2. து³தியத³ஸப³லஸுத்தவண்ணனா

22. தத்தா²தி து³தியஸுத்தே. த³ஸஹி ப³லேஹீதி த³ஸஹி அனஞ்ஞஸாதா⁴ரணேஹி ஞாணப³லேஹி, தானி ததா²க³தஸ்ஸேவ ப³லானீதி ததா²க³தப³லானீதி வுச்சந்தி. காமஞ்ச தானி ஏகச்சானம் ஸாவகானம்பி உப்பஜ்ஜந்தி, யாதி³ஸானி பன பு³த்³தா⁴னம் டா²னாட்டா²னஞாணாதீ³னி உப்பஜ்ஜந்தி, ந தாதி³ஸானி தத³ஞ்ஞேஸம் கதா³சிபி உப்பஜ்ஜந்தீதி. ஹத்தி²குலானுஸாரேனாதி வக்க²மானஹத்தி²குலானுஸாரேன. காளாவகந்தி குலஸத்³தா³பேக்கா²ய நபும்ஸகனித்³தே³ஸோ. ஏஸ நயோ ஸேஸேஸுபி. பகதிஹத்தி²குலந்தி கி³ரிசரனதி³சரவனசராதி³ப்பபே⁴தா³ கோ³சரியகாளாவகனாமா ஸப்³பா³பி ப³லேன பாகதிகா ஹத்தி²ஜாதி. த³ஸன்னம் புரிஸானந்தி தா²மமஜ்ஜி²மானம் த³ஸன்னம் புரிஸானம். ஏகஸ்ஸ ததா²க³தஸ்ஸ காயப³லந்தி ஆனேத்வா ஸம்ப³ந்தோ⁴. ஏகஸ்ஸாதி ச ததா² ஹேட்டா²கதா²யம் ஆக³தத்தா தே³ஸனாஸோதேன வுத்தம். நாராயனஸங்கா⁴தப³லந்தி ஏத்த² நாரா வுச்சந்தி ரஸ்மியோ, தா ப³ஹூ நானாவிதா⁴ இதோ உப்பஜ்ஜந்தீதி நாராயனம், வஜிரம், தஸ்மா நாராயனஸங்கா⁴தப³லந்தி வஜிரஸங்கா⁴தப³லந்தி அத்தோ². ததா²க³தஸ்ஸ காயப³லந்தி ததா²க³தஸ்ஸ பாகதிககாயப³லம். ஸங்க³ஹம் ந க³ச்ச²தி அத்தனோ ப³லாபா⁴வதோ, ததோ ஏவஸ்ஸ பா³ஹிரகதா லாமகதா ச. தது³ப⁴யம் பனஸ்ஸ காரணேன த³ஸ்ஸேதும் ‘‘ஏதஞ்ஹி நிஸ்ஸாயா’’திஆதி³ வுத்தம். அஞ்ஞந்தி காயப³லதோ அஞ்ஞம் ததோ விஸும்யேவ. த³ஸஸு டா²னேஸு த³ஸஸு ஞாதப்³ப³ட்டா²னேஸு. யாதா²வபடிவேத⁴தோ ஸயஞ்ச அகம்பயம், புக்³க³லஞ்ச தம்ஸமங்கி³ம் நேய்யேஸு அதி⁴ப³லம் கரோதீதி ஆஹ ‘‘அகம்பனட்டே²ன உபத்த²ம்ப⁴னட்டே²ன சா’’தி.

