7. மஹாவக்³கோ³

1. அஸ்ஸுதவாஸுத்தவண்ணனா

61. ‘‘அஸ்ஸுதவா’’தி ஸோதத்³வாரானுஸாரேன உபதா⁴ரிதம், உபதா⁴ரணம் வா ஸுதம் அஸ்ஸ அத்தீ²தி ஸுதவா, தப்படிக்கே²பேன ந ஸுதவாதி அஸ்ஸுதவா. வா-ஸத்³தோ³ சாயம் பஸம்ஸாயம், அதிஸயஸ்ஸ வா போ³த⁴னகோ, தஸ்மா யஸ்ஸ பஸம்ஸிதம், அதிஸயேன வா ஸுதம் அத்தி², ஸோ ‘‘ஸுதவா’’தி ஸம்கிலேஸவித்³த⁴ம்ஸனஸமத்தோ² பரியத்தித⁴ம்மபரிசயோ ‘‘தம் ஸுத்வா தத²த்தாய படிபத்தி ச ஸுதவா’’தி இமினா பதே³ன பகாஸிதோ. அத² வா ஸோதப்³ப³யுத்தம் ஸுத்வா கத்தப்³ப³னிப்ப²த்திம் ஸுணீதி ஸுதவா. தப்படிக்கே²பேன ந ஸுதவாதி அஸ்ஸுதவா. தேனாஹு போராணா ‘‘ஆக³மாதி⁴க³மாபா⁴வா, ஞேய்யோ அஸ்ஸுதவா இதீ’’தி. ததா² சாஹ ‘‘க²ந்த⁴தா⁴து…பே… வினிச்ச²யரஹிதோ’’தி. தத்த² வாசுக்³க³தகரணம் உக்³க³ஹோ, தத்த² பரிபுச்ச²னம் பரிபுச்சா², குஸலேஹி ஸஹ சோத³னாபரிஹரணவஸேன வினிச்ச²யஸ்ஸ காரணம் வினிச்ச²யோ. புதூ²னந்தி ப³ஹூனம். கிலேஸாதீ³னம் கிலேஸாபி⁴ஸங்கா²ரானம் வித்தா²ரேதப்³ப³ம் படிஸம்பி⁴தா³மக்³க³னித்³தே³ஸேஸு (மஹானி. 51, 94) ஆக³தனயேன. அந்த⁴புது²ஜ்ஜனோ க³ஹிதோ ‘‘நாலம் நிப்³பி³ந்தி³து’’ந்திஆதி³வசனதோ. ஆஸன்னபச்சக்க²வாசீ இத³ம்-ஸத்³தோ³தி ஆஹ ‘‘இமஸ்மிந்தி பச்சுப்பன்னபச்சக்க²காயம் த³ஸ்ஸேதீ’’தி. சதூஸு மஹாபூ⁴தேஸு நியுத்தோதி சாதுமஹாபூ⁴திகோ. யதா² பன மஹாமத்திகாய நிப்³ப³த்தம் மத்திகாமயம், ஏவமயம் சதூஹி மஹாபூ⁴தேஹி நிப்³ப³த்தோ ‘‘சதுமஹாபூ⁴தமயோ’’தி வுத்தம். நிப்³பி³ந்தே³ய்யாதி நிப்³பி³ந்த³னம்பி ஆபஜ்ஜேய்ய. நிப்³பி³ந்த³னா நாம உக்கண்ட²னா அனபி⁴ரதிபா⁴வதோதி வுத்தம் ‘‘உக்கண்டே²ய்யா’’தி. விரஜ்ஜேய்யாதி வீதராகோ³ ப⁴வேய்ய. தேனாஹ ‘‘ந ரஜ்ஜேய்யா’’தி. விமுச்சேய்யாதி இத⁴ பன அச்சந்தாய விமுச்சனம் அதி⁴ப்பேதந்தி ஆஹ ‘‘முச்சிதுகாமோ ப⁴வேய்யா’’தி. சதூஹி ச ரூபஜனகபச்சயேஹி ஆக³தோ சயோதி, ஆசயோ, வுத்³தி⁴. சயதோ அபக்கமோதி அபசயோ, பரிஹானி. ஆதா³னந்தி க³ஹணம், படிஸந்தி⁴யா நிப்³ப³த்தி. பே⁴தோ³தி க²ந்தா⁴னம் பே⁴தோ³. ஸோ ஹி களேவரஸ்ஸ நிக்கே²போதி வுத்தோதி ஆஹ ‘‘நிக்கே²பனந்தி பே⁴தோ³’’தி.

பஞ்ஞாயந்தீதி பகாரதோ ஞாயந்தி. ரூபம் பரிக்³க³ஹேதும் பரிக்³க³ண்ஹனவஸேனபி ரூபம் ஆலம்பி³தும். அயுத்தரூபம் கத்வா தண்ஹாதீ³ஹி பரிக்³க³ஹேதும் அரூபம் பரிக்³க³ண்ஹிதும் யுத்தரூபம் கரோதி தேஸம் பி⁴க்கூ²னம் ஸப்பாயபா⁴வதோ. தேனாஹ ‘‘கஸ்மா’’திஆதி³. நிக்கட்³ட⁴ந்தோதி ததோ கா³ஹதோ நீஹரந்தோ.

மனாயதனஸ்ஸேவ நாமம், ந ஸமாதி⁴பஞ்ஞத்தீனம் ‘‘சித்தம் பஞ்ஞஞ்ச பா⁴வயம் (ஸம். நி. 1.23, 192; பேடகோ. 22; மி. ப. 1.9.9), சித்தோ க³ஹபதீ’’திஆதீ³ஸு (த⁴. ப. அட்ட². 74) விய. சித்தீகாதப்³ப³பூ⁴தம் வத்து² ஏதஸ்ஸாதி சித்தவத்து², தஸ்ஸ பா⁴வோ சித்தவத்து²தா, தேன காரணேன சித்தபா⁴வமாஹ. சித்தகோ³சரதாயாதி சித்தவிசித்தவிஸயதாய. ஸம்பயுத்தத⁴ம்மசித்ததாயாதி ராகா³தி³ஸத்³தா⁴தி³ஸம்பயுத்தத⁴ம்மவஸேன சித்தஸபா⁴வத்தா. தேன சித்ததாய சித்தத்தமாஹ. விஜானனட்டே²னாதி பு³ஜ்ஜ²னட்டே²ன. அஜ்ஜோ²ஸிதந்தி அஜ்ஜோ²ஸாபூ⁴தாய தண்ஹாய க³ஹிதம். தேனாஹ ‘‘தண்ஹாயா’’திஆதி³. பராமஸித்வாதி த⁴ம்மஸபா⁴வம் அனிச்சதாதி³ம் அதிக்கமித்வா பரதோ நிச்சாதி³தோ ஆமஸித்வா. அட்ட²ஸதந்தி அட்டா²தி⁴கம் ஸதம். நவ மானாதி ஸேய்யஸ்ஸ ‘‘ஸேய்யோஹமஸ்மீ’’திஆதி³னா ஆக³தா நவவித⁴மானா. ப்³ரஹ்மஜாலே ஆக³தா ஸஸ்ஸதவாதா³த³யோ த்³வாஸட்டி²தி³ட்டி²யோ. ஏவந்தி வுத்தாகாரேன. யஸ்மா தண்ஹாமானதி³ட்டி²க்³கா³ஹவஸேன புது²ஜ்ஜனேன த³ள்ஹக்³கா³ஹம் க³ஹிதம், தஸ்மா ஸோ தத்த² நிப்³பி³ந்தி³தும் நிப்³பி³தா³ஞாணம் உப்பாதே³தும் ந ஸமத்தோ².

பி⁴க்க²வேதி ஏத்த² இதி-ஸத்³தோ³ ஆதி³அத்தோ², தேன ‘‘வர’’ந்தி ஏவமாதி³கம் ஸங்க³ண்ஹாதி. இத³ம் அனுஸந்தி⁴வசனம் ‘‘கஸ்மா ஆஹா’’தி கதே²துகாமதாய காரணம் புச்ச²தி. தேனாஹ ‘‘பட²மம் ஹீ’’திஆதி³. அஸ்ஸுதவதா புது²ஜ்ஜனேன. தேனாதி ப⁴க³வதா. அயுத்தரூபம் கதம் ‘‘நிப்³பி³ந்தே³ய்யா’’திஆதி³னா ஆதீ³னவஸ்ஸ விபா⁴விதத்தா. அரூபே பன ததா² ஆதீ³னவஸ்ஸ அவிபா⁴விதத்தா வுத்தம் ‘‘அரூபம் பரிக்³க³ஹேதும் யுத்தரூப’’ந்தி, யுத்தரூபம் விய கதந்தி அதி⁴ப்பாயோ. கா³ஹோதி தண்ஹாமானதி³ட்டி²க்³கா³ஹோ. ‘‘நிக்க²மித்வா அரூபம் க³தோ’’தி இத³ம் ப⁴க³வதா ஆதீ³னவம் த³ஸ்ஸேத்வா ரூபே கா³ஹோ படிக்கி²த்தோ, ந அரூபே, தஸ்மா ‘‘காதப்³போ³ நு கோ² ஸோ தத்தா²’’தி மிச்சா²க³ண்ஹந்தானம் ஸோ ததோ ரூபதோ நிக்க²மித்வா அரூபம் க³தோ விய ஹோதீதி கத்வா வுத்தம். திட்ட²மானந்தி திட்ட²ந்தம். ‘‘ஆபஜ்ஜித்வா விய ஹோதீ’’தி ஸபா⁴வேன பவத்தமானம் ‘‘பட²மவயே’’திஆதி³னா ரூபஸ்ஸ பே⁴த³ம் வயாதீ³ஹி விப⁴ஜித்வா த³ஸ்ஸேதி.

பாத³ஸ்ஸ உத்³த⁴ரணேதி யதா² ட²பிதஸ்ஸ பாத³ஸ்ஸ உக்கி²பனே. அதிஹரணந்தி யதா²உத்³த⁴தம் யதா²ட்டி²தட்டா²னம் அதிக்கமித்வா ஹரணம். வீதிஹரணந்தி உத்³த⁴தோ பாதோ³ யதா²ட்டி²தம் பாத³ம் யதா² ந க⁴ட்டேதி, ஏவம் தோ²கம் பஸ்ஸதோ பரிணாமேத்வா ஹரணம். வோஸ்ஸஜ்ஜனந்தி ததா² பரபாத³ம் வீதிஸாரேத்வா பூ⁴மியம் நிக்கி²பனத்த²ம் அவோஸ்ஸஜ்ஜனம். ஸன்னிக்கே²பனந்தி வோஸ்ஸஜ்ஜேத்வா பூ⁴மியம் ஸமம் நிக்கி²பனம் ட²பனம். ஸன்னிருஜ்ஜ²னந்தி நிக்கி²த்தஸ்ஸ ஸப்³ப³ஸோ நிருஜ்ஜ²னம் உப்பீளனம். தத்த² தத்தே²வாதி தஸ்மிம் தஸ்மிம் பட²மவயாதி³கே ஏவ. அவதா⁴ரணேன தேஸம் கோட்டா²ஸந்தரஸங்கமனாபா⁴வமாஹ. ஓதீ⁴தி பா⁴வோ, பப்³ப³ந்தி ஸந்தி⁴. பட²மவயாத³யோ ஏவ ஹேத்த² ஓதி⁴ பப்³ப³ந்தி ச அதி⁴ப்பேதா. படபடாயந்தாதி ‘‘படபடா’’இதி கரோந்தா விய, தேன நேஸம் பவத்திக்க²ணஸ்ஸ இத்தரதம் த³ஸ்ஸேதி. ஏதந்தி ஏதம் ரூபத⁴ம்மானம் யதா²வுத்தம் தத்த² தத்தே²வ பி⁴ஜ்ஜனம் ஏவம் வுத்தப்பகாரமேவ. வட்டிப்பதே³ஸந்தி வட்டியா புலகம் ப³ரஹம். தஞ்ஹி வட்டியா புலகம் அனதிக்கமித்வாவ ஸா தீ³பஜாலா பி⁴ஜ்ஜதி. பவேணிஸம்ப³ந்த⁴வஸேனாதி ஸந்ததிவஸேன.

