26. வஸ்ஸூபனாயிகவினிச்ச²யகதா²

179. வஸ்ஸூபனாயிகாதி ஏத்த² புரிமிகா பச்சி²மிகாதி து³வே வஸ்ஸூபனாயிகா. தத்த² (மஹாவ. அட்ட². 184 ஆத³யோ) ஆஸாள்ஹீபுண்ணமாய அனந்தரே பாடிபத³தி³வஸே புரிமிகா உபக³ந்தப்³பா³, பச்சி²மிகா பன ஆஸாள்ஹீபுண்ணமதோ அபராய புண்ணமாய அனந்தரே பாடிபத³தி³வஸே. உபக³ச்ச²ந்தேன ச விஹாரம் படிஜக்³கி³த்வா பானீயம் பரிபோ⁴ஜனீயம் உபட்டா²பேத்வா ஸப்³ப³ம் சேதியவந்த³னாதி³ஸாமீசிகம்மம் நிட்டா²பேத்வா ‘‘இமஸ்மிம் விஹாரே இமம் தேமாஸம் வஸ்ஸம் உபேமீ’’தி ஸகிம் வா த்³வத்திக்க²த்தும் வா வாசம் நிச்சா²ரேத்வா வஸ்ஸம் உபக³ந்தப்³ப³ம். ஸசேபி ‘‘இத⁴ வஸிஸ்ஸாமீ’’தி ஆலயோ அத்தி², அஸதியா பன வஸ்ஸம் ந உபேதி, க³ஹிதஸேனாஸனம் ஸுக்³க³ஹிதம், சி²ன்னவஸ்ஸோ ந ஹோதி, பவாரேதும் லப⁴தியேவ. வினாபி ஹி வசீபே⁴த³ம் ஆலயகரணமத்தேனபி வஸ்ஸம் உபக³தமேவ ஹோதி. ‘‘இத⁴ வஸ்ஸம் வஸிஸ்ஸாமீ’’தி சித்துப்பாதோ³யேவேத்த² ஆலயோ நாம.

‘‘ந, பி⁴க்க²வே, தத³ஹுவஸ்ஸூபனாயிகாய வஸ்ஸம் அனுபக³ந்துகாமேன ஸஞ்சிச்ச ஆவாஸோ அதிக்கமிதப்³போ³, யோ அதிக்கமேய்ய, ஆபத்தி து³க்கடஸ்ஸா’’தி (மஹாவ. 186) வசனதோ வஸ்ஸூபனாயிகதி³வஸே வஸ்ஸம் அனுபக³ந்துகாமோ விஹாரஸீமம் அதிக்கமதி, விஹாரக³ணனாய து³க்கடம். ஸசே ஹி தம் தி³வஸம் விஹாரஸதஸ்ஸ உபசாரம் ஓக்கமித்வா அதிக்கமதி, ஸதம் ஆபத்தியோ. ஸசே பன விஹாரம் அதிக்கமித்வா அஞ்ஞஸ்ஸ விஹாரஸ்ஸ உபசாரம் அனோக்கமித்வாவ நிவத்ததி, ஏகாவ ஆபத்தி. கேனசி அந்தராயேன புரிமிகம் அனுபக³தேன பச்சி²மிகா உபக³ந்தப்³பா³.

‘‘ந, பி⁴க்க²வே, அஸேனாஸனிகேன வஸ்ஸம் உபக³ந்தப்³ப³ம், யோ உபக³ச்சே²ய்ய, ஆபத்தி து³க்கடஸ்ஸா’’தி (மஹாவ. 204) வசனதோ யஸ்ஸ பஞ்சன்னம் ச²த³னானம் அஞ்ஞதரேன ச²ன்னம் யோஜிதத்³வாரப³ந்த⁴னம் ஸேனாஸனம் நத்தி², தேன ந உபக³ந்தப்³ப³ம். ‘‘ந, பி⁴க்க²வே, ச²வகுடிகாய வஸ்ஸம் உபக³ந்தப்³ப³ம், யோ உபக³ச்சே²ய்ய, ஆபத்தி து³க்கடஸ்ஸா’’தி(மஹாவ. 204) ஆதி³வசனதோ ச²வகுடிகாயம் ச²த்தே சாடியஞ்ச உபக³ந்தும் ந வட்டதி. தத்த² ச²வகுடிகா நாம டங்கிதமஞ்சாதி³பே⁴தா³ குடி. தத்தே²வ உபக³ந்தும் ந வட்டதி, ஸுஸானே பன அஞ்ஞம் குடிகம் கத்வா உபக³ந்தும் வட்டதி, ச²த்தேபி சதூஸு த²ம்பே⁴ஸு ச²த்தம் ட²பேத்வா ஆவரணம் கத்வா த்³வாரம் யோஜேத்வா உபக³ந்தும் வட்டதி, ச²த்தகுடி நாமேஸா ஹோதி. சாடியாபி மஹந்தேன கபல்லேன ச²த்தே வுத்தனயேன குடிகம் கத்வா உபக³ந்தும் வட்டதி.

