10. நிதா³னஸுத்தவண்ணனா

60. ப³ஹுவசனவஸேனாதி குரூ நாம ஜானபதி³னோ ராஜகுமாரா, தேஸம் நிவாஸோ ஏகோபி ஜனபதோ³ ருள்ஹீவஸேன ‘‘குரூ’’தி ஏவம் ப³ஹுவசனவஸேன. யத்த² ப⁴க³வதோ வஸனோகாஸபூ⁴தோ கோசி விஹாரோ ந ஹோதி, தத்த² கேவலம் கோ³சரகா³மகித்தனம் நிதா³னகதா²ய பகதி யதா² ‘‘ஸக்கேஸு விஹரதி தே³வத³ஹம் நாம ஸக்யானம் நிக³மோ’’தி. ‘‘ஆயஸ்மா’’தி வா ‘‘தே³வானம் பியோ’’தி வா ப⁴வந்தி வா பியஸமுதா³ஹாரோ ஏஸோதி ஆஹ ‘‘ஆயஸ்மாதி பியவசனமேத’’ந்தி. தயித³ம் பியவசனம் கா³ரவவஸேன வுச்சதீதி ஆஹ ‘‘க³ருவசனமேத’’ந்தி. அதிதூ³ரம் அச்சாஸன்னம் அதிஸம்முகா² அதிபச்ச²தோ உபரிவாதோ உன்னதப்பதே³ஸோதி இமே ச² நிஸஜ்ஜதோ³ஸா. நீலபீதலோஹிதோதா³தமஞ்ஜிட்ட²பப⁴ஸ்ஸரவஸேன ச²ப்³ப³ண்ணானம்.

குலஸங்க³ஹத்தா²யாதி குலானுத்³த³யதாவஸேன குலானுக்³க³ண்ஹனத்தா²ய. ஸஹஸ்ஸப⁴ண்டி³கம் நிக்கி²பந்தோ விய பி⁴க்கா²படிக்³க³ண்ஹனேன தேஸம் அபி⁴வாத³னாதி³ஸம்படிச்ச²னேன ச புஞ்ஞாபி⁴ஸந்த³ஸ்ஸ ஜனனேன. படிஸம்மஜ்ஜித்வாதி அந்தேவாஸிகேஹி ஸம்மட்ட²ட்டா²னம் ஸக்கச்சகாரிதாய புன ஸம்மஜ்ஜித்வா. உப⁴யந்ததோ பட்டா²ய மஜ்ஜ²ந்தி ஆதி³தோ பட்டா²ய வேத³னம், ஜராமரணதோ பட்டா²ய ச வேத³னம் பாபேத்வா ஸம்மஸனமாஹ. திக்க²த்துந்தி ‘‘ஆதி³தோ பட்டா²ய அந்த’’ந்திஆதி³னா வுத்தசதுராகாருபஸம்ஹிதே தயோ வாரே. தேன த்³வாத³ஸக்க²த்தும் ஸம்மஸனமாஹ. அம்ஹாகம் ப⁴க³வதா க³ம்பீ⁴ரபா⁴வேனேவ கதி²தத்தா ஸேஸபு³த்³தே⁴ஹிபி ஏவமேவ கதி²தோதி த⁴ம்மன்வயே ட²த்வா வுத்தம் ‘‘ஸப்³ப³பு³த்³தே⁴ஹி…பே… கதி²தோ’’தி.

