நிஸ்ஸக்³கி³யகதா²வண்ணனா

551. ஏவம் அனியதகத²ம் த³ஸ்ஸேத்வா இதா³னி நிஸ்ஸக்³கி³யகத²ம் த³ஸ்ஸேதுமாஹ ‘‘கோ²ம’’ந்திஆதி³. கோ²மந்தி ஏவம்னாமகம் சீவரம். கோ²மந்தி க³ச்ச²விஸேஸஸ்ஸ நாமம், தஸ்ஸ வாகேஹி கதசீவரம் காரணோபசாரவோஹாரவஸேன ‘‘கோ²ம’’ந்தி வுத்தம். கப்பாஸந்தி கப்பாஸஸுத்தமயம் சீவரம், இத³ம்பி வுத்தனயேனேவ ‘‘கப்பாஸ’’ந்தி வுச்சதி. கோஸேய்யம் நாம கோஸகாரகிமிகோஸம், கோஸேன நிப்³ப³த்தம் ஸுத்தம் கோஸேய்யம். இத⁴ பன தேன கோஸேய்யஸுத்தேன நிப்³ப³த்தம் சீவரம் ‘‘கோஸேய்ய’’ந்தி வுத்தம். ஸாணந்தி ஸாணவாகஸுத்தேஹி வாயித்வா கதசீவரம். இத³ஞ்ச கோ²மம் விய த³ட்ட²ப்³ப³ம். ப⁴ங்க³ந்தி கோ²மஸுத்தாதீ³னி ஸப்³பா³னி, ஏகச்சானி வா மிஸ்ஸேத்வா கதசீவரம். இத³ம்பி கரணப்பகாரேன லத்³த⁴னாமகம். ‘‘ப⁴ங்க³ம் நாம ஏகா க³ச்ச²ஜாதி, தஸ்ஸா வாகமயஸுத்தேஹி வாயித்வா கதசீவர’’ந்தி கேசி. இமஸ்மிம் பக்கே² கோ²மம் விய க³ஹேதப்³ப³ம். கம்ப³லந்தி மனுஸ்ஸலோமவாளலோமம் வினா ஸேஸலோமேஹி வாயித்வா கதசீவரம் வுத்தந்தி. இத³ம் ‘‘சீவரம் நாம ச²ன்னம் சீவரானம் அஞ்ஞதரம் சீவர’’ந்தி (பாரா. 463) பத³பா⁴ஜனே ச ‘‘கோ²மம் கப்பாஸிகம் கோஸேய்யம் கம்ப³லம் ஸாணம் ப⁴ங்க³’’ந்தி (பாரா. அட்ட². 2.462-463) அட்ட²கதா²ய ச வுத்தம் ஸந்தா⁴யாஹ. ‘‘ஜாதிதோ’’தி இத³ம் பமாணாதி³பே⁴த³ஸ்ஸ வக்க²மானத்தா வுத்தம். ஜாதிதோதி கோ²மாதி³ஸாமஞ்ஞதோ. ஸாமஞ்ஞஞ்ஹி ‘‘ஜாதீ’’தி வுச்சதி. தீ³க⁴ரஸ்ஸதூ²லஸுகு²மனீலபீதாதி³பே⁴த³பி⁴ன்னானம் ஸப்³பே³ஸம் வத்தா²வயவானம் ஸங்கா³ஹிககோ²மஸுத்தமயதாஸாமஞ்ஞம் ஜாதீதி வுத்தம் ஹோதி. ஏவம் ஸேஸேஸுபி.

552. து³கூலந்தி ஏவம்னாமகம் ருக்க²வாகமயசீவரம். பத்துண்ணந்தி பத்துண்ணதே³ஸே ஸஞ்ஜாதவத்த²ம். ‘‘பத்துண்ணம் கோஸேய்யவிஸேஸோ’’தி அபி⁴தா⁴னகோஸே வுத்தம். சினந்தி சினதே³ஸே உப்பன்னவத்த²ம். ஸோமாரபட்டகந்தி ஸோமாரதே³ஸே உப்பன்னவத்த²ம். ‘‘ஸோமாரசினபடக’’ந்திபி லிக²ந்தி, ஸோயேவத்தோ². இத்³தி⁴ஜந்தி ஏஹிபி⁴க்கூ²னம் புஞ்ஞித்³தி⁴யா நிப்³ப³த்தம் சீவரம். தே³வதி³ன்னந்தி தே³வதாஹி தி³ன்னம் சீவரம். தஞ்ஹி கப்பருக்கே² நிப்³ப³த்தம், ஜாலினியா தே³வகஞ்ஞாய அனுருத்³த⁴த்தே²ரஸ்ஸ தி³ன்னவத்த²ஸதி³ஸம். தஸ்ஸாதி ஜாதிதோ ச²ப்³பி³த⁴ஸ்ஸ கப்பியசீவரஸ்ஸ. இத³ம் ச²ப்³பி³த⁴சீவரம் யதா²ரஹம் அனுலோமிகம் வுத்தந்தி அத்தோ². து³கூலஞ்ஹி ஸாணஸ்ஸ அனுலோமம் வாகமயத்தா, பத்துண்ணாதீ³னி கோஸேய்யஸ்ஸ அனுலோமானி பாணகேஹி கதஸுத்தமயத்தா, இத்³தி⁴ஜம்பி கோ²மாதீ³னம்யேவ அஞ்ஞதரம் ஹோதீதி தேஸம் அனுலோமம், தே³வதி³ன்னம்பி கோ²மாதீ³னம்யேவ அனுலோமம் ஹோதி தேஸம் அஞ்ஞதரபா⁴வதோ. யதா²ஹ –

‘‘ஸாணஸ்ஸ து து³கூலஞ்ஹி, இத்³தி⁴ஜம் தே³வதி³ன்னகம்;

கோ²மாதீ³னம்வஸிட்ட²ம்து, கோஸேய்யஸ்ஸானுலோமிக’’ந்தி.

553. திண்ணம் சீவரானம் ஸமாஹாரோ திசீவரந்தி பமாணயுத்தம் ஸங்கா⁴டிஆதி³னாமேன அதி⁴ட்டி²தசீவரஸ்ஸேவ நாமத்தா ததே³வ வுச்சதி. க³ணனவஸேன யம் கிஞ்சி சீவரத்தயம் ந வத்தப்³ப³ம். ஸமுத்³தே³கதே³ஸோபி யதா² ‘‘ஸமுத்³தோ³’’தி வுச்சதி, ஏவம் அதி⁴ட்டி²தேஸு தீஸு சீவரேஸு அஞ்ஞதரம் ‘‘திசீவர’’ந்தி வுச்சதி. பரிக்கா²ரசோளந்தி ஸங்கா⁴டிஆதி³விஸிட்ட²னாமேஹி அனதி⁴ட்டி²தம் ‘‘அனுஜானாமி பி⁴க்க²வே ஆயாமேன அட்ட²ங்கு³லம் ஸுக³தங்கு³லேன சதுரங்கு³லவித்த²தம் பச்சி²மம் சீவர’’ந்தி (பாரா. 358) அனுஞ்ஞாதம் பச்சி²மசீவரபரியந்தம் கத்வா கதாகதஸ்ஸ யஸ்ஸ கஸ்ஸசி சீவரஸ்ஸ ருள்ஹிஸஞ்ஞா.

முக²ம் ஸந்த³மானலாலம் புஞ்ச²தி ஏதேனாதி முக²புஞ்ச²னந்தி கபோலதோ நிச்சம் ஸந்த³மானலாலானம் புஞ்ச²னத்தா²ய அனுஞ்ஞாதஸ்ஸ சீவரவிஸேஸஸ்ஸ நாமம். நிஸீத³ந்தி ஏத்தா²தி நிஸீத³னந்தி ச பி⁴க்கூ²னம் அத்த²ரித்வா நிஸீதி³தும் அனுஞ்ஞாதஸ்ஸ சீவரஸ்ஸ நாமம். அதி⁴ட்டே²ய்யாதி ‘‘இமம் கண்டு³ப்படிச்சா²தி³’’ந்திஆதி³னா (வி. வி. 585) வக்க²மானனயேன நாமம் க³ஹேத்வா அதி⁴ட்டே²ய்யாதி அத்தோ². பச்சத்த²ரணமேவ சாதி ஸங்கி⁴கே மஞ்சபீடே² ஸரீரஸம்பு²ஸனேன ஆபஜ்ஜிதப்³பா³ய ஆபத்தியா மோசனத்தா²ய தத்த² அத்த²ரித்வா பரிபோ⁴க³த்தா²ய அனுஞ்ஞாதம் பச்சத்த²ரணசீவரஞ்ச.

554. ஏகாஹந்தி வஸனகிரியாய அச்சந்தஸம்யோகே³ உபயோக³வசனம். திசீவரந்தி திசீவரேன. விப்பவஸேய்யாதி ‘‘ஸங்கா⁴டியா வா உத்தராஸங்கே³ன வா அந்தரவாஸகேன வா’’தி (பாரா. 476) வுத்தத்தா ஏகதே³ஸே ஸமுதா³யோபசாரவஸேன அவயவஸ்ஸ வசனதோ திண்ணம் சீவரானம் அஞ்ஞதரேனாதிபி வுத்தம் ஹோதி. ‘‘ததா²’’தி இமினா ‘‘வினா’’தி இத³ம் பச்சாமஸதி. அதி⁴ட்டா²தி அதி⁴ட்டா²யாதி க³ஹேதப்³ப³ம் ‘‘படிஸங்கா² யோனிஸோ’’தி (ம. நி. 1.22, 23; அ. நி. 6.58) யதா², ஏத்த² ‘‘வளஞ்ஜியமான’’ந்தி ஸேஸோ, அதி⁴ட்டா²ய வளஞ்ஜியமானம் நிஸீத³னம் ததா² வினா சதுமாஸம் ந வஸேய்யாதி யோஜனா.

555. கப்பியந்தி கப்பியகாரணம் நீலாதி³வண்ணபே⁴த³கரணம். கப்பியந்தி ச காரணே காரியூபசாரேன க³ஹேதப்³ப³ம். பி³ந்து³ம் த³த்வாதி ‘‘நீலம் வா கத்³த³மம் வா காளஸாமம் வா’’தி (பாசி. 368) வுத்தலோஹமலாதி³னா யேன கேனசிபி மங்கு³லபிட்டி²ப்பமாணாதி³கம் பி³ந்து³ம் த³த்வா. தத்தா²தி தேஸு அதி⁴ட்டா²தப்³பே³ஸு திசீவராதீ³ஸு, நித்³தா⁴ரணே பு⁴ம்மம். திசீவரந்தி நித்³தா⁴ரிதப்³ப³ம். உபபன்னந்தி யுத்தம். பமாணேனாதி அனந்தரம் வக்க²மானேன பமாணேன. அதி⁴ட்டா²தப்³ப³ந்தி ‘‘இமம் ஸங்கா⁴டிம் அதி⁴ட்டா²மீ’’திஆதி³னா வக்க²மானனயேன நாமம் வத்வா அதி⁴ட்டா²தப்³ப³ம். ஏவகாரேன பன நாமம் வத்வா ந விகப்பேதப்³ப³ந்தி த³ஸ்ஸேதி. ஏஸ நயோ ஸேஸசீவரேஸுபி. வுத்தஞ்ஹேதம் ப⁴க³வதா ‘‘அனுஜானாமி பி⁴க்க²வே திசீவரம் அதி⁴ட்டா²தும், ந விகப்பேது’’ந்திஆதி³ (மஹாவ. 358). தஸ்மா திசீவராதீ³னி அதி⁴ட்ட²ஹந்தேன ‘‘இமம் ஸங்கா⁴டிம் அதி⁴ட்டா²மீ’’திஆதி³னா நாமம் வத்வா அதி⁴ட்டா²தப்³ப³ம். விகப்பேந்தேன பன ‘‘இமம் ஸங்கா⁴டி’’ந்திஆதி³னா தஸ்ஸ சீவரஸ்ஸ நாமம் அக்³க³ஹேத்வா ‘‘இமம் சீவரம் துய்ஹம் விகப்பேமீ’’தி விகப்பேதப்³ப³ம். திசீவரம் வா ஹோது அஞ்ஞம் வா, யதி³ தம் தம் நாமம் க³ஹேத்வா விகப்பேதி, அவிகப்பிதம் ஹோதி அதிரேகசீவரட்டா²னே திட்ட²தி. தம் சீவரந்தி ஸம்ப³ந்தோ⁴.

556-7. ‘‘உபபன்னம் பமாணேனா’’தி ஏத்த² வுத்தப்பமாணம் த³ஸ்ஸேதுமாஹ ‘‘பச்சி²மந்தேனா’’திஆதி³. ஸங்க⁴டிதட்டே²ன ஸங்கா⁴டி. வத்த²க²ண்டா³னி ஸிப்³ப³னகம்மேன ஸங்க⁴டேத்வா கதத்தா ‘‘ஸங்கா⁴டீ’’தி சீவரானம் ஸாமஞ்ஞனாமம். இத⁴ பன ருள்ஹியா அந்தரவாஸகாதி³விஸேஸனாமப்³யதிரித்தே சீவரவிஸேஸே வத்ததி. முட்டி²பஞ்சகாதி ஏத்த² ஏகாதீ³னமட்டா²ரஸந்தானம் ஸங்க்²யாஸத்³தா³னம் ஸங்க்²யேய்யே வத்தமானத்தா பஞ்சஸத்³தோ³ சீவரப்பமாணப்பகரணதோ லப்³ப⁴மானஹத்த²ஸங்கா²தரதனேயேவ பவத்ததி, தேனேவ முட்டி²ஸத்³தோ³பி உத்தரபத³லோபேன முட்டி²ரதனே வத்ததி. பஞ்சன்னம் பூரணோ பஞ்சமோ, முட்டி²யா பஞ்சமோ முட்டி²பஞ்சமோ. முட்டி²பஞ்சமோ பரிமாணமேதிஸ்ஸாதி ‘‘முட்டி²பஞ்சமகா’’தி வத்தப்³பே³ ம-காரலோபேன ‘‘முட்டி²பஞ்சகா’’தி ஸங்கா⁴டி வுத்தா.

முட்டி²த்திகாதி ஏத்த² வுத்தனயேன ஸங்க்²யேய்யே வத்தமானோ தி-ஸத்³தோ³ சீவரப்பமாணப்பகரணதோ லப்³ப⁴மானஹத்த²ஸங்கா²தரதனேயேவ வத்ததி, தேனேவ முட்டி²ஸத்³தோ³பி உத்தரபத³லோபேன முட்டி²ரதனே வத்ததி. திண்ணம் பூரணோ ததியோ, முட்டி²யா ததியோ முட்டி²ததியோ, முட்டி²ததியோ பரிமாணமேதிஸ்ஸாதி ‘‘முட்டி²ததியகா’’தி வத்தப்³பே³ திய-பச்சயலோபேன ‘‘முட்டி²த்திகா’’தி ஸங்கா⁴டியேவ வுச்சதி. ஏவமுபரிபி. திரியந்தி திரியதோ.

உத்தமந்தேனாதி உக்கட்ட²பரிமாணந்தேன. ஸத்து²னோ சீவரூனாபீதி ‘‘தத்ரித³ம் ஸுக³தஸ்ஸ ஸுக³தசீவரப்பமாணம், தீ³க⁴ஸோ நவ வித³த்தி²யோ ஸுக³தவித³த்தி²யா, திரியம் ச² வித³த்தி²யோ’’தி (பாசி. 548) வுத்தப்பமாணஸுக³தசீவரதோ ஊனாபி. பி-ஸத்³தோ³ ஸம்பா⁴வனே, உக்கட்ட²பரிச்சே²தே³ன தத்தகம்பி வட்டதி, ததோ சே ஊனம் வத்தப்³ப³மேவ நத்தீ²தி அத்தோ². அந்தத்³வயஸந்த³ஸ்ஸனேன உப⁴யமஜ்ஜே² யம் பஹோனகருச்சனகப்பமாணம், தம் க³ஹேதப்³ப³ந்தி த³ஸ்ஸேதி.

558. முட்டி²பஞ்சகஸத்³தோ³ புப்³பே³ வுத்தனயேனித⁴ தீ³க⁴ந்தே வத்ததி. முட்டி²பஞ்சகோ தீ³க⁴ந்தோ யஸ்ஸ, யஸ்மிம் வா பமாணேதி விக்³க³ஹோ, தீ³க⁴ந்ததோ முட்டி²பஞ்சகப்பமாணேனாதி வுத்தம் ஹோதி. ‘‘முட்டி²பஞ்சம’’ந்திபி லிக²ந்தி. திரியந்ததோதி வித்தா²ரந்ததோ. அட்³ட⁴ஹத்தோ² அட்³டோ⁴ உத்தரபத³லோபேன, ஸோ தேய்யோ ததியோ யஸ்ஸ பமாணஸ்ஸாதி க³ஹேதப்³ப³ம், தம், அட்³ட⁴தேய்யரதனப்பமாணம் ஹோதீதி அத்தோ². த்³விஹத்த²ம் வாதி த்³வே ஹத்தா² யஸ்ஸ பமாணஸ்ஸாதி விக்³க³ஹோ, த்³விரதனப்பமாணம் வா ஹோதீதி அத்தோ². இத³ஞ்ச ‘‘திரியம் த்³விஹத்தோ²பி வட்டதி. பாருபனேனபி ஹி ஸக்கா நாபி⁴ம் படிச்சா²தே³து’’ந்தி (பாரா. அட்ட². 2.469) அட்ட²கதா²க³தத்தா வுத்தம். ‘‘ஸேஸே அந்தரவாஸகே’’தி இத³ம் யதா²வுத்தபரிமாணேன பரிமிதசீவரனித³ஸ்ஸனம்.

559. அஹதாஹதகப்பானந்தி ஏத்த² ‘‘வத்தா²ன’’ந்தி ஸேஸோ. அஹதானம் வத்தா²னந்தி நவவத்தா²னம். அஹததோ கிஞ்சி ஊனானி அஹதகப்பானி, தேஸம் நவவோஹாரூபகா³னம் கதிபயதோ⁴தானம் வத்தா²னந்தி வுத்தம் ஹோதி. ஸங்கா⁴டீதி ஸங்கா⁴டினாமகசீவரம். தி³கு³ணாதி து³பட்டகதா.

560. உதுத்³த⁴டானந்தி அதிக்கந்ததி³வஸானம், ப³ஹுகாலம் நிவாஸேத்வா பரிச்சத்தானந்தி வுத்தம் ஹோதி. அத² வா யானி உதுதோ உத்³த⁴டானி, தேஸம் வத்தா²னந்தி க³ஹேதப்³ப³ம், திண்ணம் உதூனமஞ்ஞதரம் அதிக்கமித்வா டி²தானம் புராணவத்தா²னந்தி வுத்தம் ஹோதி. சீவரானந்தி சீவரத்தா²னி வத்தா²னேவ க³ஹிதானி. சதுக்³கு³ணாதி சதுபட்டா. ஸேஸா து³வேதி அந்தரவாஸகஉத்தராஸங்கா³ த்³வே. யதா²ஸுக²ந்தி யதா²ருசி. பம்ஸுகூலந்தி ஸுஸானாதீ³ஸு பதிதபிலோதிகசீவரம்.

