7. சித்தஸம்யுத்தம்

1. ஸம்யோஜனஸுத்தவண்ணனா

343. போ⁴க³கா³மந்தி போ⁴கு³ப்பத்திகா³மம். பவத்ததீதி அப்படிஹதம் ஹுத்வா பவத்ததி படிஸம்பி⁴த³ப்பத்தியா.

ஸம்யோஜனஸுத்தவண்ணனா நிட்டி²தா.

2. பட²மஇஸித³த்தஸுத்தவண்ணனா

344. அவிஸாரத³த்தாதி பஞ்ஹம் ப்³யாகாதும் வேய்யத்தியாபா⁴வேன அஸமத்த²த்தா. உபாஸகோ தே²ரேஸு ப்³யாகாதும் அஸக்கோந்தேஸு ஸயம் ப்³யாகாதுகாமோ புச்ச²தி, ந விஹேஸாதி⁴ப்பாயோ. பட²மவசனேன அப்³யாகரோந்தே தி³ஸ்வாவ புனப்புனம் புச்சி²தம் விஹேஸோ விய ஹோதீதி கத்வா வுத்தம் ‘‘விஹேஸேதீ’’தி.

பட²மஇஸித³த்தஸுத்தவண்ணனா நிட்டி²தா.

3. து³தியஇஸித³த்தஸுத்தவண்ணனா

345. அவந்தியாதி அவந்திரட்டே², தம் பன மஜ்ஜி²மபதே³ஸதோ த³க்கி²ணதி³ஸாயம். தேனாஹ ‘‘த³க்கி²ணாபதே²’’தி. அதி⁴ப்பாயேனாதி தஸ்ஸ வசனஸ்ஸ அனுமோத³னாதி⁴ப்பாயேன வத³தி, ந பன ததோ கிஞ்சி க³ஹேதுகாமதாதி⁴ப்பாயேன.

து³தியஇஸித³த்தஸுத்தவண்ணனா நிட்டி²தா.

4. மஹகபாடிஹாரியஸுத்தவண்ணனா

346. தேஸம் அனுஜானந்தோதி தேஸம் தா³ஸகம்மகரானம் ஸேஸகே யதா²ருசி விசாரணம் அனுஜானந்தோ. குதி⁴தந்தி ப³லவதா ஸூரியஸந்தாபேன ஸங்குதி²தம். தேனாஹ ‘‘ஹேட்டா²’’திஆதி³. அதிதிகி²ணந்தி அதிவிய திக்க²தா⁴துகம். அஸம்பி⁴ன்னபத³ந்தி அஞ்ஞத்த² அனாக³தத்தா திபிடகே அவோமிஸ்ஸகபத³ம், இதே⁴வ ஆக³தபத³ந்தி அத்தோ². படிலீயமானேனாதி படிகம்ஸேன விஸேஸனேன விலீயமானேன காயேன.

ஏத்த² சாதி ஏதஸ்மிம் அதி⁴ட்டா²னித்³தி⁴கரணே. அப்³ப⁴மண்ட³பம் கத்வாதி ஸமந்ததோ சா²த³னவஸேன மண்ட³பம் விய மேக⁴படலம் உப்பாதே³த்வா. தே³வோதி மேகோ⁴. ஏகமேகம் பு²ஸிதகம் பு²ஸாயது ஜாலவினத்³த⁴ம் விய வஸ்ஸது. ஏவம் வுத்தப்பகாரேன நானாபரிகம்மம் நானாதி⁴ட்டா²னம் ஏகதோ பரிகம்மம் ஏகதோ அதி⁴ட்டா²னந்தி சதுக்கமேத்த² ஸம்ப⁴வதீதி த³ஸ்ஸேதி ‘‘ஏத்த² சா’’திஆதி³னா. யதா² ததா²தி யதா²வுத்தேஸு சதூஸு பகாரேஸு யேன வா தேன வா பகாரேன கரோந்தஸ்ஸ. கதபரிகம்மஸ்ஸாதி ‘‘ஏவம் வா ஏவம் வா ஹோதூ’’தி பவத்திதபரிகம்மசித்தஸ்ஸ. ‘‘பரிகம்மானந்தரேனாதி அதி⁴ட்டா²னசித்துப்பாத³னத்த²ம் ஸமாபன்னபாத³கஜ்ஜா²னதோ வுட்டா²ய அதி⁴ட்டா²னசித்தஸ்ஸ ஏகாவஜ்ஜனவீதி²யம் பவத்தபரிகம்மம் ஸந்தா⁴ய வுத்த’’ந்தி வத³ந்தி.

