8. பிண்டோ³ல்யஸுத்தவண்ணனா

80. அபகரீயதி ஏதேனாதி அபகரணம், பத³ம். அபகரணம் பகரணம் காரணந்தி அத்த²தோ ஏகம். தேனாஹ ‘‘கிஸ்மிஞ்சிதே³வ காரணே’’தி. நீஹரித்வாதி அத்தனோ ஸமீபசாரபா⁴வதோ அபனேத்வா. ததா²கரணஞ்ச ஏவமேதே ஏத்தகம்பி அப்படிரூபம் அகத்வா ஆயதிம் ஸம்மா படிபஜ்ஜிஸ்ஸந்தீதி. லத்³த⁴ப³லாதி லத்³த⁴ஞாணப³லா.

ஏகத்³வீஹிகாயாதி ஏகேகஸ்ஸ சேவ த்³வின்னம் த்³வின்னஞ்ச ஈஹிகா க³தி உபஸங்கமனா ஏகத்³வீஹிகா. தேனாஹ ‘‘ஏகேகோ சேவ த்³வே த்³வே ச ஹுத்வா’’தி. புது²ஜ்ஜனானம் ஸமுதி³தானம் நாம கிரியா தாதி³ஸீபி ஸியாதி வுத்தம் ‘‘கேளிம்பி கரேய்யு’’ந்தி. பரிகப்பனவஸேன ஸம்மாஸம்பு³த்³த⁴ம் உத்³தி³ஸ்ஸ பேஸலா பி⁴க்கூ²பி ஏவம் கரோந்தீதி.

யுக³ந்த⁴ரபப்³ப³தாதீ³னம் அந்தரே ஸீத³ந்தரம் ஸமுத்³த³ம் நாம. தத்த² கிர வாதோ ந வாயதி, பதிதம் யம் கிஞ்சிபி ஸீத³ந்தரனதி³யம் விலீயந்தா ஸீத³ந்தேவ, தஸ்மா தம் பரிவாரேத்வா டி²தா யுக³ந்த⁴ராத³யோபி ஸீத³பப்³ப³தா நாம. தம் ஸந்தா⁴ய வுத்தம் ‘‘ஸீத³ந்தரே ஸன்னிஸின்னம் மஹாஸமுத்³த³ம் வியா’’தி. ஆஹாரஹேதூதி ஆமிஸஹேது ஸப்பிதேலாதி³னிமித்தம், தேஸம் பணாமனா.

பச்சி²மந்தி நிஹீனம். தேனாஹ ‘‘லாமக’’ந்தி, லாமகந்தோ இதா⁴தி⁴ப்பேதோ –

‘‘மிகா³னம் கோட்டு²கோ அந்தோ, பக்கீ²னம் பன வாயஸோ;

ஏரண்டோ³ அந்தோ ருக்கா²னம், தயோ அந்தா ஸமாக³தா’’தி. –

ஆதீ³ஸு (ஜா. 1.3.135) விய. உலதீதி அபி⁴சரதி. அபி⁴ஸபந்தி ஏதேனாதி அபி⁴ஸாபோ. அபி⁴ஸாபவத்து² பிண்டோ³ல்யம். அத்தோ² ப²லம் வஸோ ஏதஸ்ஸாதி அத்த²வஸம், காரணம், தம்பி தேஸு அத்தி², தத்த² நியுத்தாதி அத்த²வஸிகா.

அந்தோ ஹத³யஸ்ஸ அப்³ப⁴ந்தரே அனுபவிட்டா² ஸோகவத்தூ²ஹி.

அபி⁴ஜ்ஜா²யிதாதி அபி⁴ஜ்ஜா²யனஸீலோ. அபி⁴ண்ஹப்பவத்தியா சேவ ப³ஹுலபா⁴வேன ச ப³ஹுலராகோ³. பூதிபா⁴வேனாதி குதி²தபா⁴வேன. ப்³யாபாதோ³ ஹி உப்பஜ்ஜமானோ சித்தம் அபக³ந்த⁴ம் கரோதி, ந ஸுசிமனுஞ்ஞபா⁴வம். ப⁴த்தனிக்கி²த்தகாகோ வியாதி இத³ம் ப⁴த்தட்டா²னஸ்ஸ அஸரணேன காகஸ்ஸ நட்ட²ஸதிதா பஞ்ஞாயதீதி கத்வா வுத்தம், ந ப⁴த்தனிக்கி²த்ததாய. அஸண்டி²தோதி அஸண்டி²தசித்தோ. கட்ட²த்த²ந்தி கட்டே²ன கத்தப்³ப³கிச்சம்.

பாபவிதக்கேஹி கதோ, தஸ்மா தே அனவஸேஸதோ பஹாதப்³பா³தி த³ஸ்ஸனத்த²ம். த்³வின்னம் வுத்தத்தா ஏகோ புப்³ப³பா⁴கோ³, இதரோ மிஸ்ஸகோதி வத்தும் யுத்தந்தி அதி⁴ப்பாயேன ‘‘ஏத்த² சா’’திஆதி³ வுத்தம். ஏவம் தம் பா⁴வேந்தஸ்ஸ நிருஜ்ஜ²ந்தி ஏவாதி ஏகேகமிஸ்ஸகதாவஸேன க³ஹேதப்³ப³ந்தி போராணா. உபரி திபரிவட்டதே³ஸனாய அனிமித்தஸமாதி⁴யேவ தீ³பிதோ. தேனாஹ ‘‘யாவஞ்சித³’’ந்தி. நித்³தோ³ஸோதி வீதராகா³தி³னா நித்³தோ³ஸோ.

பிண்டோ³ல்யஸுத்தவண்ணனா நிட்டி²தா.