8. கா³மணிஸம்யுத்தம்

1. சண்ட³ஸுத்தவண்ணனா

353. ‘‘யேன மிதே⁴கச்சோ சண்டோ³ சண்டோ³த்வேவ ஸங்க²ம் க³ச்ச²தீ’’தி ஏவம் பஞ்ஹபுச்ச²னேன த⁴ம்மஸங்கா³ஹகத்தே²ரேஹி சண்டோ³தி க³ஹிதனாமோ. பாகடம் கரோதீதி த³ஸ்ஸேதி அத்தனோ சண்ட³பா⁴வம்.

சண்ட³ஸுத்தவண்ணனா நிட்டி²தா.

2. தாலபுடஸுத்தவண்ணனா

354. வாலோதி வுச்சதி தாலோ, தஸ்ஸ தாலபுடம் நாம. யதா² ஆமலகீப²லஸமானகம், ஸோ பன தாலஸதி³ஸமுக²வண்ணத்தா தாலபுடோதி ஏவம்னாமகோ. தேனாஹ ‘‘தஸ்ஸ கிரா’’திஆதி³. அபி⁴னீஹாரஸம்பன்னோ அனேகேஸு கப்பேஸு ஸம்ப⁴தஸாவகபோ³தி⁴ஸம்பா⁴ரோ. ததா² ஹேஸ அஸீதியா மஹாஸாவகேஸு அப்³ப⁴ந்தரோ ஜாதோ. ஸஹஸ்ஸம் தே³ந்தி நச்சம் பஸ்ஸிதுகாமா. ஸமஜ்ஜவேஸந்தி நேபச்சவேஸம். கீளம் கத்வாதி நச்சகீளிதம் கீளித்வா, நச்சித்வாதி அத்தோ².

புப்³பே³ ததா²பவத்தவுத்தந்தத³ஸ்ஸனே ஸச்சேன, தப்³பி³பரியாயே அலிகேன. ராக³பச்சயாதி ராகு³ப்பத்தியா காரணபூ⁴தா. முக²தோ…பே… த³ஸ்ஸனாத³யோதி ஆதி³-ஸத்³தே³ன முக²தோ அக்³கி³ஜாலனிக்க²மத³ஸ்ஸனாதி³கே ஸங்க³ண்ஹாதி. அஞ்ஞே ச…பே… அபி⁴னயாதி காமஸ்ஸாத³ஸம்யுத்தானம் ஸிங்கா³ரஹஸ்ஸஅப்³பு⁴தரஸானஞ்சேவ ‘‘அஞ்ஞே சா’’தி வுத்தஸந்தபீ³ப⁴ச்ச²ரஸானஞ்ச த³ஸ்ஸனகா அபி⁴னயா. தோ³ஸபச்சயாதி தோ³ஸுப்பத்தியா காரணபூ⁴தா. ஹத்த²பாத³ச்சே²தா³தீ³தி ஆதி³-ஸத்³தே³ன ஸங்க³ஹிதானம் ருத்³த³வீரப⁴யானகரஸானம் த³ஸ்ஸனகா அபி⁴னயா. மோஹபச்சயாதி மோஹுப்பத்தியா காரணபூ⁴தா. ஏவமாத³யோதி ஆதி³-ஸத்³தே³ன ஸங்க³ஹிதானம் கருணாஸந்தப⁴யானகரஸானம் த³ஸ்ஸனகா அபி⁴னயா. தே ஹி ரஸே ஸந்தா⁴ய பாளியம் ‘‘யே த⁴ம்மா ரஜனீயா, யே த⁴ம்மா தோ³ஸனீயா, யே த⁴ம்மா மோஹனீயா’’தி ச வுத்தம்.

