6. லாப⁴ஸக்காரஸம்யுத்தம்

1. பட²மவக்³கோ³

1. தா³ருணஸுத்தவண்ணனா

157. த²த்³தோ⁴தி கக்க²ளோ அனிட்ட²ஸ்ஸ பதா³னதோ. சதுபச்சயலாபோ⁴தி சதுன்னம் பச்சயானம் படிலாபோ⁴. ஸக்காரோதி தேஹியேவ பச்சயேஹி ஸுஸங்க²தேஹி பூஜனா, ஸோ பன அத்த²தோ ஸம்பத்தியேவாதி ஆஹ ‘‘தேஸம்யேவ…பே… லாபோ⁴’’தி. வண்ணகோ⁴ஸோதி கு³ணகித்தனா. அந்தராயஸ்ஸ அனதிவத்தனதோ அந்தராயிகோ அனத்தா²வஹத்தா.

தா³ருணஸுத்தவண்ணனா நிட்டி²தா.

2. ப³ளிஸஸுத்தவண்ணனா

158. ப³ளிஸேன சரதி, தேன வா ஜீவதீதி பா³ளிஸிகோ. தேனாஹ ‘‘ப³ளிஸம் க³ஹேத்வா சரமானோ’’தி. ஆமிஸக³தந்தி ஆமிஸூபக³தம் ஆமிஸபதிதம். தேனாஹ ‘‘ஆமிஸமக்கி²த’’ந்தி. பி⁴ன்னாதி⁴கரணானம்பி பா³ஹிரத்த²ஸமாஸோ ஹோதேவாதி ஆஹ ‘‘ஆமிஸே சக்கு²த³ஸ்ஸன’’ந்தி. அயோ வுச்சதி ஸுக²ம், தப்³பி³து⁴ரதாய அனயோ, து³க்க²ந்தி ஆஹ ‘‘து³க்க²ம் பத்தோ’’தி. அஸ்ஸாதி ஏதேன. கத்துஅத்தே² ஹி ஏதம் ஸாமிவசனம். யதா² கிலேஸா வத்தந்தி, ஏவம் பவத்தமானோ புக்³க³லோ கிலேஸவிப்பயோகோ³ ந ஹோதீதி வுத்தம் ‘‘யதா² கிலேஸமாரஸ்ஸ காமோ, ஏவம் கத்தப்³போ³’’தி.

ப³ளிஸஸுத்தவண்ணனா நிட்டி²தா.

3-4. கும்மஸுத்தாதி³வண்ணனா

159-160. அட்டி²கச்ச²பா வுச்சந்தி யேஸம் கபாலமத்த²கே திகி²ணா அட்டி²கோடி ஹோதி, தேஸம் ஸமூஹோ அட்டி²கச்ச²பகுலம். மச்ச²கச்ச²பாதீ³னம் ஸரீரே லம்ப³ந்தீ பபததீதி பபதா, வுச்சமானாகாரோ அயகண்டகோ. அயகோஸகேதி அயோமயகோஸகே. கண்ணிகஸல்லஸண்டா²னோதி அத்தனிகாபனஸல்லஸண்டா²னோ. அயகண்டகோதி அயோமயவங்ககண்டகோ. நிக்க²மதி ஏத்த² அதா²வரதோ. பவேஸிதமத்தோ ஹி ஸோ. இதா³னி த்வம் ‘‘அம்ஹாக’’ந்தி ந வத்தப்³போ³. இதோ அனந்தரஸுத்தேதி சதுத்த²ஸுத்தமாஹ.

கும்மஸுத்தாதி³வண்ணனா நிட்டி²தா.

5. மீள்ஹகஸுத்தவண்ணனா

161. மீள்ஹகாதி ஏவம் இத்தி²லிங்க³வஸேன வுச்சமானா. கூ³த²பாணகாதி கூ³த²ப⁴க்க²பாணகா. அந்தோதி குச்சி²யம்.

