9. சீவரவிப்பவாஸவினிச்ச²யகதா²

51. சீவரேனவினாவாஸோதி திசீவராதி⁴ட்டா²னேன அதி⁴ட்டி²தானம் திண்ணம் சீவரானம் அஞ்ஞதரேன விப்பவாஸோ. ஏவம் அதி⁴ட்டி²தேஸு ஹி தீஸு சீவரேஸு ஏகேனபி வினா வஸிதும் ந வட்டதி, வஸந்தஸ்ஸ ஸஹ அருணுக்³க³மனா சீவரம் நிஸ்ஸக்³கி³யம் ஹோதி, தஸ்மா அருணுக்³க³மனஸமயே சீவரம் அட்³ட⁴தேய்யரதனப்பமாணே ஹத்த²பாஸே கத்வா வஸிதப்³ப³ம். கா³மனிவேஸனஉதோ³ஸிதஅட்³ட³மாளபாஸாத³ஹம்மியனாவாஸத்த²கே²த்தத⁴ஞ்ஞகரணஆராமவிஹாரருக்க²மூலஅஜ்ஜோ²காஸேஸு பன அயம் விஸேஸோ (பாரா. அட்ட². 2.477-8) – ஸசே ஏகஸ்ஸ ரஞ்ஞோ கா³மபோ⁴ஜகஸ்ஸ வா ஸந்தகோ கா³மோ ஹோதி, யேன கேனசி பாகாரேன வா வதியா வா பரிகா²ய வா பரிக்கி²த்தோ ச, ஏவரூபே கா³மே சீவரம் நிக்கி²பித்வா கா³மப்³ப⁴ந்தரே யத்த² கத்த²சி யதா²ருசிதட்டா²னே அருணம் உட்டா²பேதும் வட்டதி. ஸசே பன அபரிக்கி²த்தோ ஹோதி, ஏவரூபே கா³மே யஸ்மிம் க⁴ரே சீவரம் நிக்கி²த்தம், தஸ்மிம் வத்த²ப்³ப³ம், தஸ்ஸ வா க⁴ரஸ்ஸ ஹத்த²பாஸே ஸமந்தா அட்³ட⁴தேய்யரதனப்³ப⁴ந்தரே வஸிதப்³ப³ம். தம் பமாணம் அதிக்கமித்வா ஸசேபி இத்³தி⁴மா பி⁴க்கு² ஆகாஸே அருணம் உட்டா²பேதி, சீவரம் நிஸ்ஸக்³கி³யமேவ ஹோதி.

ஸசே நானாராஜூனம் வா போ⁴ஜகானம் வா கா³மோ ஹோதி வேஸாலீகுஸினாராதி³ஸதி³ஸோ பரிக்கி²த்தோ ச, ஏவரூபே கா³மே யஸ்மிம் க⁴ரே சீவரம் நிக்கி²த்தம், தத்த² வா வத்த²ப்³ப³ம், தத்த² ஸத்³த³ஸங்க⁴ட்டனேன வா ஜனஸம்பா³தே⁴ன வா வஸிதும் அஸக்கோந்தேன ஸபா⁴யே வா வத்த²ப்³ப³ம் நக³ரத்³வாரமூலே வா. தத்ராபி வஸிதும் அஸக்கோந்தேன யத்த² கத்த²சி பா²ஸுகட்டா²னே வஸித்வா அந்தோஅருணே ஆக³ம்ம தேஸம்யேவ ஸபா⁴யனக³ரத்³வாரமூலானம் ஹத்த²பாஸே வஸிதப்³ப³ம். க⁴ரஸ்ஸ பன சீவரஸ்ஸ வா ஹத்த²பாஸே வத்தப்³ப³மேவ நத்தி².