நடவேஸம் க³ஹேத்வாவ பச்சந்தி கம்மஸரிக்க²விபாகவஸேன. தம் ஸந்தா⁴யாதி தம் யதா²வுத்தம் நிரயே பச்சனம் ஸந்தா⁴ய. ஏதம் ‘‘பஹாஸோ நாம நிரயோ, தத்த² உபபஜ்ஜதீ’’தி வுத்தம். யதா² லோகே அத்த²விஸேஸவஸேன ஸகம்மகானிபி பதா³னி அகம்மகானி ப⁴வந்தி ‘‘விமுச்சதி புரிஸோ’’தி, ஏவம் இத⁴ அத்த²விஸேஸவஸேன அகம்மகம் ஸகம்மகம் கத்வா வுத்தம் – ‘‘நாஹம், ப⁴ந்தே, ஏதம் ரோதா³மீ’’தி. கோ பன ஸோ அத்த²விஸேஸோ? அஸஹனம் அக்க²மனம், தஸ்மா ந ரோதா³மி ந ஸஹாமி, ந அக்க²மாமீதி அத்தோ². ரோத³னகாரணஞ்ஹி அஸஹந்தோ தேன அபி⁴பூ⁴தோ ரோத³தி. தமேவஸ்ஸ ஸகம்மகபா⁴வஸ்ஸ காரணபூ⁴தம் அத்த²விஸேஸம் ‘‘ந அஸ்ஸுவிமோசனமத்தேனா’’தி வுத்தம். மதம் வா, அம்ம, ரோத³ந்தீதி ஏத்தா²பி மதம் ரோத³ந்தி, தஸ்ஸ மரணம் ந ஸஹந்தி, நக்க²மந்தீதி பாகடோயமத்தோ²தி.

தாலபுடஸுத்தவண்ணனா நிட்டி²தா.

3-5. யோதா⁴ஜீவஸுத்தாதி³வண்ணனா

355-357. யுஜ்ஜ²னம் யோதோ⁴, ஸோ ஆஜீவோ ஏதஸ்ஸாதி யோதா⁴ஜீவோ. தேனாஹ – ‘‘யுத்³தே⁴ன ஜீவிகம் கப்பனகோ’’தி, உஸ்ஸாஹம் வாயாமம் கரோதீதி யுஜ்ஜ²னவஸேன உஸ்ஸாஹம் வாயாமம் கரோதி. பரியாபாதே³ந்தீதி மரணபரியந்திகம் ஆபத³ம் பாபேந்தி. தேனாஹ ‘‘மரணம் படிபஜ்ஜாபேந்தீ’’தி. து³ட்டு² ட²பிதந்தி து³ட்டா²காரேன அத்தனோ பரேஸஞ்ச அத்தா²வஹபா⁴வம் ந க³தம் படிபன்னம். பரேஹி ஸங்கா³மே ஜிதா ஹதா ஏத்த² ஜாயந்தீதி பரஜிதோ நாம நிரயோ. அஸித⁴னுக³தா³யஸங்குசக்கானி பஞ்சாவுதா⁴னி. தம் ஸந்தா⁴யாதி தம் யோதா⁴ஜீவம் புக்³க³லம் ஸந்தா⁴ய. ஏதம் ‘‘யோ ஸோ’’திஆதி³ வுத்தம். சதுத்த²பஞ்சமேஸூதி ஹத்தா²ரோஹஅஸ்ஸாரோஹஸுத்தேஸு. ஏஸேவ நயோதி ஏஸோ ததியே வுத்தோ ஏவ அத்த²தோ விஸேஸாபா⁴வதோ.

யோதா⁴ஜீவஸுத்தாதி³வண்ணனா நிட்டி²தா.