561. ‘‘தீணிபீ’’திஆதீ³ஸு ‘‘திசீவரே கயிரமானே ஸப்³ப³ம் சி²ன்னகம் நப்பஹோதீ’’தி பாளியம் ஆக³தவத்து²ம்ஹி ‘‘அனுஜானாமி பி⁴க்க²வே த்³வே சி²ன்னகானி ஏகம் அசி²ன்னக’’ந்தி (மஹாவ. 360) ஆதி³வசனதோ ‘‘சீவர’’ந்தி ஸேஸோ. சி²ந்தி³தப்³ப³ந்தி வத்தா²னி சி²ந்தி³த்வா ஸிப்³பே³த்வா காதப்³ப³ம். பஹோதி சேதி வத்தா²னி சி²ந்தி³த்வா கரணே யதி³ சீவரஸ்ஸ பஹோதி. ஸப்³பே³ஸூதி தீஸு சீவரேஸு. அப்பஹோந்தேஸூதி வத்தா²னம் சி²ந்தி³த்வா ஸிப்³ப³னேன அப்பஹோந்தேஸு. அன்வாதி⁴கந்தி வத்தே² ஊனாதிரேகம் அபனேத்வா ஆக³ந்துகபத்தஸங்கா²தம் அனுவாதம் சீவரஸ்ஸ பரியந்தே, மஜ்ஜே² ச யதா²ரஹம் தீ³க⁴ரஸ்ஸபரிமாணயுத்தம் அல்லியாபேதப்³ப³ந்தி வுத்தம் ஹோதி.

562. அச்சி²ன்னம் வாதி யதா²வுத்தனயேன அச்சி²ன்னம் வா. அனாதி³ன்னந்தி அனாதி³ன்னஆக³ந்துகபத்தம். திசீவரந்தி தீஸு சீவரேஸு ஏகேகந்தி வுத்தம் ஹோதி. து³ப்³போ⁴கே³னாதி து³ட்டு² பரிபோ⁴கே³ன. யதா² பரிபு⁴த்தம் நஸ்ஸதி, ததா² கிலிட்டா²னம் தோ⁴வனாதி³மகத்வா நிவாஸனாதி³னா பரிபோ⁴கே³ன.

563-4. குஸிந்தி ஆயாமதோ ச வித்தா²ரதோ ச அனுவாதம் சீவரமஜ்ஜே² தாதி³ஸமேவ தீ³க⁴பத்தஞ்ச. வுத்தஞ்ஹேதம் சீவரக்க²ந்த⁴அட்ட²கதா²யம் ‘‘குஸீதி ஆயாமதோ ச வித்தா²ரதோ ச அனுவாதாதீ³னம் தீ³க⁴பத்தானமேதம் அதி⁴வசன’’ந்தி (மஹாவ. அட்ட². 345). அட்³ட⁴குஸிந்தி அனுவாதஸதி³ஸம் சீவரமஜ்ஜே² தத்த² தத்த² ரஸ்ஸபத்தம். வுத்தம்பி சேதம் ‘‘அட்³ட⁴குஸீதி அந்தரந்தரா ரஸ்ஸபத்தானம் நாம’’ந்தி (மஹாவ. அட்ட². 345). மண்ட³லந்தி ஏகேகஸ்மிம் க²ண்டே³ மஹாமண்ட³லம். வுத்தம்பி சேதம் ‘‘மண்ட³லந்தி பஞ்சக²ண்டி³கசீவரஸ்ஸ ஏகேகஸ்மிம் க²ண்டே³ மஹாமண்ட³ல’’ந்தி (மஹாவ. அட்ட². 345). அட்³ட⁴மண்ட³லந்தி மண்ட³லஸ்ஸ அந்தோ நிவேஸியமானம் கு²த்³த³கமண்ட³லம். வுத்தம்பி சேதம் ‘‘அட்³ட⁴மண்ட³லந்தி கு²த்³த³கமண்ட³ல’’ந்தி (மஹாவ. அட்ட². 345). விவட்டந்தி மண்ட³லம், அட்³ட⁴மண்ட³லஞ்சாதி த்³வே ஏகதோ கத்வா ஸிப்³பி³தம் வேமஜ்ஜே² க²ண்ட³ம். வுத்தம்பி சேதம் ‘‘விவட்டந்தி மண்ட³லஞ்ச அட்³ட⁴மண்ட³லஞ்ச ஏகதோ கத்வா ஸிப்³பி³தம் மஜ்ஜி²மக²ண்ட³’’ந்தி (மஹாவ. அட்ட². 345). அனுவிவட்டந்தி மஜ்ஜி²மக²ண்ட³ஸ்ஸ உபோ⁴ஸு பஸ்ஸேஸு ஸிப்³பி³தம் ததே²வ த்³விமண்ட³லபத்தம் க²ண்ட³த்³வயம். வுத்தம்பி சேதம் ‘‘அனுவிவட்டந்தி தஸ்ஸ உபோ⁴ஸு பஸ்ஸேஸு த்³வே க²ண்டா³னீ’’தி (மஹாவ. அட்ட². 345). பா³ஹந்தந்தி தேஸம் அனுவிவட்டானம் பா³ஹிரபஸ்ஸே ஸிப்³பி³தம் பா³ஹிரக²ண்ட³த்³வயம். வுத்தம்பி சேதம் ‘‘பா³ஹந்தந்தி தேஸம் அனுவிவட்டானம் ப³ஹி ஏகேகம் க²ண்ட³’’ந்தி (மஹாவ. அட்ட². 345).

பஞ்சன்னம் ஸமாஹாரோ பஞ்சகம், த³ஸ்ஸிதப்பகாரபஞ்சக²ண்டே³ஹி ஸிப்³பி³தசீவரம் பஞ்சகம் நாம. ஆதி³-ஸத்³தே³ன ஸத்தக²ண்டா³தீ³ஹி ஸிப்³பி³தசீவரானம் க³ஹணம். தேனேவேத்தா²ஹ ‘‘கத்தப்³ப³ம் து திசீவர’’ந்தி. ஸத்தக²ண்ட³ஸ்ஸ சீவரஸ்ஸ ஏகம் மஜ்ஜி²மக²ண்ட³ம் விவட்டனாமமேவ ஹோதி, தஸ்ஸ உபோ⁴ஸு பஸ்ஸேஸு த்³வே த்³வே க²ண்டா³னி சூளானுவிவட்டமஹானுவிவட்டஸங்கா²தானி அனுவிவட்டனாமானேவ ஹோந்தி. வுத்தஞ்சேதம் அட்ட²கதா²யம் ‘‘அத² வா அனுவிவட்டந்தி விவட்டஸ்ஸ ஏகபஸ்ஸதோ த்³வின்னம், ஏகபஸ்ஸதோ த்³வின்னந்தி சதுன்னம்பி க²ண்டா³னமேதம் நாம’’ந்தி (மஹாவ. அட்ட². 345). பா³ஹந்தந்தி த்³வீஸு பரியந்தேஸு ஸிப்³ப³னீயம் பா³ஹிரக²ண்ட³த்³வயம், தஞ்ச ஸங்க⁴டேத்வா பா³ஹமத்த²கே ட²பியமானத்தா ‘‘மஞ்சா உக்குட்டி²ம் கரோந்தீ’’திஆதீ³ஸு விய ஆதே⁴ய்யே ஆதா⁴ரோபசாரவஸேன பா³ஹாதி ச சீவரஸ்ஸ பரியந்தாவயவத்தா ‘‘அந்த’’ந்தி ச வுச்சதி. வுத்தம்பி சேதம் ‘‘பா³ஹந்தந்தி ஸுப்பமாணம் சீவரம் பாருபந்தேன ஸம்ஹரித்வா பா³ஹாய உபரி ட²பிதா உபோ⁴ அந்தா ப³ஹிமுகா² திட்ட²ந்தி, தேஸம் ஏதம் நாம’’ந்தி (மஹாவ. அட்ட². 345). இத³ம் ஸத்தக²ண்ட³சீவரமேவ மஹாஅட்ட²கதா²யம் விஹிதந்தி இதா³னிபி ததே³வ வட்டதி. வுத்தம்பி சேதம் ‘‘அயமேவ ஹி நயோ மஹாஅட்ட²கதா²யம் வுத்தோ’’தி. பி⁴க்கு²னா குஸிம்…பே… பா³ஹந்தம்பிசாதி ஸப்³ப³ம் விதி⁴ம் த³ஸ்ஸேத்வாவ சி²ன்னம் பஞ்சகாதி³ப்பபே⁴த³கம் ஸமணஸாருப்பம் திசீவரம் கத்தப்³ப³ந்தி யோஜனா.

565-6. யதா²வுத்தவிதி⁴ம் அவிராதே⁴த்வா சீவரம் கப்பபி³ந்து³ம் த³த்வா ஸங்கா⁴டிஆதி³னாமேன அதி⁴ட்டா²ய பரிபு⁴ஞ்ஜந்தஸ்ஸ அதி⁴ட்டா²னம் கத²ம் பி⁴ஜ்ஜதீதி ஆஹ ‘‘தா³னேனா’’திஆதி³. தா³னேனாதி அஞ்ஞஸ்ஸ தா³னேன. அச்சி²ஜ்ஜகா³ஹேனாதி அஞ்ஞேன அச்சி²ந்தி³த்வா க³ஹணேன. விஸ்ஸாஸக்³க³ஹணேன சாதி அத்தனி விஸ்ஸாஸேன அஞ்ஞஸ்ஸ க³ஹணேன. ஹீனாயாவத்தனேனாதி ஸிக்க²ம் அப்பச்சக்கா²ய கி³ஹிபா⁴வூபக³மனேன அஞ்ஞஸ்ஸ தா³னே விய சீவரே நிராலயபா⁴வேனேவ பரிச்சத்தா.

கேசி பன ‘‘ஹீனாயாவத்தனேனாதி பி⁴க்கு²னியா கி³ஹிபா⁴வூபக³மனேனாதி ஏவமத்த²ம் க³ஹேத்வா பி⁴க்கு² பன விப்³ப⁴ந்தோபி யாவ ஸிக்க²ம் ந பச்சக்கா²தி, தாவ பி⁴க்கு²யேவாதி அதி⁴ட்டா²னம் ந விஜஹதீ’’தி வத³ந்தி, தம் ந க³ஹேதப்³ப³ம் ‘‘பி⁴க்கு²னியா ஹீனாயாவத்தனேனா’’தி விஸேஸேத்வா அவுத்தத்தா, பி⁴க்கு²னியா ச கி³ஹிபா⁴வூபக³மனே அதி⁴ட்டா²னவிஜஹனம் விஸும் வத்தப்³ப³ந்தி நத்தி² தஸ்ஸா விப்³ப⁴மனேனேவ அஸ்ஸமணிபா⁴வதோ.

ஸிக்கா²யாதி பி⁴க்கு²ஸிக்கா²ய. பஹானேனாதி பச்சக்கா²னேன. ஸிக்கா²பச்சக்கா²னம் பனேத்த² ஸசே பி⁴க்கு²லிங்கே³ டி²தோ ஸிக்க²ம் பச்சக்கா²தி, தஸ்ஸ காயலக்³க³ம்பிசீவரம் அதி⁴ட்டா²னம் விஜஹதீதி த³ஸ்ஸனத்த²ம் க³ஹிதம். ‘‘ஸிக்கா²ய ச பஹானதோ’’தி ச லிக²ந்தி, தம் ‘‘ஹீனாயாவத்தனேனாபி, ஸிக்கா²ய ச பஹானதோ’’தி பாட²க்கமே ஸதி யுஜ்ஜதி. யதா²வுத்தோ பன பாடோ² ‘‘ஸிக்கா²ய ச பஹானேன, ஹீனாயாவத்தனேனபீ’’தி பாட²க்கமே யுஜ்ஜதி. யதா² ததா² வா ஹோது, ந கோசி விரோதோ⁴.

பச்சுத்³தா⁴ரேனாதி சீவரஸ்ஸ பச்சுத்³த⁴ரணேன. ‘‘காலகிரியாயா’’தி அட்ட²கதா²வசனதோ வினாஸேனாதி சீவரஸாமிகஸ்ஸ ஜீவிதவினாஸோவ வுச்சதீதி. லிங்க³ஸ்ஸ பரிவத்தனாதி பி⁴க்கு²ஸ்ஸ இத்தி²லிங்க³பரிவத்தனா, பி⁴க்கு²னியா புரிஸலிங்க³பரிவத்தனாதி ஏவம் உப⁴யதா² லிங்க³ஸ்ஸ பரிவத்தனேன. ஸப்³ப³ம் நவவித⁴ம்பி சீவரம். அதி⁴ட்டா²னந்தி ஏத்த² ‘‘இமேஹி அட்ட²ஹீ’’தி ஸேஸோ. வுத்தோவாயமத்தோ² அட்ட²கதா²யம் ‘‘தத்த² புரிமேஹி அட்ட²ஹி ஸப்³ப³சீவரானி அதி⁴ட்டா²னம் விஜஹந்தீ’’தி (பாரா. அட்ட². 2.469). பி⁴ஜ்ஜதீதி பஜஹதி. சி²த்³த³ஸ்ஸ பா⁴வோ சி²த்³த³பா⁴வோ, தஸ்மிம், சி²த்³தே³ ஸதி சி²த்³தே³ ஜாதேதி வுத்தம் ஹோதி. திசீவரந்தி தீஸு சீவரேஸு அஞ்ஞதரந்தி வுத்தம் ஹோதி. திசீவரமேவ வாதி க³ஹேதப்³ப³ம். வுத்தஞ்ச ‘‘சி²த்³த³பா⁴வேன பன திசீவரஸ்ஸேவா’’தி.

567. கீவப்பமாணே சி²த்³தே³ ஜாதேதி ஆஹ ‘‘கனிட்ட²ஸ்ஸா’’திஆதி³. ‘‘கனிட்ட²…பே… மாணக’’ந்தி இமினா ஹேட்டி²மபரிச்சே²த³ம் த³ஸ்ஸேதி.

568. ஏகோ தந்துபீதி தீ³க⁴தோ வா திரியதோ வா ஏகம்பி ஸுத்தம்.

569. ஜிண்ணட்டா²னே அக்³க³ளம் தே³ந்தேன தேசீவரிகேன வத்திதப்³ப³விதி⁴ம் த³ஸ்ஸேதுமாஹ ‘‘பட²ம’’ந்திஆதி³. பட²மந்தி சி²ன்னட்டா²னஸ்ஸ சி²ந்த³னதோ புப்³பே³யேவ. அக்³க³ளம் த³த்வாதி வத்த²க²ண்ட³ம் அல்லியாபேத்வா. ரக்க²தீதி ஏத்த² ‘‘அதி⁴ட்டா²ன’’ந்தி அனுவத்ததே, ‘‘தேசீவரிகோ பி⁴க்கூ²’’தி லப்³ப⁴தி, ஏவம் வத்த²க²ண்ட³ம் அல்லியாபேந்தோ தேசீவரிகோ பி⁴க்கு² அதி⁴ட்டா²னம் ரக்க²தீதி வுத்தம் ஹோதி. விபரியாயேன அதி⁴ட்டா²னம் பி⁴ந்த³தீதி லப்³ப⁴தி. பட²மம் த்³வே கோடியோ க⁴டேத்வாதி யோஜனா. மஜ்ஜே² ஜிண்ணம் அதி⁴ட்டி²தசீவரம் மஜ்ஜே² சி²ந்த³ந்தோ ததோ புப்³பே³யேவ த்³வே கோடியோ ஏகதோ க⁴டேத்வா ஸிப்³பி³த்வா. பச்சா²தி கோடிக⁴டனதோ பச்சா². சி²ந்த³தீதி மஜ்ஜ²ம் உப⁴யகோடிம் காதும் சி²ந்த³தி. ரக்க²தீதி வுத்தப்பகாரமேவ.

570. திசீவரே கத்த² ஜாதம் சி²த்³த³மதி⁴ட்டா²னம் பி⁴ந்த³தீதி ஆஹ ‘‘சதுரங்கு³லா’’திஆதி³. சத்தாரி ச அட்ட² ச சதுரட்ட²ம், சதுன்னம் அட்ட²ன்னம் வா அங்கு³லானம் ஸமாஹாரோ சதுரட்ட²ங்கு³லம், தஸ்மாதி க³ஹேதப்³ப³ம். சதுரங்கு³லா அட்ட²ங்கு³லாதி யோஜனா. ஓரந்தி அப்³ப⁴ந்தரம். ஏகஞ்ச த்³வே ச ஏகத்³வே, தேஸம் ஏகத்³வின்னம், ‘‘சீவரான’’ந்தி பகரணதோ லப்³ப⁴தி, ஏகஸ்ஸ சீவரஸ்ஸ, த்³வின்னஞ்ச சீவரானந்தி யோஜனா. யதா²ஸங்க்²யானுத்³தே³ஸவஸேன ஏகஸ்ஸ திரியதோ சதுரங்கு³லதோ ஓரம், த்³வின்னம் திரியதோ அட்ட²ங்கு³லதோ ஓரந்தி யோஜனா. வாக்யத்³வயேபி ‘‘சி²த்³த³ம் பி⁴ந்த³தேவா’’தி யோஜேதப்³ப³ம்.

ஏகஸ்ஸ சீவரஸ்ஸாதி அந்தரவாஸகசீவரஸ்ஸ. திரியதோதி வித்தா²ரதோ. சதுரங்கு³லம் ஓரந்தி சதுரங்கு³லதோ அப்³ப⁴ந்தரே சி²த்³த³ம் அதி⁴ட்டா²னம் பி⁴ந்த³தி. த்³வின்னந்தி உத்தராஸங்க³ஸங்கா⁴டீனம். திரியதோதி வித்தா²ரதோ. அட்ட²ங்கு³லதோ ஓரந்தி அட்ட²ங்கு³லதோ அப்³ப⁴ந்தரே. திண்ணம்பி தீ³க⁴தோ வித³த்தி²யா ஓரம் சி²த்³த³ம் அதி⁴ட்டா²னம் பி⁴ந்த³தேவாதி யோஜனா. ஏத்த² வித³த்தி² வட்³ட⁴கிவித³த்தி² க³ஹேதப்³பா³. ஏவம் வுத்தபரிச்சே²த³ப்³ப⁴ந்தரே சி²த்³தே³ ஜாதே தஸ்ஸ சீவரஸ்ஸ அதிரேகசீவரத்தா த³ஸாஹமனதிக்கமித்வா ஸூசிகம்மம் கத்வா அதி⁴ட்டா²தப்³ப³ம். ததா² அகரோந்தேன பன பரிக்கா²ரசோளம் அதி⁴ட்டா²தப்³ப³ம்.