ரத்திந்தி ரத்தியம். பு⁴ம்மத்தே² ஹேதம் உபயோக³வசனம். ஏவம் பன அத்தோ² ந க³ஹேதப்³போ³ அனுப்பன்னஸ்ஸ நிரோதா⁴பா⁴வதோ. புரிமபவேணிதோதி ரூபே வுத்தபவேணிதோ. அனேகானி சித்தகோடிஸதஸஹஸ்ஸானி உப்பஜ்ஜந்தீதி வுத்தமத்த²ம் தே²ரவாதே³ன தீ³பேதும் ‘‘வுத்தம்பி சேத’’ந்திஆதி³ வுத்தம். அட்³ட⁴சூளந்தி தோ²கேன ஊனம் உபட்³ட⁴ம், தஸ்ஸ பன உபட்³ட⁴ம் அதி⁴காரதோ வாஹஸதஸ்ஸாதி விஞ்ஞாயதி. ‘‘அட்³ட⁴சுத்³த³ஸ’’ந்தி கேசி, ‘‘அட்³ட⁴சதுத்த²’’ந்தி அபரே. ‘‘ஸாதி⁴கம் தி³யட்³ட⁴ஸதம் வாஹா’’தி த³ள்ஹம் கத்வா வத³ந்தீதி வீமம்ஸிதப்³ப³ம். சதுனாளிகோ தும்போ³. மஹாரஞ்ஞதாய பவத்³த⁴ம் வனம் பவனந்தி ஆஹ ‘‘பவனேதி மஹாவனே’’தி. தந்தி பட²மம் க³ஹிதஸாக²ம். அயமத்தோ²தி அயம் பூ⁴மிம் அனோதரித்வா டி²தஸாகா²ய ஏவ க³ஹணஸங்கா²தோ அத்தோ². ஏதத³த்த²மேவ ஹி ப⁴க³வா ‘‘அரஞ்ஞே’’தி வத்வாபி ‘‘பவனே’’தி ஆஹ.

அரஞ்ஞமஹாவனம் வியாதி அரஞ்ஞட்டா²னே ப்³ரஹாரஞ்ஞே விய. ஆரம்மணோலம்ப³னந்தி ஆரம்மணஸ்ஸ அவலம்ப³னம். ந வத்தப்³ப³ம் ஆரம்மணபச்சயேன வினா அனுப்பஜ்ஜனதோ. ஏகஜாதியந்தி ரூபாதி³னீலாதி³ஏகஸபா⁴வம். ‘‘தி³ஸ்ஸதி, பி⁴க்க²வே, இமஸ்ஸ சாதுமஹாபூ⁴திகஸ்ஸ காயஸ்ஸ ஆசயோபி அபசயோபீ’’தி வத³ந்தேன ரூபதோ நீஹரித்வா அரூபே கா³ஹோ பதிட்டா²பிதோ நாம, ‘‘வரம், பி⁴க்க²வே, அஸ்ஸுதவா புது²ஜ்ஜனோ’’திஆதி³ம் வத³ந்தேன அரூபதோ நீஹரித்வா ரூபே கா³ஹோ பதிட்டா²பிதோ நாம.

நந்தி கா³ஹம். உப⁴யதோதி ரூபதோ ச அரூபதோ ச. ஹரிஸ்ஸாமீதி நீஹரிஸ்ஸாமி. பரிவத்தேத்வாதி மந்தம் ஜப்பித்வா. கண்ணே து⁴மேத்வாதி கண்ணே த⁴மேத்வா. அஸ்ஸாதி விஸஸ்ஸ. நிம்மதே²த்வாதி நிம்மத்³தி³த்வா, நீஹரித்வாதி அதி⁴ப்பாயோ.

மக்³கோ³தி லோகுத்தரமக்³கோ³. ‘‘நிப்³பி³ந்த³’’ந்தி இமினா ப³லவவிபஸ்ஸனா கதி²தா.

அஸ்ஸுதவாஸுத்தவண்ணனா நிட்டி²தா.

2. து³தியஅஸ்ஸுதவாஸுத்தவண்ணனா

62. பச்சயபா⁴வேன ஸுக²வேத³னாய ஹிதந்தி ஸுக²வேத³னியம். தேனாஹ ‘‘ஸுக²வேத³னாய பச்சய’’ந்தி. பச்சயபா⁴வோ ச உபனிஸ்ஸயகோடியா, ந ஸஹஜாதகோடியா. தேனாஹ ‘‘நனு சா’’திஆதி³. ஜவனவேத³னாயாதி ஜவனசித்தஸஹக³தாய வேத³னாய. தம் ஸந்தா⁴யாதி தம் உபனிஸ்ஸயபச்சயதம் ஸந்தா⁴ய. ஏதந்தி ஏதம் ‘‘ஸுக²வேத³னாய பச்சய’’ந்தி வசனம் வுத்தம். ஏஸேவ நயோதி இமினா ‘‘நனு ச ஸோதஸம்ப²ஸ்ஸோ ஸுக²வேத³னாய பச்சயோ ந ஹோதீ’’தி ஏவமாதி³ம் அதிதி³ஸதி. ஸோ ஸம்ப²ஸ்ஸோ ஜாதி உப்பத்திட்டா²னம் ஏதஸ்ஸாதி தஜ்ஜாதிகம், வேத³யிதம். தம் பன யஸ்மா தஸ்ஸ ப²ஸ்ஸஸ்ஸ அனுச்ச²விகமேவ ஹோதி, தஸ்மா தஸ்ஸாருப்பம் தஸ்ஸ ப²ஸ்ஸஸ்ஸ அனுரூபந்தி ச அத்தோ² வுத்தோ. வுத்தனயேனாதி ‘‘ஸுக²வேத³னாய பச்சயோ’’திஆதி³னா வுத்தவிதி⁴அனுஸாரேன. அத⁴ராரணியம் உத்தராரணியா மந்தனவஸேன க⁴ட்டனம் இவ ஸங்க⁴ட்டனம் ப²ஸ்ஸேன யுக³க்³கா³ஹோ, தஸ்ஸ பன க⁴ட்டனஸ்ஸ நிரந்தரப்பவத்தியா பிண்டி³தபா⁴வோ இத⁴ ஸமோதா⁴னம், ந கேஸஞ்சி த்³வின்னம் திண்ணம் வா ஸஹாவட்டா²னந்தி வுத்தம் ‘‘ஸங்க⁴ட்டனஸம்பிண்ட³னேனாதி அத்தோ²’’தி. அக்³கி³சுண்ணோதி விப்பு²லிங்க³ம். வத்தூ²தி சக்கா²தி³வத்து² விஸயஸங்க⁴ட்டனதோ. லப்³ப⁴மானோவ த⁴ம்மோ ஸங்க⁴ட்டனம் விய க³ய்ஹதீதி வுத்தம் ‘‘ஸங்க⁴ட்டனம் விய ப²ஸ்ஸோ’’தி. உஸ்மாதா⁴து விய வேத³னா து³க்க²ஸபா⁴வத்தா.

து³தியஅஸ்ஸுதவாஸுத்தவண்ணனா நிட்டி²தா.

3. புத்தமம்ஸூபமஸுத்தவண்ணனா

63. வுத்தனயமேவாதி ஹேட்டா² ஆஹாரவக்³க³ஸ்ஸ பட²மஸுத்தே வுத்தனயமேவ. லாப⁴ஸக்காரேனாதி லாப⁴ஸக்காரஸங்கா²தாய அட்டு²ப்பத்தியாதி கேசி. லாப⁴ஸக்காரே வா அட்டு²ப்பத்தியாதி அபரே. யோ ஹி லாப⁴ஸக்காரனிமித்தம் பச்சயேஸு கே³தே⁴ன பி⁴க்கூ²னம் அபச்சவேக்கி²தபரிபோ⁴கோ³ ஜாதோ, தம் அட்டு²ப்பத்திம் கத்வா ப⁴க³வா இமம் தே³ஸனம் நிக்கி²பி. யமகமஹாமேகோ⁴தி ஹேட்டா² ஓலம்ப³னஉபரிஉக்³க³மனவஸேன ஸதபடலஸஹஸ்ஸபடலோ யுக³ளமஹாமேகோ⁴.

திட்ட²ந்தி சேவ ப⁴க³வதி கத்த²சி நிப³த்³த⁴வாஸம் வஸந்தே, சாரிகம்பி க³ச்ச²ந்தே அனுப³ந்த⁴ந்தி ச. பி⁴க்கூ²னம்பி யேபு⁴ய்யேன கப்பஸதஸஹஸ்ஸம் ததோ பி⁴ய்யோபி பூரிததா³னபாரமிஸஞ்சயத்தா ததா³ மஹாலாப⁴ஸக்காரோ உப்பஜ்ஜதீதி வுத்தம் ‘‘ஏவம் பி⁴க்கு²ஸங்க⁴ஸ்ஸபீ’’தி. ஸக்கதோதி ஸக்காரப்பத்தோ. க³ருகதோதி க³ருகாரப்பத்தோ. மானிதோதி ப³ஹுமதோ மனஸா பியாயிதோ ச. பூஜிதோதி மாலாதி³பூஜாய சேவ சதுபச்சயாபி⁴பூஜாய ச பூஜிதோ. அபசிதோதி அபசாயனப்பத்தோ. யஸ்ஸ ஹி சத்தாரோ பச்சயே ஸக்கத்வா ஸுஅபி⁴ஸங்க²தே பணீதபணீதே உபனேந்தி, ஸோ ஸக்கதோ. யஸ்மிம் க³ருபா⁴வம் பச்சுபட்ட²பேத்வா தே³ந்தி, ஸோ க³ருகதோ. யம் மனஸா பியாயந்தி ப³ஹுமஞ்ஞந்தி, ஸோ ப³ஹுமதோ. யஸ்ஸ ஸப்³ப³மேதம் பூஜாவஸேன கரோந்தி, ஸோ பூஜிதோ. யஸ்ஸ அபி⁴வாத³னபச்சுட்டா²னஞ்ஜலிகம்மாதி³வஸேன பரமனிபச்சகாரம் கரோந்தி, ஸோ அபசிதோ. ப⁴க³வதி பி⁴க்கு²ஸங்கே⁴ ச லோகோ ஏவம் படிபன்னோ. தேன வுத்தம் ‘‘தேன கோ² பன ஸமயேன…பே… பரிக்கா²ரான’’ந்தி (உதா³. 14; ஸம். நி. 2.70). லாப⁴க்³க³யஸக்³க³ப்பத்தந்தி லாப⁴ஸ்ஸ ச யஸஸ்ஸ ச அக்³க³ம் உக்கம்ஸம் பத்தம்.

பட²மாஹாரவண்ணனா

அஸ்ஸாதி ப⁴க³வதோ. த⁴ம்மஸபா⁴வசிந்தாவஸேன பவத்தம் ஸஹோத்தப்பஞாணம் த⁴ம்மஸம்வேகோ³. து⁴வபடிஸேவனட்டா²னஞ்ஹேதம் ஸத்தானம், யதி³த³ம் ஆஹாரபரிபோ⁴கோ³, தஸ்மா ந தத்த² அபச்சவேக்க²ணமத்தேன பாராஜிகம் பஞ்ஞபேதும் ஸக்காதி அதி⁴ப்பாயோ. ஆஹாராதி ‘‘பச்சயா’’திஆதி³னா புப்³பே³ ஆஹாரேஸு வுத்தவிதி⁴ம் ஸந்தா⁴ய ஆஹ ‘‘ஆஹாரா’’திஆதி³. இதா³னி தத்த² கத்தப்³ப³ம் அத்த²வண்ணனம் ஸந்தா⁴ய ‘‘ஹேட்டா² வுத்தத்த²மேவா’’தி வுத்தம்.

