13. ஸத்³த⁴ம்மப்பதிரூபகஸுத்தவண்ணனா

156. ஆஜானாதி ஹேட்டி²மமக்³கே³ஹி ஞாதமரியாத³ம் அனதிக்கமித்வாவ ஜானாதி படிவிஜ்ஜ²தீதி அஞ்ஞா, அக்³க³மக்³க³பஞ்ஞா. அஞ்ஞஸ்ஸ அயந்தி அஞ்ஞா, அரஹத்தப²லம். தேனாஹ ‘‘அரஹத்தே’’தி.

ஓபா⁴ஸேதி ஓபா⁴ஸனிமித்தம். ‘‘சித்தம் விகம்பதீ’’தி பத³த்³வயம் ஆனேத்வா ஸம்ப³ந்தோ⁴. ஓபா⁴ஸேதி விஸயபூ⁴தே. உபக்கிலேஸேஹி சித்தம் விகம்பதீதி யோஜனா. தேனாஹ ‘‘யேஹி சித்தம் பவேத⁴தீ’’தி. ஸேஸேஸுபி ஏஸேவ நயோ.

உபட்டா²னேதி ஸதியம். உபேக்கா²ய சாதி விபஸ்ஸனுபேக்கா²ய ச. ஏத்த² ச விபஸ்ஸனாசித்தஸமுட்டா²னஸந்தானவினிமுத்தம் பபா⁴ஸனம் ரூபாயதனம் ஓபா⁴ஸோ. ஞாணாத³யோ விபஸ்ஸனாசித்தஸம்பயுத்தாவ. ஸகஸககிச்சே ஸவிஸேஸோ ஹுத்வா பவத்தோ அதி⁴மோக்கோ² ஸத்³தா⁴தி⁴மோக்கோ². உபட்டா²னம் ஸதி. உபேக்கா²தி ஆவஜ்ஜனுபேக்கா². ஸா ஹி ஆவஜ்ஜனசித்தஸம்பயுத்தா சேதனா. ஆவஜ்ஜனஅஜ்ஜு²பேக்க²னவஸேன பவத்தியா இத⁴ ‘‘ஆவஜ்ஜனுபேக்கா²’’தி வுச்சதி. புன உபேக்கா²யாதி விபஸ்ஸனுபேக்கா²வ அனேன ஸமஜ்ஜ²த்ததாய ஏவம் வுத்தா. நிகந்தி நாம விபஸ்ஸனாய நிகாமனா அபேக்கா². ஸுகு²மதரகிலேஸோ வா ஸியா து³விஞ்ஞேய்யோ.

இமானி த³ஸ டா²னானீதி இமானி ஓபா⁴ஸாதீ³னி உபக்கிலேஸுப்பத்தியா டா²னானி உபக்கிலேஸவத்தூ²னி. பஞ்ஞா யஸ்ஸ பரிசிதாதி யஸ்ஸ பஞ்ஞா பரிசிதவதீ யாதா²வதோ ஜானாதி. ‘‘இமானி நிஸ்ஸாய அத்³தா⁴ மக்³க³ப்பத்தோ ப²லப்பத்தோ அஹ’’ந்தி பவத்தஅதி⁴மானோ த⁴ம்முத்³த⁴ச்சம் த⁴ம்மூபனிஸ்ஸயோ விக்கே²போ. தத்த² குஸலோ ஹி தம் யாதா²வதோ ஜானந்தோ ந ச தத்த² ஸம்மோஹம் க³ச்ச²தி.

அதி⁴க³மஸத்³த⁴ம்மப்பதிரூபகம் நாம அனதி⁴க³தே அதி⁴க³தமானிபா⁴வாவஹத்தா. யத³க்³கே³ன விபஸ்ஸனாஞாணஸ்ஸ உபக்கிலேஸோ, தத³க்³கே³ன படிபத்திஸத்³த⁴ம்மப்பதிரூபகோதிபி ஸக்கா விஞ்ஞாதும். தா⁴துகதா²தி மஹாதா⁴துகத²ம் வத³தி. வேத³ல்லபிடகந்தி வேதுல்லபிடகம். தம் நாக³ப⁴வனதோ ஆனீதந்தி வத³ந்தி. வாத³பா⁴ஸிதந்தி அபரே. அபு³த்³த⁴வசனம் பு³த்³த⁴வசனேன விருஜ்ஜ²னதோ. ந ஹி ஸம்பு³த்³தோ⁴ புப்³பா³பரவிருத்³த⁴ம் வத³தி. தத்த² ஸல்லம் உபட்ட²பேந்தி கிலேஸவினயம் ந ஸந்தி³ஸ்ஸதி, அஞ்ஞத³த்து² கிலேஸுப்பத்தியா பச்சயோ ஹோதீதி.

அவிக்கயமானந்தி விக்கயம் அக³ச்ச²ந்தம். தந்தி ஸுவண்ணப⁴ண்ட³ம்.

