேன சாதி து³க்³க³ஹிதேன து³பதா⁴ரிதேன பரம் உஜ்ஜா²பனஸிக்கா²பத³ஞ்ச நிரயேன வா ப்³ரஹ்மசரியேன வா அபி⁴ஸபனஸிக்கா²பத³ஞ்ச.

365. க³ணஸ்ஸ சாதி ‘‘க³ணஸ்ஸ சீவரலாப⁴ம் அந்தராயம் கரேய்யா’’தி (பாசி. 908) வுத்தஸிக்கா²பத³ஞ்ச. விப⁴ங்க³ஞ்சாதி ‘‘த⁴ம்மிகம் சீவரவிப⁴ங்க³ம் படிபா³ஹேய்யா’’தி (பாசி. 912) வுத்தஸிக்கா²பத³ஞ்ச. து³ப்³ப³லாஸா ததே²வ சாதி ‘‘து³ப்³ப³லசீவரபச்சாஸாய சீவரகாலஸமயம் அதிக்காமேய்யா’’தி (பாசி. 921) வுத்தஸிக்கா²பத³ஞ்ச. த⁴ம்மிகம் கதி²னுத்³தா⁴ரந்தி ‘‘த⁴ம்மிகம் கதி²னுத்³தா⁴ரம் படிபா³ஹேய்யா’’தி (பாசி. 928) வுத்தஸிக்கா²பத³ஞ்ச. ஸஞ்சிச்சாபா²ஸுமேவ சாதி ‘‘பி⁴க்கு²னியா ஸஞ்சிச்ச அபா²ஸும் கரேய்யா’’தி (பாசி. 942) வுத்தஸிக்கா²பத³ஞ்ச.

366. ஸயம் உபஸ்ஸயம் த³த்வாதி ‘‘பி⁴க்கு²னியா உபஸ்ஸயம் த³த்வா குபிதா அனத்தமனா நிக்கட்³டே⁴ய்யா’’தி (பாசி. 951) வுத்தஸிக்கா²பத³ஞ்ச. அக்கோஸேய்ய சாதி ‘‘பி⁴க்கு²ம் அக்கோஸேய்ய வா பரிபா⁴ஸேய்ய வா’’தி (பாசி. 1029) வுத்தஸிக்கா²பத³ஞ்ச. சண்டி³காதி ‘‘சண்டீ³கதா க³ணம் பரிபா⁴ஸேய்யா’’தி (பாசி. 1034) வுத்தஸிக்கா²பத³ஞ்ச. குலமச்ச²ரினீ அஸ்ஸாதி ‘‘குலமச்ச²ரினீ அஸ்ஸா’’தி (பாசி. 1043) வுத்தஸிக்கா²பத³ஞ்ச. க³ப்³பி⁴னிம் வுட்டா²பேய்ய சாதி ‘‘க³ப்³பி⁴னிம் வுட்டா²பேய்யா’’தி (பாசி. 1068) வுத்தஸிக்கா²பத³ஞ்ச.

367. பாயந்திந்தி ‘‘பாயந்திம் வுட்டா²பேய்யா’’தி (பாசி. 1073) வுத்தஸிக்கா²பத³ஞ்ச. த்³வே ச வஸ்ஸானீதி ‘‘த்³வே வஸ்ஸானி ச²ஸு த⁴ம்மேஸு அஸிக்கி²தஸிக்க²ம் ஸிக்க²மானம் வுட்டா²பேய்யா’’தி (பாசி. 1080) வுத்தஸிக்கா²பத³ஞ்ச. ஸங்கே⁴னாஸம்மதந்தி ‘‘ஸிக்கி²தஸிக்க²ம் ஸிக்க²மானம் ஸங்கே⁴ன அஸம்மதம் வுட்டா²பேய்யா’’தி (பாசி. 1086) வுத்தஸிக்கா²பத³ஞ்ச. திஸ்ஸோ கி³ஹிக³தா வுத்தாதி ‘‘ஊனத்³வாத³ஸவஸ்ஸம் கி³ஹிக³தம் (பாசி. 1091), பரிபுண்ணத்³வாத³ஸவஸ்ஸம் கி³ஹிக³தம் த்³வே வஸ்ஸானி ச²ஸு த⁴ம்மேஸு அஸிக்கி²தஸிக்க²ம் (பாசி. 1097), த்³வேவஸ்ஸானி ஸிக்கி²தஸிக்க²ம் ஸங்கே⁴ன அஸம்மத’’ந்தி (பாசி. 1103) வுத்தஸிக்கா²பதா³னி ச. திஸ்ஸோயேவ குமாரிகாதி ‘‘ஊனவீஸதிவஸ்ஸம் குமாரிபூ⁴த’’ந்திஆதி³னா (பாசி. 1120) நயேன வுத்தா திஸ்ஸோ ச.

368. ஊனத்³வாத³ஸவஸ்ஸா த்³வேதி ‘‘ஊனத்³வாத³ஸவஸ்ஸா வுட்டா²பேய்ய (பாசி. 1137), பரிபுண்ணத்³வாத³ஸவஸ்ஸா ஸங்கே⁴ன அஸம்மதா வுட்டா²பேய்யா’’தி (பாசி. 1142) வுத்தானி த்³வே ஸிக்கா²பதா³னி ச. அலம் தாவ தேதி ‘‘அலம் தாவ தே, அய்யே, வுட்டா²பிதேனா’’தி (பாசி. 1147) வுத்தஸிக்கா²பத³ஞ்ச. ஸோகாவஸ்ஸாதி ‘‘சண்டி³ம் ஸோகாவாஸம் ஸிக்க²மானம் வுட்டா²பேய்யா’’தி (பாசி. 1159) வுத்தஸிக்கா²பத³ஞ்ச. பாரிவாஸிகச்ச²ந்த³தா³னதோதி ‘‘பாரிவாஸிகச²ந்த³தா³னேன ஸிக்க²மானம் வுட்டா²பேய்யா’’தி (பாசி. 1167) வுத்தஸிக்கா²பத³ஞ்ச.

