2. து³தியவக்³கோ³

1-2. இச்சா²னங்க³லஸுத்தாதி³வண்ணனா

987-988. கஸ்மாதிஆதி³ விஹாரஸமாபத்திஆசிக்க²ணே காரணம் விபா⁴வேதும் ஆரத்³த⁴ம்.

ஏவ-வாகாரோதி ஏவ-காரோ வா-காரோ ச. ஏகந்தஸந்தத்தா ஏகந்தேன ஸந்தமனஸிகாரபா⁴வதோ. ஸேக்க²வசனேனேவ தேஸம் ஸிக்கி²தப்³ப³ஸ்ஸ அத்தி²பா⁴வே ஸித்³தே⁴பி ஸிக்கி²தப்³ப³ரஹிதேஸு தேஸுபி ஸேக்க²பரியாயஸ்ஸ வுச்சமானத்தா ஸிக்கி²தப்³ப³ஸத்³தே³ன ஸேக்கே² விஸேஸேத்வா வுத்தா. ஆஸவக்க²யத்த²ம் ஸிக்கி²தப்³ப³ஸ்ஸ அபா⁴வேபி தி³ட்ட²த⁴ம்மஸுக²விஹாரத்த²ம் ஜா²னாதி³ஸிக்க²னேன வினா ஸிக்கி²தப்³பா³பா⁴வா ‘‘அஸேக்கா² நாமா’’தி வுத்தா. பு³த்³தா⁴னம் பன ஸப்³ப³ஸோ ஸம்மதே³வ பரினிட்டி²தஸிக்க²த்தா ‘‘ஸிக்கா²மீ’’தி ந வுத்தம். ஆனாபானஜ்ஜா²னப²லஸமாபத்தி ததா²க³தவிஹாரோ.

3-10. பட²மஆனந்த³ஸுத்தாதி³வண்ணனா

989-996. அனிச்சாதி³வஸேனாதி அனிச்சது³க்கா²னத்தவஸேன. பவிசினதி பகாரேஹி விசினதி. நிக்கிலேஸாதி அபக³தகிலேஸா விக்க²ம்பி⁴தகிலேஸா. பீதிஸம்போ³ஜ்ஜ²ங்கோ³, பஸ்ஸத்³தி⁴ஸம்போ³ஜ்ஜ²ங்கோ³தி பாடோ².

யாய அனோஸக்கனம் அனதிவத்தனஞ்ச ஹோதி, அயம் தத்ரமஜ்ஜ²த்துபேக்கா² மஜ்ஜ²த்தாகாரோதி வுத்தா. ஏகசித்தக்க²ணிகாதி ஏகசித்துப்பாத³பரியாபன்னத்தா.

சத்துன்னம் சதுக்கானம் வஸேன ஸோளஸக்க²த்துகா. ஆனாபானஸன்னிஸ்ஸயேன பவத்தத்தா ஆரம்மணவஸேன பவத்தா ஆனாபானாரம்மணாபி அபரபா⁴கே³ ஸதி ஆனாபானஸ்ஸதீதி பரியாயேன வத்தப்³ப³தம் அரஹதீதி ‘‘ஆனாபானஸ்ஸதி மிஸ்ஸகா கதி²தா’’தி வுத்தம். ஆனாபானமூலகாதி ஆனாபானஸன்னிஸ்ஸயேன பவத்தா ஸதிபட்டா²னா. தேஸம் மூலபூ⁴தாதி தேஸம் ஸதிபட்டா²னானம் மூலகாரணபூ⁴தா. போ³ஜ்ஜ²ங்க³மூலகாதி போ³ஜ்ஜ²ங்க³பச்சயபூ⁴தா. தேபி போ³ஜ்ஜ²ங்கா³தி ஏதே வீஸதி ஸதிபட்டா²னஹேதுகா போ³ஜ்ஜ²ங்கா³. விஜ்ஜாவிமுத்திபூரகாதி ததியவிஜ்ஜாய தஸ்ஸ ப²லஸ்ஸ ச பரிபூரணவஸேன பவத்தா போ³ஜ்ஜ²ங்கா³. ப²லஸம்பயுத்தாதி சதுத்த²ப²லஸம்பயுத்தா, சதுப்³பி³த⁴ப²லஸம்பயுத்தா வா.

து³தியவக்³க³வண்ணனா நிட்டி²தா.

ஆனாபானஸம்யுத்தவண்ணனா நிட்டி²தா.