1. ஏகத⁴ம்மவக்³கோ³

1. ஏகத⁴ம்மஸுத்தவண்ணனா

977. ஏத்தா²தி ஏதஸ்மிம் பட²மஸுத்தே. வுத்தமேவ, தஸ்மா தத்த² வுத்தனயேனேவ வேதி³தப்³ப³ந்தி அதி⁴ப்பாயோ.

6. அரிட்ட²ஸுத்தவண்ணனா

982. நோ-ஸத்³தோ³ புச்சா²யம், தஸ்மா நூதி இமினா ஸமானத்தோ²தி ஆஹ ‘‘பா⁴வேத² நூ’’தி. காமச்ச²ந்தோ³தி வத்து²காமேஸு இச்சா²தி ஆஹ ‘‘பஞ்சகாமகு³ணிகராகோ³’’தி. த்³வாத³ஸஸு ஆயதனத⁴ம்மேஸு ஸபரஸந்ததிபரியாபன்னேஸு. இமினா காமச்ச²ந்த³ப்பஹானகித்தனேன படிக⁴ஸஞ்ஞாபடிவினயகித்தனேன ச அனாகா³மிமக்³க³ம் கதே²தி பஞ்சோரம்பா⁴கி³யஸஞ்ஞோஜனஸமுச்சே²த³ஸ்ஸ ப்³யாகதத்தா. விபஸ்ஸனம் த³ஸ்ஸேந்தோதி ‘‘விபஸ்ஸனம் அனுயுஞ்ஜதா²’’தி த³ஸ்ஸேந்தோ.

8. பதீ³போபமஸுத்தவண்ணனா

984. ‘‘நேவ காயோபி கிலமதி ந சக்கூ²னீ’’தி அட்ட²கதா²யம் பது³த்³தா⁴ரோ கதோ. ‘‘காயோபி கிலமதி, சக்கூ²னிபி விஹஞ்ஞந்தீ’’தி வத்வா யத்த² யதா² ஹோதி, தானி த³ஸ்ஸேதும் ‘‘தா⁴துகம்மட்டா²னஸ்மிம் ஹீ’’திஆதி³ வுத்தம். சக்கூ²னி ப²ந்த³ந்தி கிலமந்தீதிஆதி³ அதிவேலம் உபனிஜ்ஜா²யனே ஹோதீதி கத்வா வுத்தம். இமஸ்மிம் பன கம்மட்டா²னேதி ஆனாபானகம்மட்டா²னே. ஏவமாஹாதி ‘‘பி⁴க்கு² சேபி ஆகங்கே²ய்ய, நேவ காயோ கிலமேய்யா’’தி ஏவமாஹ.

லப்³ப⁴தீதி அட்ட²கதா²தி⁴ப்பாயே ட²த்வா வுத்தம், பரதோ ஆக³தேன தே²ரவாதே³ன ஸோ அனிச்சி²தோ. ந ஹி தாரகரூபமுத்தாவளிகாதி³ஸதி³ஸம் நிமித்தூபட்டா²னாகாரமத்தம் க²ணமத்தட்டா²யினம் கஸிணனிமித்தேஸு விய உக்³கா⁴டனம் காதும் ஸக்கோதி. தேனாஹ ‘‘ந லப்³ப⁴தேவா’’தி. ஆனிஸம்ஸத³ஸ்ஸனத்த²ம் க³ஹிதோ, ஆனாபானஸ்ஸதிஸமாதி⁴ஸ்மிம் ஸித்³தே⁴ அயம் கு³ணோ ஸுகே²னேவ இஜ்ஜ²தீதி. யஸ்மா பி⁴க்கூ²தி இமஸ்மிம் வாரே நாக³தந்தி யதா² புரிமவாரே ‘‘பி⁴க்கு² சேபி ஆகங்கே²ய்யா’’தி ஆக³தம், ஏவம் இத⁴ ‘‘பா⁴விதே கோ², பி⁴க்க²வே, ஆனாபானஸ்ஸதிஸமாதி⁴ம்ஹீ’’தி ஆக³தவாரே பி⁴க்கு²க்³க³ஹணமகதம், தஸ்மா ‘‘ஸோ’’தி ந வுத்தம்.