டா²னஞ்ச டா²னதோதி காரணஞ்ச காரணதோ. காரணஞ்ஹி யஸ்மா ப²லம் திட்ட²தி ததா³யத்தவுத்திதாய உப்பஜ்ஜதி சேவ பவத்ததி ச, தஸ்மா ‘‘டா²ன’’ந்தி வுச்சதி. விபரியாயேன அட்டா²னந்தி அகாரணம் வேதி³தப்³ப³ம். தது³ப⁴யம் ப⁴க³வா யேன ஞாணேன யே யே த⁴ம்மா யேஸம் யேஸம் த⁴ம்மானம் ஹேதூ பச்சயா உப்பாதா³ய, தம் தம் டா²னம், யே யே த⁴ம்மா யேஸம் யேஸம் த⁴ம்மானம் ந ஹேதூ ந பச்சயா உப்பாதா³ய, தம் தம் அட்டா²னந்தி பஜானாதி. தம் ஸந்தா⁴யாஹ ‘‘டா²னஞ்ச…பே… ஜானனம் ஏக’’ந்தி. கம்மஸமாதா³னானந்தி கம்மம் ஸமாதி³யித்வா கதானம் குஸலாகுஸலகம்மானம், கம்மஞ்ஞேவ வா கம்மஸமாதா³னம். டா²னஸோ ஹேதுஸோதி பச்சயதோ ச ஹேதுதோ ச. தத்த² க³திஉபதி⁴காலபயோகா³ விபாகஸ்ஸ டா²னம், கம்மம் ஹேது. ஸப்³ப³த்த²கா³மினீபடிபதா³ஜானனந்தி ஸப்³ப³க³திகா³மினியா அக³திகா³மினியா ச படிபதா³ய மக்³க³ஸ்ஸ ஜானனம், ப³ஹூஸுபி மனுஸ்ஸேஸு ஏகமேவ பாணம் ஹனந்தேஸு ‘‘இமஸ்ஸ சேதனா நிரயகா³மினீ ப⁴விஸ்ஸதி, இமஸ்ஸ திரச்சா²னயோனிகா³மினீ’’தி இமினா நயேன ஏகவத்து²ஸ்மிம்பி குஸலாகுஸலசேதனாஸங்கா²தானம் படிபத்தீனம் அவிபரீததோ ஸபா⁴வஜானனம். அனேகதா⁴துனானாதா⁴துலோகஜானனந்தி சக்கு²தா⁴துஆதீ³ஹி காமதா⁴துஆதீ³ஹி வா ப³ஹுதா⁴துனோ, தாஸம்யேவ தா⁴தூனம் விபரீததாய நானப்பகாரதா⁴துனோ க²ந்தா⁴யதனதா⁴துலோகஸ்ஸ ஜானனம். பரஸத்தானந்தி பரேஸம் ஸத்தானம். நானாதி⁴முத்திகதாஜானனந்தி ஹீனாதீ³ஹி அதி⁴முத்தீஹி நானாதி⁴முத்திகபா⁴வஸ்ஸ ஜானனம். தேஸம்யேவாதி பரஸத்தானம்யேவ. இந்த்³ரியபரோபரியத்தஜானனந்தி ஸத்³தா⁴தீ³னம் இந்த்³ரியானம் பரபா⁴வஸ்ஸ அபரபா⁴வஸ்ஸ வுத்³தி⁴யா சேவ ஹானியா ச ஜானனம். ஜா²னவிமோக்க²ஸமாதி⁴ஸமாபத்தீனந்தி பட²மாதீ³னம் சதுன்னம் ஜா²னானம், ‘‘ரூபீ ரூபானி பஸ்ஸதீ’’திஆதீ³னம் அட்ட²ன்னம் விமோக்கா²னம், ஸவிதக்கஸவிசாராதீ³னம் திண்ணம் ஸமாதீ⁴னம், பட²மஜ்ஜா²னஸமாபத்திஆதீ³னஞ்ச நவன்னம் அனுபுப்³ப³ஸமாபத்தீனம். ஸம்கிலேஸவோதா³னவுட்டா²னஜானனந்தி ஹானபா⁴கி³யஸ்ஸ, விஸேஸபா⁴கி³யஸ்ஸ ‘‘வோதா³னம்பி வுட்டா²னம், தம்ஹா தம்ஹா ஸமாதி⁴ம்ஹா வுட்டா²னம்பி வுட்டா²ன’’ந்தி (விப⁴. 828) ஏவம் வுத்தபகு³ணஜ்ஜா²னஸ்ஸ சேவ ப⁴வங்க³ப²லஸமாபத்தீனஞ்ச ஜானனம். ஹேட்டி²மம் ஹேட்டி²மஞ்ஹி பகு³ணஜ்ஜா²னம் உபரிமஸ்ஸ உபரிமஸ்ஸ பத³ட்டா²னம் ஹோதி, தஸ்மா வோதா³னம்பி ‘‘வுட்டா²ன’’ந்தி வுச்சதி. ப⁴வங்கே³ன பன ஸப்³ப³ஜா²னேஹி வுட்டா²னம் ஹோதி. ப²லஸமாபத்தியா நிரோத⁴ஸமாபத்திதோ வுட்டா²னமேவ ஸந்தா⁴ய ‘‘தம்ஹா தம்ஹா ஸமாதி⁴ம்ஹா வுட்டா²ன’’ந்தி வுத்தம். புப்³பே³னிவாஸஜானனந்தி புப்³பே³னிவாஸானுஸ்ஸதிஞாணேன நிவுட்ட²க்க²ந்தா⁴னம் ஜானனம். சுதூபபாதஜானனந்தி ஸத்தானம் சுதியா உபபத்தியா ச யாதா²வதோ ஜானனம். அயமேத்த² ஸங்கே²போ, வித்தா²ரோ பன விஸுத்³தி⁴மக்³கே³ வுத்தனயேனேவ வேதி³தப்³போ³. ஆஸவக்க²யஜானனம் ஆஸவக்க²யஞாணம், மக்³க³ஞாணந்தி அத்தோ². யத்த² பனேதானி வித்தா²ரதோ ஆக³தானி ஸம்வண்ணிதானி, தானி த³ஸ்ஸேந்தோ ‘‘அபி⁴த⁴ம்மே பனா’’திஆதி³மாஹ.