ஸசே க⁴ரே அட்ட²பேத்வா ‘‘ஸபா⁴யே ட²பேஸ்ஸாமீ’’தி ஸபா⁴யம் க³ச்ச²ந்தோ ஹத்த²ம் பஸாரேத்வா ‘‘ஹந்தி³மம் சீவரம் ட²பேஹீ’’தி ஏவம் நிக்கே²பஸுகே² ஹத்த²பாஸக³தே கிஸ்மிஞ்சி ஆபணே சீவரம் நிக்கி²பதி, தேன புரிமனயேனேவ ஸபா⁴யே வா வத்த²ப்³ப³ம், த்³வாரமூலே வா தேஸம் ஹத்த²பாஸே வா வஸிதப்³ப³ம்.

ஸசே நக³ரஸ்ஸ ப³ஹூனிபி த்³வாரானி ஹோந்தி ப³ஹூனி ச ஸபா⁴யானி, ஸப்³ப³த்த² வஸிதும் ந வட்டதி. யஸ்ஸா பன வீதி²யா சீவரம் ட²பிதம், யம் தஸ்ஸா ஸம்முக²ட்டா²னே ஸபா⁴யஞ்ச த்³வாரஞ்ச, தஸ்ஸ ஸபா⁴யஸ்ஸ ச த்³வாரஸ்ஸ ச ஹத்த²பாஸே வஸிதப்³ப³ம். ஏவஞ்ஹி ஸதி ஸக்கா சீவரஸ்ஸ பவத்திம் ஜானிதும். ஸபா⁴யம் பன க³ச்ச²ந்தேன யஸ்ஸ ஆபணிகஸ்ஸ ஹத்தே² நிக்கி²த்தம், ஸசே ஸோ தம் சீவரம் அதிஹரித்வா க⁴ரே நிக்கி²பதி, வீதி²ஹத்த²பாஸோ ந ரக்க²தி, க⁴ரஸ்ஸ ஹத்த²பாஸே வத்த²ப்³ப³ம். ஸசே மஹந்தம் க⁴ரம் ஹோதி த்³வே வீதி²யோ ப²ரித்வா டி²தம், புரதோ வா பச்ச²தோ வா ஹத்த²பாஸேயேவ அருணம் உட்டா²பேதப்³ப³ம். ஸபா⁴யே நிக்கி²பித்வா பன ஸபா⁴யே வா தஸ்ஸ ஸம்முகே² நக³ரத்³வாரமூலே வா தேஸம்யேவ ஹத்த²பாஸே வா அருணம் உட்டா²பேதப்³ப³ம். ஸசே பன கா³மோ அபரிக்கி²த்தோ ஹோதி, யஸ்மிம் க⁴ரே சீவரம் நிக்கி²த்தம், தஸ்மிம் க⁴ரே தஸ்ஸ க⁴ரஸ்ஸ வா ஹத்த²பாஸே வத்த²ப்³ப³ம்.

ஸசே (பாரா. 480) ஏககுலஸ்ஸ ஸந்தகம் நிவேஸனம் ஹோதி பரிக்கி²த்தஞ்ச நானாக³ப்³ப⁴ம் நானாஓவரகம், அந்தோனிவேஸனே சீவரம் நிக்கி²பித்வா அந்தோனிவேஸனே வத்த²ப்³ப³ம். ஸசே அபரிக்கி²த்தம், யஸ்மிம் க³ப்³பே⁴ சீவரம் நிக்கி²த்தம் ஹோதி, தஸ்மிம் க³ப்³பே⁴ வத்த²ப்³ப³ம் க³ப்³ப⁴ஸ்ஸ ஹத்த²பாஸே வா. ஸசே நானாகுலஸ்ஸ நிவேஸனம் ஹோதி பரிக்கி²த்தஞ்ச நானாக³ப்³ப⁴ம் நானாஓவரகம், யஸ்மிம் க³ப்³பே⁴ சீவரம் நிக்கி²த்தம் ஹோதி, தஸ்மிம் க³ப்³பே⁴ வத்த²ப்³ப³ம், ஸப்³பே³ஸம் ஸாதா⁴ரணே க⁴ரத்³வாரமூலே வா க³ப்³ப⁴ஸ்ஸ வா க⁴ரத்³வாரமூலஸ்ஸ வா ஹத்த²பாஸே. ஸசே அபரிக்கி²த்தம் ஹோதி, யஸ்மிம் க³ப்³பே⁴ சீவரம் நிக்கி²த்தம், தஸ்மிம் க³ப்³பே⁴ வத்த²ப்³ப³ம் க³ப்³ப⁴ஸ்ஸ வா ஹத்த²பாஸே. உதோ³ஸிதஅட்³ட³மாளபாஸாத³ஹம்மியேஸுபி நிவேஸனே வுத்தனயேனேவ வினிச்ச²யோ வேதி³தப்³போ³.

