பப்³ப³ஜ்ஜாகதா²வண்ணனா

2444. இச்சேவம் நாதிஸங்கே²பவித்தா²ரவஸேன விப⁴ங்க³த்³வயே, தத³ட்ட²கதா²ய ச ஆக³தம் வினிச்ச²யம் த³ஸ்ஸேத்வா இதா³னி க²ந்த⁴காக³தம் வினிச்ச²யம் த³ஸ்ஸேதுமாரப⁴ந்தோ ஆஹ ‘‘ஸீலக்க²ந்தா⁴தீ³’’திஆதி³. தத்த² ஸீலக்க²ந்தா⁴தி³யுத்தேனாதி ஸீலஸமாதி⁴பஞ்ஞாவிமுத்திவிமுத்திஞாணத³ஸ்ஸனஸங்கா²தேஹி பஞ்சஹி க²ந்தே⁴ஹி கு³ணராஸீஹி யுத்தேன ஸமன்னாக³தேன. ஸுப⁴க்க²ந்தே⁴னாதி ஸுவண்ணாலிங்க³ஸதி³ஸவட்டக்க²ந்த⁴தாய ஸுபோ⁴ ஸுந்த³ரோ க²ந்தோ⁴ ஏதஸ்ஸாதி ஸுப⁴க்க²ந்தோ⁴, ப⁴க³வா, தேன. இமினா பா³த்திம்ஸலக்க²ணானமேகதே³ஸபூ⁴தஸ்ஸ ஸமவட்டக்க²ந்த⁴தாலக்க²ணஸ்ஸ பரிதீ³பகேன வசனேன லக்க²ணாஹாரனயேன பா³த்திம்ஸலக்க²ணாதி³கா ஸப்³பா³பி ரூபகாயஸிரீ ஸந்த³ஸ்ஸிதாதி வேதி³தப்³பா³.

க²ந்த⁴கேதி க²ந்தா⁴னம் ஸமூஹோ க²ந்த⁴கோ, க²ந்தா⁴னம் வா காயனதோ தீ³பனதோ க²ந்த⁴கோ. ‘‘க²ந்தா⁴’’தி சேத்த² பப்³ப³ஜ்ஜூபஸம்பதா³தி³வினயகம்மஸங்கா²தா, சாரித்தவாரித்தஸிக்கா²பத³ஸங்கா²தா ச பஞ்ஞத்தியோ அதி⁴ப்பேதா. பப்³ப³ஜ்ஜாதீ³னி ஹி ப⁴க³வதா பஞ்ஞத்தத்தா ‘‘பஞ்ஞத்தியோ’’தி வுச்சந்தி. பஞ்ஞத்தியஞ்ச க²ந்த⁴-ஸத்³தோ³ தி³ஸ்ஸதி ‘‘தா³ருக்க²ந்தோ⁴ (ஸம். நி. 4.241) அக்³கி³க்க²ந்தோ⁴ (படி. ம. 1.116) உத³கக்க²ந்தோ⁴’’திஆதீ³ஸு (அ. நி. 6.37) விய. அபிச பா⁴க³ராஸத்த²தா சேத்த² யுஜ்ஜதியேவ தாஸம் பஞ்ஞத்தீனம் பா⁴க³ஸோ, ராஸிதோ ச விப⁴த்தத்தா. தஸ்மிம் க²ந்த⁴கே. பி-ஸத்³தோ³ வுத்தாபேக்கா²ய பஞ்சஸதிகஸத்தஸதிகக்க²ந்த⁴கே த்³வே வஜ்ஜேத்வா பப்³ப³ஜ்ஜக்க²ந்த⁴காதி³கே பி⁴க்கு²னிக²ந்த⁴கபரியோஸானே வீஸதிவிதே⁴ க²ந்த⁴கே வுத்தவினிச்ச²யஸ்ஸ இத⁴ வக்க²மானத்தா. ததே³வ ஸந்தா⁴யாஹ ‘‘க²ந்த⁴கேபி பவக்கா²மி, ஸமாஸேன வினிச்ச²ய’’ந்தி.

2445. ‘‘மாதரா பிதரா’’தி இமினா ஜனகாயேவ அதி⁴ப்பேதா. ‘‘ப⁴ண்டு³கம்மம், ஸமணகரணம், பப்³பா³ஜனந்தி ச பரியாய-ஸத்³தா³’’தி ‘‘அனுஜானாமி, பி⁴க்க²வே, ஸங்க⁴ம் அபலோகேதும் ப⁴ண்டு³கம்மாயா’’தி (மஹாவ. 98) இமிஸ்ஸா பாளியா அட்ட²கதா²ய (மஹாவ. அட்ட². 98) வுத்தம். ஆபுச்சி²த்வாதி ஏத்த² ‘‘ஸங்க⁴’’ந்தி ஸேஸோ.

2446. வாவடோதி பஸுதோ, யுத்தபயுத்தோதி அத்தோ². ‘‘பப்³பா³ஜேத்வா ஆனய இதி சா’’தி பத³ச்சே²தோ³. ஏத்த² ச திதா⁴ பப்³பா³ஜனம் வேதி³தப்³ப³ம் கேஸச்சே²த³னம், காஸாயஅச்சா²த³னம், ஸரணதா³னந்தி, இமானி தீணி கரோந்தோ ‘‘பப்³பா³ஜேதீ’’தி வுச்சதி. தேஸு ஏகம், த்³வே வாபி கரோந்தோ ததா² வோஹரீயதியேவ. தஸ்மா ‘‘பப்³பா³ஜேத்வானயா’’தி இமினா கேஸே சி²ந்தி³த்வா காஸாயானி அச்சா²தே³த்வா ஆனேஹீதி அயமத்தோ² தீ³பிதோதி த³ட்ட²ப்³போ³.

2447. அவுத்தோதி உபஜ்ஜா²யேன அனுய்யோஜிதோ. ஸோ த³ஹரோ ஸசே தம் ஸயமேவ கேஸச்சே²த³னகாஸாயச்சா²த³னேஹி பப்³பா³ஜேதி, வட்டதீதி யோஜனா.

2448. தத்தா²தி அத்தனோ ஸமீபே. க²ண்ட³ஸீமம் நேத்வாதி ப⁴ண்டு³கம்மாரோசனபரிஹாரத்த²ம் வுத்தம். தேன ஸபி⁴க்கு²கே விஹாரே அஞ்ஞம்பி பி⁴க்கு²ம் ‘‘ஏதஸ்ஸ கேஸே சி²ந்தா³’’தி வத்தும் ந வட்டதி. பப்³பா³ஜேத்வாதி கேஸச்சே²த³னம் ஸந்தா⁴ய வத³தி.

2450. ‘‘புரிஸம் பி⁴க்கு²தோ அஞ்ஞோ, பப்³பா³ஜேதி ந வட்டதீ’’தி இத³ம் ஸரணதா³னம் ஸந்தா⁴ய வுத்தம். தேனேவாஹ ‘‘ஸாமணேரோ’’திஆதி³.

2451. உபி⁴ன்னம்பி தே²ரதே²ரீனம் ‘‘இமேஹி சீவரேஹி இமம் அச்சா²தே³ஹீ’’தி ஆணத்தியா ஸாமணேரோபி வா ஹோது, ததா² ஸாமணேரீ வா ஹோது, தே உபோ⁴ ஸாமணேரஸாமணேரீ காஸாயானி தா³தும் லப⁴ந்தீதி யோஜனா.

2452-4. பப்³பா³ஜேந்தேன பி⁴க்கு²னாதி ஏத்த² ‘‘தசபஞ்சககம்மட்டா²னம் த³த்வா’’தி வத்தப்³ப³ம் ஏவஞ்ஹி கத்வா கேஸாபனயனஸ்ஸ அட்ட²கதா²யம் வுத்தத்தா. வுத்தஞ்ஹி தத்த² ‘‘ஆவுஸோ, ஸுட்டு² உபதா⁴ரேஹி, ஸதிம் உபட்டா²பேஹீதி வத்வா தசபஞ்சககம்மட்டா²னம் ஆசிக்கி²தப்³ப³ம். ஆசிக்க²ந்தேன ச வண்ணஸண்டா²னக³ந்தா⁴ஸயோகாஸவஸேன அஸுசிஜேகு³ச்ச²படிக்கூலபா⁴வம், நிஜ்ஜீவனிஸ்ஸத்தபா⁴வம் வா பாகடம் கரோந்தேன ஆசிக்கி²தப்³ப³’’ந்திஆதி³. கிமத்த²மேவம் கரீயதீதி சே? ஸசே உபனிஸ்ஸயஸம்பன்னோ ஹோதி, தஸ்ஸ கு²ரக்³கே³யேவ அரஹத்தபாபுணனத்த²ம். வுத்தஞ்சேதம் அட்ட²கதா²யம் –

‘‘யே ஹி கேசி கு²ரக்³கே³ அரஹத்தம் பத்தா, ஸப்³பே³ தே ஏவரூபம் ஸவனம் லபி⁴த்வா கல்யாணமித்தேன ஆசரியேன தி³ன்னனயம் நிஸ்ஸாய, நோ அனிஸ்ஸாய, தஸ்மாஸ்ஸ ஆதி³தோவ ஏவரூபீ கதா² கதே²தப்³பா³’’தி (மஹாவ. அட்ட². 34).

ஏதேனேவ ப்³யதிரேகதோ இதோ அஞ்ஞா அனிய்யானிககதா² ந கதே²தப்³பா³தி தீ³பிதம் ஹோதி. கோ³மயாதி³னாதி கோ³மயசுண்ணாதி³னா. ஆதி³-ஸத்³தே³ன மத்திகாதீ³னம் க³ஹணம். பீளகா வாதி து²ல்லபீளகா வா. கச்சு² வாதி ஸுகு²மகச்சு² வா. நியம்புத்தந்தி அத்தனோ புத்தம். ‘‘பி⁴க்கு²னா’’தி இமஸ்ஸ பத³ஸ்ஸ தூ³ரத்தா ‘‘யதினா’’தி ஆஹ.

2455-6. கஸ்மா பன ஏவம் நஹாபேதப்³போ³தி ஆஹ ‘‘ஏத்தகேனாபீ’’திஆதி³. ஸோதி பப்³ப³ஜ்ஜாபேக்கோ². உபஜ்ஜா²யகாதி³ஸூதி ஏத்த² ஆதி³-ஸத்³தே³ன ஆசரியஸமானுபஜ்ஜா²யகாதீ³னம் க³ஹணம். பாபுணந்தி ஹீதி ஏத்த² ஹி-ஸத்³தோ³ யஸ்மா-பத³த்தே² வத்ததி. யஸ்மா ஏத்தகேனாபி உபஜ்ஜா²யாதீ³ஸு ஸகா³ரவோ ஹோதி, யஸ்மா ச ஏவரூபம் உபகாரம் லபி⁴த்வா குலபுத்தா உப்பன்னம் அனபி⁴ரதிம் படிவினோதே³த்வா ஸிக்கா²யோ பரிபூரேத்வா நிப்³பா³னம் பாபுணிஸ்ஸந்தி, தஸ்மா ஏவரூபோ உபகாரோ காதப்³போ³தி அத்தோ².

2458. ஏகதோதி ஸப்³பா³னி சீவரானி ஏகதோ கத்வா.

2459. அதா²தி அதி⁴காரந்தராரம்பே⁴ நிபாதோ. தஸ்ஸ ஹத்தே² அத³த்வாபி உபஜ்ஜா²யோ வா ஆசரியோ வாபி ஸயமேவ தம் பப்³ப³ஜ்ஜாபேக்க²ம் அச்சா²தே³தி, வட்டதீதி யோஜனா.

2460. அதி³ன்னசீவரஸ்ஸ அக்³க³ஹேதப்³ப³த்தா ஆஹ ‘‘அபனேத்வா ததோ ஸப்³ப³ம், புன தா³தப்³ப³மேவ த’’ந்தி. ததோதி தஸ்ஸ ஸரீரதோ. தந்தி சீவரம்.

2461-2. ஏததே³வ ஆஹ ‘‘பி⁴க்கு²னா’’திஆதி³னா. அதி³ன்னம் ந வட்டதீதி ஏத்த² பப்³ப³ஜ்ஜா ந ருஹதீதி வத³ந்தி. தஸ்ஸேவ ஸந்தகம் வாபி சீவரம் அதி³ன்னம் ந வட்டதி அத்தஸந்தகே ஆசரியுபஜ்ஜா²யானம் அத்தனோ ஸந்தகே சீவரே கா கதா² வத்தப்³ப³மேவ நத்தீ²தி அத்தோ². பி⁴க்கூ²தி யே தத்த² ஸன்னிபதிதா. காராபேத்வான உக்குடிந்தி ஏத்த² ஸப்³ப³தா⁴த்வத்தா²னுக³தோ கரோதி-ஸத்³தோ³ க³ஹிதோதி உக்குடிகம் நிஸீதா³பேத்வாதி அத்தோ² க³ஹேதப்³போ³, ‘‘உக்குடிக’’ந்தி (மஹாவ. அட்ட². 34) அட்ட²கதா²பாடோ² கா³தா²ப³ந்த⁴ஸுக²த்த²ம் இத⁴ க-காரலோபேன நித்³தி³ட்டோ².

2464. ஏகபத³ம் வாபீதி பு³த்³த⁴மிச்சாதி³கம் ஏகம்பி வா பத³ம். ஏகக்க²ரம்பி வாதி பு³காராதி³அக்க²ரேஸு ஏகம்பி வா அக்க²ரம். படிபாடிந்தி ‘‘பு³த்³த⁴’’மிச்சாதி³கம் பத³பந்திம்.

2465. அகத்தப்³ப³ப்பகாரந்தரம் த³ஸ்ஸேதுமாஹ ‘‘திக்க²த்தும் யதி³ வா’’திஆதி³. ததா² ஸேஸேஸூதி யதி³ வா ‘‘த⁴ம்மம் ஸரண’’ந்தி திக்க²த்தும் தே³தி, ‘‘ஸங்க⁴ம் ஸரண’’ந்தி யதி³ வா திக்க²த்தும் தே³தி, ஏவம்பி தீணி ஸரணானி அதி³ன்னானேவ ஹோந்தி.

2466. அனுனாஸிகந்தானி கத்வா தா³தப்³பா³னீதி ஸம்ப³ந்தோ⁴. அனுனாஸிகந்தம் கத்வா தா³னகாலே அந்தராவிச்சே²த³ம் அகத்வா தா³தப்³பா³னீதி த³ஸ்ஸேதும் ‘‘ஏகாப³த்³தா⁴னி வா பனா’’தி வுத்தம். விச்சி²ந்தி³த்வா பத³படிபாடிதோ ம-காரந்தம் கத்வா தா³னஸமயே விச்சே²த³ம் கத்வா. மந்தானீதி ‘‘பு³த்³த⁴ம் ஸரணம் இச்சாதி³னா ம-காரந்தானி. ‘‘பு³த்³த⁴ம் ஸரணம் க³ச்சா²மீ’’திஆதி³னா நயேன நிக்³க³ஹிதந்தமேவ கத்வா ந தா³தப்³ப³ந்தி ‘‘அதா²’’தி ஆஹ.

2467. ஸுத்³தி⁴ நாம ஆசரியஸ்ஸ ஞத்தியா, கம்மவாசாய ச உச்சாரணவிஸுத்³தி⁴. பப்³ப³ஜ்ஜாதி ஸாமணேரஸாமணேரிபப்³ப³ஜ்ஜா. உப⁴தோஸுத்³தி⁴யா வினாதி உப⁴தோஸுத்³தி⁴ம் வினா ஆசரியந்தேவாஸீனம் உபி⁴ன்னம் தீஸு ஸரணத்தயதா³னக்³க³ஹணேஸு உச்சாரணஸுத்³தி⁴ம் வினா, ஏகஸ்ஸாபி அக்க²ரஸ்ஸ விபத்திஸப்³பா⁴வே ந ஹோதீதி அத்தோ².

2468-9. ‘‘பப்³ப³ஜ்ஜாகு³ணமிச்ச²தா’’தி இத³ம் ‘‘ஆசரியேன, அந்தேவாஸிகேனா’’தி பத³த்³வயஸ்ஸ விஸேஸனம் த³ட்ட²ப்³ப³ம், அந்தேவாஸிகஸ்ஸ பப்³ப³ஜ்ஜாகு³ணம் இச்ச²ந்தேன ஆசரியேன, அத்தனோ பப்³ப³ஜ்ஜாகு³ணம் இச்ச²ந்தேன அந்தேவாஸிகேன ச பு³-த்³த⁴-காராத³யோ வண்ணா பு³-கார த⁴-காராத³யோ வண்ணா அக்க²ரா டா²னகரணஸம்பத³ம் கண்ட²தாலுமுத்³த⁴த³ந்தஓட்ட²னாஸிகாபே⁴த³ம் டா²னஸம்பத³ஞ்ச அக்க²ருப்பத்திஸாத⁴கதமஜிவ்ஹாமஜ்ஜா²தி³கரணஸம்பத³ஞ்ச அஹாபேந்தேன அபரிஹாபேந்தேன வத்தப்³பா³தி யோஜனா. கஸ்மா இத³மேவ த³ள்ஹம் கத்வா வுத்தந்தி ஆஹ ‘‘ஏகவண்ணவினாஸேனா’’திஆதி³. ஹி-ஸத்³தோ³ யஸ்மா-பத³த்தே², யஸ்மா ஏகஸ்ஸாபி வண்ணஸ்ஸ வினாஸேன அனுச்சாரணேன வா து³ருச்சாரணேன வா பப்³ப³ஜ்ஜா ந ருஹதி, தஸ்மா ஏவம் வுத்தந்தி அதி⁴ப்பாயோ.

2470. யதி³ ஸித்³தா⁴தி ஸாஸங்கவசனேன உப⁴தோஉச்சாரணஸுத்³தி⁴யா து³க்கரத்தம் தீ³பேத்வா ‘‘அப்பமத்தேஹி ப⁴விதப்³ப³’’ந்தி உபி⁴ன்னம் ஆசரியந்தேவாஸிகானம் அனுஸிட்டி² தி³ன்னா ஹோதி. ஸரணக³மனதோவாதி அவதா⁴ரணேன ஸாமணேரபப்³ப³ஜ்ஜா உபஸம்பதா³ விய ஞத்திசதுத்தே²ன கம்மேன ந ஹோதி, இதா³னிபி ஸரணக³மனேனேவ ஸிஜ்ஜ²தீதி தீ³பேதி. ஹி-ஸத்³தோ³ பஸித்³தி⁴யம். யதா²ஹ –

‘‘யஸ்மா ஸரணக³மனேன உபஸம்பதா³ பரதோ படிக்கி²த்தா, தஸ்மா ஸா ஏதரஹி ஸரணக³மனமத்தேனேவ ந ருஹதி. ஸாமணேரஸ்ஸ பப்³ப³ஜ்ஜா பன யஸ்மா பரதோபி ‘அனுஜானாமி, பி⁴க்க²வே, இமேஹி தீஹி ஸரணக³மனேஹி ஸாமணேரபப்³ப³ஜ்ஜ’ந்தி (மஹாவ. 105) அனுஞ்ஞாதா ஏவ, தஸ்மா ஸா ஏதரஹிபி ஸரணக³மனமத்தேனேவ ருஹதீ’’தி (மஹாவ. அட்ட². 34).

ஸரணக³மனதோ ஏவ பப்³ப³ஜ்ஜா யதி³பி கிஞ்சாபி ஸித்³தா⁴ நிப்ப²ன்னா, ததா²பி அஸ்ஸ ஸாமணேரஸ்ஸ ‘‘இத³ஞ்சித³ஞ்ச மயா பூரேதப்³ப³ம் ஸீல’’ந்தி ஞத்வா பரிபூரணத்தா²ய பி⁴க்கு²னா த³ஸ ஸீலானி தா³தப்³பா³னீதி யோஜனா. யதா²ஹ ‘‘அனுஜானாமி, பி⁴க்க²வே, ஸாமணேரானம் த³ஸ ஸிக்கா²பதா³னி, தேஸு ச ஸாமணேரேஹி ஸிக்கி²தும். பாணாதிபாதா வேரமணீ’’திஆதி³ (மஹாவ. 106).

