6. ஓவாத³ஸுத்தவண்ணனா

149. அத்தனோ டா²னேதி ஸப்³ரஹ்மசாரீனம் ஓவாத³கவிஞ்ஞாபகபா⁴வேன அத்தனோ மஹாஸாவகட்டா²னே ட²பனத்த²ம். அத² வா யஸ்மா ‘‘அஹம் தா³னி ந சிரம் ட²ஸ்ஸாமி, ததா² ஸாரிபுத்தமோக்³க³ல்லானா, அயம் பன வீஸம்வஸ்ஸதாயுகோ, ஓவத³ந்தோ அனுஸாஸந்தோ மமச்சயேன பி⁴க்கூ²னம் மயா காதப்³ப³கிச்சம் கரிஸ்ஸதீ’’தி அதி⁴ப்பாயேன ப⁴க³வா இமம் தே³ஸனம் ஆரபி⁴. தஸ்மா அத்தனோ டா²னேதி ஸத்தா²ரா காதப்³ப³ஓவாத³தா³யகட்டா²னே. தேனாஹ ‘‘ஏவம் பனஸ்ஸா’’திஆதி³. யதா²ஹ ப⁴க³வா ‘‘ஓவத³, கஸ்ஸப…பே… த்வம் வா’’தி. து³க்கே²ன வத்தப்³பா³ அப்பத³க்கி²ணக்³கா³ஹிபா⁴வதோ. து³ப்³ப³சபா⁴வகரணேஹீதி கோதூ⁴பனாஹாதீ³ஹி. அனுஸாஸனியா பத³க்கி²ணக்³க³ஹணம் நாம அனுத⁴ம்மசரணம், சி²ன்னபடிபத்தி கதா வாமக்³கா³ஹோ நாமாதி ஆஹ ‘‘அனுஸாஸனி’’ந்திஆதி³. அதிக்கம்ம வத³ந்தேதி அஞ்ஞமஞ்ஞம் அதிக்கமித்வா அதிமஞ்ஞித்வா வத³ந்தே. ப³ஹும் பா⁴ஸிஸ்ஸதீதி த⁴ம்மம் கதே²ந்தோ கோ விபுலம் கத்வா கதே²ஸ்ஸதி. அஸஹிதந்தி புப்³பே³னாபரம் நஸஹிதம் ஹேதுபமாவிரஹிதம். அமது⁴ரந்தி ந மது⁴ரம் ந கண்ணஸுக²ம் ந பேமனீயம். லஹுஞ்ஞேவ உட்டா²தி அப்பவத்தனேன கூலட்டா²னம் விய தஸ்ஸ கத²னம்.

ஓவாத³ஸுத்தவண்ணனா நிட்டி²தா.