6. அஸிப³ந்த⁴கபுத்தஸுத்தவண்ணனா

358. பச்சா²பூ⁴மிவாஸினோதி அபரதே³ஸவாஸினோ. உத³கஸுத்³தி⁴கபா⁴வஜானனத்தா²யாதி அத்தனோ உத³கஸுத்³தி⁴கபா⁴வம் ஜானனத்த²ஞ்சேவ லோகஸ்ஸ ச உத³கேன ஸுத்³தி⁴ ஹோதீதி இமஸ்ஸ அத்த²ஸ்ஸ ஜானனத்த²ஞ்ச. உபரி யாபேந்தீதி உபரி ப்³ரஹ்மலோகம் யாபேந்தி. ஸம்மா ஞாபேந்தீதி ஸம்மா உஜுகம்யேவ ஸக்³க³ம் லோகம் க³மேந்தி. தேனாஹ – ‘‘ஸக்³க³ம் நாம ஓக்காமேந்தீ’’தி, அவக்காமேந்தி ஓகா³ஹாபேந்தீதி அத்தோ². அனுபரிக³ச்சே²ய்யாதி அனுபரிதோ க³ச்சே²ய்ய.

அஸிப³ந்த⁴கபுத்தஸுத்தவண்ணனா நிட்டி²தா.

7. கே²த்தூபமஸுத்தவண்ணனா

359. த²த்³த⁴ந்தி கதி²னம் லூக²ம். ஊஸரந்தி ஊஸஜாதம். சதூஹிபி ஓகே⁴ஹி அனபி⁴ப⁴வனீயதாய அஹம் தீ³போ. ஸப்³ப³பரிஸ்ஸயேஹி அனபி⁴ப⁴வனீயதாய அஹம் லேணோ. ஸப்³ப³து³க்க²பரித்தாஸனதோ தாயனட்டே²ன அஹம் தாணம். ஸப்³ப³ப⁴யஹிம்ஸனதோ அஹம் ஸரணந்தி யோஜேதப்³ப³ம்.

உத³கமணிகோதி மஹந்தம் உத³கபா⁴ஜனம். ப³ஹி விஸ்ஸந்த³னவஸேன உத³கம் ந ஹரதீதி அஹாரீ, பரிதோ ந பக்³க⁴ரதீதி அபரிஹாரீ. ஸக்கச்சமேவ தே³ஸேந்தி ஸத்³த⁴ம்மகா³ரவஸ்ஸ ஸப்³ப³ஸத்தேஸு மஹாகருணாய ச பு³த்³தா⁴னம் ஸமானரஸத்தா. சதஸ்ஸோ பன பரிஸா ஸத்து²கா³ரவேன அத்தனோ ச ஸத்³தா⁴ஸம்பன்னதாய ஸத்³த³ஹித்வா ஓகப்பேத்வா ஸுணந்தி, தஸ்மா தா தே³ஸனாப²லேன யுஜ்ஜந்தி. கிச்சஸித்³தி⁴யா ஸத்து² தே³ஸனா தத்த² ஸக்கச்சதே³ஸனா நாம ஜாதா.

கே²த்தூபமஸுத்தவண்ணனா நிட்டி²தா.

8. ஸங்க²த⁴மஸுத்தவண்ணனா

360. ‘‘யோ கோசி புரிஸோ பாணாதிபாதீ முஸாவாதீ³, ஸப்³போ³ ஸோ ஆபாயிகோ’’தி வத்வா புன ‘‘யம்ப³ஹுலம் யம்ப³ஹுலம் கரோதி, தேன து³க்³க³திம் க³ச்ச²தீ’’தி வத³ந்தோ அத்தனாவ அத்தனோ வாத³ம் பி⁴ந்த³தி. ஏவம் ஸந்தேதி யதி³ ப³ஹுஸோ கதேன பாபகம்மேன ஆபாயிகோ, ‘‘யோ கோசி பாணமதிபாதேதீ’’திஆதி³வசனம் மிச்சா²தி. சத்தாரி பதா³னீதி ‘‘யோ கோசி பாணமதிபாதேதீ’’திஆதி³னா நயேன வுத்தா சத்தாரோ அத்த²கோட்டா²ஸா. தி³ட்டி²யா பச்சயா ஹோந்தி ‘‘அத்தி² கோ² பன மயா’’திஆதி³னா அயோனிஸோ உம்முஜ்ஜந்தஸ்ஸ. ப³லஸம்பன்னோதி ஸமத்தோ². ஸங்க²த⁴மகோதி ஸங்க²ஸ்ஸ த⁴மனகிச்சே சே²கோ. அது³க்கே²னாதி ஸுகே²ன. உபசாரோபி அப்பனாபி வட்டதி உபி⁴ன்னம் ஸாமஞ்ஞவசனபா⁴வதோ. அப்பமாணகதபா⁴வோ லப்³ப⁴தேவ. ததா² ஹி தம் கிலேஸானம் விக்க²ம்ப⁴னஸமத்த²தாய தீ³க⁴ஸந்தானதாய விபுலப²லதாய ச ‘‘மஹக்³க³த’’ந்தி வுச்சதி.