ஸசே ஏககுலஸ்ஸ நாவா ஹோதி, அந்தோனாவாயம் சீவரம் நிக்கி²பித்வா அந்தோனாவாயம் வத்த²ப்³ப³ம். ஸசே நானாகுலஸ்ஸ நாவா ஹோதி நானாக³ப்³பா⁴ நானாஓவரகா, யஸ்மிம் ஓவரகே சீவரம் நிக்கி²த்தம் ஹோதி, தஸ்மிம் ஓவரகே வத்த²ப்³ப³ம் ஓவரகஸ்ஸ ஹத்த²பாஸே வா.

ஸசே ஏககுலஸ்ஸ ஸத்தோ² ஹோதி, தஸ்மிம் ஸத்தே² சீவரம் நிக்கி²பித்வா புரதோ வா பச்ச²தோ வா ஸத்தப்³ப⁴ந்தரா ந விஜஹிதப்³பா³, பஸ்ஸதோ அப்³ப⁴ந்தரம் ந விஜஹிதப்³ப³ம். ஏகம் அப்³ப⁴ந்தரம் அட்ட²வீஸதிஹத்த²ம் ஹோதி. ஸசே நானாகுலஸ்ஸ ஸத்தோ² ஹோதி, ஸத்தே² சீவரம் நிக்கி²பித்வா சீவரஸ்ஸ ஹத்த²பாஸே வஸிதப்³ப³ம். ஸசே ஸத்தோ² க³ச்ச²ந்தோ கா³மம் வா நதி³ம் வா பரியாதி³யித்வா திட்ட²தி, அந்தோபவிட்டே²ன ஸத்³தி⁴ம் ஏகாப³த்³தோ⁴ ஹுத்வா ஓரஞ்ச பாரஞ்ச ப²ரித்வா டி²தோ ஹோதி, ஸத்த²பரிஹாரோ லப்³ப⁴தி. அத² கா³மே வா நதி³யா வா பரியாபன்னோ ஹோதி, கா³மபரிஹாரோ சேவ நதீ³பரிஹாரோ ச லப்³ப⁴தி. ஸசே விஹாரஸீமம் அதிக்கமித்வா திட்ட²தி, அந்தோஸீமாய ச சீவரம் ஹோதி, விஹாரம் க³ந்த்வா வஸிதப்³ப³ம். ஸசே ப³ஹிஸீமாய சீவரம் ஹோதி, ஸத்த²ஸமீபேயேவ வஸிதப்³ப³ம். ஸசே க³ச்ச²ந்தோ ஸத்தோ² ஸகடே வா ப⁴க்³கே³ கோ³ணே வா நட்டே² அந்தரா சி²ஜ்ஜதி, யஸ்மிம் கோட்டா²ஸே சீவரம் நிக்கி²த்தம், தத்த² வஸிதப்³ப³ம்.

