6-7. குண்ட³லியஸுத்தாதி³வண்ணனா

187-188. நிப³த்³த⁴வாஸவஸேன ஆராமே நிஸீத³னஸீலோதி ஆராமனிஸாதீ³. பரிஸம் ஓகா³ள்ஹோ ஹுத்வா சரதீதி பரிஸாவசரோதி ஆஹ – ‘‘யோ பனா’’திஆதி³. ஏவந்தி இமினாகாரேன. க³ஹணந்தி நிக்³க³ஹணம். தேன புச்சா²பத³ஸ்ஸ அத்த²ம் விவரதி. நிப்³பே³ட²னந்தி நிக்³க³ஹனிப்³பே³ட²னம். தேன விஸ்ஸஜ்ஜனபத³ஸ்ஸ அத்த²ம் விவரதி. இமினா நயேனாதி ஏதேன ‘‘இதிவாதோ³’’தி ஏத்த² இதி-ஸத்³த³ஸ்ஸ அத்த²ம் த³ஸ்ஸேதி. உபாரம்பா⁴தி⁴ப்பாயோ வத³தி ஏதேனாதி வாதோ³, தோ³ஸோ. இதிவாதோ³ ஹோதீதி ஏவம் இமஸ்ஸ உபரி வாதா³ரோபனம் ஹோதி. இதிவாத³ப்பமோக்கோ²தி ஏவம் ததோ பமோக்கோ² ஹோதி. ஏவம் வாத³ப்பமோக்கா²னிஸம்ஸம் பரேஹி ஆரோபிததோ³ஸஸ்ஸ நிப்³பே³ட²னவஸேன த³ஸ்ஸேத்வா இதா³னி தோ³ஸபவேத³னவஸேன த³ஸ்ஸேதும் ‘‘அயம் புச்சா²ய தோ³ஸோ’’திஆதி³ வுத்தம்.

ஏத்தகம் டா²னந்திஆதி³தோ பட்டா²ய யாவ ‘‘தீணி ஸுசரிதானீ’’தி ஏத்தகம் டா²னம். இமம் தே³ஸனந்தி ‘‘இந்த்³ரியஸம்வரோ கோ²’’திஆதி³னயப்பவத்தம் இமம் தே³ஸனம். நாபி⁴ஜ்ஜா²யதீதி ந அபி⁴ஜ்ஜா²யதி. நாபி⁴ஹம்ஸதீதி ந அபி⁴துஸ்ஸதி. கோ³சரஜ்ஜ²த்தே டி²தம் ஹோதீதி கம்மட்டா²னாரம்மணே ஸமாதா⁴னவஸேன டி²தம் ஹோதி அவட்டி²தம். தேனாஹ ‘‘ஸுஸண்டி²த’’ந்தி. ஸுஸண்டி²தந்தி ஸம்மா அவிக்கே²பவஸேன டி²தம். கம்மட்டா²னவிமுத்தியாதி கம்மட்டா²னானுயுஞ்ஜனவஸேன படிபக்க²தோ நீவரணதோ விமுத்தியா. ஸுட்டு² விமுத்தந்தி ஸுவிமுத்தம். தஸ்மிம் அமனாபரூபத³ஸ்ஸனே ந மங்கு விலக்கோ² ந ஹோதி. கிலேஸவஸேன தோ³ஸவஸேன. அட்டி²தசித்தோ அத²த்³த⁴சித்தோ. கோவேஸேன ஹி சித்தம் த²த்³த⁴ம் ஹோதி, ந முது³கம். அதீ³னமானஸோதி தோ³மனஸ்ஸவஸேன யோ தீ³னபா⁴வோ, தத³பா⁴வேன நித்³தோ³ஸமானஸோ. அபூதிசித்தோதி ப்³யாபஜ்ஜாபா⁴வேன ஸீதிபூ⁴தசித்தோ.

இமேஸு ச²ஸு த்³வாரேஸு அட்டா²ரஸ து³ச்சரிதானி ஹோந்தி பச்சேகம் காயவசீமனோது³ச்சரிதபே⁴தே³ன. தானி விபா⁴கே³ன த³ஸ்ஸேதும் ‘‘கத²’’ந்திஆதி³ வுத்தம். தத்த² இட்டா²ரம்மணே ஆபாத²க³தேதி நயதா³னமத்தமேதம். தேன ‘‘அனிட்டா²ரம்மணே ஆபாத²க³தே தோ³ஸம் உப்பாதே³ந்தஸ்ஸா’’திஆதி³னா திவித⁴து³ச்சரிதம் நீஹரித்வா வத்தப்³ப³ம், ததா² ‘‘மஜ்ஜ²த்தாரம்மணே மோஹம் உப்பாதே³ந்தஸ்ஸா’’திஆதி³னா ச. மனோது³ச்சரிதாதி³ஸாமஞ்ஞேன பன தீணியேவ து³ச்சரிதானி ஹோந்தீதி வேதி³தப்³ப³ம்.