ந ஓஹீயதீதி யஸ்மிம் ஸந்தானே காமாவசரகம்மம், மஹக்³க³தகம்மஞ்ச கதூபசிதம் விபாகதா³னே லத்³தா⁴வஸரம் ஹுத்வா டி²தம், தேஸு காமாவசரகம்மம் இதரம் நீஹரித்வா ஸயம் தத்த² ஓஹீயித்வா அத்தனோ விபாகம் தா³தும் ந ஸக்கோதி, மஹக்³க³தகம்மமேவ பன இதரம் படிபா³ஹித்வா அத்தனோ விபாகம் தா³தும் ஸக்கோதி க³ருபா⁴வதோ. தேனாஹ ‘‘தம் காமாவசரகம்ம’’ந்திஆதி³. கிலேஸவஸேனாதி பாபகம்மஸ்ஸ மூலபூ⁴தகிலேஸவஸேன. பாணாதிபாதாத³யோ ஹி தோ³ஸமோஹலோபா⁴தி³மூலகிலேஸஸமுட்டா²னா. கிலேஸவஸேனாதி வா கம்மகிலேஸவஸேன. வுத்தஞ்ஹேதம் – ‘‘பாணாதிபாதோ கோ², க³ஹபதிபுத்த, கம்மகிலேஸோ’’திஆதி³ (தீ³. நி. 3.245). யதா²னுஸந்தி⁴னாவ க³தந்தி யதா²னுஸந்தி⁴ஸங்கா²தஅனுஸந்தி⁴னா ஓஸானம் க³தம் ஸம்கிலேஸஸம்முகே²ன உட்டி²தாய வோதா³னத⁴ம்மவஸேன நிட்டா²பிதத்தா.

ஸங்க²த⁴மஸுத்தவண்ணனா நிட்டி²தா.

9. குலஸுத்தவண்ணனா

361. ஏவம் பவத்தஈஹிதிகாதி ஏவம் த்³விதா⁴ பவத்தஈஹிதிகா. த்³வீஹிதிகா து³க்கரஜீவிகபயோகா³. ஸலாகமத்தம் வுத்தம் ஏத்தா²தி ஸலாகா வுத்தா, புரிமபதே³ உத்தரபத³லோபோ. உப⁴தோகோடிகந்தி யதி³ ‘‘குலானுத³யம் ந வண்ணேமீ’’தி வத³தி, ‘‘பூ⁴தா நிக்கருணா ஸமண தும்ஹே’’தி வாத³ம் ஆரோபேஹி. அத² ஸப்³ப³தா³பி ‘‘குலானுத³யம் வண்ணேமீ’’தி வத³தி. ஏவம் ஸந்தே ‘‘கஸ்மா ஏவம் து³ப்³பி⁴க்கே² காலே மஹதியா பரிஸாய பரிவுதோ ஜனபத³சாரிகம் சரந்தா குலூபச்சே²தா³ய படிபஜ்ஜதா²’’தி ஏவம் உப⁴தோகோடிகம் வாத³ம் ஆரோபேஹீதி கா³மணிம் உய்யோஜேஸி.