ந ஸக்கி²ம்ஸு ஞாணஸ்ஸ அவிஸத³பா⁴வதோ. ஏஸ நயோ இதோ பரேஸுபி.

இதா³னி ‘‘பி⁴க்கூ² படிஸம்பி⁴தா³ப்பத்தா அஹேஸு’’ந்திஆதி³னா வுத்தமேவ அத்த²ம் காரணதோ விபா⁴வேதும் புன ‘‘பட²மபோ³தி⁴யம் ஹீ’’திஆதி³ வுத்தம். தத்த² படிபத்திம் பூரயிம்ஸூதி அதீதே கதா³ தே படிஸம்பி⁴தா³வஹம் படிபத்திம் பூரயிம்ஸு? பட²மபோ³தி⁴காலிகா பி⁴க்கூ². ந ஹி அத்தஸம்மாபணிதி⁴யா புப்³பே³கதபுஞ்ஞதாய ச வினா தாதி³ஸம் ப⁴வதி. ஏஸ நயோ இதோ பரேஸுபி. ததா³ படிபத்திஸத்³த⁴ம்மோ அந்தரஹிதோ நாம ப⁴விஸ்ஸதீதி ஏதேன அரியமக்³கே³ன ஆஸன்னா ஏவ புப்³ப³பா⁴க³படிபதா³ படிபத்திஸத்³த⁴ம்மோதி த³ஸ்ஸேதி.

த்³வீஸூதி ஸுத்தாபி⁴த⁴ம்மபிடகேஸு அந்தரஹிதேஸுபி. அனந்தரஹிதமேவ அதி⁴ஸீலஸிக்கா²யம் டி²தஸ்ஸ இதரஸிக்கா²த்³வயஸமுட்டா²பிததோ. கிம் காரணாதி கேன காரணேன, அஞ்ஞஸ்மிம் த⁴ம்மே அந்தரஹிதே அஞ்ஞதரஸ்ஸ த⁴ம்மஸ்ஸ அனந்தரதா⁴னம் வுச்சதீதி அதி⁴ப்பாயோ. படிபத்தியா பச்சயோ ஹோதி அனவஸேஸதோ படிபத்திக்கமஸ்ஸ பரிதீ³பனதோ. படிபத்தி அதி⁴க³மஸ்ஸ பச்சயோ விஸேஸலக்க²ணபடிவேத⁴பா⁴வதோ. பரியத்தியேவ பமாணம் ஸாஸனஸ்ஸ டி²தியாதி அதி⁴ப்பாயோ.

நனு ச ஸாஸனம் ஓஸக்கிதம் பரியத்தியா வத்தமானாயாதி அதி⁴ப்பாயோ. அனாராத⁴கபி⁴க்கூ²தி ஸீலமத்தஸ்ஸபி ந ஆராத⁴கோ து³ஸ்ஸீலோ. இமஸ்மிந்தி இமஸ்மிம் பாதிமோக்கே². வத்தந்தாதி ‘‘ஸீலம் அகோபேத்வா டி²தா அத்தீ²’’தி புச்சி².

ஏதேஸூதி ஏவம் மஹந்தேஸு ஸகலம் லோகம் அஜ்ஜோ²த்த²ரிதும் ஸமத்தே²ஸு சதூஸு மஹாபூ⁴தேஸு. தஸ்மாதி யஸ்மா அஞ்ஞேன கேனசி அதிமஹந்தேனபி ஸத்³த⁴ம்மோ ந அந்தரதா⁴யதி, ஸமயந்தரேன பன வத்தப்³ப³மேவ நத்தி², தஸ்மா. ஏவமாஹாதி இதா³னி வுச்சமானாகாரம் வத³தி.

ஆதா³னம் ஆதி³, ஆதி³ ஏவ ஆதி³கந்தி ஆஹ ‘‘ஆதி³கேனாதி ஆதா³னேனா’’தி. ஹேட்டா²க³மனீயாதி அதோ⁴பா⁴க³க³மனீயா, அபாயது³க்க²ஸ்ஸ ஸம்ஸாரது³க்க²ஸ்ஸ ச நிப்³ப³த்தகாதி அத்தோ². கா³ரவரஹிதாதி க³ருகாரரஹிதா. பதிஸ்ஸயனம் நீசபா⁴வேன பதிப³த்³த⁴வுத்திதா, பதிஸ்ஸோ பதிஸ்ஸயோதி அத்த²தோ ஏகம், ஸோ ஏதேஸம் நத்தீ²தி ஆஹ ‘‘அப்பதிஸ்ஸாதி அப்பதிஸ்ஸயா அனீசவுத்திகா’’தி. ஸேஸம் ஸுவிஞ்ஞேய்யமேவ.

ஸத்³த⁴ம்மப்பதிரூபகஸுத்தவண்ணனா நிட்டி²தா.

ஸாரத்த²ப்பகாஸினியா ஸம்யுத்தனிகாய-அட்ட²கதா²ய

கஸ்ஸபஸம்யுத்தவண்ணனாய லீனத்த²ப்பகாஸனா ஸமத்தா.