ப்³யாமோஹப⁴யவஸேன ஸரணபரியேஸனம் ஸாரஜ்ஜனம் ஸாரதோ³, ப்³யாமோஹப⁴யம். விக³தோ ஸாரதோ³ ஏதஸ்ஸாதி விஸாரதோ³, தஸ்ஸ பா⁴வோ வேஸாரஜ்ஜம். தம் பன ஞாணஸம்பத³ம் பஹானஸம்பத³ம் தே³ஸனாவிஸேஸஸம்பத³ம் கே²மம் நிஸ்ஸாய பவத்தம் சதுப்³பி³த⁴ம் பச்சவேக்க²ணாஞாணம். தேனாஹ ‘‘சதூஸு டா²னேஸூ’’திஆதி³. சதூஸூதி பரபரிகப்பிதேஸு வத்தூ²ஸு. பரபரிகப்பிதேஸு வா வத்து²மத்தேஸு சோத³னாகாரணேஸு. ஸம்மாஸம்பு³த்³த⁴ஸ்ஸ தே படிஜானதோதி ‘‘அஹம் ஸம்மாஸம்பு³த்³தோ⁴’’தி ஏவம் படிஜானந்தேன தயா. இமே த⁴ம்மாதி ‘‘இத³ம் பஞ்சமம் அரியஸச்சம், அயம் ச²ட்டோ² உபாதா³னக்க²ந்தோ⁴, இத³ம் தேரஸமம் ஆயதன’’ந்தி வேதி³தப்³பா³ இமே த⁴ம்மா. அனபி⁴ஸம்பு³த்³தா⁴ அப்படிவித்³த⁴த்தாதி.

தத்ராதி தஸ்மிம் அனபி⁴ஸம்பு³த்³த⁴த⁴ம்மஸங்கா²தே சோத³னாவத்து²ஸ்மிம். கோசீதி ஸமணாதீ³ஹி அஞ்ஞோ வா யோ கோசி. ஸஹ த⁴ம்மேனாதி ஸஹ ஹேதுனா. ‘‘த⁴ம்மபடிஸம்பி⁴தா³’’திஆதீ³ஸு விய ஹேதுபரியாயோ இத⁴ த⁴ம்ம-ஸத்³தோ³. ஹேதூதி ச உப்பத்திஸாத⁴னஹேது வேதி³தப்³போ³, ந காரகோ ஸம்பாபகோ வா. நிமித்தந்தி காரணம், தம் பனேத்த² சோத³னாவத்து²மேவ. ந ஸமனுபஸ்ஸாமி ஸம்மாஸம்பு³த்³த⁴பா⁴வதோ. கே²மப்பத்தோதி அகே²மப்பத்தரூபாய சோத³னாய அனுபத்³த³வம் பத்தோ நிச்சலபா⁴வப்பத்தோ. வேஸாரஜ்ஜப்பத்தோதி விஸாரத³பா⁴வப்பத்தோ. ஸேஸேஸுபி ஏஸேவ நயோ. அயம் பன விஸேஸோ – இமே ஆஸவாதி காமாஸவாதீ³ஸு இமே நாம ஆஸவா ந பரிக்கீ²ணாதி ஆஸவக்க²யவசனேனேத்த² ஸப்³ப³கிலேஸப்பஹானம் வுத்தம். ந