த்³வே அந்தேதி உபோ⁴ கோடியோ. ப³ஹி நீஹரிதுந்தி ந வண்ணேமி வண்ணேமீதி த்³வே அந்தே மோசேந்தோ தம் புச்சி²தமத்த²ம் ப³ஹி நீஹரதி நாம. தத்த² தோ³ஸம் த³த்வா சோதே³ந்தோ தம் அபுச்ச²ம் கரோந்தோ கி³லித்வா விய அந்தோ பவேஸேதி நாம.

இதோ ஸோ கா³மணீதிஆதி³ அத்தனோ பி⁴க்கூ²னம் அஞ்ஞேஸஞ்ச அத்த²காமானம் பி⁴க்க²ப்பதா³னேன அனிட்ட²ப்பத்திஅபா⁴வத³ஸ்ஸனத்த²ம் ஆரத்³த⁴ம். தா³னேன ஸம்பூ⁴தானீதி தா³னமயேன புஞ்ஞகிரியவத்து²னா ஸம்மதே³வ பூ⁴திம் வட்³டி⁴ம் பத்தானி. ஸச்சேன அரியவோஹாரேன ஸம்மதே³வ பூ⁴தானி உப்பன்னானி ஸச்சஸம்பூ⁴தானீதி ஆஹ ‘‘ஸச்சம் நாம ஸச்சவாதி³தா’’தி. ஸேஸஸீலந்தி அட்ட²வித⁴அரியவோஹாரதோ அஞ்ஞஸீலம். நிஹிதந்தி தஸ்மிம் குலே புப்³ப³புரிஸேஹி நிதா⁴னபா⁴வேன நிஹிதம். து³ப்பயுத்தாதி கஸிவாணிஜ்ஜாதி³வஸேன து³ட்டு² பயுத்தா கம்மந்தா. விபஜ்ஜந்தீதி நஸ்ஸந்தி. குலங்கா³ரோதி குலஸ்ஸ அங்கா³ரஸதி³ஸோ வினாஸகபுக்³க³லோ. அனிச்சதாதி மரணம். தஸ்மிம் குலே பதா⁴னபுரிஸானம் போ⁴கா³னம் வா ஸப்³ப³ஸோ வினாஸோ. தேனாஹ ‘‘ஹுத்வா அபா⁴வோ’’திஆதி³.

குலஸுத்தவண்ணனா நிட்டி²தா.

10. மணிசூளகஸுத்தவண்ணனா

362. தம் பரிஸந்தி தம் ராஜந்தேபுரே நிஸின்னம் ராஜபரிஸம். நயக்³கா³ஹேதி குதோசிபி அஸுத்வா கேவலம் அத்தனோ ஏவ மதியா நயக்³க³ஹணே ட²த்வா.

காரேதும் வட்டதி ஸதி ஸம்ப⁴வே படிஸங்கா²ரஸ்ஸ, ஸேனாஸனவினாஸோ ந அஜ்ஜு²பேக்கி²தப்³போ³தி அதி⁴ப்பாயோ. அத்தனோ ஏத்த² கிச்சாவஸானே யம் கி³ஹீனம்யேவ ஸந்தகம் தாவகாலிகம், தம் கி³ஹிவிகதந்தி ஆஹ ‘‘கி³ஹிவிகதம் கத்வா’’தி. ந வதா³மி பப்³ப³ஜ்ஜிதாஸாருப்பதோ.

மணிசூளகஸுத்தவண்ணனா நிட்டி²தா.