மீள்ஹகஸுத்தவண்ணனா நிட்டி²தா.

6. அஸனிஸுத்தவண்ணனா

162. ‘‘இமே லாப⁴ஸக்காரம் அனாஹரந்தா ஜிக⁴ச்சா²தி³து³க்க²ம் பாபுணந்தூ’’தி ஏவம் ந ஸத்தானம் து³க்க²காமதாய ஏவமாஹாதி ஆனேத்வா ஸம்ப³ந்தோ⁴. அனந்தது³க்க²ம் அனுபோ⁴தி அபராபரம் உப்பஜ்ஜனகஅகுஸலசித்தானம் ப³ஹுபா⁴வதோ.

அஸனிஸுத்தவண்ணனா நிட்டி²தா.

7. தி³த்³த⁴ஸுத்தவண்ணனா

163. அச்ச²விஸயுத்தாதி வா தி³த்³தே⁴ க³தேன க³ததி³த்³தே⁴ன. தேனாஹ ‘‘விஸமக்கி²தேனா’’தி.

தி³த்³த⁴ஸுத்தவண்ணனா நிட்டி²தா.

8. ஸிங்கா³லஸுத்தவண்ணனா

164. ஜரஸிங்கா³லோத்வேவ வுச்சதி ஸரீரஸோபா⁴ய அபா⁴வதோ. ஸரீரஸ்ஸ உக்³க³தகண்டகத்தா உக்கண்டகேன நாம. பு²டதீதி ப²லதி பி⁴ஜ்ஜதி.

ஸிங்கா³லஸுத்தவண்ணனா நிட்டி²தா.

9. வேரம்ப⁴ஸுத்தவண்ணனா

165. காயம் ந ரக்க²தி நாம ச²ப்³பீ³ஸதியா ஸாருப்பானம் பரிச்சஜனதோ. வாசம் ந ரக்க²தி நாம ராக³ஸாமந்தா ச கோத⁴ஸாமந்தா ச யாவ நிச்சா²ரணதோ.

வேரம்ப⁴ஸுத்தவண்ணனா நிட்டி²தா.

10. ஸகா³த²கஸுத்தவண்ணனா

166. ‘‘யஸ்ஸ ஸக்கரியமானஸ்ஸா’’தி ஏத்த² அஸக்காரேன சூப⁴யந்தி அஸக்காரேன ச உப⁴யஞ்ச, கதா³சி ஸக்காரேன, கதா³சி அஸக்காரேன கதா³சி உப⁴யேனாதி அத்தோ². தேனாஹ ‘‘அஸக்காரேனா’’திஆதி³. ஸததவிஹாரானம் ஸம்பத்தியா ஸாததிகோதி ஆஹ ‘‘அரஹத்த…பே… ஸுகு²மதி³ட்டீ²’’திஆதி³. ததா² ஹி ஸா ‘‘வஜிரூபமஞாண’’ந்தி வுச்சதி. ஆக³தத்தாதி ப²லஸமாபத்திம் ஸமாபஜ்ஜிதும் தஸ்ஸா புப்³ப³பரிகம்மம் உபக³தத்தா.

ஸகா³த²கஸுத்தவண்ணனா நிட்டி²தா.

பட²மவக்³க³வண்ணனா நிட்டி²தா.

2. து³தியவக்³கோ³

1-2. ஸுவண்ணபாதிஸுத்தாதி³வண்ணனா

167-168. சாலேதும் ந ஸக்கோதி ஸீலபப்³ப³தஸன்னிஸ்ஸிதத்தா. அஞ்ஞம் வா கிச்சம் கரோதி பகே³வ ஸீலஸ்ஸ ச²ட்³டி³தத்தா. ததியாதீ³ஸு அபுப்³ப³ம் நத்தி².

ஸுவண்ணபாதிஸுத்தாதி³வண்ணனா நிட்டி²தா.

து³தியவக்³க³வண்ணனா நிட்டி²தா.