பப்³ப³ஜ்ஜாகதா²வண்ணனா.

2471. உபஜ்ஜா²யந்தி வஜ்ஜாவஜ்ஜே உபனிஜ்ஜா²யதீதி உபஜ்ஜா²யோ, தம், ப⁴க³வதா வுத்தேஹி அங்கே³ஹி ஸமன்னாக³தோ பரிபுண்ணத³ஸவஸ்ஸோ புக்³க³லோ. நிவாஸேத்வா ச பாருபித்வா ச ஸிரஸி அஞ்ஜலிம் பக்³க³ஹேத்வா அத்தனோ அபி⁴முகே² உக்குடிகம் நிஸீதி³த்வா ‘‘உபஜ்ஜா²யோ மே, ப⁴ந்தே, ஹோஹீ’’தி திக்க²த்தும் வத்வா ஆயாசனாய கதாய ‘‘ஸாஹு, லஹு, ஓபாயிகம், படிரூபம், பாஸாதி³கேன ஸம்பாதே³ஹீ’’தி இமேஸு பஞ்சஸு பதே³ஸு அஞ்ஞதரம் காயேன வா வாசாய வா உப⁴யேன வா விஞ்ஞாபேத்வா தஸ்மிம் ஸம்படிச்சி²தே பிதுட்டா²னே ட²த்வா அத்ரஜமிவ தம் க³ஹேத்வா வஜ்ஜாவஜ்ஜம் உபபரிக்கி²த்வா தோ³ஸேன நிக்³க³ண்ஹித்வா ஸத்³தி⁴விஹாரிகே ஸிக்கா²பேந்தோ உபஜ்ஜா²யோ நாம.

விஜ்ஜாஸிப்பம், ஆசாரஸமாசாரம் வா ஸிக்கி²துகாமேஹி ஆத³ரேன சரிதப்³போ³ உபட்டா²தப்³போ³தி ஆசரியோ, தம், உபஜ்ஜா²யே வுத்தலக்க²ணஸமன்னாக³தோயேவ புக்³க³லோ. வுத்தனயேனேவ நிஸீதி³த்வா ‘‘ஆசரியோ மே, ப⁴ந்தே, ஹோஹி, ஆயஸ்மதோ நிஸ்ஸாய வச்சா²மீ’’தி திக்க²த்தும் வத்வா ஆயாசனாய கதாய ‘‘ஸாஹூ’’திஆதீ³ஸு பஞ்சஸு அஞ்ஞதரம் வத்வா தஸ்மிம் ஸம்படிச்சி²தே பிதுட்டா²னே ட²த்வா புத்தட்டா²னியம் அந்தேவாஸிம் ஸிக்கா²பேந்தோ ஆசரியோ நாம.

ஏத்த² ச ஸாஹூதி ஸாது⁴. லஹூதி அக³ரு, மம துய்ஹம் உபஜ்ஜா²யபா⁴வே பா⁴ரியம் நத்தீ²தி அத்தோ². ஓபாயிகந்தி உபாயபடிஸம்யுத்தம், தம் உபஜ்ஜா²யக்³க³ஹணம் இமினா உபாயேன த்வம் மே இதோ பட்டா²ய பா⁴ரோ ஜாதோஸீதி வுத்தம் ஹோதி. படிரூபந்தி அனுரூபம் தே உபஜ்ஜா²யக்³க³ஹணந்தி அத்தோ². பாஸாதி³கேனாதி பஸாதா³வஹேன காயவசீபயோகே³ன. ஸம்பாதே³ஹீதி திவித⁴ம் ஸிக்க²ம் நிப்பா²தே³ஹீதி அத்தோ². காயேன வாதி ஹத்த²முத்³தா³தி³ம் த³ஸ்ஸேந்தோ காயேன வா. நாமவிஸேஸம் வினா பூரேதப்³ப³வத்தானம் ஸமதாய உபோ⁴பி ஏகதோ வுத்தா.

ஏதானி வத்தானி உபஜ்ஜா²யஸ்ஸ ஸத்³தி⁴விஹாரிகேன, ஆசரியஸ்ஸ அந்தேவாஸிகேனாபி ஏவமேவ காதப்³பா³னேவாதி. வஸதாதி வஸந்தேன. பியஸீலேனாதி பியம் ஸீலமேதஸ்ஸாதி பியஸீலோ, தேன, ஸீலம் பரிபூரிதுகாமேனாதி வுத்தம் ஹோதி.

2472-3. ஆஸனம் பஞ்ஞபேதப்³ப³ந்தி ஏத்த² ‘‘காலஸ்ஸேவ வுட்டா²ய உபாஹனா ஓமுஞ்சித்வா ஏகம்ஸம் உத்தராஸங்க³ம் கரித்வா’’தி (மஹாவ. 66) வுத்தா புப்³ப³கிரியா வத்தப்³பா³. ஆஸனம் பஞ்ஞபேதப்³ப³ந்தி த³ந்தகட்ட²கா²த³னட்டா²னம் ஸம்மஜ்ஜித்வா நிஸீத³னத்தா²ய ஆஸனம் பஞ்ஞபேதப்³ப³ம். இமினா ச யாகு³பானட்டா²னாதீ³ஸுபி ஆஸனானி பஞ்ஞபேதப்³பா³னேவாதி த³ஸ்ஸிதம் ஹோதி.

த³ந்தகட்ட²ம் தா³தப்³ப³ந்தி மஹந்தம், மஜ்ஜி²மம், கு²த்³த³கந்தி தீணி த³ந்தகட்டா²னி உபனேத்வா ததோ யம் தீணி தி³வஸானி க³ண்ஹாதி, சதுத்த²தி³வஸதோ பட்டா²ய தாதி³ஸமேவ தா³தப்³ப³ம். ஸசே அனியமம் கத்வா யம் வா தம் வா க³ண்ஹாதி, அத² யாதி³ஸம் லப⁴தி, தாதி³ஸம் தா³தப்³ப³ம்.

முகோ²த³கம் தா³தப்³ப³ந்தி முக²தோ⁴வனோத³கம் முகோ²த³கந்தி மஜ்ஜே²பத³லோபீஸமாஸோ, தம் தே³ந்தேன ஸீதஞ்ச உண்ஹஞ்ச உத³கம் உபனேத்வா ததோ யம் தீணி தி³வஸானி வளஞ்ஜேதி, சதுத்த²தி³வஸதோ பட்டா²ய தாதி³ஸமேவ முக²தோ⁴வனோத³கம் தா³தப்³ப³ம். ஸசே அனியமம் கத்வா யம் வா தம் வா க³ண்ஹாதி, அத² யாதி³ஸம் லப⁴தி, தாதி³ஸம் தா³தப்³ப³ம். ஸசே து³வித⁴ம்பி வளஞ்ஜேதி, து³வித⁴ம்பி உபனேதப்³ப³ம். ‘‘முகோ²த³கம் முக²தோ⁴வனட்டா²னே ட²பேத்வா அவஸேஸட்டா²னானி ஸம்மஜ்ஜிதப்³பா³னி. ஸம்மஜ்ஜந்தேன ச வச்சகுடிதோ பட்டா²ய ஸம்மஜ்ஜிதப்³ப³ம். தே²ரே வச்சகுடிம் க³தே பரிவேணம் ஸம்மஜ்ஜிதப்³ப³ம், ஏவம் பரிவேணம் அஸுஞ்ஞம் ஹோதீ’’தி அட்ட²கதா²யம் (மஹாவ. அட்ட². 64 அத்த²தோ ஸமானம்) வுத்தனயேனேவ ஸம்மஜ்ஜிதப்³ப³ம்.

ததோ உத்தரிம் கத்தப்³ப³ம் த³ஸ்ஸேதுமாஹ ‘‘தஸ்ஸ காலேனா’’திஆதி³. தஸ்ஸாதி உபஜ்ஜா²யஸ்ஸ வா ஆசரியஸ்ஸ வா. காலேனாதி யாகு³பானகாலே. இதா⁴பி ‘‘ஆஸனம் பஞ்ஞபேதப்³ப³’’ந்தி ஸேஸோ. யதா²ஹ ‘‘தே²ரே வச்சகுடிதோ அனிக்க²ந்தேயேவ ஆஸனம் பஞ்ஞபேதப்³ப³ம். ஸரீரகிச்சம் கத்வா ஆக³ந்த்வா தஸ்மிம் நிஸின்னஸ்ஸ ‘ஸசே யாகு³ ஹோதீ’திஆதி³னா நயேன வுத்தம் வத்தம் காதப்³ப³’’ந்தி (மஹாவ. அட்ட². 64).

யாகு³ தஸ்ஸுபனேதப்³பா³தி ஏத்த² ‘‘பா⁴ஜனம் தோ⁴வித்வா’’தி ஸேஸோ. யதா²ஹ – ‘‘பா⁴ஜனம் தோ⁴வித்வா யாகு³ உபனாமேதப்³பா³’’தி (மஹாவ. 66). ஸங்க⁴தோ வாதி ஸலாகாதி³வஸேன ஸங்க⁴தோ லப்³ப⁴மானா வா. குலதோபி வாதி உபாஸகாதி³குலதோ வா.

‘‘பத்தே வத்தஞ்ச காதப்³ப³’’ந்தி இத³ம் ‘‘யாகு³ம் பீதஸ்ஸ உத³கம் த³த்வா பா⁴ஜனம் படிக்³க³ஹேத்வா நீசம் கத்வா ஸாது⁴கம் அப்படிக⁴ம்ஸந்தேன தோ⁴வித்வா படிஸாமேதப்³ப³ம், உபஜ்ஜா²யம்ஹி வுட்டி²தே ஆஸனம் உத்³த⁴ரிதப்³ப³ம். ஸசே ஸோ தே³ஸோ உக்லாபோ ஹோதி, ஸோ தே³ஸோ ஸம்மஜ்ஜிதப்³போ³’’தி (மஹாவ. 66) ஆக³தவத்தம் ஸந்தா⁴யாஹ. தி³வா பு⁴த்தபத்தேபி காதப்³ப³ம் ஏதேனேவ த³ஸ்ஸிதம் ஹோதி.

வத்தம் ‘‘கா³மப்பவேஸனே’’தி இத³ம் ‘‘ஸசே உபஜ்ஜா²யோ கா³மம் பவிஸிதுகாமோ ஹோதி, நிவாஸனம் தா³தப்³ப³ம், படினிவாஸனம் படிக்³க³ஹேதப்³ப³’’ந்திஆதி³னயப்பவத்தம் (மஹாவ. 66) வத்தம் ஸந்தா⁴யாஹ. ‘‘காதப்³ப³’’ந்தி இத³ம் ஸப்³ப³பதே³ஹி யோஜேதப்³ப³ம்.

2474. சீவரே யானி வத்தானீதி கா³மம் பவிஸிதுகாமஸ்ஸ சீவரதா³னே, படினிவத்தஸ்ஸ சீவரக்³க³ஹணஸங்க⁴ரணபடிஸாமனேஸு மஹேஸினா யானி வத்தானி வுத்தானி, தானி ச காதப்³பா³னி. ஸேனாஸனே ததா²தி ‘‘யஸ்மிம் விஹாரே உபஜ்ஜா²யோ விஹரதீ’’திஆதி³னா (மஹாவ. 66) வுத்தனயேன ‘‘ஸேனாஸனே கத்தப்³ப³’’ந்தி த³ஸ்ஸிதம் ஸேனாஸனவத்தஞ்ச.

பாத³பீட²கத²லிகாதீ³ஸு ததா²தி யோஜனா. உபஜ்ஜா²யே கா³மதோ படினிவத்தே ச ஜந்தாக⁴ரே ச ‘‘பாதோ³த³கம் பாத³பீட²ம் பாத³கத²லிகம் உபனிக்கி²பிதப்³ப³’’ந்தி (மஹாவ. 66) ஏவமாக³தம் வத்தஞ்ச காதப்³ப³ம். ஆதி³-ஸத்³தே³ன ‘‘உபஜ்ஜா²யோ பானீயேன புச்சி²தப்³போ³’’திஆதி³வத்தம் (மஹாவ. 66) ஸங்க³ண்ஹாதி.

2475. ஏவம் ஸப்³ப³த்த² வத்தேஸு பாடியேக்கம் த³ஸ்ஸியமானேஸு பபஞ்சோதி க²ந்த⁴கம் ஓலோகேத்வா ஸுக²க்³க³ஹணத்தா²ய க³ணனம் த³ஸ்ஸேதுகாமோ ஆஹ ‘‘ஏவமாதீ³னீ’’திஆதி³. ரோக³தோ வுட்டா²னாக³மனந்தானீதி ஆசரியுபஜ்ஜா²யானம் ரோக³தோ வுட்டா²னாக³மனபரியோஸானானி. ஸத்ததிம்ஸஸதம் ஸியுந்தி ஸத்ததிம்ஸாதி⁴கஸதவத்தானீதி அத்தோ².

தானி பன வத்தானி க²ந்த⁴கபாளியா (மஹாவ. 66) ஆக³தக்கமேன ஏவம் யதா²வுத்தக³ணனாய ஸமானேதப்³பா³னி – த³ந்தகட்ட²தா³னம், முகோ²த³கதா³னம், ஆஸனபஞ்ஞாபனம், ஸசே யாகு³ ஹோதி, பா⁴ஜனம் தோ⁴வித்வா யாகு³யா உபனாமனம், யாகு³ம் பீதஸ்ஸ உத³கம் த³த்வா பா⁴ஜனம் படிக்³க³ஹேத்வா நீசம் கத்வா ஸாது⁴கம் அப்படிக⁴ம்ஸந்தேன தோ⁴வித்வா படிஸாமனம், உபஜ்ஜா²யம்ஹி வுட்டி²தே ஆஸனஸ்ஸ உத்³த⁴ரணம், ஸசே ஸோ தே³ஸோ உக்லாபோ ஹோதி, தஸ்ஸ ஸம்மஜ்ஜனம், ஸசே உபஜ்ஜா²யோ கா³மம் பவிஸிதுகாமோ ஹோதி, தஸ்ஸ நிவாஸனதா³னம், படினிவாஸனபடிக்³க³ஹணம், காயப³ந்த⁴னதா³னம், ஸகு³ணம் கத்வா ஸங்கா⁴டிதா³னம், தோ⁴வித்வா ஸோத³கபத்தஸ்ஸ தா³னம், ஸசே உபஜ்ஜா²யோ பச்சா²ஸமணம் ஆகங்க²தி, திமண்ட³லம் படிச்சா²தே³ந்தேன பரிமண்ட³லம் நிவாஸேத்வா காயப³ந்த⁴னம் ப³ந்தி⁴த்வா ஸகு³ணம் கத்வா ஸங்கா⁴டியோ பாருபித்வா க³ண்டி²கம் பரிமுஞ்சித்வா தோ⁴வித்வா பத்தம் க³ஹேத்வா உபஜ்ஜா²யஸ்ஸ பச்சா²ஸமணேன க³மனம், நாதிதூ³ரனச்சாஸன்னே க³மனம், பத்தபரியாபன்னஸ்ஸ படிக்³க³ஹணம், ந உபஜ்ஜா²யஸ்ஸ ப⁴ணமானஸ்ஸ அந்தரந்தரா கதா²ஓபாதனம், உபஜ்ஜா²யஸ்ஸ ஆபத்திஸாமந்தா ப⁴ணமானஸ்ஸ ச நிவாரணம், நிவத்தந்தேன பட²மதரம் ஆக³ந்த்வா ஆஸனபஞ்ஞாபனம், பாதோ³த³கபாத³பீட²பாத³கத²லிகானம் உபனிக்கி²பனம், பச்சுக்³க³ந்த்வா பத்தசீவரபடிக்³க³ஹணம், படினிவாஸனதா³னம், நிவாஸனபடிக்³க³ஹணம், ஸசே சீவரம் ஸின்னம் ஹோதி, முஹுத்தம் உண்ஹே ஓதாபனம், நேவ உண்ஹே சீவரஸ்ஸ நித³ஹனம், மஜ்ஜே² யதா² ப⁴ங்கோ³ ந ஹோதி, ஏவம் சதுரங்கு³லம் கண்ணம் உஸ்ஸாரேத்வா சீவரஸ்ஸ ஸங்க⁴ரணம், ஓபோ⁴கே³ காயப³ந்த⁴னஸ்ஸ கரணம், ஸசே பிண்ட³பாதோ ஹோதி, உபஜ்ஜா²யோ ச பு⁴ஞ்ஜிதுகாமோ ஹோதி, உத³கம் த³த்வா பிண்ட³பாதஸ்ஸ உபனாமனம், உபஜ்ஜா²யஸ்ஸ பானீயேன புச்ச²னம், பு⁴த்தாவிஸ்ஸ உத³கம் த³த்வா பத்தம் படிக்³க³ஹேத்வா நீசம் கத்வா ஸாது⁴கம் அப்படிக⁴ம்ஸந்தேன தோ⁴வித்வா வோத³கம் கத்வா முஹுத்தம் உண்ஹே ஓதாபனம், ந ச உண்ஹே பத்தஸ்ஸ நித³ஹனம், பத்தசீவரம் நிக்கி²பிதப்³ப³ம் –

பத்தம் நிக்கி²பந்தேன ஏகேன ஹத்தே²ன பத்தம் க³ஹேத்வா ஏகேன ஹத்தே²ன ஹேட்டா²மஞ்சம் வா ஹேட்டா²பீட²ம் வா பராமஸித்வா பத்தஸ்ஸ நிக்கி²பனம், ந ச அனந்தரஹிதாய பூ⁴மியா பத்தஸ்ஸ நிக்கி²பனம், சீவரம் நிக்கி²பந்தேன ஏகேன ஹத்தே²ன சீவரம் க³ஹேத்வா ஏகேன ஹத்தே²ன சீவரவம்ஸம் வா சீவரரஜ்ஜும் வா பமஜ்ஜித்வா பாரதோ அந்தம் ஓரதோ போ⁴க³ம் கத்வா சீவரஸ்ஸ நிக்கி²பனம், உபஜ்ஜா²யம்ஹி வுட்டி²தே ஆஸனஸ்ஸ உத்³த⁴ரணம், பாதோ³த³கபாத³பீட²பாத³கத²லிகானம் படிஸாமனம், ஸசே ஸோ தே³ஸோ உக்லாபோ ஹோதி, தஸ்ஸ ஸம்மஜ்ஜனம், ஸசே உபஜ்ஜா²யோ ந்ஹாயிதுகாமோ ஹோதி, ந்ஹானஸ்ஸ படியாத³னம், ஸசே ஸீதேன அத்தோ² ஹோதி, ஸீதஸ்ஸ ஸசே உண்ஹேன அத்தோ² ஹோதி, உண்ஹஸ்ஸ படியாத³னம், ஸசே உபஜ்ஜா²யோ ஜந்தாக⁴ரம் பவிஸிதுகாமோ ஹோதி, சுண்ணஸ்ஸ ஸன்னயனம், மத்திகாதேமனம், ஜந்தாக⁴ரபீட²ம் ஆதா³ய உபஜ்ஜா²யஸ்ஸ பிட்டி²தோ பிட்டி²தோ க³ந்த்வா ஜந்தாக⁴ரபீட²ம் த³த்வா சீவரம் படிக்³க³ஹேத்வா ஏகமந்தம் நிக்கி²பனம், சுண்ணதா³னம், மத்திகாதா³னம், ஸசே உஸ்ஸஹதி, ஜந்தாக⁴ரம் பவிஸிதப்³ப³ம் –