பமாணாதிக்கமேதி அபரிமாணத்தே² ‘‘யாவஞ்சித³ம் தேன ப⁴க³வதா’’திஆதீ³ஸு (தீ³. நி. 1.3) விய. அதிரேகபா⁴வஜோதனோ ஹி யம் யாவ-ஸத்³தோ³. தேனாஹ ‘‘அதிக³ம்பீ⁴ரோதி அத்தோ²’’தி. அவபா⁴ஸதி கா²யதி உபட்டா²தி ஞாணஸ்ஸ. ததா² உபட்டா²னஞ்ஹி ஸந்தா⁴ய ‘‘தி³ஸ்ஸதீ’’தி வுத்தம். நனு ஏஸ படிச்சஸமுப்பாதோ³ ஏகந்தக³ம்பீ⁴ரோவ, அத² கஸ்மா க³ம்பீ⁴ராவபா⁴ஸதா ஜோதிதாதி? ஸச்சமேதம், ஏகந்தக³ம்பீ⁴ரதாத³ஸ்ஸனத்த²மேவ பனஸ்ஸ க³ம்பீ⁴ராவபா⁴ஸக்³க³ஹணம், தஸ்மா அஞ்ஞத்த² லப்³ப⁴மானம் சாதுகோடிகம் ப்³யதிரேகமுகே²ன நித³ஸ்ஸேத்வா தமேவஸ்ஸ ஏகந்தக³ம்பீ⁴ரதம் விபா⁴வேதும் ‘‘ஏகம் ஹீ’’திஆதி³ வுத்தம். ஏதம் நத்தீ²தி அக³ம்பீ⁴ரோ அக³ம்பீ⁴ராவபா⁴ஸோ சாதி ஏதம் த்³வயம் நத்தி². தேன யதா²த³ஸ்ஸிதே சாதுகோடிகே பச்சி²மா ஏககோடி லப்³ப⁴தீதி த³ஸ்ஸேதி. தேனாஹ ‘‘அயம் ஹீ’’திஆதி³.

யேஹி க³ம்பீ⁴ரபா⁴வேஹி படிச்சஸமுப்பாதோ³ ‘‘க³ம்பீ⁴ரோ’’தி வுச்சதி, தே சதூஹி உபமாஹி உல்லிங்கே³ந்தோ ‘‘ப⁴வக்³க³க்³க³ஹணாயா’’திஆதி³மாஹ. யதா² ப⁴வக்³க³க்³க³ஹணத்த²ம் ஹத்த²ம் பஸாரேத்வா க³ஹேதும் ந ஸக்கா தூ³ரபா⁴வதோ, ஏவம் ஸங்கா²ராதீ³னம் அவிஜ்ஜாதி³பச்சயஸம்பூ⁴தஸமுதா³க³தத்தோ² பகதிஞாணேன க³ஹேதும் ந ஸக்கா. யதா² ஸினேரும் பி⁴ந்தி³த்வா மிஞ்ஜம் பப்³ப³தரஸம் பாகதிகபுரிஸேன நீஹரிதும் ந ஸக்கா, ஏவம் படிச்சஸமுப்பாத³க³தே த⁴ம்மத்தா²தி³கே பகதிஞாணேன பி⁴ந்தி³த்வா விப⁴ஜ்ஜ படிவிஜ்ஜ²னவஸேன ஜானிதும் ந ஸக்கா. யதா² மஹாஸமுத்³த³ம் பகதிபுரிஸஸ்ஸ பா³ஹுத்³வயவஸேன பாரம் தரிதும் ந ஸக்கா. ஏவம் வேபுல்லட்டே²ன மஹாஸமுத்³த³ஸதி³ஸம் படிச்சஸமுப்பாத³ம் பகதிஞாணேன தே³ஸனாவஸேன பரிஹரிதும் ந ஸக்கா. யதா² பத²விம் பரிவத்தேத்வா பாகதிகபுரிஸஸ்ஸ பத²வோஜம் க³ஹேதும் ந ஸக்கா, ஏவம் இத்த²ம் அவிஜ்ஜாத³யோ ஸங்கா²ராதீ³னம் பச்சயா ஹோந்தீதி தேஸம் படிச்சஸமுப்பாத³ஸபா⁴வோ பாகதிகஞாணேன நீஹரித்வா க³ஹேதும் ந ஸக்கோதி, ஏவம் சதுப்³பி³த⁴க³ம்பீ⁴ரதாவஸேன சதஸ்ஸோ உபமா யோஜேதப்³பா³. பாகதிகஞாணவஸேன சாயமத்த²யோஜனா கதா தி³ட்ட²ஸச்சானம் தத்த² படிவேத⁴ஸப்³பா⁴வதோ, ததா²பி யஸ்மா ஸாவகானம் பச்சேகபு³த்³தா⁴னஞ்ச தத்த² ஸப்பதே³ஸமேவ ஞாணம், பு³த்³தா⁴னம்யேவ நிப்பதே³ஸம். தஸ்மா வுத்தம் ‘‘பு³த்³த⁴விஸயம் பஞ்ஹ’’ந்தி.