ஆதீ³னவந்தி தோ³ஸம். ஜாயாதி ப⁴ரியா. பதீதி ப⁴த்தா. அபேக்கா²ஸத்³தா³ சேதே பிதாபுத்தஸத்³தா³ விய, பாளியம் பன ஆ-காரஸ்ஸ ரஸ்ஸத்தம் ஸானுனாஸிகஞ்ச கத்வா வுத்தம் ‘‘ஜாயம்பதிகா’’தி. ஸம்மா ப²லம் வஹதீதி ஸம்ப³லம், ஸுகா²வஹந்தி அத்தோ². ததா² ஹி தம் ‘‘பதே² ஹிதந்தி பாதே²ய்ய’’ந்தி வுச்சதி. மக்³க³ஸ்ஸ கந்தாரபரியாபன்னத்தா வுத்தம் ‘‘கந்தாரபூ⁴தம் மக்³க³’’ந்தி. து³ல்லப⁴தாய தம் உத³கம் தத்த² தாரேதீதி கந்தாரம், நிருத³கம் மஹாவனம். ருள்ஹீவஸேன இதரம்பி மஹாவனம் ததா² வுச்சதீதி ஆஹ ‘‘சோரகந்தார’’ந்திஆதி³. பரராஜூனம் வேரிஆதீ³னஞ்ச வஸேன ஸப்படிப⁴யம்பி அரஞ்ஞம் ஏத்தே²வ ஸங்க³ஹம் க³ச்ச²தீதி வுத்தம் ‘‘பஞ்சவித⁴’’ந்தி.

க⁴னக⁴னட்டா²னதோதி மம்ஸஸ்ஸ ப³ஹலப³ஹலம் தூ²லதூ²லம் ஹுத்வா டி²தட்டா²னதோ. ‘‘தாதி³ஸஞ்ஹி மம்ஸம் க³ஹேத்வா ஸுக்கா²பிதம் வல்லூரம். ஸூலே ஆவுனித்வா பக்கமம்ஸம் ஸூலமம்ஸம். விரளச்சா²யாயம் நிஸீதி³ம்ஸு க³ந்தும் அஸமத்தோ² ஹுத்வா. கோ³வதகுக்குரவததே³வதாயாசனாதீ³ஹீதி கோ³வதகுக்குரவதாதி³வதசரணேஹி சேவ தே³வதாயாசனாதீ³ஹி பணிதி⁴கம்மேஹி ச மஹந்தம் து³க்க²ம் அனுபூ⁴தம்.

யஸ்மா பன ஸாஸனே ஸம்மாபடிபஜ்ஜந்தஸ்ஸ பி⁴க்கு²னோ ஆஹாரபரிபோ⁴க³ஸ்ஸ ஓபம்மபா⁴வேன தேஸம் ஜாயம்பதிகானம் புத்தமம்ஸபரிபோ⁴கோ³ இத⁴ ப⁴க³வதா ஆனீதோ, தஸ்மாஸ்ஸ நானாகாரேஹி ஓபம்மத்தம் விபா⁴வேதும் ‘‘தேஸம் ஸோ புத்தமம்ஸாஹாரோ’’திஆதி³ ஆரத்³த⁴ம். தத்த² ஸஜாதிமம்ஸதாயாதி ஸமானஜாதிகமம்ஸபா⁴வேன, மனுஸ்ஸமம்ஸபா⁴வேனாதி அத்தோ². மஸுஸ்ஸமம்ஸஞ்ஹி குலப்பஸுதமனுஸ்ஸானம் அமனுஞ்ஞம் ஹோதி அபரிசிதபா⁴வதோ கா³ரய்ஹபா⁴வதோ ச, ததோ ஏவ ஞாதிஆதி³மம்ஸதாயாதிஆதி³ வுத்தம். தருணமம்ஸதாயாதிஆதி³ பன ஸபா⁴வதோ அனபி⁴ஸங்கா²ரதோ ச அமனுஞ்ஞாதி கத்வா வுத்தம். அதூ⁴பிததாயாதி அதூ⁴பிதபா⁴வதோ. மஜ்ஜ²த்தபா⁴வேயேவ டி²தா. ததோ ஏவ நிச்ச²ந்த³ராக³பரிபோ⁴கே³ டி²தாதி வுத்தம் கந்தாரதோ நித்த²ரணஜ்ஜா²ஸயதாய. இதா³னி யே ச தே அனபனீதாஹாரோ, ந யாவத³த்த²பரிபோ⁴கோ³ விக³தமச்சே²ரமலதா ஸம்மோஹாபா⁴வோ ஆயதிம் தத்த² பத்த²னாபா⁴வோ ஸன்னிதி⁴காராபா⁴வோ அபரிச்சஜனமத³த்தா²பா⁴வோ அஹீளனா அவிவாத³பரிபோ⁴கோ³ சாதி உபமாயம் லப்³ப⁴மானா பகாரவிஸேஸா, தே ததா² நீஹரித்வா உபமேய்யே யோஜேத்வா த³ஸ்ஸேதும் ‘‘ந அட்டி²ன்ஹாருசம்மனிஸ்ஸிதட்டா²னானீ’’திஆதி³ வுத்தம். தம் காரணந்தி தம் தேஸம் ஜாயம்பதீனம் யாவதே³வ கந்தாரனித்த²ரணத்தா²ய புத்தமம்ஸபரிபோ⁴க³ஸங்கா²தம் காரணம்.

நிஸ்ஸந்த³பாடிகுல்யதம் பச்சவேக்க²ந்தோபி கப³ளீகாராஹாரம் பரிவீமம்ஸதி. யதா² தே ஜாயம்பதிகாதிஆதி³பி ஓபம்மஸம்ஸந்த³னம். ‘‘பரிபு⁴ஞ்ஜிதப்³போ³ ஆஹாரோ’’தி பத³ம் ஆனேத்வா ஸம்ப³ந்தி⁴தப்³ப³ம். ஏஸ நயோ இதோ பரேஸுபி. அபடிக்கி²பித்வாதி அனபனேத்வா. வட்டகேன விய குக்குடேன விய சாதி விஸதி³ஸூதா³ஹரணம். ஓதி⁴ம் அத³ஸ்ஸேத்வாதி மஹந்தக்³க³ஹணவஸேன ஓதி⁴ம் அகத்வா. ஸீஹேன வியாதி ஸதி³ஸூதா³ஹரணம். ஸோ கிர ஸபதா³னமேவ கா²த³தி.

அக³தி⁴தஅமுச்சி²தாதி³பா⁴வேன பரிபு⁴ஞ்ஜிதப்³ப³தோ ‘‘அமச்ச²ராயித்வா’’திஆதி³ வுத்தம். அப்³ப⁴ந்தரே அத்தா நாம அத்தீ²தி தி³ட்டி² அத்தூபலத்³தி⁴, தம்ஸஹக³தேன ஸம்மோஹேன அத்தா ஆஹாரம் பரிபு⁴ஞ்ஜதீதி. ஸதிஸம்பஜஞ்ஞவஸேனபீதி ‘‘அஸிதே பீதே கா²யிதே ஸாயிதே ஸம்பஜானகாரீ ஹோதீ’’தி ஏத்த² வுத்தஸதிஸம்பஜஞ்ஞவஸேனபி.

‘‘அஹோ வத மயம்…பே… லபே⁴ய்ய’’ந்தி பத்த²னம் வா, ‘‘ஹிய்யோ விய…பே… ந லத்³த⁴’’ந்தி அனுஸோசனம் வா அகத்வாதி யோஜனா.

‘‘ஸன்னிதி⁴ம் ந அகம்ஸு, பூ⁴மியம் வா நிக²ணிம்ஸு, அக்³கி³னா வா ஜா²பயிம்ஸூ’’தி ந-காரம் ஆனேத்வா யோஜனா. ஏவம் ஸப்³ப³த்த².

பிண்ட³பாதம் வா அஹீளேந்தேன தா³யகம் வா அஹீளேந்தேன பரிபு⁴ஞ்ஜிதப்³போ³தி யோஜனா. ஸ பத்தபாணீதி ஸோ பத்தஹத்தோ². நாவஜானியாதி ந அவஜானியா. அதிமஞ்ஞதீதி அதிக்கமித்வா மஞ்ஞதி, அவஜானாதீதி அத்தோ².

‘‘தீஹி பரிஞ்ஞாஹி பரிஞ்ஞாதே’’தி வத்வா தாஹி கப³ளீகாராஹாரஸ்ஸ பரிஜானனவிதி⁴ம் த³ஸ்ஸேந்தோ ‘‘கத²’’ந்திஆதி³மாஹ. தத்த² ஸவத்து²கவஸேனாதி ஸஸம்பா⁴ரவஸேன, ஸபா⁴வதோ பன ரூபாஹரணம் ஓஜமத்தம் ஹோதி. இத³ஞ்ஹி கப³ளீகாராஹாரஸ்ஸ லக்க²ணம். காமம் ரஸாரம்மணம் ஜிவ்ஹாபஸாதே³ படிஹஞ்ஞதி, தேன பன அவினாபா⁴வதோ ஸம்பத்தவிஸயகா³ஹிதாய ச ஜிவ்ஹாபஸாத³ஸ்ஸ ‘‘ஓஜட்ட²மகரூபம் கத்த² படிஹஞ்ஞதீ’’தி வுத்தம். தஸ்ஸாதி ஜிவ்ஹாபஸாத³ஸ்ஸ. இமே த⁴ம்மாதி இமே யதா²வுத்தபூ⁴துபாதா³யத⁴ம்மா. தந்தி ரூபக²ந்த⁴ம். பரிக்³க³ண்ஹதோதி பரிக்³க³ண்ஹந்தஸ்ஸ. உப்பன்னா ப²ஸ்ஸபஞ்சமகா த⁴ம்மாதி ஸப்³பே³பி யே யதா²னித்³தா⁴ரிதா, தேஹி ஸஹப்பவத்தாவ ஸப்³பே³பி இமே. ஸரஸலக்க²ணதோதி அத்தனோ கிச்சதோ லக்க²ணதோ ச. தேஸம் நாமரூபபா⁴வேன வவத்த²பிதானம் பஞ்சன்னம் க²ந்தா⁴னம் பச்சயோ விஞ்ஞாணம். ‘‘தஸ்ஸ ஸங்கா²ரா தேஸம் அவிஜ்ஜா’’தி ஏவம் உத்³த⁴ம் ஆரோஹனவஸேன பச்சயம். அதோ⁴ஓரோஹனவஸேன பன ஸளாயதனாதி³கே பரியேஸந்தோ அனுலோமபடிலோமம் படிச்சஸமுப்பாத³ம் பஸ்ஸதி. ஸளாயதனாத³யோபி ஹி ரூபாரூபத⁴ம்மானம் யதா²ரஹம் பச்சயபா⁴வேன வவத்த²பேதப்³பா³தி. யாதா²வதோ தி³ட்ட²த்தாதி ‘‘இத³ம் ரூபம், ஏத்தகம் ரூபம், ந இதோ பி⁴ய்யோ, இத³ம் நாமம், ஏத்தகம் நாமம், ந இதோ பி⁴ய்யோ’’தி ச யதா²பூ⁴தம் தி³ட்ட²த்தா. அனிச்சானுபஸ்ஸனா, து³க்கா²னுபஸ்ஸனா, அனத்தானுபஸ்ஸனா, நிப்³பி³தா³னுபஸ்ஸனா, விராகா³னுபஸ்ஸனா, நிரோதா⁴னுபஸ்ஸனா, படினிஸ்ஸக்³கா³னுபஸ்ஸனாதி இமாஸம் ஸத்தன்னம் அனுபஸ்ஸனானம் வஸேன. ஸோதி கப³ளீகாராஹாரோ. திலக்க²ண…பே… ஸங்கா²தாயாதி அனிச்சதாதீ³னம் திண்ணம் லக்க²ணானம் படிவிஜ்ஜ²னவஸேன லக்க²ணவந்தஸம்மஸனவஸேன ச பவத்தஞாணஸங்கா²தாய. பரிஞ்ஞாதோ ஹோதி அனவஸேஸதோ நாமரூபஸ்ஸ ஞாதத்தா தப்பரியாபன்னத்தா ச ஆஹாரஸ்ஸ. தேனாஹ ‘‘தஸ்மிம் யேவா’’திஆதி³. ச²ந்த³ராகா³வகட்³ட⁴னேனாதி ச²ந்த³ராக³ஸ்ஸ பஜஹனேன.