ஜந்தாக⁴ரம் பவிஸந்தேன மத்திகாய முக²ம் மக்கே²த்வா புரதோ ச பச்ச²தோ ச படிச்சா²தே³த்வா ஜந்தாக⁴ரப்பவேஸோ, ந தே²ரானம் பி⁴க்கூ²னம் அனுபக²ஜ்ஜ நிஸீத³னம், ந நவானம் பி⁴க்கூ²னம் ஆஸனேன படிபா³ஹனம், ஜந்தாக⁴ரே உபஜ்ஜா²யஸ்ஸ பரிகம்மஸ்ஸ கரணம், ஜந்தாக⁴ரா நிக்க²மந்தேன ஜந்தாக⁴ரபீட²ம் ஆதா³ய புரதோ ச பச்ச²தோ ச படிச்சா²தே³த்வா ஜந்தாக⁴ரா நிக்க²மனம், உத³கேபி உபஜ்ஜா²யஸ்ஸ பரிகம்மகரணம், ந்ஹாதேன பட²மதரம் உத்தரித்வா அத்தனோ க³த்தம் வோத³கம் கத்வா நிவாஸேத்வா உபஜ்ஜா²யஸ்ஸ க³த்ததோ உத³கஸ்ஸ பமஜ்ஜனம், நிவாஸனதா³னம், ஸங்கா⁴டிதா³னம், ஜந்தாக⁴ரபீட²ம் ஆதா³ய பட²மதரம் ஆக³ந்த்வா ஆஸனஸ்ஸ பஞ்ஞாபனம், பாதோ³த³கபாத³பீட²பாத³கத²லிகானம் உபனிக்கி²பனம், உபஜ்ஜா²யஸ்ஸ பானீயேன புச்ச²னம், ஸசே உத்³தி³ஸாபேதுகாமோ ஹோதி, உத்³தி³ஸாபனம், ஸசே பரிபுச்சி²துகாமோ ஹோதி, பரிபுச்ச²னம், யஸ்மிம் விஹாரே உபஜ்ஜா²யோ விஹரதி, ஸசே ஸோ விஹாரோ உக்லாபோ ஹோதி, ஸசே உஸ்ஸஹதி, தஸ்ஸ ஸோத⁴னம், விஹாரம் ஸோதே⁴ந்தேன பட²மம் பத்தசீவரஸ்ஸ நீஹரித்வா ஏகமந்தம் நிக்கி²பனம், நிஸீத³னபச்சத்த²ரணஸ்ஸ நீஹரித்வா ஏகமந்தம் நிக்கி²பனம், பி⁴ஸிபி³ப்³போ³ஹனஸ்ஸ நீஹரித்வா ஏகமந்தம் நிக்கி²பனம், மஞ்சஸ்ஸ நீசம் கத்வா ஸாது⁴கம் அப்படிக⁴ம்ஸந்தேன அஸங்க⁴ட்டேந்தேன கவாடபீட²ம் நீஹரித்வா ஏகமந்தம் நிக்கி²பனம், பீட²ஸ்ஸ நீசம் கத்வா ஸாது⁴கம் அப்படிக⁴ம்ஸந்தேன அஸங்க⁴ட்டேந்தேன கவாடபீட²ம் நீஹரித்வா ஏகமந்தம் நிக்கி²பனம், மஞ்சபடிபாத³கானம் நீஹரித்வா ஏகமந்தம் நிக்கி²பனம், கே²ளமல்லகஸ்ஸ நீஹரித்வா ஏகமந்தம் நிக்கி²பனம், அபஸ்ஸேனப²லகஸ்ஸ நீஹரித்வா ஏகமந்தம் நிக்கி²பனம், பூ⁴மத்த²ரணஸ்ஸ யதா²பஞ்ஞத்தஸ்ஸ ஸல்லக்கே²த்வா நீஹரித்வா ஏகமந்தம் நிக்கி²பனம், ஸசே விஹாரே ஸந்தானகம் ஹோதி, உல்லோகா பட²மம் ஓஹாரணம், ஆலோகஸந்தி⁴கண்ணபா⁴கா³னம் பமஜ்ஜனம், ஸசே கே³ருகபரிகம்மகதா பி⁴த்தி கண்ணகிதா ஹோதி, சோளகம் தேமேத்வா பீளேத்வா பமஜ்ஜனம், ஸசே காளவண்ணகதா பூ⁴மி கண்ணகிதா ஹோதி, சோளகம் தேமேத்வா பீளேத்வா பமஜ்ஜனம், ஸசே அகதா ஹோதி பூ⁴மி, உத³கேன பரிப்போ²ஸித்வா பமஜ்ஜனம் ‘‘மா விஹாரோ ரஜேன உஹஞ்ஞீ’’தி, ஸங்காரம் விசினித்வா ஏகமந்தம் ச²ட்³ட³னம், பூ⁴மத்த²ரணஸ்ஸ ஓதாபேத்வா ஸோதே⁴த்வா பப்போ²டேத்வா அதிஹரித்வா யதா²பஞ்ஞத்தம் பஞ்ஞாபனம், மஞ்சபடிபாத³கானம் ஓதாபேத்வா பமஜ்ஜித்வா அதிஹரித்வா யதா²ட்டா²னே ட²பனம், மஞ்சஸ்ஸ ஓதாபேத்வா ஸோதே⁴த்வா பப்போ²டேத்வா நீசம் கத்வா ஸாது⁴கம் அப்படிக⁴ம்ஸந்தேன அஸங்க⁴ட்டேந்தேன கவாடபீட²ம் அதிஹரித்வா யதா²பஞ்ஞத்தம் பஞ்ஞாபனம், பீட²ஸ்ஸ ஓதாபேத்வா ஸோதே⁴த்வா பப்போ²டேத்வா நீசம் கத்வா ஸாது⁴கம் அப்படிக⁴ம்ஸந்தேன அஸங்க⁴ட்டேந்தேன கவாடபீட²ம் அதிஹரித்வா யதா²பஞ்ஞத்தம் பஞ்ஞாபனம், பி⁴ஸிபி³ப்³போ³ஹனஸ்ஸ ஓதாபேத்வா ஸோதே⁴த்வா பப்போ²டேத்வா அதிஹரித்வா யதா²பஞ்ஞத்தம் பஞ்ஞாபனம், நிஸீத³னபச்சத்த²ரணஸ்ஸ ஓதாபேத்வா ஸோதே⁴த்வா பப்போ²டேத்வா அதிஹரித்வா யதா²பஞ்ஞத்தம் பஞ்ஞாபனம், கே²ளமல்லகஸ்ஸ ஓதாபேத்வா பமஜ்ஜித்வா அதிஹரித்வா யதா²ட்டா²னே ட²பனம், அபஸ்ஸேனப²லகஸ்ஸ ஓதாபேத்வா பமஜ்ஜித்வா அதிஹரித்வா யதா²ட்டா²னே ட²பனம், பத்தசீவரம் நிக்கி²பிதப்³ப³ம் –

பத்தம் நிக்கி²பந்தேன ஏகேன ஹத்தே²ன பத்தம் க³ஹேத்வா ஏகேன ஹத்தே²ன ஹேட்டா²மஞ்சம் வா ஹேட்டா²பீட²ம் வா பராமஸித்வா பத்தஸ்ஸ நிக்கி²பனம், ந ச அனந்தரஹிதாய பூ⁴மியா பத்தஸ்ஸ நிக்கி²பனம், சீவரம் நிக்கி²பந்தேன ஏகேன ஹத்தே²ன சீவரம் க³ஹேத்வா ஏகேன ஹத்தே²ன சீவரவம்ஸம் வா சீவரரஜ்ஜும் வா பமஜ்ஜித்வா பாரதோ அந்தம் ஓரதோ போ⁴க³ம் கத்வா சீவரஸ்ஸ நிக்கி²பனம், ஸசே புரத்தி²மாய ஸரஜா வாதா வாயந்தி, புரத்தி²மானம் வாதபானானம் த²கனம், ததா² பச்சி²மானம், ததா² உத்தரானம், ததா² த³க்கி²ணானம் வாதபானானம் த²கனம், ஸசே ஸீதகாலோ ஹோதி, தி³வா வாதபானானம் விவரணம், ரத்திம் த²கனம், ஸசே உண்ஹகாலோ ஹோதி, தி³வா வாதபானானம் த²கனம், ரத்திம் விவரணம், ஸசே பரிவேணம் உக்லாபம் ஹோதி, பரிவேணஸ்ஸ ஸம்மஜ்ஜனம், ஸசே கோட்ட²கோ உக்லாபோ ஹோதி, கோட்ட²கஸ்ஸ ஸம்மஜ்ஜனம், ஸசே உபட்டா²னஸாலா உக்லாபா ஹோதி, தஸ்ஸா ஸம்மஜ்ஜனம், ஸசே அக்³கி³ஸாலா உக்லாபா ஹோதி, தஸ்ஸா ஸம்மஜ்ஜனம், ஸசே வச்சகுடி உக்லாபா ஹோதி, தஸ்ஸா ஸம்மஜ்ஜனம், ஸசே பானீயம் ந ஹோதி, பானீயஸ்ஸ உபட்டா²பனம், ஸசே பரிபோ⁴ஜனீயம் ந ஹோதி, பரிபோ⁴ஜனீயஸ்ஸ உபட்டா²பனம், ஸசே ஆசமனகும்பி⁴யா உத³கம் ந ஹோதி, ஆசமனகும்பி⁴யா உத³கஸ்ஸ ஆஸிஞ்சனம், ஸசே உபஜ்ஜா²யஸ்ஸ அனபி⁴ரதி உப்பன்னா ஹோதி, ஸத்³தி⁴விஹாரிகேன வூபகாஸனம் வூபகாஸாபனம் வா, த⁴ம்மகதா²ய வா தஸ்ஸ கரணம், ஸசே உபஜ்ஜா²யஸ்ஸ குக்குச்சம் உப்பன்னம் ஹோதி, ஸத்³தி⁴விஹாரிகேன வினோத³னம் வினோதா³பனம் வா, த⁴ம்மகதா²ய வா தஸ்ஸ கரணம், ஸசே உபஜ்ஜா²யஸ்ஸ தி³ட்டி²க³தம் உப்பன்னம் ஹோதி, ஸத்³தி⁴விஹாரிகேன விவேசனம் விவேசாபனம் வா, த⁴ம்மகதா²ய வா தஸ்ஸ கரணம், ஸசே உபஜ்ஜா²யோ க³ருத⁴ம்மம் அஜ்ஜா²பன்னோ ஹோதி பரிவாஸாரஹோ, ஸத்³தி⁴விஹாரிகேன உஸ்ஸுக்ககரணம் ‘‘கிந்தி நு கோ² ஸங்கோ⁴ உபஜ்ஜா²யஸ்ஸ பரிவாஸம் த³தே³ய்யா’’தி, ஸசே உபஜ்ஜா²யோ மூலாயபடிகஸ்ஸனாரஹோ ஹோதி, ஸத்³தி⁴விஹாரிகேன உஸ்ஸுக்ககரணம் ‘‘கிந்தி நு கோ² ஸங்கோ⁴ உபஜ்ஜா²யம் மூலாய படிகஸ்ஸேய்யா’’தி, ஸசே உபஜ்ஜா²யோ மானத்தாரஹோ ஹோதி, ஸத்³தி⁴விஹாரிகேன உஸ்ஸுக்ககரணம் ‘‘கிந்தி நு கோ² ஸங்கோ⁴ உபஜ்ஜா²யஸ்ஸ மானத்தம் த³தே³ய்யா’’தி, ஸசே உபஜ்ஜா²யோ அப்³பா⁴னாரஹோ ஹோதி, ஸத்³தி⁴விஹாரிகேன உஸ்ஸுக்ககரணம் ‘‘கிந்தி நு கோ² ஸங்கோ⁴ உபஜ்ஜா²யம் அப்³பே⁴ய்யா’’தி, ஸசே ஸங்கோ⁴ உபஜ்ஜா²யஸ்ஸ கம்மம் கத்துகாமோ ஹோதி தஜ்ஜனீயம் வா நியஸ்ஸம் வா பப்³பா³ஜனீயம் வா படிஸாரணீயம் வா உக்கே²பனீயம் வா, ஸத்³தி⁴விஹாரிகேன உஸ்ஸுக்ககரணம் ‘‘கிந்தி நு கோ² ஸங்கோ⁴ உபஜ்ஜா²யஸ்ஸ கம்மம் ந கரேய்ய, லஹுகாய வா பரிணாமேய்யா’’தி, கதம் வா பனஸ்ஸ ஹோதி ஸங்கே⁴ன கம்மம் தஜ்ஜனீயம் வா நியஸ்ஸம் வா பப்³பா³ஜனீயம் வா படிஸாரணீயம் வா உக்கே²பனீயம் வா, ஸத்³தி⁴விஹாரிகேன உஸ்ஸுக்ககரணம் ‘‘கிந்தி நு கோ² உபஜ்ஜா²யோ ஸம்மா வத்தேய்ய, லோமம் பாதேய்ய, நேத்தா²ரம் வத்தேய்ய, ஸங்கோ⁴ தம் கம்மம் படிப்பஸ்ஸம்பே⁴ய்யா’’தி, ஸசே உபஜ்ஜா²யஸ்ஸ சீவரம் தோ⁴விதப்³ப³ம் ஹோதி, ஸத்³தி⁴விஹாரிகேன தோ⁴வனம் உஸ்ஸுக்ககரணம் வா ‘‘கிந்தி நு கோ² உபஜ்ஜா²யஸ்ஸ சீவரம் தோ⁴வியேதா²’’தி, ஸசே உபஜ்ஜா²யஸ்ஸ சீவரம் காதப்³ப³ம் ஹோதி, ஸத்³தி⁴விஹாரிகேன கரணம் உஸ்ஸுக்ககரணம் வா ‘‘கிந்தி நு கோ² உபஜ்ஜா²யஸ்ஸ சீவரம் கரியேதா²’’தி, ஸசே உபஜ்ஜா²யஸ்ஸ ரஜனம் பசிதப்³ப³ம் ஹோதி, ஸத்³தி⁴விஹாரிகேன பசனம் உஸ்ஸுக்ககரணம் வா ‘‘கிந்தி நு கோ² உபஜ்ஜா²யஸ்ஸ ரஜனம் பசியேதா²’’தி, ஸசே உபஜ்ஜா²யஸ்ஸ சீவரம் ரஜேதப்³ப³ம் ஹோதி, ஸத்³தி⁴விஹாரிகேன ரஜனம் உஸ்ஸுக்ககரணம் வா ‘‘கிந்தி நு கோ² உபஜ்ஜா²யஸ்ஸ சீவரம் ரஜியேதா²’’தி, சீவரம் ரஜந்தேன ஸாது⁴கம் ஸம்பரிவத்தகம் ஸம்பரிவத்தகம் ரஜனம், ந ச அச்சி²ன்னே தே²வே பக்கமனம், உபஜ்ஜா²யம் அனாபுச்சா² ந ஏகச்சஸ்ஸ பத்ததா³னம், ந ஏகச்சஸ்ஸ பத்தபடிக்³க³ஹணம், ந ஏகச்சஸ்ஸ சீவரதா³னம், ந ஏகச்சஸ்ஸ சீவரபடிக்³க³ஹணம், ந ஏகச்சஸ்ஸ பரிக்கா²ரதா³னம், ந ஏகச்சஸ்ஸ பரிக்கா²ரபடிக்³க³ஹணம், ந ஏகச்சஸ்ஸ கேஸச்சே²த³னம், ந ஏகச்சேன கேஸானம் சே²தா³பனம், ந ஏகச்சஸ்ஸ பரிகம்மகரணம், ந ஏகச்சேன பரிகம்மஸ்ஸ காராபனம், ந ஏகச்சஸ்ஸ வேய்யாவச்சகரணம், ந ஏகச்சேன வேய்யாவச்சஸ்ஸ காராபனம், ந ஏகச்சஸ்ஸ பச்சா²ஸமணேன க³மனம், ந ஏகச்சஸ்ஸ பச்சா²ஸமணஸ்ஸ ஆதா³னம், ந ஏகச்சஸ்ஸ பிண்ட³பாதஸ்ஸ நீஹரணம், ந ஏகச்சேன பிண்ட³பாதனீஹராபனம், ந உபஜ்ஜா²யம் அனாபுச்சா² கா³மப்பவேஸனம், ந ஸுஸானக³மனம், ந தி³ஸாபக்கமனம், ஸசே உபஜ்ஜா²யோ கி³லானோ ஹோதி, யாவஜீவம் உபட்டா²னம், வுட்டா²னமஸ்ஸ ஆக³மனந்தி தேஸு கானிசி வத்தானி ஸவிப⁴த்திகானி, கானிசி அவிப⁴த்திகானி, தேஸு அவிப⁴த்திகானம் விபா⁴கே³ வுச்சமானே யதா²வுத்தக³ணனாய அதிரேகதரானி ஹோந்தி, தம் பன விபா⁴க³ம் அனாமஸித்வா பிண்ட³வஸேன க³ஹேத்வா யதா² அயம் க³ணனா த³ஸ்ஸிதாதி வேதி³தப்³பா³.

2476. அகரோந்தஸ்ஸாதி ஏத்த² ‘‘வத்த’’ந்தி ஸேஸோ. அனாத³ரவஸேனேவ வத்தம் அகரோந்தஸ்ஸ பி⁴க்கு²னோ தேன வத்தபே⁴தே³ன வத்தாகரணேன ஸப்³ப³த்த² ஸத்ததிம்ஸாதி⁴கஸதப்பபே⁴த³ட்டா²னே தத்தகம்யேவ து³க்கடம் பகாஸிதந்தி யோஜனா.

உபஜ்ஜா²யாசரியவத்தகதா²வண்ணனா.

2477. ஏவம் உபஜ்ஜா²யாசரியவத்தானி ஸங்கே²பேன த³ஸ்ஸேத்வா உபஜ்ஜா²யாசரியேஹி ஸத்³தி⁴விஹாரிகந்தேவாஸீனம் காதப்³ப³வத்தானி த³ஸ்ஸேதுமாஹ ‘‘உபஜ்ஜா²யஸ்ஸ வத்தானீ’’திஆதி³. உபஜ்ஜா²யஸ்ஸ வத்தானீதி உபஜ்ஜா²யேன ஸத்³தி⁴விஹாரிகஸ்ஸ யுத்தபத்தகாலே கத்தப்³ப³த்தா உபஜ்ஜா²யாயத்தவத்தானீதி அத்தோ². ததா² ஸத்³தி⁴விஹாரிகேதி யதா² ஸத்³தி⁴விஹாரிகேன உபஜ்ஜா²யஸ்ஸ காதப்³பா³னி, ததா² உபஜ்ஜா²யேன ஸத்³தி⁴விஹாரிகே காதப்³பா³னி.

உபஜ்ஜா²யாசரியவத்தேஸு கா³மப்பவேஸே பச்சா²ஸமணேன ஹுத்வா நாதிதூ³ரனச்சாஸன்னக³மனம், ந அந்தரந்தரா கதா²ஓபாதனம், ஆபத்திஸாமந்தா ப⁴ணமானஸ்ஸ நிவாரணம், பத்தபரியாபன்னபடிக்³க³ஹணந்தி சத்தாரி வத்தானி, ந ஏகச்சஸ்ஸ பத்ததா³னாதி³அனாபுச்சா²தி³ஸாபக்கமனாவஸானானி வீஸதி படிக்கே²பா சேதி ஏதானி சதுவீஸதி வத்தானி ட²பேத்வா அவஸேஸானி தேரஸாதி⁴கஸதவத்தானி ஸந்தா⁴யாஹ ‘‘ஸதம் தேரஸ ஹோந்தேவா’’தி, தேரஸாதி⁴கஸதவத்தானி ஹோந்தீதி அத்தோ². ஆசரியேன அந்தேவாஸிகேபி ச காதப்³ப³வத்தானி ததா² தத்தகானேவாதி அத்தோ².