3. ததியவக்³கோ³

1. மாதுகா³மஸுத்தவண்ணனா

170. யம் விஸபா⁴க³வத்து² புரிஸஸ்ஸ சித்தம் பரியாதா³ய டா²தும் ஸக்கோதீதி வுச்சதி, ததோ விஸேஸதோ லாப⁴ஸக்காரோவ ஸத்தானம் சித்தம் பரியாதா³ய டா²தும் ஸக்கோதீதி த³ஸ்ஸேந்தோ ப⁴க³வா ‘‘ந தஸ்ஸ, பி⁴க்க²வே’’திஆதி³மவோசாதி த³ஸ்ஸேந்தோ ‘‘ந தஸ்ஸா’’திஆதி³மாஹ.

மாதுகா³மஸுத்தவண்ணனா நிட்டி²தா.

2. கல்யாணீஸுத்தவண்ணனா

171. து³தியம் உத்தானமேவ, தஸ்ஸேவ அத்த²ஸ்ஸ கேவலம் ஜனபத³கல்யாணீவஸேன வுத்தம்.

கல்யாணீஸுத்தவண்ணனா நிட்டி²தா.

3-6. ஏகபுத்தகஸுத்தாதி³வண்ணனா

172-175. ஸத்³தா⁴தி அரியமக்³கே³ன ஆக³தஸத்³தா⁴ அதி⁴ப்பேதாதி ஆஹ ‘‘ஸோதாபன்னா’’தி.

ஏகபுத்தகஸுத்தாதி³வண்ணனா நிட்டி²தா.

7. ததியஸமணப்³ராஹ்மணஸுத்தவண்ணனா

176. ஏவமாதீ³தி ஆதி³-ஸத்³தே³ன பா³ஹுஸச்சஸம்வரஸீலாதீ³னம் ஸங்க³ஹோ த³ட்ட²ப்³போ³. லாப⁴ஸக்காரஸ்ஸ ஸமுத³யம் உப்பத்திகாரணம் ஸமுத³யஸச்சவஸேன து³க்க²ஸச்சஸ்ஸ உப்பத்திஹேதுதாவஸேன.

ததியஸமணப்³ராஹ்மணஸுத்தவண்ணனா நிட்டி²தா.

8. ச²விஸுத்தவண்ணனா

177. லாப⁴ஸக்காரஸிலோகோ நரகாதீ³ஸு நிப்³ப³த்தேந்தோதி இத³ம் தன்னிஸ்ஸயம் கிலேஸக³ணம் ஸந்தா⁴யாஹ. நிப்³ப³த்தேந்தோதி நிப்³ப³த்தாபேந்தோ. இமம் மனுஸ்ஸஅத்தபா⁴வம் நாஸேதி மனுஸ்ஸத்தம் புன நிப்³ப³த்திதும் அப்பதா³னவஸேன. தஸ்மாதி து³க்³க³தினிப்³ப³த்தாபனதோ இத⁴ மரணது³க்கா²வஹனதோ ச.

ச²விஸுத்தவண்ணனா நிட்டி²தா.

9. ரஜ்ஜுஸுத்தவண்ணனா

178. க²ரா ப²ருஸா ச²விஆதீ³னி சி²ந்த³னே ஸமத்தா².

ரஜ்ஜுஸுத்தவண்ணனா நிட்டி²தா.

10. பி⁴க்கு²ஸுத்தவண்ணனா

179. தம் ஸந்தா⁴யாதி தி³ட்ட²த⁴ம்மஸுக²விஹாரஸ்ஸ ஓகாஸாபா⁴வம் ஸந்தா⁴ய.

பி⁴க்கு²ஸுத்தவண்ணனா நிட்டி²தா.

ததியவக்³க³வண்ணனா நிட்டி²தா.

