அனியதகதா²வண்ணனா

542-3. இதா³னி ஸங்கா⁴தி³ஸேஸகதா²னந்தரம் அனியதகத²ம் த³ஸ்ஸேதுமாஹ ‘‘ரஹோனிஸஜ்ஜஸ்ஸாதே³னா’’திஆதி³. ரஹஸி நிஸஜ்ஜா ரஹோனிஸஜ்ஜா, தஸ்ஸா அஸ்ஸாதோ³ ரஹோனிஸஜ்ஜஸ்ஸாதோ³, தேன ரஹோனிஸஜ்ஜஸ்ஸாதே³ன, மேது²னத⁴ம்மஸன்னிஸ்ஸிதேன கிலேஸேனாதி அத்தோ². வுத்தஞ்ஹி அட்ட²கதா²யம் ‘‘ரஹோனிஸஜ்ஜஸ்ஸாதோ³தி மேது²னத⁴ம்மஸன்னிஸ்ஸிதகிலேஸோ வுச்சதீ’’தி (பாரா. அட்ட². 2.451). ‘‘ரஹோ நாம சக்கு²ஸ்ஸ ரஹோ ஸோதஸ்ஸ ரஹோ. சக்கு²ஸ்ஸ ரஹோ நாம ந ஸக்கா ஹோதி அக்கி²ம் வா நிக²ணியமானே ப⁴முகம் வா உக்கி²பியமானே ஸீஸம் வா உக்கி²பியமானே பஸ்ஸிதும். ஸோதஸ்ஸ ரஹோ நாம ந ஸக்கா ஹோதி பகதிகதா² ஸோது’’ந்தி (பாரா. 445) பத³பா⁴ஜனே வுத்தரஹேஸு சக்கு²ஸ்ஸ ரஹோ ஏவ இதா⁴தி⁴ப்பேதோ. யதா²ஹ அட்ட²கதா²யம் ‘‘கிஞ்சாபி பாளியம் ‘ஸோதஸ்ஸ ரஹோ’தி ஆக³தம், சக்கு²ஸ்ஸ ரஹேனேவ பன பரிச்சே²தோ³ வேதி³தப்³போ³’’தி (பாரா. அட்ட². 2.444-445).

சக்கு²ஸ்ஸ ரஹத்தா ‘‘படிச்ச²ன்ன’’ந்தி இமம்பி படிச்ச²ன்னத்தா ஏவ ‘‘அலம்கம்மனிய’’ந்தி இமம்பி ஸங்க³ண்ஹாதி. நிஸஜ்ஜஸத்³தோ³பாதா³னேன ‘‘ஆஸனே’’தி இத³ம்பி க³ஹிதமேவ. ‘‘மாதுகா³மஸ்ஸ ஸந்திகம் க³ந்துகாமோ’’தி இமினா ‘‘மாதுகா³மேன ஸத்³தி⁴’’ந்தி இத³ம்பி க³ஹிதமேவ. ஏவம் ஸாமத்தி²யா லப்³ப⁴மானபதோ³பாதா³னேன யோ பன பி⁴க்கு² மாதுகா³மேன ஸத்³தி⁴ம் ஏகோ ஏகாய ரஹோ படிச்ச²ன்னே ஆஸனே அலம்கம்மனியே நிஸஜ்ஜஸ்ஸாதே³னாதி வுத்தம் ஹோதி. சக்கு²ஸ்ஸ ரஹபா⁴வேன குட்டாதி³படிச்ச²ன்னே தேனேவ மேது²னஸேவனகம்மஸ்ஸ அனுரூபே ஆஸனே தத³ஹுஜாதாயபி மனுஸ்ஸித்தி²யா ஸஹ நிஸஜ்ஜஸ்ஸாத³ராகே³ன ஸமன்னாக³தோ ஹுத்வாதி அத்தோ². ஏத்த² ‘‘மாதுகா³மஸ்ஸா’’தி தத³ஹுஜாதம்பி இத்தி²ம் க³ண்ஹாதீதி குதோ லப்³ப⁴தீதி? ‘‘மாதுகா³மோ நாம மனுஸ்ஸித்தீ², ந யக்கீ², ந பேதீ, ந திரச்சா²னக³தா, அந்தமஸோ தத³ஹுஜாதாபி தா³ரிகா, பகே³வ மஹத்தரீ’’தி (பாரா. 445) பத³பா⁴ஜனதோ லப்³ப⁴தி.