ஸத்³தி⁴விஹாரிகந்தேவாஸிகவத்தகதா²வண்ணனா.

2478. உபஜ்ஜா²யாசரியேஹி ஸத்³தி⁴விஹாரிகந்தேவாஸிகானம் நிஸ்ஸயபடிப்பஸ்ஸத்³தி⁴ப்பகாரம் த³ஸ்ஸேதுமாஹ ‘‘பக்கந்தே வாபீ’’திஆதி³. பக்கந்தே வாபி விப்³ப⁴ந்தே வாபி பக்க²ஸங்கந்தே வாபி மதே வாபி ஆணத்தியா வாபி ஏவம் பஞ்சதா⁴ உபஜ்ஜா²யா ஸத்³தி⁴விஹாரிகேன க³ஹிதோ நிஸ்ஸயோ படிப்பஸ்ஸம்ப⁴தீதி யோஜனா. பக்கந்தேதி தத³ஹு அபச்சாக³ந்துகாமதாய தி³ஸம் க³தே. விப்³ப⁴ந்தேதி கி³ஹிபா⁴வம் பத்தே. பக்க²ஸங்கந்தகேதி தித்தி²யாயதனம் க³தே. மதேதி காலகதே. ஆணத்தியாதி நிஸ்ஸயபணாமனேன.

2479-80. ஆசரியம்ஹாபி அந்தேவாஸிகேன க³ஹிதனிஸ்ஸயஸ்ஸ பே⁴த³னம் ச²தா⁴ ச²ப்பகாரேன ஹோதீதி யோஜனா. கத²ந்தி ஆஹ ‘‘பக்கந்தே சா’’திஆதி³. தம் உபஜ்ஜா²யதோ நிஸ்ஸயபே⁴தே³ வுத்தனயமேவ. விஸேஸம் பன ஸயமேவ வக்க²தி ‘‘ஆணத்திய’’ந்திஆதி³னா. ஆணத்தியந்தி ஏத்த² விஸேஸத்த²ஜோதகோ பன-ஸத்³தோ³ லுத்தனித்³தி³ட்டோ². உபி⁴ன்னம்பி து⁴ரனிக்கே²பனேபி சாதி ஆசரியஸ்ஸ நிஸ்ஸயபணாமனே பன உபி⁴ன்னம் ஆசரியந்தேவாஸிகானம்யேவ அஞ்ஞமஞ்ஞனிராலயபா⁴வே ஸதி நிஸ்ஸயபே⁴தோ³ ஹோதி, ந ஏகஸ்ஸாதி அத்தோ². தமேவத்த²ம் ப்³யதிரேகதோ த³ள்ஹீகரோதி ‘‘ஏகேகஸ்ஸா’’திஆதி³னா. ஏகேகஸ்ஸ வா உபி⁴ன்னம் வா ஆலயே ஸதி ந பி⁴ஜ்ஜதீதி யோஜனா. யதா²ஹ –

‘‘ஆணத்தியம் பன ஸசேபி ஆசரியோ முஞ்சிதுகாமோவ ஹுத்வா நிஸ்ஸயபணாமனாய பணாமேதி, அந்தேவாஸிகோ ச ‘கிஞ்சாபி மம் ஆசரியோ பணாமேதி, அத² கோ² ஹத³யேன முது³கோ’தி ஸாலயோவ ஹோதி, நிஸ்ஸயோ ந படிப்பஸ்ஸம்ப⁴தியேவ. ஸசேபி ஆசரியோ ஸாலயோ, அந்தேவாஸிகோ நிராலயோ ‘ந தா³னி இமம் நிஸ்ஸாய வஸிஸ்ஸாமீ’தி து⁴ரம் நிக்கி²பதி, ஏவம்பி ந படிப்பஸ்ஸம்ப⁴தி. உபி⁴ன்னம் ஸாலயபா⁴வே பன ந படிப்பஸ்ஸம்ப⁴தியேவ. உபி⁴ன்னம் து⁴ரனிக்கே²பேன படிப்பஸ்ஸம்ப⁴தீ’’தி (மஹாவ. அட்ட². 83).

அயம் பன விஸேஸோ ஆசரியாணத்தியா நிஸ்ஸயபே⁴தே³யேவ த³ஸ்ஸிதோ, ந உபஜ்ஜா²யாணத்தியா. ஸாரத்த²தீ³பனியம் பன ‘‘ஸசேபி ஆசரியோ முஞ்சிதுகாமோவ ஹுத்வா நிஸ்ஸயபணாமனாய பணாமேதீதிஆதி³ ஸப்³ப³ம் உபஜ்ஜா²யஸ்ஸ ஆணத்தியம்பி வேதி³தப்³ப³’’ந்தி வுத்தம்.

2481. ஏவம் பஞ்ச ஸாதா⁴ரணங்கா³னி த³ஸ்ஸேத்வா அஸாதா⁴ரணங்க³ம் த³ஸ்ஸேதுமாஹ ‘‘உபஜ்ஜா²யஸமோதா⁴ன-க³தஸ்ஸாபி ச பி⁴ஜ்ஜதீ’’தி. தத்த² ஸமோதா⁴னக³மனம் ஸரூபதோ, பபே⁴த³தோ ச த³ஸ்ஸேதுமாஹ ‘‘த³ஸ்ஸனம் ஸவனஞ்சாதி, ஸமோதா⁴னம் த்³விதா⁴ மத’’ந்தி. அயமேத்த² ஸங்கே²போ, வித்தா²ரோ பன ஸமந்தபாஸாதி³காயம் (மஹாவ. அட்ட². 83) க³ஹேதப்³போ³. க³ந்த²வித்தா²ரபீ⁴ரூனம் அனுக்³க³ஹாய பன இத⁴ ந வித்தா²ரிதோ.

2482-3. ஸபா⁴கே³ தா³யகே அஸந்தே அத்³தி⁴கஸ்ஸ ச கி³லானஸ்ஸ ச ‘‘கி³லானேன மம் உபட்ட²ஹா’’தி யாசிதஸ்ஸ கி³லானுபட்டா²கஸ்ஸ ச நிஸ்ஸயம் வினா வஸிதும் தோ³ஸோ நத்தீ²தி யோஜனா. ‘‘கி³லானுபட்டா²கஸ்ஸா’’தி வத்தப்³பே³ கா³தா²ப³ந்த⁴வஸேன ரஸ்ஸத்தம். இமினா ஸபா⁴கே³ நிஸ்ஸயதா³யகே ஸந்தே ஏகதி³வஸம்பி பரிஹாரோ ந லப்³ப⁴தீதி தீ³பேதி. அத்தனோ வனே பா²ஸுவிஹாரதம் ஜானதாதி அத்தனோ ஸமத²விபஸ்ஸனாபடிலாப⁴ஸ்ஸ வனே பா²ஸுவிஹாரம் ஜானந்தேனபி. ‘‘ஸபா⁴கே³ தா³யகே அஸந்தே’’தி பத³ச்சே²தோ³. ஸப்³ப³மேதம் விதா⁴னம் அந்தோவஸ்ஸதோ அஞ்ஞஸ்மிம் காலே வேதி³தப்³ப³ம். அயமேத்த² ஸங்கே²போ, வித்தா²ரோ பன ஸமந்தபாஸாதி³காய க³ஹேதப்³போ³.

நிஸ்ஸயபடிப்பஸ்ஸம்ப⁴னகதா²வண்ணனா.

2484. குட்ட²மஸ்ஸ அத்தீ²தி குட்டீ², தம். ‘‘க³ண்டி³’’ந்திஆதீ³ஸுபி ஏஸேவ நயோ. ரத்தஸேதாதி³பே⁴தே³ன யேன கேனசி குட்டே²ன வேவண்ணியம் பத்தஸரீரந்தி அத்தோ². யதா²ஹ –

‘‘ரத்தகுட்ட²ம் வா ஹோது காளகுட்ட²ம் வா, யம் கிஞ்சி கிடிப⁴த³த்³து³கச்சு²ஆதி³ப்பபே⁴த³ம்பி ஸப்³ப³ம் குட்ட²மேவாதி வுத்தம். தஞ்சே நக²பிட்டி²ப்பமாணம்பி வட்³ட⁴னகபக்கே² டி²தம் ஹோதி, ந பப்³பா³ஜேதப்³போ³. ஸசே பன நிவாஸனபாருபனேஹி பகதிபடிச்ச²ன்னட்டா²னே நக²பிட்டி²ப்பமாணம் அவட்³ட⁴னகபக்கே² டி²தம் ஹோதி, வட்டதி. முகே², பன ஹத்த²பாத³பிட்டே²ஸு வா ஸசேபி அவட்³ட⁴னகபக்கே² டி²தம் நக²பிட்டி²தோ கு²த்³த³கபமாணம்பி ந வட்டதியேவாதி குருந்தி³யம் வுத்தம். தம் திகிச்சா²பேத்வா பப்³பா³ஜேந்தேனாபி பகதிவண்ணே ஜாதேயேவ பப்³பா³ஜேதப்³போ³’’தி (மஹாவ. அட்ட². 88).

நக²பிட்டி²ப்பமாணந்தி ஏத்த² ‘‘கனிட்ட²ங்கு³லினக²பிட்டி² அதி⁴ப்பேதா’’தி தீஸுபி க³ண்டி²பதே³ஸு வுத்தம்.

க³ண்டி³ந்தி மேத³க³ண்டா³தி³க³ண்ட³பே⁴த³வந்தம். யதா²ஹ ‘‘மேத³க³ண்டோ³ வா ஹோது அஞ்ஞோ வா, யோ கோசி கோலட்டி²மத்தகோபி சே வட்³ட⁴னகபக்கே² டி²தோ க³ண்டோ³ ஹோதி, ந பப்³பா³ஜேதப்³போ³’’திஆதி³ (மஹாவ. அட்ட². 88). கோலட்டீ²தி ப³த³ரட்டி². கிலாஸிந்தி கிலாஸவந்தம். யதா²ஹ – ‘‘கிலாஸோதி நபி⁴ஜ்ஜனகம் நபக்³க⁴ரணகம் பது³மபுண்ட³ரீகபத்தவண்ணம் குட்ட²ம், யேன கு³ன்னம் விய ஸப³லம் ஸரீரம் ஹோதீ’’தி (மஹாவ. அட்ட². 88). ச-ஸத்³தோ³ ஸப்³பே³ஹி உபயோக³வந்தேஹி பச்சேகம் யோஜேதப்³போ³. ஸோஸிந்தி க²யரோக³வந்தம். யதா²ஹ – ‘‘ஸோஸோதி ஸோஸப்³யாதி⁴. தஸ்மிம் ஸதி ந பப்³பா³ஜேதப்³போ³’’தி (மஹாவ. அட்ட². 88). அபமாரிகந்தி அபமாரவந்தம். யதா²ஹ – ‘‘அபமாரோதி பித்தும்மாரோ வா யக்கு²ம்மாரோ வா. தத்த² புப்³ப³வேரிகேன அமனுஸ்ஸேன க³ஹிதோ து³த்திகிச்சோ² ஹோதி, அப்பமத்தகேபி பன அபமாரே ஸதி ந பப்³பா³ஜேதப்³போ³’’தி.

ராஜப⁴டந்தி ரஞ்ஞோ ப⁴த்தவேதனப⁴டம் வா டா²னந்தரம் பத்தம் வா அப்பத்தம் வா ராஜபுரிஸம். யதா²ஹ – ‘‘அமச்சோ வா ஹோது மஹாமத்தோ வா ஸேவகோ வா கிஞ்சி டா²னந்தரம் பத்தோ வா அப்பத்தோ வா, யோ கோசி ரஞ்ஞோ ப⁴த்தவேதனப⁴டோ. ஸப்³போ³ ‘ராஜப⁴டோ’தி ஸங்க்²யம் க³ச்ச²தீ’’தி. சோரந்தி மனுஸ்ஸேஹி அப்பமாத³னம் கா³மகா⁴தபந்த²கா⁴தாதி³கம்மேன பாகடம் சோரஞ்ச. லிகி²தகந்தி யம் கஞ்சி சோரிகம் வா அஞ்ஞம் வா க³ரும் ராஜாபராத⁴ம் கத்வா பலாதம், ராஜா ச நம் பண்ணே வா போத்த²கே வா ‘‘இத்த²ன்னாமோ யத்த² தி³ஸ்ஸதி, தத்த² க³ஹேத்வா மாரேதப்³போ³’’தி வா ‘‘ஹத்த²பாதா³தீ³னிஸ்ஸ சி²ந்தி³தப்³பா³னீ’’தி வா ‘‘ஏத்தகம் நாம த³ண்ட³ம் ஹராபேதப்³போ³’’தி வா லிகா²பேதி, ஏவரூபம் லிகி²தகம்.

‘‘காரபே⁴த³க’’ந்தி கா³தா²ப³ந்த⁴வஸேன ரஸ்ஸோ கதோ. காரபே⁴த³கந்தி தா³தப்³ப³கரஸ்ஸ வா கதசோரகம்மஸ்ஸ வா காரணா காராக⁴ரே பக்கி²த்தோ வா நிக³ளப³ந்த⁴னாதீ³ஹி ப³த்³தோ⁴ வா, ததோ ஸோ முச்சித்வா பலாயதி, ஏவரூபம் காராபே⁴த³கஞ்ச. யதா²ஹ – ‘‘காரா வுச்சதி ப³ந்த⁴னாகா³ரம், இத⁴ பன அந்து³ப³ந்த⁴னம் வா ஹோது ஸங்க²லிகப³ந்த⁴னம் வா ரஜ்ஜுப³ந்த⁴னம் வா கா³மப³ந்த⁴னம் வா நிக³மப³ந்த⁴னம் வா நக³ரப³ந்த⁴னம் வா புரிஸகு³த்தி வா ஜனபத³ப³ந்த⁴னம் வா தீ³பப³ந்த⁴னம் வா, யோ ஏதேஸு யம் கிஞ்சி ப³ந்த⁴னம் சி²ந்தி³த்வா பி⁴ந்தி³த்வா முஞ்சித்வா விவரித்வா வா பஸ்ஸமானானம் வா அபஸ்ஸமானானம் வா பலாயதி, ஸோ ‘காராபே⁴த³கோ’தி ஸங்க்²யம் க³ச்ச²தீ’’தி (மஹாவ. அட்ட². 92).

2485. கஸாஹதந்தி இணம் க³ஹேத்வா தா³தும் அஸமத்த²த்தா ‘‘அயமேவ தே த³ண்டோ³ ஹோதூ’’தி கஸாதி³னா தி³ன்னப்பஹாரம் அவூபஸந்தவணம். யதா²ஹ –

‘‘யோ வசனபேஸனாதீ³னி அகரோந்தோ ஹஞ்ஞதி, ந ஸோ கதத³ண்ட³கம்மோ. யோ பன கேணியா வா அஞ்ஞதா² வா கிஞ்சி க³ஹேத்வா கா²தி³த்வா புன தா³தும் அஸக்கோந்தோ ‘அயமேவ தே த³ண்டோ³ ஹோதூ’தி கஸாஹி ஹஞ்ஞதி, அயம் கஸாஹதோ கதத³ண்ட³கம்மோ. யோ ச கஸாஹி வா ஹதோ ஹோது அத்³த⁴த³ண்ட³காதீ³னம் வா அஞ்ஞதரேன, யாவ அல்லவணோ ஹோதி, தாவ ந பப்³பா³ஜேதப்³போ³’’தி (மஹாவ. அட்ட². 94).

லக்க²ணாஹதந்தி ஏகம்ஸம் கத்வா பாருதேன உத்தராஸங்கே³ன அப்படிச்சா²த³னீயட்டா²னே தத்தேன லோஹேன ஆஹதம் அஸச்ச²விபூ⁴தலக்க²ணேன ஸமன்னாக³தம். யதா²ஹ –

‘‘யஸ்ஸ பன நலாடே வா உராதீ³ஸு வா தத்தேன லோஹேன லக்க²ணம் ஆஹதம் ஹோதி, ஸோ ஸசே பு⁴ஜிஸ்ஸோ, யாவ அல்லவணோ ஹோதி, தாவ ந பப்³பா³ஜேதப்³போ³. ஸசேபிஸ்ஸ வணா ருள்ஹா ஹோந்தி ச²வியா ஸமபரிச்சே²தா³, லக்க²ணம் பன பஞ்ஞாயதி, திமண்ட³லம் நிவத்த²ஸ்ஸ உத்தராஸங்கே³ கதே படிச்ச²ன்னோகாஸே சே ஹோதி, பப்³பா³ஜேதும் வட்டதி. அப்படிச்ச²ன்னோகாஸே சே, ந வட்டதீ’’தி (மஹாவ. அட்ட². 95).

இணாயிகஞ்சாதி மாதாபிதுபிதாமஹாதீ³ஹி வா அத்தனா வா க³ஹிதஇணம். யதா²ஹ –

‘‘இணாயிகோ நாம யஸ்ஸ பிதிபிதாமஹேஹி வா இணம் க³ஹிதம் ஹோதி, ஸயம் வா இணம் க³ஹிதம் ஹோதி, யம் வா ஆட²பேத்வா மாதாபிதூஹி கிஞ்சி க³ஹிதம் ஹோதி, ஸோ தம் இணம் பரேஸம் தா⁴ரேதீதி இணாயிகோ. யம் பன அஞ்ஞே ஞாதகா ஆட²பேத்வா கிஞ்சி க³ண்ஹந்தி, ஸோ ந இணாயிகோ. ந ஹி தே தம் ஆட²பேதும் இஸ்ஸரா. தஸ்மா தம் பப்³பா³ஜேதும் வட்டதீ’’தி (மஹாவ. அட்ட². 96).

தா³ஸந்தி அந்தோஜாதோ, த⁴னக்கீதோ, கரமரானீதோ, ஸயம் வா தா³ஸப்³யம் உபக³தோதி சதுன்னம் தா³ஸானம் அஞ்ஞதரம். தா³ஸவினிச்ச²யோ பனேத்த² ஸமந்தபாஸாதி³காய (மஹாவ. அட்ட². 97) வித்தா²ரதோ க³ஹேதப்³போ³. பப்³பா³ஜேந்தஸ்ஸ து³க்கடந்தி ‘‘குட்டி²’’ந்திஆதீ³ஹி உபயோக³வந்தபதே³ஹி பச்சேகம் யோஜேதப்³ப³ம்.

2486. ஹத்த²ச்சி²ன்னந்தி ஹத்த²தலே வா மணிப³ந்தே⁴ வா கப்பரே வா யத்த² கத்த²சி சி²ன்னஹத்த²ம். அட்ட²ச்சி²ன்னந்தி யதா² நக²ம் ந பஞ்ஞாயதி, ஏவம் சதூஸு அங்கு³ட்ட²கேஸு அஞ்ஞதரம் வா ஸப்³பே³ வா யஸ்ஸ சி²ன்னா ஹோந்தி, ஏவரூபம். பாத³ச்சி²ன்னந்தி யஸ்ஸ அக்³க³பாதே³ஸு வா கோ³ப்ப²கேஸு வா ஜங்கா⁴ய வா யத்த² கத்த²சி ஏகோ வா த்³வே வா பாதா³ சி²ன்னா ஹோந்தி. ஹத்த²பாத³சி²ன்னஸ்ஸாபி பாளியம் (மஹாவ. 119) ஆக³தத்தா ஸோபி இத⁴ வத்தப்³போ³, யதா²வுத்தனயேனேவ தஸ்ஸ து³க்கடவத்து²தா பஞ்ஞாயதீதி ந வுத்தோதி த³ட்ட²ப்³ப³ம்.