9. வேஸாலீஸுத்தவண்ணனா

985. பாகாரபரிக்கே²பவட்³ட⁴னேனாதி பாகாரபரிக்கே²பேன பூ⁴மியா வட்³ட⁴னேன. ராஜக³ஹஸாவத்தி²யோ விய இத³ம்பி ச நக³ரம்…பே… ஸப்³பா³காரவேபுல்லதம் பத்தம். அனேகபரியாயேனாதி ஏத்த² பரியாயஸத்³தோ³ காரணவசனோதி ஆஹ ‘‘அனேகேஹி காரணேஹீ’’தி, அயம் காயோ அவிஞ்ஞாணகோபி ஸவிஞ்ஞாணகோபி ஏவம்பி அஸுபோ⁴ ஏவம்பி அஸுபோ⁴தி நானாவிதே⁴ஹி காரணேஹீதி அத்தோ². அஸுபா⁴காரஸந்த³ஸ்ஸனப்பவத்தந்தி கேஸாதி³வஸேன தத்தா²பி வண்ணாதி³தோ அஸுபா⁴காரஸ்ஸ ஸப்³ப³ஸோ த³ஸ்ஸனவஸேன பவத்தம். காயவிச்ச²ந்த³னீயகத²ந்தி அத்தனோ பரஸ்ஸ ச கரஜகாயே விச்ச²ந்த³னுப்பாத³னகத²ம். முத்தம் வாதிஆதி³னா ப்³யதிரேகமுகே²ன காயஸ்ஸ அமனுஞ்ஞதம் த³ஸ்ஸேதி. தத்த² ஆதி³தோ தீஹி பதே³ஹி அத³ஸ்ஸனீயதாய அஸாரகதாய ச, மஜ்ஜே² சதூஹி து³க்³க³ந்த⁴தாய, அந்தே ஏகேன லேஸமத்தேனபி மனுஞ்ஞதாபா⁴வமஸ்ஸ த³ஸ்ஸேதி. அத² கோ²திஆதி³னா அன்வயதோ ஸரூபேனேவ அமனுஞ்ஞதாய த³ஸ்ஸனம். ‘‘கேஸலோமாதீ³’’தி ஸங்கே²பதோ வுத்தமத்த²ம் விபா⁴கே³ன த³ஸ்ஸேதும் ‘‘யேபீ’’திஆதி³ வுத்தம்.

வண்ணேந்தோதி வித்தா²ரேந்தோ. அஸுபா⁴யாதி அஸுப⁴மாதிகாய. பா²திகம்மந்தி ப³ஹுலீகாரோ. கிலேஸசோரேஹி அனபி⁴ப⁴வனீயத்தா ஜா²னம் ‘‘சித்தமஞ்ஜூஸ’’ந்தி வுத்தம். நிஸ்ஸாயாதி பாத³கம் கத்வா.

அபரே பன ‘‘தஸ்மிம் கிர அத்³த⁴மாஸே ந கோசி பு³த்³த⁴வேனேய்யோ அஹோஸி, தஸ்மா ப⁴க³வா ஏவமாஹ – ‘இச்சா²மஹம், பி⁴க்க²வே’திஆதீ³’’தி வத³ந்தி. பரே கிராதி கிர-ஸத்³தோ³ அருசிஸம்ஸூசனத்தோ². தேனாஹ ‘‘இத³ம் பன இச்சா²மத்த’’ந்தி.

அனேககாரணஸம்மிஸ்ஸோதி ஏத்த² காரணம் நாம காயஸ்ஸ அஸுசிது³க்³க³ந்த⁴ஜேகு³ச்ச²படிகூலதாவ. ஸப்³ப³மகம்ஸூதி புது²ஜ்ஜனா நாம ஸாவஜ்ஜேபி தத்த² அனவஜ்ஜஸஞ்ஞினோ ஹுத்வா கரணகாராபனஸமனுஞ்ஞதாபே⁴த³ம் ஸப்³ப³ம் பாபம் அகம்ஸு. காமம் த³ஸானுஸ்ஸதிக்³க³ஹணேனேவ ஆனாபானஸ்ஸதி க³ஹிதா, ஸா பன தத்த² ஸன்னிபதிதபி⁴க்கூ²ஸு ப³ஹூனம் ஸப்பாயா ஸாத்தி²கா ச, தஸ்மா புன க³ஹிதா. ததா² ஹி ப⁴க³வா தமேவ கம்மட்டா²னம் இமஸ்மிம் ஸுத்தே கதே²ஸி. ஆஹாரே படிகூலஸஞ்ஞா அஸுப⁴கம்மட்டா²னஸதி³ஸா, சத்தாரோ பன ஆருப்பா ஆதி³கம்மிகானம் அயோக்³யாதி தேஸம் இத⁴ அக்³க³ஹணம் த³ட்ட²ப்³ப³ம்.

