4. துலாகூடஸுத்தவண்ணனா

1164. ரூபகூடம் ஸரூபேன ஸதி³ஸேன ச²லவோஹாரோ. அங்க³கூடம் அத்தனோ ஹத்தா²தி³னா அங்கா³னம் ச²லகரணம். க³ஹணகூடம் மானேஸு க³ஹணவஸேன. படிச்ச²ன்னகூடம் அயசுண்ணாதி³னா படிச்ச²ன்னேன ச²லகரணம். மஹதியா துலாய. பச்சா²பா⁴கே³தி துலாய பச்சி²மபா⁴கே³. ஹத்தே²னாதி ஹத்த²பதே³ஸேன. அக்கமதீதி உட்டா²தும் அதே³ந்தோ க³ண்ஹாதி. த³த³ந்தோ புப்³ப³பா⁴கே³தி பரேஸம் த³த³ந்தோ புப்³ப³பா⁴கே³ ஹத்தே²ன துலம் அக்கமதி. தந்தி அயசுண்ணம்.

லோஹபாதியோதி தம்ப³லோஹபாதியோ. ஸுவண்ணவண்ணா கரோந்தீதி அஸனிகா²த³ஸுவண்ணகனகலிம்பிதா ஸுவண்ணவண்ணா கரோந்தி. மானபா⁴ஜனஸ்ஸ ஹத³யபூ⁴தஸ்ஸ அப்³ப⁴ந்தரஸ்ஸ பி⁴ன்னம் ஹத³யபே⁴தோ³. நிமியமானஸ்ஸ திலதண்டு³லாதி³கஸ்ஸ ஸிகா²ய அக்³க³கோடியா பி⁴ன்னம் ஸிகா²பே⁴தோ³. கே²த்தாதீ³னம் மினனரஜ்ஜுயா அஞ்ஞதா²கரணம் ரஜ்ஜுபே⁴தோ³. ரஜ்ஜுக³ஹணேனேவ சேத்த² த³ண்ட³கஸ்ஸ க³ஹணம் கதமேவாதி த³ட்ட²ப்³ப³ம்.