‘‘ந, பி⁴க்க²வே, ருக்க²ஸுஸிரே வஸ்ஸம் உபக³ந்தப்³ப³ம், யோ உபக³ச்சே²ய்ய, ஆபத்தி து³க்கடஸ்ஸா’’தி (மஹாவ. 204) வசனதோ ஸுத்³தே⁴ ருக்க²ஸுஸிரே உபக³ந்தும் ந வட்டதி, மஹந்தஸ்ஸ பன ருக்க²ஸுஸிரஸ்ஸ அந்தோ பத³ரச்ச²த³னம் குடிகம் கத்வா பவிஸனத்³வாரம் யோஜேத்வா உபக³ந்தும் வட்டதி, ருக்க²ம் சி²ந்தி³த்வா கா²ணுகமத்த²கே பத³ரச்ச²த³னம் குடிகம் கத்வாபி வட்டதியேவ. ‘‘ந, பி⁴க்க²வே, ருக்க²விடபி⁴யா’’தி(மஹாவ. 204) ஆதி³வசனதோ ஸுத்³தே⁴ விடபி⁴மத்தே உபக³ந்தும் ந வட்டதி, மஹாவிடபே பன அட்டகம் ப³ந்தி⁴த்வா தத்த² பத³ரச்ச²த³னம் குடிகம் கத்வா த்³வாரம் யோஜேத்வா உபக³ந்தப்³ப³ம்.

‘‘அனுஜானாமி, பி⁴க்க²வே, வஜே வஸ்ஸம் உபக³ந்து’’ந்திஆதி³வசனதோ வஜே ஸத்தே² நாவாயஞ்ச உபக³ந்தும் வட்டதி. தத்த² வஜோதி கோ³பாலகானம் நிவாஸட்டா²னம். வஜே வுட்டி²தே வஜேன ஸத்³தி⁴ம் க³தஸ்ஸ வஸ்ஸச்சே²தே³ அனாபத்தி ‘‘அனுஜானாமி, பி⁴க்க²வே, யேன வஜோ, தேன க³ந்து’’ந்தி (மஹாவ. 203) வுத்தத்தா. ஸத்தே² வஸ்ஸம் உபக³ச்ச²ந்தேன பன வஸ்ஸூபனாயிகதி³வஸே உபாஸகா வத்தப்³பா³ ‘‘குடிகா லத்³து⁴ம் வட்டதீ’’தி. ஸசே கரித்வா தே³ந்தி, தத்த² பவிஸித்வா ‘‘இத⁴ வஸ்ஸம் உபேமீ’’தி திக்க²த்தும் வத்தப்³ப³ம். நோ சே தே³ந்தி, ஸாலாஸங்கே²பேன டி²தஸகடஸ்ஸ ஹேட்டா² உபக³ந்தப்³ப³ம். தம்பி அலப⁴ந்தேன ஆலயோ காதப்³போ³, ஸத்தே² பன வஸ்ஸம் உபக³ந்தும் ந வட்டதி. ஆலயோ நாம ‘‘இத⁴ வஸ்ஸம் வஸிஸ்ஸாமீ’’தி சித்துப்பாத³மத்தம். ஸசே மக்³க³ப்படிபன்னேயேவ ஸத்தே² பவாரணாதி³வஸோ ஹோதி, தத்தே²வ பவாரேதப்³ப³ம். அத² ஸத்தோ² அந்தோவஸ்ஸேயேவ பி⁴க்கு²னா பத்தி²தட்டா²னம் பத்வா அதிக்கமதி, பத்தி²தட்டா²னே வஸித்வா தத்த² பி⁴க்கூ²ஹி ஸத்³தி⁴ம் பவாரேதப்³ப³ம். அதா²பி ஸத்தோ² அந்தோவஸ்ஸேயேவ அந்தரா ஏகஸ்மிம் கா³மே திட்ட²தி வா விப்பகிரதி வா, தஸ்மிம்யேவ கா³மே பி⁴க்கூ²ஹி ஸத்³தி⁴ம் வஸித்வா பவாரேதப்³ப³ம், அப்பவாரேத்வா ததோ பரம் க³ந்தும் ந வட்டதி. நாவாய வஸ்ஸம் உபக³ச்ச²ந்தேனபி குடியம்யேவ உபக³ந்தப்³ப³ம், பரியேஸித்வா அலப⁴ந்தேன ஆலயோ காதப்³போ³. ஸசே அந்தோதேமாஸம் நாவா ஸமுத்³தே³யேவ ஹோதி, தத்தே²வ பவாரேதப்³ப³ம். அத² நாவா கூலம் லப⁴தி, அயஞ்ச பரதோ க³ந்துகாமோ ஹோதி, க³ந்தும் ந வட்டதி, நாவாய லத்³த⁴கா³மேயேவ வஸித்வா பி⁴க்கூ²ஹி ஸத்³தி⁴ம் பவாரேதப்³ப³ம். ஸசேபி நாவா அனுதீரமேவ அஞ்ஞத்த² க³ச்ச²தி, பி⁴க்கு² ச பட²மம் லத்³த⁴கா³மேயேவ வஸிதுகாமோ, நாவா க³ச்ச²து, பி⁴க்கு²னா தத்தே²வ வஸித்வா பி⁴க்கூ²ஹி ஸத்³தி⁴ம் பவாரேதப்³ப³ம். இதி வஜே ஸத்தே² நாவாயந்தி தீஸு டா²னேஸு நத்தி² வஸ்ஸச்சே²தே³ ஆபத்தி, பவாரேதுஞ்ச லப⁴தி.

