11. அந்தவக்³கோ³

1. அந்தஸுத்தவண்ணனா

103. அஞ்ஞமஞ்ஞம் அஸம்ஸட்ட²பா⁴வேன ஏதி க³ச்ச²தீதி அந்தோ, பா⁴கோ³தி ஆஹ ‘‘அந்தாதி கோட்டா²ஸா’’தி. ‘‘ஸக்காயனிரோத⁴ந்தோ’’தி நிரோத⁴பச்சயஸ்ஸ க³ஹிதத்தா வுத்தம் ‘‘சதுஸச்சவஸேன பஞ்சக்க²ந்தே⁴ யோஜேத்வா’’தி. அந்தோதி…பே… அஜ்ஜா²ஸயவஸேன வுத்தம் யதா²னுலோமதே³ஸனத்தா ஸுத்தந்ததே³ஸனாய.

அந்தஸுத்தவண்ணனா நிட்டி²தா.

2-3. து³க்க²ஸுத்தாதி³வண்ணனா

104-105. து³தியம்பீதி அபி-ஸத்³தோ³ ஸம்பிண்ட³னத்தோ². தேன ந கேவலம் பட²மஸுத்தமேவ, அத² கோ² து³தியம்பீதி.

ததியம்பி ததே²வாதி இமினா ‘‘பஞ்சக்க²ந்தே⁴ சதுஸச்சவஸேன யோஜேத்வா’’தி இத³ம் உபஸம்ஹரதி.

து³க்க²ஸுத்தாதி³வண்ணனா நிட்டி²தா.

4. பரிஞ்ஞேய்யஸுத்தவண்ணனா

106. பரிஞ்ஞேய்யேதி ஏத்த² திஸ்ஸோ பரிஞ்ஞா ஞாதபரிஞ்ஞா, தீரணபரிஞ்ஞா, பஹானபரிஞ்ஞாதி. தாஸு ஞாதபரிஞ்ஞா யாவதே³வ தீரணபரிஞ்ஞத்தா². தீரணபரிஞ்ஞா ச யாவதே³வ பஹானபரிஞ்ஞத்தா²தி. தத்த² உக்கட்டா²ய பரிஞ்ஞாய கிச்சத³ஸ்ஸனவஸேன அத்த²ம் த³ஸ்ஸேந்தோ ‘‘பரிஞ்ஞேய்யேதி பரிஜானிதப்³பே³ ஸமதிக்கமிதப்³பே³’’தி, பஹாதப்³பே³தி அத்தோ². தேனாஹ ப⁴க³வா – ‘‘கதமா ச, பி⁴க்க²வே, பரிஞ்ஞா? ராக³க்க²யோ, தோ³ஸக்க²யோ, மோஹக்க²யோ’’தி, தஸ்மா ஸமதிக்கமந்தி, ஸமதிக்கந்தம் பஹானஸ்ஸ உபாயம். ஸமதிக்கமித்வா டி²தந்தி பஜஹித்வா டி²தந்தி அயமேத்த² அத்தோ².

பரிஞ்ஞேய்யஸுத்தவண்ணனா நிட்டி²தா.

5-10. ஸமணஸுத்தாதி³வண்ணனா

107-112. சத்தாரி ஸச்சானி கதி²தானி அஸ்ஸாதா³தீ³னம் ஸமுத³யாதீ³னஞ்ச தே³ஸிதத்தா.

கிலேஸப்பஹானம் கதி²தம் ராக³ப்பஹானஸ்ஸ ஜோதிதத்தா.

ஸமணஸுத்தாதி³வண்ணனா நிட்டி²தா.

அந்தவக்³க³வண்ணனா நிட்டி²தா.