571. ‘‘நிஸீத³னஸ்ஸா’’தி ‘‘நிஸீத³னசீவரஸ்ஸா’’தி வத்தப்³பே³ உத்தரபத³லோபேன வுத்தந்தி த³ட்ட²ப்³ப³ம். தி³யட்³டா⁴தி ஏத்த² விஸேஸிதப்³பா³ வித³த்தி² ‘‘த்³வே வித³த்தி²யோ’’தி ச ‘‘ஸுக³தஸ்ஸ வித³த்தி²யா’’தி ச வுத்தஸாமத்தி²யா லப்³ப⁴தி. அட்³டே⁴ன து³தியா தி³யட்³டா⁴, து³தியம் அட்³ட⁴மேதஸ்ஸாதி ‘‘து³தியட்³டா⁴’’தி வத்தப்³பே³ திய-பச்சயலோபேன ‘‘தி³யட்³டா⁴’’தி வுத்தம், அட்³ட⁴து³தியாதி வுத்தம் ஹோதி. ‘‘ஸுக³தஸ்ஸ வித³த்தி²யா’’தி பமாணனியமஸ்ஸ கதத்தா வட்³ட⁴கிவித³த்தி²யா திஸ்ஸோ வித³த்தி²யோ ஏகா ஸுக³தவித³த்தி² ஹோதி. இத³ம் நிஸீத³னசீவரம் தீ³க⁴தோ வட்³ட⁴கிஹத்தே²ன திஹத்த²ம், வித்தா²ரதோ ச²ளங்கு³லாதி⁴கத்³விஹத்த²ப்பமாணம் ஹோதி. ‘‘த³ஸா வித³த்தீ²’’தி (பாசி. 533) வுத்தத்தா தி³யட்³ட⁴ஹத்தா² த³ஸாதி வேதி³தப்³பா³.

572. சதஸ்ஸோதி ஏத்தா²பி ‘‘வித³த்தி²யோ’’தி ஸாமத்தி²யாவ லப்³ப⁴தி. ‘‘கண்டு³ப்படிச்சா²தி³யா’’தி விப⁴த்திபரிணாமேன தீ³க⁴தோதி யோஜனா.

573. அட்³ட⁴ம் தேய்யம் ததியம் யஸ்ஸா ஸா அட்³ட⁴தேய்யா, அட்³ட⁴ததியாதி வுத்தம் ஹோதி.

574. ததோ உத்தரிம் தது³த்தரிம், தஸ்ஸ தஸ்ஸ வுத்தப்பமாணதோ அதிரேகம். அதி⁴கச்சே²த³னந்தி அதி⁴கஸ்ஸ பமாணாதிரித்தட்டா²னஸ்ஸ சே²த³னம் அஸ்ஸ பாசித்தியஸ்ஸ தே³ஸனாயாதி அதி⁴கச்சே²த³னம், வுத்தப்பமாணதோ அதி⁴கட்டா²னம் சி²ந்தி³த்வா தே³ஸேதப்³ப³ம் பாசித்தியம். உதீ³ரிதம் வுத்தம் பாளியாதி அத்தோ².

575. அப்பமாணேனாதி கு³ணவஸேன அப்பமாணேன ஸம்மாஸம்பு³த்³தே⁴ன.

576. ஸப்³ப³ம் வட்டதீதி ஸம்ப³ந்தோ⁴. ‘‘ஸப்³ப³’’ந்தி இமினா அட்ட²கதா²ய ஆக³தம் நீலாதி³ம் ஸங்க³ண்ஹாதி. மஹந்தாதி³பே⁴த³ம் ஸப்³ப³ம் பச்சத்த²ரணசீவரம் வட்டதி.

577. ‘‘முக²புஞ்ச²னசோளம் ஏக’’ந்தி பத³ச்சே²தோ³. ஏகம் தோ⁴வித்வா யாவ ஸுக்கா²பீயதி, தாவ அஞ்ஞேன முக²புஞ்ச²னேன ப⁴விதப்³ப³த்தா ஆஹ ‘‘த்³வேபி வட்டந்தி ஸப்³ப³தா²’’தி.

579. பமாணதோ, க³ணனதோ ச அதீதாதி பமாணக³ணனாதீதா. ‘‘பமாணாதீதா’’தி வசனேன வினயத⁴ரானம் அப்பமாணகு³ணதம் த³ஸ்ஸேதி, ‘‘க³ணனாதீதா’’தி இமினா அதிக்கந்தக³ணனதம். பகதம் வினயே பட²மம் கதம் பு³த்³தே⁴ன ப⁴க³வதா பஞ்ஞத்தம் ஜானந்தீதி பகதஞ்ஞூ, வினயத⁴ரா, தே பகதஞ்ஞுனோ. அபரிமாணகு³ணமணிக³ணபூ⁴ஸிதஉபாலிதா³ஸகாதி³மஹாதே²ராசரியபரம்பராக³தா ஸங்க்²யாபதா²தீதா வினயத⁴ராதி வுத்தம் ஹோதி.

580. ஸுக³தட்ட²ங்கு³லாயாமந்தி வட்³ட⁴கிரதனப்பமாணதீ³க⁴ம். சதுரங்கு³லவித்த²தந்தி வட்³ட⁴கிவித³த்தி²ப்பமாணவித்தா²ரம். விகப்பனுபக³ம் பச்சி²மம் சீவரம் நாம ஹோதி. பச்சி²மம் சீவரந்தி பரிஸ்ஸாவனபடாதீ³னம் விஸேஸனம், பச்சி²மசீவரப்பமாணந்தி வுத்தம் ஹோதி.

581. பரிஸ்ஸாவபடந்தி உத³கபரிஸ்ஸாவனத்த²ம் படம். பத்தத்த²விகந்தி பத்தகஞ்சுகம். போத்த²கத்த²விகந்தி போத்த²ககஞ்சுகம். ஆதி³க்³க³ஹணேன பச்சி²மப்பமாணாதி³ம் யம் கிஞ்சி படம், த³ண்ட³படஞ்ச ஸங்க³ண்ஹாதி.

582. அதி⁴ட்டா²துந்தி பரிக்கா²ரசோளம் அதி⁴ட்டா²தும். ட²பிதேதி அனதி⁴ட்டா²ய ட²பிதே. மஹாபச்சரியம் பன ‘‘அனாபத்தீ’’தி (பாரா. அட்ட². 2.469) ஆஹ. நத்தி² தோ³ஸதாதி தோ³ஸோ ஏவ தோ³ஸதா. ‘‘அத்தனோ ஸந்தகபா⁴வதோ மோசேத்வா ட²பிதம் ஸந்தா⁴ய மஹாபச்சரியம் அனாபத்தி வுத்தா’’தி வத³ந்தி. ‘‘இமினா பே⁴ஸஜ்ஜம் சேதாபேஸ்ஸாமி, இத³ம் மாதுயா த³ஸ்ஸாமீ’’தி ட²பேந்தேன அதி⁴ட்டா²தப்³ப³ம். ‘‘இத³ம் பே⁴ஸஜ்ஜஸ்ஸ, மாதுயா’’தி விப⁴ஜித்வா ஸஸந்தகபா⁴வதோ மோசிதே அதி⁴ட்டா²னகிச்சம் நத்தீ²தி அதி⁴ப்பாயோ. ஹோதி சேத்த² –

‘‘யம் வத்த²ம் பி⁴க்கு²னா லத்³த⁴ம், கதம் மாதாதி³ஸந்தகம்;

நிஸ்ஸக்³கி³யம் ந ஹோதீதி, தமாஹு வினயஞ்ஞுனோ’’தி.

583. வஸ்ஸமாஸே சதுரோதி வஸ்ஸானே சதுரோ மாஸே, அதி⁴ட்டா²னகிரியாய சத்தாரோ மாஸே அவிச்சே²தோ³தி அச்சந்தஸம்யோகே³ உபயோக³வசனம். வஸ்ஸிகே சத்தாரோ மாஸே நிவாஸேதப்³பா³ ஸாடிகா வஸ்ஸிகஸாடிகா.

584. கண்டு³ம் படிச்சா²தே³தீதி கண்டு³ப்படிச்சா²தி³, கண்டு³ரோகா³துரஸ்ஸ பி⁴க்கு²னோ தப்படிச்சா²த³னத்த²மனுஞ்ஞாதசீவரஸ்ஸேதமதி⁴வசனம். ஹோந்தி சேத்த² –

‘‘மாதிகட்ட²கதா²யஸ்ஸா, கண்டு³ச்சா²தி³கஸாடியா;

ந காலாதிக்கமே வுத்தம், அதி⁴ட்டா²னவிவட்டனம்.

அதி⁴ட்டா²னபஹானங்கே³-ஸு வுத்தத்தா விஸேஸதோ;

வீமம்ஸிதப்³ப³ம் விஞ்ஞூஹி, தத்த² யம் காரணம் ஸியா’’தி.

586. ‘‘அஸம்முகே² ஏதந்தி சா’’தி வசனேனேவ ஸம்முகே² ‘‘இம’’ந்தி விஞ்ஞாயதி. விசக்க²ணோ பச்சுத்³த⁴ரேய்யாதி யோஜனா.

587. அதி⁴ட்டி²தந்தி அதி⁴ட்டா²னம்.

588. இதி ஸப்³ப³மித³ந்தி ஏவம் வுத்தம் இத³ம் திசீவராதீ³னம் பமாணாதி³ஸப்³ப³விதா⁴னம். தேசீவரிகபி⁴க்கு²னோதி திசீவராதி⁴ட்டா²னேன அதி⁴ட்டி²ததேசீவரிகஸ்ஸ வினயதேசீவரிகஸ்ஸ. திண்ணம் சீவரானம் ஸமாஹாரோ திசீவரம், திண்ணம் திசீவரானம் ஸமாஹாரோதி ‘‘திதிசீவர’’ந்தி வத்தப்³பே³ ஏகதே³ஸஸரூபேகஸேஸனயேன ‘‘திசீவர’’ந்தி நவசீவரானி ஸங்க³ஹிதானி, திசீவரே நியுத்தோ தேசீவரிகோதி வினயதேசீவரிகோ வுச்சதி. து⁴தங்க³தேசீவரிகஸ்ஸாபி திசீவரே இத³மேவ விதா⁴னந்தி ஸோபி ஸங்க³ய்ஹதி. அஞ்ஞேஸு வா பன ச²ஸு சீவரேஸு பரிக்கா²ரசோளம் ஏகம் அம்ஸகாஸாவமேவ வட்டதி. ததா² வத்வாவாதி ‘‘இமம் பரிக்கா²ரசோளம் அதி⁴ட்டா²மீ’’திஆதி³னா நயேன வத்வா. தம் பரிக்கா²ரசோளம். பரிக்கா²ரசோளமஸ்ஸ அத்தி², தத்த² வா நியுத்தோதி பரிக்கா²ரசோளிகோ.

589. ‘‘திசீவரம் பன பரிக்கா²ரசோளம் அதி⁴ட்டா²தும் வட்டதி, ந வட்டதீ’’தி அனுயோக³ம் கத்வா ‘‘வட்டதீ’’தி (பாரா. அட்ட². 2.469) அட்ட²கதா²ய வுத்தத்தா இத⁴ ‘‘திசீவர’’ந்தி சீவரத்தயமேவ வுத்தம். ‘‘ஸுக²பரிஹாரத்த²ம் ஏகம்பி விகப்பேதப்³ப³’’ந்தி வசனதோ ஏகதே³ஸே ஸமுதா³யோபசாரவஸேன ஏகம்பி விகப்பேதப்³ப³மேவ ஹோதி.

பரிக்கா²ரசோளம் காதும்பி வட்டதீதி ப³த்³த⁴ஸீமதோ ப³ஹி வஸந்தேன ஏககேன தேசீவரிகேன அந்தோஅருணே அஸதியா தீஸு சீவரேஸு ஹத்த²பாஸே அகதேஸு நிஸ்ஸக்³கி³யம் பாசித்தியம் ஹோதீதி, வினயகம்மம் காதும் ஸபா⁴க³புக்³க³லானம் து³ல்லப⁴த்தா ச ஸுக²பரிஹாரத்த²ம் தீஸு ஏகம் வா ஸப்³பா³னி ஏவ வா திசீவரனாமேன கதாதி⁴ட்டா²னானி பச்சுத்³த⁴ரித்வா பரிக்கா²ரசோளனாமேன அதி⁴ட்டா²தும்பி வட்டதீதி வுத்தம் ஹோதி.

ஏவம் அக்³க³ஹேத்வா ‘‘ஸசே திசீவரம் பரிக்கா²ரசோளாதி⁴ட்டா²னம் லபே⁴ய்ய, உதோ³ஸிதஸிக்கா²பதே³ பரிஹாரோ நிரத்த²கோ ப⁴வேய்யா’’தி (பாரா. அட்ட². 2.469) வுத்தம் மஹாபது³மத்தே²ரஸ்ஸ மதம் த³ஸ்ஸேதுமாஹ ‘‘ஏவம் சுதோ³ஸிதே’’திஆதி³. ஏவம் சேதி ஏவம் திசீவரம் பரிக்கா²ரசோளம் அதி⁴ட்ட²ஹித்வா பரிஹரிதும் வட்டதி சே. உதோ³ஸிதேதி இமஸ்ஸ ஸிக்கா²பத³ஸ்ஸ அனந்தரே து³தியகதி²னஸிக்கா²பதே³. வுத்தோ பரிஹாரோதி ‘‘ஏககுலஸ்ஸ கா³மோ ஹோதி பரிக்கி²த்தோ ச. அந்தோகா³மே சீவரம் நிக்கி²பித்வா அந்தோகா³மே வத்த²ப்³ப³’’ந்திஆதி³னா (பாரா. 478) நயேன பத³பா⁴ஜனாவஸானே வுத்தோ, இத⁴ ச ‘‘கா³மாதீ³ஸு பதே³ஸேஸூ’’திஆதி³னா நயேன அனந்தரம் வக்க²மானோ திசீவரஸ்ஸ பரிஹரணவிதி⁴. நிரத்த²கோதி பரிக்கா²ரசோளனாமேன அதி⁴ட்டி²தசீவரஸ்ஸ தேன விதி⁴னா திசீவரம் அபரிஹரந்தஸ்ஸாபி பி⁴க்கு²னோ அனாபத்திபா⁴வதோ நிப்பயோஜனோதி அத்தோ².

590. தப்பரிஹரிதுமாஹ ‘‘ந’’இச்சாதி³. ந நிரத்த²கோதி யோஜனா. ஹேதும் த³ஸ்ஸேதுமாஹ ‘‘தேசீவரிகஸ்ஸேவா’’திஆதி³. யோ திசீவரனாமேன அதி⁴ட்டா²னம் அபச்சுத்³த⁴ரித்வா ஸதிம் உபட்ட²பேத்வா அந்தோஅருணே சீவரம் ஹத்த²பாஸதோ அமோசேத்வா அருணம் உட்டா²பேதி, தாதி³ஸஸ்ஸ தேசீவரிகஸ்ஸேவ தஸ்மிம் ஸிக்கா²பதே³ உதோ³ஸிதபரிஹாரஸ்ஸ ப⁴க³வதா தே³ஸிதத்தாதி அத்தோ². யஸ்மா தாதி³ஸஸ்ஸேவ தேசீவரிகஸ்ஸ உதோ³ஸிதஸிக்கா²பதே³ பரிஹாரோ வுத்தோ, தஸ்மா. தம் ஸப்³ப³ம்பீதி தம் நவவித⁴ம் ஸப்³ப³ம்பி சீவரம். பரிக்கா²ரசோளஸ்ஸாதி பரிக்கா²ரசோளனாமேன அதி⁴ட்ட²ஹித்வா சீவரம் பரிபு⁴ஞ்ஜிதுகாமஸ்ஸ பரிக்கா²ரசோளனாமேன அதி⁴ட்டா²தும் வட்டதி.

591. இமினா உதோ³ஸிதபரிஹாரஸ்ஸ அனிரத்த²கபா⁴வம் ஸாதே⁴த்வா இதா³னி ‘‘திசீவரம் பரிக்கா²ரசோளனாமேனாபி அதி⁴ட்டா²தும் வட்டதீ’’தி இமஸ்ஸ அதி⁴கத்த²ஸ்ஸ மஹாகாருணிகேன அனுஞ்ஞாதபா⁴வே கிரியந்தரானுஜானனஸங்கா²தஅதி⁴கவசனஸ்ஸ ஞாபகஹேதுபா⁴வம் த³ஸ்ஸேதுமாஹ ‘‘அதி⁴ட்டே²தீ’’திஆதி³. இமஸ்மிம்யேவ ஸிக்கா²பதே³ அனாபத்திவாரே ‘‘அனாபத்தி அந்தோத³ஸாஹம் அதி⁴ட்டே²தி, விகப்பேதீ’’தி பாடே² அனாபத்திபா⁴வே ‘‘அதி⁴ட்டே²தீ’’தி ஏத்தகேனேவ பரியத்தே (பாரா. 469) ‘‘விகப்பேதீ’’தி கிரியந்தரானுஜானனேன பகாரந்தரேனாபி தோ³ஸோ நத்தீ²தி அதி⁴ப்பாயஸ்ஸ விஞ்ஞாபிதத்தாதி அத்தோ².

592. ஏவம் கரோந்தஸ்ஸாதி திசீவரனாமேன அதி⁴ட்டா²னம் பச்சுத்³த⁴ரித்வா பரிக்கா²ரசோளனாமேன அதி⁴ட்ட²ஹந்தஸ்ஸ. இதா³னி அதிப்பஸங்க³ம் த³ஸ்ஸேதுகாமஸ்ஸ சோத³கஸ்ஸ அதி⁴ப்பாயம் த³ஸ்ஸேதுமாஹ ‘‘ஏவ’’ந்திஆதி³. மூலாதி⁴ட்டா²னம் பஹாய காதப்³ப³ப்பகாரந்தரஸ்ஸாபி விஜ்ஜமானத்தா திசீவரம் பச்சுத்³த⁴ரித்வா முக²புஞ்ச²னாதி³கம் கத்வா அதி⁴ட்ட²ஹதோபி தோ³ஸோ ந ஸியாதி கஸ்மா நாபஜ்ஜதீதி அத்தோ². நஇதி அதிப்பஸங்க³னிவாரணே.

593. கிச்சவிதா⁴னதோதி தேஸம் முக²புஞ்ச²னாதீ³னம் அத்தனோ அத்தனோ கிச்சஸ்ஸ ஸாத⁴னதோ, தாதி³ஸம் கிச்சவிஸேஸாபேக்க²ம் வினா தம்தம்னாமேன அதி⁴ட்டா²தும் ந யுஜ்ஜதீதி அதி⁴ப்பாயோ. அகிச்சஸ்ஸாதி முக²புஞ்ச²னாதி³கிச்சரஹிதஸ்ஸ. அதி⁴கஸ்ஸாதி பச்சுத்³த⁴ரித்வா பட²மம் அதி⁴ட்டா²னஸ்ஸ விஜஹிதத்தா அதிரேகஸ்ஸ. அஸ்ஸாதி திசீவரஸ்ஸ. அதி⁴ட்டா²னம் து யுஜ்ஜதீதி த³ஸாஹம் அனதிக்கமித்வா பரிக்கா²ரசோளனாமேன அதி⁴ட்டா²னம் பன யுஜ்ஜதி.