பஞ்ச காமகு³ணா காரணபூ⁴தா ஏதஸ்ஸ அத்தீ²தி பஞ்சகாமகு³ணிகோ. தேனாஹ ‘‘பஞ்சகாமகு³ணஸம்ப⁴வோ’’தி. ஏகிஸ்ஸா தண்ஹாய பரிஞ்ஞா ஏகபரிஞ்ஞா. ஸப்³ப³ஸ்ஸ பஞ்சகாமகு³ணிகஸ்ஸ ராக³ஸ்ஸ பரிஞ்ஞா, ஸப்³ப³பரிஞ்ஞா. தது³ப⁴யஸ்ஸபி மூலபூ⁴தஸ்ஸ ஆஹாரஸ்ஸ பரிஞ்ஞா மூலபரிஞ்ஞா. இதா³னி இமா திஸ்ஸோபி பரிஞ்ஞாயோ விபா⁴கே³ன த³ஸ்ஸேதும் ‘‘யோ பி⁴க்கூ²’’திஆதி³ ஆரத்³த⁴ம். ஜிவ்ஹாத்³வாரே ஏகரஸதண்ஹம் பரிஜானாதீதி ஜிவ்ஹாய ரஸம் ஸாயித்வா இதி படிஸஞ்சிக்க²தி ‘‘யோ யமேத்த² ரஸோ, ஸோ வத்து²காமவஸேன ஓஜட்ட²மகரூபம் ஹோதி ஜிவ்ஹாயதனம் பஸாதோ³. ஸோ கிம் நிஸ்ஸிதோ? சதுமஹாபூ⁴தனிஸ்ஸிதோ. தம்ஸஹஜாதோ வண்ணோ க³ந்தோ⁴ ரஸோ ஓஜா ஜீவிதிந்த்³ரியந்தி இமே த⁴ம்மா ரூபக்க²ந்தோ⁴ நாம. யோ தஸ்மிம் ரஸே அஸ்ஸாதோ³, அயம் ரஸதண்ஹா. தம்ஸஹக³தா ப²ஸ்ஸாத³யோ த⁴ம்மா சத்தாரோ அரூபக்க²ந்தா⁴’’திஆதி³வஸேன. ஸப்³ப³ம் அட்ட²கதா²யம் ஆக³தவஸேன வேதி³தப்³ப³ம். தேனாஹ ‘‘தேன பஞ்சகாமகு³ணிகோ ராகோ³ பரிஞ்ஞாதோவ ஹோதீ’’தி. தத்த² தேனாதி யோ பி⁴க்கு² ஜிவ்ஹாத்³வாரே ரஸதண்ஹம் பரிஜானாதி, தேன. கத²ம் பன ஏகஸ்மிம் த்³வாரே தண்ஹம் பரிஜானதோ பஞ்சஸு த்³வாரேஸு ராகோ³ பரிஞ்ஞாதோ ஹோதீதி ஆஹ ‘‘கஸ்மா’’திஆதி³. தஸ்ஸாயேவாதி தண்ஹாய ஏவ தண்ஹாஸாமஞ்ஞதோ ஏகத்தனயவஸேன வுத்தம். தத்தா²தி பஞ்சஸு த்³வாரேஸு. உப்பஜ்ஜனதோதி ரூபராகா³தி³பா⁴வேன உப்பஜ்ஜனதோ. லோபோ⁴ ஏவ ஹி தண்ஹாயனட்டே²ன ‘‘தண்ஹா’’திபி, ரஜ்ஜனட்டே²ன ‘‘ராகோ³’’திபி வுச்சதி. தேனாஹ ‘‘ஸாயேவ ஹீ’’திஆதி³. இதா³னி வுத்தமேவத்த²ம் ‘‘யதா²’’திஆதி³னா உபமாய ஸம்பிண்டே³தி. பஞ்சமக்³கே³ ஹனதோதி பஞ்சஸு மக்³கே³ஸு ஸஞ்சரித்தம் கரோந்தேன மக்³க³கா³மினோ ஹனந்தோ ‘‘மக்³கே³ ஹனதோ’’தி வுத்தோ.

ஸப்³யஞ்ஜனே பிண்ட³பாதஸஞ்ஞிதே ப⁴த்தஸமூஹே மனுஞ்ஞே ரூபே ரூபஸத்³தா³த³யோ லப்³ப⁴ந்தி, தத்த² பஞ்சகாமகு³ணராக³ஸ்ஸ ஸம்ப⁴வம் த³ஸ்ஸேதும் ‘‘கத²’’ந்திஆதி³ வுத்தம். ஸதிஸம்பஜஞ்ஞேன பரிக்³க³ஹேத்வாதி ஸப்³ப³பா⁴கி³யேன கம்மட்டா²னபரிபாலகேன பரிக்³க³ஹேத்வா. நிச்ச²ந்த³ராக³பரிபோ⁴கே³னாதி மக்³கா³தி⁴க³மஸித்³தே⁴ன நிச்ச²ந்த³ராக³பரிபோ⁴கே³ன பரிபு⁴த்தே. ஸோதி காமகு³ணிகோ ராகோ³.

தஸ்மிம் ஸதீதி கப³ளீகாராஹாரே ஸதி. தஸ்ஸாதி பஞ்சகாமகு³ணிகராக³ஸ்ஸ. உப்பத்திதோதி உப்பஜ்ஜனதோ. ந ஹி ஆஹாராலாபே⁴ன ஜிக⁴ச்சா²து³ப்³ப³ல்யபரேதஸ்ஸ காமபரிபோ⁴கி³ச்சா² ஸம்ப⁴வதி. உபனிஜ்ஜா²னசித்தந்தி ராக³வஸேன அஞ்ஞமஞ்ஞம் ஓலோகனசித்தம்.

நத்தி² தம் ஸம்யோஜனந்தி பஞ்சவித⁴ம்பி உத்³த⁴ம்பா⁴கி³யஸம்யோஜனம் ஸந்தா⁴ய வுத்தம். தேனாஹ ‘‘தேன ராகே³ன…பே… நத்தீ²’’தி. தேனாதி காமராகே³ன. ஏத்தகேனாதி யதா²வுத்தாய தே³ஸனாய. கதே²தும் வட்டதீதி இமம் பட²மாஹாரகத²ம் கதே²ந்தேன த⁴ம்மகதி²கேன.

பட²மாஹாரவண்ணனா நிட்டி²தா.

து³தியாஹாரவண்ணனா

து³தியேதி து³தியே ஆஹாரே. உத்³தா³லிதசம்மாதி உப்பாடிதசம்மா, ஸப்³ப³ஸோ அபனீதசம்மாதி அத்தோ². ந ஸக்கோதி து³ப்³ப³லபா⁴வதோ, ததா² ஹி இத்தீ² ‘‘அப³லா’’தி வுச்சதி. ஸிலாகுட்டாதீ³னந்தி ஆதி³-ஸத்³தே³ன இட்ட²ககுட்டமத்திகாகுட்டாதீ³னம் ஸங்க³ஹோ. உண்ணனாபீ⁴தி மக்கடகம். ஸரபூ³தி க⁴ரகோ³ளிகா. உச்சாலிங்க³பாணகா நாம லோமஸா பாணகா. ஆகாஸனிஸ்ஸிதாதி ஆகாஸசாரினோ. லுஞ்சித்வாதி உப்பாடேத்வா.

திஸ்ஸோ பரிஞ்ஞாதி ஹேட்டா² வுத்தா ஞாதபரிஞ்ஞாத³யோ திஸ்ஸோ பரிஞ்ஞா. தம்மூலகத்தாதி ப²ஸ்ஸமூலகத்தா. தே³ஸனா யாவ அரஹத்தா கதி²தா ஸப்³ப³ஸோ வேத³னாஸு பரிஞ்ஞாதாஸு கிலேஸானம் லேஸஸ்ஸபி அபா⁴வதோ.

து³தியாஹாரவண்ணனா நிட்டி²தா.

ததியாஹாரவண்ணனா

அங்கா³ரகாஸுந்தி அங்கா³ரராஸிம். பு²ணந்தீதி அத்தனோ உபரி ஸயமேவ ஆகிரந்தீதி அத்தோ². தேனாஹ ‘‘நரா ருத³ந்தா பரித³ட்³ட⁴க³த்தா’’தி. நராதி புரிஸாதி அத்தோ², ந மனுஸ்ஸா. ப⁴யஞ்ஹி மம் விந்த³தீதி ப⁴யஸ்ஸ வஸேன கரோந்தோ ப⁴யம் லப⁴தி நாம. ஸந்தரமானோவாதி ஸுட்டு² தரமானோ ஏவ ஹுத்வா. போரிஸம் வுச்சதி புரிஸப்பமாணம், தஸ்மா அதிரேகபோரிஸா புரிஸப்பமாணதோ அதி⁴கா. தேனாஹ ‘‘பஞ்சரதனப்பமாணா’’தி. அஸ்ஸாதி காஸுயா. தத³பா⁴வேதி தேஸம் ஜாலாதூ⁴மானம் அபா⁴வே. ஆரகாவஸ்ஸாதி ஆரகா ஏவ அஸ்ஸ.

அங்கா³ரகாஸு விய தேபூ⁴மகவட்டம் ஏகாத³ஸன்னம் அக்³கீ³னம் வஸேன மஹாபரிளாஹதோ. ஜிவி…பே… புது²ஜ்ஜனோ தேஹி அக்³கீ³ஹி த³ஹிதப்³ப³தோ. த்³வே ப³ல…பே… கம்மம் அனிச்ச²ந்தஸ்ஸேவ தஸ்ஸ வட்டது³க்கே² பாதனதோ. ஆயூஹனூபகட்³ட⁴னானம் காலபே⁴தோ³ ந சிந்தேதப்³போ³ ஏகந்தபா⁴வினோ ப²லஸ்ஸ நிப்பா²தி³தத்தாதி ஆஹ ‘‘கம்மம் ஹீ’’திஆதி³.

ப²ஸ்ஸே வுத்தனயேனேவாதி தத்த² ‘‘ப²ஸ்ஸோ ஸங்கா²ரக்க²ந்தோ⁴’’தி வுத்தம், இத⁴ ‘‘மனோஸஞ்சேதனா ஸங்கா²ரக்க²ந்தோ⁴’’தி வத்தப்³ப³ம். ஸேஸம் வுத்தனயமேவாதி. ‘‘தண்ஹாபச்சயா உபாதா³னம், உபாதா³னபச்சயா ப⁴வோ’’தி வசனதோ மனோஸஞ்சேதனாய தண்ஹா மூலகாரணந்தி ஆஹ ‘‘தண்ஹாமூலகத்தா மனோஸஞ்சேதனாயா’’தி. தேனாஹ ‘‘ந ஹீ’’திஆதி³. கேசி பன யஸ்மா மனோஸஞ்சேதனாய ப²லபூ⁴தம் வேத³னம் படிச்ச தண்ஹா உப்பஜ்ஜதி, தஸ்மா ஏவம் வுத்தந்தி வத³ந்தி.

ததியாஹாரவண்ணனா நிட்டி²தா.

சதுத்தா²ஹாரவண்ணனா

அனிட்ட²பாபனவஸேன தம்ஸமங்கீ³புக்³க³லம் ஆக³ச்ச²தீதி ஆகு³, பாபம், தம் சரதி ஸீலேனாதி ஆகு³சாரீ. தேனாஹ ‘‘பாபசாரி’’ந்தி.

ராஜா விய கம்மம் பரமிஸ்ஸரபா⁴வதோ. ஆகு³சாரீ புரிஸோ விய…பே… புது²ஜ்ஜனோ து³க்க²வத்து²பா⁴வதோ. ஆதி³ன்னப்பஹாரவணானி தீணி ஸத்திஸதானி விய புது²ஜ்ஜனஸ்ஸ ஆதுரமானமஹாது³க்க²பதிட்ட²ம் படிஸந்தி⁴விஞ்ஞாணம். தேனாஹ ஸத்தி…பே… து³க்க²ந்தி.