369. அனுவஸ்ஸம் து³வே சாதி ‘‘அனுவஸ்ஸம் வுட்டா²பேய்ய (பாசி. 1171), ஏகம் வஸ்ஸம் த்³வே வுட்டா²பேய்யா’’தி (பாசி. 1175) வுத்தஸிக்கா²பதா³னி சாதி ஏகூனஸத்ததி ஸிக்கா²பதா³னி. அதி³ன்னாதா³னதுல்யத்தாதி அதி³ன்னாதா³னேன ஸமானஸமுட்டா²னத்தா. திஸமுட்டா²னிகா கதாதி ஸசித்தகேஹி தீஹி ஸமுட்டா²னேஹி ஸமுட்ட²ஹந்தீதி வுத்தா.

து³தியபாராஜிகஸமுட்டா²னவண்ணனா.

370. ஸஞ்சரிகுடிமஹல்லகந்தி ஸஞ்சரித்தம், ஸஞ்ஞாசிகாய குடிகரணம், மஹல்லகவிஹாரகரணஞ்ச. தோ⁴வாபனஞ்ச படிக்³க³ஹோதி அஞ்ஞாதிகாய பி⁴க்கு²னியா புராணசீவரதோ⁴வாபனஞ்ச சீவரபடிக்³க³ஹணஞ்ச. சீவரஸ்ஸ ச விஞ்ஞத்திந்தி அஞ்ஞாதகம் க³ஹபதிம் வா க³ஹபதானிம் வா சீவரவிஞ்ஞாபனஸிக்கா²பத³ஞ்ச. க³ஹணஞ்ச தது³த்தரிந்தி தது³த்தரிஸாதி³யனஸிக்கா²பத³ஞ்ச.

371. உபக்க²டத்³வயஞ்சேவாதி ‘‘சீவரசேதாபன்னம் உபக்க²டம் ஹோதீ’’தி (பாரா. 528) ஆக³தஸிக்கா²பத³த்³வயஞ்ச. ததா² தூ³தேன சீவரந்தி தூ³தேனசீவரசேதாபன்னபஹிதஸிக்கா²பத³ஞ்ச. கோஸியந்தி கோஸியமிஸ்ஸகஸிக்கா²பத³ஞ்ச. ஸுத்³த⁴காளானந்தி ‘‘ஸுத்³த⁴காளகான’’ந்திஆதி³ஸிக்கா²பத³ஞ்ச (பாரா. 548). த்³வே பா⁴கா³தா³னமேவ சாதி ‘‘த்³வே பா⁴கா³ ஆதா³தப்³பா³’’தி (பாரா. 553) வுத்தஸிக்கா²பத³ஞ்ச.

372. ச²ப்³ப³ஸ்ஸானீதி ச²ப்³ப³ஸ்ஸானி தா⁴ரணஸிக்கா²பத³ஞ்ச. புராணஸ்ஸாதி ‘‘புராணஸந்த²தஸ்ஸா’’தி (பாரா. 567) வுத்தஸிக்கா²பத³ஞ்ச. லோமதோ⁴வாபனம்பி சாதி ஏளகலோமதோ⁴வாபனஸிக்கா²பத³ஞ்ச. ரூபியஸ்ஸ படிக்³கா³ஹோதி ரூபியபடிக்³க³ஹணஸிக்கா²பத³ஞ்ச. உபோ⁴ நானப்பகாரகாதி ரூபியஸம்வோஹாரகயவிக்கயஸிக்கா²பதா³னி ச.

373. ஊனப³ந்த⁴னபத்தோ சாதி ஊனபஞ்சப³ந்த⁴னபத்தஸிக்கா²பத³ஞ்ச. வஸ்ஸஸாடிகஸுத்தகந்தி வஸ்ஸிகஸாடிகஸிக்கா²பத³ஞ்ச ஸுத்தம் விஞ்ஞாபேத்வா சீவரகாராபனஸிக்கா²பத³ஞ்ச. விகப்பாபஜ்ஜனந்தி தந்தவாயே உபஸங்கமித்வா சீவரே விகப்பாபஜ்ஜனஞ்ச. யாவ த்³வாரதா³னஞ்ச ஸிப்³ப³னந்தி ‘‘யாவ த்³வாரகோஸா அக்³க³ளட்ட²பனாயா’’தி (பாசி. 135) வுத்தஸிக்கா²பத³ஞ்ச ‘‘அஞ்ஞாதிகாய பி⁴க்கு²னியா சீவரம் த³தே³ய்ய (பாசி. 171), சீவரம் ஸிப்³பே³ய்யா’’தி (பாசி. 176) வுத்தஸிக்கா²பத³த்³வயஞ்ச.

374. பூவேஹீதி பூவேஹி வா மந்தே²ஹி வா அபி⁴ஹட்டு²ம் பவாரணஸிக்கா²பத³ஞ்ச. பச்சயோதி சதுமாஸபச்சயபவாரணஸிக்கா²பத³ஞ்ச. ஜோதீதி ஜோதியா ஸமாத³ஹனஸிக்கா²பத³ஞ்ச. ரதனந்தி ரதனஸிக்கா²பத³ஞ்ச. ஸூசி…பே… ஸுக³தஸ்ஸ சாதி ஸூசிக⁴ரஸிக்கா²பதா³தீ³னி ஸத்த ஸிக்கா²பதா³னி ச.

