18. ஸமுத்³த³வக்³கோ³

1. பட²மஸமுத்³த³ஸுத்தவண்ணனா

228. யதி³ ‘‘து³ப்பூரணட்டே²ன ஸமுத்³த³னட்டே²னா’’தி இமினா அத்த²த்³வயேன ஸாக³ரோ ‘‘ஸமுத்³தோ³’’தி வுச்சதி, சக்கு²ஸ்ஸேவேதம் நிப்பரியாயதோ யுஜ்ஜதீதி த³ஸ்ஸேதும் ‘‘யதீ³’’திஆதி³ வுத்தம். தத்த² து³ப்பூரணட்டே²னாதி பூரேதும் அஸக்குணேய்யபா⁴வேன. ஸமுத்³த³னட்டே²னாதி ஸப்³ப³ஸோ உபரூபரிபக்கி²த்தக³மனேன. மஹாக³ங்கா³தி³மஹானதீ³னம் மஹதா உத³கோகே⁴ன அனுஸம்வச்ச²ரம் அனுபக்க²ந்த³மானோபி ஹி ஸமுத்³தோ³ பாரிபூரிம் ந க³ச்ச²தி, யஞ்ச பூ⁴மிபதே³ஸம் ஓத்த²ரதி, தம் ஸமுத்³த³பா⁴வம் நேதி, அபா⁴வம் வா பாபுணாதி அபயாதே ஸமுத்³தோ³த³கே, தம் வா அனுத³கபா⁴வபத்தியா அதத²மேவ ஹோதி. காமஞ்சேஸ து³ப்பூரணட்டோ² ஸமுத்³த³னட்டோ² ஸாக³ரே லப்³ப⁴தி, ததா²பி தம் த்³வயம் சக்கு²ஸ்மிம்யேவ விஸேஸதோ லப்³ப⁴தீதி த³ஸ்ஸேந்தோ ‘‘தஸ்ஸ ஹீ’’திஆதி³மாஹ. ஸமோஸரந்தந்தி ஸப்³ப³ஸோ நீலாதி³பா⁴கே³ஹி ஓஸரந்தம், ஆபாத²ம் ஆக³ச்ச²ந்தந்தி அத்தோ². காதும் ந ஸக்கோதி து³ப்பூரணீயத்தா. ஸதோ³ஸக³மனேன க³ச்ச²தி ஸத்தஸந்தானஸ்ஸ து³ஸ்ஸனதோ. து³ஸ்ஸனட்ட²தா சஸ்ஸ சக்கு²த்³வாரிகதண்ஹாவஸேன வேதி³தப்³பா³. யதா² ஸமுத்³தே³ அபராபரம் பரிவத்தமானோ ஊமியா வேகோ³ ஸமுத்³த³ஸ்ஸாதி வுச்சதி, ஏவம் சக்கு²ஸமுத்³த³ஸ்ஸ புரதோ அபராபரம் பரிவத்தமானம் நீலாதி³பே⁴த³ம் ரூபாரம்மணம் சக்கு²ஸ்ஸாதி வத்தப்³ப³தம் அரஹதி அனஞ்ஞஸாதா⁴ரணத்தாதி வுத்தம் ‘‘ரூபமயோ வேகோ³’’தி. அஸமபேக்கி²தேதி ஸம்மாத³ஸ்ஸனே ரூபே மனாபபா⁴வம் அமனாபபா⁴வஞ்ச க³ஹேத்வா, ‘‘இத³ம் நாம மயா தி³ட்ட²’’ந்தி அனுபதா⁴ரேந்தஸ்ஸ கேவலம் ஸமூஹக⁴னவஸேன க³ண்ஹந்தஸ்ஸ க³ஹணம் அஸமபேக்க²னம். ஸஹதீதி அதி⁴ப⁴வதி, தம்னிமித்தம் கஞ்சி விகாரம் நாபஜ்ஜதி.