மஹகபாடிஹாரியஸுத்தவண்ணனா நிட்டி²தா.

5. பட²மகாமபூ⁴ஸுத்தவண்ணனா

347. ஏலம் வுச்சதி தோ³ஸோ, தம் ஏதஸ்ஸ நத்தீ²தி நேலம், தம் அங்க³ம் ஏதஸ்ஸாதி நேலங்கோ³, ஸுவிஸுத்³த⁴ஸீலகு³ணோ. தேனாஹ ‘‘நேலங்க³ந்தி கோ², ப⁴ந்தே, ஸீலானமேதம் அதி⁴வசன’’ந்தி. அட்ட²கதா²யம் பன தோ³ஸாபா⁴வமேவ த³ஸ்ஸேதும் ‘‘நேலங்கோ³தி நித்³தோ³ஸோ’’தி வுத்தம். ஏதம் பி⁴க்கு²ம் ஆக³ச்ச²ந்தந்தி மஹாகப்பினத்தே²ரம் ஸந்தா⁴ய வுத்தம். அத்தனோ தி³ட்டே²ன கதே²ஸீதி அத்தனோ ஸப்³ப³ஞ்ஞுதஞ்ஞாணேன பச்சக்க²தோ உபலக்கி²தேன அத்தே²ன கதே²ஸி. அயம் பன நயக்³கா³ஹேனாதி அயம் பன க³ஹபதி அஸுத்வா கேவலம் நயக்³கா³ஹேன ஆஹ.

பட²மகாமபூ⁴ஸுத்தவண்ணனா நிட்டி²தா.

6. து³தியகாமபூ⁴ஸுத்தவண்ணனா

348. நிரோத⁴ம் வலஞ்ஜேதி அனாகா³மிபா⁴வதோ. இமே ஸங்கா²ராதி இமே ‘‘காயஸங்கா²ரோ, வசீஸங்கா²ரோ, சித்தஸங்கா²ரோ’’தி வுச்சமானா தயோ ஸங்கா²ரா. ஸத்³த³தோபி, அத்த²தோபி அஞ்ஞமஞ்ஞம் மிஸ்ஸா, ததோ ஏவ ஆலுளிதா ஆகுலா, அவிபூ⁴தா து³ப்³பி³பா⁴வனா, து³த்³தீ³பனா அஸங்கரதோ தீ³பேதும் து³க்கரா. ததா² ஹி குஸலசேதனா ஏவ ‘‘காயஸங்கா²ரோ’’திபி வுச்சதி, ‘‘வசீஸங்கா²ரோ’’திபி, ‘‘சித்தஸங்கா²ரோ’’திபி. அஸ்ஸாஸபஸ்ஸாஸாபி கத்த²சி ‘‘காயஸங்கா²ரோ’’தி, விதக்கவிசாராபி ‘‘வசீஸங்கா²ரோ’’தி வுச்சந்தி, ஸஞ்ஞாவேத³னாபி ‘‘சித்தஸங்கா²ரோ’’தி வுச்சந்தி. தேன வுத்தம் ‘‘ததா² ஹீ’’திஆதி³. தத்த² ஆகட்³டி⁴த்வா க³ஹணம் ஆதா³னம், ஸம்பத்தஸ்ஸ ஹத்தே² கரணம் க³ஹணம், க³ஹிதஸ்ஸ விஸ்ஸஜ்ஜனம் முஞ்சனம், ப²ந்த³னம் சோபனம் பாபேத்வா நிப்பா²தே³த்வா. ஹனுஸஞ்சோபனந்தி காயவிஞ்ஞத்திவஸேன புப்³ப³பா⁴கே³ ஹனுஸஞ்சோபனம் கத்வா. ஏவஞ்ஹி வசீபே⁴த³கரணம். ஏவம் இமேதிஆதி³ யதா²வுத்தஸ்ஸ அத்த²ஸ்ஸ நிக³மனம்.

