3. பட²மரூபாராமஸுத்தவண்ணனா

136. ஸம்முதி³தா ஸம்மோத³ப்பத்தா, பமோதி³தா ஸஞ்ஜாதபமோதா³. து³க்கா²தி து³க்க²வந்தோ ஸஞ்ஜாதது³க்கா². தேனாஹ ‘‘து³க்கி²தா’’தி. ஸுக²ம் ஏதஸ்ஸ அத்தீ²தி ஸுகோ², ஸுகீ². தேனாஹ ‘‘ஸுகி²தோ’’தி. யத்தகா ரூபாத³யோ த⁴ம்மா லோகே அத்தீ²தி வுச்சதி. பஸ்ஸந்தானந்தி ஸச்சபடிவேதே⁴ன ஸம்மதே³வ பஸ்ஸந்தானம். ‘‘பச்சனீகம் ஹோதீ’’தி வத்வா தம் பச்சனீகபா⁴வம் த³ஸ்ஸேதும் ‘‘லோகோ ஹீ’’திஆதி³ வுத்தம். அஸுபா⁴தி ‘‘ஆஹூ’’திபத³ம் ஆனேத்வா ஸம்ப³ந்தோ⁴. ஸப்³ப³மேதந்தி ‘‘ஸுக²ம் தி³ட்ட²மரியேபி⁴…பே… தத³ரியா ஸுக²தோ விதூ³’’தி ச வுத்தம். ஸப்³ப³மேதம் நிப்³பா³னமேவ ஸந்தா⁴ய வுத்தம். நிப்³பா³னமேவ ஹி ஏகந்ததோ ஸுக²ம் நாம.

பஞ்சனவுதிபாஸண்டி³னோ தேஸஞ்ச பாஸண்டி³பா⁴வோ பபஞ்சஸூத³னிட்ட²கதா²யம் பகாஸிதோ ஏவ. கிலேஸனீவரணேன நிவுதானந்தி கிலேஸக²ந்தா⁴ கிலேஸனீவரணம், தேன நிவாரிதானம். நிப்³பா³னத³ஸ்ஸனம் நாம அரியமக்³கோ³, தேன தஸ்ஸ படிவிஜ்ஜ²னஞ்ச காளமேக⁴அவச்சா²தி³தம் விய சந்த³மண்ட³லம்.

பரிச்சி²ந்தி³த்வாதி அஸுப⁴பா⁴வபரிச்சி²ந்த³னேன ஸம்மாவிஞ்ஞாணத³ஸ்ஸனேன ச பரிச்சி²ந்தி³த்வா. மக்³க³த⁴ம்மஸ்ஸாதி அரியமக்³க³த⁴ம்மஸ்ஸ.

அனுபன்னேஹீதி அனு அனு அவிஹாய படிபன்னேஹி. கோ நு அஞ்ஞோ ஜானிதும் அரஹதி, அஞ்ஞோ ந ஜானாதீதி த³ஸ்ஸேதி.

பட²மரூபாராமஸுத்தவண்ணனா நிட்டி²தா.