594. நிதா⁴னஸ்ஸ முக²ம் உபாயோதி நிதா⁴னமுக²ம், அந்தரவாஸகாதி³தம்தம்சீவரனாமேன அதி⁴ட்டா²னதோ அதிரேகம் யம் கிஞ்சி சீவரம் யதா² ட²பிதம் ஆபத்திம் ந கரோதி, ததா² நிதா⁴னஸ்ஸ உபாயோதி அத்தோ². ஏதம் பரிக்கா²ரசோளாதி⁴ட்டா²னம். மஹாபச்சரியந்தி ப்³ராஹ்மணதிஸ்ஸப⁴யே பி⁴க்கு²ஸங்க⁴ம் ஜம்பு³தீ³பம் நேதும் ஸக்கஸ்ஸ தே³வானமிந்த³ஸ்ஸ ஆணத்தியா விஸுகம்மேன நிம்மிதமஹாபச்சரியம் நிஸீதி³த்வா லிகி²தத்தா தம்னாமகாயம் வினயட்ட²கதா²யம், ‘‘மஹாபச்சரியாதி³ஸூ’’திபி லிக²ந்தி.

595. பரிக்கா²ரசோளனாமேன அதி⁴ட்டா²னவிதா⁴னஸ்ஸ வுத்தப்பமாணம் கதமந்தி ஆஹ ‘‘சீவர’’ந்திஆதி³. ‘‘நிதா³னே உப்பத்திதோ’’தி பத³ச்சே²தோ³. ‘‘சீவரம் பரிபுண்ண’’ந்தி நிதா³னே ‘‘திசீவரம் ஸம்புண்ணம் விஜ்ஜதி, இத³மதிரேகசீவரம் கிம் காதப்³ப³’’ந்தி பி⁴க்கூ²ஹி ப⁴க³வதோ ஆரோசிதவத்து²ம்ஹி. உப்பத்திதோதி பரிக்கா²ரசோளாதி⁴ட்டா²னஸ்ஸ உப்பன்னத்தா, அனுஞ்ஞாதத்தாதி அத்தோ². ‘‘தேன கோ² பன ஸமயேன பி⁴க்கூ²னம் பரிபுண்ணம் ஹோதி திசீவரம், அத்தோ² ச ஹோதி பரிஸ்ஸாவனேஹிபி த²விகாஹிபி. ப⁴க³வதோ ஏதமத்த²ம் ஆரோசேஸும். அனுஜானாமி பி⁴க்க²வே பரிக்கா²ரசோளக’’ந்தி (மஹாவ. 357) ஏத்த² பாளியம் ஏவம் விப்பவாஸஸுக²த்த²ம் நாமேனாதி⁴ட்டி²ததிசீவரம் அதி⁴ட்டா²னம் பச்சுத்³த⁴ரித்வா பரிக்கா²ரசோளனாமேன அதி⁴ட்டா²தும் வட்டதீதி ஸாத⁴னேன ததே³கஸாத⁴னத்தா ஏவ ஏகம்பி சீவரம் விகப்பேதும் வட்டதீதி வுத்தமேவ ஹோதி. தேனேவாஹ அட்ட²கதா²யம் ‘‘ஏவஞ்ச ஸதி யோ திசீவரே ஏகேன சீவரேன விப்பவஸிதுகாமோ ஹோதி, தஸ்ஸ திசீவராதி⁴ட்டா²னம் பச்சுத்³த⁴ரித்வா விப்பவாஸஸுக²த்த²ம் விகப்பனாய ஓகாஸோ தி³ன்னோ ஹோதீ’’தி (பாரா. அட்ட². 2.469).

596-8. ஏத்தாவதா கப்பியசீவரஞ்ச தத்த² கத்தப்³ப³ஞ்ச த³ஸ்ஸேத்வா இதா³னி அகப்பியசீவரம் த³ஸ்ஸேதுமாஹ ‘‘குஸவாகாதீ³’’திஆதி³. குஸந்தி த³ப்³ப³திணம். வாகந்தி ருக்கா²தீ³னம் வாகம். ஆதி³-ஸத்³தே³ன ப²லகம் க³ஹிதம், சீர-ஸத்³தோ³ சீவரபரியாயோ, இமஸ்மிம் குஸாத³யோ க³ந்தே²த்வா கதே சீவரேயேவ வத்ததி. கேஸஜம் கம்ப³லந்தி மனுஸ்ஸகேஸேஹி வீதகம்ப³லஞ்ச. வாலஜம் கம்ப³லந்தி அஸ்ஸவாலசமரவாலேஹி வீதகம்ப³லஞ்ச. உலூகபக்க²ந்தி கோஸியஸகுணபத்தம். இத⁴ பன தம் க³ந்தே²த்வா கதசீவரமேவ க³ஹேதப்³ப³ம். அஜினக்கி²பேதி அஜினதீ³பிசம்மே. ‘‘தா⁴ரயதோ து²ல்லச்சய’’ந்தி பச்சேகம் ஸம்ப³ந்தோ⁴.

கத³லிது³ஸ்ஸேதி கத³லிவாகமயவத்தே². ஏரகது³ஸ்ஸேதி ஏரகமயவத்தே². அக்கது³ஸ்ஸேதி அக்கத³ண்டே³ வா தேஸம் ஸுத்தானி வா க³ஹேத்வா கதவத்தே². போத்த²கேதி மகசிவாகமயவத்தே². திரீடே வாதி ஏவம்னாமகே ருக்க²தசே. வேட²னேதி ஸீஸவேட²னே. கஞ்சுகேதி கவசே.

ஸப்³ப³னீலகேதி கேவலனீலகே. ஏஸ நயோ மஞ்ஜேட்டா²தீ³ஸு. மஹானாமரத்தேதி தனுபது³மத³லவண்ணரத்தே. மஹாரங்க³ரத்தேதி ஸதபதி³வண்ணரத்தே.

599. அச்சி²ன்னத³ஸகேதி அச்சி²ன்னா த³ஸா யஸ்ஸ, தஸ்மிம் சீவரே. ஏஸ நயோ தீ³க⁴த³ஸேபி. ப²லத³ஸேதி ப²லஸதி³ஸக³ந்தி²தா த³ஸா யஸ்ஸ, தஸ்மிம். புப்ப²த³ஸேதி கண்ணிகம் ப³ந்தி⁴த்வா விகாஸேத்வா கதா த³ஸா யஸ்ஸ, தஸ்மிம் சீவரேதி அத்தோ². அச்சி²ன்னசீவரஸ்ஸாதி நக்³க³ம் கத்வா சோரேஹி விலுத்தசீவரஸ்ஸ. ஏத்தா²தி குஸவாகாதீ³ஸு, ஸப்³ப³னீலாதீ³ஸு ச. கிஞ்சீதி ஏகம்பி அகப்பியம் நத்தி² அனனுலோமிகம் நத்தி². ‘‘நக்³கே³ன ஏதேஸு அகப்பியசீவரேஸு யம்கிஞ்சி லத்³த⁴ம், தேன ஹிரிகோபினம் படிச்சா²தே³த்வா பச்சா² கப்பியசீவரே லத்³தே⁴ தம் அதி⁴வாஸேத்வா இத³ம் அகப்பியசீவரம் பரிச்சஜிதப்³ப³ம். ஸப்³ப³னீலகாதி³வத்தே²ஸு லத்³தே⁴ஸு கப்பியரஜனேன ரஜித்வா, தம் வண்ணம் நாஸேத்வா வா கப்பியவத்தா²னி உப⁴யபஸ்ஸேஸு அல்லியாபேத்வா, படிச்சா²தே³த்வா வா நிவாஸேதும் வட்டதீ’’தி அட்ட²கதா²யம் வுத்தம்.

600. ‘‘அந்தோத³ஸாஹ’’ந்தி இத³ம் ‘‘அதி⁴ட்டே²தீ’’திஆதீ³ஹி ஸப்³ப³பதே³ஹிபி யோஜேதப்³ப³ம். விஸ்ஸஜ்ஜேதீதி அஞ்ஞஸ்ஸ தே³தி. இத⁴ தா³னம் து³வித⁴ம் ஸம்முகா²தா³னம், பரம்முகா²தா³னந்தி. படிக்³கா³ஹகம் தி³ஸ்வா ‘‘இத³ம் துய்ஹம் த³ம்மீ’’தி தா³னம் ஸம்முகா²தா³னம் நாம. பரம்முகா² ‘‘இத³ம் இத்த²ன்னாமஸ்ஸ த³ம்மீ’’தி தி³ன்னம் பரம்முகா²தா³னம். ‘‘இத³ம் த்வம் க³ண்ஹாஹீ’’தி வா ‘‘துய்ஹம் க³ண்ஹாஹீ’’தி வா வுத்தே ‘‘மய்ஹம் க³ண்ஹாமீ’’தி ஸசே வத³தி, தா³னக³ஹணத்³வயம்பி ஸுத்³த⁴ம். ‘‘இத³ம் தவ ஸந்தகம் கரோஹி, தவ ஸந்தகம் ஹோது, தவ ஸந்தகம் ஹோதீ’’தி தா³யகேன வுத்தே க³ண்ஹந்தோபி ‘‘மம ஸந்தகம் கரோமி, மம ஸந்தகம் ஹோது, மம ஸந்தகம் ஹோதீ’’தி வத³தி சே, தா³னம், க³ஹணஞ்ச அஸுத்³த⁴ம் ஹோதி. ‘‘தவ ஸந்தகம் கரோஹீ’’தி வுத்தே பன ‘‘ஸாது⁴ ப⁴ந்தே மய்ஹம் க³ண்ஹாமீ’’தி வத்வா க³ண்ஹாதி, க³ஹணம் ஸுத்³த⁴ம். ‘‘இத³ம் துய்ஹம் க³ண்ஹாஹீ’’தி வுத்தே ‘‘அஹம் ந க³ண்ஹாமீ’’தி வத³தி, புன ‘‘தி³ன்னம் மயா, துய்ஹம் க³ண்ஹாஹீ’’தி வுத்தே இதரோபி புன படிக்கி²பதி, தம் சீவரம் கஸ்ஸசி அஸந்தகத்தா த³ஸாஹாதிக்கமேனாபி நிஸ்ஸக்³கி³யம் ந ஹோதீதி பச்சா² தேஸு த்³வீஸு யோ இச்ச²தி, தேன அதி⁴ட்டா²ய பரிபு⁴ஞ்ஜிதப்³ப³ந்தி ஸப்³ப³மித³ம் அட்ட²கதா²ய (பாரா. அட்ட². 2.469 அத்த²தோ ஸமானம்) வுத்தம்.

அதி⁴ட்டி²தசீவரே அதி⁴ட்டா²னே வேமதிகேன அத்தனோ விமதிம் பட²மம் ஆவி கத்வா ‘‘ஸசே அனதி⁴ட்டி²தம், ஏவம் கதே கப்பியம் ஹோதீ’’தி சிந்தேத்வா நிஸ்ஸஜ்ஜேத்வா வினயகம்மம் கரோந்தஸ்ஸ முஸாவாத³தோ³ஸோ நாபஜ்ஜதி. யதா²ஹ அட்ட²கதா²யம் ‘‘ந ஹி ஏவம் ஜானாபேத்வா வினயகம்மம் கரோந்தஸ்ஸ முஸாவாதோ³ ஹோதீ’’தி (பாரா. அட்ட². 2.469). ‘‘கேசி ‘ததா² வேமதிகசீவரம் அஞ்ஞேன விஸ்ஸாஸேன க³ஹேத்வா புன தா³தப்³ப³’ந்தி வத³ந்தி, தம் ந ஸுந்த³ர’’ந்தி (பாரா. அட்ட². 2.469 தோ²கம் விஸதி³ஸம்) தத்தே²வ வுத்தம்.

வினஸ்ஸதீதி சோராதீ³ஹி வினஸ்ஸதி. ‘‘நஸ்ஸதி, ட³ய்ஹதி, அச்சி²ந்தி³த்வா க³ண்ஹந்தீ’’தி இமானிபி வினாஸப்பகாரத்தா ‘‘வினஸ்ஸதீ’’தி இமினாவ ஸங்க³ய்ஹந்தி. தத்த² ‘‘நஸ்ஸதீ’’தி இத³ம் சோராதீ³ஹி ஹடம் ஸந்தா⁴ய வுத்தம், ‘‘வினஸ்ஸதீ’’தி இத³ம் உந்தூ³ரகா²யிதாதி³ம் ஸந்தா⁴ய வுத்தம், ‘‘ட³ய்ஹதீ’’தி அக்³கி³னா த³ட்³ட⁴ம் ஸந்தா⁴ய. விஸ்ஸாஸேதி ஏத்த² ஸந்தி³ட்டோ² ச ஸம்ப⁴த்தோ ச ஆலபிதோ ச ஜீவதி ச க³ஹிதே சத்தமனோ ஹோதீதி பஞ்சங்க³ஸமன்னாக³தேன அத்தனி விஸ்ஸாஸேன அஞ்ஞேன க³ஹிதேதி அத்தோ². பகாஸிதாதி ‘‘அனாபத்தி அந்தோத³ஸாஹம் அதி⁴ட்டே²தீ’’திஆதி³னா (பாரா. 469) நயேன வுத்தா.

601. இத³ம் பன ஸமுட்டா²னம் நாமேன கதி²னஸமுட்டா²னம் நாமாதி அத்தோ². இத³ம் கதி²னஸமுட்டா²னம் நாம காயவாசதோ ச காயவாசாசித்ததோ ச ஸமுட்டா²தி. அதிரேகசீவரபா⁴வஸ்ஸ ஜானனசித்தேன பண்ணத்திஜானனசித்தே அஸதிபி ஆபத்திஸம்ப⁴வதோ அசித்தம். அனதி⁴ட்டா²னதோ, அவிகப்பனதோ ச அக்ரியம். கம்மட்டா²னமனுயுஞ்ஜந்தோ வா சேதியாதி³ம் வந்த³ந்தோ வா ஏகாத³ஸமம் அருணம் உட்டா²பேதி, குஸலசித்தோ ஆபஜ்ஜதி, கலஹாதி³பஸுதோ வா வீதிக்கமம் ஜானந்தோ வா உட்டா²பேதி, அகுஸலசித்தோ ஆபஜ்ஜதி, கீ²ணாஸவோ பன அஸதியா வா பண்ணத்திம் அஜானந்தோ வா ததா² கரோந்தோ அப்³யாகதசித்தோ ஆபஜ்ஜதீதி திசித்தம். வுத்தனயேன கம்மட்டா²னாதி³மனுயுஞ்ஜந்தஸ்ஸ ஸோமனஸ்ஸசித்தஸமங்கி³னோ ஸுக²வேத³னா, உபேக்கா²சித்தஸமங்கி³னோ உபேக்கா²வேத³னா, கலஹாதி³பஸுதஸ்ஸ தோ³மனஸ்ஸசித்தஸமங்கி³னோ து³க்க²வேத³னா ஹோதீதி திவேத³னம். ஏஸ நயோ உபரிபி ஏவரூபே டா²னே யோஜேதப்³போ³.

பட²மகதி²னகதா²வண்ணனா.

602. கா³மாதீ³ஸு பதே³ஸேஸு திபஞ்சஸூதி திசீவரானி நிக்கி²பித்வா விப்பவாஸேன தோ³ஸம், உப்பஜ்ஜனட்டா²னஞ்ச த³ஸ்ஸேதும் ‘‘கா³மோ ஏகூபசாரோ’’திஆதி³னா (பாரா. 477) நயேன பாளியம் வுத்தகா³மனிவேஸனஉதோ³ஸிதஅட்டமாளபாஸாத³ஹம்மியனாவாஸத்த²கே²த்தத⁴ஞ்ஞகர- ணஆராமவிஹாரருக்க²மூலஅஜ்ஜோ²காஸஸங்கா²தேஸு பன்னரஸஸு சீவரனிக்கே²பட்டா²னேஸூதி வுத்தம் ஹோதி. ஏத்த² கா³மோ நாம ஏககுடிகாதி³கா³மோ.

நிவேஸனம் நாம கா³மதோ ப³ஹி சதுஸாலாதி³கோ கே³ஹோ. தேனாஹ க³ண்டி²பதே³ ‘‘கா³மனிவேஸனானம் விஸேஸம் வத³ந்தா ‘புன ஏகபரிச்சே²த³ம் கத்வா நிவேஸிதா ப³ஹுகே³ஹா நிவேஸனம் நாம ஹோந்தீ’தி வத³ந்தி, தஸ்மா இத³ம் நிவேஸனாதி³ ஸப்³ப³ம் ‘கா³மதோ ப³ஹீ’தி க³ஹேதப்³ப³’’ந்தி. இத³ஞ்ச தத்தே²வ வுத்தம் ‘‘நிவேஸனாதி³கம் அந்தோகா³மே சே ஹோதி, கா³மே வுத்தபரிஹாரஸ்ஸேவ லப்³ப⁴னதோ அந்தோகா³மதோ ப³ஹீ’தி க³ஹேதப்³ப³’’ந்தி.

அட்ட²கதா²யம் ‘‘உதோ³ஸிதோதி யானாதீ³னம் ப⁴ண்டா³னம் ஸாலா’’தி (பாரா. அட்ட². 2.482-487) வுத்தஸரூபம் உதோ³ஸிதம் நாம. ‘‘அட்டோதி படிராஜாதி³படிபா³ஹனத்த²ம் இட்ட²காஹி கதோ ப³ஹலபி⁴த்திகோ சதுபஞ்சபூ⁴மிகோ பதிஸ்ஸயவிஸேஸோ’’தி (பாரா. அட்ட². 2.482-487) வுத்தஸரூபோ அட்டோ நாம. ‘‘மாளோதி ஏககூடஸங்க³ஹிதோ சதுரஸ்ஸபாஸாதோ³’’தி (பாரா. அட்ட². 482-487) வுத்தோ ஏககண்ணிகஸங்க³ஹிதோ சதுரஸ்ஸகே³ஹோ மாளோ நாம. பாஸாதோ³தி தீ³க⁴பாஸாதோ³. ஹம்மியந்தி முண்ட³ச்ச²த³னபாஸாதோ³. நாவாதி யானப்பத்தி. ஸத்த²ந்தி ஜங்க⁴ஸத்த²ஸகடஸத்த²வஸேன து³விதோ⁴ ஜனஸமூஹோ, ஸோ ச நிவிட்டா²னிவிட்ட²வஸேன பச்சேகம் து³விதோ⁴. தத்த² நிவிட்டே² வதிஆதி³பரிக்கே²போபி ஹோதேவ.