பத³த்த²ம் புச்ச²தி இதரஸங்கா²ரேஹி பத³த்த²தோ விஸேஸம் கதா²பேஸ்ஸாமீதி. காயனிஸ்ஸிதாதி ஏத்த² காயனிஸ்ஸிததா ச நேஸம் தப்³பா⁴வபா⁴விதாய வேதி³தப்³பா³, ந காயஸ்ஸ நிஸ்ஸயபச்சயதாவஸேனாதி த³ஸ்ஸேந்தோ ‘‘காயே ஸதி ஹோந்தி, அஸதி ந ஹோந்தீ’’தி ஆஹ. காயோதி சேத்த² கரஜகாயோ த³ட்ட²ப்³போ³. சித்தனிஸ்ஸிதாதி சித்தம் நிஸ்ஸாய தம் நிஸ்ஸயபச்சயபூ⁴தம் லபி⁴த்வா உப்பன்னா.

‘‘ஸமாபஜ்ஜாமீ’’தி பத³ஸ்ஸ ஸமீபே வுச்சமானம் ‘‘ஸமாபஜ்ஜிஸ்ஸ’’ந்தி பத³ம் ஆஸன்னானாக³தகாலவாசீ ஏவ ப⁴விதும் யுத்தம், ந இதரந்தி ஆஹ – ‘‘பத³த்³வயேன நேவஸஞ்ஞானாஸஞ்ஞாயதனஸமாபத்திகாலோ கதி²தோ’’தி. தயித³ம் தஸ்ஸ ததா² வத்தப்³ப³தாய வுத்தம், ந பன தஸ்ஸ ததா² சித்தபவத்திஸம்ப⁴வதோ. ஸமாபன்னேபி ஏஸேவ நயோ. புரிமேஹீதி ‘‘ஸமாபஜ்ஜிஸ்ஸம் ஸமாபஜ்ஜாமீ’’தி த்³வீஹி பதே³ஹி. பச்சி²மேனாதி ‘‘ஸமாபன்னோ’’தி பதே³ன.

பா⁴விதம் ஹோதி உப்பாதி³தம் ஹோதி நிரோத⁴ஸமாபன்னத்தா²ய. அனுபுப்³ப³ஸமாபத்திஸமாபஜ்ஜனஸங்கா²தாய நிரோத⁴பா⁴வனாய தம் சித்தம் பா⁴விதம் ஹோதி. தேனாஹ ‘‘யம் த’’ந்திஆதி³. து³தியஜ்ஜா²னேயேவாதி து³தியஜ்ஜா²னக்க²ணே நிருஜ்ஜ²தி. தத்த² அனுப்பஜ்ஜனதோ அனுப்பாத³னதோ ஹேட்டா² நிரோதோ⁴தி அதி⁴ப்பேதோ. சதுன்னம் அரூபக்க²ந்தா⁴னம் தஜ்ஜா பரிகம்மஸித்³தா⁴ யா அப்பவத்தி, தத்த² ‘‘நிரோத⁴ஸமாபத்திஸஞ்ஞா’’தி, யா நேஸம் ததா² அப்பவத்தி. ஸா ‘‘அந்தோனிரோதே⁴ நிருஜ்ஜ²தீ’’தி வுத்தா.

‘‘சித்தஸங்கா²ரோ நிருத்³தோ⁴’’தி வசனதோ தத³ஞ்ஞேஸம் அனிரோத⁴ம் இச்ச²ந்தானம் வாத³ம் த³ஸ்ஸேந்தோ ‘‘சித்தஸங்கா²ரோ நிருத்³தோ⁴தி வசனதோ’’திஆதி³ம் வத்வா தத்த² அதிப்பஸங்க³த³ஸ்ஸனமுகே²ன தம் வாத³ம் நிஸேதே⁴தும் ‘‘தே வத்தப்³பா³’’திஆதி³மாஹ. அபி⁴னிவேஸம் அகத்வாதி யதா²க³தே ப்³யஞ்ஜனமத்தே அபி⁴னிவேஸம் அகத்வா. ஆசரியானம் நயேதி ஆசரியானம் பரம்பராக³தே த⁴ம்மனயே த⁴ம்மனேத்தியம் ட²த்வா.