ஸசே ஏககுலஸ்ஸ கே²த்தம் ஹோதி பரிக்கி²த்தஞ்ச, அந்தோகே²த்தே சீவரம் நிக்கி²பித்வா அந்தோகே²த்தே வத்த²ப்³ப³ம். ஸசே அபரிக்கி²த்தம் ஹோதி, சீவரஸ்ஸ ஹத்த²பாஸே வஸிதப்³ப³ம். ஸசே நானாகுலஸ்ஸ கே²த்தம் ஹோதி பரிக்கி²த்தஞ்ச, அந்தோகே²த்தே சீவரம் நிக்கி²பித்வா த்³வாரமூலே வத்த²ப்³ப³ம் த்³வாரமூலஸ்ஸ ஹத்த²பாஸே வா. ஸசே அபரிக்கி²த்தம் ஹோதி, சீவரஸ்ஸ ஹத்த²பாஸே வஸிதப்³ப³ம்.

ஸசே ஏககுலஸ்ஸ த⁴ஞ்ஞகரணம் ஹோதி பரிக்கி²த்தஞ்ச, அந்தோத⁴ஞ்ஞகரணே சீவரம் நிக்கி²பித்வா அந்தோத⁴ஞ்ஞகரணே வத்த²ப்³ப³ம். ஸசே அபரிக்கி²த்தம் ஹோதி, சீவரஸ்ஸ ஹத்த²பாஸே வஸிதப்³ப³ம். ஸசே நானாகுலஸ்ஸ த⁴ஞ்ஞகரணம் ஹோதி பரிக்கி²த்தஞ்ச, அந்தோத⁴ஞ்ஞகரணே சீவரம் நிக்கி²பித்வா த்³வாரமூலே வா வத்த²ப்³ப³ம் த்³வாரமூலஸ்ஸ வா ஹத்த²பாஸே. ஸசே அபரிக்கி²த்தம் ஹோதி, சீவரஸ்ஸ ஹத்த²பாஸே வஸிதப்³ப³ம். புப்பா²ராமப²லாராமேஸுபி கே²த்தே வுத்தனயேனேவ வினிச்ச²யோ வேதி³தப்³போ³.

ஸசே ஏககுலஸ்ஸ விஹாரோ ஹோதி பரிக்கி²த்தோ ச, அந்தோவிஹாரே சீவரம் நிக்கி²பித்வா அந்தோவிஹாரே வத்த²ப்³ப³ம். ஸசே அபரிக்கி²த்தோ ஹோதி, யஸ்மிம் விஹாரே சீவரம் நிக்கி²த்தம், தஸ்மிம் வத்த²ப்³ப³ம் தஸ்ஸ விஹாரஸ்ஸ வா ஹத்த²பாஸே.

ஸசே ஏககுலஸ்ஸ ருக்க²மூலம் ஹோதி, யம் மஜ்ஜ²ன்ஹிகே காலே ஸமந்தா சா²யா ப²ரதி, அந்தோசா²யாய சீவரம் நிக்கி²பித்வா அந்தோசா²யாய வத்த²ப்³ப³ம். விரளஸாக²ஸ்ஸ பன ருக்க²ஸ்ஸ ஆதபேன பு²ட்டோ²காஸே ட²பிதம் நிஸ்ஸக்³கி³யமேவ ஹோதி, தஸ்மா தாதி³ஸஸ்ஸ ருக்க²ஸ்ஸ ஸாக²ச்சா²யாய வா க²ந்த⁴ச்சா²யாய வா ட²பேதப்³ப³ம். ஸசே ஸாகா²ய வா விடபே வா ட²பேதி, உபரி அஞ்ஞஸாக²ச்சா²யாய பு²ட்டோ²காஸேயேவ ட²பேதப்³ப³ம். கு²ஜ்ஜருக்க²ஸ்ஸ சா²யா தூ³ரம் க³ச்ச²தி, சா²யாய க³தட்டா²னே ட²பேதும் வட்டதியேவ. ஸசே நானாகுலஸ்ஸ ருக்க²மூலம் ஹோதி, சீவரஸ்ஸ ஹத்த²பாஸே வஸிதப்³ப³ம்.