‘‘ந, பி⁴க்க²வே, வஸ்ஸம் உபக³ந்த்வா புரிமம் வா தேமாஸம் பச்சி²மம் வா தேமாஸம் அவஸித்வா சாரிகா பக்கமிதப்³பா³, யோ பக்கமேய்ய, ஆபத்தி து³க்கடஸ்ஸா’’தி (மஹாவ. 186) வசனதோ புரிமிகாய வஸ்ஸம் உபக³தேன புரிமம் தேமாஸம், பச்சி²மிகாய உபக³தேன பச்சி²மம் தேமாஸம் அவஸித்வா சாரிகா ந பக்கமிதப்³பா³, வஸ்ஸம் உபக³ந்த்வா பன அருணம் அனுட்டா²பேத்வாபி தத³ஹேவ ஸத்தாஹகரணீயேன பக்கமந்தஸ்ஸபி அந்தோஸத்தாஹே நிவத்தந்தஸ்ஸ அனாபத்தி, கோ பன வாதோ³ த்³வீஹதீஹம் வஸித்வா ஸத்தாஹகரணீயேன பக்கமந்தஸ்ஸ அந்தோஸத்தாஹே நிவத்தந்தஸ்ஸ.

180. ‘‘அனுஜானாமி, பி⁴க்க²வே, ஸத்தன்னம் ஸத்தாஹகரணீயேன பஹிதே க³ந்தும், ந த்வேவ அப்பஹிதே. பி⁴க்கு²ஸ்ஸ பி⁴க்கு²னியா ஸிக்க²மானாய ஸாமணேரஸ்ஸ ஸாமணேரியா உபாஸகஸ்ஸ உபாஸிகாயா’’தி (மஹாவ. 187) வசனதோ பஞ்சன்னம் ஸஹத⁴ம்மிகானம் அஞ்ஞதரேன ஸங்க⁴க³ணபுக்³க³லே உத்³தி³ஸ்ஸ அத்தனோ வா அத்தா²ய விஹாரம் அட்³ட⁴யோக³ம் பாஸாத³ம் ஹம்மியம் கு³ஹம் பரிவேணம் கோட்ட²கம் உபட்டா²னஸாலம் அக்³கி³ஸாலம் கப்பியகுடிம் வச்சகுடிம் சங்கமம் சங்கமனஸாலம் உத³பானம் உத³பானஸாலம் ஜந்தாக⁴ரம் ஜந்தாக⁴ரஸாலம் போக்க²ரணிம் மண்ட³பம் ஆராமம் ஆராமவத்து²ம் வா காரேத்வா ‘‘ஆக³ச்ச²ந்து பி⁴க்கூ², இச்சா²மி தா³னஞ்ச தா³தும் த⁴ம்மஞ்ச ஸோதும் பி⁴க்கூ² ச பஸ்ஸிது’’ந்தி ஏவம் நித்³தி³ஸித்வா பேஸிதே க³ந்தப்³ப³ம் ஸத்தாஹகரணீயேன, ந த்வேவ அப்பஹிதே. உபாஸகோ வா உபாஸிகா வா ததே²வ ஸங்க⁴க³ணபுக்³க³லே உத்³தி³ஸ்ஸ விஹாராதீ³ஸு அஞ்ஞதரம் காரேத்வா அத்தனோ வா அத்தா²ய நிவேஸனஸயனிக⁴ராதீ³ஸு அஞ்ஞதரம் காராபேத்வா அஞ்ஞம் வா கிச்சகரணீயம் நித்³தி³ஸித்வா கி³லானோ வா ஹுத்வா பி⁴க்கூ²னம் ஸந்திகே தூ³தம் பஹிணேய்ய ‘‘ஆக³ச்ச²ந்து ப⁴த³ந்தா, இச்சா²மி தா³னஞ்ச தா³தும் த⁴ம்மஞ்ச ஸோதும் பி⁴க்கூ² ச பஸ்ஸிது’’ந்தி, க³ந்தப்³ப³ம் ஸத்தாஹகரணீயேன, ந த்வேவ அப்பஹிதே.

‘‘அனுஜானாமி, பி⁴க்க²வே, ஸத்தன்னம் ஸத்தாஹகரணீயேன அப்பஹிதேபி க³ந்தும், பகே³வ பஹிதே. பி⁴க்கு²ஸ்ஸ பி⁴க்கு²னியா ஸிக்க²மானாய ஸாமணேரஸ்ஸ ஸாமணேரியா மாதுயா ச பிதுஸ்ஸ சா’’தி (மஹாவ. 198) வசனதோ ‘‘கி³லானானம் ஏதேஸம் பி⁴க்கு²ஆதீ³னம் ஸஹத⁴ம்மிகானம் மாதாபிதூனஞ்ச கி³லானானம்யேவ கி³லானப⁴த்தம் வா கி³லானுபட்டா²கப⁴த்தம் வா பே⁴ஸஜ்ஜம் வா பரியேஸிஸ்ஸாமி, புச்சி²ஸ்ஸாமி வா உபட்ட²ஹிஸ்ஸாமி வா’’தி இமினா காரணேன அப்பஹிதேபி க³ந்தப்³ப³ம், பகே³வ பஹிதே. அந்த⁴கட்ட²கதா²யம் பன ‘‘யே மாதாபிதூனம் உபட்டா²கா ஞாதகா வா அஞ்ஞாதகா வா, தேஸம்பி அப்பஹிதே க³ந்தும் வட்டதீ’’தி வுத்தம், தம் நேவ அட்ட²கதா²யம், ந பாளியம் வுத்தம், தஸ்மா ந க³ஹேதப்³ப³ம்.