கிரியமயபவத்தஸ்மிந்தி பரித்தபூ⁴மககுஸலாகுஸலத⁴ம்மபப³ந்தே⁴ வத்தமானே. தஸ்மிஞ்ஹி வத்தமானே காயிக-வாசஸிக-கிரியஸம்பவத்தி ஹோதி, த³ஸ்ஸன-ஸவனாதி³வஸேன ஆரம்மணக்³க³ஹணே பவத்தமானேதி அத்தோ². தேனாஹ – ‘‘ப³ஹித்³தா⁴ரம்மணேஸு பஸாதே³ க⁴ட்டேந்தேஸூ’’தி. மக்கி²தானி வியாதி புஞ்சி²தானி விய ஹோந்தி க⁴ட்டனாய விபா³தி⁴தத்தா. ஏதேனாயம் க⁴ட்டனா பஞ்சத்³வாரிகவிஞ்ஞாணானம் வேக³ஸா உப்பஜ்ஜனாய ந ஆரம்மணந்தி த³ஸ்ஸேதி. தேனேவாஹ – ‘‘அந்தோனிரோதே⁴ பஞ்ச பஸாதா³ அதிவிய விரோசந்தீ’’தி.

ததோ பரம் ஸசித்தகோ ப⁴விஸ்ஸாமீதி இத³ம் அத்த²தோ ஆபன்னம் க³ஹேத்வா வுத்தம் – ‘‘ஏத்தகம் காலம் அசித்தகோ ப⁴விஸ்ஸாமீ’’தி ஏதேனேவ தஸ்ஸ அத்த²ஸ்ஸ ஸித்³த⁴த்தா. யம் ஏவம் பா⁴விதந்தி ஏத்த² விஸும் சித்தஸ்ஸ பா⁴வனா நாம நத்தி², அத்³தா⁴னபரிச்சே²த³ம் பன கத்வா நிரோத⁴ஸமாபத்தத்தா²ய காதப்³ப³பரிகம்மபா⁴வனாய ஏவ தஸ்ஸ ஸிஜ்ஜ²னதோ.

ஸா பனேஸா நிரோத⁴கதா². த்³வீஹி ப³லேஹீதி ஸமத²விபஸ்ஸனாப³லேஹி. தயோ ச ஸங்கா²ரானந்தி திண்ணம் காயவசீசித்தஸங்கா²ரானம் படிப்பஸ்ஸத்³தி⁴யா. ஸோளஸஹி ஞாணசரியாஹீதி அனிச்சானுபஸ்ஸனாதீ³னம் அட்ட²ன்னம் அனுபஸ்ஸனாஞாணானம், அட்ட²ன்னஞ்ச மக்³க³ப²லஞாணானம் வஸேன இமாஹி ஸோளஸஹி ஞாணப்பவத்தீஹி. நவஹி ஸமாதி⁴சரியாஹீதி அட்ட² ஸமாபத்தியோ அட்ட² ஸமாதி⁴சரியா, தாஸம் உபசாரஸமாதி⁴ ஸமாதி⁴பா⁴வஸாமஞ்ஞேன ஏகா ஸமாதி⁴சரியாதி ஏவம் நவஹி ஸமாதி⁴சரியாஹி. வஸீபா⁴வதாபஞ்ஞாதி வஸீபா⁴வதாஸங்கா²தா பஞ்ஞா. ஸப்³பா³காரேன விஸுத்³தி⁴மக்³கே³ கதி²தா, தே தாவ ஆகாரா திட்ட²ந்து, ஸரூபமத்தஸ்ஸ பனஸ்ஸ வத்தப்³ப³ந்தி ஆஹ – ‘‘கோ பனாயம் நிரோதோ⁴ நாமா’’தி. யதி³ க²ந்தா⁴னம் அப்பவத்தி, அத² கிமத்த²மேதம் ஜா²னஸுகா²தி³ம் விய ஸமாபஜ்ஜந்தீதி ஆஹ ‘‘ஸங்கா²ரான’’ந்திஆதி³.