‘‘நிவாஸேதீ’’தி இமினா ‘‘காயப³ந்த⁴னம் ப³ந்த⁴தி, சீவரம் பாருபதீ’’தி இத³ம் லக்கீ²யதி. ஸப்³ப³த்தா²தி யதா²வுத்தம் பயோக³தோ புப்³பா³பரபயோகே³ ஸங்க³ண்ஹாதி. தேனேவ ‘‘பயோகே³ ச பயோகே³ சா’’தி விச்சா²பயோகோ³ கதோ. நிஸீத³தோ சஸ்ஸ து³க்கடந்தி யோஜனா. ‘‘உபி⁴ன்னம்பி நிஸஜ்ஜாய பாசித்திய’’ந்தி வக்க²மானத்தா து³க்கடம் ஸந்தா⁴ய ஏககஸ்ஸ நிஸீத³தோதி க³ஹேதப்³ப³ம்.

544. நிஸஜ்ஜாய உபி⁴ன்னம்பீதி ஏத்த² ‘‘ஸகி’’ந்தி ஸேஸோ, உபி⁴ன்னம் நிஸஜ்ஜாபூரணவஸேன அஞ்ஞமஞ்ஞஸ்ஸ புரே வா பச்சா² வா ஏகக்க²ணே வா மாதுகா³மஸ்ஸ வா பி⁴க்கு²ஸ்ஸ வா ஏகவாரம் நிஸஜ்ஜாயாதி வுத்தம் ஹோதி. வுத்தஞ்ஹேதம் பாளியம் ‘‘மாதுகா³மே நிஸின்னே பி⁴க்கு² உபனிஸின்னோ வா ஹோதீ’’திஆதி³ (பாரா. 445). ஹோதி பாசித்தியந்தி யோஜனா. பயோக³க³ணனாய ச ஹோந்தி பாசித்தியானீதி க³ஹேதப்³ப³ம், மாதுகா³மஸ்ஸ வா பி⁴க்கு²னோ வா உபி⁴ன்னம் வா உட்டா²யுட்டா²ய புனப்புனம் உபனிஸீத³னபயோக³க³ணனாய சாதி அத்தோ². ‘‘ஆபத்தீஹிபி தீஹிபீ’’தி வக்க²மானத்தா பாசித்தியக்³க³ஹணம் பாராஜிகஸங்கா⁴தி³ஸேஸானம் உபலக்க²ணம் ஹோதி, தீஸு ஏகம் ஹோதீதி வுத்தம் ஹோதி. ஏத்த² ‘‘பயோக³க³ணனாயா’’தி இத³ம் பாராஜிகாய ந லப்³ப⁴தி ஏகபயோகே³னேவ ஸிஜ்ஜ²னதோ. காயஸம்ஸக்³க³ஸங்கா⁴தி³ஸேஸோ, பன ஸரீரதோ புனப்புனம் வியுஜ்ஜித்வா பு²ஸனேன பாசித்தியஞ்ச யதா²வுத்தனயேனேவ லப்³ப⁴தி.

ப³ஹூஸுபி மாதுகா³மேஸு ப³ஹுகானி பாசித்தியானி ஹோந்தீதி யோஜனா. ப³ஹூஸு மாதுகா³மேஸு நிஸின்னேஸு நிஸின்னானம் க³ணனாய ஏகேனேவ பயோகே³ன ப³ஹூனி பாசித்தியானி ச ஸங்கா⁴தி³ஸேஸா ச ஹோந்தி. ‘‘பயோக³க³ணனாய சா’’தி இமஸ்ஸ ஏத்தா²பி யுஜ்ஜமானத்தா தாஸு விஸும் விஸும் உட்டா²யுட்டா²ய புனப்புனம் நிஸீத³ந்தீஸு, ஸயஞ்ச உட்டா²யுட்டா²ய புனப்புனம் நிஸீத³தோ தாஸம் க³ணனாய ஆபஜ்ஜிதப்³பா³பத்தியோ பயோக³க³ணனாய ச ப³ஹூ ஹோந்தீதி இத³ம் லப்³ப⁴தி. ஏத்தா²பி பன பாராஜிகம் ந லப்³ப⁴தி, ஸங்கா⁴தி³ஸேஸோ, பாசித்தியஞ்ச லப்³ப⁴தி.