375. அஞ்ஞவிஞ்ஞத்திஸிக்கா² சாதி ‘‘அஞ்ஞம் விஞ்ஞாபேய்யா’’தி (பாசி. 749) வுத்தஸிக்கா²பத³ஞ்ச. அஞ்ஞம் சேதாபனம்பி சாதி ‘‘அஞ்ஞம் சேதாபேத்வா அஞ்ஞம் சேதாபேய்யா’’தி (பாசி. 749) வுத்தஸிக்கா²பத³ஞ்ச. ஸங்கி⁴கேன து³வே வுத்தாதி ‘‘ஸங்கி⁴கேன அஞ்ஞம் சேதாபேய்ய (பாசி. 759), ஸங்கி⁴கேன ஸஞ்ஞாசிகேன அஞ்ஞம் சேதாபேய்யா’’தி (பாசி. 764) வுத்தானி த்³வே ஸிக்கா²பதா³னி ச. த்³வே மஹாஜனிகேனாதி ‘‘மஹாஜனிகேன அஞ்ஞம் சேதாபேய்ய (பாசி. 769), மஹாஜனிகேன ஸஞ்ஞாசிகேன அஞ்ஞம் சேதாபேய்யா’’தி (பாசி. 774) வுத்தானி த்³வே ஸிக்கா²பதா³னி ச.

376. ததா² புக்³க³லிகேனேகந்தி ‘‘புக்³க³லிகேன ஸஞ்ஞாசிகேன அஞ்ஞம் சேதாபேய்யா’’தி (பாசி. 779) வுத்தமேகஸிக்கா²பத³ஞ்ச. க³ருபாவுரணந்தி க³ருபாவுரணசேதாபனஸிக்கா²பத³ஞ்ச. லஹுந்தி லஹுபாவுரணசேதாபனஸிக்கா²பத³ம். ‘‘விகா⁴ஸா உத³ஸாடி சா’’தி பத³ச்சே²தோ³. த்³வே விகா⁴ஸாதி ‘‘உச்சாரம் வா பஸ்ஸாவம் வா ஸங்காரம் வா விகா⁴ஸம் வா திரோகுட்டே வா திரோபாகாரே வா ச²ட்³டே³ய்ய வா ச²ட்³டா³பேய்ய வா (பாசி. 825), ஹரிதே ச²ட்³டே³ய்ய வா ச²ட்³டா³பேய்ய வா’’தி (பாசி. 829) ஏவம் வுத்தானி த்³வே விகா⁴ஸஸிக்கா²பதா³னி ச. உத³ஸாடி சாதி உத³கஸாடிகஸிக்கா²பத³ஞ்ச. ததா² ஸமணசீவரந்தி ததா² ‘‘ஸமணசீவரம் த³தே³ய்யா’’தி (பாசி. 917) வுத்தஸிக்கா²பத³ஞ்சாதி.

377. இதி ஏதே ஏகூனபண்ணாஸ த⁴ம்மா து³க்க²ந்தத³ஸ்ஸினா ப⁴க³வதா ச²ஸமுட்டா²னிகா தேயேவ ஸஞ்சரித்தஸமா ஸஞ்சரித்தஸிக்கா²பதே³ன ஸமா கதா அனுமதா பஞ்ஞத்தாதி யோஜனா.

ஸஞ்சரித்தஸமுட்டா²னவண்ணனா.

378. ஸங்க⁴பே⁴தோ³தி ஸங்க⁴பே⁴த³ஸிக்கா²பத³ஞ்ச. பே⁴தா³னுவத்தது³ப்³ப³சதூ³ஸகாதி பே⁴தா³னுவத்தகது³ப்³ப³சகுலதூ³ஸகஸிக்கா²பதா³னி ச. து³ட்டு²ல்லச்சா²த³னந்தி து³ட்டு²ல்லபடிச்சா²த³னஸிக்கா²பத³ஞ்ச. தி³ட்டீ²தி தி³ட்டி²அப்படினிஸ்ஸஜ்ஜனஸிக்கா²பத³ஞ்ச. ச²ந்த³உஜ்ஜக்³கி⁴கா து³வேதி ச²ந்த³ம்அத³த்வாக³மனஸிக்கா²பத³ஞ்ச உஜ்ஜக்³கி⁴காய அந்தரக⁴ரே க³மனனிஸீத³னஸிக்கா²பத³த்³வயஞ்ச.

379. அப்பஸத்³தா³ து³வே வுத்தாதி ‘‘அப்பஸத்³தோ³ அந்தரக⁴ரே க³மிஸ்ஸாமி, நிஸீதி³ஸ்ஸாமீ’’தி (பாசி. 588, 589) வுத்தானி த்³வே ஸிக்கா²பதா³னி ச. ந ப்³யாஹரேதி ‘‘ந ஸகப³ளேன முகே²ன ப்³யாஹரிஸ்ஸாமீ’’தி (பாசி. 619) வுத்தஸிக்கா²பத³ஞ்ச. ச²மா, நீசாஸனே, டா²னந்தி ‘‘ச²மாயம் நிஸீதி³த்வா (பாசி. 645), நீசே ஆஸனே நிஸீதி³த்வா (பாசி. 647), டி²தோ நிஸின்னஸ்ஸா’’தி (பாசி. 648) வுத்தஸிக்கா²பத³ஞ்ச. பச்ச²தோ உப்பதே²ன சாதி ‘‘பச்ச²தோ க³ச்ச²ந்தோ புரதோ க³ச்ச²ந்தஸ்ஸ (பாசி. 649), உப்பதே²ன க³ச்ச²ந்தோ பதே²ன க³ச்ச²ந்தஸ்ஸா’’தி (பாசி. 650) வுத்தஸிக்கா²பத³த்³வயஞ்ச.

380. வஜ்ஜச்சா²தா³தி வஜ்ஜதோ படிச்சா²த³னஸிக்கா²பத³ஞ்ச. அனுவத்தா சாதி உக்கி²த்தானுவத்தனஸிக்கா²பத³ஞ்ச. க³ஹணந்தி ‘‘ஹத்த²க்³க³ஹணம் வா ஸாதி³யேய்யா’’தி (பாசி. 675) வுத்தஸிக்கா²பத³ஞ்ச. ஓஸாரேய்ய சாதி ‘‘அனபலோகேத்வா காரகஸங்க⁴ம் அனஞ்ஞாய க³ணஸ்ஸ ச²ந்த³ம் ஓஸாரேய்யா’’தி (பாசி. 695) வுத்தஸிக்கா²பத³ஞ்ச. பச்சக்கா²மீதி ஸிக்கா² சாதி ‘‘பு³த்³த⁴ம் பச்சாசிக்கா²மீ’’தி (பாசி. 710) வுத்தஸிக்கா²பத³ஞ்ச. ததா² கிஸ்மிஞ்சிதே³வ சாதி ‘‘கிஸ்மிஞ்சிதே³வ அதி⁴கரணே பச்சாகதா’’தி (பாசி. 716) வுத்தஸிக்கா²பத³ஞ்ச.