ஸசே பன பி⁴க்கு²னோ பா⁴தா வா அஞ்ஞோ வா ஞாதகோ கி³லானோ ஹோதி, ஸோ சே பி⁴க்கு²ஸ்ஸ ஸந்திகே தூ³தம் பஹிணேய்ய ‘‘அஹம் கி³லானோ, ஆக³ச்ச²து ப⁴த³ந்தோ, இச்சா²மி ப⁴த³ந்தஸ்ஸ ஆக³த’’ந்தி, க³ந்தப்³ப³ம் ஸத்தாஹகரணீயேன, ந த்வேவ அப்பஹிதே. ஸசே ஏகஸ்மிம் விஹாரே பி⁴க்கூ²ஹி ஸத்³தி⁴ம் வஸந்தோ பி⁴க்கு²ப⁴த்திகோ கி³லானோ ஹோதி, ஸோ சே பி⁴க்கூ²னம் ஸந்திகே தூ³தம் பஹிணேய்ய ‘‘அஹம் கி³லானோ, ஆக³ச்ச²ந்து பி⁴க்கூ², இச்சா²மி பி⁴க்கூ²னம் ஆக³த’’ந்தி, க³ந்தப்³ப³ம் ஸத்தாஹகரணீயேன, ந த்வேவ அப்பஹிதே.

ஸசே பி⁴க்கு²ஸ்ஸ பி⁴க்கு²னியா ஸிக்க²மானாய ஸாமணேரஸ்ஸ ஸாமணேரியா அனபி⁴ரதி வா குக்குச்சம் வா தி³ட்டி²க³தம் வா உப்பன்னம் ஹோதி, க³ந்தப்³ப³ம் ஸத்தாஹகரணீயேன அப்பஹிதேபி ‘‘அனபி⁴ரதிம் வூபகாஸேஸ்ஸாமி வா வூபகாஸாபேஸ்ஸாமி வா கும்குச்சம் வினோதே³ஸ்ஸாமி வா வினோதா³பேஸ்ஸாமி வா தி³ட்டி²க³தம் விவேசேஸ்ஸாமி வா விவேசாபேஸ்ஸாமி வா த⁴ம்மகத²ம் வா கரிஸ்ஸாமீ’’தி, பகே³வ பஹிதே. ஸசே கோசி பி⁴க்கு² க³ருத⁴ம்மம் அஜ்ஜா²பன்னோ ஹோதி பரிவாஸாரஹோ மூலாயபடிகஸ்ஸனாரஹோ மானத்தாரஹோ அப்³பா⁴னாரஹோ வா, அப்பஹிதேபி க³ந்தப்³ப³ம் ‘‘பரிவாஸதா³னாதீ³ஸு உஸ்ஸுக்கம் ஆபஜ்ஜிஸ்ஸாமி, அனுஸ்ஸாவேஸ்ஸாமி, க³ணபூரகோ வா ப⁴விஸ்ஸாமீ’’தி, பகே³வ பஹிதே. பி⁴க்கு²னியாபி மானத்தாரஹாய மூலாயபடிகஸ்ஸனாரஹாய அப்³பா⁴னாரஹாய வா ஏஸேவ நயோ. ஸசே ஸாமணேரோ உபஸம்பஜ்ஜிதுகாமோ ஹோதி, வஸ்ஸம் வா புச்சி²துகாமோ, ஸிக்க²மானா வா உபஸம்பஜ்ஜிதுகாமா ஹோதி, ஸிக்கா² வாஸ்ஸா குபிதா, ஸாமணேரீ வா ஸிக்கா² ஸமாதி³யிதுகாமா ஹோதி, வஸ்ஸம் வா புச்சி²துகாமா, அப்பஹிதேபி க³ந்தப்³ப³ம், பகே³வ பஹிதே.

ஸசே பி⁴க்கு²ஸ்ஸ பி⁴க்கு²னியா வா ஸங்கோ⁴ கம்மம் காதுகாமோ ஹோதி, தஜ்ஜனீயம் வா நியஸ்ஸம் வா பப்³பா³ஜனீயம் வா படிஸாரணீயம் வா உக்கே²பனீயம் வா, அப்பஹிதேபி க³ந்தப்³ப³ம், பகே³வ பஹிதே ‘‘கிம் நு கோ² ஸங்கோ⁴ கம்மம் ந கரேய்ய, லஹுகாய வா பரிணாமேய்யா’’தி. ஸசேபி கதம்யேவ ஹோதி கம்மம், அப்பஹிதேபி க³ந்தப்³ப³ம் ‘‘கிம் நு கோ² ஸம்மா வத்தேய்ய, லோமம் பாதேய்ய, நேத்தா²ரம் வத்தேய்ய, ஸங்கோ⁴ தம் கம்மம் படிப்பஸ்ஸம்பே⁴ய்யா’’தி.