தம்மூலகத்தாதி படிஸந்தி⁴விஞ்ஞாணமூலகத்தா இதோ பரம் பவத்தனாமரூபஸ்ஸ.

சதுத்தா²ஹாரவண்ணனா நிட்டி²தா.

புத்தமம்ஸூபமஸுத்தவண்ணனா நிட்டி²தா.

4. அத்தி²ராக³ஸுத்தவண்ணனா

64. சதுத்தே² ஸோதி லோபோ⁴. ரஞ்ஜனவஸேனாதி ரங்க³ஜாதம் விய தஸ்ஸ சித்தஸ்ஸ அனுரஞ்ஜனவஸேன. நந்த³னவஸேனாதி ஸப்பீதிகதாய ஆரம்மணஸ்ஸ அபி⁴னந்த³னவஸேன. தண்ஹாயனவஸேனாதி விஸயகத்துகாமதாய வஸேன. ஏகோ ஏவ ஹி லோபோ⁴ பவத்திஆகாரவஸேன ததா² வுத்தோ. பதிட்டி²தந்தி லத்³த⁴ஸபா⁴வம். தத்தா²தி வட்டே. ஆஹாரேதி கேசி. விஞ்ஞாணந்தி அபி⁴ஸங்கா²ரவிஞ்ஞாணம். விருள்ஹந்தி ப²லனிப்³ப³த்தியா விருள்ஹிப்பத்தம். தேனாஹ ‘‘கம்மம் ஜவாபேத்வா’’திஆதி³. தத்த² ஜவாபேத்வாதி ப²லம் கா³ஹாபேத்வா. அபி⁴ஸங்கா²ரவிஞ்ஞாணஞ்ஹி அத்தனா ஸஹஜாதானம் ஸஹஜாதாதி³பச்சயேஹி சேவ ஆஹாரபச்சயேன ச பச்சயோ ஹுத்வா தஸ்ஸ அத்தனோ ப²லுப்பாத³னே ஸாமத்தி²யத்தா விருள்ஹிப்பத்தம். தேனாஹ ‘‘கம்மம் ஸந்தானே லத்³த⁴பா⁴வம் விருள்ஹிப்பத்தஞ்சஸ்ஸ ஹோதீ’’தி. வட்டகதா² ஏஸாதி கத்வா ‘‘யத்தா²தி தேபூ⁴மகவட்டே பு⁴ம்ம’’ந்தி வுத்தம். ஸப்³ப³த்தா²தி ஸப்³பே³ஸு. புரிமபதே³ ஏதம் பு⁴ம்மந்தி ‘‘யத்த² தத்தா²’’தி ஆக³தம் ஏதம் பு⁴ம்மவசனம் புரிமஸ்மிம் புரிமஸ்மிம் பதே³ விஸயபூ⁴தே. தஞ்ஹி ஆரப்³ப⁴ ஏதம் ‘‘யத்த² தத்தா²’’தி பு⁴ம்மவசனம் வுத்தம். இமஸ்மிம் விபாகவட்டேதி பச்சுப்பன்னே விபாகவட்டே. ஆயதிம் வட்டஹேதுகே ஸங்கா²ரே ஸந்தா⁴ய வுத்தம் ‘‘யத்த² அத்தி² ஆயதிம் புனப்³ப⁴வாபி⁴னிப்³ப³த்தீ’’தி வசனதோ. புனப்³ப⁴வாபி⁴னிப்³ப³த்தீதி ச படிஸந்தி⁴ அதி⁴ப்பேதாதி வுத்தம் ‘‘யத்த² அத்தி² ஆயதிம் புனப்³ப⁴வாபி⁴னிப்³ப³த்தி, அத்தி² தத்த² ஆயதிம் ஜாதிஜராமரண’’ந்தி. ஜாதீதி சேத்த² மாதுகுச்சி²தோ நிக்க²மனம் அதி⁴ப்பேதம். யஸ்மிம் டா²னேதி யஸ்மிம் காரணே ஸதி.

காரணஞ்சேத்த² ஸங்கா²ரா வேதி³தப்³பா³. தே ஹி ஆயதிம் புனப்³ப⁴வாபி⁴னிப்³ப³த்தியா ஹேதூ, தண்ஹாஅவிஜ்ஜாயோ, காலக³திஆத³யோ ச கம்மஸ்ஸ ஸம்பா⁴ரா. கேசி பன கிலேஸவட்டகம்மக³திகாலா சாதி அதி⁴ப்பாயேன ‘‘காலக³திஆத³யோ ச கம்மஸ்ஸ ஸம்பா⁴ரா’’தி வத³ந்தி. தம்தம்ப⁴வபத்த²னாய ததா² ததா² க³தோ திவிதோ⁴ ப⁴வோவ தேபூ⁴மகவட்டம். தேனாஹ ‘‘யத்தா²தி தேபூ⁴மகவட்டே’’தி. ததா² சாஹ ‘‘ஸஸம்பா⁴ரககம்மம் ப⁴வேஸு ரூபம் ஸமுட்டா²பேதீ’’தி. ரூபந்தி அத்தபா⁴வம்.

ஸங்கி²பித்வாதி தீஸு அகத்வா விஞ்ஞாணேன ஏகஸங்கே²பம் கத்வாதி அத்தோ². ஏகோ ஸந்தீ⁴தி ஏகோ ஹேதுப²லஸந்தி⁴. விபாகவிதி⁴ந்தி ஸளாயதனாதி³கம் வேத³னாவஸானம் விபாகவிதி⁴ம். ‘‘நாமரூபேன ஸத்³தி⁴’’ந்தி பத³ம் ஆனேத்வா ஸம்ப³ந்தோ⁴. நாமரூபேனாதி வா ஸஹயோகே³ கரணவசனம். இத⁴ ஏகோ ஸந்தீ⁴தி ஏகோ ஹேதுப²லஸந்தி⁴. ஆயதிப⁴வஸ்ஸாதி ஆயதிம் உபபத்திப⁴வஸ்ஸ. தேன சேத்த² ஏகோ ஸந்தி⁴ ஹேதுப²லஸந்தி⁴ வேதி³தப்³போ³.

கீ²ணாஸவஸ்ஸ அக்³க³மக்³கா³தி⁴க³மனதோவ பவத்தகம்மஸ்ஸ மக்³கே³ன ஸஹாயவேகல்லஸ்ஸ கதத்தா அவிஜ்ஜமானம். ஸூரியரஸ்மிஸமந்தி ததோ ஏவ வுத்தனயேனேவ அப்பதிட்டி²தஸூரியரஸ்மிஸமம். ஸாதி ரஸ்மி. காயாத³யோதி காயத்³வாராத³யோ. கதகம்மந்தி பச்சயேஹி கதபா⁴வம் உபாதா³ய வுத்தம், ந கம்மலக்க²ணபத்ததோ. தேனாஹ ‘‘குஸலாகுஸலம் நாம ந ஹோதீ’’தி. கிரியமத்தேதி அவிபாகத⁴ம்மத்தா காயிகாதி³பயோக³மத்தே ட²த்வா. அவிபாகம் ஹோதி தேஸம் அவிபாகத⁴ம்மத்தா.

அத்தி²ராக³ஸுத்தவண்ணனா நிட்டி²தா.

5. நக³ரஸுத்தவண்ணனா

65. பஞ்சமஸுத்தே ‘‘புப்³பே³வ மே, பி⁴க்க²வே, ஸம்போ³தா⁴’’திஆதி³ ஹேட்டா² ஸம்வண்ணிதமேவாதி அவுத்தமேவ ஸம்வண்ணேதும் ‘‘நாமரூபே கோ² ஸதீ’’தி ஆரத்³தோ⁴. தத்த² த்³வாத³ஸபதி³கே படிச்சஸமுப்பாதே³ இமஸ்மிம் ஸுத்தே யானி த்³வே பதா³னி அக்³க³ஹிதானி, நேஸம் அக்³க³ஹணே காரணம் புச்சி²த்வா விஸ்ஸஜ்ஜேதுகாமோ தேஸம் க³ஹேதப்³ப³காரணம் தாவ த³ஸ்ஸேந்தோ ‘‘ஏத்தா²’’திஆதி³மாஹ. பச்சக்க²பூ⁴தம் பச்சுப்பன்னம் ப⁴வம் பட²மம் க³ஹேத்வா தத³னந்தரம் அனாக³தஸ்ஸ ‘‘து³திய’’ந்தி க³ஹணே அதீதோ ததியோ ஹோதீதி ஆஹ ‘‘அவிஜ்ஜாஸங்கா²ரா ஹி ததியோ ப⁴வோ’’தி. நனு சேத்த² அனாக³தஸ்ஸ ப⁴வஸ்ஸ க³ஹணம் ந ஸம்ப⁴வதி பச்சுப்பன்னப⁴வவஸேன அபி⁴னிவேஸஸ்ஸ ஜோதிதத்தாதி? ஸச்சமேதம், காரணே பன க³ஹிதே ப²லம் க³ஹிதமேவ ஹோதீதி ததா² வுத்தந்தி த³ட்ட²ப்³ப³ம். அபிசேத்த² அனாக³தோ அத்³தா⁴ அத்த²தோ ஸங்க³ஹிதோ ஏவ யதோ ‘‘நாமரூபபச்சயா ஸளாயதன’’ந்திஆதி³னா அனாக³தத்³த⁴ஸம்கா³ஹிதா தே³ஸனா பவத்தா, சதுவோகாரவஸேன விஞ்ஞாணபச்சயா நாமந்தி விஸேஸோ அத்தி². தஸ்மா ‘‘பஞ்சவோகாரவஸேனா’’தி வுத்தம். தேஹீதி அவிஜ்ஜாஸங்கா²ரேஹி ஆரம்மணபூ⁴தேஹி. அயம் விபஸ்ஸனாதி அத்³தா⁴பச்சுப்பன்னவஸேன உத³யப்³ப³யம் பஸ்ஸந்தஸ்ஸ பவத்தவிபஸ்ஸனா. ந க⁴டீயதீதி ந ஸமிஜ்ஜ²தி. மஹா…பே… அபி⁴னிவிட்டோ²தி ந க⁴டனே காரணமாஹ, ஹேட்டா² க³ஹிதத்தா பாடியேக்கம் ஸம்மஸனீயம் ந ஹோதீதி அதி⁴ப்பாயோ.

அதி³ட்டே²ஸூதி அனவபு³த்³தே⁴ஸு. சதுஸச்சஸ்ஸ அனுபோ³தே⁴ன ந ப⁴விதப்³ப³ந்தி ஆஹ ‘‘ந ஸக்கா பு³த்³தே⁴ன ப⁴விது’’ந்தி. இமினாதி மஹாஸத்தேன. தேதி அவிஜ்ஜாஸங்கா²ரா. ப⁴வஉபாதா³னதண்ஹாவஸேனாதி ப⁴வஉபாதா³னதண்ஹாத³ஸ்ஸனவஸேன. தி³ட்டா²வ ‘‘தம்ஸஹக³தா’’தி ஸமானயோக³க்க²மத்தா. ந பரபா⁴க³ம் க²னேய்ய அத்தனா இச்சி²தஸ்ஸ க³ஹிதத்தா பரபா⁴கே³ அஞ்ஞஸ்ஸ அபா⁴வதோ ச. தேனாஹ ‘‘கஸ்ஸசி நத்தி²தாயா’’தி. படினிவத்தேஸீதி படிஸம்ஹரி. படினிவத்தனே பன காரணம் த³ஸ்ஸேதும் ‘‘ததே³த’’ந்திஆதி³ வுத்தம். அபி⁴ன்னட்டா²னந்தி அக²ணிதட்டா²னம்.