ஹி ஸோ கிலேஸோ அத்தி², யோ ஸப்³ப³ஸோ ஆஸவேஸு கீ²ணேஸு நப்பஹீயேய்ய. அந்தராயிகாதி அந்தராயகரா, ஸக்³க³விமோக்கா²தி⁴க³மஸ்ஸ அந்தராயகராதி அத்தோ². த⁴ம்மோ ஹி யோ ஸம்கிலேஸதோ நிய்யாதி, ஸோ ‘‘நிய்யானிகோ’’தி வுத்தோ. த⁴ம்மே நிய்யந்தே தம்ஸமங்கீ³புக்³க³லோ நிய்யானிகோதி வோஹரிதோ ஹோதீதி தஸ்ஸ படிக்கி²பந்தோ ‘‘ஸோ ந நிய்யாதீ’’தி ஆஹ. கத²ம் பன தே³ஸனாத⁴ம்மோ நிய்யாதீதி வுச்சதி? நிய்யானத்த²ஸமாதா⁴னதோ, ஸோ அபே⁴தோ³பசாரேன ‘‘நிய்யாதீ’’தி வுத்தோ. அத² வா ‘‘த⁴ம்மோ தே³ஸிதோ’’தி அரியத⁴ம்மஸ்ஸ அதி⁴ப்பேதத்தா ந கோசி விரோதோ⁴.

உஸப⁴ஸ்ஸ இத³ந்தி ஆஸப⁴ம், அஸந்தஸனட்டே²ன ஆஸப⁴ம் வியாதி ஆஸப⁴ம், ஸேட்ட²ட்டா²னம் ஸப்³ப³ஞ்ஞுதம். ஆஸப⁴ட்டா²னட்டா²யிதாய ஆஸபா⁴ நாம புப்³ப³பு³த்³தா⁴. ஸப்³ப³ஞ்ஞுதபடிஜானனவஸேன அபி⁴முக²ம் க³ச்ச²ந்தி, சதஸ்ஸோ வா பரிஸா உபஸங்கமந்தீதி ஆஸபா⁴. சதஸ்ஸோபி ஹி பரிஸா பு³த்³தா⁴பி⁴முகா² ஏவம் திட்ட²ந்தி, ந திட்ட²ந்தி பரம்முகா². இத³ம்பீதி ‘‘உஸபோ⁴’’தி இத³ம்பி பத³ம். தஸ்ஸாதி நிஸப⁴ஸ்ஸ. யேஸம் ப³லுப்பாதா³வட்டா²னானம் வஸேன உஸப⁴ஸ்ஸ ஆஸப⁴ண்டா²னம் இச்சி²தம், ததோ ஸாதிஸயானம் ஏவ தேஸம் வஸேன ஆஸப⁴ண்டா²னம் ஹோதீதி த³ட்ட²ப்³ப³ம். யம் கிஞ்சி லோகே உபமம் நாம பு³த்³த⁴கு³ணானம் நித³ஸ்ஸனபா⁴வேன வுச்சதி, ஸப்³ப³ம் தம் நிஹீனமேவ. திட்ட²மானோ சாதி அதிட்ட²ந்தோபி திட்ட²மானோ ஏவ படிஜானாதி நாம. உபக³ச்ச²தீதி அனுஜானாதி.