181. ‘‘அனுஜானாமி, பி⁴க்க²வே, ஸங்க⁴கரணீயேன க³ந்து’’ந்தி (மஹாவ. 199) வசனதோ ஸேனாஸனபடிப³த்³த⁴ஸங்க⁴கரணீயேனபி க³ந்தும் வட்டதி. ஏத்த² (மஹாவ. அட்ட². 199) ஹி யம் கிஞ்சி உபோஸதா²கா³ராதீ³ஸு ஸேனாஸனேஸு சேதியச²த்தவேதி³காதீ³ஸு வா கத்தப்³ப³ம், அந்தமஸோ பி⁴க்கு²னோ புக்³க³லிகஸேனாஸனம்பி ஸப்³ப³ம் ஸங்க⁴கரணீயமேவாதி அதி⁴ப்பேதம், தஸ்மா தஸ்ஸ நிப்பா²த³னத்த²ம் த³ப்³ப³ஸம்பா⁴ராதீ³னி வா ஆஹரிதும் வட்³ட⁴கீபபு⁴தீனம் ப⁴த்தவேதனாதீ³னி வா தா³தும் க³ந்தப்³ப³ம். அபிசேத்த² அயம்பி பாளிமுத்தகனயோ வேதி³தப்³போ³ – த⁴ம்மஸ்ஸவனத்தா²ய அனிமந்திதேன க³ந்தும் ந வட்டதி, ஸசே ஏகஸ்மிம் மஹாவாஸே பட²மம்யேவ கதிகா கதா ஹோதி ‘‘அஸுகதி³வஸம் நாம ஸன்னிபதிதப்³ப³’’ந்தி, நிமந்திதோயேவ நாம ஹோதி, க³ந்தும் வட்டதி. ‘‘ப⁴ண்ட³கம் தோ⁴விஸ்ஸாமீ’’தி க³ந்தும் ந வட்டதி. ஸசே பன ஆசரியுபஜ்ஜா²யா பஹிணந்தி, வட்டதி. நாதிதூ³ரே விஹாரோ ஹோதி, ‘‘தத்த² க³ந்த்வா அஜ்ஜேவ ஆக³மிஸ்ஸாமீ’’தி ஸம்பாபுணிதும் ந ஸக்கோதி, வட்டதி. உத்³தே³ஸபரிபுச்சா²தீ³னம் அத்தா²யபி க³ந்தும் ந லப⁴தி, ‘‘ஆசரியம் பன பஸ்ஸிஸ்ஸாமீ’’தி க³ந்தும் லப⁴தி. ஸசே நம் ஆசரியோ ‘‘அஜ்ஜ மா க³ச்சா²’’தி வத³தி, வட்டதி, உபட்டா²ககுலம் வா ஞாதிகுலம் வா த³ஸ்ஸனாய க³ந்தும் ந லப⁴தி.

ஸசே பி⁴க்கூ²ஸு வஸ்ஸூபக³தேஸு கா³மோ சோரேஹி வுட்டா²தி, தத்த² கிம் காதப்³ப³ந்தி? யேன கா³மோ, தேன க³ந்தப்³ப³ம். ஸசே கா³மோ த்³விதா⁴ பி⁴ஜ்ஜதி, யத்த² ப³ஹுதரா மனுஸ்ஸா, தத்த² க³ந்தப்³ப³ம். ஸசே ப³ஹுதரா அஸ்ஸத்³தா⁴ ஹோந்தி அப்பஸன்னா, யத்த² ஸத்³தா⁴ பஸன்னா, தத்த² க³ந்தப்³ப³ம். ஏத்த² ச ஸசே கா³மோ அவிதூ³ரக³தோ ஹோதி, தத்த² பிண்டா³ய சரித்வா விஹாரமேவ ஆக³ந்த்வா வஸிதப்³ப³ம். ஸசே தூ³ரம் க³தோ, ஸத்தாஹவாரேன அருணோ உட்டா²பேதப்³போ³, ந ஸக்கா சே ஹோதி, தத்தே²வ ஸபா⁴க³ட்டா²னே வஸிதப்³ப³ம். ஸசே மனுஸ்ஸா யதா²பவத்தானி ஸலாகப⁴த்தாதீ³னி தே³ந்தி, ‘‘ந மயம் தஸ்மிம் விஹாரே வஸிம்ஹா’’தி வத்தப்³பா³. ‘‘மயம் விஹாரஸ்ஸ வா பாஸாத³ஸ்ஸ வா ந தே³ம, தும்ஹாகம் தே³ம, யத்த² கத்த²சி வஸித்வா பு⁴ஞ்ஜதா²’’தி வுத்தே பன யதா²ஸுக²ம் பு⁴ஞ்ஜிதப்³ப³ம், தேஸம்யேவ தம் பாபுணாதி. ‘‘தும்ஹாகம் வஸனட்டா²னே பாபுணாபேத்வா பு⁴ஞ்ஜதா²’’தி வுத்தே பன யத்த² வஸந்தி, தத்த² நேத்வா வஸ்ஸக்³கே³ன பாபுணாபேத்வா பு⁴ஞ்ஜிதப்³ப³ம். ஸசே பவாரிதகாலே வஸ்ஸாவாஸிகம் தே³ந்தி, யதி³ ஸத்தாஹவாரேன அருணம் உட்டா²பயிம்ஸு, க³ஹேதப்³ப³ம். சி²ன்னவஸ்ஸேஹி பன ‘‘ந மயம் தத்த² வஸிம்ஹ, சி²ன்னவஸ்ஸா மய’’ந்தி வத்தப்³ப³ம். யதி³ ‘‘யேஸம் அம்ஹாகம் ஸேனாஸனம் பாபிதம், தே க³ண்ஹந்தூ’’தி வத³ந்தி, க³ஹேதப்³ப³ம். யம் பன ‘‘விஹாரே உபனிக்கி²த்தகம் மா வினஸ்ஸீ’’தி இத⁴ ஆஹடம் சீவராதி³வேப⁴ங்கி³யப⁴ண்ட³ம், தம் தத்தே²வ க³ந்த்வா அபலோகேத்வா பா⁴ஜேதப்³ப³ம். ‘‘இதோ அய்யானம் சத்தாரோ பச்சயே தே³தா²’’தி கப்பியகாரகானம் தி³ன்னே கே²த்தவத்து²ஆதி³கே தத்ருப்பாதே³பி ஏஸேவ நயோ. ஸங்கி⁴கஞ்ஹி வேப⁴ங்கி³யப⁴ண்ட³ம் அந்தோவிஹாரே வா ப³ஹிஸீமாய வா ஹோது, ப³ஹிஸீமாய டி²தானம் அபலோகேத்வா பா⁴ஜேதும் ந வட்டதி. உப⁴யத்த² டி²தம்பி பன அந்தோஸீமாய டி²தானம் அபலோகேத்வா பா⁴ஜேதும் வட்டதியேவ.