381. ஸம்ஸட்டா² த்³வே சாதி ‘‘பி⁴க்கு²னியோ பனேவ ஸம்ஸட்டா² விஹரந்தீ’’தி (பாசி. 722) ச ‘‘யா பன பி⁴க்கு²னீ ஏவம் வதே³ய்ய ஸம்ஸட்டா²வ, அய்யே, தும்ஹே விஹரதா²’’திஆதி³வசனம் (பாசி. 728) படிச்ச வுத்தஸிக்கா²பத³த்³வயஞ்ச. வதி⁴த்வா சாதி ‘‘அத்தானம் வதி⁴த்வா வதி⁴த்வா ரோதே³ய்யா’’தி (பாசி. 880) வுத்தஸிக்கா²பத³ஞ்ச. விஸிப்³பே³த்வா சாதி ‘‘பி⁴க்கு²னியா சீவரம் விஸிப்³பே³த்வா வா விஸிப்³பா³பேத்வா வா’’தி (பாசி. 893) வுத்தஸிக்கா²பத³ஞ்ச. து³க்கி²தந்தி ‘‘து³க்கி²தம் ஸஹஜீவினி’’ந்தி (பாசி. 947) வுத்தஸிக்கா²பத³ஞ்ச. புனதே³வ ச ஸம்ஸட்டா²தி ‘‘ஸம்ஸட்டா² விஹரேய்ய க³ஹபதினா வா க³ஹபதிபுத்தேன வா’’தி (பாசி. 956) ஏவம் புன வுத்தஸம்ஸட்ட²ஸிக்கா²பத³ஞ்ச. நேவ வூபஸமேய்ய சாதி ‘‘‘ஏஹாய்யே, இமம் அதி⁴கரணம் வூபஸமேஹீ’தி (பாசி. 995) வுச்சமானா ‘ஸாதூ⁴’தி படிஸ்ஸுணித்வா ஸா பச்சா² அனந்தராயிகினீ நேவ வூபஸமேய்யா’’தி வுத்தஸிக்கா²பத³ஞ்ச.

382. ஜானம் ஸபி⁴க்கு²காராமந்தி ‘‘ஜானம் ஸபி⁴க்கு²கம் ஆராமம் அனாபுச்சா² பவிஸேய்யா’’தி (பாசி. 1024) வுத்தஸிக்கா²பத³ஞ்ச. ததே²வ ந பவாரயேதி ‘‘உப⁴தோஸங்கே⁴ தீஹி டா²னேஹி ந பவாரேய்யா’’தி (பாசி. 1051) வுத்தஸிக்கா²பத³ஞ்ச. ததா² அன்வத்³த⁴மாஸஞ்சாதி ‘‘அன்வத்³த⁴மாஸம் பி⁴க்கு²னியா பி⁴க்கு²ஸங்க⁴தோ த்³வே த⁴ம்மா பச்சாஸீஸிதப்³பா³’’தி (பாசி. 1059) வுத்தஸிக்கா²பத³ஞ்ச. ஸஹஜீவினியோ து³வேதி ‘‘ஸஹஜீவினிம் வுட்டா²பேத்வா த்³வே வஸ்ஸானி நேவ அனுக்³க³ண்ஹேய்ய (பாசி. 1108), ஸஹஜீவினிம் வுட்டா²பேத்வா நேவ வூபகாஸேய்யா’’தி (பாசி. 1116) வுத்தஸிக்கா²பத³த்³வயஞ்ச.

383-4. ஸசே மே சீவரம் அய்யேதி ‘‘ஸசே மே த்வம், அய்யே, சீவரம் த³ஸ்ஸஸி, ஏவாஹம் தம் வுட்டா²பேஸ்ஸாமீ’’தி (பாசி. 1151) வுத்தஸிக்கா²பத³ஞ்ச. அனுப³ந்தி⁴ஸ்ஸஸீதி ‘‘ஸசே மம் த்வம், அய்யே, த்³வே வஸ்ஸானி அனுப³ந்தி⁴ஸ்ஸஸி, ஏவாஹம் தம் வுட்டா²பேஸ்ஸாமீ’’தி (பாசி. 1155) வுத்தஸிக்கா²பத³ஞ்ச. அஸமேன ஸம்பு³த்³தே⁴ன பகாஸிதா இமே ஸத்ததிம்ஸ த⁴ம்மா ஸப்³பே³ காயவாசாதி³தோ காயவாசாசித்ததோ ஏகஸமுட்டா²னா கதா ஸமனுபா⁴ஸனா ஸியும் ஸமுட்டா²னதோ ஸமனுபா⁴ஸனஸிக்கா²பதே³ன ஸதி³ஸா ஸியுந்தி யோஜனா.

ஸமனுபா⁴ஸனஸமுட்டா²னவண்ணனா.

385. கதி²னானி ச தீணீதி ‘‘நிட்டி²தசீவரஸ்மிம் பி⁴க்கு²னா உப்³ப⁴தஸ்மிம் கதி²னே’’தி (பாரா. 462) வுத்தானி ஆதி³தோ தீணி ஸிக்கா²பதா³னி. பத்தோதி ‘‘த³ஸாஹபரமம் அதிரேகபத்தோ’’தி (பாரா. 601) வுத்தஸிக்கா²பத³ஞ்ச. பே⁴ஸஜ்ஜமேவ சாதி ‘‘படிஸாயனீயானி பே⁴ஸஜ்ஜானீ’’தி (பாரா. 622) வுத்தஸிக்கா²பத³ஞ்ச. அச்சேகம்பி சாதி அச்சேகஸிக்கா²பத³ஞ்ச. ஸாஸங்கந்தி தத³னந்தரமேவ ஸாஸங்கஸிக்கா²பத³ஞ்ச. பக்கமந்தத்³வயம்பி சாதி ‘‘தம் பக்கமந்தோ நேவ உத்³த⁴ரேய்யா’’தி (பாசி. 109, 115) பூ⁴தகா³மவக்³கே³ வுத்தஸிக்கா²பத³த்³வயஞ்ச.