கே²த்தந்தி யவகே²த்தாதி³கே²த்தம். த⁴ஞ்ஞகரணம் க²லம். ஆராமோ புப்பா²ராமோ, ப²லாராமோ ச. விஹாரோதி ஏகம்பி ஸேனாஸனம் வுச்சதி. ‘‘ருக்கோ² நாம யம் மஜ்ஜ²ந்திகே காலே ஸமந்தா சா²யா ப²ரதீ’’தி (பாரா. 494) வுத்தப்பமாணபரிச்ச²ன்னோ ருக்கோ². அஜ்ஜோ²காஸோ நாம ஸத்தப்³ப⁴ந்தரோ, ஸோ விஞ்சாடவிஆதி³அகா³மகாரஞ்ஞே ச மச்ச²ப³ந்தா⁴னம் அக³மனபதே² ஸமுத்³த³தீ³பே ச லப்³ப⁴தி. மச்ச²ப³ந்தா⁴னம் அக³மனபதோ² நாம உத³கபிட்டி²யா க³ந்த்வா புன தத³ஹேவ கே³ஹம் ஆக³ந்தும் அஸக்குணேய்யதாய தூ³ரோ ஸமுத்³த³ப்பதே³ஸோ வுச்சதி.

அயம் கா³மாதி³கோ பச்சேகம் ஏகூபசாரோ, நானூபசாரோதி து³விதோ⁴. தத்த² அஜ்ஜோ²காஸம் வினா கா³மாதி³கோ தம்தம்ராஜாதி³ஸாமிககுலானம் ஏகத்த²னானத்த²வஸேன ஏககுலஸந்தகோ சே ஹோதி, ஏகூபசாரோ. நானாகுலஸந்தகோ சே, நானூபசாரோ ஹோதி. வுத்தஞ்ஹேதம் ‘‘கா³மோ ஏகூபசாரோ நாம ஏககுலஸ்ஸ கா³மோ ஹோதீ’’திஆதி³ (பாரா. 478). அட்ட²கதா²யம்பி வுத்தம் ‘‘ஏககுலஸ்ஸ கா³மோதி ஏகஸ்ஸ ரஞ்ஞோ வா போ⁴ஜகஸ்ஸ வா கா³மோ’’தி ச ‘‘நானாகுலஸ்ஸ கா³மோதி நானாராஜூனம் வா போ⁴ஜகானம் வா கா³மோ வேஸாலீகுஸினாராதி³ஸதி³ஸோ’’தி (பாரா. அட்ட². 2.479) ச.

ஏககுலேன காராபிதோ விஹாரோ ஏகூபசாரோ, நானாகுலேஹி காராபிதோ நானூபசாரோ ஹோதி. யதா²ஹ க³ண்டி²பதே³ ‘‘விஹாரே ஏககுலனானாகுலவோஹாரோ காராபகானம் வஸேன வுத்தோ’’தி. அஜ்ஜோ²காஸே பன உபசாரபே⁴தோ³ அப்³ப⁴ந்தரவஸேன வேதி³தப்³போ³. வுத்தஞ்சேதம் பாளியம் ‘‘அஜ்ஜோ²காஸோ ஏகூபசாரோ நாம அகா³மகே அரஞ்ஞே ஸமந்தா ஸத்தப்³ப⁴ந்தரா ஏகூபசாரோ. ததோ பரம் நானூபசாரோ’’தி. இத⁴ ஏகம் அப்³ப⁴ந்தரம் அட்ட²வீஸதிரதனம் ஹோதி. யதா²ஹ அட்ட²கதா²யம் ‘‘ஏகம் அப்³ப⁴ந்தரம் அட்ட²வீஸதிஹத்த²’’ந்தி (பாரா. அட்ட². 2.489). ஏவம் ஸங்கே²பதோ வுத்தஸரூபப்பபே⁴தா³னி பன்னரஸ டா²னானி த³ஸ்ஸேதுமாஹ ‘‘கா³மாதீ³ஸு பதே³ஸேஸு திபஞ்சஸூ’’தி. அயமேத்த² ஸங்கே²போ, வித்தா²ரோ பன பாளிஅட்ட²கதா²வண்ணனதோ வேதி³தப்³போ³.

‘‘திசீவரேன விப்பவாஸேய்யாதி ஸங்கா⁴டியா வா உத்தராஸங்கே³ன வா அந்தரவாஸகேன வா. அந்தோகா³மே சீவரம் நிக்கி²பித்வா’’தி (பாரா. 476, 478) வசனதோ ஏத்த² திசீவரந்தி திண்ணம் சீவரானமஞ்ஞதரமேவ சீவரம் வத்தப்³ப³ம். ஏகரத்தந்தி விப்பவாஸகிரியாய அச்சந்தஸம்யோகே³ உபயோக³வசனம். அபி-ஸத்³தே³ன கிம் பன தி³ரத்தாதி³கந்தி த³ஸ்ஸேதி.

ஸங்க⁴ஸம்முதியா வினாதி திசீவரம் பரிஹரிதும் அஸமத்தே²ன கி³லானேன பி⁴க்கு²னா ஸங்க⁴ம் வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ய்ஹ ‘‘அஹம் ப⁴ந்தே கி³லானோ, ந ஸக்கோமி திசீவரம் ஆதா³ய பக்கமிதும், ஸோஹம் ப⁴ந்தே ஸங்க⁴ம் திசீவரேன அவிப்பவாஸஸம்முதிம் யாசாமீ’’தி திக்க²த்தும் யாசிதேன ஸங்கே⁴ன தஸ்ஸ ஞத்திது³தியாய கம்மவாசாய தி³ன்னம் அவிப்பவாஸஸம்முதிம் வினாதி வுத்தம் ஹோதி. ததா² லத்³த⁴ஸம்முதிகஸ்ஸ கி³லானஸ்ஸ பி⁴க்கு²னோ தஸ்மிம் கே³லஞ்ஞே அவூபஸந்தே வா வூபஸந்தேபி சீவரனிக்கே²பட்டா²னம் ஆக³மனகாலே வா உப்பன்னே அஞ்ஞேபி ரோகே³ அவூபஸந்தே தாயயேவ ஸம்முதியா ந தோ³ஸோ.

603. பி⁴க்கு²னோதி அலத்³த⁴ஸம்முதிகஸ்ஸ பி⁴க்கு²னோ. தேன சீவரேன. விப்பவத்து²ம் ந வட்டதீதி வினா வஸிதும் ந வட்டதி. கிம் வுத்தம் ஹோதி? ‘‘ஏககுலஸ்ஸ கா³மோ ஹோதி பரிக்கி²த்தோ ச, அந்தோகா³மே சீவரம் நிக்கி²பித்வா அந்தோகா³மே வத்த²ப்³ப³ம். அபரிக்கி²த்தோ ஹோதி, யஸ்மிம் க⁴ரே சீவரம் நிக்கி²த்தம் ஹோதி, தஸ்மிம் க⁴ரே வத்த²ப்³ப³ம், ஹத்த²பாஸா வா ந விஜஹிதப்³ப³ம். நானாகுலஸ்ஸ கா³மோ ஹோதி பரிக்கி²த்தோ ச, யஸ்மிம் க⁴ரே சீவரம் நிக்கி²த்தம் ஹோதி, தஸ்மிம் க⁴ரே வத்த²ப்³ப³ம் ஸபா⁴யே வா த்³வாரமூலே வா, ஹத்த²பாஸா வா ந விஜஹிதப்³ப³’’ந்திஆதி³னா (பாரா. 478) நயேன பாளியா வுத்தட்டா²னதோ ப³ஹி அருணம் உட்டா²பேதும் ந வட்டதீதி வுத்தம் ஹோதி.

இமஸ்மிம் பாடே² ‘‘பரிக்கி²த்தோ’’தி இத³ம் பாகாரேன வா வதியா வா பரிகா²ய வா பரிக்கி²த்தம் ஸந்தா⁴ய வுத்தம். ஹத்த²பாஸா வாதி ஏத்த² ஹத்த²பாஸா நாம அட்³ட⁴தியரதனம் ஹோதி. யதா²ஹ அட்ட²கதா²யம் ‘‘தம் க⁴ரம் ஸமந்ததோ ஹத்த²பாஸா ந விஜஹிதப்³ப³ம், அட்³ட⁴தேய்யரதனப்பமாணா பதே³ஸா உத்³த⁴ம் ந விஜஹிதப்³ப³ந்தி வுத்தம் ஹோதீ’’தி (பாரா. அட்ட². 2.477-478).

விப்பவஸந்தஸ்ஸ கோ தோ³ஸோதி ஆஹ ‘‘ஹோதி…பே… அருணுக்³க³மே’’தி. அனுஞ்ஞாதட்டா²னதோ ஹி ப³ஹி சீவரேன வினா அருணம் உட்டா²பேந்தஸ்ஸ தம் சீவரம் நிஸ்ஸஜ்ஜிதப்³ப³ம் ஹோதி, தம்ஹேதுகா பாசித்தியாபத்திபி ஹோதீதி அத்தோ². தேனேவ வக்க²தி ‘‘நிஸ்ஸஜ்ஜித்வா…பே… விஞ்ஞுனா’’தி.

604. ந்ஹாயந்தஸ்ஸேவாதி சீவரஸ்ஸ ஹத்த²பாஸதோ தூ³ரே நஹாயந்தஸ்ஸேவ, அனாத³ரே ஸாமிவசனம்.

606. அச்சி²ன்னம் விலுத்தம் சீவரம் யஸ்ஸ ஸோ அச்சி²ன்னசீவரோ, பி⁴க்கு², தஸ்ஸ டா²னம் அச்சி²ன்னசீவரட்டா²னம், தஸ்மிம்.

607. நிவாஸேத்வாதி ஏத்த² ‘‘அந்தரவாஸக’’ந்தி ச க³ஹேத்வாதி ஏத்த² ‘‘இதரானீ’’தி ச ஸேஸோ. இத³ஞ்ச க³ந்தப்³ப³ட்டா²னே, ஆஸன்னே மக்³கே³ ச மனுஸ்ஸஸம்பா³தே⁴ அஸதி கத்தப்³ப³த³ஸ்ஸனம். இதரத்த² நிவாஸேத்வா, பாருபித்வா ச ஸங்கா⁴டிம் அம்ஸே கத்வாவ க³ந்தப்³ப³ம் ஹோதி. விஹாரே ஸபா⁴கே³ஸு அலப்³ப⁴மானேஸு ஆஸனஸாலம்பி க³ந்த்வா ஸபா⁴க³ஸ்ஸ ஸந்திகே வினயகம்மம் கத்தப்³ப³ந்தி அட்ட²கதா²யம் (பாரா. அட்ட². 2.495 அத்த²தோ ஸமானம்) வுத்தம். ‘‘நிஸ்ஸஜ்ஜித்வா’’தி இமினா ‘‘இத³ம் மே ப⁴ந்தே சீவரம் ரத்திவிப்பவுத்த²ம் அஞ்ஞத்ர பி⁴க்கு²ஸம்முதியா நிஸ்ஸக்³கி³யம், இமாஹம் ஸங்க⁴ஸ்ஸ நிஸ்ஸஜ்ஜாமீ’’தி ஸங்கே⁴ வா ‘‘இத³ம் மே ப⁴ந்தே சீவரம்…பே… அஹம் ஆயஸ்மந்தானம் நிஸ்ஸஜ்ஜாமீ’’தி திண்ணம், த்³வின்னம் வா ஸந்திகே வா ‘‘இத³ம் மே ஆவுஸோ…பே… இமாஹம் ஆயஸ்மதோ நிஸ்ஸஜ்ஜாமீ’’தி ஏகஸ்ஸ ஸந்திகே வா வத்வா நிஸ்ஸஜ்ஜித்வாதி வுத்தம் ஹோதி. விஞ்ஞுனாதி ஏவம் நிஸ்ஸக்³கி³யவத்து²னிஸ்ஸஜ்ஜனாதி³னானப்பகாரவிதி⁴ஜானனகேன ஞாணவதாதி அத்தோ².

608. தம் நிஸ்ஸக்³கி³யசீவரம்.

609. ‘‘அதே³ந்தஸ்ஸ ச நிஸ்ஸட்ட²ம் து³க்கட’’ந்தி இமினா ‘‘ப்³யத்தேன பி⁴க்கு²னா படிப³லேன ஆபத்தி படிக்³க³ஹேதப்³பா³, நிஸ்ஸட்ட²சீவரம் தா³தப்³ப³’’ந்தி வுத்தத்தா இமம் விதி⁴ம் ஜானனதாய ப்³யத்தேன யதா²விதி⁴ம் காதும் ஸமத்த²தாய படிப³லேன க²ந்த⁴கே (சூளவ. 239) ஆக³தனயேன ஆபத்திம் படிக்³க³ஹேத்வா நிஸ்ஸட்ட²சீவரம் ஹத்தே²ன க³ஹேத்வா நிஸீதா³பேத்வா ஸசே ஸங்கோ⁴ ஹோதி, ‘‘ஸுணாது மே ப⁴ந்தே ஸங்கோ⁴, இத³ம் சீவரம் இத்த²ன்னாமஸ்ஸ பி⁴க்கு²னோ நிஸ்ஸக்³கி³யம் ஸங்க⁴ஸ்ஸ நிஸ்ஸட்ட²ம், யதி³ ஸங்க⁴ஸ்ஸ பத்தகல்லம், ஸங்கோ⁴ இமம் சீவரம் இத்த²ன்னாமஸ்ஸ பி⁴க்கு²னோ த³தே³ய்யா’’தி, ஸசே தயோ ஹோந்தி, ‘‘ஸுணந்து மே ஆயஸ்மந்தா, இத³ம் சீவரம் இத்த²ன்னாமஸ்ஸ பி⁴க்கு²னோ நிஸ்ஸக்³கி³யம் ஆயஸ்மந்தானம் நிஸ்ஸட்ட²ம், யதா³யஸ்மந்தானம் பத்தகல்லம், ஆயஸ்மந்தா இமம் சீவரம் இத்த²ன்னாமஸ்ஸ பி⁴க்கு²னோ த³தே³ய்யு’’ந்தி, ஸசே ஏககோ ஹோதி, ‘‘இமம் சீவரம் ஆயஸ்மதோ த³ம்மீ’’தி தா³தப்³ப³ம், நிஸ்ஸட்ட²சீவரம் ‘‘அத்தனோயேவ தி³ன்ன’’ந்தி ஸுத்³த⁴ஸஞ்ஞாய க³ஹேத்வா அதே³ந்தஸ்ஸ து³க்கடம் ஹோதீதி வுத்தம் ஹோதி.

தஸ்ஸ ஸந்தகபா⁴வம் ஞத்வா லேஸேன விலும்பந்தஸ்ஸ பன ப⁴ண்ட³க்³க⁴வஸேன து³க்கடது²ல்லச்சயபாராஜிகாபத்தியோ ஹோந்தி. யதா²ஹ அட்ட²கதா²யம் ‘‘தஸ்ஸ ஸந்தகபா⁴வம் பன ஞத்வா லேஸேன அச்சி²ந்த³ந்தோ ப⁴ண்ட³ம் அக்³கா⁴பேத்வா காரேதப்³போ³’’தி (பாரா. அட்ட². 2.469). பரியாபுதந்தி ‘‘ந பி⁴க்க²வே நிஸ்ஸட்ட²சீவரம் ந தா³தப்³ப³ம், யோ ந த³தே³ய்ய, ஆபத்தி து³க்கடஸ்ஸா’’தி (பாரா. 470) பாளியம் வுத்தந்தி அத்தோ².

610-1. தே²ரே த³ஹரே சாதி ஏதேஸு உபோ⁴ஸுபி மக்³க³ம் க³ச்ச²ந்தேஸூதி யோஜனா. ‘‘தே²ரே’’தி இமினா அனிஸ்ஸிதபா⁴வமாஹ, ‘‘த³ஹரே சா’’தி இமினா நிஸ்ஸிதபா⁴வம். ஓஹீனேதி ஓஸக்கிதே. ஸசே ஸோ தே²ரோ நிஸ்ஸயாசரியோ ப⁴வேய்யாதி அதி⁴ப்பாயேனாஹ ‘‘க³ரு’’ந்தி. தஸ்மிம் த³ஹரே. வத்த²ந்தி தஸ்ஸ ஹத்தே² டி²தசீவரம். ந பஸ்ஸம்ப⁴தீதி து⁴ரனிக்கே²பம் அகத்வா க³மனே ஸஉஸ்ஸாஹத்தா நிஸ்ஸயபடிப்பஸ்ஸத்³தி⁴ ந ஹோதீதி அதி⁴ப்பாயோ. தேனேவ ‘‘முஹுத்த’’ந்திஆதி³மாஹ.

614. பச்சுத்³தா⁴ரே அந்தோயேவாருணேதி இமினா ஸம்ப³ந்தோ⁴, த³ஹரபி⁴க்கு²னோ தூ³ரபா⁴வஞ்ச அருணுக்³க³மனஞ்ச ஞத்வா சீவரஸ்ஸ அனிஸ்ஸக்³கி³யத்த²ம் தஸ்ஸ ஹத்தே² டி²தபா⁴வம் ஸல்லக்கே²த்வா புராருணா பச்சுத்³த⁴ரேதி அத்தோ². விஸ்ஸஜ்ஜேதீதி அஞ்ஞஸ்ஸ தே³தி. வினஸ்ஸதீதி சோராதீ³ஹி நஸ்ஸதி.

து³தியகதி²னகதா²வண்ணனா.

616. அகாலசீவரந்தி ‘‘அகாலசீவரம் நாம அனத்த²தே கதி²னே ஏகாத³ஸமாஸே உப்பன்னம், அத்த²தே கதி²னே ஸத்தமாஸே உப்பன்னம், காலேபி ஆதி³ஸ்ஸ தி³ன்ன’’ந்தி (பாரா. 500) வசனதோ அனத்த²தகதி²னே விஹாரே ‘‘சீவரமாஸோ’’தி யோ புப்³ப³கத்திககாளபக்க²பாடிபத³தோ பட்டா²ய யாவ அபரகத்திகபுண்ணமீ, தாவ மாஸோ வுச்சதி, ததோ பரேஸு ஏகாத³ஸஸு மாஸேஸு உப்பன்னஞ்ச அத்த²தகதி²னே விஹாரே யோ சீவரமாஸோ, ஹேமந்தா ச சத்தாரோ மாஸாதி பஞ்சமாஸதோ ப³ஹி ஸத்தஸு மாஸேஸு உப்பன்னஞ்ச அத்த²தகதி²னே பஞ்ச மாஸா யதா²பரிச்சி²ன்னகாலே ஸங்க⁴ஸ்ஸ ச ‘‘இத³ம் அகாலசீவரம் த³ம்மீ’’தி புக்³க³லஸ்ஸ ச ‘‘இத³ம் துய்ஹம் த³ம்மீ’’தி தி³ன்னஞ்சேதி இத³ம் அகாலசீவரந்தி அத்தோ². ‘‘உப்பன்ன’’ந்தி ஸேஸோ, ‘‘உப்பஜ்ஜேய்ய ஸங்க⁴தோ வா க³ணதோ வா ஞாதிதோ வா மித்ததோ வா பம்ஸுகூலதோ வா அத்தனோ வா த⁴னேனா’’தி (பாரா. 500) வசனதோ ஸங்க⁴ஸ்ஸ வா ‘‘இத³ம் ஸுத்தந்திகக³ணஸ்ஸ தே³ம, இத³ம் ஆபி⁴த⁴ம்மிகக³ணஸ்ஸ தே³மா’’திஆதி³னா நயேன க³ணஸ்ஸ வா தி³ன்னதோ அத்தனோ வஸ்ஸக்³கே³ன வா ஞாதிஆதி³தோ வா ஸுஸானாதி³பம்ஸுகூலகே²த்ததோ வா அத்தனோ ஸந்தகேன ஸுத்தகப்பாஸாதி³கப்பியவத்து²தோ வா உப்பன்னசீவரந்தி அத்தோ².