வேஸாலிம் உபனிஸ்ஸாயாதி வேஸாலீனக³ரம் கோ³சரகா³மம் கத்வா. முஹுத்தேனேவாதி ஸத்த²ரி ஸத்³த⁴ம்மே ச கா³ரவேன உபக³தபி⁴க்கூ²னம் வசனஸமனந்தரமேவ உட்ட²ஹிம்ஸூதி கத்வா வுத்தம். பு³த்³த⁴காலே கிர பி⁴க்கூ² ப⁴க³வதோ ஸந்தே³ஸம் ஸிரஸா ஸம்படிச்சி²தும் ஓஹிதஸோதா விஹரந்தி.

ஆனாபானபரிக்³கா³ஹிகாயாதி அஸ்ஸாஸபஸ்ஸாஸே பரிக்³க³ண்ஹனவஸேன பவத்தாய ஸதியா. ஸம்பயுத்தோ ஸமாதீ⁴தி தாய ஸம்பயுத்தஅஞ்ஞமஞ்ஞபச்சயபூ⁴தாய உப்பன்னோ ஸமாதி⁴. ஆனாபானஸ்ஸதியம் வா ஸமாதீ⁴தி இமினா உபனிஸ்ஸயபச்சயஸபா⁴வம்பி த³ஸ்ஸேதி, உப⁴யத்தா²பி ஸஹஜாதாதீ³னம் ஸத்தன்னம்பி பச்சயானம் வஸேன பச்சயபா⁴வம் த³ஸ்ஸேதி. ‘‘யதா²படிபன்னா மே ஸாவகா சத்தாரோ ஸதிபட்டா²னே பா⁴வேந்தீ’’திஆதீ³ஸு உப்பாத³னவட்³ட⁴னட்டே²ன பா⁴வனாதி வுச்சதீதி தது³ப⁴யவஸேன அத்த²ம் த³ஸ்ஸேந்தோ ‘‘பா⁴விதோதி உப்பாதி³தோ வட்³டி⁴தோ வா’’தி ஆஹ. தத்த² பா⁴வம் விஜ்ஜமானதம் இதோ க³தோதி பா⁴விதோ, உப்பாதி³தோ படிலத்³த⁴மத்தோதி அத்தோ². உப்பன்னோ பன லத்³தா⁴ஸேவனோ பா⁴விதோ, பகு³ணபா⁴வம் ஆபாதி³தோ வட்³டி⁴தோதி அத்தோ². ப³ஹுலீகதோதி ப³ஹுலம் பவத்திதோ. தேன ஆவஜ்ஜனாதி³வஸீபா⁴வப்பத்திமாஹ. யோ ஹி வஸீபா⁴வமாபாதி³தோ, ஸோ இச்சி²திச்சி²தக்க²ணே ஸமாபஜ்ஜிதப்³ப³தோ புனப்புனம் பவத்திஸ்ஸதி. தேன வுத்தம் ‘‘புனப்புனம் கதோ’’தி. யதா² ‘‘இதே⁴வ, பி⁴க்க²வே, ஸமணோ (ம. நி. 1.139; அ. நி. 4.241), விவிச்சேவ காமேஹீ’’தி (தீ³. நி. 1.226; ம. நி. 1.271; ஸம். நி. 2.152; அ. நி. 4.123) ச ஏவமாதீ³ஸு பட²மபதே³ வுத்தோ ஏவ-ஸத்³தோ³ து³தியாதீ³ஸுபி வுத்தோயேவ ஹோதி, ஏவமிதா⁴பீதி ஆஹ ‘‘உப⁴யத்த² ஏவஸத்³தே³ன நியமோ வேதி³தப்³போ³’’தி. உப⁴யத்த² நியமேன லத்³த⁴கு³ணம் த³ஸ்ஸேதும் ‘‘அயம் ஹீ’’திஆதி³ வுத்தம்.

