8. கோஸம்பி³ஸுத்தவண்ணனா

68. அட்ட²மே பரஸ்ஸ ஸத்³த³ஹித்வாதி பரஸ்ஸ வசனம் ஸத்³த³ஹித்வா. தேனாஹ ‘‘யம் ஏஸ ப⁴ணதி, தம் பூ⁴தந்தி க³ண்ஹாதீ’’தி. பரபத்தியோ ஹி ஏஸோ பரனேய்யபு³த்³தி⁴கோ. யம் காரணந்தி யம் அத்தனா சிந்திதவத்து². ருச்சதீதி ‘‘ஏவமேதம் ப⁴விஸ்ஸதி, ந அஞ்ஞதா²’’தி அத்தனோ மதியா சிந்தேந்தஸ்ஸ ருச்சதி. ருசியா க³ண்ஹாதீதி பரபத்தியோ அஹுத்வா ஸயமேவ ததா² ரோசேந்தோ க³ண்ஹாதி. அனுஸ்ஸவோதி ‘‘அனு அனு ஸுத’’ந்தி ஏவம் சிரகாலக³தாய அனுஸ்ஸுதியா லப்³ப⁴மானம் ‘‘கத²மித³ம் ஸியா, கஸ்மா பூ⁴தமேத’’ந்தி அனுஸ்ஸவேன க³ண்ஹாதி. விதக்கயதோதி ‘‘ஏவமேதம் ஸியா’’தி பரிகப்பேந்தஸ்ஸ. ஏகம் காரணம் உபட்டா²தீதி யதா²பரிகப்பிதவத்து² சித்தஸ்ஸ உபட்டா²தி. ஆகாரபரிவிதக்கேனாதி அத்தனா கப்பிதாகாரேனா தம் க³ண்ஹாதி. ஏகா தி³ட்டி² உப்பஜ்ஜதீதி ‘‘யதா²பரிகப்பிதம் கிஞ்சி அத்த²ம் ஏவமேதம், நாஞ்ஞதா²’’தி அபி⁴னிவிஸந்தஸ்ஸ ஏகோ அபி⁴னிவேஸோ உப்பஜ்ஜதி. யாயஸ்ஸாதி யாய தி³ட்டி²யா அஸ்ஸ புக்³க³லஸ்ஸ. நிஜ்ஜா²யந்தஸ்ஸாதி பச்சக்க²ம் விய நிரூபேத்வா சிந்தேந்தஸ்ஸ. க²மதீதி ததா² க³ஹணக்க²மோ ஹோதி. தேனாஹ ‘‘ஸோ…பே… க³ண்ஹாதீ’’தி. ஏதானீதி ஸத்³தா⁴தீ³னி. தானி ஹி ஸத்³தே⁴ய்யானம் வத்தூ²னம் க³ஹணஹேதுபா⁴வதோ ‘‘காரணானீ’’தி வுத்தானி. ப⁴வனிரோதோ⁴ நிப்³பா³னந்தி நவவிதோ⁴பி ப⁴வோ நிருஜ்ஜ²தி ஏத்த² ஏதஸ்மிம் அதி⁴க³தேதி ப⁴வனிரோதோ⁴, நிப்³பா³னம். ஸ்வாயம் ப⁴வோ பஞ்சக்க²ந்த⁴ஸங்க³ஹோ தப்³பி³னிமுத்தோ நத்தீ²தி ஆஹ ‘‘பஞ்சக்க²ந்த⁴னிரோதோ⁴ நிப்³பா³ன’’ந்தி. ப⁴வனிரோதோ⁴ நிப்³பா³னம் நாமாதி ‘‘நிப்³பா³னம் நாம ப⁴வனிரோதோ⁴’’தி ஏஸ பஞ்ஹோ ஸேக்கே²ஹிபி ஜானிதப்³போ³, ந அஸேக்கே²ஹேவ. இமம் டா²னந்தி இமம் யாதா²வகாரணம்.

ஸுட்டு² தி³ட்ட²ந்தி ‘‘ப⁴வனிரோதோ⁴ நிப்³பா³ன’’ந்தி மயா ஸுட்டு² யாதா²வதோ தி³ட்ட²ம், ப⁴வஸ்ஸ பீளனஸங்க²தஸந்தாபவிபரிணாமட்டா²னம், ப⁴வனிரோத⁴ஸ்ஸ ச நிஸ்ஸரணவிவேகாஸங்க²தாமதட்டா²னம் யதா²பூ⁴தம் ஸம்மப்பஞ்ஞாய தி³ட்ட²த்தா. அனாகா³மிப²லே டி²தோ ஹி அனாகா³மிமக்³கே³ டி²தோ ஏவ நாம உபரிமக்³க³ஸ்ஸ அனதி⁴க³தத்தாதி வுத்தம் ‘‘அனாகா³மிமக்³கே³ டி²தத்தா’’தி. நிப்³பா³னம் ஆரப்³ப⁴ பவத்தம்பி தே²ரஸ்ஸேதம் ஞாணம் ‘‘நிப்³பா³னம் பச்சவேக்க²தீ’’தி வுத்தஞாணம் விய ந ஹோதீதி வுத்தம் ‘‘ஏகூனவீஸதியா…பே… பச்சவேக்க²ணஞாண’’ந்தி. ஏதேன ஏதம் நிப்³பா³னபச்சவேக்க²ணா விய ந ஹோதி ஸப்பதே³ஸபா⁴வதோதி த³ஸ்ஸேதி. ஏவஞ்ச கத்வா இத⁴ உத³பானனித³ஸ்ஸனம்பி ஸமத்தி²தந்தி த³ட்ட²ப்³ப³ம். பச்சவேக்க²ணஞாணேனாதி அவஸேஸகிலேஸானம், நிப்³பா³னஸ்ஸேவ வா பச்சவேக்க²ணஞாணேன. உபரி அரஹத்தப²லஸமயோதி உபரி ஸிஜ்ஜ²னதோ அரஹத்தபடிலாபோ⁴ ததா² அத்தி². ‘‘யேனாஹம் தம் பரியேஸதோ நிப்³பா³னம் ஸச்சி²கரிஸ்ஸாமீ’’தி ஜானாதி.

கோஸம்பி³ஸுத்தவண்ணனா நிட்டி²தா.