ஊமீதி வீசியோ. ஆவட்டோ ஆவட்டனவஸேன பவத்தம் உத³கம். கா³ஹரக்க²ஸமகராத³யோ கா³ஹரக்க²ஸோ. யதா² ஸமுத்³தே³ ஊமியோ உபரூபரி வத்தமானா அத்தனி பதிதபுக்³க³லம் அஜ்ஜோ²த்த²ரித்வா அனயப்³யஸனம் ஆபாதே³ந்தி, ததா² ஆவட்டகா³ஹரக்க²ஸா. ஏவமேதே ராகா³த³யோ கிலேஸா ஸயம் உப்பன்னகஸத்தே அஜ்ஜோ²த்த²ரித்வா அனயப்³யஸனம் ஆபாதே³ந்தி, கிலேஸுப்பத்தினிமித்ததாய ஸத்தானம் அனயப்³யஸனாபத்திஹேதுபூ⁴தஸ்ஸ ஊமிப⁴யஸ்ஸ ஆரம்மணவஸேன சக்கு²ஸமுத்³தோ³ ‘‘ஸஊமிஸாவட்டோ ஸகா³ஹோ ஸரக்க²ஸோ’’தி வுத்தோ.

ஊமிப⁴யந்தி ஏத்த² பா⁴யதி ஏதஸ்மாதி ப⁴யம், ஊமீவ ப⁴யம் ஊமிப⁴யம். குஜ்ஜ²னட்டே²ன கோதோ⁴. ஸ்வேவ சித்தஸ்ஸ ச அபி⁴மத்³த³னவஸேனுப்பாத³னத்தே²ன த³ள்ஹம் ஆயாஸனட்டே²ன உபாயாஸோ. ஏத்த² ச அனேகவாரம் பவத்தித்வா ஸத்தே அஜ்ஜோ²த்த²ரித்வா ஸீஸம் உக்கி²பிதும் அத³த்வா அனயப்³யஸனனிப்பா²த³னேன கோதூ⁴பாயாஸஸ்ஸ ஊமிஸதி³ஸதா த³ட்ட²ப்³பா³. ததா² காமகு³ணா கிலேஸாபி⁴பூ⁴தே ஸத்தே மானே விய ரூபாதி³விஸயஸங்கா²தே அத்தனி ஸம்ஸாரேத்வா யதா² ததோ ப³ஹிபூ⁴தே நேக்க²ம்மே சித்தம்பி ந உப்பஜ்ஜதி, ஏவம் ஆவட்டேத்வா ப்³யஸனாபாத³னேன ஆவட்டஸதி³ஸதா த³ட்ட²ப்³பா³. யதா³ பன கா³ஹரக்க²ஸோ ஆரக்க²ரஹிதம் அத்தனோ கோ³சரபூ⁴மிக³தம் புரிஸம் அபி⁴பு⁴ய்ய க³ஹேத்வா அகோ³சரே டி²தம்பி கோ³சரம் நேத்வா பே⁴ரவரூபத³ஸ்ஸனாதி³னா அத்தனோ உபக்கமம் காதும் அஸமத்த²ம் கத்வா அன்வாவிஸித்வா வண்ணப³லபோ⁴க³ஆயுஸுகே²ஹி வியோஜேத்வா மஹந்தம் அனயப்³யஸனம் ஆபாதே³தி, ஏவம் மாதுகா³மோபி யோனிஸோமனஸிகாரரஹிதம் அவீரபுரிஸம் அத்தனோ ரூபாதீ³ஹி பலோப⁴னவஸேன அபி⁴பு⁴ய்ய க³ஹேத்வா வா வீரஜாதியம்பி இத்தி²குத்தபூ⁴தேஹி அத்தனோ ஹாவபா⁴வவிலாஸேஹி இத்தி²மாயாய அன்வாவிஸித்வா வா அவஸம் அத்தனோ உபகாரத⁴ம்மே ஸீலாத³யோ ஸம்பாதே³தும் அஸமத்த²ம் கரோந்தோ கு³ணவண்ணாதீ³ஹி வியோஜேத்வா மஹந்தம் அனயப்³யஸனம் ஆபாதே³தி, ஏவம் மாதுகா³மஸ்ஸ கா³ஹரக்க²ஸஸதி³ஸதா த³ட்ட²ப்³பா³. ஊமிப⁴யந்தி லக்க²ணவசனம். யதா² ஹி ஊமி பா⁴யிதப்³ப³ட்டே²ன ப⁴யம், ஏவம் ஆவட்டகா³ஹரக்க²ஸாபீதி ஊமிஆதி³ப⁴யேன ஸப⁴யந்தி அத்தோ² வேதி³தப்³போ³. அந்தம் அவஸானம் க³தோ, ஏவம் பாரம் நிப்³பா³னம் க³தோதி வுச்சதி.