மாதி படிஸேதே⁴ நிபாதோ. ஸ்வாயம் ‘‘உத்தானகுத்தானகோ விய கா²யதீ’’தி வசனம் ஸந்தா⁴ய வுத்தோதி ஆஹ ‘‘மா ப⁴ணீதி அத்தோ²’’தி. உஸ்ஸாதே³ந்தோதி பஞ்ஞாவஸேன உக்கம்ஸந்தோதி அத்தோ². அபஸாதே³ந்தோதி நிப்³ப⁴ச்ச²ந்தோ, நிக்³க³ண்ஹந்தோதி அத்தோ². தேனாதி மஹாபஞ்ஞபா⁴வேன.

தத்தா²தி தே²ரஸ்ஸ ஸதிபி உத்தானபா⁴வே படிச்சஸமுப்பாத³ஸ்ஸ அஞ்ஞேஸம் க³ம்பீ⁴ரபா⁴வே. ஸுபோ⁴ஜனரஸபுட்ட²ஸ்ஸாதி ஸுந்த³ரேன போ⁴ஜனரஸேன போஸிதஸ்ஸ. கதயோக³ஸ்ஸாதி நிப்³பு³த்³த⁴பயோகே³ கதபரிசயஸ்ஸ. மல்லபாஸாணந்தி மல்லேஹி மஹாப³லேஹேவ கி²பிதப்³ப³பாஸாணம். குஹிம் இமஸ்ஸ பா⁴ரியட்டா²னந்தி கஸ்மிம் பஸ்ஸே இமஸ்ஸ பாஸாணஸ்ஸ க³ருதரபதே³ஸோதி தஸ்ஸ ஸல்லஹுகபா⁴வம் தீ³பேந்தோ வத³தி.

திமிரபிங்க³லேனேவ தீ³பேந்தி தஸ்ஸ மஹாவிப்பா²ரபா⁴வதோ. தேனாஹ ‘‘தஸ்ஸ கிரா’’திஆதி³. பக்குத²தீதி பக்குத²ந்தம் விய பரிவத்ததி பரிதோ வத்ததி. லக்க²ணவசனஞ்ஹேதம். பிட்டி²யம் ஸகலிகஅட்டி²கா பிட்டி²பத்தம். காயூபபன்னஸ்ஸாதி மஹதா காயேன உபேதஸ்ஸ, மஹாகாயஸ்ஸாதி அத்தோ². பிஞ்ச² வட்டீதி பிஞ்ச² கலாபோ. ஸுபண்ணவாதந்தி நாக³க்³க³ஹணாதீ³ஸு பக்க²பப்போ²டனவஸேன உப்பஜ்ஜனகவாதம்.

‘‘புப்³பூ³பனிஸ்ஸயஸம்பத்தியா’’திஆதி³னா உத்³தி³ட்ட²காரணானி வித்தா²ரதோ விவரிதும் ‘‘இதோ கிரா’’திஆதி³ வுத்தம். தத்த² இதோதி இதோ ப⁴த்³த³கப்பதோ. ஸதஸஹஸ்ஸிமேதி ஸதஸஹஸ்ஸமே. ஹம்ஸவதீ நாம நக³ரம் அஹோஸி ஜாதனக³ரம். து⁴ரபத்தானீதி பா³ஹிரபத்தானி, யானி தீ³க⁴தமானி.

கனிட்ட²பா⁴தாதி வேமாதிகபா⁴தா கனிட்டோ² யதா² அம்ஹாகம் ப⁴க³வதோ நந்த³த்தே²ரோ. பு³த்³தா⁴னஞ்ஹி ஸஹோத³ரா பா⁴தரோ நாம ந ஹோந்தி. தத்த² ஜேட்டா² தாவ நுப்பஜ்ஜந்தி, கனிட்டா²னம் பன அஸம்ப⁴வோ ஏவ. போ⁴க³ந்தி விப⁴வம். உபஸந்தோதி சோரஜனிதஸங்கோ²ப⁴வூபஸமேன உபஸந்தோ ஜனபதோ³.

