5. வாலஸுத்தவண்ணனா

1115. உபாஸனந்தி ஆசரியஉபாஸனம், ஆசரியம் அந்தேவாஸினா வா தி³வஸே தி³வஸே ஸிக்க²னவஸேன உபாஸிதப்³ப³தோ உபாஸனந்தி லத்³த⁴னாமம் கண்ட³கி²பனஸிப்பம். கண்ட³ம் அதிக்கமந்தேதி ஸரம் கி²பந்தே. போங்கா²னுபோங்க²ந்தி போங்க²ஸத்³த³த்த²ம் பாகடம் கத்வா த³ஸ்ஸேதும் ‘‘ஏகம் கண்ட³ம் கி²பித்வா’’திஆதி³ வுத்தம். அபரம் அனுபோங்க²ந்தி ஏத்த² அபரந்தி ததியகண்ட³ம். அனுபோங்க²ம் நாம இத³ந்தி த³ஸ்ஸேதும் ‘‘அனுபோங்க²ம் நாம து³தியஸ்ஸ போங்க²’’ந்தி வுத்தம். தஞ்ஹி ததியேன ஸரேன விஜ்ஜீ²யதி. புன அபரம் தஸ்ஸ போங்க²ந்தி இத³ம் பன அபராபரம் அவிரஜ்ஜ²னம் த³ஸ்ஸேதும் வுத்தம். து³ரபி⁴ஸம்ப⁴வதரந்தி அபி⁴ப⁴விதும் அஸக்குணேய்யதரம். வாலந்தி கேஸம். ஸத்ததா⁴ பி⁴ந்தி³த்வாதி ஸத்தக்க²த்தும் விபா²லேத்வா. தஸ்ஸ ஏகம் பே⁴த³ந்தி தஸ்ஸ கேஸஸ்ஸ ஏகம் அம்ஸுஸங்கா²தம் பே⁴த³ம் க³ஹேத்வா. வாதிங்க³ணமஜ்ஜே² ப³ந்தி⁴த்வாதி வாதிங்க³ணப²லஸ்ஸ மஜ்ஜ²ட்டா²னே ப³ந்தி⁴த்வா. அபரம் பே⁴த³ந்தி அபரம் கேஸஸ்ஸ அம்ஸுஸங்கா²தம் பே⁴த³ம். அக்³க³கோடியம் ப³ந்தி⁴த்வாதி யதா² தஸ்ஸ வாலபே⁴த³ஸ்ஸ ஊகாமத்தம் லிகா²மத்தம் வா கண்ட³ஸ்ஸ அக்³க³கோடிம் அதி⁴கம் ஹுத்வா திட்ட²தி, ஏவம் ப³ந்தி⁴த்வா. உஸப⁴மத்தேதி வீஸதியட்டி²மத்தே டா²னே டி²தோ. கண்ட³ப³த்³தா⁴ய கோடியாதி கண்ட³ப³த்³தா⁴ய வாலஸ்ஸ கோடியா வாதிங்க³ணப³ந்த⁴னவாலஸ்ஸ கோடிம் படிவிஜ்ஜே²ய்ய.