அஜ்ஜோ²காஸே பன அகா³மகே அரஞ்ஞே சீவரம் ட²பேத்வா தஸ்ஸ ஸமந்தா ஸத்தப்³ப⁴ந்தரே வஸிதப்³ப³ம். அகா³மகம் நாம அரஞ்ஞம் விஞ்ஜா²டவீஆதீ³ஸு வா ஸமுத்³த³மஜ்ஜே² வா மச்ச²ப³ந்தா⁴னம் அக³மனபதே² தீ³பகேஸு லப்³ப⁴தி. தாதி³ஸே அரஞ்ஞே மஜ்ஜே² டி²தஸ்ஸ ஸமந்தா ஸத்தப்³ப⁴ந்தரபரிச்சே²தோ³, வினிப்³பே³தே⁴ன சுத்³த³ஸ ஹோந்தி. மஜ்ஜே² நிஸின்னோ புரத்தி²மாய வா பச்சி²மாய வா தி³ஸாய பரியந்தே ட²பிதசீவரம் ரக்க²தி. ஸசே பன அருணுக்³க³மனஸமயே கேஸக்³க³மத்தம்பி புரத்தி²மம் தி³ஸம் க³ச்ச²தி, பச்சி²மாய தி³ஸாய சீவரம் நிஸ்ஸக்³கி³யம் ஹோதி. ஏஸ நயோ இதரஸ்மிம். நிஸ்ஸக்³கி³யம் பன சீவரம் அனிஸ்ஸஜ்ஜித்வா பரிபு⁴ஞ்ஜந்தோ து³க்கடம் ஆபஜ்ஜதி.

52. ஸசே பதா⁴னிகோ பி⁴க்கு² ஸப்³ப³ரத்திம் பதா⁴னமனுயுஞ்ஜித்வா பச்சூஸஸமயே ‘‘நஹாயிஸ்ஸாமீ’’தி தீணி சீவரானி தீரே ட²பேத்வா நதி³ம் ஓதரதி, நஹாயந்தஸ்ஸேவ சஸ்ஸ அருணம் உட்ட²ஹதி, கிம் காதப்³ப³ம்? ஸோ ஹி யதி³ உத்தரித்வா சீவரம் நிவாஸேதி, நிஸ்ஸக்³கி³யம் சீவரம், அனிஸ்ஸஜ்ஜித்வா பரிபு⁴ஞ்ஜனபச்சயா து³க்கடம் ஆபஜ்ஜதி. அத² நக்³கோ³ க³ச்ச²தி, ஏவம்பி து³க்கடம் ஆபஜ்ஜதீதி? நாபஜ்ஜதி. ஸோ ஹி யாவ அஞ்ஞம் பி⁴க்கு²ம் தி³ஸ்வா வினயகம்மம் ந கரோதி, தாவ தேஸம் சீவரானம் அபரிபோ⁴கா³ரஹத்தா நட்ட²சீவரட்டா²னே டி²தோ ஹோதி, நட்ட²சீவரஸ்ஸ ச அகப்பியம் நாம நத்தி², தஸ்மா ஏகம் நிவாஸேத்வா த்³வே ஹத்தே²ன க³ஹேத்வா விஹாரம் க³ந்த்வா வினயகம்மம் காதப்³ப³ம். ஸசே தூ³ரே விஹாரோ ஹோதி, அந்தராமக்³கே³ மனுஸ்ஸா ஸஞ்சரந்தி, ஏகம் நிவாஸேத்வா ஏகம் பாருபித்வா ஏகம் அம்ஸகூடே ட²பேத்வா க³ந்தப்³ப³ம். ஸசே விஹாரே ஸபா⁴க³ம் பி⁴க்கு²ம் ந பஸ்ஸதி, பி⁴க்கா²சாரம் க³தா ஹோந்தி, ஸங்கா⁴டிம் ப³ஹிகா³மே ட²பேத்வா ஸந்தருத்தரேன ஆஸனஸாலம் க³ந்த்வா வினயகம்மம் காதப்³ப³ம். ஸசே ப³ஹிகா³மே சோரப⁴யம் ஹோதி, பாருபித்வா க³ந்தப்³ப³ம். ஸசே ஆஸனஸாலா ஸம்பா³தா⁴ ஹோதி, ஜனாகிண்ணா ந ஸக்கா ஏகமந்தே சீவரம் அபனேத்வா வினயகம்மம் காதும், ஏகம் பி⁴க்கு²ம் ஆதா³ய ப³ஹிகா³மம் க³ந்த்வா வினயகம்மம் கத்வா சீவரானி பரிபு⁴ஞ்ஜிதப்³பா³னி.