386. ததா² உபஸ்ஸயம் க³ந்த்வாதி ‘‘பி⁴க்கு²னுபஸ்ஸயம் உபஸங்கமித்வா பி⁴க்கு²னியோ ஓவதே³ய்யா’’தி (பாசி. 158) வுத்தஸிக்கா²பத³ஞ்ச. பரம்பரம் போ⁴ஜனந்தி ‘‘பரம்பரபோ⁴ஜனே பாசித்திய’’ந்தி (பாசி. 221) வுத்தஸிக்கா²பத³ஞ்ச. அனதிரித்தந்தி ‘‘அனதிரித்தம் கா²த³னீயம் வா போ⁴ஜனீயம் வா’’தி (பாசி. 238) வுத்தஸிக்கா²பத³ஞ்ச. ஸப⁴த்தோதி ‘‘நிமந்திதோ ஸப⁴த்தோ ஸமானோ’’தி (பாசி. 299) வுத்தஸிக்கா²பத³ஞ்ச. விகப்பேத்வா ததே²வ சாதி ‘‘சீவரம் விகப்பேத்வா’’தி (பாசி. 373) வுத்தஸிக்கா²பத³ஞ்ச.

387. ரஞ்ஞோதி ‘‘ரஞ்ஞோ க²த்தியஸ்ஸா’’தி (பாசி. 498) வுத்தஸிக்கா²பத³ஞ்ச. விகாலேதி ‘‘விகாலே கா³மம் பவிஸேய்யா’’தி (பாசி. 509-512) வுத்தஸிக்கா²பத³ஞ்ச. வோஸாஸாதி ‘‘வோஸாஸமானரூபா டி²தா’’தி (பாசி. 558) வுத்தஸிக்கா²பத³ஞ்ச. ‘‘ஆரஞ்ஞகே உஸ்ஸயவாதி³கா’’தி பத³ச்சே²தோ³. ஆரஞ்ஞகேதி ‘‘ததா²ரூபேஸு ஆரஞ்ஞகேஸு ஸேனாஸனேஸு புப்³பே³ அப்படிஸம்விதி³த’’ந்தி (பாசி. 570) வுத்தஸிக்கா²பத³ஞ்ச. உஸ்ஸயவாதி³காதி ‘‘உஸ்ஸயவாதி³கா விஹரேய்யா’’தி (பாசி. 679) வுத்தஸிக்கா²பத³ஞ்ச. பத்தஸன்னிசயஞ்சேவாதி ‘‘பத்தஸன்னிசயம் கரேய்யா’’தி (பாசி. 734) வுத்தஸிக்கா²பத³ஞ்ச. புரே, பச்சா², விகாலகேதி ‘‘யா பன பி⁴க்கு²னீ புரேப⁴த்தம் குலானி உபஸங்கமித்வா’’தி (பாசி. 855) ச ‘‘பச்சா²ப⁴த்தம் குலானி உபஸங்கமித்வா’’தி (பாசி. 860) ச ‘‘விகாலே குலானி உபஸங்கமித்வா’’தி (பாசி. 865) ச வுத்தஸிக்கா²பத³த்தயஞ்ச.

388-9. பஞ்சாஹிகந்தி ‘‘பஞ்சாஹிகம் ஸங்கா⁴டிசாரம் அதிக்கமேய்யா’’தி (பாசி. 898) வுத்தஸிக்கா²பத³ஞ்ச. ஸங்கமனிந்தி ‘‘சீவரஸங்கமனீயம் தா⁴ரேய்யா’’தி (பாசி. 903) வுத்தஸிக்கா²பத³ஞ்ச. ததா² ஆவஸத²த்³வயந்தி ‘‘ஆவஸத²சீவரம் அனிஸ்ஸஜ்ஜித்வா பரிபு⁴ஞ்ஜேய்ய (பாசி. 1004), ஆவஸத²ம் அனிஸ்ஸஜ்ஜித்வா சாரிகம் பக்கமேய்யா’’தி (பாசி. 1009) ஏவம் ஆவஸதே²ன ஸத்³தி⁴ம் வுத்தஸிக்கா²பத³த்³வயஞ்ச. பஸாகே²தி ‘‘பஸாகே² ஜாதம் க³ண்ட³ம் வா’’தி (பாசி. 1063) வுத்தஸிக்கா²பத³ஞ்ச. ஆஸனே சாதி ‘‘பி⁴க்கு²ஸ்ஸ புரதோ அனாபுச்சா² ஆஸனே நிஸீதே³ய்யா’’தி (பாசி. 1215) வுத்தஸிக்கா²பத³ஞ்சாதி இமே பன ஏகூனதிம்ஸ த⁴ம்மா காயவாசதோ, காயவாசாசித்ததோ ச ஸமுட்டா²னதோ ஸப்³பே³ த்³விஸமுட்டா²னிகா, ததோயேவ கதி²னஸம்ப⁴வா கதி²னஸமுட்டா²னா ஹோந்தீதி யோஜனா.

கதி²னஸமுட்டா²னவண்ணனா.