த்³வே ஸாடகே நிவாஸேத்வாதி ஸாடகத்³வயமேவ அத்தனோ காயபரிஹாரியம் கத்வா, இதரம் ஸப்³ப³ஸம்பா⁴ரம் அத்தனா மோசேத்வா.

பத்தக்³க³ஹணத்த²ந்தி அந்தோபக்கி²த்தஉண்ஹபோ⁴ஜனத்தா பத்தஸ்ஸ அபராபரம் ஹத்தே² பரிவத்தேந்தஸ்ஸ ஸுகே²ன பத்தக்³க³ஹணத்த²ம். உத்தரிஸாடகந்தி அத்தனோ உத்தரியம் ஸாடகம். ஏதானி பாகடட்டா²னானீதி ஏதானி யதா²வுத்தானி ப⁴க³வதோ தே³ஸனாய பாகடானி பு³த்³தே⁴ பு³த்³த⁴ஸாவகே ச உத்³தி³ஸ்ஸ தே²ரஸ்ஸ புஞ்ஞகரணட்டா²னானி, பச்சேகபு³த்³த⁴ம் பன போ³தி⁴ஸத்தஞ்ச உத்³தி³ஸ்ஸ தே²ரஸ்ஸ புஞ்ஞகரணட்டா²னானி ப³ஹூனியேவ.

படிஸந்தி⁴ம் க³ஹேத்வாதி அம்ஹாகம் போ³தி⁴ஸத்தஸ்ஸ படிஸந்தி⁴க்³க³ஹணதி³வஸேயேவ படிஸந்தி⁴ம் க³ஹேத்வா.

உக்³க³ஹனம் பாளியா உக்³க³ண்ஹனம், ஸவனம் அத்த²ஸவனம், பரிபுச்ச²னம் க³ண்டி²ட்டா²னேஸு அத்த²பரிபுச்ச²னம், தா⁴ரணம் பாளியா பாளிஅத்த²ஸ்ஸ ச சித்தே ட²பனம். ஸப்³ப³ஞ்சேதம் இத⁴ படிச்சஸமுப்பாத³வஸேன வேதி³தப்³ப³ம், ஸப்³ப³ஸ்ஸபி பு³த்³த⁴வசனஸ்ஸ வஸேனாதிபி வட்டதி. ஸோதாபன்னானஞ்ச…பே… உபட்டா²தி தத்த² ஸம்மோஹவிக³மேன ‘‘யம் கிஞ்சி ஸமுத³யத⁴ம்மம், ஸப்³ப³ம் தம் நிரோத⁴த⁴ம்ம’’ந்தி அத்தபச்சக்க²வஸேன உபட்டா²னதோ. நாமரூபபரிச்சே²தோ³தி ஸஹ பச்சயேன நாமரூபஸ்ஸ பரிச்சி²ஜ்ஜ அவபோ³தோ⁴. சதூஹீதி த⁴ம்மக³ம்பீ⁴ராதீ³ஹி சதூஹி க³ம்பீ⁴ரதாஹி ஸப்³பா³பி க³ம்பீ⁴ரதா.

