9. அஸங்க²தஸம்யுத்தம்

1. பட²மவக்³கோ³

1-11. காயக³தாஸதிஸுத்தாதி³வண்ணனா

366-376. அஸங்க²தந்தி ந ஸங்க²தம் ஹேதுபச்சயேதி. தேனாஹ ‘‘அகத’’ந்தி. ஹிதம் ஏஸந்தேனாதி மேத்தாயந்தேன. அனுகம்பமானேனாதி கருணாயந்தேன. உபாதா³யாதி ஆதி³யித்வாதி அயமத்தோ²திஆஹ ‘‘சித்தேன பரிக்³க³ஹேத்வா’’தி. அவிபரீதத⁴ம்மதே³ஸனாதி அவிபரீதத⁴ம்மஸ்ஸ தே³ஸனா, படிபத்திம்பி ஸாவகா விய க³ருகோ ப⁴க³வா. தா³யஜ்ஜம் அத்தனோ அதி⁴ட்டி²தம் நிய்யாதேதி.

பி⁴க்கா²ஸம்பத்திகாலாதீ³னம் ஸத்தன்னம் ஸப்பாயானம் ஸம்பத்தியா லப்³ப⁴னகாலே. விபத்திகாலே பன ஏத்த² வுத்தவிபரியாயேன அத்தோ² வேதி³தப்³போ³. பா⁴ரியந்தி து³க்க²ப³ஹுலதாய தா³ருணம். அம்ஹாகம் ஸந்திகா லத்³த⁴ப்³பா³. தும்ஹாகம் அனுஸாஸனீதி தும்ஹாகம் தா³தப்³பா³ அனுஸாஸனீ.

காயக³தாஸதிஸுத்தாதி³வண்ணனா நிட்டி²தா.

2. து³தியவக்³கோ³

23-33. அஸங்க²தஸுத்தாதி³வண்ணனா

377-409. தத்த² ச நத்தி² ஏத்த² தண்ஹாஸங்கா²தம் நதம், நத்தி² ஏதஸ்மிம் வா அதி⁴க³தே புக்³க³லபா⁴வோதி அனதம். அனாஸவந்தி ஏத்தா²பி ஏஸேவ நயோ. ஸச்சத⁴ம்மதாய ஸச்சம். வட்டது³க்க²தோ பாரமேதீதி பாரம். ஸண்ஹட்டே²னாதி ஸுகு²மட்டே²ன நிபுணம். ததோ ஏவ து³த்³த³ஸதாய. அஜஜ்ஜரம் நிச்சஸபா⁴வத்தா. நத்தி² ஏதஸ்ஸ நித³ஸ்ஸனந்தி வா அனித³ஸ்ஸனம். ஏதஸ்மிம் அதி⁴க³தே நத்தி² ஸம்ஸாரே. பபஞ்சந்தி வா நிப்பபஞ்சம்.

ஏதஸ்மிம் அதி⁴க³தே புக்³க³லஸ்ஸ மரணம் நத்தீ²தி வா அமதம். அதப்பகட்டே²ன வா பணீதம். ஸுக²ஹேதுதாய வா ஸிவம். தண்ஹா கீ²யந்தி ஏத்தா²தி தண்ஹக்க²யம்.

அஞ்ஞஸ்ஸ தாதி³ஸஸ்ஸ அபா⁴வதோ விம்ஹாபனீயதாய அபூ⁴தமேவாதி. குதோசி பச்சயதோ அனிப்³ப³த்தமேவ ஹுத்வா பூ⁴தம் விஜ்ஜமானம். தேனாஹ ‘‘அஜாதம் ஹுத்வா அத்தீ²’’தி. நத்தி² ஏத்த² து³க்க²ந்தி நித்³து³க்க²ம், தஸ்ஸ பா⁴வோ நித்³து³க்க²த்தம். தஸ்மா அனீதிகம் ஈதிரஹிதம். வானம் வுச்சதி தண்ஹா, தத³பா⁴வேன நிப்³பா³னம். ப்³யாப³ஜ்ஜ²ம் வுச்சதி து³க்க²ம், தத³பா⁴வேன அப்³யாப³ஜ்ஜ²ம். பரமத்த²தோ ஸச்சதோ ஸுத்³தி⁴பா⁴வேன. காமா ஏவ புது²ஜ்ஜனேஹி அல்லீயிதப்³ப³தோ ஆலயா. ஏஸ நயோ ஸேஸேஸுபி. பதிட்ட²ட்டே²னாதி பதிட்டா²பா⁴வேன வட்டது³க்க²தோ முச்சிதுகாமானம் தீ³பஸதி³ஸம் ஓகே⁴ஹி அனஜ்ஜோ²த்த²ரணீயத்தா. அல்லீயிதப்³ப³யுத்தட்டே²னாதி அல்லீயிதும் அரஹபா⁴வதோ. தாயனட்டே²னாதி ஸபரதாயனட்டே²ன. ப⁴யஸரணட்டே²னாதி ப⁴யஸ்ஸ ஹிம்ஸனட்டே²ன. ஸேட்ட²ம் உத்தமம். க³தீதி க³ந்த⁴ப்³ப³ட்டா²னம்.

அஸங்க²தஸுத்தாதி³வண்ணனா நிட்டி²தா.

அஸங்க²தஸம்யுத்தவண்ணனா நிட்டி²தா.