பட²மஸமுத்³த³ஸுத்தவண்ணனா நிட்டி²தா.

2-3. து³தியஸமுத்³த³ஸுத்தாதி³வண்ணனா

229-230. கிலேஸானம் அல்லபா⁴வூபனயனந்தி ஆஹ ‘‘தேமனட்டே²னா’’தி. அரியஸாவகேதி அனாகா³மினோ. தே ஹி காமப⁴வவஸேன அதிந்ததாய ந ஸமுன்னா. தயோ மச்சூதி கிலேஸாபி⁴ஸங்கா²ரதே³வபுத்தமாரே. தீஹி உபதீ⁴ஹீதி கிலேஸாபி⁴ஸங்கா²ரகாமகு³ணானம் வஸேன தீஹி உபதீ⁴ஹி. க²ந்து⁴பதி⁴னா பன ஸோ ந நிரூபதி⁴ ஸஉபாதி³ஸேஸஸ்ஸேவ நிப்³பா³னஸ்ஸ அதி⁴க³தத்தா. க³தோதி படிபத்திக³மனேன க³தோ.

து³தியஸமுத்³த³ஸுத்தாதி³வண்ணனா நிட்டி²தா.

4-6. கீ²ரருக்கோ²பமஸுத்தாதி³வண்ணனா

231-233. அப்பஹீனட்டே²னாதி மக்³கே³ன அஸமுக்³கா⁴டிதபா⁴வேன. அத்தீ²தி விஜ்ஜதி. ஸதி பச்சயே விஜ்ஜமானகிச்சகரணதோ பரியுட்டா²னம் அப்பகம் மூஸிகாவிஸம் விய பரித்தம் நாம ஹோதி அப்பானுபா⁴வத்தா. ஏவரூபாபீதி அப்பகாபி. அஸ்ஸாதி அப்பஹீனகிலேஸஸ்ஸ. அதி⁴மத்தானந்தி இட்டா²னம் ரஜனீயானம், வத்து²வஸேன பரித்தகம்பி இட்டா²ரம்மணம் அதி⁴மத்தமேவ. தேனாஹ ‘‘நக²பிட்டி²ப்பமாணம்பீ’’திஆதி³. த³ஹரோதிஆதீ³னி தீணிபி பதா³னி. ஆபி⁴ந்தே³ய்யாதி பி⁴ந்தே³ய்ய. தம் உப⁴யந்தி தம் சக்கு²ரூபந்தி உப⁴யம்பி ஆயதனம்.

கீ²ரருக்கோ²பமஸுத்தாதி³வண்ணனா நிட்டி²தா.

7. உதா³யீஸுத்தவண்ணனா

234. இதிபீதி இமினாபி காரணேன. அனிச்சேனாதி அனிச்சபா⁴வேன அனத்தலக்க²ணம் கதி²தம். யஸ்மா ஹேதுபச்சயா விஞ்ஞாணஸ்ஸ உப்பத்தி ஸதி ச உப்பாதே³ நிரோதே⁴ன ப⁴விதப்³ப³ம், உப்பாத³வயவந்ததாய அனிச்சம் விஞ்ஞாணம், யதி³ ச அத்தா ஸியா பச்சயேஹி வினா ஸிஜ்ஜே²ய்ய, ந ச ததா²ஸ்ஸ ஸித்³தி⁴, தஸ்மா ‘‘விஞ்ஞாணம் அனத்தா’’தி அனிச்சதாய அனத்ததா கதி²தா.

உதா³யீஸுத்தவண்ணனா நிட்டி²தா.

