5. ஜிண்ணஸுத்தவண்ணனா

148. சி²ன்னபி⁴ன்னட்டா²னே சி²த்³த³ஸ்ஸ அபுது²லத்தா அக்³க³ளம் அத³த்வாவ ஸுத்தேன ஸம்ஸிப்³ப³னமத்தேன அக்³க³ளதா³னேன ச சி²த்³தே³ புது²லே. நிப்³ப³ஸனானீதி சிரனிஸேவிதவஸனகிச்சானி, பரிபோ⁴க³ஜிண்ணானீதி அத்தோ². தேனாஹ ‘‘புப்³பே³…பே… லத்³த⁴னாமானீ’’தி, ஸஞ்ஞாபுப்³ப³கோ விதி⁴ அனிச்சோதி ‘‘க³ஹபதானீ’’தி வுத்தம் யதா² ‘‘வீரிய’’ந்தி.

ஸேனாபதிந்தி ஸேனாபதிபா⁴வினம், ஸேனாபச்சாரஹந்தி அத்தோ². அத்தனோ கம்மேனாதி அத்தனா காதப்³ப³கம்மேன. ஸோதி ஸத்தா². தஸ்மிந்தி மஹாகஸ்ஸபத்தே²ரே கரோதீதி ஸம்ப³ந்தோ⁴. ந கரோதீதி வுத்தமத்த²ம் விவரந்தோ ‘‘கஸ்மா’’திஆதி³மாஹ. யதி³ ஸத்தா² து⁴தங்கா³னி ந விஸ்ஸஜ்ஜாபேதுகாமோ, அத² கஸ்மா ‘‘ஜிண்ணோஸி தா³னி த்வ’’ந்திஆதி³மவோசாதி ஆஹ ‘‘யதா² பனா’’திஆதி³.

தி³ட்ட²த⁴ம்மஸுக²விஹாரந்தி இமஸ்மிம்யேவ அத்தபா⁴வே பா²ஸுவிஹாரம். அமானுஸிகா ஸவனரதீதி அதிக்கந்தமானுஸிகாய அரஞ்ஞஸத்³து³ப்பத்தியா அரஞ்ஞேஹம் வஸாமீதி விவேகவாஸூபனிஸ்ஸயாதீ⁴னஸத்³த³ஸவனபச்சயா த⁴ம்மரதி உப்பஜ்ஜதி. அபரோதி அஞ்ஞோ, து³தியோதி அத்தோ². தத்தே²வாதி தஸ்மிம்யேவ ஏகஸ்ஸ விஹரணட்டா²னே விஹரணஸமயே ச பா²ஸு ப⁴வதி சித்தவிவேகஸம்ப⁴வதோ. தேனாஹ ‘‘ஏகஸ்ஸ ரமதோ வனே’’தி.

ததா²தி யதா² ஆரஞ்ஞிகஸ்ஸ ரதி, ததா² பிண்ட³பாதிகஸ்ஸ லப்³ப⁴தி தி³ட்ட²த⁴ம்மஸுக²விஹாரோ. ஏஸ நயோ ஸேஸேஸு. அபிண்ட³பாதிகாதீ⁴னோ இதரஸ்ஸ விஸேஸஜோதகோதி தமேவஸ்ஸ விஸேஸம் த³ஸ்ஸேதும் ‘‘அகாலசாரீ’’திஆதி³ வுத்தம்.

அம்ஹாகம் ஸலாகம் க³ஹேத்வா ப⁴த்தத்தா²ய கே³ஹம் அனாக³ச்ச²ந்தஸ்ஸ ஸத்தாஹம் ந பாதேதப்³ப³ந்தி ஸாமிகேஹி தி³ன்னத்தா ஸத்தாஹம் ஸலாகம் ந லப⁴தி, ந கதிகவஸேன. பிண்ட³சாரிகவத்தே அவத்தனதோ ‘‘யஸ்ஸ சேஸா’’திஆதி³ வுத்தம்.

பட²மதரம் காதப்³ப³ம் யம், தம் வத்தம், இதரம் படிவத்தம். மஹந்தம் வா வத்தம், கு²த்³த³கம் படிவத்தம். கேசி ‘‘வத்தபடிபத்தி’’ந்தி பட²ந்தி, வத்தஸ்ஸ கரணந்தி அத்தோ². உத்³த⁴ரண-அதிஹரண-வீதிஹரணவோஸ்ஸஜ்ஜன-ஸன்னிக்கே²பன-ஸன்னிரும்ப⁴னானம் வஸேன ச² கோட்டா²ஸே. க³ருபா⁴வேனாதி தி²ரபா⁴வேன.

‘‘அமுகஸ்மிம் ஸேனாஸனே வஸந்தா ப³ஹும் வஸ்ஸவாஸிகம் லப⁴ந்தீ’’தி ததா² ந வஸ்ஸவாஸிகம் பரியேஸந்தோ சரதி வஸ்ஸவாஸிகஸ்ஸேவ அக்³க³ஹணதோ. தஸ்மா ஸேனாஸனபா²ஸுகம்யேவ சிந்தேதி. தேன ப³ஹுபரிக்கா²ரபா⁴வேன பா²ஸுவிஹாரோ நத்தி² பரிக்கா²ரானம் ரக்க²ணபடிஜக்³க³னாதி³து³க்க²ப³ஹுலதாய. அப்பிச்சா²தீ³னந்தி அப்பிச்ச²ஸந்துட்டா²தீ³னம்யேவ லப்³ப⁴தி தி³ட்ட²த⁴ம்மஸுக²விஹாரோ.

ஜிண்ணஸுத்தவண்ணனா நிட்டி²தா.