545. ஸமீபே டி²தோபி அந்தோ⁴ அனாபத்திம் ந கரோதீதி ஸோதஸ்ஸ ரஹபா⁴வே அஸதிபி பதா⁴னபூ⁴தஸ்ஸ ‘‘சக்கு²ஸ்ஸ ரஹோ’’தி இமஸ்ஸ அங்க³ஸ்ஸ விஜ்ஜமானத்தா வுத்தம் ‘‘அந்தோத்³வாத³ஸஹத்த²கே’’தி, இமினா ஸவனூபசாரே விஜ்ஜமானேபீதி வுத்தம் ஹோதி. இத்தீ²னம் து ஸதம்பி ச ந கரோதி அனாபத்திந்தி யோஜனா, விஞ்ஞுனோ புரிஸஸ்ஸ அஸன்னிஹிதபா⁴வேனாதி அதி⁴ப்பாயோ. ‘‘இத்தீ²னம்பி ஸதம்பி சா’’தி லிக²ந்தி, ததோபி அயமேவ பாடோ² ஸுந்த³ரோ. பி-ஸத்³தோ³ வா து-ஸத்³த³த்தே² த³ட்ட²ப்³போ³.

546. நிபஜ்ஜித்வாதி ஏத்த² ‘‘ஸமீபே’’தி ஸேஸோ, ‘‘நித்³தா³யந்தோபீ’’தி ஏதஸ்ஸ விஸேஸகேன ‘‘நிபஜ்ஜித்வா’’தி இமினா நிஸீதி³த்வா நித்³தா³யந்தோதி இமஸ்ஸ நிவத்திதத்தா ஸமீபே நிஸீதி³த்வா நித்³தா³யந்தோபி அனந்தோ⁴ மனுஸ்ஸபுரிஸோ அனாபத்திம் கரோதீதி லப்³ப⁴தி. ‘‘கேவல’’ந்தி விஸேஸனேன ப³லவனித்³தூ³பக³தோ க³ஹிதோதி ததா² அஹுத்வா அந்தரந்தரா ஆபன்னாபன்னே வினிச்சி²னித்வா பவத்தமானாய கபினித்³தா³ய நித்³தா³யந்தோபி அனாபத்திம் கரோதீதி அயமத்தோ² லப்³ப⁴தி. ‘‘பிஹிதத்³வாரக³ப்³ப⁴ஸ்ஸா’’தி வத்தப்³பே³ மஜ்ஜ²பத³லோபீஸமாஸவஸேன ‘‘பிஹிதக³ப்³ப⁴ஸ்ஸா’’தி வுத்தம். ‘‘த்³வாரே’’தி இமினா த்³வாரேகதே³ஸபூ⁴தம் உம்மாரம் வா தம்ஸமீபம் வா உபசாரேன வுத்தந்தி த³ட்ட²ப்³ப³ம். ஸசே க³ப்³போ⁴ பிஹிதத்³வாரோ ந ஹோதி, அனாபத்தீதி ப்³யதிரேகதோ த³ஸ்ஸிதம்.