ப²லஸமாபத்திசித்தந்தி அரஹத்தம் அனாகா³மிப²லசித்தம். ‘‘ததோ பரம் ப⁴வங்க³ஸமயே’’தி வுத்தத்தா ஆஹ ‘‘கிம் பன…பே… ந ஸமுட்டா²பேதீ’’தி. ஸமுட்டா²பேதி ரூபஸமுப்பாத³கத்தா. இமஸ்ஸாதி நிரோத⁴ம் ஸமாபன்னபி⁴க்கு²னோ. ஸா ந ஸமுட்டா²பேதீதி ஸா சதுத்த²ஜ்ஜா²னிகா ப²லஸமாபத்தி ந ஸமுட்டா²பேதி அஸ்ஸாஸபஸ்ஸாஸே. ப²லஸமாபத்தியா சதுத்த²ஜ்ஜா²னிகபா⁴வோ கத²ம் நிச்சி²தோதி ஆஹ – ‘‘கிம் வா ஏதேனா’’திஆதி³. வக்க²மானாகாரேனபி பரிஹாரோ ஹோதீதி. ஸந்தஸமாபத்திதோதி நிரோத⁴ஸமாபத்திமேவ ஸந்தா⁴ய வத³தி. அப்³போ³ஹாரிகா ஹோந்தி அதிஸுகு²மஸபா⁴வத்தா, ஸஞ்ஜீவத்தே²ரஸ்ஸ புப்³பே³ ஸமாபத்திக்க²ணே அஸ்ஸாஸபஸ்ஸாஸா அப்³போ³ஹாரிகபா⁴வம் க³ச்ச²ந்தி. தேன வுத்தம் ‘‘ப⁴வங்க³ஸமயேனேவேதம் கதி²த’’ந்தி.

கிரியமய …பே… உப்பஜ்ஜதீதி கஸ்மா வுத்தம்? நனு ப⁴வங்கு³ப்பத்திகாலம்பி விதக்கவிசாரா உப்பஜ்ஜந்தேவாதி? கிஞ்சாபி உப்பஜ்ஜந்தி, வசீஸங்கா²ரலக்க²ணப்பத்தா பன ந ஹோந்தீதி இமமத்த²ம் த³ஸ்ஸேதும் ‘‘கிம் ப⁴வங்க³’’ந்திஆதி³ வுத்தம்.

ஸுஞ்ஞதோ ப²ஸ்ஸோதிஆத³யோ ஸகு³ணேனபி ஆரம்மணேனாதி ஆரம்மணபூ⁴தமேதம். ஸுஞ்ஞதா நாம ப²லஸமாபத்தி நிச்சஸுக²அத்தஸபா⁴வதோ ஸுஞ்ஞத்தா. ‘‘ஸுஞ்ஞதோ ப²ஸ்ஸோ’’தி வுத்தம் வுத்தனயேன ஸுஞ்ஞஸபா⁴வத்தா. அனிமித்தா நாம ப²லஸமாபத்தி ராக³னிமித்தாதீ³னம் அபா⁴வதோ. அப்பணிஹிதா நாம ப²லஸமாபத்தி ராக³பணிதி⁴ஆதீ³னமபா⁴வதோ. ஸேஸம் வுத்தனயமேவ. தேனாஹ ‘‘அனிமித்தப்பணிஹிதேஸுபி ஏஸேவ நயோ’’தி. ராக³னிமித்தாதீ³னந்தி ஏத்த² ஆதி³-ஸத்³தே³ன ஸங்கா²ரனிமித்தஸ்ஸபி ஸங்க³ஹோ த³ட்ட²ப்³போ³. யத³க்³கே³ன ப²லஸமாபத்திஸம்ப²ஸ்ஸோ ஸுஞ்ஞதோ நாம, தத³க்³கே³ன ப²லஸமாபத்திபி ஸுஞ்ஞதா நாம, ப²ஸ்ஸஸீஸேன பன தே³ஸனா ஆக³தாதி ததா² வுத்தம். அனிமித்தப்பணிஹிதேஸுபி ஏஸேவ நயோ.