அஸுப⁴கம்மட்டா²னந்தி அஸுபா⁴ரம்மணம் ஜா²னமாஹ. தஞ்ஹி அஸுபே⁴ஸு யோக³கம்மபா⁴வதோ யோகி³னோ ஸுக²விஸேஸானம் காரணபா⁴வதோ ச ‘‘அஸுப⁴கம்மட்டா²ன’’ந்தி வுச்சதி. கேவலந்தி இமினா ஆரம்மணம் நிவத்தேதி. படிவேத⁴வஸேனாதி ஜா²னபடிவேத⁴வஸேன. ஜா²னஞ்ஹி பா⁴வனாவிஸேஸேன இஜ்ஜ²ந்தம் அத்தனோ விஸயம் படிவிஜ்ஜ²ந்தமேவ பவத்ததி யதா²ஸபா⁴வதோ படிவிஜ்ஜி²யதி சாதி படிவேதோ⁴தி வுச்சதி. ஓளாரிகாரம்மணத்தாதி பீ³ப⁴ச்சா²ரம்மணத்தா. படிகூலாரம்மணத்தாதி ஜிகு³ச்சி²தப்³பா³ரம்மணத்தா. பரியாயேனாதி காரணேன, லேஸந்தரேன வா. ஆரம்மணஸந்ததாயாதி அனுக்கமேன விசிதப்³ப³தம் பத்தாரம்மணஸ்ஸ பரமஸுகு²மதம் ஸந்தா⁴யாஹ. ஸந்தேஹி ஸன்னிஸின்னே ஆரம்மணே பவத்தமானோ த⁴ம்மோ ஸயம்பி ஸன்னிஸின்னோவ ஹோதி. தேனாஹ ‘‘ஸந்தோ வூபஸந்தோ நிப்³பு³தோ’’தி, நிப்³பு³தஸப்³ப³பரிளாஹோதி அத்தோ². ஆரம்மணஸந்ததாய ததா³ரம்மணானம் த⁴ம்மானம் ஸந்ததா லோகுத்தரத⁴ம்மாரம்மணாஹி பச்சவேக்க²ணாஹி வேதி³தப்³பா³.

நாஸ்ஸ ஸந்தபணீதபா⁴வாவஹம் கிஞ்சி ஸேசனந்தி அஸேசனகோ. அஸேசனகத்தா அனாஸித்தகோ, அனாஸித்தகத்தா ஏவ அப்³போ³கிண்ணோ, அஸம்மிஸ்ஸோ பரிகம்மாதி³னா. ததோ ஏவ பாடியேக்கோ விஸும்யேவேகோ. ஆவேணிகோ அஸாதா⁴ரணோ. ஸப்³ப³மேதம் ஸரஸதோ ஏவ ஸந்தபா⁴வம் த³ஸ்ஸேதும் வுத்தம், பரிகம்மம் வா ஸந்தபா⁴வனிமித்தம். பரிகம்மந்தி ச கஸிணகரணாதி³னிமித்துப்பாத³பரியோஸானம், தாதி³ஸம் ஏத்த² நத்தீ²தி அதி⁴ப்பாயோ. ததா³ ஹி கம்மட்டா²னம் நிரஸ்ஸாத³த்தா அஸந்தம் அப்பணீதம் ஸியா. உபசாரே வா நத்தி² ஏத்த² ஸந்ததாதி யோஜனா. யதா² உபசாரக்க²ணே நீவரணாதி³விக³மேன அங்க³பாதுபா⁴வேன ச பரேஸம் ஸந்ததா ஹோதி, ந ஏவமிமஸ்ஸ. அயம் பன ஆதி³ஸமன்னா…பே… பணீதோ சாதி யோஜனா. கேசீதி உத்தரவிஹாரவாஸினோ. அனாஸித்தகோதி உபஸேசனேன அனாஸித்தகோ. தேனாஹ – ‘‘ஓஜவந்தோ’’தி ஓஜவந்தஸதி³ஸோதி அத்தோ². மது⁴ரோதி இட்டோ². சேதஸிகஸுக²படிலாப⁴ஸம்வத்தனம் திகசதுக்கஜ்ஜா²னவஸேன, உபேக்கா²ய வா ஸந்தபா⁴வேன ஸுக²க³திகத்தா ஸப்³பே³ஸம்பி ஜா²னானம் வஸேன வேதி³தப்³ப³ம். ஜா²னஸமுட்டா²னபணீதரூபபு²ட்ட²ஸரீரதாவஸேன பன காயிகஸுக²படிலாப⁴ஸம்வத்தனம் த³ட்ட²ப்³ப³ம், தஞ்ச கோ² ஜா²னதோ வுட்டி²தகாலே. இமஸ்மிம் பக்கே² ‘‘அப்பிதப்பிதக்க²ணே’’தி இத³ம் ஹேதும்ஹி பு⁴ம்மவசனம் த³ட்ட²ப்³ப³ம்.

