8. து³தியஆமகத⁴ஞ்ஞபேய்யாலவக்³கோ³

8. பீ³ஜகா³மஸுத்தவண்ணனா

1148. ‘‘மூலபீ³ஜ’’ந்திஆதீ³ஸு மூலமேவ பீ³ஜந்தி மூலபீ³ஜம், மூலபீ³ஜம் ஏதஸ்ஸாதிபி மூலபீ³ஜம். தத்த² புரிமேன பீ³ஜகா³மோ வுத்தோ ‘‘பீ³ஜானம் ஸமூஹோ’’தி கத்வா, து³தியேன பூ⁴தகா³மோ. து³விதோ⁴பேஸோ ஸாமஞ்ஞனித்³தே³ஸேன, ‘‘மூலபீ³ஜஞ்ச மூலபீ³ஜஞ்ச மூலபீ³ஜ’’ந்தி ஏகஸேஸனயேன வா பீ³ஜத்தோ² வேதி³தப்³போ³. ஏஸ நயோ ஸேஸேஸுபி. ப²ளுபீ³ஜந்தி பப்³ப³பீ³ஜம். பா³ஹிரபச்சயந்தரஸமவாயே ஸதி³ஸப²லுப்பத்தியா விஸேஸகாரணபா⁴வதோ விருஹனஸமத்தே² ஸாரப²லே நிருள்ஹோ பீ³ஜ-ஸத்³தோ³. தத³த்த²ஸித்³தி⁴யா மூலாதீ³ஸுபி கேஸுசி பவத்ததீதி ததோ நிவத்தனத்த²ம் ஏகேன பீ³ஜ-ஸத்³தே³ன விஸேஸேத்வா வுத்தம் ‘‘பீ³ஜபீ³ஜ’’ந்தி ‘‘ரூபரூபம், து³க்க²து³க்க²’’ந்தி (ஸம். நி. 4.327) ச யதா². நீலதிணருக்கா²தி³கஸ்ஸாதி அல்லதிணஸ்ஸ சேவ அல்லருக்கா²தி³கஸ்ஸ ச. ஆதி³-ஸத்³தே³ன ஓஸதி⁴க³ச்ச²லதாதீ³னம் க³ஹணம்.

9. விகாலபோ⁴ஜனஸுத்தவண்ணனா

1149. அருணுக்³க³மனதோ பட்டா²ய யாவ மஜ்ஜ²ன்ஹிகோ, அயம் பு³த்³தா⁴தி³அரியானம் ஆசிண்ணஸமாசிண்ணோ போ⁴ஜனஸ்ஸ காலோ, தத³ஞ்ஞோ விகாலோதி ஆஹ – ‘‘விகாலபோ⁴ஜனாதி காலாதிக்கந்தபோ⁴ஜனா’’தி.

10. க³ந்த⁴விலேபனஸுத்தவண்ணனா

1150. யம் கிஞ்சி புப்ப²ந்தி க³ந்தி²மம் அக³ந்தி²மம் வா யம் கிஞ்சி புப்ப²ஜாதம், ததா² பிஸிதாதி³பே⁴த³ம் யம் கிஞ்சி க³ந்த⁴ஜாதம்.