ஸாவகேஹி தே³ஸிதா தே³ஸனாபி பன ஸத்து² ஏவ தே³ஸனாதி ஆஹ ‘‘மயா தி³ன்னனயே ட²த்வா’’தி. ‘‘ஸேக்கே²ன நாம நிப்³பா³னம் ஸப்³பா³காரேன படிவித்³த⁴ம் ந ஹோதீ’’தி ந தஸ்ஸ க³ம்பீ⁴ரதாதி தஸ்ஸ க³ம்பீ⁴ரஸ்ஸ உபாதா³னஸ்ஸ க³ம்பீ⁴ரதா விய ஸுட்டு² தி³ட்டா² நாம ஹோதி. தஸ்மா ஆஹ ‘‘இத³ம் நிப்³பா³னமேவ க³ம்பீ⁴ரம், பச்சயாகாரோ பன உத்தானகோ ஜாதோ’’தி. நிப்³பா³னஞ்ஹி ஸப்³பே³பி அஸேக்கா² ஸப்³ப³ஸோ படிவிஜ்ஜ²ந்தி நிப்பதே³ஸத்தா, பச்சயாகாரம் பன ஸம்மாஸம்பு³த்³தா⁴யேவ அனவஸேஸதோ படிவிஜ்ஜ²ந்தி, ந இதரே. தஸ்மா பச்சயவஸேன ‘‘இத³ம் அபரத்³த⁴’’ந்தி வுத்தம் தே²ரம் அபஸாதே³ந்தேன. தமேவ ஹிஸ்ஸ அனவஸேஸதோ படிவேதா⁴பா⁴வம் விபா⁴வேதும் ‘‘அத² கஸ்மா’’திஆதி³ வுத்தம். அஸதிபி த⁴ம்மதோ பே⁴தே³ ஸம்யோஜனத்த²அனுஸயத்த²வஸேன பன தேஸம் லப்³ப⁴மானபே⁴த³ம் க³ஹேத்வா ‘‘இமே சத்தாரோ கிலேஸே’’தி வுத்தம். அஞ்ஞோ ஹி தேஸம் ப³ந்த⁴னத்தோ², அஞ்ஞோ தா²மக³மனட்டோ²தி. ஏஸ நயோ ஸேஸேஸுபி. இதி இமேஸம் கிலேஸானம் அப்பஹீனத்தா ததா²ரூபம் உபனிஸ்ஸயஸம்பத³ம் அபா⁴வயதோவ அனுத்தானமேவ த⁴ம்மம் உத்தானந்தி ந வத்தப்³ப³மேவாதி அதி⁴ப்பாயோ. சத்தாரி அட்ட² ஸோளஸ வா அஸங்க்²யேய்யானீதி இத³ம் மஹாபோ³தி⁴ஸத்தானம் ஸந்தானே போ³தி⁴பரிபாசகத⁴ம்மானம் திக்க²மஜ்ஜி²மமுது³பா⁴வஸித்³த⁴காலவிஸேஸத³ஸ்ஸனம், தஞ்ச கோ² மஹாபி⁴னீஹாரதோ பட்டா²யாதி வத³ந்தி. ஏதேஹீதி யதா²வுத்தபு³த்³த⁴ஸாவகஅக்³க³ஸாவகபச்சேகபு³த்³த⁴ஸம்மாஸம்பு³த்³தா⁴னம் விஸேஸாதி⁴க³மேஹி. பச்சனீகந்தி படிக்கூலம் விருத்³த⁴ம். ஸப்³ப³தா² பச்சயாகாரபடிவேதோ⁴ நாம ஸம்மாஸம்போ³தி⁴யாதி⁴க³மோ ஏவாதி வுத்தம் ‘‘பச்சயாகாரம் படிவிஜ்ஜி²தும் வாயமந்தஸ்ஸேவா’’தி. நவஹி ஆகாரேஹீதி உப்பாதா³தீ³ஹி நவஹி பச்சயாகாரேஹி. வுத்தஞ்ஹேதம் படிஸம்பி⁴தா³யம் (படி. ம. 1.45) –

‘‘அவிஜ்ஜாஸங்கா²ரானம் உப்பாத³ட்டி²தி ச பவத்தட்டி²தி ச நிமித்தட்டி²தி ச ஆயூஹனட்டி²தி ச ஸம்யோக³ட்டி²தி ச பலிபோ³த⁴ட்டி²தி ச ஸமுத³யட்டி²தி ச ஹேதுட்டி²தி ச பச்சயட்டி²தி ச, இமேஹி நவஹாகாரேஹி அவிஜ்ஜா பச்சயோ, ஸங்கா²ரா பச்சயஸமுப்பன்னா’’திஆதி³.