அவிக்க²ம்பி⁴தேதி ஜா²னேன ஸகஸந்தானதோ அனீஹதே அப்பஹீனே. அகோஸல்லஸம்பூ⁴தேதி அகோஸல்லம் வுச்சதி அவிஜ்ஜா, ததோ ஸம்பூ⁴தே. அவிஜ்ஜாபுப்³ப³ங்க³மா ஹி ஸப்³பே³ பாபத⁴ம்மா. க²ணேனேவாதி அத்தனோ பவத்திக்க²ணேனேவ. அந்தரதா⁴பேதீதி ஏத்த² அந்தரதா⁴பனம் வினாஸனம், தம் பன ஜா²னகத்துகம் இதா⁴தி⁴ப்பேதந்தி பரியுட்டா²னப்பஹானம் ஹோதீதி ஆஹ – ‘‘விக்க²ம்பே⁴தீ’’தி. வூபஸமேதீதி விஸேஸேன உபஸமேதி. விஸேஸேன உபஸமனம் பன ஸம்மதே³வ உபஸமனம் ஹோதீதி ஆஹ ‘‘ஸுட்டு² உபஸமேதீ’’தி. ஸாஸனிகஸ்ஸ ஜா²னபா⁴வனா யேபு⁴ய்யேன நிப்³பே³த⁴பா⁴கி³யா ஹோதீதி ஆஹ ‘‘நிப்³பே³த⁴பா⁴கி³யத்தா’’தி. அரியமக்³க³ஸ்ஸ பாத³கபூ⁴தோ அயம் ஸமாதி⁴ அனுக்கமேன வட்³டி⁴த்வா அரியமக்³க³பா⁴வம் உபக³தோ விய ஹோதீதி ஆஹ ‘‘அனுபுப்³பே³ன அரியமக்³க³வுட்³டி⁴ப்பத்தோ’’தி. அயம் பனத்தோ² விராக³னிரோத⁴படினிஸ்ஸக்³கா³னுபஸ்ஸனானம் வஸேன ஸம்மதே³வ யுஜ்ஜதி. ஸேஸம் ஸுவிஞ்ஞேய்யமேவ.

10. கிமிலஸுத்தவண்ணனா

986. தே²ரோதி ஆனந்த³த்தே²ரோ. அயம் தே³ஸனாதி ‘‘கத²ம் விபா⁴விதோ நு கோ² கிமிலா’’திஆதி³னா பவத்தா தே³ஸனா. காயஞ்ஞதரந்தி ரூபகாயே அஞ்ஞதரகோட்டா²ஸே. ஏவந்தி யதா² ஆனாபானம் அனுஸ்ஸரந்தோ பி⁴க்கு² காயே காயானுபஸ்ஸீ ஜாதோ, ஏவம் ஸப்³ப³த்த² வாரேஸு வேத³னானுபஸ்ஸீதிஆதி³ அத்தோ² வேதி³தப்³போ³.