கண்ணனாஸங்கு³லிச்சி²ன்னந்தி ஏத்த² ‘‘கண்ணச்சி²ன்னம் நாஸச்சி²ன்னம் கண்ணனாஸச்சி²ன்னம் அங்கு³லிச்சி²ன்ன’’ந்தி யோஜனா. கண்ணச்சி²ன்னந்தி யஸ்ஸ கண்ணமூலே வா கண்ணஸக்க²லிகாய வா ஏகோ வா த்³வே வா கண்ணா சி²ன்னா ஹோந்தி. யஸ்ஸ பன கண்ணாவட்டே சி²ன்னா ஹோந்தி, ஸக்கா ச ஹோந்தி ஸங்கா⁴டேதும், ஸோ கண்ணம் ஸங்கா⁴டேத்வா பப்³பா³ஜேதப்³போ³. நாஸச்சி²ன்னந்தி யஸ்ஸ அஜபத³கே வா அக்³கே³ வா ஏகபுடே வா யத்த² கத்த²சி நாஸா சி²ன்னா ஹோதி. யஸ்ஸ பன நாஸிகா ஸக்கா ஹோதி ஸந்தே⁴தும், ஸோ தம் பா²ஸுகம் கத்வா பப்³பா³ஜேதப்³போ³. கண்ணனாஸச்சி²ன்னந்தி தது³ப⁴யச்சி²ன்னம். அங்கு³லிச்சி²ன்னந்தி யஸ்ஸ நக²ஸேஸம் அத³ஸ்ஸேத்வா ஏகா வா ப³ஹூ வா அங்கு³லியோ சி²ன்னா ஹோந்தி. யஸ்ஸ பன ஸுத்ததந்துமத்தம்பி நக²ஸேஸம் பஞ்ஞாயதி, தம் பப்³பா³ஜேதும் வட்டதி. கண்ட³ரச்சி²ன்னமேவ சாதி யஸ்ஸ கண்ட³ரனாமகா மஹான்ஹாரூ புரதோ வா பச்ச²தோ வா சி²ன்னா ஹோந்தி, யேஸு ஏகஸ்ஸாபி சி²ன்னத்தா அக்³க³பாதே³ன வா சங்கமதி, மூலேன வா சங்கமதி, ந வா பாத³ம் பதிட்டா²பேதும் ஸக்கோதி.

2487. காணந்தி பஸன்னந்தோ⁴ வா ஹோது புப்பா²தீ³ஹி வா உபஹதபஸாதோ³, யோ த்³வீஹி வா ஏகேன வா அக்கி²னா ந பஸ்ஸதி, தம் காணம். குணிந்தி ஹத்த²குணீ வா பாத³குணீ வா அங்கு³லிகுணீ வா, யஸ்ஸ ஏதேஸு ஹத்தா²தீ³ஸு யம் கிஞ்சி வங்கம் பஞ்ஞாயதி, ஸோ குணீ. கு²ஜ்ஜஞ்சாதி யோ உரஸ்ஸ வா பிட்டி²யா வா பஸ்ஸஸ்ஸ வா நிக்க²ந்தத்தா கு²ஜ்ஜஸரீரோ, தம் கு²ஜ்ஜம். யஸ்ஸ பன கிஞ்சி கிஞ்சி அங்க³பச்சங்க³ம் ஈஸகம் வங்கம், தம் பப்³பா³ஜேதும் வட்டதி. மஹாபுரிஸோ ஏவ ஹி ப்³ரஹ்முஜுக³த்தோ, அவஸேஸோ ஸத்தோ அகு²ஜ்ஜோ நாம நத்தி².

வாமனந்தி யோ ஜங்க⁴வாமனோ வா கடிவாமனோ வா உப⁴யவாமனோ வா, தம். தத்த² ஜங்க⁴வாமனஸ்ஸ கடிதோ பட்டா²ய ஹேட்டி²மகாயோ ரஸ்ஸோ ஹோதி, உபரிமகாயோ பரிபுண்ணோ. கடிவாமனஸ்ஸ கடிதோ பட்டா²ய உபரிமகாயோ ரஸ்ஸோ ஹோதி, ஹேட்டி²மகாயோ பரிபுண்ணோ ஹோதி. உப⁴யவாமனஸ்ஸ உபோ⁴பி காயா ரஸ்ஸா ஹோந்தி. யேஸம் காயரஸ்ஸத்தா பூ⁴தானம் விய பரிவடுமோ மஹாகுச்சி²க⁴டஸதி³ஸோ அத்தபா⁴வோ ஹோதி. தம் திவித⁴ம்பி பப்³பா³ஜேதும் ந வட்டதி.

ப²ணஹத்த²கந்தி யஸ்ஸ வக்³கு³லிபக்க²கா விய அங்கு³லியோ ஸம்ப³த்³தா⁴ ஹோந்தி, தம். ஏதம் பப்³பா³ஜேதுகாமேன அங்கு³லந்தரிகாயோ பா²லேத்வா ஸப்³ப³ம் அந்தரசம்மம் அபனேத்வா பா²ஸுகம் கத்வா பப்³பா³ஜேதப்³போ³. யஸ்ஸாபி ச² அங்கு³லியோ ஹோந்தி, தம் பப்³பா³ஜேதுகாமேன அதி⁴கம் அங்கு³லிம் சி²ந்தி³த்வா பா²ஸுகம் கத்வா பப்³பா³ஜேதப்³போ³.

க²ஞ்ஜந்தி யோ நதஜாணுகோ வா பி⁴ன்னஜங்கோ⁴ வா மஜ்ஜே² ஸம்குடிதபாத³த்தா குண்ட³பாத³கோ வா பிட்டி²பாத³மஜ்ஜே²ன சங்கமந்தோ அக்³கே³ ஸம்குடிதபாத³த்தா குண்ட³பாத³கோ வா பிட்டி²பாத³க்³கே³ன சங்கமந்தோ அக்³க³பாதே³னேவ சங்கமனக²ஞ்ஜோ வா பண்ஹிகாய சங்கமனக²ஞ்ஜோ வா பாத³ஸ்ஸ பா³ஹிரந்தேன சங்கமனக²ஞ்ஜோ வா பாத³ஸ்ஸ அப்³ப⁴ந்தரந்தேன சங்கமனக²ஞ்ஜோ வா கோ³ப்ப²கானம் உபரி ப⁴க்³க³த்தா ஸகலேன பிட்டி²பாதே³ன சங்கமனக²ஞ்ஜோ வா, தம் பப்³பா³ஜேதும் ந வட்டதி. ஏத்த² நதஜாணுகோதி அந்தோபவிட்ட²ஆனதபாதோ³. பக்க²ஹதந்தி யஸ்ஸ ஏகோ ஹத்தோ² வா பாதோ³ வா அட்³ட⁴ஸரீரம் வா ஸுக²ம் ந வஹதி.

ஸீபதி³ந்தி பா⁴ரபாத³ம். யஸ்ஸ பாதோ³ தூ²லோ ஹோதி ஸஞ்ஜாதபீளகோ க²ரோ, ஸோ ந பப்³பா³ஜேதப்³போ³. யஸ்ஸ பன ந தாவ க²ரபா⁴வம் க³ண்ஹாதி, ஸக்கா ஹோதி உபனாஹம் ப³ந்தி⁴த்வா உத³கஆவாடே பவேஸேத்வா உத³கவாலிகாய பூரேத்வா யதா² ஸிரா பஞ்ஞாயந்தி, ஜங்கா⁴ ச தேலனாளிகா விய ஹோந்தி, ஏவம் மிலாபேதும் ஸக்கா, தஸ்ஸ பாத³ம் ஈதி³ஸம் கத்வா தம் பப்³பா³ஜேதும் வட்டதி. ஸசே புன வட்³ட⁴தி, உபஸம்பாதே³ந்தேனாபி ததா² கத்வாவ உபஸம்பாதே³தப்³போ³. பாபரோகி³னந்தி யோ அரிஸப⁴க³ந்த³ரபித்தஸேம்ஹகாஸஸோஸாதீ³ஸு யேன கேனசி ரோகே³ன நிச்சாதுரோ அதேகிச்ச²ரோகோ³ ஜேகு³ச்சோ² அமனாபோ, தம்.

2488. ஜராய து³ப்³ப³லந்தி யோ ஜிண்ணபா⁴வேன து³ப்³ப³லோ அத்தனோ சீவரரஜனாதி³கம்மம்பி காதும் அஸமத்தோ², தம். யோ பன மஹல்லகோபி ப³லவா ஹோதி அத்தானம் படிஜக்³கி³தும் ஸக்கோதி, ஸோ பப்³பா³ஜேதப்³போ³. அந்த⁴ந்தி ஜச்சந்த⁴ம். பதி⁴ரஞ்சேவாதி யோ ஸப்³பே³ன ஸப்³ப³ம் ந ஸுணாதி, தம். யோ பன மஹாஸத்³த³ம் ஸுணாதி, தம் பப்³பா³ஜேதும் வட்டதி. மம்மனந்தி யஸ்ஸ வசீபே⁴தோ³ வத்ததி, ஸரணக³மனம் பரிபுண்ணம் பா⁴ஸிதும் ந ஸக்கோதி, தாதி³ஸம் மம்மனம்பி பப்³பா³ஜேதும் ந வட்டதி. யோ பன ஸரணக³மனமத்தம் பரிபுண்ணம் பா⁴ஸிதும் ஸக்கோதி, தம் பப்³பா³ஜேதும் வட்டதி. அத² வா மம்மனந்தி க²லிதவசனம், யோ ஏகமேவ அக்க²ரம் சதுபஞ்சக்க²த்தும் வத³தி, தஸ்ஸேதமதி⁴வசனம். பீட²ஸப்பிந்தி சி²ன்னிரியாபத²ம். மூக³ந்தி யஸ்ஸ வசீபே⁴தோ³ நப்பவத்ததி.

2489. அத்தனோ விரூபபா⁴வேன பரிஸம் தூ³ஸேந்தேன பரிஸதூ³ஸகே (மஹாவ. அட்ட². 119) த³ஸ்ஸேதுமாஹ ‘‘அதிதீ³கோ⁴’’திஆதி³. அதிதீ³கோ⁴தி அஞ்ஞேஸம் ஸீஸப்பமாணனாபி⁴ப்பதே³ஸோ. அதிரஸ்ஸோதி வுத்தப்பகாரோ உப⁴யவாமனோ விய அதிரஸ்ஸோ. அதிகாளோ வாதி ஜா²பிதகே²த்தே கா²ணுகோ விய அதிகாளவண்ணோ. மட்ட²தம்ப³லோஹனித³ஸ்ஸனோ அச்சோதா³தோபி வாதி ஸம்ப³ந்தோ⁴, த³தி⁴தக்காதீ³ஹி மஜ்ஜிதமட்ட²தம்ப³லோஹவண்ணோ அதீவ ஓதா³தஸரீரோதி அத்தோ².

2490. அதிதூ²லோ வாதி பா⁴ரியமம்ஸோ மஹோத³ரோ மஹாபூ⁴தஸதி³ஸோ. அதிகிஸோதி மந்த³மம்ஸலோஹிதோ அட்டி²ஸிராசம்மஸரீரோ விய. அதிமஹாஸீஸோ வாதி யோஜனா. அதிமஹாஸீஸோ வாதி பச்சி²ம் ஸீஸே கத்வா டி²தோ விய. ‘‘அதிகு²த்³த³கஸீஸேன அஸஹிதேனா’’தி பத³ச்சே²தோ³. அஸஹிதேனாதி ஸரீரஸ்ஸ அனனுரூபேன. ‘‘அதிகு²த்³த³கஸீஸேனா’’தி ஏதஸ்ஸ விஸேஸனம். அஸஹிதேன அதிகு²த்³த³கஸீஸேன ஸமன்னாக³தோதி யோஜனா. யதா²ஹ – ‘‘அதிகு²த்³த³கஸீஸோ வா ஸரீரஸ்ஸ அனனுரூபேன அதிகு²த்³த³கேன ஸீஸேன ஸமன்னாக³தோ’’தி.

2491. குடகுடகஸீஸோதி தாலப²லபிண்டி³ஸதி³ஸேன ஸீஸேன ஸமன்னாக³தோ. ஸிக²ரஸீஸகோதி உத்³த⁴ம் அனுபுப்³ப³தனுகேன ஸீஸேன ஸமன்னாக³தோ, மத்த²கதோ ஸம்குடிகோ மூலதோ வித்த²தோ ஹுத்வா டி²தபப்³ப³தஸிக²ரஸதி³ஸஸீஸோதி அத்தோ². வேளுனாளிஸமானேனாதி மஹாவேளுபப்³ப³ஸதி³ஸேன. ஸீஸேனாதி தீ³க⁴ஸீஸேன. யதா²ஹ – ‘‘நாளிஸீஸோ வா மஹாவேளுபப்³ப³ஸதி³ஸேன ஸீஸேன ஸமன்னாக³தோ’’தி (மஹாவ. அட்ட². 119).

2492. கப்பஸீஸோபீதி மஜ்ஜே² தி³ஸ்ஸமானஆவாடேன ஹத்தி²கும்ப⁴ஸதி³ஸேன த்³விதா⁴பூ⁴தஸீஸேன ஸமன்னாக³தோ. பப்³பா⁴ரஸீஸோ வாதி சதூஸு பஸ்ஸேஸு யேன கேனசி பஸ்ஸேன ஓணதேன ஸீஸேன ஸமன்னாக³தோ. வணஸீஸகோதி வணேஹி ஸமன்னாக³தஸீஸோ. கண்ணிககேஸோ வாதி பாணகேஹி கா²யிதகேதா³ரே ஸஸ்ஸஸதி³ஸேஹி தஹிம் தஹிம் உட்டி²தேஹி கேஸேஹி ஸமன்னாக³தோ. தூ²லகேஸோபி வாதி தாலஹீரஸதி³ஸேஹி கேஸேஹி ஸமன்னாக³தோ.

2493. பூதிஸீஸோதி து³க்³க³ந்த⁴ஸீஸோ. நில்லோமஸீஸோ வாதி லோமரஹிதஸீஸோ. ஜாதிபண்ட³ரகேஸகோதி ஜாதிப²லிதேஹி பண்ட³ரகேஸோ வா. ஜாதியா தம்ப³கேஸோ வாதி ஆதி³த்தேஹி விய தம்ப³வண்ணேஹி கேஸேஹி ஸமன்னாக³தோ. ஆவட்டஸீஸகோதி கு³ன்னம் ஸரீரே ஆவட்டஸதி³ஸேஹி உத்³த⁴க்³கே³ஹி கேஸாவட்டேஹி ஸமன்னாக³தோ.

2494. ஸீஸலோமேகப³த்³தே⁴ஹி ப⁴முகேஹி யுதோபீதி ஸீஸலோமேஹி ஸத்³தி⁴ம் ஏகாப³த்³த⁴லோமேஹி ப⁴முகேஹி ஸமன்னாக³தோ. ஸம்ப³த்³த⁴ப⁴முகோ வாதி ஏகாப³த்³த⁴உப⁴யப⁴முகோ, மஜ்ஜே² ஸஞ்ஜாதலோமேஹி ப⁴முகேஹி ஸமன்னாக³தோதி அத்தோ². நில்லோமப⁴முகோபி வாதி ப⁴முலோமரஹிதோ. நில்லோமப⁴முகோபி வாதி பி-ஸத்³தே³ன அவுத்தஸமுச்சயத்தே²ன மக்கடப⁴முகோ ஸங்க³ஹிதோ.

2495. மஹந்தகு²த்³த³னேத்தோ வாதி ஏத்த² நேத்த-ஸத்³தோ³ மஹந்தகு²த்³த³-ஸத்³தே³ஹி பச்சேகம் யோஜேதப்³போ³, மஹந்தனேத்தோ வா கு²த்³த³கனேத்தோ வாதி அத்தோ². மஹந்தனேத்தோ வாதி அதிமஹந்தேஹி நேத்தேஹி ஸமன்னாக³தோ. கு²த்³த³கனேத்தோ வாதி மஹிம்ஸசம்மே வாஸிகோணேன பஹரித்வா கதசி²த்³த³ஸதி³ஸேஹி அதிகு²த்³த³கக்கீ²ஹி ஸமன்னாக³தோ. விஸமலோசனோதி ஏகேன மஹந்தேன, ஏகேன கு²த்³த³கேன அக்கி²னா ஸமன்னாக³தோ. கேகரோ வாபீதி திரியம் பஸ்ஸந்தோ. ஏத்த² அபி-ஸத்³தே³ன நிக்க²ந்தக்கி²ம் ஸம்பிண்டே³தி, யஸ்ஸ கக்கடகஸ்ஸேவ அக்கி²தாரகா நிக்க²ந்தா ஹோந்தி. க³ம்பீ⁴ரனேத்தோதி யஸ்ஸ க³ம்பீ⁴ரே உத³பானே உத³கதாரகா விய அக்கி²தாரகா பஞ்ஞாயந்தி. ஏத்த² ச உத³கதாரகா நாம உத³கபுப்³பு³ளம். அக்கி²தாரகாதி அக்கி²கே³ண்ட³கா. விஸமசக்கலோதி ஏகேன உத்³த⁴ம், ஏகேன அதோ⁴தி ஏவம் விஸமஜாதேஹி அக்கி²சக்கேஹி ஸமன்னாக³தோ.

2496. ஜதுகண்ணோ வாதி அதிகு²த்³தி³காஹி கண்ணஸக்க²லீஹி ஸமன்னாக³தோ. மூஸிககண்ணோ வாதி மூஸிகானம் கண்ணஸதி³ஸேஹி கண்ணேஹி ஸமன்னாக³தோ. ஹத்தி²கண்ணோபி வாதி அனனுரூபாஹி மஹந்தாஹி ஹத்தி²கண்ணஸதி³ஸாஹி கண்ணஸக்க²லீஹி ஸமன்னாக³தோ. சி²த்³த³மத்தககண்ணோ வாதி யஸ்ஸ வினா கண்ணஸக்க²லீஹி கண்ணச்சி²த்³த³மேவ ஹோதி. அவித்³த⁴கண்ணகோதி கண்ணப³ந்த⁴த்தா²ய அவித்³தே⁴ன கண்ணேன ஸமன்னாக³தோ.

2497. டங்கிதகண்ணோ வாதி கோ³ப⁴த்தனாளிகாய அக்³க³ஸதி³ஸேஹி கண்ணேஹி ஸமன்னாக³தோ, கோ³ஹனுகோடிஸண்டா²னேஹி கண்ணேஹி ஸமன்னாக³தோதி அத்தோ². பூதிகண்ணோபி வாதி ஸதா³ பக்³க⁴ரிதபுப்³பே³ன கண்ணேன ஸமன்னாக³தோ. பூதிகண்ணோபீதி அபி-ஸத்³தே³ன கண்ணப⁴க³ந்த³ரிகோ க³ஹிதோ. கண்ணப⁴க³ந்த³ரிகோதி நிச்சபூதினா கண்ணேன ஸமன்னாக³தோ. அவித்³த⁴கண்ணோ பரிஸதூ³ஸகோ வுத்தோ, கத²ம் யோனகஜாதீனம் பப்³ப³ஜ்ஜாதி ஆஹ ‘‘யோனகாதி³ப்பபே⁴தோ³பி, நாயம் பரிஸதூ³ஸகோ’’தி, கண்ணாவேத⁴னம் யோனகானம் ஸபா⁴வோ, அயம் யோனகாதி³ப்பபே⁴தோ³ பரிஸதூ³ஸகோ ந ஹோதீதி வுத்தம் ஹோதி.

2498. அதிபிங்க³லனேத்தோதி அதிஸயேன பிங்க³லேஹி நேத்தேஹி ஸமன்னாக³தோ. மது⁴பிங்க³லம் பன பப்³பா³ஜேதும் வட்டதி. நிப்பகு²மக்கி² வாதி அக்கி²த³லரோமேஹி விரஹிதஅக்கி²கோ. பகு²ம-ஸத்³தோ³ ஹி லோகே அக்கி²த³லரோமேஸு நிருள்ஹோ. அஸ்ஸுபக்³க⁴ரனேத்தோ வாதி பக்³க⁴ரணஸ்ஸூஹி நேத்தேஹி ஸமன்னாக³தோ. பக்கபுப்பி²தலோசனோதி பக்கலோசனோ புப்பி²தலோசனோதி யோஜனா. பரிபக்கனேத்தோ ஸஞ்ஜாதபுப்ப²னேத்தோதி அத்தோ².