390. த்³வே ஸேய்யாதி த்³வே ஸஹஸேய்யஸிக்கா²பதா³னி ச. ஆஹச்சபாதோ³ சாதி ஆஹச்சபாத³கஸிக்கா²பத³ஞ்ச. பிண்ட³ஞ்சாதி ஆவஸத²பிண்ட³போ⁴ஜனஸிக்கா²பத³ஞ்ச. க³ணபோ⁴ஜனந்தி க³ணபோ⁴ஜனஸிக்கா²பத³ஞ்ச. விகாலேதி விகாலபோ⁴ஜனஸிக்கா²பத³ஞ்ச. ஸன்னிதி⁴ஞ்சேவாதி ஸன்னிதி⁴காரகஸிக்கா²பத³ஞ்ச. த³ந்தபோனந்தி த³ந்தபோனஸிக்கா²பத³ஞ்ச. அசேலகந்தி அசேலகஸிக்கா²பத³ஞ்ச.

391. உய்யுத்தஞ்சாதி ‘‘உய்யுத்தம் ஸேனம் த³ஸ்ஸனாய க³ச்சே²ய்யா’’தி (பாசி. 311) வுத்தஸிக்கா²பத³ஞ்ச. ‘‘வஸே உய்யோதி⁴’’ந்தி பத³ச்சே²தோ³. வஸேதி ‘‘ஸேனாய வஸேய்யா’’தி (பாசி. 318) வுத்தஸிக்கா²பத³ஞ்ச. உய்யோதி⁴ந்தி ‘‘உய்யோதி⁴கம் வா…பே… அனீகத³ஸ்ஸனம் வா க³ச்சே²ய்யா’’தி (பாசி. 323) வுத்தஸிக்கா²பத³ஞ்ச. ஸுராதி ஸுராபானஸிக்கா²பத³ஞ்ச. ஓரேன ந்ஹாயனந்தி ஓரேனத்³த⁴மாஸனஹாயனஸிக்கா²பத³ஞ்ச. து³ப்³ப³ண்ணகரணஞ்சேவாதி ‘‘திண்ணம் து³ப்³ப³ண்ணகரணான’’ந்தி (பாசி. 368) வுத்தஸிக்கா²பத³ஞ்ச. பாடிதே³ஸனீயத்³வயந்தி வுத்தாவஸேஸம் பாடிதே³ஸனீயத்³வயஞ்ச.

392. லஸுணந்தி லஸுணஸிக்கா²பத³ஞ்ச. உபதிட்டே²ய்யாதி ‘‘பி⁴க்கு²ஸ்ஸ பு⁴ஞ்ஜந்தஸ்ஸ பானீயேன வா விதூ⁴பனேன வா உபதிட்டே²ய்யா’’தி (பாசி. 816) வுத்தஸிக்கா²பத³ஞ்ச. நச்சத³ஸ்ஸனமேவ சாதி ‘‘நச்சம் வா கீ³தம் வா வாதி³தம் வா த³ஸ்ஸனாய க³ச்சே²ய்யா’’தி (பாசி. 834) வுத்தஸிக்கா²பத³ஞ்ச. நக்³க³ந்தி ‘‘நக்³கா³ நஹாயேய்யா’’தி (பாசி. 884) வுத்தஸிக்கா²பத³ஞ்ச. அத்த²ரணந்தி ‘‘ஏகத்த²ரணபாவுரணா துவட்டேய்யு’’ந்தி (பாசி. 937) வுத்தஸிக்கா²பத³ஞ்ச. மஞ்சேதி ‘‘ஏகமஞ்சே துவட்டேய்யு’’ந்தி (பாசி. 933) வுத்தஸிக்கா²பத³ஞ்ச. அந்தோரட்டே²தி ‘‘அந்தோரட்டே² ஸாஸங்கஸம்மதே’’தி (பாசி. 962) வுத்தஸிக்கா²பத³ஞ்ச. ததா² ப³ஹீதி ‘‘திரோரட்டே² ஸாஸங்கஸம்மதே’’தி (பாசி. 966) வுத்தஸிக்கா²பத³ஞ்ச.

393. அந்தோவஸ்ஸந்தி ‘‘அந்தோவஸ்ஸம் சாரிகம் சரேய்யா’’தி (பாசி. 970) வுத்தஸிக்கா²பத³ஞ்ச. அகா³ரஞ்சாதி ‘‘ராஜாகா³ரம் வா சித்தாகா³ரம் வா…பே… போக்க²ரணிம் வா த³ஸ்ஸனாய க³ச்சே²ய்யா’’தி (பாசி. 978) வுத்தஸிக்கா²பத³ஞ்ச. ஆஸந்தி³ந்தி ‘‘ஆஸந்தி³ம் வா பல்லங்கம் வா பரிபு⁴ஞ்ஜேய்யா’’தி (பாசி. 983) வுத்தஸிக்கா²பத³ஞ்ச. ஸுத்தகந்தனந்தி ‘‘ஸுத்தம் கந்தேய்யா’’தி (பாசி. 987) வுத்தஸிக்கா²பத³ஞ்ச. வேய்யாவச்சந்தி ‘‘கி³ஹிவேய்யாவச்சம் கரேய்யா’’தி (பாசி. 991) வுத்தஸிக்கா²பத³ஞ்ச. ஸஹத்தா² சாதி ‘‘அகா³ரிகஸ்ஸ வா பரிப்³பா³ஜகஸ்ஸ வா பரிப்³பா³ஜிகாய வா ஸஹத்தா² கா²த³னீயம் வா போ⁴ஜனீயம் வா த³தே³ய்யா’’தி (பாசி. 1000) வுத்தஸிக்கா²பத³ஞ்ச. ஆவாஸே ச அபி⁴க்கு²கேதி ‘‘அபி⁴க்கு²கே ஆவாஸே வஸ்ஸம் வஸேய்யா’’தி (பாசி. 1047) வுத்தஸிக்கா²பத³ஞ்ச.