தே³ஸனாஸீஸந்தி தே³ஸனாபதே³ஸம். மனஸிகாரபதே³ஸேன வேத³னா வுத்தாதி தம் ஸப்³ப³ம் ஸரூபதோ அஞ்ஞாபதே³ஸதோ அபதி³ஸதி. யதே²வ ஹீதிஆதி³னா தத்த² நித³ஸ்ஸனம் த³ஸ்ஸேதி. சித்தஸங்கா²ரபத³த்³வயேதி ‘‘சித்தஸங்கா²ரபடிஸம்வேதீ³ பஸ்ஸம்ப⁴யம் சித்தஸங்கா²ர’’ந்தி ஏதஸ்மிம் பத³த்³வயே.

ஏவம் ஸந்தேபீதி பீதிமனஸிகாரசித்தஸங்கா²ரபதே³ஸேன யதி³ வேத³னா வுத்தா, ஏவம் ஸந்தேபி. ஏஸா யதா²வுத்தா வேத³னா ஆரம்மணம் ந ஹோதி. வேத³னாரம்மணா ச அனுபஸ்ஸனா, தஸ்மா வேத³னானுபஸ்ஸனா ந யுஜ்ஜதி. யதி³ ஏவம் மஹாஸதிபட்டா²னாதீ³ஸு ‘‘வேத³னா வேதி³யதீ’’தி வுத்தம், தம் கத²ந்தி ஆஹ – ‘‘மஹாஸதிபட்டா²னாதீ³ஸுபீ’’திஆதி³. தத்த² ஸுகா²தீ³னம் வத்து²ந்தி ஸுகா²தீ³னம் உப்பத்தியா வத்து²பூ⁴தம் ரூபஸத்³தா³தி³ம் ஆரம்மணம் கத்வா வேத³னா வேதி³யதி, ந புக்³க³லோ புக்³க³லஸ்ஸேவ அபா⁴வதோ. வேத³னாப்பவத்திம் உபாதா³ய நிஸ்ஸாய யதா² ‘‘புக்³க³லோ வேத³னம் வேதி³யதீ’’தி வோஹாரமத்தம் ஹோதி. ஏவம் இதா⁴பி வேத³னாய அஸ்ஸாஸபஸ்ஸாஸே ஆரப்³ப⁴ பவத்தி, ததா² பவத்தமனஸிகாரஸீஸேன ‘‘வேத³னாஸு வேத³னானுபஸ்ஸீ பி⁴க்கு² தஸ்மிம் ஸமயே விஹரதீ’’தி வுத்தோ. தம் ஸந்தா⁴யாதி தம் வேத³னாய ஆரம்மணபா⁴வம் ஸந்தா⁴ய. ஆதீ³னம் பதா³னம். ஏதஸ்ஸ ‘‘வேத³னானுபஸ்ஸனா ந யுஜ்ஜதீ’’தி வுத்தஅனுயோக³ஸ்ஸ.

ஸப்பீதிகே த்³வே ஜா²னே ஸமாபஜ்ஜதீதி பீதிஸஹக³தானி பட²மது³தியஜ்ஜா²னானி படிபாடியா ஸமாபஜ்ஜதி. தஸ்ஸாதி தேன. படிஸம்விதி³தஸத்³தா³பேக்கா²ய ஹி கத்துஅத்தே² ஏதம் ஸாமிவசனம். ஸமாபத்திக்க²ணேதி ஸமாபஜ்ஜனக்க²ணே. ஜா²னபடிலாபே⁴னாதி ஜா²னேன ஸமங்கீ³பா⁴வேன. ஆரம்மணதோதி ஆரம்மணமுகே²ன ததா³ரம்மணஜா²னபரியாபன்னா பீதி படிஸம்விதி³தா ஹோதி, ஆரம்மணஸ்ஸ படிஸம்விதி³தத்தாதி வுத்தம் ஹோதி. யதா² நாம ஸப்பபரியேஸனம் சரந்தேன தஸ்ஸ ஆஸயே படிஸம்விதி³தே ஸோபி படிஸம்விதி³தோ ஹோதி மந்தாக³த³ப³லேன தஸ்ஸ க³ஹணஸ்ஸ ஸுகரத்தா, ஏவம் பீதியா ஆஸயபூ⁴தே ஆரம்மணே படிஸம்விதி³தே ஸா பீதி படிஸம்விதி³தாவ ஹோதி ஸலக்க²ணதோ ஸாமஞ்ஞலக்க²ணதோ ச தஸ்ஸா க³ஹணஸ்ஸ ஸுகரத்தா. விபஸ்ஸனக்க²ணேதி விபஸ்ஸனாபஞ்ஞாய திக்க²விஸத³பா⁴வப்பத்தாய விஸயதோ த³ஸ்ஸனக்க²ணே. லக்க²ணப்படிவேதே⁴னாதி பீதியா ஸலக்க²ணஸ்ஸ ஸாமஞ்ஞலக்க²ணஸ்ஸ ச படிவிஜ்ஜ²னேன. யஞ்ஹி பீதியா விஸேஸதோ ஸாமஞ்ஞதோ ச லக்க²ணம், தஸ்மிம் விதி³தே ஸா யாதா²வதோ விதி³தா ஏவ ஹோதி. தேனாஹ ‘‘அஸம்மோஹதோ பீதி படிஸம்விதி³தா ஹோதீ’’தி.

