13. க³ஹபதிவக்³கோ³

1-3. வேஸாலீஸுத்தாதி³வண்ணனா

124-126. த்³வீஸூதி இமஸ்மிம் க³ஹபதிவக்³கே³ பட²மது³தியேஸு ததியே ச வுத்தத்த²மேவ பாட²ஜாதம் அபுப்³ப³ம் நத்தீ²தி அத்தோ².

4-5. பா⁴ரத்³வாஜஸுத்தாதி³வண்ணனா

127-128. காமம் அஞ்ஞேபி பப்³ப³ஜிதா யுத்தகாலே பிண்ட³ம் உலமானா சரந்தியேவ, அயம் பன ஓத³ரிதோ, தேனேவ காரணேன பப்³ப³ஜிதோதி த³ஸ்ஸேந்தோ ‘‘பிண்ட³ம் உலமானோ’’திஆதி³மாஹ. க⁴ம்ஸந்தோவாதி பூ⁴மியம் க⁴ம்ஸந்தோ ஏவ பத்தம் ட²பேதி. பரிக்கீ²ணந்தி ஸமந்ததோ பரிக்கீ²ணம். நாளிகோ …பே… ஜாதம், அதிரேகபத்தட்ட²பனஸ்ஸ படிக்கி²த்தத்தா அஞ்ஞம் ந க³ண்ஹாதி. ‘‘இந்த்³ரியபா⁴வனந்தி சக்கா²தி³பஞ்சிந்த்³ரியபா⁴வன’’ந்தி கேசி வத³ந்தி, ததா² விபஸ்ஸனாபி⁴னிவேஸம் கத்வா உபரிவிபஸ்ஸனம் வட்³டி⁴த்வாதி அதி⁴ப்பாயோ. அபரே பன ‘‘ஸத்³தா⁴பஞ்சமானம் இந்த்³ரியானம் வஸேன விபஸ்ஸனாபி⁴னிவேஸம் கத்வா தேன ஸுகே²ன அபி⁴ஞ்ஞாபஹானானம் ஸம்பாத³னவஸேன இந்த்³ரியம் பா⁴வேத்வா’’தி வத³ந்தி.

உபஸங்கமதீதி ஏத்த² யதா² ஸோ ராஜா உபஸங்கமி, தம் ஆக³மனதோ பட்டா²ய த³ஸ்ஸேதும் ‘‘தே²ரோ கிரா’’திஆதி³ ஆரத்³த⁴ம். மஹாபானம் நாம அஞ்ஞம் கம்மம் அகத்வா பானபஸுதோ ஹுத்வா ஸத்தாஹம் தத³னுரூபபரிஜனஸ்ஸ ஸுராபிவனம். தேனாஹ ‘‘மஹாபானம் நாம பிவித்வா’’தி. ஸாலிது²ஸேஹீதி ரத்தஸாலிது²ஸேஹி. ட³ய்ஹமானம் விய கிபில்லிகத³ம்ஸனஜாதாஹி து³க்க²வேத³னாஹி. முக²ஸத்தீஹி விஜ்ஜி²ம்ஸு வல்லப⁴தாய. இத்தி²லோலோ ஹி ஸோ ராஜா.

பவேணிந்தி தேஸம் ஸமாதா³னபவேணிம் ப்³ரஹ்மசரியபப³ந்த⁴ம். படிபாதே³ந்தீதி ஸம்பாதே³ந்தி. க³ருகாரம்மணந்தி க³ருகாதப்³ப³ஆரம்மணம், அவீதிக்கமிதப்³பா³ரம்மணந்தி அத்தோ². அஸ்ஸாதி ரஞ்ஞோ. சித்தம் அனோதரந்தந்தி பஸாத³வீதி²ம் அனோதரந்தம் அனுபக³ச்ச²ந்தம். விஹேடே²துந்தி விபா³தி⁴தும்.

