6. மோக்³க³ல்லானஸம்யுத்தம்

1-8. பட²மஜ்ஜா²னபஞ்ஹஸுத்தாதி³வண்ணனா

332-339. காமஸஹக³தேஸு ஸஞ்ஞாமனஸிகாரேஸு உபட்ட²ஹந்தேஸு ப்³யாபாதா³தி³ஸஹக³தாபி ஸஞ்ஞாமனஸிகாரா யதா²பச்சயம் உபட்ட²ஹந்தியேவாதி வுத்தம் ‘‘காமஸஹக³தாதி பஞ்சனீவரணஸஹக³தா’’தி. நீவரணானஞ்ஹேத்த² நித³ஸ்ஸனமத்தமேதம், யதி³த³ம் காமக்³க³ஹணம். பஹீனாவஸேஸா சேத்த² நீவரணா வேதி³தப்³பா³, தஸ்மா பஞ்சக்³க³ஹணம் ந கத்தப்³ப³ம். தஸ்ஸாதி மஹாமோக்³க³ல்லானத்தே²ரஸ்ஸ ஸந்ததோ உபட்ட²ஹிம்ஸு அசிண்ணவஸிதாய. தேனாஹ ‘‘ஹானபா⁴கி³யம் நாம அஹோஸீ’’தி. ஆரம்மண…பே… ஸஹக³தந்தி வுத்தம் இதரேஸம் அபா⁴வதோ.

பட²மஜ்ஜா²னபஞ்ஹஸுத்தாதி³வண்ணனா நிட்டி²தா.

9. அனிமித்தபஞ்ஹஸுத்தவண்ணனா

340. விபஸ்ஸனாஸமாதி⁴ம்யேவ, ந ப²லஸமாதி⁴ம். சே²ஜ்ஜகிச்சம் ந நிப்ப²ஜ்ஜதி அவிச்சே²த³வஸேன அப்பவத்தனதோ. நிகந்தீதி விபஸ்ஸனம் அஸ்ஸாதே³ந்தீ பவத்ததண்ஹா. ஸாதே⁴தும் நாஸக்கி² உபக்கிலிட்ட²த்தா. நிமித்தானுஸாரீதி நிச்சஸுக²அத்தனிமித்தானம் அபூரணதோ ராக³தோ³ஸமோஹனிமித்தானிபேத்த² நிமித்தானேவ. வுட்டா²ன…பே… ஸமாதி⁴ந்தி ஏதேன யாவ மக்³கோ³ நாதி⁴க³தோ, தாவ வுட்டா²னகா³மினிவிபஸ்ஸனமனுயுஞ்ஜந்தோபி யதா²ரஹம் அனிமித்தம் அப்பணிஹிதம் ஸுஞ்ஞதம் சேதோஸமாதி⁴ம் அனுயுத்தோ விஹரதீதி வத்தப்³ப³தம் அரஹதீதி த³ஸ்ஸேதி. விபஸ்ஸனாஸம்பயுத்தந்தி விபஸ்ஸனாஸங்கா²தஞாணஸம்பயுத்தம். சேதோஸமாதி⁴ந்தி சித்தஸீஸேன விபஸ்ஸனாஸமாதி⁴மாஹ. உபரிமக்³க³ப²லஸமாதி⁴ந்தி பட²மமக்³க³ஸமாதி⁴ஸ்ஸ பகே³வ அதி⁴க³தத்தா.

அனிமித்தபஞ்ஹஸுத்தவண்ணனா நிட்டி²தா.

10-11. ஸக்கஸுத்தாதி³வண்ணனா

341-342. அவேச்சப்பஸாதே³னாதி வத்து²த்தயம் யாதா²வதோ ஞத்வா உப்பன்னபஸாதே³ன, மக்³கே³னாக³தபஸாதே³னாதி அத்தோ². ஸோ பன கேனசி அஸம்ஹாரியோ அஸம்பவேதீ⁴தி ஆஹ ‘‘அசலப்பஸாதே³னா’’தி. அபி⁴ப⁴வந்தி அத்தனோ புஞ்ஞானுபா⁴வேன.

ஸக்கஸுத்தாதி³வண்ணனா நிட்டி²தா.

மோக்³க³ல்லானஸம்யுத்தவண்ணனா நிட்டி²தா.