தத்த² நவஹாகாரேஹீதி நவஹி பச்சயபா⁴வூபக³மனேஹி ஆகாரேஹி. உப்பஜ்ஜதி ஏதஸ்மா ப²லந்தி உப்பாதோ³, ப²லுப்பத்தியா காரணபா⁴வோ. ஸதி ச அவிஜ்ஜாய ஸங்கா²ரா உப்பஜ்ஜந்தி, நாஸதி, தஸ்மா அவிஜ்ஜா ஸங்கா²ரானம் உப்பாதோ³ ஹோதி. ததா² அவிஜ்ஜாய ஸதி ஸங்கா²ரா பவத்தந்தி ச நிமியந்தி ச. யதா² ச ப⁴வாதீ³ஸு கி²பந்தி, ஏவம் தேஸம் அவிஜ்ஜா பச்சயோ ஹோதி, ததா² ஆயூஹந்தி ப²லுப்பத்தியா க⁴டேந்தி ஸம்யுஜ்ஜந்தி அத்தனோ ப²லேன. யஸ்மிம் ஸந்தானே ஸயம் உப்பன்னா, தம் பலிபு³ந்த⁴ந்தி பச்சயந்தரஸமவாயே உத³யந்தி உப்பஜ்ஜந்தி, ஹினோதி ச ஸங்கா²ரானம் காரணபா⁴வம் உபக³ச்ச²தி. படிச்ச அவிஜ்ஜம் ஸங்கா²ரா அயந்தி பவத்தந்தீதி ஏவம் அவிஜ்ஜாய ஸங்கா²ரானம் காரணபா⁴வூபக³மனவிஸேஸா உப்பாதா³த³யோ வேதி³தப்³பா³தி. உப்பாத³ட்டி²தீதி ச திட்ட²தி ஏதேனாதி டி²தி, காரணம். உப்பாதோ³ ஏவ டி²தி உப்பாத³டி²தி. ஏஸ நயோ ஸேஸேஸுபி. இத³ஞ்ச பச்சயாகாரத³ஸ்ஸனம் யதா² புரிமேஹி மஹாபோ³தி⁴மூலே பவத்திதம், ததா² அம்ஹாகம் ப⁴க³வதாபி பவத்திதந்தி அச்ச²ரியவேகா³பி⁴ஹதா த³ஸஸஹஸ்ஸிலோகதா⁴து ஸங்கம்பி ஸம்பகம்பீதி த³ஸ்ஸேந்தோ ‘‘தி³ட்ட²மத்தே’’திஆதி³மாஹ.