ஆக³மனம் ஏத்த², ஏதாயாதி வா ஆக³மனிகா, ஸா ஏவ ஆக³மனியா க-காரஸ்ஸ ய-காரம் கத்வா. வுட்டா²தி நிமித்ததோ மக்³க³ஸ்ஸ உப்பாத³னேன. அனிமித்தா நாம நிச்சனிமித்தஸ்ஸ உக்³கா⁴டனதோ. ஏத்த² ச வுட்டா²னமேவ பமாணம், ந பரிக்³க³ஹத³ஸ்ஸனானி. அப்பணிஹிதா நாம ஸுக²பணிதி⁴யா படிபக்க²தோ. ஸுஞ்ஞதா நாம அத்ததி³ட்டி²யா உஜுபடிபக்க²த்தா ஸத்தஸுஞ்ஞதாய ஸுதி³ட்ட²த்தா. மக்³கோ³ அனிமித்தோ நாம விபஸ்ஸனாக³மனதோ. ப²லம் அனிமித்தம் நாம மக்³கா³க³மனதோ. விகப்போ ஆபஜ்ஜேய்ய ஆக³மனஸ்ஸ வவத்தா²னஸ்ஸ அபா⁴வேன, விபஸ்ஸனாய அனிமித்தாதி³னாமலாபோ⁴ அவவத்தி²தோதி அதி⁴ப்பாயோ. தேன வுத்தம் ‘‘தஸ்மா’’திஆதி³. யஸ்மா பன ஸா மக்³க³வுட்டா²னகாலே ஏவரூபாபி ஹோதீதி தஸ்ஸ வஸேன மக்³க³ப²லானம் விய ப²ஸ்ஸஸ்ஸபி பவத்திரூபத்தா யதா²வுத்தோ விகப்போ அனவஸரோதி த³ட்ட²ப்³ப³ம். தயோ ப²ஸ்ஸா பு²ஸந்தீதி புக்³க³லபே⁴த³வஸேன வுத்தம். ந ஹி ஏகம்யேவ புக்³க³லம் ஏதஸ்மிம் க²ணே தயோ ப²ஸ்ஸா பு²ஸந்தி. ‘‘திவிதோ⁴ ப²ஸ்ஸோ பு²ஸதீ’’தி வா ப⁴விதப்³ப³ம். யஸ்மா பன ‘‘நிரோத⁴ப²லஸமாபத்தியா வுட்டி²தஸ்ஸா’’திஆதி³ யஸ்ஸ யதா²வுத்தா தயோ ஏவ ப²ஸ்ஸா ஸம்ப⁴வந்தி, தஸ்ஸ அனவஸேஸக்³க³ஹணவஸேனேவ வுத்தம் ‘‘தயோ ப²ஸ்ஸா பு²ஸந்தீ’’தி.

நிப்³பா³னம் விவேகோ நாம ஸப்³ப³ஸங்கா²ரவிவித்தபா⁴வதோ. தஸ்மிம் விவேகே ஏகந்தேனேவ நின்னபோணத்தா ஏவ ஹி தே படிப்பஸ்ஸத்³த⁴ஸப்³பு³ஸ்ஸுக்கா உத்தமபுரிஸா சதுன்னம் க²ந்தா⁴னம் அப்பவத்திம் அனவஸேஸக்³க³ஹணலக்க²ணம் நிரோத⁴ஸமாபத்திம் ஸமாபஜ்ஜந்தீதி.

து³தியகாமபூ⁴ஸுத்தவண்ணனா நிட்டி²தா.

7. கோ³த³த்தஸுத்தவண்ணனா

349. நேஸந்தி அப்பமாணசேதோவிமுத்தி-ஆகிஞ்சஞ்ஞசேதோவிமுத்திஸஞ்ஞிதானம் ஜா²னானம். அத்தோ²பி நானாதி ஆனேத்வா யோஜனா. ப²ரணஅப்பமாணதாய ‘‘அப்பமாணா சேதோவிமுத்தீ’’தி லத்³த⁴னாமம் ப்³ரஹ்மவிஹாரஜ்ஜா²னந்தி ஆஹ ‘‘பூ⁴மந்தரதோ’’திஆதி³. ஆகிஞ்சஞ்ஞா சேதோவிமுத்தீதி ஆகிஞ்சஞ்ஞாயதனஜ்ஜா²னந்தி ஆஹ ‘‘பூ⁴மந்தரதோ’’திஆதி³. விபஸ்ஸனாதி அனிச்சானுபஸ்ஸனா, ஸப்³பா³பி வா. பமாணகரணோ நாம யஸ்ஸ ஸயம் உப்பஜ்ஜதி, தஸ்ஸ கு³ணாபா⁴வத³ஸ்ஸனவஸேன பமாணகரணதோ.