394. ச²த்தந்தி ‘‘ச²த்துபாஹனம் தா⁴ரேய்யா’’தி (பாசி. 1178) வுத்தஸிக்கா²பத³ஞ்ச. யானஞ்சாதி ‘‘யானேன யாயேய்யா’’தி (பாசி. 1186) வுத்தஸிக்கா²பத³ஞ்ச. ஸங்கா⁴ணிந்தி ‘‘ஸங்கா⁴ணிம் தா⁴ரேய்யா’’தி (பாசி. 1191) வுத்தஸிக்கா²பத³ஞ்ச. அலங்காரந்தி ‘‘இத்தா²லங்காரம் தா⁴ரேய்யா’’தி (பாசி. 1195) வுத்தஸிக்கா²பத³ஞ்ச. க³ந்த⁴வாஸிதந்தி ‘‘க³ந்த⁴வண்ணகேன நஹாயேய்ய (பாசி. 1199), வாஸிதகேன பிஞ்ஞாகேன நஹாயேய்யா’’தி (பாசி. 1203) வுத்தஸிக்கா²பத³த்³வயஞ்ச. ‘‘பி⁴க்கு²னீ…பே… கி³ஹினியா’’தி ஏதேன ‘‘பி⁴க்கு²னியா உம்மத்³தா³பேய்யா’’திஆதீ³னி (பாசி. 1207) சத்தாரி ஸிக்கா²பதா³னி வுத்தானி.

395. ததா²ஸம்கச்சிகாதி ‘‘அஸம்கச்சிகா கா³மம் பவிஸேய்யா’’தி (பாசி. 1225) ஏவம் வுத்தஸிக்கா²பத³ஞ்ச. இமே பன தேசத்தாலீஸ த⁴ம்மா ஸப்³பே³ காயசித்தவஸேன த்³விஸமுட்டா²னிகா. ஏளகலோமேன ஸமுட்டா²னதோ ஸமா ஹோந்தீதி யோஜனா.

ஏளகலோமஸமுட்டா²னவண்ணனா.

396-7. அஞ்ஞத்ராதி ‘‘மாதுகா³மஸ்ஸ உத்தரிச²ப்பஞ்சவாசாஹி த⁴ம்மம் தே³ஸேய்ய அஞ்ஞத்ர விஞ்ஞுனா புரிஸவிக்³க³ஹேனா’’தி (பாசி. 63) வுத்தஸிக்கா²பத³ஞ்ச. அஸம்மதோ சேவாதி ‘‘அஸம்மதோ பி⁴க்கு²னியோ ஓவதே³ய்யா’’தி (பாசி. 146) வுத்தஸிக்கா²பத³ஞ்ச. ததா² அத்த²ங்க³தேன சாதி ‘‘அத்த²ங்க³தே ஸூரியே பி⁴க்கு²னியோ ஓவதே³ய்யா’’தி (பாசி. 154) வுத்தஸிக்கா²பத³ஞ்ச. திரச்சா²னவிஜ்ஜா த்³வே வுத்தாதி ‘‘திரச்சா²னவிஜ்ஜம் பரியாபுணேய்ய, வாசேய்யா’’தி (பாசி. 1014, 1018) ஏவம் வுத்தானி த்³வே ஸிக்கா²பதா³னி ச. அனோகாஸகதம்பி சாதி ‘‘அனோகாஸகதம் பி⁴க்கு²ம் பஞ்ஹம் புச்சே²ய்யா’’தி (பாசி. 1220) வுத்தஸிக்கா²பத³ஞ்சாதி இமே பன ஸப்³பே³ ச² த⁴ம்மா வாசதோ, வாசாசித்ததோ சாதி இமேஹி த்³வீஹி ஸமுட்டா²னேஹி ஸமுட்டா²னிகா ஹோந்தி. பத³ஸோத⁴ம்மதுல்யதா அயமேதேஸம் பத³ஸோத⁴ம்மேன ஸதி³ஸபா⁴வோதி யோஜனா.

பத³ஸோத⁴ம்மஸமுட்டா²னவண்ணனா.

398-9. ஏகந்தி ‘‘பி⁴க்கு²னியா ஸத்³தி⁴ம் ஸம்விதா⁴ய ஏகத்³தா⁴னமக்³க³ம் படிபஜ்ஜேய்யா’’தி (பாசி. 180) வுத்தஸிக்கா²பத³ஞ்ச. நாவந்தி ‘‘ஏகனாவம் அபி⁴ருஹேய்யா’’தி (பாசி. 188) வுத்தஸிக்கா²பத³ஞ்ச. பணீதஞ்சாதி ‘‘பணீதபோ⁴ஜனானி அகி³லானோ அத்தனோ அத்தா²ய விஞ்ஞாபேத்வாபு⁴ஞ்ஜேய்யா’’தி (பாசி. 259) வுத்தஸிக்கா²பத³ஞ்ச. ஸம்விதா⁴னஞ்சாதி மாதுகா³மேன ஸத்³தி⁴ம் ஸம்விதா⁴ய க³மனஸிக்கா²பத³ஞ்ச. ஸம்ஹரேதி ‘‘ஸம்பா³தே⁴ லோமம் ஸம்ஹராபேய்யா’’தி (பாசி. 799) வுத்தஸிக்கா²பத³ஞ்ச. த⁴ஞ்ஞந்தி ‘‘ஆமகத⁴ஞ்ஞம் விஞ்ஞத்வா வா’’தி (பாசி. 821) வுத்தஸிக்கா²பத³ஞ்ச. நிமந்திதா சேவாதி ‘‘நிமந்திதா வா பவாரிதா வா கா²த³னீயம் வா போ⁴ஜனீயம் வா கா²தே³ய்ய வா பு⁴ஞ்ஜேய்ய வா’’தி (பாசி. 1038) வுத்தஸிக்கா²பத³ஞ்ச. பாடிதே³ஸனியட்ட²கந்தி பி⁴க்கு²னீனம் வுத்தா அட்ட² பாடிதே³ஸனீயா சேதி பு³த்³த⁴ஸேட்டே²ன பஞ்ஞத்தா ஏதா சுத்³த³ஸ ஸிக்கா² சதுஸமுட்டா²னா காயதோ, காயவாசதோ, காயசித்ததோ, வாசாசித்ததோ சாதி சதூஹி ஸமுட்டா²னேஹி ஸமுட்ட²ஹந்தி. ஸமுட்டா²னதோ அத்³தா⁴னேன அத்³தா⁴னஸிக்கா²பதே³ன ஸமா ஹோந்தீதி மதாதி யோஜனா.