ஏதஸ்ஸ த⁴ம்மஸ்ஸாதி ஏதஸ்ஸ படிச்சஸமுப்பாத³ஸஞ்ஞிதஸ்ஸ த⁴ம்மஸ்ஸ. ஸோ பன யஸ்மா அத்த²தோ ஹேதுப்பப⁴வானம் ஹேது. தேனாஹ ‘‘ஏதஸ்ஸ பச்சயத⁴ம்மஸ்ஸா’’தி. ஜாதிஆதீ³னம் ஜராமரணபச்சயதாயாதி அத்தோ². நாமரூபபரிச்சே²தோ³ தஸ்ஸ ச பச்சயபரிக்³க³ஹோ ந பட²மாபி⁴னிவேஸமத்தேன ஹோதி, அத² கோ² தத்த² அபராபரம் ஞாணுப்பத்திஸஞ்ஞிதேன அனு அனு பு³ஜ்ஜ²னேன. தது³ப⁴யபா⁴வம் பன த³ஸ்ஸேந்தோ ‘‘ஞாதபரிஞ்ஞாவஸேன அனனுபு³ஜ்ஜ²னா’’தி ஆஹ. நிச்சஸஞ்ஞாதீ³னம் பஜஹனவஸேன பவத்தமானா விபஸ்ஸனாத⁴ம்மே படிவிஜ்ஜ²தி ஏவ நாம ஹோதி படிபக்க²விக்க²ம்ப⁴னேன திக்க²விஸத³பா⁴வாபத்திதோ, தத³தி⁴ட்டா²னபூ⁴தா ச தீரணபரிஞ்ஞா அரியமக்³கோ³ ச பரிஞ்ஞாபஹானாபி⁴ஸமயவஸேன பவத்தியா தீரணப்பஹானபரிஞ்ஞாஸங்க³ஹோ சாதி தது³ப⁴யபடிவேதா⁴பா⁴வம் த³ஸ்ஸேந்தோ ‘‘தீரணப்பஹானபரிஞ்ஞாவஸேன அப்படிவிஜ்ஜ²னா’’தி ஆஹ. தந்தம் வுச்சதி படவீனனத்த²ம் தந்தவாயேதி தந்தம் ஆவஞ்சி²த்வா பஸாரிதஸுத்தவட்டிதம் நீயதீதி கத்வா, தம் பன தந்தாகுலதாய நித³ஸ்ஸனபா⁴வேன ஆகுலமேவ க³ஹிதந்தி ஆஹ ‘‘தந்தம் விய ஆகுலஜாதா’’தி. ஸங்கே²பதோ வுத்தமத்த²ம் வித்தா²ரதோ த³ஸ்ஸேந்தோ ‘‘யதா² நாமா’’திஆதி³ வுத்தம். ஸமானேதுந்தி புப்³பே³னாபரம் ஸமம் கத்வா ஆனேதும், அவிஸமம் உஜும் காதுந்தி அத்தோ². தந்தமேவ வா ஆகுலம் தந்தாகுலம், தந்தாகுலம் விய ஜாதா பூ⁴தா தந்தாகுலகஜாதா. மஜ்ஜி²மம் படிபத³ம் அனுபக³ந்த்வா அந்தத்³வயபக்க²ந்தே³ன பச்சயாகாரே க²லித்வா ஆகுலப்³யாகுலா ஹோந்தி, தேனேவ அந்தத்³வயபக்க²ந்தே³ன தம்தம்தி³ட்டி²க்³கா³ஹவஸேன பரிப்³ப⁴மந்தா உஜுகம் த⁴ம்மட்டி²திதந்தம் படிவிஜ்ஜி²தும் ந ஜானந்தி. தேனாஹ ‘‘ந ஸக்கோந்தி பச்சயாகாரம் உஜும் காது’’ந்தி. த்³வே போ³தி⁴ஸத்தேதி பச்சேகபோ³தி⁴ஸத்தமஹாபோ³தி⁴ஸத்தே. அத்தனோ த⁴ம்மதாயாதி அத்தனோ ஸபா⁴வேன, பரோபதே³ஸேன வினாதி அத்தோ². தத்த² தத்த² கு³ளகஜாதந்தி தஸ்மிம் தஸ்மிம் டா²னே ஜாதகு³ளகம் பிண்டி³ஸுத்தம். ததோ ஏவ க³ண்டி²ப³த்³த⁴ந்தி வுத்தம். பச்சயேஸு பக்க²லித்வாதி அனிச்சது³க்கா²னத்தாதி³ஸபா⁴வேஸு பச்சயத⁴ம்மேஸு நிச்சாதி³பா⁴வவஸேன பக்க²லித்வா. பச்சயே உஜும் காதும் அஸக்கோந்தோதி தஸ்ஸேவ நிச்சாதி³கா³ஹஸ்ஸ அவிஸ்ஸஜ்ஜனதோ பச்சயத⁴ம்மனிமித்தம் அத்தனோ த³ஸ்ஸனம் உஜும் காதும் அஸக்கோந்தோ இத³ம்ஸச்சாபி⁴னிவேஸகாயக³ந்த²வஸேன க³ண்டி²கஜாதா ஹோந்தீதி ஆஹ ‘‘த்³வாஸட்டி²…பே… க³ண்டி²ப³த்³தா⁴’’தி.