அட்ட² கோ² இமாதி இத³ம் வேஸாரஜ்ஜஞாணஸ்ஸ ப³லத³ஸ்ஸனம். யதா² ஹி ப்³யத்தம் பரிஸம் அஜ்ஜோ²கா³ஹேத்வா விஞ்ஞூனம் சித்தம் ஆராத⁴னஸமத்தா²ய கதா²ய த⁴ம்மகதி²கஸ்ஸ சே²கபா⁴வோ பஞ்ஞாயதி, ஏவம் இமா அட்ட² பரிஸா பத்வா ஸத்து² வேஸாரஜ்ஜஞாணஸ்ஸ ப³லம் பாகடம் ஹோதி. தேன வுத்தம் ‘‘பரிஸாஸூ’’தி. க²த்தியபரிஸாதி க²த்தியானம் ஸன்னிபதிதானம் ஸமூஹோ. ஏஸ நயோ ஸப்³ப³த்த². மாரபரிஸாதி மாரகாயிகானம் ஸன்னிபதிதானம் ஸமூஹோ. மாரஸதி³ஸானம் மாரானம் பரிஸாதி மாரபரிஸா. ஸப்³பா³ சேதா பரிஸா உக்³க³ட்டா²னத³ஸ்ஸனவஸேன க³ஹிதா. மனுஸ்ஸா ஹி ‘‘ஏத்த² ராஜா நிஸின்னோ’’தி வுத்தே பகதிவசனம்பி வத்தும் ந ஸக்கோந்தி, கச்சே²ஹி ஸேதா³ முச்சந்தி, ஏவம் உக்³கா³ க²த்தியபரிஸா, ப்³ராஹ்மணா தீஸு வேதே³ஸு குஸலா ஹோந்தி, க³ஹபதயோ நானாவோஹாரேஸு ச அக்க²ரசிந்தாய ச குஸலா, ஸமணா ஸகவாத³பரவாதே³ஸு குஸலா, தேஸம் மஜ்ஜே² த⁴ம்மகதா²கத²னம் நாம அதிவிய பா⁴ரியம். தே³வானம் உக்³க³பா⁴வே வத்தப்³ப³மேவ நத்தி². அமனுஸ்ஸோதி ஹி வுத்தமத்தே மனுஸ்ஸானம் ஸகலஸரீரம் கம்பதி, தேஸம் ரூபம் தி³ஸ்வாபி ஸத்³த³ம் ஸுத்வாபி ஸத்தா விஸஞ்ஞிதாபி ஹோந்தி. ஏவம் அமனுஸ்ஸபரிஸா உக்³கா³. இதி சேதா பரிஸா உக்³க³ட்டா²னத³ஸ்ஸனவஸேன வுத்தா. கஸ்மா பனேத்த² யாமாதி³பரிஸா ந க³ஹிதாதி? பு⁴ஸம் காமாபி⁴கி³த்³த⁴தாய யோனிஸோமனஸிகாரவிரஹதோ. யாமாத³யோ ஹி உளாருளாரே காமே படிஸேவந்தா தத்தா²பி⁴கி³த்³த⁴தாய த⁴ம்மஸ்ஸவனாய ஸபா⁴வேன சித்தம்பி ந உப்பாதே³ந்தி, மஹாபோ³தி⁴ஸத்தானம் பன பு³த்³தா⁴னஞ்ச ஆனுபா⁴வேன ஆகட்³டி⁴யமானா கதா³சி நேஸம் பயிருபாஸனாதீ³னி கரோந்தி தாதி³ஸே மஹாஸமயே. தேனேவ ஹி விமானவத்து²தே³ஸனாபி தம்னிமித்தா ப³ஹுலா நாஹோஸி. ஸேட்ட²னாத³ந்தி கேனசி அப்படிஹதபா⁴வேன உத்தமனாத³ம். அபீ⁴தனாத³ந்தி வேஸாரஜ்ஜயோக³தோ குதோசி நிப்³ப⁴யனாத³ம். ஸீஹனாத³ஸுத்தேனாதி க²ந்தி⁴யவக்³கே³ ஆக³தேன ஸீஹனாத³ஸுத்தேன. ஸஹனதோதி க²மனதோ. ஹனனதோதி வித⁴மனதோ வித்³த⁴ம்ஸனதோ. யதா² வாதிஆதி³ ‘‘ஸீஹனாத³ஸதி³ஸம் வா நாத³ம் நத³தீ’’தி ஸங்கே²பதோ வுத்தஸ்ஸ அத்த²ஸ்ஸ விஞ்ஞாபனம்.