ப²ரணஅப்பமாணதாயாதி ப²ரணவஸேன அப்பமாணகோ³சரதாய. நிப்³பா³னம்பி அப்பமாணமேவ பமாணகோ³சரானம் கிலேஸானம் ஆரம்மணபா⁴வஸ்ஸபி அனாக³மனதோ. க²லந்தி க²லே பஸாரிதஸாலிஸீஸாதி³ப⁴ண்ட³ம். கிஞ்சேஹீதி மத்³த³ஸ்ஸு. தேனாஹ ‘‘மத்³த³னட்டோ²’’தி. ஆரம்மணபூ⁴தம், பலிபு³த்³த⁴கம் வா நத்தி² ஏதஸ்ஸ கிஞ்சனந்தி அகிஞ்சனம், அகிஞ்சனமேவ ஆகிஞ்சஞ்ஞம்.

ரூபனிமித்தஸ்ஸாதி கஸிணரூபனிமித்தஸ்ஸ. ந க³ஹிதாதி ஸரூபதோ ந க³ஹிதா, அத்த²தோ பன க³ஹிதா ஏவ. தேனாஹ – ‘‘ஸா ஸுஞ்ஞா ராகே³னாதிஆதி³வசனதோ ஸப்³ப³த்த² அனுபவித்தா²வா’’தி.

நானாதி ஸத்³த³வஸேன. ஏகத்தா²தி ஆரம்மணவஸேன ஆரம்மணபா⁴வேன ஏகஸபா⁴வா. தேனாஹ ‘‘அப்பமாணம்…பே… ஏகத்தா²’’தி. ஆரம்மணவஸேனாதி ஆரம்மணஸ்ஸ வஸேன. சத்தாரோ ஹி மக்³கா³, சத்தாரி ப²லானி ஆரம்மணவஸேன நிப்³பா³னபவிட்ட²தாய ஏகத்தா² ஏகாரம்மணா. அஞ்ஞஸ்மிம் பன டா²னேதி இத³ம் விஸும் விஸும் க³ஹேத்வா வுத்தம் அப்பமாணாதி³ பரியாயவுத்தம், நிப்³பா³னம் ஆரப்³ப⁴ பவத்தனதோ. தஸ்மா ‘‘அஞ்ஞஸ்மி’’ந்தி இத³ம் தேன தேன பரியாயேன தத்த² தத்த² ஆக³தபா⁴வம் ஸந்தா⁴ய வுத்தம்.

கோ³த³த்தஸுத்தவண்ணனா நிட்டி²தா.

8. நிக³ண்ட²னாடபுத்தஸுத்தவண்ணனா

350. ஆக³தாக³மோதி வாசுக்³க³தபரியத்தித⁴ம்மோ. விஞ்ஞாதஸாஸனோதி படிவித்³த⁴ஸத்து²ஸாஸனோ. தேனாஹ ‘‘அனாகா³மீ’’திஆதி³. நக்³க³போ⁴க்³க³ந்தி அவஸனபா⁴வேன நக்³க³ம், குடிலஜ்ஜா²ஸயதாய போ⁴க்³க³ம், ததோ ஏவ நிஸ்ஸிரிகம். நக்³க³தாய ஹி ஸோ ரூபேன நிஸ்ஸிரிகோ, போ⁴க்³க³தாய சித்தேன. ப⁴க³வதோ ஸத்³தா⁴யாதி ப⁴க³வதி ஸத்³தா⁴ய. தஸ்மிம் ஸத்³த³ஹனா ஓகப்பனா தஸ்ஸ ஸத்³தா⁴திபி வத்தப்³ப³தம் லப⁴தி. க³ச்சா²மீதி ஆக³ச்சா²மி, பு³ஜ்ஜா²மீதி அத்தோ². ஏதம் நிக³ண்டே²ன புச்சி²தமத்த²மாஹ.