மாஸபரமம் நிக்கி²பேதி மாஸோ பரமம் பமாணம் ஏதஸ்ஸ நிக்கி²பனஸ்ஸாதி மாஸபரமம், நிக்கி²பனந்தி கிரியாவிஸேஸனம் காதப்³ப³ம், மாஸபரமம் நிக்கி²பனம் கரேய்யாதி வுத்தம் ஹோதி. ‘‘ஆகங்க²மானேன பி⁴க்கு²னா படிக்³க³ஹேதப்³ப³ம், படிக்³க³ஹேத்வா கி²ப்பமேவ காரேதப்³ப³ம், நோ சஸ்ஸ பாரிபூரீ, மாஸபரமம் தேன பி⁴க்கு²னா தம் சீவரம் நிக்கி²பிதப்³ப³ம் ஊனஸ்ஸ பாரிபூரியா’’தி (பாரா. 500) வசனதோ ஏவம் உப்பன்னம் சீவரம் இச்ச²ந்தேன படிக்³க³ஹேத்வா ஸசே பஹோதி, த³ஸாஹமனதிக்காமேத்வா காரேதப்³ப³ம். ஸசே நப்பஹோதி, ஊனஸ்ஸ பரிபூரணத்த²ம் மாஸபரமம் ட²பேதப்³ப³ந்தி அத்தோ².

கதா³ ஏவம் நிக்கி²பிதப்³ப³ந்தி ஆஹ ‘‘ஸதி பச்சாஸாயா’’தி, ‘‘பச்சாஸா ஹோதி ஸங்க⁴தோ வா க³ணதோ வா ஞாதிதோ வா மித்ததோ வா பம்ஸுகூலதோ வா அத்தனோ வா த⁴னேனா’’தி (பாரா. 500) வுத்தஸங்கா⁴தி³தோ அத்தனோ வஸ்ஸக்³கா³தி³தோ லபே⁴ய்ய, தேன ‘‘இமஸ்ஸ ஊனே பரிபுண்ணே காரேஸ்ஸாமீ’’தி பச்சாஸாய ஸதி ஏவம் நிக்கி²பிதப்³ப³ந்தி அத்தோ². ததோ உத்³த⁴ம்ட²பேதும் ந வட்டதீதி மாஸதோ அதிரேககாலம் நிக்கி²பிதும் ந வட்டதி, நிஸ்ஸக்³கி³யபாசித்தியம் ஹோதீதி அத்தோ².

யதி³ ஏவம் ‘‘தத³ஹுப்பன்னே மூலசீவரே பச்சாஸாசீவரம் உப்பஜ்ஜதி, த³ஸாஹா காரேதப்³ப³ம்…பே… வீஸே உப்பன்னே மூலசீவரே பச்சாஸாசீவரம் உப்பஜ்ஜதி, த³ஸாஹா காரேதப்³ப³’’ந்தி (பாரா. 500) கஸ்மா ஆஹாதி? பச்சாஸாசீவரஸ்ஸ த³ஸதி³வஸே அதிக்கம்ம ட²பேதும் அயுத்தத்தா, மூலசீவரஸ்ஸ தக்³க³திகத்தா ஏவம் வுத்தம். யதா²ஹ அட்ட²கதா²யம் ‘‘மூலசீவரஸ்ஸ உப்பன்னதி³வஸதோ யாவ வீஸதிமோ தி³வஸோ, தாவ உப்பன்னம் பச்சாஸாசீவரம் மூலசீவரம் அத்தனோ க³திகம் கரோதீ’’தி (பாரா. அட்ட². 2.500).

ததியகதி²னகதா²வண்ணனா.

618-9. பி⁴க்கு²னியா யோ தோ⁴வாபேதீதி ஸம்ப³ந்தோ⁴. ‘‘பி⁴க்கு²னீ நாம உப⁴தோஸங்கே⁴ உபஸம்பன்னா’’தி (பாரா. 500) வசனதோ பி⁴க்கு²னிஸங்கே⁴ ஞத்திசதுத்தா²ய கம்மவாசாய, பி⁴க்கு²ஸங்கே⁴ ஞத்திசதுத்தா²ய கம்மவாசாயாதி அட்ட²வாசிகாய உபஸம்பன்னா பி⁴க்கு²னீ நாம. பு⁴த்தந்தி பி⁴க்கு²னா அத்தனா பரிபு⁴த்தம் ரஜிதம் ஆதி³ன்னகப்பம், ‘‘பரிபோ⁴க³ம் கரிஸ்ஸாமீ’’தி அந்தமஸோ ஸீஸம் ட²பேத்வா ஸயனமத்தேனாபி புராணபூ⁴தம் சீவரந்தி அத்தோ². யதா²ஹ அட்ட²கதா²யம் ‘‘ரஜித்வா கப்பம் கத்வா ஏகவாரம்பி நிவத்த²ம் வா பாருதம் வா அந்தமஸோ பரிபோ⁴க³ஸீஸேன அம்ஸே வா மத்த²கே வா கத்வா மக்³க³ம் க³தோ ஹோதி, உஸ்ஸீஸகம் வா கத்வா நிபன்னோ ஹோதி, ஏதம்பி புராணசீவரமேவா’’தி (பாரா. அட்ட². 2.503-505). வத்த²ந்தி காரியே காரணோபசாரவஸேன சீவரமேவ ஆஹ.

அஞ்ஞாதிகாயாதி ‘‘அஞ்ஞாதிகா நாம மாதிதோ வா பிதிதோ வா யாவ ஸத்தமா பிதாமஹயுகா³ அஸம்ப³த்³தா⁴’’தி வசனதோ அத்தனோ வா தஸ்ஸா வா மாது வா பிது வா பரம்பராய யாவ ஸத்தமா யுகா³, ஏத்த²ந்தரே யேன கேனசி ஞாதகேன அஸம்ப³த்³த⁴பா⁴வேன அஞ்ஞாதிகாயாதி அத்தோ². யதா² சாஹ அட்ட²கதா²யம் ‘‘பிதாமஹோயேவ பிதாமஹயுக³ம். ததோ உத்³த⁴ம் ஸப்³பே³பி புப்³ப³புரிஸா பிதாமஹக்³க³ஹணேனேவ க³ஹிதா. ஏவம் யாவ ஸத்தமோ புரிஸோ, தாவ யா அஸம்ப³த்³தா⁴’’தி (பாரா. அட்ட². 2.503-505). ஆகோடாபேதீதி பஹராபேதி.

ததோ தோ⁴வாபனாதி³தோ. நிஸ்ஸக்³கி³யாபத்தீதி நிஸ்ஸக்³கி³யஸ்ஸ ஆபத்தி நிஸ்ஸக்³கி³யாபத்தி, நிஸ்ஸக்³கி³யஸ்ஸ சீவரஸ்ஸ நாமேன விஸிட்டா² பாசித்தியாபத்தி ஹோதீதி அத்தோ². இத³ஞ்ச திண்ணம் பயோகா³னம் அந்தே ஆபஜ்ஜிதப்³பா³ய ஆபத்தியா த³ஸ்ஸனம். தஸ்ஸ நியோகே³ன தோ⁴வனாதி³ம் கரோந்தியா பி⁴க்கு²னியா தத³த்த²ம் ஸப்³ப³புப்³ப³பயோக³க³ணனாய பி⁴க்கு²னோ து³க்கடம் ஹோதீதி க³ஹேதப்³போ³. யதா²ஹ அட்ட²கதா²யம் ‘‘யாவ நம் தோ⁴வித்வா உக்கி²பதி, தாவ பி⁴க்கு²னியா பயோகே³ பயோகே³ பி⁴க்கு²ஸ்ஸ து³க்கட’’ந்தி (பாரா. அட்ட². 2.503-505). பட²மேனாதி தீணிபி காராபேந்தஸ்ஸ யம் பட²மம் காராபேதி, தேனாதி அத்தோ². தீ³பிதந்தி ‘‘அஞ்ஞாதிகாய அஞ்ஞாதிகஸஞ்ஞீ புராணசீவரம் தோ⁴வாபேதி ரஜாபேதி ஆகோடாபேதி, நிஸ்ஸக்³கி³யேன ஆபத்தி த்³வின்னம் து³க்கடான’’ந்திஆதி³னா (பாரா. 506) தே³ஸிதம். இமினா நயேன த்³வே காராபேந்தஸ்ஸ பட²மேன நிஸ்ஸக்³கி³யாபத்தி, து³தியேன து³க்கடந்தி அயமத்தோ² ஸங்க³ய்ஹதி.

620. ‘‘தோ⁴வனத்தா²ய தே³தீ’’தி இமினா ‘‘பு⁴த்தம் வத்த²’’ந்தி அதி⁴காரதோ லப்³ப⁴தி.

621. ஸாமணேரனித்³தே³ஸேபீதி ‘‘ஸாமணேரா’’தி நித்³தே³ஸோ நாம யஸ்ஸ, தஸ்மிம்பி, அத்தனா பரிபு⁴த்தம் வத்த²ம் தோ⁴வனத்தா²ய தே³தீதி யோஜனா, அத்தனோ பரிபு⁴த்தம் சீவரம் தோ⁴வனத்தா²ய ஸாமணேரஸ்ஸ தே³தீதி அத்தோ². பி-ஸத்³தோ³ ஸமுச்சயத்தோ². உபஸம்பஜ்ஜாதி புப்³ப³கிரியாய ‘‘தோ⁴வதீ’’தி அபரகிரியா ஸாமத்தி²யா லப்³ப⁴தி.

622. த³ஹரானஞ்ச பி⁴க்கூ²னந்தி அத்தனோ நவகதரானம் பி⁴க்கூ²னம். நிய்யாதி³தே தி³ன்னே. ஏஸ நயோதி ‘‘ஏகேன பாசித்தியம், அவஸிட்டே²ஹி த்³வீஹி வா ஏகேன வா ஸப்³ப³பயோகே³ஸு து³க்கடம் ஹோதீ’’தி நயோ.

623. சீவரேதி பரிபு⁴த்தசீவரே.

624. ‘‘தோ⁴வனப்பச்சயாயேவா’’தி இமினா இதரத்³வயஸ்ஸ தஸ்ஸ அனாணத்தியா கதத்தா ததோ அனாபத்திபா⁴வமாஹ.

626. ஞாதிகாதி ஏத்த² ‘‘படிஸங்கா² யோனிஸோ’’திஆதீ³ஸு (ம. நி. 1.22-23, 422; அ. நி. 6.58; 8.9; மஹானி. 206; த⁴. ஸ. 1355; விப⁴. 518) விய கா³தா²ப³ந்த⁴வஸேன ய-காரலோபோ, ஞாதிகாய பி⁴க்கு²னியாதி அத்தோ². ‘‘ஞாதிகா அஞ்ஞாதிஸஞ்ஞிஸ்ஸா’’தி பத³ச்சே²தோ³. பச்சத்த²ரணந்தி மஞ்சபீடே² அத்த²ரிதப்³ப³ம் பச்சத்த²ரணசீவரஞ்ச.

627. ‘‘பி⁴க்கு²னீனம் வஸேனா’’தி இத³ம் பி⁴க்கு²ஸங்கே⁴பி உபஸம்பன்னா சே, பாசித்தியஸம்ப⁴வா வுத்தம். யதா²ஹ அட்ட²கதா²யம் ‘‘பி⁴க்கூ²னம் ஸந்திகே உபஸம்பன்னாய பன யதா²வத்து²கமேவா’’தி (பாரா. அட்ட². 2.506). பி⁴க்கு²னிஸங்கே⁴ பட²மம் உபஸம்பஜ்ஜித்வா பச்சா² பி⁴க்கு²ஸங்கே⁴ சே உபஸம்பஜ்ஜதி, கேவலம் பி⁴க்கு²ஸங்கே⁴ உபஸம்பன்னாதி ந வுச்சதீதி தா ப⁴க³வதி த⁴ரமானே பட²மம் பப்³ப³ஜிதா பஞ்சஸதா ஸாகியானியோ வுச்சந்தி. யதா²ஹ அட்ட²கதா²யம் ‘‘பி⁴க்கூ²னம் ஸந்திகே உபஸம்பன்னா நாம பஞ்சஸதா ஸாகியானியோ’’தி (பாரா. அட்ட². 2.506). பி⁴க்கு²னோ லிங்கே³ பரிவத்தே தஸ்ஸேவ உபஸம்பன்னகம்மஸ்ஸ அனுஞ்ஞாதத்தா ஸோபி க³ஹேதப்³போ³யேவ.

628. அவுத்தா தோ⁴வதீதி ‘‘இமம் சீவரம் தோ⁴வா’’தி அவுத்தா சீவரம் கிலிட்ட²ம் தி³ஸ்வா அவத்வா ட²பிதட்டா²னதோ சீவரம் க³ஹேத்வா வா ஸயமேவ வத்வா யாசனாதி³னயேன வா அனாணத்தியா ச க³ஹேத்வா சீவரதோ⁴வனாதி³ம் கரேய்ய சே. அபரிபு⁴த்தம் வாதி ஹேட்டா² வுத்தனயேன அபரிபு⁴த்தம் சீவரம். அஞ்ஞம் வாதி உபாஹனத்த²விகபத்தத்த²விகபோத்த²கத்த²விகமஞ்சபீடா²தி³ம் யம் கிஞ்சி பரிக்கா²ரம்.

புராணசீவரதோ⁴வாபனகதா²வண்ணனா.

629. விகப்பனுபக³ம் பச்சி²மம் உபாதா³ய கிஞ்சி சீவரம் க³ண்ஹதோதி யோஜனா, ஏத்த² ‘‘அஞ்ஞாதிகாய பி⁴க்கு²னியா ஹத்த²தோ’’தி ச ‘‘ஞாதிகாய அஞ்ஞாதிகஸஞ்ஞிஸ்ஸா’’தி ச ‘‘ஏகதோஉபஸம்பன்னாய ஹத்த²தோ க³ண்ஹாதீ’’தி ச வக்க²மானவசனஸாமத்தி²யா லப்³ப⁴மானதோ புப்³பே³ வுத்தனயேன அஞ்ஞாதிகாய உப⁴தோஸங்கே⁴ உபஸம்பன்னாய பி⁴க்கு²னியா ஹத்த²தோ விகப்பனுபக³ரதனவித³த்தி²ப்பமாணவத்த²தோ பட்டா²ய யம் கிஞ்சி சீவரம் க³ண்ஹந்தஸ்ஸாதி அத்தோ². ‘‘ஆபத்தீ’’தி ஸாமஞ்ஞேன வுத்தேபி ‘‘நிஸ்ஸக்³கி³யா பாசித்தியாபத்தீ’’தி பகரணதோ ச ‘‘நிஸ்ஸக்³கி³யாபத்தீ’’தி வக்க²மானதோ ச லப்³ப⁴தி. ட²பேத்வா பாரிவத்தகந்தி ‘‘பாரிவத்தகம் பரித்தேன வா விபுலம், விபுலேன வா பரித்த’’ந்தி (பாரா. 514) வசனதோ மஹாபச்சரியம் ‘‘அந்தமஸோ ஹரீதகக²ண்டே³னாபீ’’தி (பாரா. அட்ட². 2.514) வுத்தத்தா ச ஹேட்டி²மந்ததோ ஹரீதகக²ண்ட³ம்பி த³த்வா க³ஹேதப்³ப³ம் திசீவரஞ்ச பாரிவத்தகம் நாம ஹோதி, தம் ட²பேத்வாதி வுத்தம் ஹோதி. பரிவத்தனம் பரிவத்தம், தம் ஏதஸ்ஸ அத்தீ²தி பாரிவத்தகம், கயவிக்கயேன க³ஹேதப்³ப³ம் சீவரந்தி அத்தோ².

630. க³ஹணத்தா²ய பயோகே³தி க³ண்ஹிதும் ஹத்த²பஸாரணாதி³ப்பயோகே³. பரியாபுதந்தி ‘‘படிக்³க³ண்ஹாதி பயோகே³ து³க்கட’’ந்தி (பாரா. 512) தே³ஸிதம்.

631. அனுபஸம்பன்னஹத்தே²தி பி⁴க்கு²பி⁴க்கு²னிதோ அஞ்ஞே ஸப்³பே³ அனுபஸம்பன்னா க³ஹிதா. யதா²ஹ அட்ட²கதா²யம் ‘‘ஸசே பன ஸிக்க²மானாஸாமணேரஸாமணேரிஉபாஸகஉபாஸிகானம் ஹத்தே² பேஸிதம் படிக்³க³ண்ஹாதி, அனாபத்தீ’’தி (பாரா. அட்ட². 2.512).

632. ஏகதோதி ஏத்த² பி⁴க்கு²னிஸங்க⁴தோதி க³ஹேதப்³ப³ம். அஞ்ஞஸ்மிம் பக்கே² பாசித்தியமேவ. யதா²ஹ அட்ட²கதா²யம் ‘‘பி⁴க்கூ²னம் ஸந்திகே உபஸம்பன்னாய பன பாசித்தியமேவா’’தி (பாரா. அட்ட². 2.513).

633. ‘‘பாரிவத்தகம் த³ஸ்ஸாமீ’’தி ஆபோ⁴க³ம் கத்வா க³ண்ஹாதி, தோ³ஸோ ந விஜ்ஜதீதி யோஜனா.

634. அஞ்ஞம் பரிக்கா²ரந்தி த²விககாயப³ந்த⁴னாதி³ அவிகப்பியம் வா அவிகப்பனுபக³ம் வா பரிக்கா²ரமேவ க³ஹேதப்³ப³ம். விகப்பனுபக³ம் பன ந வட்டதி. யதா²ஹ அட்ட²கதா²யம் ‘‘விகப்பனுபக³ம் பச்சி²மசீவரப்பமாணம் பன படபரிஸ்ஸாவனம்பி ந வட்டதீ’’தி (பாரா. அட்ட². 2.514). சீவரபடிக்³க³ண்ஹனம் கிரியா, பாரிவத்தகஸ்ஸ அதா³னம் அகிரியாதி கிரியாய ச அகிரியாய ச ஆபஜ்ஜிதப்³ப³தோ க்ரியாக்ரியம்.