ஏதந்தி ‘‘ப்³ரஹ்மசக்க’’ந்தி ஏதம் பத³ம். பஞ்ஞாபபா⁴விதந்தி சிரகாலபரிபா⁴விதாய பாரமிதாபஞ்ஞாய விபஸ்ஸனாபஞ்ஞாய ச உப்பாதி³தம். கருணாபபா⁴விதந்தி ‘‘கிச்ச²ம் வதாயம் லோகோ ஆபன்னோ’’திஆதி³னயப்பவத்தாய மஹாகருணாய உப்பாதி³தம். யதா² அபி⁴னிக்க²மனதோ பபு⁴தி மஹாபோ³தி⁴ஸத்தானம் அரியமக்³கா³தி⁴க³மனவிரோதி⁴னீ படிபத்தி நத்தி², ஏவம் துஸிதப⁴வனதோ நியதபா⁴வாபத்திதோ ச பட்டா²யாதி து³தியததியனயா ச க³ஹிதா. ப²லக்க²ணேதி அக்³க³ப²லக்க²ணே. படிவேத⁴னிட்ட²த்தா அரஹத்தமக்³க³ஞாணம் வஜிரூபமதாயேவ ஸாதிஸயோ படிவேதோ⁴தி ‘‘ப²லக்க²ணே உப்பன்னம் நாமா’’தி வுத்தம். தேன படிலத்³த⁴ஸ்ஸபி தே³ஸனாஞாணஸ்ஸ கிச்சனிப்ப²த்தி பரஸ்ஸ பு³ஜ்ஜ²னமத்தேன ஹோதீதி ‘‘அஞ்ஞாஸிகோண்ட³ஞ்ஞஸ்ஸ ஸோதாபத்தி…பே… ப²லக்க²ணே பவத்தனம் நாமா’’தி வுத்தம். ததோ பரம் பன யாவ பரினிப்³பா³னா தே³ஸனாஞாணப்பவத்தி, தஸ்ஸேவ பவத்திதஸ்ஸ த⁴ம்மசக்கஸ்ஸ டா²னந்தி வேதி³தப்³ப³ம் பவத்திதசக்கஸ்ஸ சக்கவத்தினோ சக்கரதனஸ்ஸ டா²னம் விய. உப⁴யம்பீதி பி-ஸத்³தே³ன லோகியதே³ஸனாஞாணஸ்ஸ இதரேன அனஞ்ஞஸாதா⁴ரணதாவஸேன ஸமானதம் ஸம்பிண்டே³தி. உரஸி ஜாததாய உரஸோ ஸம்பூ⁴தந்தி ஓரஸம் ஞாணம்.

இதி ரூபந்தி ஏத்த² இதி-ஸத்³தோ³ அனவஸேஸதோ ரூபஸ்ஸ ஸரூபனித³ஸ்ஸனத்தோ²தி தஸ்ஸ ‘‘இத³ம் ரூப’’ந்தி ஏதேன ஸாதா⁴ரணதோ ச ஸரூபனித³ஸ்ஸனமாஹ. ஏத்தகம் ரூபந்தி ஏதேன அனவஸேஸதோ ‘‘இதோ உத்³த⁴ம் ரூபம் நத்தீ²’’தி நிமித்தஸ்ஸ அஞ்ஞஸ்ஸ அபா⁴வம். இதா³னி தமத்த²ம் வித்தா²ரதோ த³ஸ்ஸேதும் ‘‘ருப்பனஸபா⁴வஞ்சேவா’’திஆதி³ வுத்தம். தத்த² ருப்பனம் ஸீதாதி³விரோதி⁴பச்சயஸமவாயே விஸதி³ஸுப்பத்தி. ஆதி³-ஸத்³தே³ன அஜ்ஜ²த்திகபா³ஹிராதி³பே⁴த³ம் ஸங்க³ண்ஹாதி. லக்க²ண…பே… வஸேனாதி கக்க²ளத்தாதி³லக்க²ணவஸேன ஸந்தா⁴ரணாதி³ரஸவஸேன ஸம்படிச்ச²னாதி³பச்சுபட்டா²னவஸேன பூ⁴தத்தயாதி³பத³ட்டா²னவஸேன ச. ஏவம் பரிக்³க³ஹிதஸ்ஸாதி ஏவம் ஸாதா⁴ரணதோ ச லக்க²ணாதி³தோ ச பரிக்³க³ஹிதஸ்ஸ. அவிஜ்ஜாஸமுத³யாதி அவிஜ்ஜாய உப்பாதா³, அத்தி²பா⁴வாதி