யே ஹி கேசி ஸமணா வா ப்³ராஹ்மணா வா ஸஸ்ஸததி³ட்டி²ஆதி³ தி³ட்டி²யோ நிஸ்ஸிதா அல்லீனா, வினனதோ குலாதி இத்தி²லிங்க³வஸேன லத்³த⁴னாமஸ்ஸ தந்தவாயஸ்ஸ க³ண்டி²கம் நாம ஆகுலபா⁴வேன அக்³க³தோ வா மூலதோ வா து³விஞ்ஞேய்யாவயவம் க²லிதப³ந்த⁴ஸுத்தந்தி ஆஹ ‘‘குலாக³ண்டி²கம் வுச்சதி பேஸகாரகஞ்ஜியஸுத்த’’ந்தி. ஸகுணிகாதி வட்டசாடகஸகுணிகா. ஸா ஹி ருக்க²ஸாகா²ஸு ஓலம்ப³னகுலாவகா ஹோதி. தஞ்ஹி ஸா குலாவகம் ததோ ததோ திணஹீராதி³கே ஆனேத்வா ததா² ததா² வினந்த⁴தி, யதா² தேஸம் பேஸகாரகஞ்ஜியஸுத்தம் விய அக்³கே³ன வா அக்³க³ம், மூலேன வா மூலம் ஸமானேதும் விவேசேதும் வா ந ஸக்கா. தேனாஹ ‘‘யதா²’’திஆதி³. தது³ப⁴யம்பீதி குலாக³ண்டி²கந்தி வுத்தம் கஞ்ஜியஸுத்தம் குலாவகஞ்ச. புரிமனயேனேவாதி ‘‘ஏவமேவ ஸத்தா’’திஆதி³னா புப்³பே³ வுத்தனயேனேவ.

காமம் முஞ்ஜபப்³ப³ஜதிணானி யதா²ஜாதானிபி தீ³க⁴பா⁴வேன பதித்வா அரஞ்ஞட்டா²னே அஞ்ஞமஞ்ஞம் வினந்தி⁴த்வா ஆகுலானி ஹுத்வா திட்ட²ந்தி, தானி பன ததா² து³ப்³பி³வேசியானி யதா² ரஜ்ஜுபூ⁴தானீதி த³ஸ்ஸேதும் ‘‘யதா² ஹீ’’திஆதி³ வுத்தம். ஸேஸமேத்த² ஹேட்டா² வுத்தனயமேவ.

அபாயோதி அயேன ஸுகே²ன, ஸுக²ஹேதுனா வா விரஹிதோ. து³க்க²ஸ்ஸ க³திபா⁴வதோதி அபாயிகஸ்ஸ து³க்க²ஸ்ஸ பவத்திட்டா²னபா⁴வதோ. ஸுக²ஸமுஸ்ஸயதோதி ‘‘அப்³பு⁴த³யதோ வினிபதிதத்தா’’தி விரூபம் நிபதிதத்தா யதா² தேனத்தபா⁴வேன ஸுக²ஸமுஸ்ஸயோ ந ஹோதி, ஏவம் நிபதிதத்தா. இதரோதி ஸம்ஸாரோ நனு ‘‘அபாய’’ந்திஆதி³னா வுத்தோபி ஸம்ஸாரோ ஏவாதி? ஸச்சமேதம், நிரயாதீ³னம் பன அதி⁴மத்தது³க்க²பா⁴வத³ஸ்ஸனத்த²ம் அபாயாதி³க்³க³ஹணம் கோ³ப³லிப³த்³த³ஞாயேன அயமத்தோ² வேதி³தப்³போ³. க²ந்தா⁴னஞ்ச படிபாடீதி பஞ்சன்னம் க²ந்தா⁴னம் ஹேதுப²லபா⁴வேன அபராபருப்பத்தி. அப்³போ⁴ச்சி²ன்னம் வத்தமானாதி அவிச்சே²தே³ன பவத்தமானா.

தம் ஸப்³ப³ம்பீதி தம் ‘‘அபாய’’ந்திஆதி³னா வுத்தம் ஸப்³ப³ம் அபாயது³க்க²ஞ்சேவ வட்டது³க்க²ஞ்ச. மஹாஸமுத்³தே³ வாதக்கி²த்தா நாவா வியாதி இத³ம் பரிப்³ப⁴மனட்டா²னஸ்ஸ மஹந்தபா⁴வத³ஸ்ஸனத்த²ஞ்சேவ பரிப்³ப⁴மனஸ்ஸ அனவத்திதத³ஸ்ஸனத்த²ஞ்ச வேதி³தப்³ப³ம். ஸேஸம் வுத்தனயமேவ.

நிதா³னஸுத்தவண்ணனா நிட்டி²தா.

து³க்க²வக்³க³வண்ணனா நிட்டி²தா.