ஸசே தே²ரா பி⁴க்கூ² த³ஹரானம் ஹத்தே² பத்தசீவரம் த³த்வா மக்³க³ம் க³ச்ச²ந்தா பச்சி²மயாமே ஸயிதுகாமா ஹோந்தி, அத்தனோ அத்தனோ சீவரம் ஹத்த²பாஸே கத்வாவ ஸயிதப்³ப³ம். ஸசே க³ச்ச²ந்தானம்யேவ அஸம்பத்தேஸு த³ஹரேஸு அருணம் உக்³க³ச்ச²தி, சீவரம் நிஸ்ஸக்³கி³யம் ஹோதி, நிஸ்ஸயோ பன ந படிப்பஸ்ஸம்ப⁴தி. த³ஹரானம்பி புரதோ க³ச்ச²ந்தானம் தே²ரேஸு அஸம்பத்தேஸு ஏஸேவ நயோ. மக்³க³ம் விரஜ்ஜி²த்வா அரஞ்ஞே அஞ்ஞமஞ்ஞம் அபஸ்ஸந்தேஸுபி ஏஸேவ நயோ. ஸசே பன த³ஹரா ‘‘மயம், ப⁴ந்தே, முஹுத்தம் ஸயித்வா அஸுகஸ்மிம் நாம ஓகாஸே தும்ஹே ஸம்பாபுணிஸ்ஸாமா’’தி வத்வா யாவ அருணுக்³க³மனா ஸயந்தி, சீவரஞ்ச நிஸ்ஸக்³கி³யம் ஹோதி, நிஸ்ஸயோ ச படிப்பஸ்ஸம்ப⁴தி. த³ஹரே உய்யோஜேத்வா தே²ரேஸு ஸயந்தேஸுபி ஏஸேவ நயோ. த்³வேதா⁴பத²ம் தி³ஸ்வா தே²ரா ‘‘அயம் மக்³கோ³’’, த³ஹரா ‘‘அயம் மக்³கோ³’’தி வத்வா அஞ்ஞமஞ்ஞஸ்ஸ வசனம் அக்³க³ஹேத்வா க³தா, ஸஹ அருணஸ்ஸ உக்³க³மனா சீவரானி ச நிஸ்ஸக்³கி³யானி ஹோந்தி, நிஸ்ஸயோ ச படிப்பஸ்ஸம்ப⁴தி. ஸசே த³ஹரா மக்³க³தோ ஓக்கம்ம ‘‘அந்தோஅருணேயேவ நிவத்திஸ்ஸாமா’’தி பே⁴ஸஜ்ஜத்தா²ய கா³மம் பவிஸித்வா ஆக³ச்ச²ந்தி, அஸம்பத்தானம்யேவ ச நேஸம் அருணோ உக்³க³ச்ச²தி, சீவரானி நிஸ்ஸக்³கி³யானி ஹோந்தி, நிஸ்ஸயோ பன ந படிப்பஸ்ஸம்ப⁴தி. ஸசே பன தே⁴னுப⁴யேன வா ஸுனக²ப⁴யேன வா முஹுத்தம் ட²த்வா ‘‘க³மிஸ்ஸாமா’’தி ட²த்வா வா நிஸீதி³த்வா வா க³ச்ச²ந்தி, அந்தரா அருணே உக்³க³தே சீவரானி ச நிஸ்ஸக்³கி³யானி ஹோந்தி, நிஸ்ஸயோ ச படிப்பஸ்ஸம்ப⁴தி.