8. ஆதி³த்தபரியாயஸுத்தவண்ணனா

235. கிலேஸானம் அனு அனு ப்³யஞ்ஜனதோ பரிப்³யத்தியா உப்பத்திபச்சயபா⁴வதோ அனுப்³யஞ்ஜனம், ஹத்த²பாதா³தி³அவயவாதி ஆஹ – ‘‘ஹத்தா² ஸோப⁴னா’’திஆதி³. நிமித்தக்³கா³ஹோதி கிலேஸுப்பத்தியா நிமித்தபூ⁴தோ கா³ஹோ. ஸம்ஸந்தே³த்வா க³ஹணந்தி அவயவே ஸமோதா⁴னேத்வா ‘‘இத்தி²புரிஸோ’’திஆதி³னா ஏகஜ்ஜ²ம் க³ஹணம். விப⁴த்திக³ஹணந்தி விபா⁴கே³ன அனவஸேஸக்³க³ஹணம். கும்பீ⁴லஸதி³ஸோதி கும்பீ⁴லகா³ஹஸதி³ஸோ. தேனாஹ – ‘‘ஸப்³ப³மேவ க³ண்ஹாதீ’’தி ஹத்த²பாதா³தீ³ஸு தம் தம் கோட்டா²ஸம் விப⁴ஜித்வா க³ஹணம் ரத்தபாஸதி³ஸோ ஜலூககா³ஹஸதி³ஸோ. ஏகஜவனவாரேபி லப்³ப⁴ந்தீதி இத³ம் சக்கு²த்³வாரானுஸாரேன உப்பன்னமனோத்³வாரிகஜவனம் ஸந்தா⁴ய வுத்தம்.

நிமித்தஸ்ஸாதே³ன க³ந்தி²தந்தி யதா²வுத்தே நிமித்தே அஸ்ஸாத³கா³ஹேன க³ந்தி²தம் ஸம்ப³த்³த⁴ம். ப⁴வங்கே³னேவாதி மூலப⁴வங்கே³னேவ. கிலேஸப⁴யம் த³ஸ்ஸேந்தோதி ததா² கிலேஸுப்பத்தியா ஸதி அகுஸலசித்தேன அந்தரிதம் சே மரணசித்தம் ப⁴வேய்ய, ஏகந்ததோ நிரயே வா திரச்சா²னயோனியா வா உப்பத்தி ஸியாதி கிலேஸானம் பா⁴யிதப்³ப³ம் த³ஸ்ஸேந்தோ. ‘‘ஸமயவஸேன வா ஏவம் வுத்த’’ந்தி வத்வா தமத்த²ம் விவரந்தோ ‘‘சக்கு²த்³வாரஸ்மிஞ்ஹீ’’திஆதி³மாஹ. ரத்தசித்தம் வாதி ராக³வஸேன ரத்தசித்தம் வா. து³ட்ட²சித்தேன கத²ம் ஆரம்மணரஸானுப⁴வனந்தி? தோ³மனஸ்ஸவேத³னுப்பத்தி ஏவ தஸ்ஸ ஆரம்மணரஸானுப⁴வனம் த³ட்ட²ப்³ப³ம். இமஸ்ஸ ஸமயஸ்ஸாதி மரணஸமயஸ்ஸ.

உபி⁴ன்னம் நாஸச்சி²த்³தா³னம் மஜ்ஜே² டி²த-அட்டி²துத³னம் ஸஹ கு²ரட்டே²ன சி²ந்த³னம். த³ண்ட³கவாஸீதி தீ³க⁴த³ண்ட³கா மஹாவாஸி. நிபஜ்ஜித்வா நித்³தோ³க்கமனந்தி இமினா பசலாயிகனித்³த³ம் படிக்கி²பதி. தத்த² ஹி கதா³சி அந்தரா மிச்சா²விதக்கானம் ஸல்லகானம் அவஸரோ ஸியா, நத்தே²வ நிபஜ்ஜித்வா மஹானித்³த³ம் ஓக்கந்தகாலே. விதக்கானந்தி மிச்சா²விதக்கானம்.

ஆதி³த்தபரியாயஸுத்தவண்ணனா நிட்டி²தா.

9-10. பட²மஹத்த²பாதோ³பமஸுத்தாதி³வண்ணனா

236-237. நவமம் ‘‘பஞ்ஞாயதீ’’தி வுச்சமானே பு³ஜ்ஜ²னகானம் அஜ்ஜா²ஸயவஸேன வுத்தந்தி ஆஹ – ‘‘த³ஸமே ந ஹோதீதி வுச்சமானே’’திஆதி³. ஏத்தகமேவ ஹி த்³வின்னம் ஸுத்தானம் விஸேஸோதி.

பட²மஹத்த²பாதோ³பமஸுத்தாதி³வண்ணனா நிட்டி²தா.

ஸமுத்³த³வக்³க³வண்ணனா நிட்டி²தா.