இதா³னி தமத்த²ம் பாளியா ஏவ விபா⁴வேதும் ‘‘வுத்தஞ்ஹேத’’ந்திஆதி³மாஹ. தத்த² தீ³க⁴ம் அஸ்ஸாஸவஸேனாதி தீ³க⁴ஸ்ஸ அஸ்ஸாஸஸ்ஸ ஆரம்மணபூ⁴தஸ்ஸ வஸேன. பஜானதோ ஸா பீதி படிஸம்விதி³தா ஹோதீதி ஸம்ப³ந்தோ⁴. சித்தஸ்ஸ ஏகக்³க³தம் அவிக்கே²பம் பஜானதோதி ஜா²னபரியாபன்னம் ‘‘அவிக்கே²போ’’தி லத்³த⁴னாமம் சித்தஸ்ஸேகக்³க³தம் தம்ஸம்பயுத்தாய பஞ்ஞாய பஜானதோ. யதா² ஹி ஆரம்மணமுகே²ன பீதி படிஸம்விதி³தா ஹோதி, ஏவம் தம்ஸம்பயுத்தத⁴ம்மாபி ஆரம்மணமுகே²ன படிஸம்விதி³தா ஏவ ஹோந்தீதி. ஸதி உபட்டி²தா ஹோதீதி தீ³க⁴ம் அஸ்ஸாஸவஸேன ஜா²னஸம்பயுத்தா ஸதி தஸ்மிம் ஆரம்மணே உபட்டி²தா ஆரம்மணமுகே²ன ஜா²னேபி உபட்டி²தா நாம ஹோதி. தாய ஸதியாதி ஏவம் உபட்டி²தாய தாய ஸதியா யதா²வுத்தேன தேன ஞாணேன ஸுப்படிவிதி³தத்தா ஆரம்மணஸ்ஸ தஸ்ஸ வஸேன ததா³ரம்மணா ஸா பீதி படிஸம்விதி³தா ஹோதி. தீ³க⁴ம் பஸ்ஸாஸவஸேனாதிஆதீ³ஸுபி இமினாவ நயேன அத்தோ² வேதி³தப்³போ³. தேன வுத்தம் ‘‘ஏதேனேவ நயேன அவஸேஸபதா³னிபி அத்த²தோ வேதி³தப்³பா³னீ’’தி.

யதே²வாதிஆதீ³ஸு அயம் ஸங்கே²பத்தோ² – ஜா²னபடிலாபே⁴ன யதா² ஆரம்மணதோ பீதிஆத³யோ படிஸம்விதி³தா ஹோந்தி தேன வினா தேஸம் அப்பவத்தனதோ. ஏவம் ஜா²னஸம்பயுத்தேன தம்பரியாபன்னேன வேத³னாஸங்கா²தமனஸிகாரபடிலாபே⁴ன ஆரம்மணதோ வேத³னா படிஸம்விதி³தா ஹோதி அருணுக்³க³மேன விய ஸூரியஸ்ஸ தேன வினா வேத³னாய அப்பவத்தனதோ. தஸ்மா வுத்தனயேன அதிஸயப்பவத்தி வேத³னா ஸுப்படிவிதி³தா, தஸ்மா ஸுவுத்தமேதந்தி புப்³பே³ வுத்தசோத³னம் நிராகரோதி.

