1. கம்மனிரோத⁴ஸுத்தவண்ணனா

146. ஸம்பதி விஜ்ஜமானஸ்ஸ சக்கு²ஸ்ஸ தம்னிப்³ப³த்தஸ்ஸ கம்மஸ்ஸ ச அதி⁴ப்பேதத்தா ‘‘ந சக்கு² புராணம், கம்மமேவ புராண’’ந்தி வத்வா யதா² தஸ்ஸ சக்கு²ஸ்ஸ புராணபரியாயோ வுத்தோ, தம் த³ஸ்ஸேந்தோ ஆஹ – ‘‘கம்மதோ பனா’’திஆதி³. பச்சயனாமேனாதி புரிமஜாதிஸம்ஸித்³த⁴த்தா ‘‘புராண’’ந்தி வத்தப்³ப³ஸ்ஸ பச்சயபூ⁴தஸ்ஸ கம்மஸ்ஸ நாமேன. ஏவம் வுத்தந்தி ‘‘புராணகம்ம’’ந்தி ஏவம் வுத்தம். பச்சயேஹி அபி⁴ஸமாக³ந்த்வா கதந்தி தண்ஹாவிஜ்ஜாதி³பச்சயேஹி அபி⁴முக²பா⁴வேன ஸமாக³ந்த்வா ஸமேச்ச நிப்³ப³த்திதம். சேதனாயாதி கம்மசேதனாய. பகப்பிதந்தி அபி⁴ஸமீஹிதம். வேத³னாயாதி அத்தானம் நிஸ்ஸாய ஆரம்மணம் கத்வா பவத்தாய வேத³னாய. வத்தூ²தி நிப்³ப³த்திகாரணம் பவத்தட்டா²னந்தி விபஸ்ஸனாபஞ்ஞாய பஸ்ஸிதப்³ப³ம். கம்மஸ்ஸ நிரோதே⁴னாதி கிலேஸானம் அனுப்பாத³னிரோத⁴ஸித்³தே⁴ன கம்மஸ்ஸ நிரோதே⁴ன. விமுத்திம் பு²ஸதீதி அரஹத்தப²லவிமுத்திம் பாபுணாதி. ஆரம்மணபூ⁴தோ நிரோதோ⁴ நிப்³பா³னம் ‘‘கம்மனிரோதோ⁴’’தி வுச்சதி, ‘‘கம்மம் நிருஜ்ஜ²தி ஏத்தா²’’தி கத்வா. ‘‘ஜா²யத², பி⁴க்க²வே, மா பமாத³த்தா²’’தி வுத்தத்தா ‘‘புப்³ப³பா⁴க³விபஸ்ஸனா கதி²தா’’தி வுத்தம்.

கம்மனிரோத⁴ஸுத்தவண்ணனா நிட்டி²தா.