11. ப⁴த்³ரகஸுத்தவண்ணனா

363. ஏவம்னாமகேதி மல்லா நாம ஜானபதி³னோ ராஜகுமாரா, நேஸம் நிவாஸதாய ‘‘மல்லா’’இச்சேவ ப³ஹுவசனவஸேன லத்³த⁴னாமத்தா ஏவம்னாமகே ஜனபதே³. நத்தி² ஏதஸ்ஸ பத்தியா காலந்தரஸஞ்ஞிதோ காலோதி அகாலோ, ஸோ ஏவ அகாலிகோ. தேனாஹ – ‘‘காலம் அனதிக்கமித்வா பத்தேனா’’தி. ஸோ பன ‘‘யம்கிஞ்சி து³க்க²ம் உப்பஜ்ஜமானம் உப்பஜ்ஜதி, ஸப்³ப³ம் தம் ச²ந்த³மூலக’’ந்தி ஏவம் வுத்தோ து³க்க²ஸ்ஸ ச²ந்த³மூலபா⁴வோ, ஏவம் ச²ந்த³மூலகஸ்ஸ து³க்க²ஸ்ஸ கதி²தத்தா ‘‘இமஸ்மிம் ஸுத்தே வட்டது³க்க²ம் கதி²த’’ந்தி வுத்தம்.

ப⁴த்³ரகஸுத்தவண்ணனா நிட்டி²தா.

12. ராஸியஸுத்தவண்ணனா

364. ராஸிம் கத்வா மாரபாஸவஸேன, தத்ராபி அந்தரபே⁴தே³ன விப⁴ஜித்வா புச்சி²தப்³ப³பஞ்ஹே ஏகதோ ராஸிம் கத்வா. தபனம் அத்தபரிதாபனம் தபோ, ஸோ ஏதஸ்ஸ அத்தீ²தி தபஸ்ஸீ, தம் தபஸ்ஸிம். ஸோ பன தம் தபம் நிஸ்ஸாய டி²தோ நாம ஹோதீதி வுத்தம் ‘‘தபனிஸ்ஸிதக’’ந்தி. ஸோ பன அனேகாகாரபே⁴தே³ன லூக²ம் ப²ருஸம் ஜீவனஸீலத்தா லூக²ஜீவீ நாம. தேனாஹ ‘‘லூக²ஜீவிக’’ந்தி. மஜ்ஜி²மாய படிபத்தியா உப்பத²பா⁴வேன அவனியா க³ந்த⁴ப்³பா³தி அந்தா, ததோ ஏவ லாமகத்தா அந்தா. லாமகம்பி ‘‘அந்தோ’’தி வுச்சதி ‘‘அந்தமித³ம், பி⁴க்க²வே, ஜீவிகானம் (இதிவு. 91; ஸம். நி. 3.80), ஏகோ அந்தோ’’தி ஏவமாதீ³ஸு (ஸம். நி. 2.15; 3.90). அட்ட²கதா²யம் பன அஞ்ஞமஞ்ஞஆதா⁴ரபா⁴வம் உரீகத்வா ‘‘கோட்டா²ஸா’’தி வுத்தம். ஹீனோ கா³மோதி பாளி. கா³ம-ஸத்³தோ³ ஹீனபரியாயோதி அதி⁴ப்பாயேனாஹ ‘‘கா³ம்மோ’’தி. கா³மே ப⁴வோதி கா³ம்மோ. கா³ம-ஸத்³தோ³ சேத்த² கா³மவாஸிவிஸயோ ‘‘கா³மோ ஆக³தோ’’திஆதீ³ஸு விய. அட்ட²கதா²யம் பன ‘‘கா³மவாஸீனம் த⁴ம்மோ’’தி வுத்தம், தேஸம் சாரித்தந்தி அத்தோ². அத்த-ஸத்³தோ³ இத⁴ ஸரீரபரியாயோ ‘‘அத்தந்தபோ’’திஆதீ³ஸு வியாதி ஆஹ ‘‘ஸரீரது³க்க²கரணந்தி அத்தோ²’’தி.