2499. மஹானாஸோதி ஸரீரஸ்ஸ அனனுரூபாய மஹதியா நாஸாய ஸமன்னாக³தோ. அதிகு²த்³த³கனாஸிகோதி ததா² அதிகு²த்³தி³காய நாஸாய ஸமன்னாக³தோ. சிபிடனாஸோ வாதி சிபிடாய அந்தோ பவிட்டா²ய விய அல்லினாஸாய ஸமன்னாக³தோ. சிபிடனாஸோ வாதி அவுத்தவிகப்பத்தே²ன வா-ஸத்³தே³ன தீ³க⁴னாஸிகோ ஸங்க³ய்ஹதி. ஸோ ச ஸுகதுண்ட³ஸதி³ஸாய ஜிவ்ஹாய லேஹிதும் ஸக்குணேய்யாய நாஸிகாய ஸமன்னாக³தோ. குடிலனாஸிகோதி முக²மஜ்ஜே² அப்பதிட்ட²ஹித்வா ஏகபஸ்ஸே டி²தனாஸிகோ.

2500. நிச்சவிஸ்ஸவனாஸோ வாதி நிச்சபக்³க⁴ரிதஸிங்கா⁴ணிகனாஸோ வா. மஹாமுகோ²தி யஸ்ஸ படங்க³மண்டு³கஸ்ஸேவ முக²னிமித்தம்யேவ மஹந்தம் ஹோதி, முக²ம் பன லாபு³ஸதி³ஸம் அதிகு²த்³த³கம். படங்க³மண்டு³கோ நாம மஹாமுக²மண்டு³கோ. வங்கபி⁴ன்னமுகோ² வாபீதி ஏத்த² ‘‘வங்கமுகோ² வா பி⁴ன்னமுகோ² வாபீ’’தி யோஜனா. வங்கமுகோ²தி ப⁴முகஸ்ஸ, நலாதஸ்ஸ வா ஏகபஸ்ஸே நின்னதாய வங்கமுகோ². பி⁴ன்னமுகோ² வாதி மக்கடஸ்ஸேவ பி⁴ன்னமுகோ². மஹாஓட்டோ²பி வாதி உக்க²லிமுக²வட்டிஸதி³ஸேஹி ஓட்டே²ஹி ஸமன்னாக³தோ.

2501. தனுகஓட்டோ² வாதி பே⁴ரிசம்மஸதி³ஸேஹி த³ந்தே பித³ஹிதும் அஸமத்தே²ஹி ஓட்டே²ஹி ஸமன்னாக³தோ. பே⁴ரிசம்மஸதி³ஸேஹீதி பே⁴ரிமுக²சம்மஸதி³ஸேஹி. தனுகஓட்டோ² வாதி ஏத்த² வா-ஸத்³தே³ன மஹாத⁴ரோட்டோ² வா தனுகஉத்தரோட்டோ² வா தனுகஅத⁴ரோட்டோ² வாதி தயோ விகப்பா ஸங்க³ஹிதா. விபுலுத்தரஓட்ட²கோதி மஹாஉத்தரோட்டோ². ஓட்ட²சி²ன்னோதி யஸ்ஸ ஏகோ வா த்³வே வா ஓட்டா² சி²ன்னா ஹோந்தி. உப்பக்கமுகோ²தி பக்கமுகோ². ஏளமுகோ²பி வாதி நிச்சபக்³க⁴ரணமுகோ².

2502-3. ஸங்க²துண்டோ³பீதி ப³ஹி ஸேதேஹி அந்தோ அதிரத்தேஹி ஓட்டே²ஹி ஸமன்னாக³தோ. து³க்³க³ந்த⁴முகோ²தி து³க்³க³ந்த⁴குணபமுகோ². மஹாத³ந்தோபீதி அட்ட²கத³ந்தஸதி³ஸேஹி ஸமன்னாக³தோ. அச்சந்தந்தி அதிஸயேன. ‘‘ஹேட்டா² உபரிதோ வாபி, ப³ஹி நிக்க²ந்தத³ந்தகோ’’தி இத³ம் ‘‘அஸுரத³ந்தகோ’’தி ஏதஸ்ஸ அத்த²பத³ம். அஸுரோதி தா³னவோ. ‘‘ஸிப்பித³ந்தோ வா ஓட்ட²த³ந்தோ வா’’தி க³ண்டி²பதே³ லிகி²தோ. யஸ்ஸ பன ஸக்கா ஹோந்தி ஓட்டே²ஹி பித³ஹிதும், கதே²ந்தஸ்ஸேவ பஞ்ஞாயதி, நோ அகதே²ந்தஸ்ஸ, தம் பப்³பா³ஜேதும் வட்டதி. அத³ந்தோதி த³ந்தரஹிதோ. பூதித³ந்தோதி பூதிபூ⁴தேஹி த³ந்தேஹி ஸமன்னாக³தோ.

2504. ‘‘அதிகு²த்³த³கத³ந்தகோ’’தி இமஸ்ஸ ‘‘யஸ்ஸா’’திஆதி³ அபவாதோ³. யஸ்ஸ த³ந்தந்தரே காளகத³ந்தஸன்னிபோ⁴ கலந்த³கத³ந்தஸதி³ஸோ த³ந்தோ ஸுகு²மோவ டி²தோ சே, தம் து பப்³பா³ஜேதும் வட்டதீதி யோஜனா. பப்³பா³ஜேதும்பீதி ஏத்த² பி-ஸத்³தோ³ து-ஸத்³த³த்தோ².

2505. யோ போஸோதி ஸம்ப³ந்தோ⁴. மஹாஹனுகோதி கோ³ஹனுஸதி³ஸேன ஹனுனா ஸமன்னாக³தோ. ‘‘ரஸ்ஸேன ஹனுனா யுதோ’’தி இத³ம் ‘‘சிபிடஹனுகோ வா’’தி இமஸ்ஸ அத்த²பத³ம். யதா²ஹ – ‘‘சிபிடஹனுகோ வா அந்தோபவிட்டே²ன விய அதிரஸ்ஸேன ஹனுகேன ஸமன்னாக³தோ’’தி (மஹாவ. அட்ட². 119). சிபிடஹனுகோ வாபீதி ஏத்த² பி-ஸத்³தே³ன ‘‘பி⁴ன்னஹனுகோ வா வங்கஹனுகோ வா’’தி விகப்பத்³வயம் ஸங்க³ண்ஹாதி.

2506. நிம்மஸ்ஸுதா³டி²கோ வாபீதி பி⁴க்கு²னிஸதி³ஸமுகோ². அதிதீ³க⁴க³லோபி வாதி ப³கக³லஸதி³ஸேன க³லேன ஸமன்னாக³தோ. அதிரஸ்ஸக³லோபி வாதி அந்தோபவிட்டே²ன விய க³லேன ஸமன்னாக³தோ. பி⁴ன்னக³லோ வா க³ண்ட³க³லோபி வாதி யோஜனா, பி⁴ன்னக³லட்டி²கோ வா க³ண்டே³ன ஸமன்னாக³தக³லோபி வாதி அத்தோ².

2507. ப⁴ட்ட²ம்ஸகூடோ வாதி மாதுகா³மஸ்ஸ விய ப⁴ட்டே²ன அம்ஸகூடேன ஸமன்னாக³தோ. பி⁴ன்னபிட்டி² வா பி⁴ன்னஉரோபி வாதி யோஜனா, ஸுதீ³க⁴ஹத்தோ² வா ஸுரஸ்ஸஹத்தோ² வாதி யோஜனா, அதிதீ³க⁴ஹத்தோ² வா அதிரஸ்ஸஹத்தோ² வாதி அத்தோ². வா-ஸத்³தே³ன அஹத்த²ஏகஹத்தா²னம் க³ஹணம். கச்சு²ஸமாயுதோ வா கண்டு³ஸமாயுதோ வாதி யோஜனா. வா-ஸத்³தே³ன ‘‘த³த்³து³க³த்தோ வா கோ³தா⁴க³த்தோ வா’’தி இமே த்³வே ஸங்க³ண்ஹாதி. தத்த² கோ³தா⁴க³த்தோ வாதி யஸ்ஸ கோ³தா⁴ய விய க³த்ததோ சுண்ணானி பதந்தி.

2508. மஹானிஸத³மம்ஸோதி இமஸ்ஸ அத்த²பத³ம் ‘‘உத்³த⁴னக்³கு³பமாயுதோ’’தி. யதா²ஹ – ‘‘மஹாஆனிஸதோ³ வா உத்³த⁴னகூடஸதி³ஸேஹி ஆனிஸத³மம்ஸேஹி அச்சுக்³க³தேஹி ஸமன்னாக³தோ’’தி (மஹாவ. அட்ட². 119). மஹானிஸத³மம்ஸோ வாதி ஏத்த² வா-ஸத்³தே³ன ப⁴ட்ட²கடிகோ ஸங்க³ஹிதோ. வாதண்டி³கோதி அண்ட³கோஸேஸு வுத்³தி⁴ரோகே³ன ஸமன்னாக³தோ. மஹாஊரூதி ஸரீரஸ்ஸ அனனுரூபேஹி மஹந்தேஹி ஸத்தீஹி ஸமன்னாக³தோ. ஸங்க⁴ட்டனகஜாணுகோதி அஞ்ஞமஞ்ஞம் ஸங்க⁴ட்டேஹி ஜாணூஹி ஸமன்னாக³தோ.

2509. பி⁴ன்னஜாணூதி யஸ்ஸ ஏகோ வா த்³வே வா ஜாணூ பி⁴ன்னா ஹோந்தி. மஹாஜாணூதி மஹந்தேன ஜாணுனா ஸமன்னாக³தோ. தீ³க⁴ஜங்கோ⁴தி யட்டி²ஸதி³ஸஜங்கோ⁴. விகடோ வாதி திரியம் க³மனபாதே³ஹி ஸமன்னாக³தோ, யஸ்ஸ சங்கமதோ ஜாணுகா ப³ஹி நிக்³க³ச்ச²ந்தி. பண்ஹோ வாதி பச்ச²தோ பரிவத்தபாதே³ஹி ஸமன்னாக³தோ, யஸ்ஸ சங்கமதோ ஜாணுகா அந்தோ பவிஸந்தி. ‘‘பந்தோ’’தி ச ‘‘ஸண்ஹோ’’தி ச ஏதஸ்ஸேவ வேவசனானி. உப்³ப³த்³த⁴பிண்டி³கோதி ஹேட்டா² ஓருள்ஹாஹி வா உபரி ஆருள்ஹாஹி வா மஹதீஹி ஜங்க⁴பிண்டி³காஹி ஸமன்னாக³தோ.

2510. யட்டி²ஜங்கோ⁴தி யட்டி²ஸதி³ஸாய ஜங்கா⁴ய ஸமன்னாக³தோ. மஹாஜங்கோ⁴தி ஸரீரஸ்ஸ அனனுரூபாய மஹதியா ஜங்கா⁴ய ஸமன்னாக³தோ. மஹாபாதோ³பி வாதி ஸரீரஸ்ஸ அனனுரூபேஹி மஹந்தேஹி பாதே³ஹி ஸமன்னாக³தோ. அபி-ஸத்³தே³ன தூ²லஜங்க⁴பிண்டி³கோ ஸங்க³ஹிதோ, ப⁴த்தபுடஸதி³ஸாய தூ²லாய ஜங்க⁴பிண்டி³யா ஸமன்னாக³தோதி அத்தோ². பிட்டி²கபாதோ³ வாதி பாத³வேமஜ்ஜ²தோ உட்டி²தஜங்கோ⁴. மஹாபண்ஹிபி வாதி அனனுரூபேஹி அதிமஹந்தேஹி பண்ஹீஹி ஸமன்னாக³தோ.

2511. வங்கபாதோ³தி அந்தோ வா ப³ஹி வா பரிவத்தபாத³வஸேன து³விதோ⁴ வங்கபாதோ³. க³ண்டி²கங்கு³லிகோதி ஸிங்கி³வேரப²ணஸதி³ஸாஹி அங்கு³லீஹி ஸமன்னாக³தோ. ‘‘அந்த⁴னகோ² வாபீ’’தி ஏதஸ்ஸ அத்த²பத³ம் ‘‘காளபூதினகோ²பி சா’’தி. யதா²ஹ – ‘‘அந்த⁴னகோ² வா காளவண்ணேஹி பூதினகே²ஹி ஸமன்னாக³தோ’’தி (மஹாவ. அட்ட². 119).

2512. இச்சேவந்தி யதா²வுத்தவசனீயனித³ஸ்ஸனத்தோ²யம் நிபாதஸமுதா³யோ. அங்க³வேகல்லதாய ப³ஹுவித⁴த்தா அனவஸேஸம் வேகல்லப்பகாரம் ஸங்க³ண்ஹிதுமாஹ ‘‘இச்சேவமாதி³க’’ந்தி.

பரிஸதூ³ஸககதா²வண்ணனா.

2514. பத்தசீவரந்தி ஏத்த² ‘‘ஸாமணேரஸ்ஸா’’தி அதி⁴காரதோ லப்³ப⁴தி. அந்தோ நிக்கி²பதோதி ஓவரகாதீ³னம் அந்தோ நிக்கி²பந்தஸ்ஸ. ஸப்³ப³பயோகே³ஸூதி பத்தசீவரஸ்ஸ ஆமஸனாதி³ஸப்³ப³பயோகே³ஸு.

2515-6. த³ண்ட³கம்மம் கத்வாதி த³ண்ட³கம்மம் யோஜேத்வா. த³ண்டே³ந்தி வினேந்தி ஏதேனாதி த³ண்டோ³, ஸோயேவ கத்தப்³ப³த்தா கம்மந்தி த³ண்ட³கம்மம், ஆவரணாதி³. அனாசாரஸ்ஸ து³ப்³ப³சஸாமணேரஸ்ஸ கேவலம் ஹிதகாமேன பி⁴க்கு²னா த³ண்ட³கம்மம் கத்வா த³ண்ட³கம்மம் யோஜேத்வா யாகு³ம் வா ப⁴த்தம் வா வா-ஸத்³தே³ன பத்தம் வா சீவரம் வா த³ஸ்ஸேத்வா ‘‘த³ண்ட³கம்மே ஆஹடே த்வம் இத³ம் லச்ச²ஸி’’ இதி பா⁴ஸிதும் வட்டதீதி யோஜனா. கிராதி பத³பூரணத்தே² நிபாதோ.

2517. த⁴ம்மஸங்கா³ஹகத்தே²ரேஹி ட²பிதத³ண்ட³கம்மம் த³ஸ்ஸேதுமாஹ ‘‘அபராதா⁴னுரூபேனா’’திஆதி³. தம் அபராதா⁴னுரூபத³ண்ட³கம்மம் நாம வாலிகாஸலிலாதீ³னம் ஆஹராபனமேவாதி யோஜேதப்³ப³ம். ஆதி³-ஸத்³தே³ன தா³ருஆதீ³னம் ஆஹராபனம் க³ண்ஹாதி. தஞ்ச கோ² ‘‘ஓரமிஸ்ஸதீ’’தி அனுகம்பாய, ந ‘‘நஸ்ஸிஸ்ஸதி விப்³ப⁴மிஸ்ஸதீ’’திஆதி³னயப்பவத்தேன பாபஜ்ஜா²ஸயேன.

2518-9. அகத்தப்³ப³ம் த³ண்ட³கம்மம் த³ஸ்ஸேதுமாஹ ‘‘ஸீஸே வா’’திஆதி³. ஸீஸே வாதி ஏத்த² ‘‘ஸாமணேரஸ்ஸா’’தி அதி⁴காரதோ லப்³ப⁴தி. பாஸாணாதீ³னீதி ஏத்த² ஆதி³-ஸத்³தே³ன இட்ட²காதீ³னம் க³ஹணம். ஸாமணேரம் உண்ஹே பாஸாணே நிபஜ்ஜாபேதும் வா உண்ஹாய பூ⁴மியா நிபஜ்ஜாபேதும் வா உத³கம் பவேஸேதும் வா பி⁴க்கு²னோ ந வட்டதீதி யோஜனா.

ப⁴க³வதா அனுஞ்ஞாதத³ண்ட³கம்மம் த³ஸ்ஸேதுமாஹ ‘‘இதா⁴’’திஆதி³. இதா⁴தி இமஸ்மிம் த³ண்ட³கம்மாதி⁴காரே. ஆவரணமத்தந்தி ‘‘மா இத⁴ பாவிஸீ’’தி நிவாரணமத்தம். பகாஸிதந்தி ‘‘அனுஜானாமி, பி⁴க்க²வே, யத்த² வா வஸதி, யத்த² வா படிக்கமதி, தத்த² ஆவரணம் காது’’ந்தி (மஹாவ. 107) பா⁴ஸிதம்.

‘‘யத்த² வா வஸதி, யத்த² வா படிக்கமதீதி யத்த² வஸதி வா பவிஸதி வா, உப⁴யேனாபி அத்தனோ பரிவேணஞ்ச வஸ்ஸக்³கே³ன பத்தஸேனாஸனஞ்ச வுத்த’’ந்தி (மஹாவ. அட்ட². 107) அட்ட²கதா²ய வுத்தத்தா யாவ யோஜிதம் த³ண்ட³கம்மம் கரோந்தி, தாவ அத்தனோ புக்³க³லிகபரிவேணம் வா வஸ்ஸக்³கே³ன பத்தஸேனாஸனம் வா பவிஸிதும் அத³த்வா நிவாரணம் ஆவரணம் நாம. அட்ட²கதா²யம் ‘‘அத்தனோ’’தி வசனம் யே ஆவரணம் கரோந்தி, தே ஆசரியுபஜ்ஜா²யே ஸந்தா⁴ய வுத்தந்தி விஞ்ஞாயதி. கேசி பனேத்த² ‘‘அத்தனோ’’தி இத³ம் யஸ்ஸ ஆவரணம் கரோந்தி, தம் ஸந்தா⁴ய வுத்தந்தி க³ஹேத்வா தத்த² வினிச்ச²யம் வத³ந்தி. கேசி உப⁴யதா²பி அத்த²ம் க³ஹேத்வா உப⁴யத்தா²பி ஆவரணம் காதப்³ப³ந்தி வத³ந்தி. வீமம்ஸித்வா யமேத்த² யுத்ததரம், தம் க³ஹேதப்³ப³ம்.

நிவாரணகதா²வண்ணனா.

2520. பக்கோ² ச ஓபக்கமிகோ ச ஆஸித்தோ சாதி விக்³க³ஹோ. ஏத்த² ச ‘‘அனுபோஸதே² உபோஸத²ம் கரோதீ’’திஆதீ³ஸு யதா² உபோஸத²தி³னே கத்தப்³ப³கம்மம் ‘‘உபோஸதோ²’’தி வுச்சதி, ததா² மாஸஸ்ஸ பக்கே² பண்ட³கபா⁴வமாபஜ்ஜந்தோ ‘‘பக்கோ²’’தி வுத்தோ. அத² வா பக்க²பண்ட³கோ பக்கோ² உத்தரபத³லோபேன யதா² ‘‘பீ⁴மஸேனோ பீ⁴மோ’’தி. இத³ஞ்ச பாபானுபா⁴வேன கண்ஹபக்கே²யேவ பண்ட³கபா⁴வமாபஜ்ஜந்தஸ்ஸ அதி⁴வசனம். யதா²ஹ ‘‘அகுஸலவிபாகானுபா⁴வேன காளபக்கே² காளபக்கே² பண்ட³கோ ஹோதி, ஜுண்ஹபக்கே² பனஸ்ஸ பரிளாஹோ வூபஸம்மதி, அயம் பக்க²பண்ட³கோ’’தி (மஹாவ. அட்ட². 109).