ஸசே பன வஸ்ஸூபக³தா பி⁴க்கூ² வாளேஹி உப்³பா³ள்ஹா ஹோந்தி, க³ண்ஹந்திபி பரிபாதேந்திபி, ஸரீஸபேஹி வா உப்³பா³ள்ஹா ஹோந்தி, ட³ம்ஸந்திபி பரிபாதேந்திபி, சோரேஹி வா உப்³பா³ள்ஹா ஹோந்தி, விலும்பந்திபி ஆகோடேந்திபி, பிஸாசேஹி வா உப்³பா³ள்ஹா ஹோந்தி, ஆவிஸந்திபி ஹனந்திபி, ‘‘ஏஸேவ அந்தராயோ’’தி பக்கமிதப்³ப³ம், நத்தி² வஸ்ஸச்சே²தே³ ஆபத்தி. ஸசே கா³மோ அக்³கி³னா வா த³ட்³டோ⁴ ஹோதி, உத³கேன வா வுள்ஹோ. பி⁴க்கூ² பிண்ட³கேன கிலமந்தி, ‘‘ஏஸேவ அந்தராயோ’’தி பக்கமிதப்³ப³ம், வஸ்ஸச்சே²தே³ அனாபத்தி. ஸேனாஸனம் அக்³கி³னா வா த³ட்³ட⁴ம் ஹோதி, உத³கேன வா வுள்ஹம், பி⁴க்கூ² ஸேனாஸனேன கிலமந்தி, ‘‘ஏஸேவ அந்தராயோ’’தி பக்கமிதப்³ப³ம், வஸ்ஸச்சே²தே³ அனாபத்தி. ஸசே வஸ்ஸூபக³தா பி⁴க்கூ² ந லப⁴ந்தி லூக²ஸ்ஸ வா பணீதஸ்ஸ வா போ⁴ஜனஸ்ஸ யாவத³த்த²ம் பாரிபூரிம், ‘‘ஏஸேவ அந்தராயோ’’தி பக்கமிதப்³ப³ம். ஸசே லப⁴ந்தி லூக²ஸ்ஸ வா பணீதஸ்ஸ வா போ⁴ஜனஸ்ஸ யாவத³த்த²ம் பாரிபூரிம், ந லப⁴ந்தி ஸப்பாயானி போ⁴ஜனானி, ‘‘ஏஸேவ அந்தராயோ’’தி பக்கமிதப்³ப³ம். ஸசேபி லப⁴ந்தி லூக²ஸ்ஸ வா பணீதஸ்ஸ வா போ⁴ஜனஸ்ஸ யாவத³த்த²ம் பாரிபூரிம், லப⁴ந்தி ஸப்பாயானி போ⁴ஜனானி, ந லப⁴ந்தி ஸப்பாயானி பே⁴ஸஜ்ஜானி, ‘‘ஏஸேவ அந்தராயோ’’தி பக்கமிதப்³ப³ம். ஸசே லப⁴ந்தி லூக²ஸ்ஸ வா பணீதஸ்ஸ வா போ⁴ஜனஸ்ஸ யாவத³த்த²ம் பாரிபூரிம், லப⁴ந்தி ஸப்பாயானி போ⁴ஜனானி, லப⁴ந்தி ஸப்பாயானி பே⁴ஸஜ்ஜானி, ந லப⁴ந்தி பதிரூபம் உபட்டா²கம், ‘‘ஏஸேவ அந்தராயோ’’தி பக்கமிதப்³ப³ம், ஸப்³ப³த்த² வஸ்ஸச்சே²தே³ அனாபத்தி.

ஸசே பன வஸ்ஸூபக³தம் பி⁴க்கு²ம் இத்தீ² நிமந்தேதி ‘‘ஏஹி, ப⁴ந்தே, ஹிரஞ்ஞம் வா தே தே³மி, ஸுவண்ணம் வா கே²த்தம் வா வத்து²ம் வா கா³வும் வா கா³விம் வா தா³ஸம் வா தா³ஸிம் வா தே தே³மி, தீ⁴தரம் வா தே தே³மி ப⁴ரியத்தா²ய, அஹம் வா தே ப⁴ரியா ஹோமி, அஞ்ஞம் வா தே ப⁴ரியம் ஆனேமீ’’தி, தத்ர சே பி⁴க்கு²னோ ஏவம் ஹோதி ‘‘லஹுபரிவத்தம் கோ² சித்தம் வுத்தம் ப⁴க³வதா, ஸியாபிமே ப்³ரஹ்மசரியஸ்ஸ அந்தராயோ’’தி, பக்கமிதப்³ப³ம், நத்தி² வஸ்ஸச்சே²தே³ ஆபத்தி. வுத்தனயேனேவ வேஸீ வா நிமந்தேதி, து²ல்லகுமாரீ வா நிமந்தேதி, பண்ட³கோ வா நிமந்தேதி, ஞாதகா வா நிமந்தேந்தி, ராஜானோ வா நிமந்தேந்தி, சோரா வா நிமந்தேந்தி, து⁴த்தா வா நிமந்தேந்தி, ஏஸேவ நயோ. ஸசே வஸ்ஸூபக³தோ பி⁴க்கு² பஸ்ஸதி அஸாமிகம் நிதி⁴ம், தத்ர சே பி⁴க்கு²னோ ஏவம் ஹோதி ‘‘லஹுபரிவத்தம் கோ² சித்தம் வுத்தம் ப⁴க³வதா, ஸியாபி மே ப்³ரஹ்மசரியஸ்ஸ அந்தராயோ’’தி, பக்கமிதப்³ப³ம், அனாபத்தி வஸ்ஸச்சே²தே³.