ஏத்தா²தி ஏதஸ்மிம் தபனிஸ்ஸிதக³ரஹிதப்³ப³பதே³ கஸ்மா அந்தத்³வயமஜ்ஜி²மபடிபதா³க³ஹணம்? அத்தகிலமதா²னுயோகோ³ தாவ க³ய்ஹது இத³மத்தி²தாயாதி அதி⁴ப்பாயோ. காமபோ⁴கீ³தபனிஸ்ஸிதகனிஜ்ஜரவத்தூ²னம் த³ஸ்ஸனே யதா²தி⁴ப்பேதஸ்ஸ அத்த²ஸ்ஸ விப⁴ஜித்வா கத²னம் ஸம்ப⁴வதீதி தே த³ஸ்ஸேத்வா அதி⁴ப்பேதத்தோ² கதி²தோ.

தமத்த²ந்தி யோ ‘‘காமபோ⁴கீ³தபனிஸ்ஸிதகேஸு க³ரஹிதப்³பே³யேவ க³ரஹதி, பஸம்ஸிதப்³பே³யேவ ச பஸம்ஸதீ’’தி வுத்தோ அத்தோ², தமத்த²ம் பகாஸேந்தோ. ஸாஹஸிககம்மேனாதி அயுத்தேன கம்மேன. த⁴ம்மேன ச அத⁴ம்மேன சாதி த⁴ம்மிகேன அத⁴ம்மிகேன ச. அயோனிஸோ பவத்தம் பா³ஹிரகம் ஸந்தா⁴ய சோத³கோ ‘‘கத²’’ந்திஆதி³மாஹ. இதரோ நயித³ம் தாதி³ஸம் அத்தபரிதாபனம் அதி⁴ப்பேதம், அத² கோ² யோனிஸோ பவத்தம் ஸாஸனிகமேவாதி த³ஸ்ஸேந்தோ ‘‘சதுரங்க³வீரியவஸேன சா’’தி ஆஹ. தத்த² ‘‘காமம் தசோ ச ந்ஹாரு ச அட்டி² ச அவஸிஸ்ஸதூ’’திஆதி³னா (ம. நி. 2.184; ஸம். நி. 2.22.237; அ. நி. 2.5) நயேன வுத்தா ஸரீரேனிரபேக்க²விபஸ்ஸனாய உஸ்ஸுக்காபனவஸேன பவத்தா வீரியபா⁴வனா ‘‘சதுரங்க³வீரியவஸேனா’’தி வுத்தா. ததா² அப்³போ⁴காஸிகனேஸஜ்ஜிகதபாதி³னிஸ்ஸிதாவ கிலேஸனிம்மத²னயோக்³யா வீரியபா⁴வனா ‘‘து⁴தங்க³வஸேன சா’’தி வுத்தாதி. அரியமக்³கே³ன நிஸ்ஸேஸகிலேஸானம் பஜஹனா நிஜ்ஜரா. ஸா ச அத்தபச்சக்க²தாய ஸந்தி³ட்டி²கா திண்ணம் மூலகிலேஸானம் பஜஹனேன ‘‘திஸ்ஸோ’’தி ச வுத்தா. தேனாஹ ‘‘ஏகோபீ’’திஆதி³.

ராஸியஸுத்தவண்ணனா நிட்டி²தா.

13. பாடலியஸுத்தவண்ணனா

365. ‘‘மாயஞ்சாஹம் பஜானாமீ’’தி வசனம் காமம் தேஸம் மாயாவீபா⁴வத³ஸ்ஸனபரம், ப⁴க³வதோ பன மாயாஸாடே²ய்யாதி³கஸ்ஸ ஸப்³ப³ஸ்ஸ பாபத⁴ம்மஸ்ஸ போ³தி⁴மூலே ஏவ ஸேதுகா⁴தோ, தஸ்மா ஸப்³ப³ஸோ பஹீனமாயோ, ஸப்³ப³ஞ்ஞுதாய மாயம் அஞ்ஞே ச ஞேய்யே ஸப்³ப³ஸோ ஜானாதி. தேன வுத்தம் ‘‘மாயஞ்சாஹம், கா³மணி, பஜானாமீ’’திஆதி³. மாயஞ்ச பஜானாமீதி ந கேவலமஹம் மாயம் ஏவ ஜானாமி, அத² கோ² அஞ்ஞம்பி இத³ஞ்சித³ஞ்ச ஜானாமீதி.