547. இமஸ்மிம் அனியதஸிக்கா²பதே³ பாளியம் அனாபத்திவாரே அஸதிபி ‘‘யோ பன பி⁴க்கு² மாதுகா³மேன ஸத்³தி⁴ம் ரஹோ படிச்ச²ன்னே ஆஸனே நிஸஜ்ஜம் கப்பேய்ய, பாசித்திய’’ந்தி (பாசி. 285) பஞ்சமஸ்ஸ அசேலகவக்³க³ஸ்ஸ சதுத்த²ஸிக்கா²பதே³ அனாபத்திவாரே ‘‘அனாபத்தி யோ கோசி விஞ்ஞூ புரிஸோ து³தியோ ஹோதி, திட்ட²தி ந நிஸீத³தி, அரஹோபேக்கோ², அஞ்ஞவிஹிதோ நிஸீத³தி, உம்மத்தகஸ்ஸ ஆதி³கம்மிகஸ்ஸா’’தி (பாசி. 288) வுத்தே அனாபத்திவாரே ஸங்க³ஹேதுமாஹ ‘‘அனந்தே⁴ ஸதீ’’திஆதி³. ‘‘ஏதஸ்ஸ ஸமீபே’’தி பகரணதோ லப்³ப⁴தி. இத⁴ புல்லிங்க³னித்³தே³ஸேன புரிஸோ லப்³ப⁴தி, ‘‘தேனாபி அபா³லேன ப⁴விதப்³ப³ம், மனுஸ்ஸஜாதிகேன ப⁴விதப்³ப³’’ந்தி இத³ஞ்ச ‘‘விஞ்ஞுஸ்மி’’ந்தி இமினா லப்³ப⁴தி. அந்த⁴ஸதி³ஸனித்³தூ³பக³தபடிபக்க²வாசிஅனந்த⁴பதே³ன ‘‘அனித்³தா³யந்தே’’தி லப்³ப⁴தி, மனாபாமனாபம் ஜானந்தே அனித்³தா³யந்தே மனுஸ்ஸபுரிஸே த³ஸ்ஸனூபசாரஸ்ஸ அந்தோ விஜ்ஜமானேதி அத்தோ².

‘‘நிஸஜ்ஜபச்சயா தோ³ஸோ நத்தீ²’’தி இமினா ஸம்ப³ந்தோ⁴, ஏவரூபே ரஹோ ஆஸனே மாதுகா³மேன ஸத்³தி⁴ம் நிஸின்னபச்சயா ஆபத்தி நத்தீ²தி அத்தோ². ‘‘டி²தஸ்ஸா’’தி இமினாபி ததே³வ பத³ம் யோஜேதப்³ப³ம். விஞ்ஞும்ஹி படிப³லே மனுஸ்ஸபுரிஸே அஸன்னிஹிதேபி ததா²விதே⁴ ரஹோ ஆஸனே மாதுகா³மே ஆஸனே நிஸின்னேபி ஸயானேபி டி²தேபி ஸயம் டி²தஸ்ஸ நிஸஜ்ஜாய அபா⁴வா தப்பச்சயா ஆபத்தி ந ஹோதீதி அத்தோ². அரஹஸஞ்ஞினோ நிஸஜ்ஜபச்சயா தோ³ஸோ நத்தீ²தி ரஹோ ஆஸனே மாதுகா³மேன ஸத்³தி⁴ம் நிஸஜ்ஜந்தஸ்ஸாபி ‘‘ரஹோ’’தி ஸஞ்ஞாரஹிதஸ்ஸ நிஸீத³தோ நிஸஜ்ஜபச்சயா அனாபத்தீதி அத்தோ². விக்கி²த்தசேதஸோ நிஸஜ்ஜபச்சயா தோ³ஸோ நத்தீ²தி யோஜனா.

548. ஏத்தாவதா பாசித்தியாபத்திமத்ததோ அனாபத்திப்பகாரம் த³ஸ்ஸேத்வா இதா³னி இமஸ்ஸ ஸிக்கா²பத³ஸ்ஸ அனியதவோஹாரஹேதுபூ⁴தாஹி தீஹி ஆபத்தீஹி அனாபத்திபகாரம் த³ஸ்ஸேதுமாஹ ‘‘ந தோ³ஸோ’’திஆதி³. ஆபத்தீஹிபி தீஹிபீதி ‘‘நிஸஜ்ஜம் பி⁴க்கு² படிஜானமானோ திண்ணம் த⁴ம்மானம் அஞ்ஞதரேன காரேதப்³போ³ பாராஜிகேன வா ஸங்கா⁴தி³ஸேஸேன வா பாசித்தியேன வா’’தி (பாரா. 444) பாளியம் வுத்தாஹி ‘‘பட²மபாராஜிகாபத்திகாயஸம்ஸக்³க³ஸங்கா⁴தி³ஸேஸாபத்திபாசித்தியாபத்தீ’’தி இமாஹி தீஹிபி ஆபத்தீஹீதி வுத்தம் ஹோதீதி.