சீவரபடிக்³க³ஹணகதா²வண்ணனா.

635. ‘‘அஞ்ஞாதகம் அப்பவாரித’’ந்தி பத³ச்சே²தோ³. ‘‘க³ஹபதிம் வா க³ஹபதானிம் வா’’தி பாட²ஸேஸோ. வுத்தஞ்ஹி ப⁴க³வதா ‘‘அஞ்ஞாதகம் க³ஹபதிம் வா க³ஹபதானிம் வா’’தி (பாரா. 516, 518). புப்³பே³ வுத்தனயேன யாவ ஸத்தமா பிதாமஹயுகா³ ஸம்ப³த்³த⁴ஞ்ஞாதிகதாய அபா⁴வதோ அஞ்ஞாதகம். ‘‘யம் மய்ஹம் கே³ஹே அத்தி², தம் பவாரேமீ’’திஆதி³னா நயேன அப்பவாரிதம். ‘‘க³ஹபதி நாம யோ கோசி அகா³ரம் அஜ்ஜா²வஸதீ’’தி (பாரா. 519) பாளியம் வுத்தம் க³ஹபதிம் வா. ‘‘க³ஹபதானீ நாம யா காசி அகா³ரம் அஜ்ஜா²வஸதீ’’தி (பாரா. 519) பாளியம் வுத்தம் க⁴ரணிம் வாதி அத்தோ².

ஹோதி நிஸ்ஸக்³கி³யாபத்தீதி ‘‘அஞ்ஞத்ர ஸமயா விஞ்ஞாபேதி, பயோகே³ து³க்கடம், படிலாபே⁴ன நிஸ்ஸக்³கி³யம் ஹோதீ’’தி (பாரா. 519) பாளியம் வுத்தேஸு ஸப்³பே³ஸு புப்³ப³பயோகே³ஸு து³க்கடேன ஸத்³தி⁴ம் நிஸ்ஸக்³கி³யபாசித்தியம் ஹோதீதி வுத்தம் ஹோதி. அஞ்ஞத்ர ஸமயாதி ‘‘தத்தா²யம் ஸமயோ, அச்சி²ன்னசீவரோ வா ஹோதி பி⁴க்கு² நட்ட²சீவரோ வா’’தி (பாரா. 518) மாதிகாய, ‘‘அச்சி²ன்னசீவரோ நாம பி⁴க்கு²ஸ்ஸ சீவரம் அச்சி²ன்னம் ஹோதி ராஜூஹி வா சோரேஹி வா து⁴த்தேஹி வா யேஹி கேஹிசி வா அச்சி²ன்னம் ஹோதி. நட்ட²சீவரோ நாம பி⁴க்கு²ஸ்ஸ சீவரம் அக்³கி³னா வா த³ட்³ட⁴ம் ஹோதி, உத³கேன வா வூள்ஹம் ஹோதி, உந்தூ³ரேஹி வா உபசிகாஹி வா கா²யிதம் ஹோதீ’’தி (பாரா. 519) பத³பா⁴ஜனே ச நித்³தி³ட்ட²ஸரூபகாலதோ அஞ்ஞத்ராதி அத்தோ².

636. திகபாசித்தியம் வுத்தந்தி ‘‘அஞ்ஞாதகே அஞ்ஞாதகஸஞ்ஞீ, வேமதிகோ, ஞாதகஸஞ்ஞீ அஞ்ஞத்ர ஸமயா சீவரம் விஞ்ஞாபேதி, நிஸ்ஸக்³கி³யம் பாசித்திய’’ந்தி (பாரா. 520) பாசித்தியத்தயம் ப⁴க³வதா வுத்தம். ‘‘ஞாதகே அஞ்ஞாதிஸஞ்ஞிஸ்ஸா’’தி பத³ச்சே²தோ³. தத்தா²தி தஸ்மிம் ஞாதகே. வேமதிகஸ்ஸாதி ‘‘ஞாதகோ நு கோ², அஞ்ஞாதகோ’’தி வேமதிகஸ்ஸ. த்³விகது³க்கடம் ததே²வாதி யோஜனா. ‘‘ததே²வா’’தி ‘‘வுத்த’’ந்தி இத³ம் ஆகட்³ட⁴தி, ‘‘ஞாதகே அஞ்ஞாதகஸஞ்ஞீ, வேமதிகோ அஞ்ஞத்ர ஸமயா சீவரம் விஞ்ஞாபேதி, ஆபத்தி து³க்கடஸ்ஸா’’தி (பாரா. 520) தே³ஸிதந்தி அத்தோ².

637-8. ஸமயே விஞ்ஞாபேந்தஸ்ஸ அனாபத்தீதி யோஜனா. ஏத்த² ‘‘சீவரம் அஞ்ஞாதகஅப்பவாரித’’ந்தி ஆனேத்வா ஸம்ப³ந்தி⁴தப்³ப³ம், யதா²பரிச்சி²ன்னகாலத்³வயதோ அஞ்ஞதரஸ்மிம் காலே அஞ்ஞாதகஅப்பவாரிதம் சீவரம் விஞ்ஞாபேந்தஸ்ஸ அனாபத்தீதி அத்தோ². ஞாதகே வா பவாரிதேதி ஏத்தா²பி ‘‘அத்தனோ’’தி அஜ்ஜா²ஹாரோ, ‘‘ஸமயே’’தி இமினா யோஜேதப்³ப³ம், அத்தனோ ஞாதகபவாரிதே அஸமயேபி சீவரம் விஞ்ஞாபேந்தஸ்ஸ அனாபத்தீதி அத்தோ². அஞ்ஞஸ்ஸத்தா²யாதி ஏத்த² ‘‘அத்தனோ’’தி ஸேஸோ, அத்தனோ ஞாதகே, பவாரிதே வா விஞ்ஞாபேந்தஸ்ஸ அனாபத்தீதி யோஜனா, அஞ்ஞம் பி⁴க்கு²ம் நிஸ்ஸாய அத்தனோ ஞாதகே வா பவாரிதே வா சீவரம் விஞ்ஞாபேந்தஸ்ஸ அனாபத்தீதி வுத்தம் ஹோதி. இதரம் பக்க²ம் த³ஸ்ஸேதி ‘‘தஸ்ஸ ஞாதகே வா பவாரிதே வா’’தி. தஸ்ஸாதி ‘‘அஞ்ஞஸ்ஸா’’தி வுத்தஸ்ஸ, ‘‘விஞ்ஞாபேந்தஸ்ஸ அனாபத்தீ’’தி இமினா யோஜேதப்³ப³ம். வாதி புரிமவிகப்பாபேக்க²ம். யம் ஸந்தா⁴ய சீவரம் விஞ்ஞாபேதி, தஸ்ஸ ஞாதகே வா பவாரிதே வா தம்யேவ ஸந்தா⁴ய சீவரம் விஞ்ஞாபேந்தஸ்ஸ அனாபத்தீதி வுத்தம் ஹோதி.

‘‘அத்தனோ வா த⁴னேனா’’தி வுத்தம் அனாபத்திஅங்க³ம் உம்மத்தகாதி³னோதி ஏத்த² ஆதி³-ஸத்³தே³ன ஸங்க³ய்ஹதி, அத்தனோ ஸந்தகம் ஸுத்தகப்பாஸாதி³கம் கப்பியவத்து²ம் த³த்வா க³ண்ஹிதுகாமதாய அகப்பியவோஹாரேன யாசந்தஸ்ஸ ச அனாபத்தீதி அத்தோ².

அஞ்ஞாதகவிஞ்ஞத்திகதா²வண்ணனா.

639. அப்பவாரிதமஞ்ஞாதிந்தி ஏத்த² ‘‘க³ஹபதிம் வா க³ஹபதானிம் வா’’தி இத³ம் ஸாமத்தி²யா லப்³ப⁴தி. ததுத்தரிந்தி ததோ ஸந்தருத்தரபரமதோ உத்தரிந்தி க³ஹேதப்³ப³ம், ‘‘ஸந்தருத்தரபரமம் தேன பி⁴க்கு²னா ததோ சீவரம் ஸாதி³தப்³ப³’’ந்தி (பாரா. 523) வுத்தத்தா அச்சி²ன்னசீவரேன ஸாதி³தப்³ப³அந்தரவாஸகஉத்தராஸங்க³மத்தேன அதி⁴கந்தி அத்தோ².

‘‘ததோ சே உத்தரி ஸாதி³யேய்யா’’தி (பாரா. 523) வசனதோ ‘‘ஸாதி³யந்தஸ்ஸா’’தி வத்தப்³ப³ம், ஏவம் வத்தப்³பே³ ‘‘விஞ்ஞாபேந்தஸ்ஸா’’தி கஸ்மா வுத்தந்தி? அச்சி²ன்னசீவரானம் பி⁴க்கூ²னம் ச²ப்³ப³க்³கி³யேஹி பி⁴க்கூ²ஹி சீவரவிஞ்ஞாபனவத்து²ஸ்மிம் ‘‘கத²ஞ்ஹி நாம தும்ஹே மோக⁴புரிஸா ந மத்தம் ஜானித்வா ப³ஹும் சீவரம் விஞ்ஞாபேஸ்ஸதா²’’தி (பாரா. 522) ச²ப்³ப³க்³கி³யே பி⁴க்கூ² க³ரஹித்வா இமஸ்ஸ ஸிக்கா²பத³ஸ்ஸ பஞ்ஞத்தத்தா ‘‘ஸாதி³தப்³ப³’’ந்தி ஏத்த² விஞ்ஞாபேதப்³ப³ந்தி அத்தோ² ஹோதி, தேனேவ இமஸ்மிம் பத³பா⁴ஜனே ‘‘ததோ சே உத்தரி ஸாதி³யேய்யாதி ததுத்தரி விஞ்ஞாபேதீ’’தி (பாரா. 524) ச ஆபத்திபே⁴த³ஸந்த³ஸ்ஸனட்டா²னே ‘‘அஞ்ஞாதகே அஞ்ஞாதகஸஞ்ஞீ ததுத்தரி சீவரம் விஞ்ஞாபேதி, நிஸ்ஸக்³கி³யம் பாசித்திய’’ந்திஆதி³வசனதோ (பாரா. 525) ச வுத்தம். யதி³ ஏவம் ஸிக்கா²பதே³யேவ ‘‘ஸாதி³தப்³ப³ம், ஸாதி³யேய்யா’’தி ச உப⁴யத்த² ‘‘விஞ்ஞாபேதப்³ப³ம், விஞ்ஞாபேய்யா’’தி ச கஸ்மா ந வுத்தந்தி? அச்சி²ன்னசீவரபா⁴வம் ஞத்வா அவிஞ்ஞாபிதேபி அபி⁴ஹரித்வா தி³ய்யமானம்பி அதி⁴வாஸேந்தேன ஏவமேவ ஸாதி³தப்³ப³ந்தி ந வுத்தம். இமஸ்ஸேவ ச அதி⁴கவிஞ்ஞாபனனிஸேத⁴னத்த²ம் வத³ந்தேனாபி ‘‘தஞ்சே அஞ்ஞாதகோ க³ஹபதி வா க³ஹபதானீ வா ப³ஹூஹி சீவரேஹி அபி⁴ஹட்டு²ம் பவாரேய்ய, ஸந்தருத்தரபரமம் தேன பி⁴க்கு²னா ததோ சீவரம் ஸாதி³தப்³ப³’’ந்தி ஸாதி³தப்³ப³னியமப்பதா⁴னம் வுத்தம். தஸ்மா அச்சி²ன்னசீவரேன அத்தனா வா தம் ஸந்தா⁴ய அஞ்ஞேன வா விஞ்ஞாபேந்தேனபி அவிஞ்ஞாபேந்தேபி தி³ய்யமானம் ஸாதி³யந்தேனாபி ஸந்தருத்தரபரமதம் நாதிக்கமிதப்³ப³ந்தி இமஸ்மிம் ஸிக்கா²பதே³ ஸந்தா⁴ய பா⁴ஸிதத்தோ²தி ஸல்லக்கே²தப்³ப³ந்தி ஏத்தகம் ஞாபேதும் ‘‘ஸாதி³யந்தஸ்ஸா’’தி அவத்வா ‘‘விஞ்ஞாபேந்தஸ்ஸா’’தி வுத்தந்தி ஆசரியாபி⁴ஸந்தி⁴ வேதி³தப்³பா³.

640. இதா³னி விஞ்ஞாபனே ச அதி⁴வாஸனே ச உப⁴யத்தே²வ நியமம் த³ஸ்ஸேதும் ‘‘ஸசே தீணி நட்டா²னி ஹோந்தி, த்³வே ஸாதி³தப்³பா³னி. த்³வே நட்டா²னி, ஏகம் ஸாதி³தப்³ப³ம். ஏகம் நட்ட²ம், ந கிஞ்சி ஸாதி³தப்³ப³’’ந்தி (பாரா. 524) பத³பா⁴ஜனே வுத்தவினிச்ச²யம் த³ஸ்ஸேதுமாஹ ‘‘யஸ்ஸா’’திஆதி³. ‘‘யஸ்ஸ தீணிபி நட்டா²னி, த்³வே வா நட்டா²னி, ஏகம் வா நட்ட²’’ந்தி ஸம்ப³ந்தி⁴த்வா யதா²க்கமம் ‘‘தேன த்³வே ஸாதி³தப்³பா³னி, ஏகம் ஸாதி³தப்³ப³ம், ந கிஞ்சிபி ஸாதி³தப்³ப³’’ந்தி யோஜனா காதப்³பா³. யஸ்ஸ தீணிபி சீவரானி நட்டா²னி, ப³ஹு ச தி³ய்யதி, தேன த்³வேயேவ சீவரானி ஸாதி³தப்³பா³னி. த்³வே சீவரானி நட்டா²னி, ஏகம் ஸாதி³தப்³ப³ம். ஏகஞ்சே நட்ட²ம், ந ஸாதி³தப்³ப³ம், அவஸிட்ட²ம் பச்சா² த⁴ம்மேன ஸமேன லத்³த⁴னீஹாரேன க³ஹேதப்³ப³ந்தி அத்தோ². யதா²ஹ அட்ட²கதா²யம் ‘‘ஸேஸம் ஸபா⁴க³ட்டா²னதோ பரியேஸிஸ்ஸதீ’’தி. ‘‘பி⁴க்கு²னியா பன பஞ்சஸுபி நட்டே²ஸு த்³வே ஸாதி³தப்³பா³னி, சதூஸு நட்டே²ஸு ஏகம் ஸாதி³தப்³ப³ம், தீஸு நட்டே²ஸு கிஞ்சி ந ஸாதி³தப்³ப³’’ந்தி (பாரா. அட்ட². 2.522-524) அட்ட²கதா²யம் வுத்தம்.

641-2. ஸேஸகம் ஆஹரந்தஸ்ஸ அனாபத்தீதி ஞாதப்³ப³ந்தி யோஜனா. ஏவமுபரிபி யோஜேதப்³ப³ம். சீவரம் யோஜேத்வா அதிரேகம் வத்த²ம் பச்சாஹரித்வா ‘‘த³ஸ்ஸாமீ’’தி ப³ஹும்பி க³ஹேத்வா க³ச்ச²ந்தஸ்ஸ அனாபத்தீதி அத்தோ². அதிரேகம்பி தும்ஹேயேவ க³ண்ஹதா²தி தி³ன்னம் க³ண்ஹதோபி அனாபத்தி. ந அச்சி²ன்னகாரணா தி³ன்னேதி யோஜனா, அச்சி²ன்னசீவரபா⁴வம் அனுத்³தி³ஸ்ஸ ப³ஹூனம் சீவரானம் க³ஹணனிமித்தேனாபி அனாபத்தீதி அத்தோ². ஏவமேவ ‘‘ந நட்ட²காரணா தே³ந்தீ’’தி இத³ம்பி த³ஸ்ஸிதமேவ. அச்சி²ன்னசீவரே நிஸ்ஸாய ததுத்தரிசீவரவிஞ்ஞாபனவத்து²ம்ஹி இமஸ்ஸ ஸிக்கா²பத³ஸ்ஸ பஞ்ஞத்தத்தா அனாபத்திவாரே ‘‘அஞ்ஞஸ்ஸத்தா²யா’’தி ந க³ஹிதம்.

ததுத்தரிகதா²வண்ணனா.

643. கல்யாணகம்யதாஹேதூதி ஸுந்த³ரஸ்ஸ மஹக்³க⁴ஸ்ஸ காமதம் படிச்ச சீவரே விகப்பனம் ஆபஜ்ஜேய்யாதி யோஜனா, ‘‘கீதி³ஸேன தே ப⁴ந்தே சீவரேன அத்தோ²’’தி புப்³பே³ அப்பவாரிதோ ‘‘ஆயதம் வா ஹோது வித்த²தம் வா அப்பிதம் வா ஸண்ஹம் வா’’தி (பாரா. 529) பத³பா⁴ஜனே வுத்தவிஸிட்ட²கப்பம் அதி⁴கவிதா⁴னம் கரோதீதி அத்தோ². தஸ்ஸ லாபா⁴ நிஸ்ஸக்³கி³யம் ப⁴வேதி ததா² அப்பவாரிதேன ஹுத்வா கதேன அதி⁴கவிதா⁴னேன நிப்ப²ன்னசீவரஸ்ஸ லாப⁴ப்பயோகே³ன து³க்கடனிஸ்ஸக்³கி³யபாசித்தியா ஹோந்தி.

644. மஹக்³க⁴ம் …பே… விஞ்ஞாபேதீதி வீஸதிஅக்³க⁴னகம் சீவரம் தா³துகாமம்ஹி உபாஸகே, ‘‘அலம் மய்ஹம் ஏதேன, த³ஸக்³க⁴னகம் வா அப்பக்³க⁴னகம் வா தே³ஹீ’’தி வத³தி.

645. ‘‘ஞாதகே அஞ்ஞாதிஸஞ்ஞிஸ்ஸா’’தி பத³ச்சே²தோ³.

பட²மோபக்க²டகதா²வண்ணனா.

646. பட²மஸிக்கா²பதே³ ஏகேன உபாஸகேன பீளா லத்³தா⁴, இத⁴ த்³வீஹீதி ஏத்தகம் நானாகரணம். ஸேஸம் பட²மஸிக்கா²பத³ஸதி³ஸமேவாதி ஆஹ ‘‘து³தியோ…பே… வினிச்ச²யோ’’தி. உபக்க²டபதே³ன லக்கி²தம் ஸிக்கா²பத³ம் உபக்க²டம், து³தியஞ்ச தம் உபக்க²டஞ்சாதி து³தியோபக்க²டம், தஸ்மிம் து³தியோபக்க²டே. அஸ்ஸாதி து³தியோபக்க²டஸ்ஸ.

