1. பத்தஸிக்கா²பத³வண்ணனா

602. ததியவக்³க³ஸ்ஸ பட²மே அட்³ட⁴தேரஸபலாதி மாக³தி⁴காய மானதுலாய அட்³ட⁴தேரஸபலபரிமிதம் உத³கம் க³ண்ஹந்தம் ஸந்தா⁴ய வுத்தம், ததா² பரிமிதம் யவமாஸாதி³ம் க³ண்ஹந்திம் ஸந்தா⁴யாதி கேசி. ஆசரியத⁴ம்மபாலத்தே²ரேன பன ‘‘பகதிசதுமுட்டி²கம் குடு³வம், சதுகுடு³வம் நாளி, தாய நாளியா ஸோளஸ நாளியோ தோ³ணம், தம் பன மக³த⁴னாளியா த்³வாத³ஸ நாளியோ ஹோந்தீதி வத³ந்தீ’’தி வுத்தம். த³மிளனாளீதி புராணனாளிம் ஸந்தா⁴ய வுத்தம். ஸா ச சதுமுட்டி²கேஹி குடு³வேஹி அட்ட² குடு³வா, தாய நாளியா த்³வே நாளியோ மக³த⁴னாளிம் க³ண்ஹாதி. புராணா பன ‘‘ஸீஹளனாளி திஸ்ஸோ நாளியோ க³ண்ஹாதீ’’தி வத³ந்தி, தேஸம் மதேன மக³த⁴னாளி இதா³னி பவத்தமானாய சதுகுடு³வாய த³மிளனாளியா சதுனாளிகா ஹோதி, ததோ மக³த⁴னாளிதோ உபட்³ட⁴ஞ்ச புராணத³மிளனாளிஸங்கா²தம் பத்த²ம் நாம ஹோதி, ஏதேன ச ‘‘ஓமகோ நாம பத்தோ பத்தோ²த³னம் க³ண்ஹாதீ’’தி பாளிவசனஞ்ச ஸமேதி, லோகியேஹிபி –

‘‘லோகியம் மக³த⁴ஞ்சேதி, பத்த²த்³வயமுதா³ஹடம்;

லோகியம் ஸோளஸபலம், மாக³த⁴ம் தி³கு³ணம் மத’’ந்தி. –

ஏவம் லோகே நாளியா மக³த⁴னாளி தி³கு³ணாதி த³ஸ்ஸிதா, ஏவஞ்ச க³ய்ஹமானே ஓமகபத்தஸ்ஸ ச யாபனமத்தோத³னகா³ஹிகா ச ஸித்³தா⁴ ஹோதி. ந ஹி ஸக்கா அட்ட²குடு³வதோ ஊனோத³னகா³ஹினா பத்தேன அதூ²பீகதம் பிண்ட³பாதம் பரியேஸித்வா யாபேதும். தேனேவ வேரஞ்ஜகண்ட³ட்ட²கதா²யம் ‘‘பத்தோ² நாம நாளிமத்தம் ஹோதி ஏகஸ்ஸ புரிஸஸ்ஸ அலம் யாபனாய. வுத்தம்பி ஹேதம் ‘பத்தோ²த³னோ நாலமயம் து³வின்ன’’’ந்தி (ஜா. 2.21.192) வுத்தம், ‘‘ஏகேகஸ்ஸ த்³வின்னம் திண்ணம் பஹோதீ’’தி ச ஆக³ஹம், தஸ்மா இத⁴ வுத்தனயானுஸாரேனேவ க³ஹேதப்³ப³ம்.

ஆலோபஸ்ஸ அனுரூபந்தி ஏத்த² ‘‘ப்³யஞ்ஜனஸ்ஸ மத்தா நாம ஓத³னதோ சதுத்த²பா⁴கோ³’’தி (ம. நி. அட்ட². 2.387) ப்³ரஹ்மாயுஸுத்தட்ட²கதா²யம் வுத்தத்தா ஆலோபஸ்ஸ சதுத்த²பா⁴க³மேவ ப்³யஞ்ஜனம் அனுரூபந்தி த³ட்ட²ப்³ப³ம். ஓத³னக³திகானேவாதி ஓத³னஸ்ஸ அந்தோ ஏவ பவிஸனஸீலானி ஸியும், அத்தனோ ஓகாஸம் ந க³வேஸந்தீதி அத்தோ². நாமமத்தேதி ‘‘மஜ்ஜி²மோ பத்தோ மஜ்ஜி²மோமகோ’’திஆதி³னாமமத்தே.

607-8. ஏவம் பயோகே³ பயோகே³தி பரியோஸானாலோபஜ்ஜோ²ஹரணபயோகே³ பயோகே³, ஆலோபே ஆலோபேதி அத்தோ². கத்வாதி பாகபரியோஸானம் கத்வா. பசித்வா ட²பேஸ்ஸாமீதி காளவண்ணபாகம் ஸந்தா⁴ய வுத்தம். சி²த்³த³ந்தி முக²வட்டிதோ த்³வங்கு³லஸ்ஸ ஹேட்டா²சி²த்³த³ம் வுத்தம். ஸேஸம் பட²மகதி²னே வுத்தனயமேவ.

பத்தஸிக்கா²பத³வண்ணனா நிட்டி²தா.