ஸசே ‘‘அந்தோஅருணேயேவ ஆக³மிஸ்ஸாமா’’தி அந்தோஸீமாயம் கா³மம் பவிட்டா²னம் அந்தரா அருணோ உக்³க³ச்ச²தி, நேவ சீவரானி நிஸ்ஸக்³கி³யானி ஹோந்தி, ந நிஸ்ஸயோ படிப்பஸ்ஸம்ப⁴தி. ஸசே பன ‘‘விபா⁴யது தாவா’’தி நிஸீத³ந்தி, அருணே உக்³க³தே ந சீவரானி நிஸ்ஸக்³கி³யானி ஹோந்தி, நிஸ்ஸயோ பன படிப்பஸ்ஸம்ப⁴தி. ஸசே யேபி ‘‘அந்தோஅருணேயேவ ஆக³மிஸ்ஸாமா’’தி ஸாமந்தவிஹாரம் த⁴ம்மஸ்ஸவனத்தா²ய ஸஉஸ்ஸாஹா க³ச்ச²ந்தி, அந்தராமக்³கே³யேவ ச நேஸம் அருணோ உக்³க³ச்ச²தி, சீவரானி நிஸ்ஸக்³கி³யானி ஹோந்தி, நிஸ்ஸயோ பன ந படிப்பஸ்ஸம்ப⁴தி. ஸசே த⁴ம்மகா³ரவேன ‘‘யாவபரியோஸானம் ஸுத்வாவ க³மிஸ்ஸாமா’’தி நிஸீத³ந்தி, ஸஹ அருணஸ்ஸ உக்³க³மனா சீவரானிபி நிஸ்ஸக்³கி³யானி ஹோந்தி, நிஸ்ஸயோ ச படிப்பஸ்ஸம்ப⁴தி. தே²ரேன த³ஹரம் சீவரதோ⁴வனத்தா²ய கா³மகம் பேஸேந்தேன அத்தனோ சீவரம் பச்சுத்³த⁴ரித்வாவ தா³தப்³ப³ம், த³ஹரஸ்ஸபி சீவரம் பச்சுத்³த⁴ராபேத்வாவ ட²பேதப்³ப³ம். ஸசே அஸதியா க³ச்ச²தி, அத்தனோ சீவரம் பச்சுத்³த⁴ரித்வா த³ஹரஸ்ஸ சீவரம் விஸ்ஸாஸேன க³ஹேத்வா ட²பேதப்³ப³ம். ஸசே தே²ரோ ந ஸரதி, த³ஹரோவ ஸரதி, த³ஹரேன அத்தனோ சீவரம் பச்சுத்³த⁴ரித்வா தே²ரஸ்ஸ சீவரம் விஸ்ஸாஸேன க³ஹேத்வா க³ந்த்வா வத்தப்³ப³ம் ‘‘ப⁴ந்தே, தும்ஹாகம் சீவரம் அதி⁴ட்ட²ஹித்வா பரிபு⁴ஞ்ஜதா²’’தி. அத்தனோபி சீவரம் அதி⁴ட்டா²தப்³ப³ம். ஏவம் ஏகஸ்ஸ ஸதியாபி ஆபத்திமோக்கோ² ஹோதி.

இதி பாளிமுத்தகவினயவினிச்ச²யஸங்க³ஹே

சீவரவிப்பவாஸவினிச்ச²யகதா² ஸமத்தா.