து³தியோபக்க²டகதா²வண்ணனா.

647. ரஞ்ஞா வாதி ராஜதோ வா. ராஜதோ போ⁴க்³க³ம் பு⁴ஞ்ஜிதப்³ப³ம் அஸ்ஸ அத்தீ²தி ‘‘ராஜபோ⁴க்³கோ³’’தி வுத்தோ, ராஜதோ ப⁴த்தவேத்தனலாபி⁴தோ யதோ குதோசி தா³யகா ஆப⁴தந்தி ஸம்ப³ந்தோ⁴. ந ச வட்டதீதி ஏத்த² ‘‘நிஸ்ஸக்³கி³யபாசித்தியபா⁴வதோ’’தி அஜ்ஜா²ஹரிதப்³ப³ம். இத⁴ உத்தரிகரணீயம் ‘‘திக்க²த்து’’ந்திஆதி³கா³தா²ய (வி. வி. 671) வக்க²தி.

648. சீவரசேதாபன்னவஸேன அதி⁴க³தரஜதாதி³ யேன கேனசி பரியாயேனாபி ந ஸாதி³தப்³ப³ந்தி த³ஸ்ஸேதுமாஹ ‘‘ரஜதம் வா’’திஆதி³. த⁴வலஸபா⁴வதாய ராஜதீதி ரஜதம், ஸஜ்ஜு². ஜாதம் ரூபம் வண்ணாயதனமேதஸ்ஸாதி ஜாதரூபம், ஸுவண்ணம். கிஞ்சீதி அப்பமத்தகம்பி. அத்தனோ வா அத்தா²ய பரஸ்ஸ வா அத்தா²ய தி³ய்யமானம் கிஞ்சி க³ண்ஹிதும் ந வட்டதீதி யோஜனா.

649. அத்தனோ படிக்³க³ஹணே ஆபத்தியா ரூபியக³ஹணஸிக்கா²பதே³ வக்க²மானத்தா அஞ்ஞஸ்ஸ அத்தா²ய க³ஹணே ஆபத்தித³ஸ்ஸனத்த²மாஹ ‘‘அஞ்ஞஸ்ஸத்தா²யா’’திஆதி³. தத்த² அஞ்ஞஸ்ஸத்தா²யாதி அஞ்ஞஸ்ஸ புக்³க³லஸ்ஸ, க³ணஸ்ஸ, ஸங்க⁴ஸ்ஸ, சேதியஸ்ஸ, நவகம்மஸ்ஸ வா அத்தா²ய. நித்³தி³ட்ட²ந்தி ஆஹரித்வா ‘‘இமம் க³ண்ஹதா²’’தி வுத்தம் ரஜதம், ஜாதரூபம் வா அஞ்ஞம் வா யம் கிஞ்சி நிஸ்ஸக்³கி³யது³க்கடவத்து²ம் படிக்³க³ண்ஹதோ தஸ்ஸ பி⁴க்கு²னோ து³க்கடம் ஹோதீதி மஹாபச்சரியம் வுத்தந்தி யோஜனா.

650-1. வுத்தமேவத்த²ம் ஸரூபதோ விபா⁴வேதுமாஹ ‘‘நேத்வா’’திஆதி³. நேத்வாதி ஆனேத்வா. அகப்பியம் ப⁴ண்ட³ந்தி ‘‘ரஜதம் ஜாதரூபம் வா’’தி யதா²வுத்தமேவ அகப்பியப⁴ண்ட³ம். இத்த²ந்தி வக்க²மானப்பகாரேன. ந ச வட்டதீதி ஏத்த² ச-காரேன வட்டதி சாதி அனுஞ்ஞாதம் கதந்தி. யதா²ஹ அட்ட²கதா²யம் –

‘‘ஸசே பன ‘நயித³ம் பி⁴க்கூ²னம் ஸம்படிச்சி²தும் வட்டதீ’தி படிக்கி²த்தே ‘வட்³ட⁴கீனம் வா கம்மகரானம் வா ஹத்தே² ப⁴விஸ்ஸதி, கேவலம் தும்ஹே ஸுகதது³க்கடம் ஜானாதா²’தி வத்வா தேஸம் ஹத்தே² த³த்வா பக்கமதி, வட்டதி. அதா²பி ‘மம மனுஸ்ஸானம் ஹத்தே² ப⁴விஸ்ஸதி, மய்ஹமேவ வா ஹத்தே² ப⁴விஸ்ஸதி, கேவலம் தும்ஹே யம் யஸ்ஸ தா³தப்³ப³ம், தத³த்தா²ய பேஸேய்யாதா²’தி வத³தி, ஏவம்பி வட்டதீ’’தி (பாரா. அட்ட². 2.538-539).

652. விஹாரஸ்ஸாதி ஏத்த² ‘‘நவகம்மஸ்ஸா’’தி (பாரா. அட்ட². 2.538-539) அட்ட²கதா²யம் வுத்தத்தா வத்தப்³ப³ம் கா³தா²ப³ந்த⁴வஸேன ந வுத்தம்.

654. ரஜதம் ஜாதரூபம் வா ஸங்க⁴ஸ்ஸாதி ஏத்த² ‘‘சத்தாரோ பச்சயே பரிபு⁴ஞ்ஜதா²தி தி³ன்ன’’ந்தி ஸேஸோ. யதா²ஹ அட்ட²கதா²யம் ‘‘ஸசே பன கோசி ப³ஹும்பி ஹிரஞ்ஞஸுவண்ணம் ஆனேத்வா ‘இத³ம் ஸங்க⁴ஸ்ஸ த³ம்மி, சத்தாரோ பச்சயே பரிபு⁴ஞ்ஜதா²’தி வத³தி, தம் சே ஸங்கோ⁴ ஸம்படிச்ச²தி, படிக்³க³ஹணேபி பரிபோ⁴கே³பி ஆபத்தீ’’தி (பாரா. அட்ட². 2.538-539). ஏவம் ஆப⁴தம் தஸ்மிம் ஸங்கே⁴ யோ கோசி பி⁴க்கு² ‘‘நயித³ம் கப்பதீ’’தி ஸசே படிக்கி²பதி, ‘‘அயம் ஸங்க⁴ஸ்ஸ லாப⁴ந்தராயம் கரோதீ’’தி வத³ந்தஸ்ஸேவ ஆபத்தி ஹோதி. யதா²ஹ அட்ட²கதா²யம் ‘‘யோ ஹி தம் சோதே³தி, ஸ்வேவ ஸாபத்திகோ ஹோதி, தேன பன ஏகேன ப³ஹூ அனாபத்திகா கதா’’தி (பாரா. அட்ட². 2.538-539). இத⁴ ஸ்வேவ ஸாபத்திகோதி ஏத்த² ‘‘து³க்கடாபத்திகோதி வுத்தம் ஹோதீ’’தி க³ண்டி²பதே³ வுத்தம். இமிஸ்ஸா கா³தா²ய ‘‘ஸங்க⁴ஸ்ஸா’’தி அலிகி²த்வா ‘‘பி⁴க்கு²னோ’’தி ச லிக²ந்தி, தம் ந ஸுந்த³ரம். இதா³னி த³ஸ்ஸிதஅட்ட²கதா²பாடே² ‘‘ஸங்கோ⁴ ஸம்படிச்ச²தீ’’தி (பாரா. அட்ட². 2.538-539) வுத்தத்தா ‘‘ஸங்க⁴ஸ்ஸா’’தி பாடோ² ஸுந்த³ரோ.

655. தளாகஸ்ஸாதி வாபியா. ஸஸ்ஸுப்பத்தினிதா³னதோ தளாகம் கே²த்தம், ததோ தஸ்ஸ க³ஹணம் வா பரிபோ⁴கோ³ வா ந ச வட்டதீதி யோஜனா. தளாகஸ்ஸ சாதி ஏத்த² ச-காரேன கே²த்தவத்து² ஸங்க³ஹிதம். ந ச வட்டதீதி ஏத்த² சகாரேன வட்டதி சாதி த³ஸ்ஸிதம் ஹோதி.

656. தம் கதமந்தி ஆஹ ‘‘சத்தாரோ’’திஆதி³. ஸப்³ப³ம்பீதி தளாகபோக்க²ரணிகே²த்தாதி³ ஸப்³ப³ம்பி.

658-9. அபரிச்சி²ன்னபா⁴க³ஸ்மிந்தி ‘‘இமஸ்மிம் பூ⁴மிபா⁴கே³ கதஸ்ஸ கம்மேஹி ஏத்தகோ பா⁴கோ³ தே³ய்யோ’’தி ஏவம் புப்³பே³ அனியமிதஆயே பூ⁴மிபா⁴கே³. அகதபுப்³ப³ம் நவஸஸ்ஸம் நாம. ஏத்தகம் பா⁴க³ம் தே³தா²தி ஏத்தகம் கஹாபணபா⁴க³ம் தே³த². உட்டா²பேதீதி உப்பாதே³தி.

‘‘கஸத² வபதா²’’தி அகப்பியம் வாசம் வத்வாதி யோஜனா. வபதா²தி சாதி ஏத்த² ச-ஸத்³தோ³ இத⁴ அவுத்தம் தம்கத்துயோக³காலே வுச்சமானம் அகப்பியவசனந்தரம் ஸமுச்சினோதி. உப்பாதி³தஞ்சாதி ஏத்த² ச-ஸத்³தோ³ கஹாபணம் ஸமுச்சினோதி. ஸப்³ப³ந்தி ததா² உப்பாதி³தகஹாபணஞ்ச ஏவம் அகப்பியவோஹாரேன உப்பாதி³தஞ்சாதி ஸப்³ப³ம்.

660. கஸதா²தி³கம் வசனம் அவத்வா ‘‘ஏத்திகாய பூ⁴மியா ஏத்தகோ நாம பா⁴கோ³’’தி பூ⁴மிம் யோ ச பதிட்டா²பேதி, தஸ்ஸேவேதமகப்பியந்தி வக்க²மானேன யோஜேதப்³ப³ம். ச-ஸத்³தோ³ ‘‘யோ பனா’’தி வக்க²மானபுக்³க³லந்தராபேக்கோ².

661-2. பூ⁴மியா ஸயமேவ பமாணஸ்ஸ ஜானனத்த²ம் தூதி யோஜனா, ‘‘ஏத்தகே பூ⁴மிபா⁴கே³ அம்ஹேஹி ஸஸ்ஸம் கதம், ஏத்தகம் நாம பா⁴க³ம் க³ண்ஹதா²’’தி கஸகேஹி வுத்தே தேஸம் வசனம் அஸத்³த³ஹித்வா ஸயமேவ கே²த்தபூ⁴மியா பமாணம் ஞாதுகாமதாயாதி அத்தோ². து-ஸத்³தோ³ இமமேவ விஸேஸம் ஜோதேதி. யோ பன மினாதி, தஸ்ஸேவேதமகப்பியந்தி வக்க²மானேன யோஜேதப்³ப³ம். ரஜ்ஜுயாபி ச த³ண்டே³னாதி ஏத்த² பாதே³னாபி மினிதும் ந வட்டதீதி வத³ந்தி. ‘‘ரக்க²தீ’’திஆதி³கிரியாபதே³ஹிபி ஏவமேவ யோஜேதப்³ப³ம்.

க²லே ட²த்வா ரக்க²தீதி த⁴ஞ்ஞகரணே ட²த்வா அஞ்ஞே க³ண்ஹிதும் அத³த்வா பாலேதி. கத²ம் ரக்கி²தும் வட்டதி, கத²ம் ரக்கி²தும் ந வட்டதீதி? தம் பன வீஹிம் ‘‘இத³ம் வா ஏத்தகம் வா மா க³ண்ஹ, இத³ம் க³ஹேதும் ந லப்³ப⁴தீ’’தி வா ‘‘இதோ அபனேஹி, இத⁴ புஞ்ஜம் கரோஹீ’’தி வா ஏவமாதி³னா பயோகே³ன சே ரக்க²தி, தம் அகப்பியம். ஸசே ‘‘மயி டி²தே ரக்கி²தம் ஹோதீ’’தி ரக்க²தி, க³ண்ஹந்தே வா பஸ்ஸித்வா ‘‘கிம் கரோதா²’’தி ப⁴ணதி, வட்டதி. ரூபியபடிக்³க³ஹணஸிக்கா²பதே³ த்³வாரம் பித³ஹித்வா ரக்க²ந்தேன வஸிதப்³ப³ந்தி ஹி வுத்தந்தி க³ண்டி²பதே³ வுத்தனயேன வேதி³தப்³போ³. அஞ்ஞஸ்மிம்பி க³ண்டி²பதே³ வுத்தம் ‘‘தே²னேத்வா க³ண்ஹந்தே ஸதி ஏதம் போ⁴ பவத்திம் பி⁴க்கு²ஸங்க⁴ஸ்ஸ கிம் ஆரோசேஸ்ஸாமீதி படிபுச்சி²தும் வட்டதீதி வத³ந்தீ’’தி. நீஹராபேதீதி ஏத்தா²பி ஸசே பரியாயேன வத³தி, வட்டதீதி வத³ந்தி. தஸ்ஸேவேதமகப்பியந்தி இத³ம் கே²த்தமினனாதி³ம் கரோந்தேன லத்³த⁴ப்³ப³தோ அஞ்ஞஸ்ஸ அபி⁴னவுப்பாதி³தஸ்ஸ அபா⁴வா அஞ்ஞேஸம் வட்டதீதி த்³வீஸு க³ண்டி²பதே³ஸு வுத்தம்.

663. ‘‘ஏத்தகேஹி வீஹீஹி இத³ம் ஆஹரதா²’’தி வுத்தா ஸசே ஆஹரந்தீதி யோஜனா. ஏத்த² ‘‘தஸ்ஸேவேதமகப்பிய’’ந்தி இத³ம் த⁴ஞ்ஞஸ்ஸ விசாரிதத்தா வுத்தம். யதா²ஹ அட்ட²கதா²யம் ‘‘தஸ்ஸேவ அகப்பியம். கஸ்மா? த⁴ஞ்ஞஸ்ஸ விசாரிதத்தா’’தி (பாரா. அட்ட². 2.538-539).

664. ஹிரஞ்ஞேனாதி கஹாபணேன. ‘‘தமகப்பிய’’ந்தி இத³ம் கஹாபணானம் விசாரிதத்தா வுத்தம். யதா²ஹ அட்ட²கதா²யம் ‘‘ஸப்³பே³ஸம் அகப்பியம். கஸ்மா? கஹாபணானம் விசாரிதத்தா’’தி (பாரா. அட்ட². 2.538-539).

665. பேஸகாரகதா³ஸம் வாதி பேஸகாரகஸங்கா²தம் தா³ஸம் வா, பேஸகாரோ தந்தவாயோ. ஆராமிகானம் நாமேன தே³ந்தேதி ‘‘ஆராமிகம் த³ம்மி, வேய்யாவச்சகரம் த³ம்மீ’’திஆதி³னா நயேன தே³ந்தே.

666. கீ²ரம் த³தி⁴ தக்கம் ஸப்பி நவனீதந்தி பஞ்சகோ³ரஸா.

667. அஜிகாதீ³ஸூதி ஆதி³-ஸத்³தே³ன மஹிஸம் ஸங்க³ண்ஹாதி.

669. படிஸித்³தே⁴பீதி படிக்கி²த்தேபி. மூலம் த³த்வாதி கப்பியப⁴ண்ட³மூலம் த³த்வா. குக்குடாத³யோ பன ‘‘ஸுகே²ன வஸந்தூ’’தி அரஞ்ஞேயேவ விஸ்ஸஜ்ஜேதப்³ப³ம். யதா²ஹ அட்ட²கதா²யம் ‘‘குக்குடஸூகரே ‘ஸுக²ம் ஜீவந்தூ’தி அரஞ்ஞே விஸ்ஸஜ்ஜேதும் வட்டதீ’’தி (பாரா. அட்ட². 2.538-539). ஸூகரமயூராதீ³ஸுபி லத்³தே⁴ஸு தேஸம் அனுரூபேயேவ விஸயே விஸ்ஸஜ்ஜேதப்³பா³.

671. ‘‘திக்க²த்து’’ந்திஆதி³கா³தா²ய கோ ஸம்ப³ந்தோ⁴? ‘‘ரஞ்ஞா வா ராஜபோ⁴க்³கே³னா’’திஆதி³கா³தா²ய ஸங்க³ஹிதனயேன ராஜராஜாமச்சப்³ராஹ்மணக³ஹபதாதீ³ஸு யேன கேனசி அத்தனா வா சீவரசேதாபன்னேன சீவரம் சேதாபேத்வா ‘‘இத்த²ன்னாமம் பி⁴க்கு²ம் சீவரேன அச்சா²தே³ஹீ’’தி வத்வா தம் சீவரசேதாபன்னஸங்கா²தம் சீவரமூலம் த³த்வா பஹிததூ³தேன வா பி⁴க்கு²ம் உபஸங்கமித்வா ‘‘இத³ம் கோ² ப⁴ந்தே ஆயஸ்மந்தம் உத்³தி³ஸ்ஸ சீவரசேதாபன்னம் ஆப⁴தம், படிக்³க³ண்ஹாது ஆயஸ்மா சீவரசேதாபன்ன’’ந்தி யதி³ வுச்சேய்ய, பி⁴க்கு²னா ‘‘ந கோ² மயம் ஆவுஸோ சீவரசேதாபன்னம் படிக்³க³ண்ஹாம, சீவரஞ்ச கோ² மயம் படிக்³க³ண்ஹாம காலேன கப்பிய’’ந்தி வுத்தே ஸசே தேன ‘‘அத்தி² பனாயஸ்மதோ கோசி வேய்யாவச்சகரோ’’தி வுத்தே சீவரத்தி²கேன பி⁴க்கு²னா ‘‘ஏஸோ கோ² ஆவுஸோ பி⁴க்கூ²னம் வேய்யாவச்சகரோ’’தி ஆராமிகே வா உபாஸகே வா த³ஸ்ஸிதே யதி³ ஸோ தஸ்ஸ அத்தனா ஆஹரித்வா ‘‘இமஸ்ஸ பி⁴க்கு²னோ சீவரேன அத்தே² ஸதி இமினா சீவரம் சேதாபேத்வா அச்சா²தே³ஹீ’’தி வத்வா தம் பி⁴க்கு²ம் உபஸங்கமித்வா ‘‘யம் கோ² ப⁴ந்தே ஆயஸ்மா வேய்யாவச்சகரம் நித்³தி³ஸி, ஸஞ்ஞத்தோ ஸோ மயா, உபஸங்கமது ஆயஸ்மா காலேன, சீவரேன தம் அச்சா²தே³ஸ்ஸதீ’’தி யதி³ வதே³ய்ய, தேன சீவரத்தி²கேன பி⁴க்கு²னா கிம் காதப்³ப³ந்தி ப⁴க³வதா வுத்தந்தி ஆஹாதி அயமிமிஸ்ஸா கா³தா²ய ஸம்ப³ந்தோ⁴.