பட²மானியதகதா²வண்ணனா.

549. வத்தப்³ப³பா⁴வேனாதி⁴கதது³தியானியதவினிச்ச²யதோ பட²மானியதே வுத்தவினிச்ச²யேஹி ஸமம் வினிச்ச²யம் பஹாய தத்த² அவுத்தம் இமஸ்ஸேவ வினிச்ச²யவிஸேஸம் த³ஸ்ஸேதுமாஹ ‘‘அனந்தா⁴’’திஆதி³. இத⁴ து³ட்டு²ல்லவாசாஸங்கா⁴தி³ஸேஸஸ்ஸாபி க³ஹிதத்தா ததோ அனாபத்திகரம் த³ஸ்ஸேதும் ‘‘அப³தி⁴ரோ’’தி வுத்தம். அனந்தோ⁴ அப³தி⁴ரோதி ‘‘புரிஸோ’’தி இத³ம் ஸந்தா⁴ய வுத்தம். ‘‘இத்தீ²’’தி இத³ம் ஸந்தா⁴ய ‘‘அனந்தா⁴ப³தி⁴ரா’’தி க³ஹேதப்³ப³ம். ஏவமுபரிபி. தேனாபி ஸவனூபசாரந்தோக³தே⁴ன ப⁴விதப்³ப³ந்தி த³ஸ்ஸேதும் ‘‘அந்தோத்³வாத³ஸஹத்த²ட்டோ²’’தி வுத்தம்.

550. ‘‘அந்தோ⁴ அப³தி⁴ரோ அனாபத்திம் ந கரோதீ’’தி இத³ம் காயஸம்ஸக்³க³ஸங்கா⁴தி³ஸேஸம் ஸந்தா⁴ய வுத்தம். ‘‘ப³தி⁴ரோ வாபி சக்கு²மா, ந கரோதி அனாபத்தி’’ந்தி இத³ம் பன து³ட்டு²ல்லவாசாஸங்கா⁴தி³ஸேஸம் ஸந்தா⁴ய வுத்தந்தி ஏவமேத்த² ஸந்தா⁴ய பா⁴ஸிதத்தோ² வேதி³தப்³போ³.