லோப⁴ஸ்ஸ அபராபருப்பத்தியா ப³ஹுவசனவஸேன ‘‘லோப⁴த⁴ம்மா’’தி வுத்தம். உப்பஜ்ஜந்தீதிபி அத்தோ² யேவ, யஸ்மா உப்பஜ்ஜமானோ லோப⁴த⁴ம்மோ அத்தனோ ஹேதுபச்சயே பரிக்³க³ஹாபேந்தோ ஜானாபேந்தோ விய ஸஹதி பவத்ததீதி. இமமேவ காயந்தி ஏத்த² ஸமூஹத்தே² ஏவ காய-ஸத்³தோ³ க³ப்³பா⁴ஸயாதி³ட்டா²னேஸு உப்பஜ்ஜனத⁴ம்மஸமூஹவிஸயத்தா, இதரே பன காயூபலக்கி²ததாய ‘‘காயோ’’தி வேதி³தப்³பா³. உத்தானமேவ ஹேட்டா² வுத்தனயத்தா.

பா⁴ரத்³வாஜஸுத்தாதி³வண்ணனா நிட்டி²தா.

6. கோ⁴ஸிதஸுத்தவண்ணனா

129. ரூபா ச மனாபாதி நீலாதி³பே⁴தா³ ரூபத⁴ம்மா ச மனஸா மனுஞ்ஞா பியரூபா ஸம்விஜ்ஜந்தி, இத³ஞ்ச ஸுக²வேத³னீயஸ்ஸ ப²ஸ்ஸஸ்ஸ ஸபா⁴வத³ஸ்ஸனத்த²ம். ஏவம் ‘‘ரூபா ச மனாபா உபேக்கா²வேத³னியா’’தி ஏத்தா²பி யதா²ரஹம் வத்தப்³ப³ம். சக்கு²விஞ்ஞாண…பே… ப²ஸ்ஸந்தி வுத்தம். உபனிஸ்ஸயகோடியா ஹி சக்கு²விஞ்ஞாணஸம்பயுத்தப²ஸ்ஸோ ஸுக²வேத³னீயோ, ந ஸஹஜாதகோடியா. தேனாஹ – ‘‘ஏகம் ப²ஸ்ஸம் படிச்ச ஜவனவஸேன ஸுக²வேத³னா உப்பஜ்ஜதீ’’தி. ஸேஸபதே³ஸூதி ‘‘ஸம்விஜ்ஜதி கோ², க³ஹபதி, ஸோததா⁴தூ’’தி ஆக³தேஸு பஞ்சஸு கோட்டா²ஸேஸு.

தேவீஸதி தா⁴துயோ கதி²தா ச²ன்னம் த்³வாரானம் வஸேன விப⁴ஜ்ஜக³ஹணேன. வத்து²னிஸ்ஸிதந்தி ஹத³யவத்து²னிஸ்ஸிதம். பஞ்சத்³வாரே வீஸதி, மனோத்³வாரே திஸ்ஸோ ஏவம் தேவீஸதி.

கோ⁴ஸிதஸுத்தவண்ணனா நிட்டி²தா.

7-8. ஹாலித்³தி³கானிஸுத்தாதி³வண்ணனா

130-131. தம் இத்தே²தந்தி சக்கு²னா யம் ரூபம் தி³ட்ட²ம், தம் இத்த²ந்தி அத்தோ². தம் ஸுக²வேத³னியந்தி தம் ஸுக²வேத³னாய உபனிஸ்ஸயகோடியா பச்சயபூ⁴தம் சக்கு²விஞ்ஞாணஞ்சேவ, யோ ச யதா²ரஹம் உபனிஸ்ஸயகோடியா வா, அனந்தரோ சே அனந்தரகோடியா வா, ஸஹஜாதோ சே ஸம்பயுத்தகோடியா வா, ஸுக²வேத³னாய பச்சயோ ப²ஸ்ஸோ. தம் ஸுக²வேத³னியஞ்ச ப²ஸ்ஸம் படிச்ச உப்பஜ்ஜதி ஸுக²வேத³னாதி யோஜனா. ஏஸ நயோ ஸப்³ப³த்த² ஸப்³பே³ஸு ஸேஸேஸு ஸத்தஸு வாரேஸு. மனோதா⁴துயேவ வா ஸமானாதி அபி⁴த⁴ம்மனயேன. ஸுத்தந்தனயேன பன ஸுஞ்ஞதட்டே²ன நிஸ்ஸத்தனிஜ்ஜீவட்டே²ன ச மனோதா⁴துஸமஞ்ஞம் லப⁴தேவ. அட்ட²மம் உத்தானமேவ ஹேட்டா² வுத்தனயத்தா.