ஸசே வஸ்ஸூபக³தோ பி⁴க்கு² பஸ்ஸதி ஸம்ப³ஹுலே பி⁴க்கூ² ஸங்க⁴பே⁴தா³ய பரக்கமந்தே, ஸுணாதி வா ‘‘ஸம்ப³ஹுலா பி⁴க்கூ² ஸங்க⁴பே⁴தா³ய பரக்கமந்தீ’’தி, தத்ர சே பி⁴க்கு²னோ ஏவம் ஹோதி ‘‘க³ருகோ கோ² ஸங்க⁴பே⁴தோ³ வுத்தோ ப⁴க³வதா, மா மயி ஸம்முகீ²பூ⁴தே ஸங்கோ⁴ பி⁴ஜ்ஜீ’’தி, பக்கமிதப்³ப³ம், அனாபத்தி வஸ்ஸச்சே²தே³. ஸசே வஸ்ஸூபக³தோ பி⁴க்கு² ஸுணாதி ‘‘அஸுகஸ்மிம் கிர ஆவாஸே ஸம்ப³ஹுலா பி⁴க்கூ² ஸங்க⁴பே⁴தா³ய பரக்கமந்தீ’’தி, தத்ர சே பி⁴க்கு²னோ ஏவம் ஹோதி ‘‘தே ச கோ² மே பி⁴க்கூ² மித்தா, த்யாஹம் வக்கா²மி ‘க³ருகோ கோ², ஆவுஸோ, ஸங்க⁴பே⁴தோ³ வுத்தோ ப⁴க³வதா, மா ஆயஸ்மந்தானம் ஸங்க⁴பே⁴தோ³ ருச்சித்தா²’தி, கரிஸ்ஸந்தி மே வசனம் ஸுஸ்ஸூஸிஸ்ஸந்தி, ஸோதம் ஓத³ஹிஸ்ஸந்தீ’’தி, பக்கமிதப்³ப³ம், அனாபத்தி வஸ்ஸச்சே²தே³, பி⁴ன்னே பன ஸங்கே⁴ க³ந்த்வா கரணீயம் நத்தி².

ஸசே பன கோசி பி⁴க்கு² ‘‘இமம் தேமாஸம் இத⁴ வஸ்ஸம் வஸதா²’’தி வுத்தே படிஸ்ஸுணித்வா விஸம்வாதே³தி, து³க்கடம். ந கேவலம் தஸ்ஸேவ படிஸ்ஸவஸ்ஸ விஸம்வாதே³ து³க்கடம், ‘‘இமம் தேமாஸம் பி⁴க்க²ம் க³ண்ஹத², உபோ⁴பி மயம் இத⁴ வஸ்ஸம் வஸிஸ்ஸாம, ஏகதோ உத்³தி³ஸாபேஸ்ஸாமா’’தி ஏவமாதி³னாபி தஸ்ஸ தஸ்ஸ படிஸ்ஸவஸ்ஸ விஸம்வாதே³ து³க்கடம். தஞ்ச கோ² பட²மம் ஸுத்³த⁴சித்தஸ்ஸ பச்சா² விஸம்வாத³னபச்சயா, பட²மம்பி அஸுத்³த⁴சித்தஸ்ஸ பன படிஸ்ஸவே பாசித்தியம். விஸம்வாதே³ து³க்கடந்தி பாசித்தியேன ஸத்³தி⁴ம் து³க்கடம் யுஜ்ஜதி.