பச்சயதோதி ஹேதுதோ, ஸங்கா²ரதோதி அத்தோ². ‘‘கிம்ஹி நு கோ² ஸதி ஜராமரணம் ஹோதீ’’திஆதி³னா ஹேதுபரம்பரவஸேன ப²லபரம்பராய கித்தமானாய, கிம்ஹி நு கோ² ஸதி விஞ்ஞாணம் ஹோதீதி ச விசாரணாய ஸங்கா²ரே கோ² ஸதி விஞ்ஞாணஸ்ஸ விஸேஸதோ காரணபூ⁴தோ ஸங்கா²ரோ அக்³க³ஹிதோ, ததோ விஞ்ஞாணம் படினிவத்ததி நாம, ந ஸப்³ப³பச்சயதோ. தேனேவாஹ ‘‘நாமரூபே கோ² ஸதி விஞ்ஞாணம் ஹோதீ’’தி. கிம் நாம ஹேத்த² ஸஹஜாதாதி³வஸேனேவ பச்சயபூ⁴தம் அதி⁴ப்பேதம், ந கம்மூபனிஸ்ஸயவஸேன பச்சுப்பன்னவஸேன அபி⁴னிவேஸஸ்ஸ ஜோதிதத்தா. ஆரம்மணதோதி அவிஜ்ஜாஸங்கா²ரஸங்கா²தஆரம்மணதோ, அதீதப⁴வஸங்கா²தஆரம்மணதோ. அதீதத்³த⁴பரியாபன்னா ஹி அவிஜ்ஜாஸங்கா²ரா. ததோ படினிவத்தமானம் விஞ்ஞாணம் அதீதப⁴வோபி படினிவத்ததி நாம. உப⁴யம்பீதி படிஸந்தி⁴விஞ்ஞாணம் விபஸ்ஸனாவிஞ்ஞாணம்பி. நாமரூபம் ந அதிக்கமதீதி பச்சயபூ⁴தம் ஆரம்மணபூ⁴தஞ்ச நாமரூபம் ந அதிக்கமதி தேன வினா அவத்தனதோ. தேனாஹ ‘‘நாமரூபதோ பரம் ந க³ச்ச²தீ’’தி. விஞ்ஞாணே நாமரூபஸ்ஸ பச்சயே ஹோந்தேதி படிஸந்தி⁴விஞ்ஞாணே நாமரூபஸ்ஸ பச்சயே ஹோந்தே. நாமரூபே விஞ்ஞாணஸ்ஸ பச்சயே ஹோந்தேதி நாமரூபே படிஸந்தி⁴விஞ்ஞாணஸ்ஸ பச்சயே ஹோந்தே. சதுவோகாரபஞ்சவோகாரப⁴வவஸேன யதா²ரஹம் யோஜனா வேதி³தப்³பா³. த்³வீஸுபி அஞ்ஞமஞ்ஞம் பச்சயேஸு ஹோந்தேஸூதி பன பஞ்சவோகாரப⁴வவஸேன. ஏத்தகேனாதி ஏவம் விஞ்ஞாணனாமரூபானம் அஞ்ஞமஞ்ஞம் உபத்த²ம்ப⁴வஸேன பவத்தியா. ஜாயேத² வா உபபஜ்ஜேத² வாதி ‘‘ஸத்தோ ஜாயதி உபபஜ்ஜதீ’’தி ஸமஞ்ஞா ஹோதி விஞ்ஞாணனாமரூபவினிமுத்தஸ்ஸ ஸத்தபஞ்ஞத்தியா உபாதா³னபூ⁴தஸ்ஸ த⁴ம்மஸ்ஸ அபா⁴வதோ. தேனாஹ ‘‘இதோ ஹீ’’திஆதி³. ஏததே³வாதி ‘‘விஞ்ஞாணம் நாமரூப’’ந்தி ஏதம் த்³வயமேவ.

அபராபரசுதிபடிஸந்தீ⁴ஹீதி அபராபரசுதிபடிஸந்தி⁴தீ³பகேஹி ‘‘சவதி, உபபஜ்ஜதீ’’தி த்³வீஹி பதே³ஹி. பஞ்ச பதா³னீதி ‘‘ஜாயேத² வா’’திஆதீ³னி பஞ்ச பதா³னி. நனு தத்த² பட²மததியேஹி சதுத்த²பஞ்சமானி அத்த²தோ அபி⁴ன்னானீதி? ஸச்சம், விஞ்ஞாணனாமரூபானம் அபராபருப்பத்தித³ஸ்ஸனத்த²ம் ஏவம் வுத்தம். தேனாஹ ‘‘அபராபரசுதிபடிஸந்தீ⁴ஹீ’’தி. ஏத்தாவதாதி வுத்தமேவத்த²ந்தி யோ ‘‘ஏத்தாவதா’’தி பதே³ன புப்³பே³ வுத்தோ, தமேவ யதா²வுத்தமத்த²ம் ‘‘யதி³த³’’ந்திஆதி³னா நிய்யாதேந்தோ புன வத்வா. அனுலோமபச்சயாகாரவஸேனாதி பச்சயத⁴ம்மத³ஸ்ஸனபுப்³ப³கபச்சயுப்பன்னத⁴ம்மத³ஸ்ஸனவஸேன. பச்சயத⁴ம்மானஞ்ஹி அத்தனோ பச்சயுப்பன்னஸ்ஸ பச்சயபா⁴வோ இத³ப்பச்சயதா பச்சயாகாரோ, ஸோ ச ‘‘அவிஜ்ஜாபச்சயா ஸங்கா²ரா’’திஆதி³னா வுத்தோ ஸங்கா²ருப்பத்தியா அனுலோமனதோ அனுலோமபச்சயாகாரோ, தஸ்ஸ வஸேன.

ஆபதோதி பரிகா²க³தஉத³கதோ. த்³வாரஸம்பத்தியா தத்த² வஸந்தானம் பவேஸனனிக்³க³மனபா²ஸுதாய உபபோ⁴க³பரிபோ⁴க³வத்து²ஸம்பத்தியா ஸரீரசித்தஸுக²தாய நக³ரஸ்ஸ மனுஞ்ஞதாதி வுத்தம் ‘‘ஸமந்தா …பே… ரமணீய’’ந்தி. புப்³பே³ ஸுஞ்ஞபா⁴வேன அரஞ்ஞஸதி³ஸம் ஹுத்வா டி²தம் ஜனவாஸம் கரோந்தே நக³ரஸ்ஸ லக்க²ணப்பத்தம் ஹோதீதி வுத்தம் ‘‘தம் அபரேன ஸமயேன இத்³த⁴ஞ்சேவ அஸ்ஸ பீ²தஞ்சா’’தி.

‘‘புப்³பே³வ கோ² பனஸ்ஸ காயகம்மம் வசீகம்மம் ஆஜீவோ ச ஸுபரிஸுத்³தோ⁴’’தி வசனதோ தீஹி விரதீஹி ஸத்³தி⁴ம் புப்³ப³பா⁴க³மக்³கோ³பி அட்ட²ங்கி³கவோஹாரம் லத்³து⁴ம் அரஹதீதி வுத்தம் ‘‘அட்ட²ங்கி³கஸ்ஸ விபஸ்ஸனாமக்³க³ஸ்ஸா’’தி. விபஸ்ஸனாய சிண்ணந்தேதி விபஸ்ஸனாய ஸஞ்சரிததாய தத்த² தத்த² தாய விபஸ்ஸனாய தீரிதே பரியேஸிதே. லோகுத்தரமக்³க³த³ஸ்ஸனந்தி அனுமானாதி³வஸேன லோகுத்தரமக்³க³ஸ்ஸ த³ஸ்ஸனம். ததா² ஹி நிப்³பா³னனக³ரஸ்ஸ த³ஸ்ஸனம் த³ட்ட²ப்³ப³ம். தி³ட்ட²காலோதி அதி⁴க³மவஸேன தி³ட்ட²காலோ. மக்³க³ப²லவஸேன உப்பன்னா பரோபண்ணாஸ அனவஜ்ஜத⁴ம்மா, பச்சவேக்க²ணஞாணம் பன தேஸம் வவத்தா²பகம். யாபேத்வாதி சராபேத்வா.

அவத்தமானகட்டே²னாதி பு³த்³த⁴ஸுஞ்ஞே லோகே கஸ்ஸசி ஸந்தானே அப்பவத்தனதோவ உப்பாதா³தி³வஸேன வத்தமானவஸேன. ததா² ஹி ப⁴க³வா ‘‘அனுப்பன்னஸ்ஸ மக்³க³ஸ்ஸ உப்பாதே³தா, அஸஞ்ஜாதஸ்ஸ ஸஞ்ஜனேதா’’திஆதி³கேஹி தோ²மிதோ. புப்³ப³கேஹி மஹேஸீஹி படிபன்னோ ஹி அரியமக்³கோ³ இதரேஹி அந்தரா கேஹிசி அவளஞ்ஜிதோதி வுத்தம் ‘‘அவளஞ்ஜனட்டே²ன புராணமக்³கோ³’’தி. ஜா²னஸ்ஸாதே³னாதி ஜா²னஸுகே²ன ஜா²னபீதியா. ஸுபி⁴க்க²ம் பணீதத⁴ம்மாமததாய தித்திஆவஹம். புப்பி²தம் உபஸோபி⁴தம். யாவ த³ஸஸஹஸ்ஸசக்கவாளேதி வுத்தம் ‘‘ஏகிஸ்ஸா லோகதா⁴துயா’’தி பரிச்சி²ன்னபு³த்³த⁴கே²த்தத்தா. தஸ்ஸ அத்தி²தாய ஹி பரிச்சே²தோ³ அத்தி². ஏதஸ்மிம் அந்தரேதி ஏதஸ்மிம் ஓகாஸே.

நக³ரஸுத்தவண்ணனா நிட்டி²தா.

6. ஸம்மஸஸுத்தவண்ணனா

66. ச²ட்டே² அஸ்ஸாதி ப⁴க³வதோ. ஸண்ஹஸுகு²மத⁴ம்மபரிதீ³பனதோ ஸுகு²மா. தீஹி லக்க²ணேஹி அங்கியத்தா திலக்க²ணாஹதா, அனிச்சாதி³லக்க²ணபரிதீ³பினீதி அத்தோ². அரியத⁴ம்மாதி⁴க³மஸ்ஸ உபனிஸ்ஸயபூ⁴தேன ஹேதுனா ஸஹேதுகா. திஹேதுகபடிஸந்தி⁴பஞ்ஞாய பாடிஹாரியபஞ்ஞாய ச அத்தி²தாய பஞ்ஞவந்தோ ந கேவலம் அஜ்ஜ²த்திகஅங்க³ஸம்பத்தியேவ, பா³ஹிரங்க³ஸம்பத்திபி நேஸமத்தீ²தி த³ஸ்ஸேதும் ‘‘ஸினித்³தா⁴னீ’’திஆதி³ வுத்தம். அப்³ப⁴ந்தரந்தி அஜ்ஜ²த்தம். பச்சயஸம்மஸனந்தி பச்சயுப்பன்னானம் பச்சயவீமம்ஸம்.

ஆரம்பா⁴னுரூபா அனுஸந்தி⁴ யதா²னுஸந்தி⁴. ந க³தாதி ந ஸம்பத்தா. அஸம்பி⁴ன்னபத³ந்தி அவோமிஸ்ஸகபத³ம், அஞ்ஞத்த² ஏவம் அனாக³தம் வாக்யந்தி அத்தோ². தேனாஹ ‘‘அஞ்ஞத்த² ஹி ஏவம் வுத்தம் நாம நத்தீ²’’தி. ஏவந்தி ‘‘தேனஹானந்தா³’’தி ஏகவசனம், ‘‘ஸுணாத² மனஸி கரோதா²’’தி ப³ஹுவசனம் கத்வா வுத்தம் நாம நத்தீ²தி அத்தோ². கேசி பன ‘‘தேனஹானந்தா³’’தி இதா⁴பி ப³ஹுவசனமேவ கத்வா பட²ந்தி ‘‘ஸாது⁴ அனுருத்³தா⁴’’திஆதீ³ஸு விய. உபதீ⁴தி அதி⁴ப்பேதம் உபதீ⁴யதி ஏத்த² து³க்க²ந்தி. உப்பஜ்ஜதி உப்பாத³க்க²ணம் உத³யம் படிலப⁴தி ‘‘பாகடபா⁴வோ டி²திகோ, அத்தலாபோ⁴ உத³யோ’’தி. நிவிஸதி நிவேஸம் ஓகாஸம் படிலப⁴தி. ஏகவாரமேவ ஹி உப்பன்னமத்தஸ்ஸ த⁴ம்மஸ்ஸ து³ப்³ப³லத்தேன ஓகாஸே விய பதிட்ட²ஹனம் நத்தி², புனப்புனம் ஆரம்மணே பவத்தமானம் நிவிட்ட²ம் பதிட்டி²தம் நாம ஹோதி. தேனாஹ ‘‘நிவிஸதீதி புனப்புனம் பவத்திவஸேன பதிட்ட²ஹதீ’’தி.