ஹாலித்³தி³கானிஸுத்தாதி³வண்ணனா நிட்டி²தா.

9. லோஹிச்சஸுத்தவண்ணனா

132. தேபி மாணவகாத்வேவ வுத்தா, ந ப்³ராஹ்மணகுமாரா ஏவ. ஸேலேய்யகானீதி அஞ்ஞமஞ்ஞம் ஸிலிஸ்ஸனலங்க⁴னகீளனானி.

உபட்டா²னவஸேன இப⁴ம் ஹரந்தீதி இப்³பா⁴, ஹத்தி²கோ³பகா. தே பன நிஹீனகுடும்ப³ஸ்ஸ போ⁴க்³க³ம் உபாதா³ய க³ஹபதிபா⁴வம் உபாதா³ய ‘‘க³ஹபதிகா’’திபி வுச்சந்தீதி ஆஹ ‘‘க³ஹபதிகா’’தி. கண்ஹாதி கண்ஹாபி⁴ஜாதிகா. ரட்ட²ம் ப⁴ரந்தீதி யஸ்மிம் ரட்டே² வஸந்தி, தஸ்ஸ ரட்ட²ஸ்ஸ ப³லிம் ப⁴ரணேன, அத்தனோ வா குடும்ப³ஸ்ஸ ப⁴ரணேன ப⁴ரதா. பரியாயந்தாதி பரிதோ ஸம்சரந்தா கீளந்தி.

ஸீலஜேட்ட²காதி ஸீலப்பதா⁴னா. யே புராணம் ஸரந்தி, தே ஸீலுத்தமா அஹேஸும். த்³வாரானி சக்கா²தி³த்³வாரானி.

அபக்கமித்வா அபேதா விரஹிதா ஹுத்வா. விஸமானீதி விக³தஸமானி து³ச்சரிதஸபா⁴வானி. நானாவித⁴த³ண்டா³ நானாவித⁴த³ண்ட³னிபாதா.

அனாஹாரகாதி கிஞ்சி அபு⁴ஞ்ஜனகா. பங்கோ விய பங்கோ, மலம். த³ந்தபங்கோ புரிமபத³லோபேன பங்கோதி வுத்தோதி ‘‘பங்கோ நாம த³ந்தமல’’ந்தி வுத்தம். அஜேஹி காதப்³ப³கானம் அகோபேத்வா கரணம் ஸமாதா³னவஸேன வதம். ஏஸ நயோ ஸேஸேஸுபி. கோஹஞ்ஞம் நாம அத்தனி விஜ்ஜமானதோ³ஸம் படிச்சா²தே³த்வா அஸந்தகு³ணபகாஸனாதி ஆஹ – ‘‘படிச்ச²ன்ன…பே… கோஹஞ்ஞஞ்சேவா’’தி. பரிக்கா²ரப⁴ண்ட³கவண்ணாதி பரிக்கா²ரப⁴ண்டா³ கப்பகாதி. தே ச கோ² அத்தனோ ஜீவிகத்தா²ய ஆமிஸகிஞ்ஜக்க²ஸ்ஸ அத்தனிப³ந்த⁴னத்தா²ய அமோசனத்தா²ய கதா.

அகி²லந்தி சேதோகி²லரஹிதம் ப்³ரஹ்மவிஹாரவஸேன. தேனாஹ ‘‘முது³ அத²த்³த⁴’’ந்தி.

அதி⁴முத்தோதி அபி⁴ரதிவஸேன யுத்தபயுத்தோ. பரித்தசித்தோதி பரிதோ க²ண்டி³தசித்தோ. அப்பமாணசித்தோதி ஏத்த² ‘‘கோ அய’’ந்தி படிக்கி²தும் ஸக்குணேய்யசித்தோ.

லோஹிச்சஸுத்தவண்ணனா நிட்டி²தா.

10. வேரஹச்சானிஸுத்தவண்ணனா

133. ப்³ராஹ்மணிம் த⁴ம்மஸவனாய சோதே³ந்தோ மாணவகோ ‘‘யக்³கே⁴’’தி அவோச. தேனாஹ ‘‘யக்³கே⁴தி சோத³னத்தே² நிபாதோ’’தி.

வேரஹச்சானிஸுத்தவண்ணனா நிட்டி²தா.

க³ஹபதிவக்³க³வண்ணனா நிட்டி²தா.