புரிமானியதகதா²ய அவுத்தவிஸேஸஸ்ஸ து³தியானியதகதா²ய வத்துமிச்சி²தத்தா அயம்பி விஸேஸோ இத⁴ வத்தப்³போ³. கோயம் விஸேஸோ, யோ இத⁴ வத்தப்³போ³தி சே? தத்த² ‘‘படிச்ச²ன்னே ஆஸனே அலம்கம்மனியே’’தி (பாரா. 444) வுத்தம் ஆஸனங்க³த்³வயம் இத⁴ ‘‘ந ஹேவ கோ² பன படிச்ச²ன்னம் ஆஸனம் ஹோதி நாலம்கம்மனிய’’ந்தி (பாரா. 453) நிஸேதே⁴த்வா ‘‘அலஞ்ச கோ² ஹோதி மாதுகா³மம் து³ட்டு²ல்லாஹி வாசாஹி ஓபா⁴ஸிது’’ந்தி (பாரா. 453) இத³ம் அபுப்³ப³ங்க³ம் வுத்தம். தத்ர மாதுகா³மோதி அந்தமஸோ தத³ஹுஜாதாபி தா³ரிகா க³ஹிதா, இத⁴ ‘‘மாதுகா³மோ நாம மனுஸ்ஸித்தீ², ந யக்கீ², ந பேதீ, ந திரச்சா²னக³தா, விஞ்ஞூ படிப³லா ஸுபா⁴ஸிதது³ப்³பா⁴ஸிதம் து³ட்டு²ல்லாது³ட்டு²ல்லம் ஆஜானிது’’ந்தி (பாரா. 454) விஞ்ஞூ படிப³லோ மாதுகா³மோவ வுத்தோ. தத்த² ‘‘பாராஜிகேன வா ஸங்கா⁴தி³ஸேஸேன வா பாசித்தியேன வா’’தி (பாரா. 444) திஸ்ஸோ ஆபத்தியோ வுத்தா, இத⁴ ‘‘நிஸஜ்ஜம் பி⁴க்கு² படிஜானமானோ த்³வின்னம் த⁴ம்மானம் அஞ்ஞதரேன காரேதப்³போ³ ஸங்கா⁴தி³ஸேஸேன வா பாசித்தியேன வா’’தி (பாரா. 453) த்³வேயேவ ஆபத்தியோ வுத்தா. ஸங்கா⁴தி³ஸேஸேஸு ச தத்த² ‘‘ஸா சே ஏவம் வதே³ய்ய ‘அய்யோ மயா தி³ட்டோ² நிஸின்னோ மாதுகா³மேன ஸத்³தி⁴ம் காயஸம்ஸக்³க³ம் ஸமாபஜ்ஜந்தோ’தி, ஸோ ச தம் படிஜானாதி, ஆபத்தியா காரேதப்³போ³’’தி (பாரா. 448) காயஸம்ஸக்³க³ஸங்கா⁴தி³ஸேஸோவ வுத்தோ, இத⁴ ஸோ ச வுத்தோ, ‘‘ஸா சே ஏவம் வதே³ய்ய ‘அய்யஸ்ஸ மயா ஸுதம் நிஸின்னஸ்ஸ மாதுகா³மம் து³ட்டு²ல்லாஹி வாசாஹி ஓபா⁴ஸேந்தஸ்ஸா’தி, ஸோ ச தம் படிஜானாதி, ஆபத்தியா காரேதப்³போ³’’தி (பாரா. 455) து³ட்டு²ல்லவாசாஸங்கா⁴தி³ஸேஸோ ச வுத்தோ. ஏத்தகோ உபி⁴ன்னமனியதானம் விஸேஸோ.

அயம் கஸ்மா ந வுத்தோதி? அயம் ஸம்போ³த⁴வத்து²விஸேஸோ வத்துமிச்சி²தோ பன அட்ட²கதா²க³தவினிச்ச²யவிஸேஸதோதி தஸ்மா ந வுத்தோதி த³ட்ட²ப்³போ³. திஸமுட்டா²னமேவித³ம் காயசித்தவாசாசித்தகாயவாசாசித்தவஸேன தீணி ஸமுட்டா²னானி ஏதஸ்ஸாதி கத்வா.

இமேஹிபி த்³வீஹி அனியதஸிக்கா²பதே³ஹி ஸிக்கா²பத³ந்தரேஸு பஞ்ஞத்தாயேவ ஆபத்தியோ, அனாபத்தியோ ச த³ஸ்ஸிதா, ந கோசி ஆபத்திவிஸேஸோ வுத்தோ, தஸ்மா கிமேதேஸம் வசனேனாதி? வுச்சதே – வினயவினிச்ச²யலக்க²ணம் ட²பேதும் ப⁴க³வதா உப்பன்னே வத்து²ம்ஹி த்³வே அனியதா பஞ்ஞத்தா. கத²ம்? ஏவரூபாயபி ஸத்³தே⁴ய்யவசனாய உபாஸிகாய வுச்சமானோ படிஜானமானோவ ஆபத்தியா காரேதப்³போ³, ந அப்படிஜானமானோ, தஸ்மா ‘‘யாய காயசி ஆபத்தியா யேன கேனசி சோதி³தே படிஞ்ஞாதகரணம்யேவங்க³ம் காதப்³ப³’’ந்தி இமேஹி ஸிக்கா²பதே³ஹி வினிச்ச²யலக்க²ணம் ட²பிதந்தி வேதி³தப்³ப³ம். அத² கஸ்மா பி⁴க்கு²னீனம் அனியதம் ந வுத்தந்தி? இத³மேவ லக்க²ணம் ஸப்³ப³த்த² அனுக³தந்தி ந வுத்தம்.

து³தியானியதகதா²வண்ணனா.

இதி வினயத்த²ஸாரஸந்தீ³பனியா

வினயவினிச்ச²யவண்ணனாய

அனியதகதா²வண்ணனா நிட்டி²தா.