182. வஸ்ஸூபக³தேஹி (சூளவ. அட்ட². 318) அந்தோவஸ்ஸே நிப³த்³த⁴வத்தம் ட²பேத்வா வஸ்ஸூபக³தா பி⁴க்கூ² ‘‘ஸம்முஞ்ஜனியோ ப³ந்த⁴தா²’’தி வத்தப்³பா³. ஸுலபா⁴ சே த³ண்ட³கா சேவ ஸலாகாயோ ச ஹோந்தி, ஏககேன ச² பஞ்ச முட்டி²ஸம்முஞ்ஜனியோ த்³வே திஸ்ஸோ யட்டி²ஸம்முஞ்ஜனியோ வா ப³ந்தி⁴தப்³பா³. து³ல்லபா⁴ ஹோந்தி, த்³வே திஸ்ஸோ முட்டி²ஸம்முஞ்ஜனியோ ஏகா யட்டி²ஸம்முஞ்ஜனீ ப³ந்தி⁴தப்³பா³. ஸாமணேரேஹி பஞ்ச பஞ்ச உக்கா வா கோட்டேதப்³பா³, வஸனட்டா²னேஸு கஸாவபரிப⁴ண்ட³ம் காதப்³ப³ம். வத்தம் கரோந்தேஹி ச ந உத்³தி³ஸிதப்³ப³ம் ந உத்³தி³ஸாபேதப்³ப³ம், ந ஸஜ்ஜா²யோ காதப்³போ³, ந பப்³பா³ஜேதப்³ப³ம் ந உபஸம்பாதே³தப்³ப³ம், ந நிஸ்ஸயோ தா³தப்³போ³, ந த⁴ம்மஸ்ஸவனம் காதப்³ப³ம். ஸப்³பே³வ ஹி ஏதே பபஞ்சா, நிப்பபஞ்சா ஹுத்வா ஸமணத⁴ம்மமேவ கரிஸ்ஸாமாதி வா ஸப்³பே³ தேரஸ து⁴தங்கா³னி ஸமாதி³யந்து, ஸேய்யம் அகப்பேத்வா டா²னசங்கமேஹி வீதினாமேந்து, மூக³ப்³ப³தம் க³ண்ஹந்து, ஸத்தாஹகரணீயேன க³தாபி பா⁴ஜனீயப⁴ண்ட³ம் லப⁴ந்தூதி வா ஏவரூபம் அத⁴ம்மிகவத்தம் ந காதப்³ப³ம். ஏவம் பன காதப்³ப³ம் – பரியத்தித⁴ம்மோ நாம திவித⁴ம்பி ஸத்³த⁴ம்மம் பதிட்டா²பேதி, தஸ்மா ஸக்கச்சம் உத்³தி³ஸத² உத்³தி³ஸாபேத², ஸஜ்ஜா²யம் கரோத², பதா⁴னக⁴ரே வஸந்தானம் ஸங்க⁴ட்டனம் அகத்வா அந்தோவிஹாரே நிஸீதி³த்வா உத்³தி³ஸத² உத்³தி³ஸாபேத², ஸஜ்ஜா²யம் கரோத², த⁴ம்மஸ்ஸவனம் ஸமித்³த⁴ம் கரோத², பப்³பா³ஜேந்தா ஸோதே⁴த்வா பப்³பா³ஜேத², ஸோதே⁴த்வா உபஸம்பாதே³த², ஸோதே⁴த்வா நிஸ்ஸயம் தே³த². ஏகோபி ஹி குலபுத்தோ பப்³ப³ஜ்ஜஞ்ச உபஸம்பத³ஞ்ச லபி⁴த்வா ஸகலம் ஸாஸனம் பதிட்டா²பேதி, அத்தனோ தா²மேன யத்தகானி ஸக்கோத², தத்தகானி து⁴தங்கா³னி ஸமாதி³யத², அந்தோவஸ்ஸம் நாமேதம் ஸகலதி³வஸம் ரத்தியா ச பட²மயாமபச்சி²மயாமேஸு அப்பமத்தேஹி ப⁴விதப்³ப³ம், வீரியம் ஆரபி⁴தப்³ப³ம். போராணகமஹாதே²ராபி ஸப்³ப³பலிபோ³தே⁴ சி²ந்தி³த்வா அந்தோவஸ்ஸே ஏகசாரியவத்தம் பூரயிம்ஸு, ப⁴ஸ்ஸே மத்தம் ஜானித்வா த³ஸவத்து²கத²ம் த³ஸஅஸுப⁴த³ஸானுஸ்ஸதிஅட்ட²திம்ஸாரம்மணகத²ம் காதும் வட்டதி, ஆக³ந்துகானம் வத்தம் காதும், ஸத்தாஹகரணீயேன க³தானம் அபலோகேத்வா தா³தும் வட்டதீதி ஏவரூபம் வத்தம் காதப்³ப³ம்.

அபிச பி⁴க்கூ² ஓவதி³தப்³பா³ ‘‘விக்³கா³ஹிகபிஸுணப²ருஸவசனானி மா வத³த², தி³வஸே தி³வஸே ஸீலானி ஆவஜ்ஜேந்தா சதுராரக்க²ம் அஹாபேந்தா மனஸிகாரப³ஹுலா விஹரதா²’’தி. த³ந்தகட்ட²கா²த³னவத்தம் ஆசிக்கி²தப்³ப³ம், சேதியம் வா போ³தி⁴ம் வா வந்த³ந்தேன க³ந்த⁴மாலம் வா பூஜேந்தேன பத்தம் வா த²விகாய பக்கி²பந்தேன ந கதே²தப்³ப³ம், பி⁴க்கா²சாரவத்தம் ஆசிக்கி²தப்³ப³ம், அந்தோகா³மே மனுஸ்ஸேஹி ஸத்³தி⁴ம் பச்சயஸஞ்ஞுத்தகதா² வா விஸபா⁴க³கதா² வா ந கதே²தப்³பா³, ரக்கி²திந்த்³ரியேஹி ப⁴விதப்³ப³ம், க²ந்த⁴கவத்தஞ்ச ஸேகி²யவத்தஞ்ச பூரேதப்³ப³ந்தி ஏவரூபா ப³ஹுகாபி நிய்யானிககதா² ஆசிக்கி²தப்³பா³தி.

இதி பாளிமுத்தகவினயவினிச்ச²யஸங்க³ஹே

வஸ்ஸூபனாயிகவினிச்ச²யகதா² ஸமத்தா.