4. சதுத்த²வக்³கோ³

1-4. பி⁴ந்தி³ஸுத்தாதி³வண்ணனா

180-183. தே³வத³த்தோ ஸக்³கே³ வா நிப்³ப³த்தேய்யாதிஆதி³ பரிகப்பவசனம். ந ஹி பச்சேகபோ³தி⁴யம் நியதக³திகோ அந்தரா மக்³க³ப²லானி அதி⁴க³ந்தும் ப⁴ப்³போ³தி. ஸோதி அனவஜ்ஜத⁴ம்மோ. அஸ்ஸாதி தே³வத³த்தஸ்ஸ. ஸமுச்சே²த³மக³மா கதூபசிதஸ்ஸ மஹதோ பாபத⁴ம்மஸ்ஸ ப³லேன தஸ்மிம் அத்தபா⁴வே ஸமுச்சே²த³பா⁴வதோ, ந அச்சந்தாய. அகுஸலம் நாமேதம் அப³லம், குஸலம் விய ந மஹாப³லம், தஸ்மா தஸ்மிம்யேவ அத்தபா⁴வே தாதி³ஸானம் புக்³க³லானம் அதேகிச்ச²தா, அஞ்ஞதா² ஸம்மத்தனியாமோ விய மிச்ச²த்தனியாமோ அச்சந்திகோ ஸியா. யதி³ ஏவம் வட்டகா²ணுகஜோதனா கத²ந்தி? ஆஸேவனாவஸேன, தஸ்மா யதா² ‘‘ஸகிம் நிமுக்³கோ³ நிமுக்³கோ³ ஏவ பா³லோ’’தி வுத்தம், ஏவம் வட்டகா²ணுகஜோதனா. யாதி³ஸே ஹி பச்சயே படிச்ச புக்³க³லோ தம் த³ஸ்ஸனம் க³ண்ஹி, ததா² ச படிபன்னோ, புன அசிந்தப்பதிவத்தே பச்சயே பதிததோ ஸீஸுக்கி²பனமஸ்ஸ ந ஹோதீதி ந வத்தப்³ப³ம்.

பி⁴ந்தி³ஸுத்தாதி³வண்ணனா நிட்டி²தா.

5. அசிரபக்கந்தஸுத்தவண்ணனா

184. காலே ஸம்பத்தேதி க³ப்³ப⁴ஸ்ஸ பரிபாகக³தத்தா விஜாயனகாலே ஸம்பத்தே. போதந்தி அஸ்ஸதரியா புத்தம். ஏதந்தி ‘‘க³ப்³போ⁴ அஸ்ஸதரிம் யதா²’’தி ஏதம் வசனம்.

அசிரபக்கந்தஸுத்தவண்ணனா நிட்டி²தா.

6. பஞ்சரத²ஸதஸுத்தவண்ணனா

185. அபி⁴ஹரீயதீதி அபி⁴ஹாரோ, ப⁴த்தம்யேவ அபி⁴ஹாரோ ப⁴த்தாபி⁴ஹாரோதி ஆஹ ‘‘அபி⁴ஹரிதப்³ப³ம் ப⁴த்த’’ந்தி. மச்ச²பித்தந்தி வாளமச்ச²பித்தம். பக்கி²பேய்யுந்தி உரகா³தி³னா ஓஸிஞ்சேய்யும்.

பஞ்சரத²ஸதஸுத்தவண்ணனா நிட்டி²தா.

7-13. மாதுஸுத்தாதி³வண்ணனா

186-187. மாதுபி ஹேதூதி அத்தனோ மாதுயா உப்பன்னஅனத்தா²வஹஸ்ஸ பஹானஹேதுபி. இதோ பரேஸூதி ‘‘பிதுபி ஹேதூ’’தி ஏவமாதீ³ஸு.

மாதுஸுத்தாதி³வண்ணனா நிட்டி²தா.

ஸாரத்த²ப்பகாஸினியா ஸம்யுத்தனிகாய-அட்ட²கதா²ய

லாப⁴ஸக்காரஸம்யுத்தவண்ணனாய லீனத்த²ப்பகாஸனா ஸமத்தா.