காயம் உன்னாமேத்வாதி காயம் அப்³பு⁴ன்னாமேத்வா. குச்சி²ம் நீஹரித்வாதி பிட்டி²யா நின்னமனேன குச்சி²ம் புரதோ நீஹரித்வா. கீ³வம் பஸாரணவஸேன பக்³க³ய்ஹ பக்³க³ஹேத்வா ஸப்³ப³ம் தி³ஸம் பேக்க²மானோ. ஸப்³ப³மித³ம் நிக³ண்ட²ஸ்ஸ பஹட்டா²காரத³ஸ்ஸனத்த²ம் ‘‘இதா³னி ஸமணஸ்ஸ கோ³தமஸ்ஸ உபரி வாத³ம் ஆரோபேதும் லப்³ப⁴தீ’’தி. தேனாஹ ‘‘வாதம் வா ஸோ’’திஆதி³. ஸகாரணாதி யுத்திஸஹிதா. பஞ்ஹமக்³கோ³தி பஞ்ஹஸங்கா²தோ வீமம்ஸா, ஏவம் ப⁴விதப்³ப³ந்தி சித்தேனேவ பரிவீமம்ஸா பஞ்ஹா. ஏகோ உத்³தே³ஸோதி ஏகம் உத்³தி³ஸனம் அத்த²ஸ்ஸ ஸம்கி²த்தவசனம். வேய்யாகரணந்தி நித்³தி³ஸனம் அத்த²ஸ்ஸ விசாரேத்வா கத²னம். ஏவந்தி இமினா நயேன. ஸப்³ப³த்தா²தி ஸப்³பே³ஸு பஞ்ஹுத்³தே³ஸவேய்யாகரணேஸு அத்தோ² வித்தா²ரதோ வேதி³தப்³போ³.

நிக³ண்ட²னாடபுத்தஸுத்தவண்ணனா நிட்டி²தா.

9. அசேலகஸ்ஸபஸுத்தவண்ணனா

351. அலம் ஸமத்தோ² அரியபா⁴வாயாதி அலமரியோ. ஞேய்யஜானனட்டே²ன ஞாணமேவ பச்சக்க²தோ த³ஸ்ஸனட்டே²ன ஞாணத³ஸ்ஸனம், ஸோயேவ அதிஸயட்டே²ன ஞாணத³ஸ்ஸனவிஸேஸோ. பாவளா வுச்சதி ஆனிஸத³பதே³ஸோ, தம் பாவளம் ரஜோஹரணத்த²ம் நிப்போ²டீயதி ஏதாயாதி பாவளனிப்போ²டனா, மோரபிஞ்ச²வத்தி.

அசேலகஸ்ஸபஸுத்தவண்ணனா நிட்டி²தா.

10. கி³லானத³ஸ்ஸனஸுத்தவண்ணனா

352. மத்தராஜா நாம ஏகோ பு⁴ம்மதே³வோ பூ⁴தாதி⁴பதி ஸுராபோதலருக்க²னிவாஸீ. தேன வுத்தம் ‘‘மத்தராஜகாலே’’தி. ‘‘ஓஸதி⁴திணவனப்பதீஸூ’’தி வத்வா தே யதா²க்கமம் த³ஸ்ஸேந்தோ ‘‘ஹரீதகா…பே… ருக்கே²ஸு சா’’தி ஆஹ. பத்த²னாவஸேன சித்தம் ட²பேஹி. ஸமிஜ்ஜி²ஸ்ஸதீதி யதா²தி⁴ப்பாயம் ஸமிஜ்ஜி²ஸ்ஸதி. தேன ஹீதி யஸ்மா தம் தே³வாபி ஆஸன்னமரணம் மஞ்ஞந்தி, தஸ்மா ஸா வரமேவ ப⁴விஸ்ஸதி, தம் தும்ஹாகம் தீ³க⁴ரத்தம் ஹிதாய ஸுகா²ய ப⁴விஸ்ஸதீதி அதி⁴ப்பாயோ.

கி³லானத³ஸ்ஸனஸுத்தவண்ணனா நிட்டி²தா.

சித்தஸம்யுத்தவண்ணனா நிட்டி²தா.