ஆரம்மணேதி அஸ்ஸாஸபஸ்ஸாஸனிமித்தம் வத³தி. சித்தானுபஸ்ஸீயேவ நாமேஸ ஹோதி அஸம்மோஹதோ சித்தஸ்ஸ படிஸம்விதி³தத்தா. தேனாஹ ‘‘தஸ்மா’’திஆதி³. சித்தபடிஸம்விதி³தவஸேனாதி ஆதி³-ஸத்³தே³ன இதரா திஸ்ஸோபி சித்தானுபஸ்ஸனா ஸங்க³ண்ஹாதி.

ஸோதி த⁴ம்மானுபஸ்ஸனம் அனுயுத்தோ பி⁴க்கு². யம் தம் பஹானம் பஹாயகஞாணம். பஞ்ஞாயாதி அபராய விபஸ்ஸனாபஞ்ஞாய அனிச்சவிராகா³தி³தோ தி³ஸ்வா து³விதா⁴யபி அஜ்ஜு²பேக்கி²தா ஹோதி. இத³ஞ்ஹி சதுக்கந்தி அனிச்சானுபஸ்ஸனாதி³வஸேன வுத்தம் சதுக்கம். தஸ்ஸாபி த⁴ம்மானுபஸ்ஸனாய. பஜஹதீதி பஹானந்தி ஆஹ ‘‘நிச்சஸஞ்ஞம்…பே… பஹானகரஞாணம் அதி⁴ப்பேத’’ந்தி. விபஸ்ஸனாபரம்பரந்தி படிபாடியா விபஸ்ஸனமாஹ. பத²படிபன்னம் அஜ்ஜு²பேக்க²தீதி மஜ்ஜி²மாய படிபத்தியா ஸம்மதே³வ வீதி²படிபன்னம் பா⁴வனாசித்தம் பக்³க³ஹனிக்³க³ஹானம் அகரணேன அஜ்ஜு²பேக்க²தி. ஏகதோ உபட்டா²னந்தி யஸ்மா மஜ்ஜி²மஸமத²வீதி²னாதிவத்தியா தத்த² ச பக்க²ந்த³னேன இந்த்³ரியானம் ஏகரஸபா⁴வேன, தத்ரமஜ்ஜ²த்ததாய பா⁴வதோ அவிஸேஸம் ஏகக்³க³பா⁴வூபக³மனேன ஏகந்ததோ உபட்டா²தி, தஸ்மா ந தத்த² கிஞ்சி காதப்³ப³ந்தி அஜ்ஜு²பேக்க²தி. தத்தா²தி ஏவம் அஜ்ஜு²பேக்க²னே. ஸஹஜாதானம்பி அஜ்ஜு²பேக்க²னா ஹோதி தேஸம் பவத்தனாகாரஸ்ஸ அஜ்ஜு²பேக்க²னதோ. ‘‘பஞ்ஞாய தி³ஸ்வா’’தி வுத்தத்தா ஆரம்மணஅஜ்ஜு²பேக்க²னா அதி⁴ப்பேதா. ந கேவலம் நீவரணாதி³த⁴ம்மே அஜ்ஜு²பேக்கி²தா, அத² கோ² அபி⁴ஜ்ஜா² …பே… பஞ்ஞாய தி³ஸ்வா அஜ்ஜு²பேக்கி²தா ஹோதீதி யோஜனா.

பம்ஸுபுஞ்ஜட்டா²னியஸ்ஸ கிலேஸஸ்ஸ உப்பத்திட்டா²னத³ஸ்ஸனத்த²ம் ‘‘சதுமஹாபதோ² விய ச² ஆயதனானி’’இச்சேவ வுத்தம். காயாத³யோ சத்தாரோ ஆரம்மணஸதிபட்டா²னா. சதூஸு ஆரம்மணேஸூதி காயாதீ³ஸு சதூஸு ஆரம்மணேஸு பவத்தா சத்தாரோ ஸதிபட்டா²னா பம்ஸுபுஞ்ஜட்டா²னியஸ்ஸ கிலேஸஸ்ஸ உபஹனனதோ.

ஏகத⁴ம்மவக்³க³வண்ணனா நிட்டி²தா.