பஞ்ஞத்திவஸேனாதி வத்து²ம் அனாமஸித்வா பிண்ட³க³ஹணமுகே²ன கேவலம் பஞ்ஞத்திவஸேனேவ. பா⁴வனாபடிஸங்கா²னேதி பா⁴வனாஸித்³தே⁴ படிஸங்கா²னே, பா⁴வனாய படிஸங்கா²னே வாதி அத்தோ². இமானீதி யதா²வுத்தானி ச²த்³வாராரம்மணானி. து³ச்சரிதானீதி து³ச்சரிதகாரணானி. அப்படிஸங்கா²னே டி²தஸ்ஸ து³ச்சரிதானி ஸுசரிதானி கத்வா. பரிணாமேதீதி பரிவத்தேதி து³ச்சரிதானி தத்த² அனுப்பாதே³த்வா ஸுசரிதானி உப்பாதே³ந்தோ. ஏவந்தி வுத்தப்பகாரேன. இந்த்³ரியஸம்வரோ…பே… வேதி³தப்³போ³ இந்த்³ரியஸம்வரஸம்பாத³னவஸேன திண்ணம் ஸுசரிதானம் ஸிஜ்ஜ²னதோ. தேனாஹ ‘‘ஏத்தாவதா’’திஆதி³. ஏத்தாவதாதி ஆதி³தோ பட்டா²ய யாவ ‘‘தீணி ஸுசரிதானி பரிபூரேந்தீ’’தி பத³ம், ஏத்தாவதா. ஸீலானுரக்க²கம் இந்த்³ரியஸம்வரஸீலந்தி சதுபாரிஸுத்³தி⁴ஸீலஸ்ஸ அனுரக்க²கம் இந்த்³ரியஸம்வரஸீலம் கதி²கம். கத²ம் பன ததே³வ தஸ்ஸ அனுரக்க²கம் ஹோதீதி? அபராபருப்பத்தியா உபனிஸ்ஸயபா⁴வதோ.

தீணி ஸீலானீதி இந்த்³ரியஸம்வர-ஆஜீவபாரிஸுத்³தி⁴-பச்சயஸன்னிஸ்ஸித-ஸீலானி. லோகுத்தரமிஸ்ஸகாதி லோகியாபி லோகுத்தராபி ஹோந்தீதி அத்தோ². ஸத்தன்னம் போ³ஜ்ஜ²ங்கா³னந்தி லோகுத்தரானம் ஸத்தன்னம் போ³ஜ்ஜ²ங்கா³னம். மூலபூ⁴தா ஸதிபட்டா²னா புப்³ப³பா⁴கா³, தே ஸந்தா⁴ய வுத்தம் ‘‘சத்தாரோ கோ², குண்ட³லிய, ஸதிபட்டா²னா பா⁴விதா ப³ஹுலீகதா ஸத்த போ³ஜ்ஜ²ங்கே³ பரிபூரேந்தீ’’தி. தேபீதி யதா²வுத்தஸதிபட்டா²னா. ஸதிபட்டா²னமூலகா போ³ஜ்ஜ²ங்கா³தி லோகியஸதிபட்டா²னமூலகா போ³ஜ்ஜ²ங்கா³வ. புப்³ப³பா⁴கா³வாதி ஏத்த² கேசி ‘‘புப்³ப³பா⁴கா³ சா’’தி பாட²ம் கத்வா ‘‘புப்³பே³வ லோகுத்தரா புப்³ப³பா⁴கா³ சா’’தி அத்த²ம் வத³ந்தி. விஜ்ஜாவிமுத்திமூலகாதி ‘‘ஸத்த கோ², குண்ட³லிய, போ³ஜ்ஜ²ங்கா³ பா⁴விதா ப³ஹுலீகதா விஜ்ஜாவிமுத்திம் பரிபூரேந்தீ’’தி ஏவம் வுத்தா போ³ஜ்ஜ²ங்கா³ லோகுத்தராவ விஜ்ஜாவிமுத்திஸஹக³தபா⁴வதோ.

குண்ட³லியஸுத்தாதி³வண்ணனா நிட்டி²தா.