இத்தி²காமேஹீதி இத்தீ²ஹி சேவ தத³ஞ்ஞகாமேஹி ச. ஏகஸ்மிம் டா²னேதி ஏகஸ்மிம் பதே³ஸே. ஏகேகஸ்ஸேவ ஆக³ந்துகஸ்ஸ க³ஹட்ட²ஸ்ஸ வா பப்³ப³ஜிதஸ்ஸ வா. ஸத்திஅனுரூபேனாதி விப⁴வஸத்திஅனுரூபேன. ப³லானுரூபேனாதி பரிவாரப³லானுரூபேன. ஸத்திஅனுரூபேனாதி வா ஸத்³தா⁴ஸத்திஅனுரூபேன. ப³லானுரூபேனாதி விப⁴வப³லானுரூபேன. த⁴ம்மேஸு ஸமாதி⁴ த³ஸகுஸலத⁴ம்மேஸு ஸமாதா⁴னம். அக்³க³ஹிதசித்ததா பரியுட்ட²காரிதா. தேன லோகியஸீலவிஸுத்³தி⁴ தி³ட்டி²விஸுத்³தி⁴ ச வுத்தா. ததா² சாஹ – ‘‘கோ சாதி³ குஸலானம் த⁴ம்மானம், ஸீலஞ்ச ஸுவிஸுத்³த⁴ம் தி³ட்டி² ச உஜுகா’’தி (ஸம். நி. 5.369). தத்த² பதிட்டி²தஸ்ஸ உபரி கத்தப்³ப³ம் த³ஸ்ஸேதும் ‘‘த⁴ம்மஸமாதி⁴ஸ்மிம் டி²தோ’’திஆதி³ வுத்தம். அயம் படிபதா³தி தஸ்ஸ கம்மப²லவாதி³னோ ஸத்து² வசனம் ஸப்³பே³ஸஞ்ச அயம் மய்ஹம் ஸீலஸம்வரப்³ரஹ்மவிஹாரபா⁴வனாஸங்கா²தாபடிபதா³ அனபராத⁴கதாய ஏவ ஸம்வத்ததி. ஜயக்³கா³ஹோதி உப⁴யதா²பி மய்ஹம் காசி ஜானி நத்தி².

பஞ்ச த⁴ம்மா த⁴ம்மஸமாதி⁴ நாம, விபஸ்ஸனாமக்³க³ப²லத⁴ம்மமத்தம் வா. ததியவிகப்பே ஸீலாதி³விஸுத்³தி⁴யா ஸத்³தி⁴ம் ப்³ரஹ்மவிஹாரா யதா²வுத்ததிவித⁴த⁴ம்மாவஹத்தா ஏவ த⁴ம்மஸமாதி⁴ நாம. பூரேந்தஸ்ஸ உப்பன்னா சித்தேகக்³க³தாதி வுத்தக²ணிகசித்தேகக்³க³தா. ஸாபி சித்தஸ்ஸ ஸமாதா⁴னதோ ‘‘சித்தஸமாதீ⁴’’தி வுத்தா, தஸ்ஸ படிபக்க²ம் விக்க²ம்ப⁴ந்தீ ஸமுச்சி²ந்த³ந்தீ ச ஹுத்வா பவத்தா யதா²வுத்தஸமாதி⁴ ஏவ விஸேஸேன சித்தஸமாதி⁴ நாம.

பாடலியஸுத்தவண்ணனா நிட்டி²தா.

கா³மணிஸம்யுத்தவண்ணனா நிட்டி²தா.