அத்³தா⁴னஸமுட்டா²னவண்ணனா.

400-1. ஸுதிந்தி உபஸ்ஸுதிதிட்ட²னஸிக்கா²பத³ஞ்ச. ஸூபாதி³விஞ்ஞத்திந்தி ஸூபோத³னவிஞ்ஞத்திஸிக்கா²பத³ஞ்ச. அந்த⁴காரேதி ‘‘ரத்தந்த⁴காரே அப்பதீ³பே’’தி (பாசி. 839) வுத்தஸிக்கா²பத³ஞ்ச. ததே²வ ச படிச்ச²ன்னேதி ‘‘படிச்ச²ன்னே ஓகாஸே’’தி (பாசி. 843) வுத்தஸிக்கா²பத³ஞ்ச. ஓகாஸேதி ‘‘அஜ்ஜோ²காஸே புரிஸேன ஸத்³தி⁴’’ந்தி (பாசி. 847) ஏவம் வுத்தஸிக்கா²பத³ஞ்ச. ப்³யூஹே சாதி தத³னந்தரமேவ ‘‘ரதி²காய வா ப்³யூஹே வா ஸிங்கா⁴டகே வா புரிஸேன ஸத்³தி⁴’’ந்தி (பாசி. 851) ஆக³தஸிக்கா²பத³ஞ்சாதி இமே ஸப்³பே³பி ஆதி³ச்சப³ந்து⁴னா தே³ஸிதா ச² த⁴ம்மா சதுத்த²ச்ச²ட்ட²தோ காயசித்ததோ, காயவாசாசித்ததோ ச ஸமுட்ட²ஹந்தா தே²ய்யஸத்த²ஸமுட்டா²னா தே²ய்யஸத்த²ஸிக்கா²பதே³ன ஸமானஸமுட்டா²னா ஸியுந்தி யோஜனா.

தே²ய்யஸத்த²ஸமுட்டா²னவண்ணனா.

402. ச²த்த, த³ண்ட³கரஸ்ஸாபீதி ‘‘ந ச²த்தபாணிஸ்ஸ த³ண்ட³பாணிஸ்ஸா’’தி (பாசி. 635) வுத்தஸிக்கா²பத³த்³வயஞ்ச. ஸத்தா²வுத⁴கரஸ்ஸாபீதி ‘‘ந ஸத்த²பாணிஸ்ஸ (பாசி. 636), ந ஆவுத⁴பாணிஸ்ஸா’’தி (பாசி. 637) வுத்தஸிக்கா²பத³த்³வயஞ்ச. பாது³கூபாஹனா, யானந்தி ‘‘ந பாது³காருள்ஹஸ்ஸ (பாசி. 638), ந உபாஹனாருள்ஹஸ்ஸ (பாசி. 639), ந யானக³தஸ்ஸா’’தி (பாசி. 640) வுத்தஸிக்கா²பத³த்தயஞ்ச. ஸேய்யா, பல்லத்தி²காய சாதி ‘‘ந ஸயனக³தஸ்ஸ (பாசி. 641), ந பல்லத்தி²காய நிஸின்னஸ்ஸா’’தி (பாசி. 642) வுத்தஸிக்கா²பத³த்³வயஞ்ச.

403. வேடி²தோகு³ண்டி²தோ சாதி ‘‘ந வேடி²தஸீஸஸ்ஸ (பாசி. 643), ந ஓகு³ண்டி²தஸீஸஸ்ஸா’’தி (பாசி. 644) வுத்தஸிக்கா²பத³த்³வயஞ்சாதி நித³ஸ்ஸிதா ஸப்³பே³ ஏகாத³ஸ த⁴ம்மா வாசாசித்தஸங்கா²தேன ஏகேன ஸமுட்டா²னேன ஸமுட்டி²தா த⁴ம்மதே³ஸனஸமுட்டா²னாதி ஸஞ்ஞிதா ஸல்லக்கி²தாதி யோஜனா.

த⁴ம்மதே³ஸனஸமுட்டா²னவண்ணனா.

404. ஏவம் தாவ ஸம்பி⁴ன்னஸமுட்டா²னம் வேதி³தப்³ப³ம், நியதஸமுட்டா²னம் திவித⁴ம், தம் ஏகஸ்ஸேவ ஸிக்கா²பத³ஸ்ஸ ஹோதீதி விஸும்யேவ த³ஸ்ஸேதுமாஹ ‘‘பூ⁴தாரோசனகஞ்சேவா’’திஆதி³. பூ⁴தாரோசனகஞ்சேவாதி தீஹி அசித்தகஸமுட்டா²னேஹி ஸமுட்டி²தம் பூ⁴தாரோசனஸிக்கா²பத³ஞ்ச. சோரிவுட்டா²பனம்பி சாதி வாசாசித்ததோ, காயவாசாசித்ததோ சாதி த்³வீஹி ஸமுட்டி²தம் சோரிவுட்டா²பனஸிக்கா²பத³ஞ்ச. அனனுஞ்ஞாதமேவ அனனுஞ்ஞாதமத்தம். அனனுஞ்ஞாதமத்தந்தி வாசதோ, காயவாசதோ, வாசாசித்ததோ, காயவாசாசித்ததோ சாதி சதூஹி ஸமுட்டி²தம் அனனுஞ்ஞாதஸிக்கா²பத³ஞ்சாதி. இத³ம் தயந்தி இத³ம் ஸிக்கா²பத³த்தயம். அஸம்பி⁴ன்னந்தி கேனசி அஞ்ஞேன ஸிக்கா²பதே³ன அஸம்மிஸ்ஸஸமுட்டா²னம்.

இதி உத்தரே லீனத்த²பகாஸனியா

ஸமுட்டா²னஸீஸகதா²வண்ணனா நிட்டி²தா.