பியஸபா⁴வந்தி பியாயிதப்³ப³ஜாதிகம். மது⁴ரஸபா⁴வந்தி இட்ட²ஜாதிகம். அபி⁴னிவிட்டா²தி தண்ஹாபி⁴னிவேஸேன ஓதிண்ணா. ஸம்பத்தியந்தி ப⁴வஸம்பத்தியம். நிமித்தக்³க³ஹணானுஸாரேனாதி படிபி³ம்ப³க்³க³ஹணானுஸாரேன. கண்ணஸ்ஸ சி²த்³த³பதே³ஸம் ரஜதனாளிகம் விய, கண்ணப³த்³த⁴ம் பன பாமங்க³ஸுத்தம் விய. துங்கா³ உச்சா தீ³கா⁴ நாஸிகா துங்க³னாஸா. ஏவம் லத்³த⁴வோஹாரம் அத்தனோ கா⁴னம். ‘‘லத்³த⁴வோஹாரா’’தி வா பாடோ². தஸ்மிம் ஸதி துங்கா³ நாஸா யேஸம் தே துங்க³னாஸா. ஏவம் லத்³த⁴வோஹாரா ஸத்தா அத்தனோ கா⁴னந்தி யோஜனா வண்ணஸண்டா²னதோ ரத்தகம்ப³லபடலம் விய. ஸம்ப²ஸ்ஸதோ முது³ஸினித்³த⁴ம் கிச்சதோ ஸினித்³த⁴மது⁴ரரஸத³ம். ஸாலலட்டி²ந்தி ஸாலக்க²ந்த⁴ம்.

அத்³த³ஸம்ஸூதி பஸ்ஸிம்ஸு. ஏவம் வுத்தந்தி ‘‘கம்ஸே’’தி ஏவம் வுத்தம் அதி⁴ட்டா²னவோஹாரேன.

ஸம்பத்திந்தி வண்ணாதி³கு³ணம். ஆதீ³னவந்தி மரணக்³க³ததோ.

ஸத்துபானீயேனாதி ஸத்தும் பக்கி²பித்வா ஆலோலிதபானீயேன. சத்தாரி பானானி விய சத்தாரோ மக்³கா³ தண்ஹாபிபாஸாவூபஸமனதோ.

ஸம்மஸஸுத்தவண்ணனா நிட்டி²தா.

7. நளகலாபீஸுத்தவண்ணனா

67. ஸத்தமே கஸ்மா புச்ச²தீதி மஹாகோட்டி²கத்தே²ரோ ஸயம் தத்த² நிக்கங்கோ² ஸமானோ கஸ்மா புச்ச²தீதி அதி⁴ப்பாயோ. அஜ்ஜா²ஸயஜானனத்த²ந்தி இத³ம்பி தஸ்ஸ மஹாஸாவகஸ்ஸ பரசித்தஜானனேன அப்பாடிஹீரம் ஸியா, தேன தம் அபரிதுஸ்ஸந்தோ ‘‘அபிசா’’திஆதி³மாஹ. தத்த² த்³வே அக்³க³ஸாவகாதி ஸீலாதி³கு³ணேஹி உத்தமஸாவகாதி அத்தோ², ந ஹி மஹாகோட்டி²கத்தே²ரோ அக்³க³ஸாவகலக்க²ணப்பத்தோ, அத² கோ² மஹாஸாவகலக்க²ணப்பத்தோ. இதா³னேவ கோ² மயந்திஆதி³ ஹேட்டா² பச்சயுப்பன்னம் அனாலோளேந்தேன த³ஸ்ஸேத்வா தே³ஸனா ஆஹடா, ந அஞ்ஞமஞ்ஞபச்சயதாவஸேன, இத⁴ பன யேனாதி⁴ப்பாயேன தம் ஆலோளேத்வா நிவத்தேத்வா கதி²தம் மஹாதே²ரேன, தமேவஸ்ஸ அதி⁴ப்பாயம் தேனேவ பகாஸேதுகாமோ மஹாகோட்டி²கத்தே²ரோ ஆஹ ‘‘இதா³னேவ கோ² மய’’ந்திஆதி³. தேனாஹ ‘‘இத³ம் தே²ரோ’’திஆதி³.

ஏத்தகே டா²னேதி ‘‘கிம் நு கோ² ஆவுஸோ’’திஆதி³னா பட²மாரம்ப⁴தோ பட்டா²ய யாவ ‘‘நிரோதோ⁴ ஹோதீ’’தி பத³ம், ஏத்தகே டா²னே. அவிஜ்ஜாஸங்கா²ரே அக்³க³ஹேத்வா ‘‘நாமரூபபச்சயா விஞ்ஞாண’’ந்தி தே³ஸனாய பவத்தத்தா ‘‘பச்சயுப்பன்னபஞ்சவோகாரப⁴வவஸேன தே³ஸனா கதி²தா’’தி வுத்தம். ‘‘ப²லே க³ஹிதே காரணம் க³ஹிதமேவா’’தி விஞ்ஞாணே க³ஹிதே ஸங்கா²ரா, தேஸஞ்ச காரணபூ⁴தா அவிஜ்ஜா க³ஹிதா ஏவ ஹோதீதி வுத்தம் ‘‘ஹேட்டா² விஸ்ஸஜ்ஜிதேஸு த்³வாத³ஸஸு பதே³ஸூ’’தி. ஏகேகஸ்மிந்தி ஏகேகஸ்மிம் பதே³. திண்ணம் திண்ணம் வஸேனாதி ‘‘நிரோதா⁴ய த⁴ம்மம் தே³ஸேஸி, நிரோதா⁴ய படிபன்னோ ஹோதி, நிரோதா⁴ அனுபாதா³வினிமுத்தோ ஹோதீ’’தி ஏவமாக³தானம் திண்ணம் திண்ணம் வாரானம் வஸேன. ‘‘அட்டா²ரஸஹி வத்தூ²ஹீ’’திஆதீ³ஸு (மஹாவ. 468) விய இத⁴ வத்து²ஸத்³தோ³ காரணபரியாயோதி ஆஹ ‘‘ச²த்திம்ஸாய காரணேஹீ’’தி. பட²மோ அனுமோத³னாவிதி⁴. த⁴ம்மகதி²ககு³ணோதி விபஸ்ஸனாவிஸயோ அபே⁴தோ³பசாரேன வுத்தோ. ஸேஸத்³வயேஸுபி ஏஸேவ நயோ. து³தியோ அனுமோத³னா, ததியம் அனுமோத³னந்தி அபி⁴தே⁴ய்யானுரூபம் வத்தப்³ப³ம். தே³ஸனாஸம்பத்தி கதி²தா ‘‘நிப்³பி³தா³ய…பே… த⁴ம்மம் தே³ஸேதீ’’தி வுத்தத்தா. ஸேக்க²பூ⁴மி கதி²தா ‘‘நிப்³பி³தா³ய…பே… படிபன்னோ ஹோதீ’’தி வுத்தத்தா. அஸேக்க²பூ⁴மி கதி²தா ‘‘நிப்³பி³தா³ …பே… அனுபாதா³விமுத்தோ ஹோதீ’’தி வுத்தத்தா.

நளகலாபீஸுத்தவண்ணனா நிட்டி²தா.

8. கோஸம்பி³ஸுத்தவண்ணனா

68. அட்ட²மே பரஸ்ஸ ஸத்³த³ஹித்வாதி பரஸ்ஸ வசனம் ஸத்³த³ஹித்வா. தேனாஹ ‘‘யம் ஏஸ ப⁴ணதி, தம் பூ⁴தந்தி க³ண்ஹாதீ’’தி. பரபத்தியோ ஹி ஏஸோ பரனேய்யபு³த்³தி⁴கோ. யம் காரணந்தி யம் அத்தனா சிந்திதவத்து². ருச்சதீதி ‘‘ஏவமேதம் ப⁴விஸ்ஸதி, ந அஞ்ஞதா²’’தி அத்தனோ மதியா சிந்தேந்தஸ்ஸ ருச்சதி. ருசியா க³ண்ஹாதீதி பரபத்தியோ அஹுத்வா ஸயமேவ ததா² ரோசேந்தோ க³ண்ஹாதி. அனுஸ்ஸவோதி ‘‘அனு அனு ஸுத’’ந்தி ஏவம் சிரகாலக³தாய அனுஸ்ஸுதியா லப்³ப⁴மானம் ‘‘கத²மித³ம் ஸியா, கஸ்மா பூ⁴தமேத’’ந்தி அனுஸ்ஸவேன க³ண்ஹாதி. விதக்கயதோதி ‘‘ஏவமேதம் ஸியா’’தி பரிகப்பேந்தஸ்ஸ. ஏகம் காரணம் உபட்டா²தீதி யதா²பரிகப்பிதவத்து² சித்தஸ்ஸ உபட்டா²தி. ஆகாரபரிவிதக்கேனாதி அத்தனா கப்பிதாகாரேனா தம் க³ண்ஹாதி. ஏகா தி³ட்டி² உப்பஜ்ஜதீதி ‘‘யதா²பரிகப்பிதம் கிஞ்சி அத்த²ம் ஏவமேதம், நாஞ்ஞதா²’’தி அபி⁴னிவிஸந்தஸ்ஸ ஏகோ அபி⁴னிவேஸோ உப்பஜ்ஜதி. யாயஸ்ஸாதி யாய தி³ட்டி²யா அஸ்ஸ புக்³க³லஸ்ஸ. நிஜ்ஜா²யந்தஸ்ஸாதி பச்சக்க²ம் விய நிரூபேத்வா சிந்தேந்தஸ்ஸ. க²மதீதி ததா² க³ஹணக்க²மோ ஹோதி. தேனாஹ ‘‘ஸோ…பே… க³ண்ஹாதீ’’தி. ஏதானீதி ஸத்³தா⁴தீ³னி. தானி ஹி ஸத்³தே⁴ய்யானம் வத்தூ²னம் க³ஹணஹேதுபா⁴வதோ ‘‘காரணானீ’’தி வுத்தானி. ப⁴வனிரோதோ⁴ நிப்³பா³னந்தி நவவிதோ⁴பி ப⁴வோ நிருஜ்ஜ²தி ஏத்த² ஏதஸ்மிம் அதி⁴க³தேதி ப⁴வனிரோதோ⁴, நிப்³பா³னம். ஸ்வாயம் ப⁴வோ பஞ்சக்க²ந்த⁴ஸங்க³ஹோ தப்³பி³னிமுத்தோ நத்தீ²தி ஆஹ ‘‘பஞ்சக்க²ந்த⁴னிரோதோ⁴ நிப்³பா³ன’’ந்தி. ப⁴வனிரோதோ⁴ நிப்³பா³னம் நாமாதி ‘‘நிப்³பா³னம் நாம ப⁴வனிரோதோ⁴’’தி ஏஸ பஞ்ஹோ ஸேக்கே²ஹிபி ஜானிதப்³போ³, ந அஸேக்கே²ஹேவ. இமம் டா²னந்தி இமம் யாதா²வகாரணம்.