யஸ்ஸ உபக்கமேன பீ³ஜானி அபனீதானி, அயம் ஓபக்கமிகபண்ட³கோ. யஸ்ஸ பரேஸம் அங்க³ஜாதம் முகே²ன க³ஹேத்வா அஸுசினா ஆஸித்தஸ்ஸ பரிளாஹோ வூபஸம்மதி, அயம் ஆஸித்தபண்ட³கோ. உஸூயகோதி யஸ்ஸ பரேஸம் அஜ்ஜா²சாரம் பஸ்ஸதோ உஸூயாய உப்பன்னாய பரிளாஹோ வூபஸம்மதி, அயம் உஸூயபண்ட³கோ. யோ படிஸந்தி⁴யம்யேவ அபா⁴வகோ உப்பன்னோ, அயம் நபும்ஸகபண்ட³கோ.

2521. தேஸூதி தேஸு பஞ்சஸு பண்ட³கேஸு. ‘‘பக்க²பண்ட³கஸ்ஸ யஸ்மிம்பக்கே² பண்ட³கோ ஹோதி, தஸ்மிம்யேவஸ்ஸ பக்கே² பப்³ப³ஜ்ஜா வாரிதா’’தி (மஹாவ. அட்ட². 109) குருந்தி³யம் வுத்தத்தா ‘‘திண்ணம் நிவாரிதா’’தி இத³ம் தஸ்ஸ பண்ட³கஸ்ஸ பண்ட³கபக்க²ம் ஸந்தா⁴ய வுத்தந்தி க³ஹேதப்³ப³ம்.

2522. ‘‘நாஸேதப்³போ³’’தி இத³ம் லிங்க³னாஸனம் ஸந்தா⁴ய வுத்தம். யதா²ஹ ‘‘ஸோபி லிங்க³னாஸனேனேவ நாஸேதப்³போ³’’தி (மஹாவ. அட்ட². 109). ஏஸ நயோ உபரிபி ஈதி³ஸேஸு டா²னேஸு.

பண்ட³ககதா²வண்ணனா.

2523. தே²னேதீதி தே²னோ, லிங்க³ஸ்ஸ பப்³ப³ஜிதவேஸஸ்ஸ தே²னோ லிங்க³தே²னோ. ஸம்வாஸஸ்ஸ பி⁴க்கு²வஸ்ஸக³ணனாதி³கஸ்ஸ தே²னோ ஸம்வாஸதே²னோ. தது³ப⁴யஸ்ஸ சாதி தஸ்ஸ லிங்க³ஸ்ஸ, ஸம்வாஸஸ்ஸ ச உப⁴யஸ்ஸ தே²னோதி ஸம்ப³ந்தோ⁴. ஏஸ திவிதோ⁴பி தே²ய்யஸம்வாஸகோ நாம பவுச்சதீதி யோஜனா.

2524-6. தத்த² தேஸு தீஸு தே²ய்யஸம்வாஸகேஸு யோ ஸயமேவ பப்³ப³ஜித்வா பி⁴க்கு²வஸ்ஸானி ந க³ண்ஹதி, யதா²வுட்³ட⁴ம் வந்த³னம்பி நேவ க³ண்ஹதி, அபி-ஸத்³தே³ன ஆஸனேன நேவ படிபா³ஹதி உபோஸத²பவாரணாதீ³ஸு நேவ ஸந்தி³ஸ்ஸதீதி ஸங்க³ண்ஹனதோ தது³ப⁴யம்பி ந கரோதி, அயம் லிங்க³மத்தஸ்ஸ பப்³ப³ஜிதவேஸமத்தஸ்ஸ தே²னதோ சோரிகாய க³ஹணதோ லிங்க³த்தே²னோ ஸியாதி யோஜனா.

யோ ச பப்³ப³ஜிதோ ஹுத்வா பி⁴க்கு²வஸ்ஸானி க³ண்ஹதி, ஸோ யதா²வுட்³ட⁴வந்த³னாதி³கம் ஸம்வாஸம் ஸாதி³யந்தோவ ஸம்வாஸத்தே²னகோ மதோதி யோஜனா. யதா²ஹ – ‘‘பி⁴க்கு²வஸ்ஸக³ணனாதி³கோ ஹி ஸப்³போ³பி கிரியபே⁴தோ³ இமஸ்மிம் அத்தே² ‘ஸம்வாஸோ’தி வேதி³தப்³போ³’’தி (மஹாவ. அட்ட². 110).

வுத்தனயோயேவாதி உபி⁴ன்னம் பச்சேகம் வுத்தலக்க²ணமேவ ஏதஸ்ஸ லக்க²ணந்தி கத்வா வுத்தம். அயம் திவிதோ⁴பி தே²ய்யஸம்வாஸகோ அனுபஸம்பன்னோ ந உபஸம்பாதே³தப்³போ³, உபஸம்பன்னோ நாஸேதப்³போ³, புன பப்³ப³ஜ்ஜம் யாசந்தோபி ந பப்³பா³ஜேதப்³போ³. ப்³யதிரேகமுகே²ன தே²ய்யஸம்வாஸலக்க²ணம் நியமேதும் அட்ட²கதா²ய (மஹாவ. அட்ட². 110) வுத்தகா³தா²த்³வயம் உதா³ஹரந்தோ ஆஹ ‘‘யதா²ஹ சா’’தி. யதா² அட்ட²கதா²சரியோ ராஜது³ப்³பி⁴க்கா²தி³கா³தா²த்³வயமாஹ, ததா²யமத்தோ² ப்³யதிரேகதோ வேதி³தப்³போ³தி அதி⁴ப்பாயோ.

2527-8. ராஜது³ப்³பி⁴க்க²கந்தார-ரோக³வேரிப⁴யேஹி வாதி ஏத்த² ப⁴ய-ஸத்³தோ³ பச்சேகம் யோஜேதப்³போ³ ‘‘ராஜப⁴யேன து³ப்³பி⁴க்க²ப⁴யேனா’’திஆதி³னா. சீவராஹரணத்த²ம் வாதி அத்தனா பரிச்சத்தசீவரம் புன விஹாரம் ஆஹரணத்தா²ய. இத⁴ இமஸ்மிம் ஸாஸனே. ஸம்வாஸம் நாதி⁴வாஸேதி, யாவ ஸோ ஸுத்³த⁴மானஸோதி ராஜப⁴யாதீ³ஹி க³ஹிதலிங்க³தாய ஸோ ஸுத்³த⁴மானஸோ யாவ ஸம்வாஸம் நாதி⁴வாஸேதீதி அத்தோ².

யோ ஹி ராஜப⁴யாதீ³ஹி வினா கேவலம் பி⁴க்கூ² வஞ்சேத்வா தேஹி ஸத்³தி⁴ம் வஸிதுகாமதாய லிங்க³ம் க³ண்ஹாதி, ஸோ அஸுத்³த⁴சித்ததாய லிங்க³க்³க³ஹணேனேவ தே²ய்யஸம்வாஸகோ நாம ஹோதி. அயம் பன தாதி³ஸேன அஸுத்³த⁴சித்தேன பி⁴க்கூ² வஞ்சேதுகாமதாய அபா⁴வதோ யாவ ஸம்வாஸம் நாதி⁴வாஸேதி, தாவ தே²ய்யஸம்வாஸகோ நாம ந ஹோதி. தேனேவ ‘‘ராஜப⁴யாதீ³ஹி க³ஹிதலிங்கா³னம் ‘கி³ஹீ மம் ஸமணோதி ஜானந்தூ’தி வஞ்சனாசித்தே ஸதிபி பி⁴க்கூ²னம் வஞ்சேதுகாமதாய அபா⁴வா தோ³ஸோ ந ஜாதோ’’தி தீஸுபி க³ண்டி²பதே³ஸு வுத்தம்.

கேசி பன ‘‘வூபஸந்தப⁴யதா இத⁴ ஸுத்³த⁴சித்ததா’’தி வத³ந்தி, ஏவஞ்ச ஸதி ஸோ வூபஸந்தப⁴யோ யாவ ஸம்வாஸம் நாதி⁴வாஸேதி, தாவ தே²ய்யஸம்வாஸகோ நாம ந ஹோதீதி அயமத்தோ² விஞ்ஞாயதி. இமஸ்மிஞ்ச அத்தே² விஞ்ஞாயமானே அவூபஸந்தப⁴யஸ்ஸ ஸம்வாஸஸாதி³யனேபி தே²ய்யஸம்வாஸகதா ந ஹோதீதி ஆபஜ்ஜேய்ய, ந ச அட்ட²கதா²யம் அவூபஸந்தப⁴யஸ்ஸ ஸம்வாஸஸாதி³யனே அதே²ய்யஸம்வாஸகதா த³ஸ்ஸிதா. ‘‘ஸப்³ப³பாஸண்டி³யப⁴த்தானி பு⁴ஞ்ஜந்தோ’’தி ச இமினா அவூபஸந்தப⁴யேனாபி ஸம்வாஸம் அஸாதி³யந்தேனேவ வஸிதப்³ப³ந்தி தீ³பேதி. தேனேவ தீஸுபி க³ண்டி²பதே³ஸு வுத்தம் ‘‘யஸ்மா விஹாரம் ஆக³ந்த்வா ஸங்கி⁴கம் க³ண்ஹந்தஸ்ஸ ஸம்வாஸம் பரிஹரிதும் து³க்கரம், தஸ்மா ‘ஸப்³ப³பாஸண்டி³யப⁴த்தானி பு⁴ஞ்ஜந்தோ’தி இத³ம் வுத்த’’ந்தி. தஸ்மா ராஜப⁴யாதீ³ஹி க³ஹிதலிங்க³தா சேத்த² ஸுத்³த⁴சித்ததாதி க³ஹேதப்³ப³ம்.

தாவ ஏஸ தே²ய்யஸம்வாஸகோ நாம ந வுச்சதீதி யோஜனா. அயமேத்த² ஸங்கே²போ, வித்தா²ரோ பன ‘‘தத்ராயம் வித்தா²ரனயோ’’தி அட்ட²கதா²யம் (மஹாவ. அட்ட². 110) ஆக³தனயேன வேதி³தப்³போ³.

தே²ய்யஸம்வாஸககதா²வண்ணனா.

2529-30. யோ உபஸம்பன்னோ பி⁴க்கு² ‘‘அஹம் தித்தி²யோ ப⁴விஸ்ஸ’’ந்தி ஸலிங்கே³னேவ அத்தனோ பி⁴க்கு²வேஸேனேவ தித்தி²யானம் உபஸ்ஸயம் யாதி சேதி ஸம்ப³ந்தோ⁴. தித்தி²யேஸு பக்கந்தகோ பவிட்டோ² தித்தி²யபக்கந்தகோ. தேஸம் லிங்கே³ நிஸ்ஸிதேதி தேஸம் தித்தி²யானம் வேஸே க³ஹிதே.

2531. ‘‘அஹம் தித்தி²யோ ப⁴விஸ்ஸ’’ந்தி குஸசீராதி³கம் யோ ஸயமேவ நிவாஸேதி, ஸோபி பக்கந்தகோ தித்தி²யபக்கந்தகோ ஸியாதி யோஜனா.

2532-4. நக்³கோ³ தேஸம் ஆஜீவகாதீ³னம் உபஸ்ஸயம் க³ந்த்வாதி யோஜனா. கேஸே லுஞ்சாபேதீதி அத்தனோ கேஸே லுஞ்சாபேதி. தேஸம் வதானி ஆதி³யதி வாதி யோஜனா. வதானி ஆதி³யதீதி உக்குடிகப்பதா⁴னாதீ³னி வா வதானி ஆதி³யதி. தேஸம் தித்தி²யானம் மோரபிஞ்சா²தி³கம் லிங்க³ம் ஸஞ்ஞாணம் ஸசே க³ண்ஹாதி வா தேஸம் பப்³ப³ஜ்ஜம், லத்³தி⁴மேவ வா ஸாரதோ வா ஏதி உபக³ச்ச²தி வாதி யோஜனா. ‘‘அயம் பப்³ப³ஜ்ஜா ஸேட்டா²தி ஸேட்ட²பா⁴வம் வா உபக³ச்ச²தீ’’தி (மஹாவ. அட்ட². 110 தித்தி²யபக்கந்தககதா²) அட்ட²கதா²யம் வுத்தம். ஏஸ தித்தி²யபக்கந்தகோ ஹோதி ஏவ, ந பன விமுச்சதி தித்தி²யபக்கந்தபா⁴வதோ. நக்³க³ஸ்ஸ க³ச்ச²தோதி ‘‘ஆஜீவகோ ப⁴விஸ்ஸ’’ந்தி காஸாயாதீ³னி அனாதா³ய நக்³க³ஸ்ஸ ஆஜீவகானம் உபஸம்க³ச்ச²தோ.

2535. தே²ய்யஸம்வாஸகோ அனுபஸம்பன்னவஸேன வுத்தோ, நோ உபஸம்பன்னவஸேன. இமினா ‘‘உபஸம்பன்னோ பி⁴க்கு² கூடவஸ்ஸம் க³ண்ஹந்தோபி அஸ்ஸமணோ ந ஹோதி. லிங்கே³ ஸஉஸ்ஸாஹோ பாராஜிகம் ஆபஜ்ஜித்வா பி⁴க்கு²வஸ்ஸாதீ³னி க³ணேந்தோபி தே²ய்யஸம்வாஸகோ ந ஹோதீ’’தி அட்ட²கதா²க³தவினிச்ச²யம் தீ³பேதி. ததா² வுத்தோதி யோஜனா. ‘‘உபஸம்பன்னபி⁴க்கு²னா’’தி இமினா அனுபஸம்பன்னம் நிவத்தேதி. தேன ச ‘‘ஸாமணேரோ ஸலிங்கே³ன தித்தா²யதனம் க³தோபி புன பப்³ப³ஜ்ஜஞ்ச உபஸம்பத³ஞ்ச லப⁴தீ’’தி குருந்த³ட்ட²கதா²க³தவினிச்ச²யம் த³ஸ்ஸேதி.

தித்தி²யபக்கந்தகஸ்ஸ கிம் காதப்³ப³ந்தி? ந பப்³பா³ஜேதப்³போ³, பப்³பா³ஜிதோபி ந உபஸம்பாதே³தப்³போ³, உபஸம்பாதி³தோ ச காஸாயானி அபனேத்வா ஸேதகானி த³த்வா கி³ஹிபா⁴வம் உபனேதப்³போ³. அயமத்தோ² ச ‘‘தித்தி²யபக்கந்தகோ பி⁴க்க²வே அனுபஸம்பன்னோ ந உபஸம்பாதே³தப்³போ³, உபஸம்பன்னோ நாஸேதப்³போ³’’தி (மஹாவ. 110) பாளிதோ ச ‘‘ஸோ ந கேவலம் ந உபஸம்பாதே³தப்³போ³, அத² கோ² ந பப்³பா³ஜேதப்³போ³பீ’’தி (மஹாவ. அட்ட². 110 தித்தி²யபக்கந்தககதா²) அட்ட²கதா²வசனதோ ச வேதி³தப்³போ³.

தித்தி²யபக்கந்தககதா²வண்ணனா.

2536. இதா⁴தி இமஸ்மிம் பப்³ப³ஜ்ஜூபஸம்பதா³தி⁴காரே. மனுஸ்ஸஜாதிகதோ அஞ்ஞஸ்ஸ திரச்சா²னக³தேயேவ அந்தோக³த⁴த்தம் த³ஸ்ஸேதுமாஹ ‘‘யக்கோ² ஸக்கோபி வா’’தி. திரச்சா²னக³தோ வுத்தோதி ஏத்த² இதி-ஸத்³தோ³ லுத்தனித்³தி³ட்டோ². ‘‘திரச்சா²னக³தோ, பி⁴க்க²வே, அனுபஸம்பன்னோ ந உபஸம்பாதே³தப்³போ³, உபஸம்பன்னோ நாஸேதப்³போ³’’தி (மஹாவ. 111) வசனதோ பப்³ப³ஜ்ஜாபி உபலக்க²ணதோ நிவாரிதாயேவாதி கத்வா வுத்தம் ‘‘பப்³பா³ஜேதும் ந வட்டதீ’’தி. தேன திரச்சா²னக³தோ ச ப⁴க³வதோ அதி⁴ப்பாயஞ்ஞூஹி அட்ட²கதா²சரியேஹி ந பப்³பா³ஜேதப்³போ³தி (மஹாவ. அட்ட². 111) வுத்தம்.

திரச்சா²னகதா²வண்ணனா.

2537. பஞ்சானந்தரிகே போஸேதி மாதுகா⁴தகோ, பிதுகா⁴தகோ, அரஹந்தகா⁴தகோ, லோஹிதுப்பாத³கோ, ஸங்க⁴பே⁴த³கோதி ஆனந்தரியகம்மேஹி ஸமன்னாக³தே பஞ்ச புக்³க³லே.

தத்த² மாதுகா⁴தகோ (மஹாவ. அட்ட². 112) நாம யேன மனுஸ்ஸித்தி²பூ⁴தா ஜனிகா மாதா ஸயம்பி மனுஸ்ஸஜாதிகேனேவ ஸதா ஸஞ்சிச்ச ஜீவிதா வோரோபிதா, அயம் ஆனந்தரியேன மாதுகா⁴தககம்மேன மாதுகா⁴தகோ, ஏதஸ்ஸ பப்³ப³ஜ்ஜா ச உபஸம்பதா³ ச படிக்கி²த்தா. யேன பன மனுஸ்ஸித்தி²பூ⁴தாபி அஜனிகா போஸாவனிகமாதா வா சூளமாதா வா மஹாமாதா வா ஜனிகாபி வா நமனுஸ்ஸித்தி²பூ⁴தா மாதாகா⁴திதா, தஸ்ஸ பப்³ப³ஜ்ஜா ந வாரிதா, ந ச ஆனந்தரியோ ஹோதி. யேன ஸயம் திரச்சா²னபூ⁴தேன மனுஸ்ஸித்தி²பூ⁴தா மாதா கா⁴திதா, ஸோபி ஆனந்தரியோ ந ஹோதி, திரச்சா²னக³தத்தா பனஸ்ஸ பப்³ப³ஜ்ஜா படிக்கி²த்தாவ. பிதுகா⁴தகேபி ஏஸேவ நயோ. ஸசேபி ஹி வேஸியா புத்தோ ஹோதி, ‘‘அயம் மே பிதா’’தி ந ஜானாதி, யஸ்ஸ ஸம்ப⁴வேன நிப்³ப³த்தோ, ஸோ சே அனேன கா⁴திதோ, ‘‘பிதுகா⁴தகோ’’த்வேவ ஸங்க்²யம் க³ச்ச²தி, ஆனந்தரியஞ்ச பு²ஸதி.

அரஹந்தகா⁴தகோபி மனுஸ்ஸஅரஹந்தவஸேனேவ வேதி³தப்³போ³. மனுஸ்ஸஜாதியஞ்ஹி அந்தமஸோ அபப்³ப³ஜிதம்பி கீ²ணாஸவம் தா³ரகம் வா தா³ரிகம் வா ஸஞ்சிச்ச ஜீவிதா வோரோபேந்தோ அரஹந்தகா⁴தகோவ ஹோதி, ஆனந்தரியஞ்ச பு²ஸதி, பப்³ப³ஜ்ஜா சஸ்ஸ வாரிதா. அமனுஸ்ஸஜாதிகம் பன அரஹந்தம், மனுஸ்ஸஜாதிகம் வா அவஸேஸம் அரியபுக்³க³லம் கா⁴தேத்வா ஆனந்தரியோ ந ஹோதி, பப்³ப³ஜ்ஜாபிஸ்ஸ ந வாரிதா, கம்மம் பன ப³லவம் ஹோதி. திரச்சா²னோ மனுஸ்ஸஅரஹந்தம்பி கா⁴தேத்வா ஆனந்தரியோ ந ஹோதி, கம்மம் பன பா⁴ரியம்.

யோ தே³வத³த்தோ விய து³ட்ட²சித்தேன வத⁴கசித்தேன ததா²க³தஸ்ஸ ஜீவமானகஸரீரே கு²த்³த³கமக்கி²காய பிவனகமத்தம்பி லோஹிதம் உப்பாதே³தி, அயம் லோஹிதுப்பாத³கோ நாம, ஏதஸ்ஸ பப்³ப³ஜ்ஜா ச உபஸம்பதா³ ச வாரிதா. யோ பன ரோக³வூபஸமனத்த²ம் ஜீவகோ விய ஸத்தே²ன பா²லேத்வா பூதிமம்ஸஞ்ச லோஹிதஞ்ச நீஹரித்வா பா²ஸும் கரோதி, ப³ஹும் ஸோ புஞ்ஞம் பஸவதி.

யோ தே³வத³த்தோ விய ஸாஸனம் உத்³த⁴ம்மம் உப்³பி³னயம் கத்வா சதுன்னம் கம்மானம் அஞ்ஞதரவஸேன ஸங்க⁴ம் பி⁴ந்த³தி, அயம் ஸங்க⁴பே⁴த³கோ நாம, ஏதஸ்ஸ பப்³ப³ஜ்ஜா ச உபஸம்பதா³ ச வாரிதா. ‘‘மாதுகா⁴தகோ, பி⁴க்க²வே, அனுபஸம்பன்னோ ந உபஸம்பாதே³தப்³போ³, உபஸம்பன்னோ நாஸேதப்³போ³’’திஆதி³காய (மஹாவ. 112) பாளியா உபஸம்பதா³படிக்கே²போ பப்³ப³ஜ்ஜாபடிக்கே²பஸ்ஸ உபலக்க²ணந்தி ஆஹ ‘‘பப்³பா³ஜேந்தஸ்ஸ து³க்கட’’ந்தி.

உப⁴தோப்³யஞ்ஜனஞ்சேவ பி⁴க்கு²னிதூ³ஸகஞ்ச ததா² பப்³பா³ஜேந்தஸ்ஸ து³க்கடந்தி ஸம்ப³ந்தோ⁴. உப⁴தோப்³யஞ்ஜனந்தி க-காரலோபேன நித்³தே³ஸோ. இத்தி²னிமித்துப்பாத³னகம்மதோ ச புரிஸனிமித்துப்பாத³னகம்மதோ ச உப⁴தோ ப்³யஞ்ஜனமஸ்ஸ அத்தீ²தி உப⁴தோப்³யஞ்ஜனகோ. ஸோ து³விதோ⁴ ஹோதி இத்தி²உப⁴தோப்³யஞ்ஜனகோ, புரிஸஉப⁴தோப்³யஞ்ஜனகோதி.

தத்த² இத்தி²உப⁴தோப்³யஞ்ஜனகஸ்ஸ (மஹாவ. அட்ட². 116) இத்தி²னிமித்தம் பாகடம் ஹோதி, புரிஸனிமித்தம் படிச்ச²ன்னம். புரிஸஉப⁴தோப்³யஞ்ஜனகஸ்ஸ புரிஸனிமித்தம் பாகடம் ஹோதி, இத்தி²னிமித்தம் படிச்ச²ன்னம். இத்தி²உப⁴தோப்³யஞ்ஜனகஸ்ஸ இத்தீ²ஸு புரிஸத்தம் கரோந்தஸ்ஸ இத்தி²னிமித்தம் படிச்ச²ன்னம் ஹோதி, புரிஸனிமித்தம் பாகடம் ஹோதி. புரிஸஉப⁴தோப்³யஞ்ஜனகஸ்ஸ புரிஸானம் இத்தி²பா⁴வம் உபக³ச்ச²ந்தஸ்ஸ புரிஸனிமித்தம் படிச்ச²ன்னம் ஹோதி, இத்தி²னிமித்தம் பாகடம் ஹோதி. இத்தி²உப⁴தோப்³யஞ்ஜனகோ ஸயஞ்ச க³ப்³ப⁴ம் க³ண்ஹாதி, பரஞ்ச க³ப்³ப⁴ம் க³ண்ஹாபேதி. புரிஸஉப⁴தோப்³யஞ்ஜனகோ ஸயம் ந க³ண்ஹாதி, பரம் க³ண்ஹாபேதீதி இத³மேதேஸம் நானாகரணம். இமஸ்ஸ பன து³வித⁴ஸ்ஸாபி உப⁴தோப்³யஞ்ஜனகஸ்ஸனேவ பப்³ப³ஜ்ஜா அத்தி², ந உபஸம்பதா³தி இத³மித⁴ ஸன்னிட்டா²னம் வேதி³தப்³ப³ம்.

யோ பகதத்தம் பி⁴க்கு²னிம் (மஹாவ. அட்ட². 115) திண்ணம் மக்³கா³னம் அஞ்ஞதரஸ்மிம் தூ³ஸேதி, அயம் பி⁴க்கு²னிதூ³ஸகோ நாம, ஏதஸ்ஸ பப்³ப³ஜ்ஜா ச உபஸம்பதா³ ச வாரிதா. யோ பன காயஸம்ஸக்³கே³ன ஸீலவினாஸம் பாபேதி, தஸ்ஸ பப்³ப³ஜ்ஜா ச உபஸம்பதா³ ச ந வாரிதா. ப³லக்காரேன பன ஓதா³தவத்த²வஸனம் கத்வா அனிச்ச²மானம்யேவ தூ³ஸேந்தோபி பி⁴க்கு²னிதூ³ஸகோயேவ. ப³லக்காரேன பன ஓதா³தவத்த²வஸனம் கத்வா இச்ச²மானம் தூ³ஸேந்தோ பி⁴க்கு²னிதூ³ஸகோ ந ஹோதி. கஸ்மா? யஸ்மா கி³ஹிபா⁴வே ஸம்படிச்சி²தமத்தேயேவ ஸா அபி⁴க்கு²னீ ஹோதி. ஸகிம் ஸீலவிபன்னம் பன பச்சா² தூ³ஸேந்தோ நேவ பி⁴க்கு²னிதூ³ஸகோ ஹோதி, பப்³ப³ஜ்ஜம்பி உபஸம்பத³ம்பி லப⁴தி.

2538. பாளிஅட்ட²கதா²விமுத்தம் ஆசரியபரம்பராப⁴தவினிச்ச²யம் த³ஸ்ஸேதுமாஹ ‘‘ஏகதோ’’திஆதி³. ‘‘ஏகதோ’’தி இமினா பி⁴க்கு²ஸங்க⁴ஸ்ஸாபி க³ஹணம் ப⁴வேய்யாதி தம் பரிவஜ்ஜேதும் ‘‘பி⁴க்கு²னீனம் து ஸந்திகே’’தி வுத்தம். ஏதேன தம்தூ³ஸகஸ்ஸ ப⁴ப்³ப³தம் தீ³பேதி. ஸோ நேவ பி⁴க்கு²னிதூ³ஸகோ ஸியா, ‘‘உபஸம்பத³ம் லப⁴தேவ ச பப்³ப³ஜ்ஜம், ஸா ச நேவ பராஜிதா’’தி இத³ம் து³தியகா³தா²ய இதா⁴னேத்வா யோஜேதப்³ப³ம். கேவலம் பி⁴க்கு²னிஸங்கே⁴ உபஸம்பன்னா நாம ந ஹோதீதி அதி⁴ப்பாயேனேவ வுத்தம். ‘‘ஸா ச நேவ பராஜிதா’’தி இமினா தஸ்ஸா ச புன பப்³ப³ஜ்ஜூபஸம்பதா³ய ப⁴ப்³ப³தம் தீ³பேதி. அயமத்தோ² அட்ட²கதா²க³ண்டி²பதே³பி வுத்தோயேவ ‘‘பி⁴க்கு²னீனம் வஸேன ஏகதோஉபஸம்பன்னம் தூ³ஸேத்வா பி⁴க்கு²னிதூ³ஸகோ ந ஹோதி, பப்³ப³ஜ்ஜாதீ³னி லப⁴தி, ஸா ச பாராஜிகா ந ஹோதீதி வினிச்ச²யோ’’தி.

2539. ‘‘ஸிக்க²மானாஸாமணேரீஸு ச விப்படிபஜ்ஜந்தோ நேவ பி⁴க்கு²னிதூ³ஸகோ ஹோதி, பப்³ப³ஜ்ஜம்பி உபஸம்பத³ம்பி லப⁴தீ’’தி (மஹாவ. அட்ட². 115) அட்ட²கதா²க³தவினிச்ச²யம் த³ஸ்ஸேதுமாஹ ‘‘ஸசே அனுபஸம்பன்னதூ³ஸகோ’’தி. ‘‘உபஸம்பத³ம் லப⁴தேவ ச பப்³ப³ஜ்ஜ’’ந்தி இத³ம் யதா²டா²னேபி யோஜேதப்³ப³ம். ஸா ச நேவ பராஜிதாதி இத³ம் பன அட்ட²கதா²ய அனாக³தத்தா ச அனுபஸம்பன்னாய உபஸம்பன்னவிகப்பாபா⁴வா ச ந யோஜேதப்³ப³ம். அஸதி ஹி உபஸம்பன்னவிகப்பே பராஜிதவிகப்பாஸங்க³ஹோ படிஸேதோ⁴ நிரத்த²கோதி ஸா பப்³ப³ஜ்ஜூபஸம்பதா³னம் ப⁴ப்³பா³யேவாதி த³ட்ட²ப்³பா³. இமே பன பண்ட³காத³யோ ஏகாத³ஸ புக்³க³லா ‘‘பண்ட³கோ, பி⁴க்க²வே, அனுபஸம்பன்னோ ந உபஸம்பாதே³தப்³போ³, உபஸம்பன்னோ நாஸேதப்³போ³’’திஆதி³வசனதோ (மஹாவ. 109) அப⁴ப்³பா³யேவ, நேஸம் பப்³ப³ஜ்ஜா ச உபஸம்பதா³ ச ந ருஹதி, தஸ்மா ந பப்³பா³ஜேதப்³பா³. ஜானித்வா பப்³பா³ஜேந்தோ, உபஸம்பாதே³ந்தோ ச து³க்கடம் ஆபஜ்ஜதி. அஜானித்வாபி பப்³பா³ஜிதா, உபஸம்பாதி³தா ச ஜானித்வா லிங்க³னாஸனாய நாஸேதப்³பா³.

ஏகாத³ஸஅப⁴ப்³ப³புக்³க³லகதா²வண்ணனா.

2540. நூபஸம்பாத³னீயோவாதி ந உபஸம்பாதே³தப்³போ³வ. அனுபஜ்ஜா²யகோதி அஸன்னிஹிதஉபஜ்ஜா²யோ வா அக்³க³ஹிதஉபஜ்ஜா²யக்³க³ஹணோ வா. கரோதோதி அனுபஜ்ஜா²யகம் உபஸம்பாத³யதோ. து³க்கடம் ஹோதீதி ஆசரியஸ்ஸ ச க³ணஸ்ஸ ச து³க்கடாபத்தி ஹோதி. ந குப்பதி ஸசே கதந்தி ஸசே அனுபஜ்ஜா²யகஸ்ஸ உபஸம்பதா³கம்மம் கதம் ப⁴வேய்ய, தம் ந குப்பதி ஸமக்³கே³ன ஸங்கே⁴ன அகுப்பேன டா²னாரஹேன கதத்தா.

2541. ஏகேதி அப⁴யகி³ரிவாஸினோ. ‘‘ந க³ஹேதப்³ப³மேவா’’தி அட்ட²கதா²ய த³ள்ஹம் வுத்தத்தா வுத்தம். தம் வசனம். ஏத்த² ச உபஜ்ஜா²யே அஸன்னிஹிதேபி உபஜ்ஜா²யக்³க³ஹணே அகதேபி கம்மவாசாயம் பன உபஜ்ஜா²யகித்தனம் கதம்யேவாதி த³ட்ட²ப்³ப³ம். அஞ்ஞதா² ‘‘புக்³க³லம் ந பராமஸதீ’’தி வுத்தாய கம்மவிபத்தியா ஸம்ப⁴வதோ கம்மம் குப்பேய்ய. தேனேவ ‘‘உபஜ்ஜா²யம் அகித்தேத்வா’’தி அவத்வா ‘‘உபஜ்ஜ²ம் அக்³கா³ஹாபேத்வா’’தி (மஹாவ. அட்ட². 117) அட்ட²கதா²யம் வுத்தம். யதா² ச அபரிபுண்ணபத்தசீவரஸ்ஸ உபஸம்பதா³காலே கம்மவாசாயம் ‘‘பரிபுண்ணஸ்ஸ பத்தசீவர’’ந்தி அஸந்தம் வத்து²ம் கித்தேத்வா கம்மவாசாய கதாயபி உபஸம்பதா³ ருஹதி, ஏவம் ‘‘அயம் பு³த்³த⁴ரக்கி²தோ ஆயஸ்மதோ த⁴ம்மரக்கி²தஸ்ஸ உபஸம்பதா³பேக்கோ²’’தி அஸந்தம் புக்³க³லம் கித்தேத்வா கேவலம் ஸந்தபத³னீஹாரேன கம்மவாசாய கதாய உபஸம்பதா³ ருஹதியேவாதி த³ட்ட²ப்³ப³ம். தேனேவாஹ ‘‘ந குப்பதி ஸசே கத’’ந்தி. ‘‘ந, பி⁴க்க²வே, அனுபஜ்ஜா²யகோ உபஸம்பாதே³தப்³போ³, யோ உபஸம்பாதே³ய்ய, ஆபத்தி து³க்கடஸ்ஸா’’தி (மஹாவ. 117) ஏத்தகமேவ வத்வா ‘‘ஸோ ச புக்³க³லோ அனுபஸம்பன்னோ’’தி அவுத்தத்தா, கம்மவிபத்திலக்க²ணஸ்ஸ ச அஸம்ப⁴வதோ ‘‘ந க³ஹேதப்³ப³மேவ த’’ந்தி வுத்தம்.

ஸேஸேஸு ஸப்³ப³த்த²பீதி ஸங்க⁴க³ணபண்ட³கதே²ய்யஸம்வாஸகதித்தி²யபக்கந்தகதிரச்சா²னக³தமாதுபிதுஅரஹந்தகா⁴தகபி⁴க்கு²னிதூ³ஸகஸங்க⁴பே⁴த³கலோஹிதுப்பாத³கஉப⁴தோப்³யஞ்ஜனகஸங்கா²தேஹி உபஜ்ஜா²யேஹி உபஸம்பாதி³தேஸு ஸப்³பே³ஸு தேரஸஸு விகப்பேஸு. வுத்தஞ்ஹி ப⁴க³வதா ‘‘ந, பி⁴க்க²வே, ஸங்கே⁴ன உபஜ்ஜா²யேன உபஸம்பாதே³தப்³போ³, யோ உபஸம்பாதே³ய்ய, ஆபத்தி து³க்கடஸ்ஸா’’திஆதி³. ந கேவலம் ஏதேஸுயேவ தேரஸஸு, அத² ‘‘அபத்தகஅசீவரகஅசீவரபத்தகயாசிதகபத்தயாசிதகசீவரயாசிதகபத்தசீவரகா’’தி ஏதேஸு ச²ஸு விகப்பேஸு அயம் நயோ யோஜேதப்³போ³தி. ஸேஸ-க்³க³ஹணேன ஏதேஸம்பி ஸங்க³ஹோ. வுத்தஞ்ஹேதம் ப⁴க³வதா ‘‘ந, பி⁴க்க²வே, அபத்தகோ உபஸம்பாதே³தப்³போ³, யோ உபஸம்பாதே³ய்ய, ஆபத்தி து³க்கடஸ்ஸா’’திஆதி³ (மஹாவ. 118). அயம் நயோதி ‘‘ந குப்பதி ஸசே கத’’ந்தி வுத்தனயோ.

2542. பஞ்சவீஸதீதி சதுவீஸதி பாராஜிகா, ஊனவீஸதிவஸ்ஸோ சாதி பஞ்சவீஸதி. வுத்தஞ்ஹி ‘‘ந, பி⁴க்க²வே, ஜானம் ஊனவீஸதிவஸ்ஸோ புக்³க³லோ உபஸம்பாதே³தப்³போ³. யோ உபஸம்பாதே³ய்ய, யதா²த⁴ம்மோ காரேதப்³போ³’’தி (மஹாவ. 99). ஓஸாரோதி உபஸம்பதா³ஸங்கா²தோ ஓஸாரோ. தேனேவ சம்பேய்யக்க²ந்த⁴கே ‘‘தஞ்சே ஸங்கோ⁴ ஓஸாரேதி, ஏகச்சோ ஸோஸாரிதோ’’திஆதி³பாட²ஸ்ஸ (மஹாவ. 396) அட்ட²கதா²யம் ‘‘ஓஸாரேதீதி உபஸம்பதா³கம்மவஸேன பவேஸேதீ’’தி (மஹாவ. அட்ட². 396) வுத்தம். ‘‘நாஸனாரஹோ’’தி இமினா ‘‘பண்ட³கோ, பி⁴க்க²வே, அனுபஸம்பன்னோ ந உபஸம்பாதே³தப்³போ³’’திஆதி³வசனதோ (மஹாவ. 109) உபஸம்பாதி³தஸ்ஸாபி ஸேதகானி த³த்வா கி³ஹிபா⁴வம் பாபேதப்³ப³தம் தீ³பேதி.

2543. ஹத்த²ச்சி²ன்னாதி³ பா³த்திம்ஸாதி சம்பேய்யக்க²ந்த⁴கே –

‘‘ஹத்த²ச்சி²ன்னோ, பி⁴க்க²வே, அப்பத்தோ ஓஸாரணம், தஞ்சே ஸங்கோ⁴ ஓஸாரேதி, ஸோஸாரிதோ. பாத³ச்சி²ன்னோ…பே… ஹத்த²பாத³ச்சி²ன்னோ… கண்ணச்சி²ன்னோ… நாஸச்சி²ன்னோ… கண்ணனாஸச்சி²ன்னோ… அங்கு³லிச்சி²ன்னோ… அளச்சி²ன்னோ… கண்ட³ரச்சி²ன்னோ… ப²ணஹத்த²கோ… கு²ஜ்ஜோ… வாமனோ… க³லக³ண்டீ³… லக்க²ணாஹதோ… கஸாஹதோ… லிகி²தகோ… ஸீபதி³கோ… பாபரோகீ³… பரிஸதூ³ஸகோ… காணோ… குணீ… க²ஞ்ஜோ… பக்க²ஹதோ… சி²ன்னிரியாபதோ²… ஜராது³ப்³ப³லோ… அந்தோ⁴… மூகோ³… பதி⁴ரோ… அந்த⁴மூகோ³… அந்த⁴பதி⁴ரோ… மூக³பதி⁴ரோ… அந்த⁴மூக³பதி⁴ரோ, பி⁴க்க²வே, அப்பத்தோ ஓஸாரணம், தஞ்சே ஸங்கோ⁴ ஓஸாரேதி, ஸோஸாரிதோ’’தி (மஹாவ. 396) பா³த்திம்ஸ.

குட்டி²ஆதி³ ச தேரஸாதி மஹாக²ந்த⁴கே ஆக³தா –

‘‘குட்டி²ம் க³ண்டி³ம் கிலாஸிஞ்ச, ஸோஸிஞ்ச அபமாரிகம்;

ததா² ராஜப⁴டம் சோரம், லிகி²தம் காரபே⁴த³கம்.