ஸுட்டு² தி³ட்ட²ந்தி ‘‘ப⁴வனிரோதோ⁴ நிப்³பா³ன’’ந்தி மயா ஸுட்டு² யாதா²வதோ தி³ட்ட²ம், ப⁴வஸ்ஸ பீளனஸங்க²தஸந்தாபவிபரிணாமட்டா²னம், ப⁴வனிரோத⁴ஸ்ஸ ச நிஸ்ஸரணவிவேகாஸங்க²தாமதட்டா²னம் யதா²பூ⁴தம் ஸம்மப்பஞ்ஞாய தி³ட்ட²த்தா. அனாகா³மிப²லே டி²தோ ஹி அனாகா³மிமக்³கே³ டி²தோ ஏவ நாம உபரிமக்³க³ஸ்ஸ அனதி⁴க³தத்தாதி வுத்தம் ‘‘அனாகா³மிமக்³கே³ டி²தத்தா’’தி. நிப்³பா³னம் ஆரப்³ப⁴ பவத்தம்பி தே²ரஸ்ஸேதம் ஞாணம் ‘‘நிப்³பா³னம் பச்சவேக்க²தீ’’தி வுத்தஞாணம் விய ந ஹோதீதி வுத்தம் ‘‘ஏகூனவீஸதியா…பே… பச்சவேக்க²ணஞாண’’ந்தி. ஏதேன ஏதம் நிப்³பா³னபச்சவேக்க²ணா விய ந ஹோதி ஸப்பதே³ஸபா⁴வதோதி த³ஸ்ஸேதி. ஏவஞ்ச கத்வா இத⁴ உத³பானனித³ஸ்ஸனம்பி ஸமத்தி²தந்தி த³ட்ட²ப்³ப³ம். பச்சவேக்க²ணஞாணேனாதி அவஸேஸகிலேஸானம், நிப்³பா³னஸ்ஸேவ வா பச்சவேக்க²ணஞாணேன. உபரி அரஹத்தப²லஸமயோதி உபரி ஸிஜ்ஜ²னதோ அரஹத்தபடிலாபோ⁴ ததா² அத்தி². ‘‘யேனாஹம் தம் பரியேஸதோ நிப்³பா³னம் ஸச்சி²கரிஸ்ஸாமீ’’தி ஜானாதி.

கோஸம்பி³ஸுத்தவண்ணனா நிட்டி²தா.

9. உபயந்திஸுத்தவண்ணனா

69. நவமே உத³கவட்³ட⁴னஸமயேதி ஸப்³ப³தி³வஸேஸு மஹாஸமுத்³த³ஸ்ஸ அந்தோ மஹந்தசந்த³கந்தமணிபப்³ப³தானம் ஜுண்ஹஸம்ப²ஸ்ஸேன பஹதத்தா ஜலாபி⁴ஸந்த³னவஸேன உத³கஸ்ஸ வட்³ட⁴னஸமயே. உபரி க³ச்ச²ந்தோதி பகதியா உத³கஸ்ஸ திட்ட²ட்டா²னஸ்ஸ ததோ உபரி க³ச்ச²ந்தோதி அத்தோ². உபரி யாபேதீதி உத³கம் தத்த² உபரூபரி வட்³டே⁴தி. ததா²பூ⁴தோ ச தம் ப்³ரூஹேந்தோ பூரேந்தோதி வுச்சதீதி ஆஹ ‘‘வட்³டே⁴தி பூரேதீதி அத்தோ²’’தி. யஸ்மா பச்சயத⁴ம்மா அத்தனோ ப²லஸமவாயபச்சயே ஹோந்தே தஸ்ஸ உபரி டி²தோ விய ஹோதி தஸ்ஸ அத்தனோ வஸே வத்தாபனதோ, தஸ்மா வுத்தம் ‘‘அவிஜ்ஜா உபரி க³ச்ச²ந்தீ’’தி. பச்சயபா⁴வேன ஹி ஸா ததா² வுச்சதி. தேனாஹ ‘‘ஸங்கா²ரானம் பச்சயோ ப⁴விதும் ஸக்குணந்தீ’’தி. அபக³ச்ச²ந்தோ யாயந்தோ. தேனாஹ ‘‘ஓஸரந்தோ’’தி, அவட்³ட⁴ந்தோ பரிஹீயமானோதி அத்தோ².

உபயந்திஸுத்தவண்ணனா நிட்டி²தா.

10. ஸுஸிமஸுத்தவண்ணனா

70. த³ஸமே க³ருகதோதி க³ருபா⁴வஹேதூனம் உத்தமகு³ணானம் மத்த²கப்பத்தியா அனஞ்ஞஸாதா⁴ரணேன க³ருகாரேன க³ருகதோ. மானிதோதி ஸம்மாபடிபத்தியா மானிதோ. தாய ஹி விஞ்ஞூனம் மனாபதாதி ஆஹ ‘‘மனேன பியாயிதோ’’தி. சதுபச்சயபூஜாய ச பூஜிதோதி இத³ம் அத்த²வசனம். யத³த்த²ம் ஸம்கீ³திகாரேஹி ‘‘தேன கோ² பன ஸமயேன ப⁴க³வா ஸக்கதோ ஹோதீ’’திஆதி³னா இமஸ்ஸ ஸுத்தஸ்ஸ நிதா³னம் நிக்கி²த்தம், தஸ்ஸ அத்த²ஸ்ஸ உல்லிங்க³வஸேன வுத்தந்தி த³ட்ட²ப்³ப³ம். ஏஸ நயோ ஸேஸபதே³ஸுபி. அம்ஸகூடதோதி உத்தராஸங்கே³ன உபோ⁴ அம்ஸகூடே படிச்சா²தே³த்வா டி²தா த³க்கி²ணஅம்ஸகூடதோ, உப⁴யதோ வா அபனேந்தி. பரிசிதக³ந்த²வஸேன பண்டி³தபரிப்³பா³ஜகோ, யதோ பச்சா² விஸேஸபா⁴கீ³ ஜாதோ. விசித்தனயாய த⁴ம்மகதா²ய கத²னதோ ‘‘கவிஸேட்டோ²’’தி ஆஹம்ஸு.

தேஜுஸ்ஸதோ³தி மஹாதேஜோ. புரேப⁴த்தகிச்சாதீ³னம் நியதபா⁴வேன நியமமனுயுத்தோ. விபஸ்ஸனாலக்க²ணம்ஹீதி ஞாணம் தத்த² கதி²தம். த⁴ம்மந்தி தஸ்ஸம் தஸ்ஸம் பரிஸாயம் தே²ரஸ்ஸ அஸம்முகா² தே³ஸிதம் த⁴ம்மம். ஆஹரித்வா கதே²தி ததா² வரஸ்ஸ தி³ன்னத்தா.

கிஞ்சாபி ஸுஸிமோ பூரணாத³யோ விய ஸத்து²படிஞ்ஞோ ந ஹோதி, தித்தி²யேஹி பன ‘‘அயம் ப்³ராஹ்மணபப்³ப³ஜிதோ பஞ்ஞவா வேத³ங்க³குஸலோ’’தி க³ணாசரியட்டா²னே ட²பிதோ, ததா² சஸ்ஸ ஸம்பா⁴விதோ. தேன வுத்தம் ‘‘அஹம் ஸத்தா²தி படிஜானந்தோ’’தி, ந ஸஸ்ஸததி³ட்டி²கத்தா. ததா² ஹேஸ ப⁴க³வதோ ஸம்முகா² உபக³ந்தும் அஸக்கி².

அஞ்ஞாதி அரஹத்தஸ்ஸ நாமம் அஞ்ஞிந்த்³ரியஸ்ஸ சிண்ணந்தே பவத்தத்தா. தம் பவத்திந்தி யம் அஞ்ஞப்³யாகரணம் வுத்தம், தம் ஸுத்வா. அஸ்ஸ ஸுஸிமஸ்ஸ, பரமப்பமாணந்தி உத்தமகோடி. ஆசரியமுட்டீ²தி ஆசரியஸ்ஸ முட்டி²கதத⁴ம்மோ.

அங்க³ஸந்ததாயாதி நீவரணாதீ³னம் பச்சனீகத⁴ம்மானம் விதூ³ரபா⁴வேன ஜா²னங்கா³னம் வூபஸந்ததாய. நிப்³பு³தஸப்³ப³த³ரத²பரிளாஹதாய ஹி தேஸம் ஜா²னானம் பணீததரபா⁴வோ. ஆரம்மணஸந்ததாயாதி ரூபபதிபா⁴க³விக³மேன ஸண்ஹஸுகு²மாதி³பா⁴வப்பத்தஸ்ஸ ஆரம்மணஸ்ஸ ஸந்தபா⁴வேன. யத³க்³கே³ன ஹி தேஸம் பா⁴வனாதிஸயஸம்பா⁴விதஸண்ஹஸுகு²மப்பகாரானி ஆரம்மணானி ஸந்தானி, தத³க்³கே³ன ஜா²னங்கா³னம் ஸந்ததா வேதி³தப்³பா³. ஆரம்மணஸந்ததாய வா ததா³ரம்மணத⁴ம்மானம் ஸந்ததா லோகுத்தரத⁴ம்மாரம்மணாஹி பச்சவேக்க²ணாஹி தீ³பேதப்³பா³. ஆருப்பவிமோக்கா²தி அரூபஜ்ஜா²னஸஞ்ஞாவிமோக்கா². பஞ்ஞாமத்தேனேவ விமுத்தா, ந உப⁴தோபா⁴க³விமுத்தா. த⁴ம்மானம் டி²ததா தம்ஸபா⁴வதா த⁴ம்மட்டி²தி, அனிச்சது³க்கா²னத்ததா, தத்த² ஞாணம் த⁴ம்மட்டி²திஞாணந்தி ஆஹ ‘‘விபஸ்ஸனாஞாண’’ந்தி. ஏவமாஹாதி ‘‘புப்³பே³ கோ², ஸுஸிம, த⁴ம்மட்டி²திஞாணம், பச்சா² நிப்³பா³னே ஞாண’’ந்தி ஏவமாதி³.

வினாபி ஸமாதி⁴ந்தி ஸமத²லக்க²ணப்பத்தம் புரிமஸித்³த⁴ம் வினாபி ஸமாதி⁴ந்தி விபஸ்ஸனாயானிகம் ஸந்தா⁴ய வுத்தம். ஏவந்தி வுத்தாகாரேன. ந ஸமாதி⁴னிஸ்ஸந்தோ³ அனுபுப்³ப³விஹாரா விய. ந ஸமாதி⁴ஆனிஸம்ஸோ லோகியாபி⁴ஞ்ஞா விய. ந ஸமாதி⁴ஸ்ஸ நிப்ப²த்தி ஸப்³ப³ப⁴வக்³க³ம் விய. விபஸ்ஸனாய நிப்ப²த்தி மக்³கோ³ வா ப²லம் வாதி யோஜனா.

ரூபாதீ³ஸு சேதேஸு திண்ணம் லக்க²ணானம் பரிவத்தனவஸேன தே³ஸனா தேபரிவட்டதே³ஸனா. அனுயோக³ம் ஆரோபேந்தோதி நனு வுத்தம், ஸுஸிம, இதா³னி அரஹத்தாதி⁴க³மேன ஸப்³ப³ஸோ பச்சயாகாரம் படிவிஜ்ஜி²த்வா தத்த² விக³தஸம்மோஹோதி அனுயோக³ம் கரோந்தோ. பாகடகரணத்த²ந்தி யதா² த்வம், ஸுஸிம, நிஜ்ஜா²னகோ ஸுக்க²விபஸ்ஸகோ ச ஹுத்வா ஆஸவானம் க²யஸம்மஸனே ஸுப்பதிட்டி²தோ, ஏவமேதேபி பி⁴க்கூ², தஸ்மா ‘‘அபி பன தும்ஹே ஆயஸ்மந்தோ’’திஆதி³னா ந தே தயா அனுயுஞ்ஜிதப்³பா³தி.

ஸுஸிமஸுத்தவண்ணனா நிட்டி²தா.

மஹாவக்³க³வண்ணனா நிட்டி²தா.