அத்தோ². நிரோத⁴விரோதீ⁴ ஹி அத்தி²பா⁴வோ ஹோதி, தஸ்மா நிரோதே⁴ அஸதி அத்தி²பா⁴வோ ஹோதி, தஸ்மா புரிமப⁴வே ஸித்³தா⁴ய அவிஜ்ஜாய ஸதி இமஸ்மிம் ப⁴வே ரூபஸ்ஸ ஸமுத³யோ ரூபஸ்ஸ உப்பாதோ³ ஹோதீதி அத்தோ². தண்ஹாஸமுத³யா கம்மஸமுத³யாதி ஏத்தா²பி ஏஸேவ நயோ. அவிஜ்ஜாதீ³ஹி ச தீஹி அதீதகாலிகத்தா தேஸம் ஸஹகாரீகாரணபூ⁴தம் உபாதா³னம்பி க³ஹிதமேவாதி வேதி³தப்³ப³ம். பவத்திபச்சயேஸு கப³ளீகாரஆஹாரஸ்ஸ ப³லவதாய, ஸோ ஏவ க³ஹிதோ, ‘‘ஆஹாரஸமுத³யா’’தி பன க³ஹிதேன பவத்திபச்சயதாமத்தேன உதுசித்தானிபி க³ஹிதானேவ ஹோந்தீதி த்³வாத³ஸஸமுட்டா²னிகம் ரூபஸ்ஸ பச்சயதோ த³ஸ்ஸனம்பி ப⁴விதப்³ப³மேவாதி த³ட்ட²ப்³ப³ம். நிப்³ப³த்திலக்க²ணந்திஆதி³னா காலவஸேன உத³யத³ஸ்ஸனமாஹ. தத்த² பூ⁴தவஸேன மக்³கே³ உத³யம் பஸ்ஸித்வா டி²தோ இத⁴ ஸந்ததிவஸேன அனுக்கமேன க²ணவஸேன பஸ்ஸதி. அவிஜ்ஜானிரோதா⁴ ரூபனிரோதோ⁴தி அக்³க³மக்³க³ஞாணேன அவிஜ்ஜாய அனுப்பாத³னிரோத⁴தோ அனாக³தஸ்ஸ அனுப்பாத³னிரோதோ⁴ ஹோதி பச்சயாபா⁴வே அபா⁴வதோ. பச்சயனிரோதே⁴னாதி அவிஜ்ஜாஸங்கா²தஸ்ஸ பச்சயஸ்ஸ நிரோத⁴பா⁴வேன. தண்ஹானிரோதா⁴தி ஏத்தா²பி ஏஸேவ நயோ. ஆஹாரனிரோதா⁴தி பவத்திபச்சயஸ்ஸ கப³ளீகாராஹாரஸ்ஸ அபா⁴வா. ரூபனிரோதா⁴தி தம்ஸமுட்டா²னரூபஸ்ஸ அபா⁴வோ ஹோதி. ஸேஸம் ஹேட்டா² வுத்தனயானுஸாரேன வேதி³தப்³ப³ம். விபரிணாமலக்க²ணந்தி ப⁴வகாலவஸேன ஹேதுத்³வயத³ஸ்ஸனம். தஸ்மா தம் பத³ட்டா²னவஸேன பகே³வ பஸ்ஸித்வா டி²தோ இத⁴ ஸந்ததிவஸேன தி³ஸ்வா அனுக்கமேன க²ணவஸேன பஸ்ஸதி.

இதி வேத³னாதிஆதீ³ஸுபி வுத்தனயேன அத்தோ² வேதி³தப்³போ³. ஸுகா²தி³பே⁴த³ந்தி ஸுக²து³க்க²அது³க்க²மஸுகா²தி³விபா⁴க³ம். ரூபஸஞ்ஞாதி³பே⁴த³ந்தி ரூபஸஞ்ஞா, ஸத்³த³… க³ந்த⁴… ரஸ… போ²ட்ட²ப்³ப³ … த⁴ம்மஸஞ்ஞாதி³விபா⁴க³ம். ப²ஸ்ஸாதி³பே⁴த³ந்தி ப²ஸ்ஸசேதனாமனஸிகாராதி³விபா⁴க³ம். லக்க²ண…பே… வஸேனாதி இட்டா²னுப⁴வனலக்க²ணாதி³லக்க²ணவஸேன இட்டா²காரஸம்போ⁴க³ரஸாதி³ரஸவஸேன காயிகஅஸ்ஸாதா³தி³பச்சுபட்டா²னவஸேன இட்டா²ரம்மணாதி³பத³ட்டா²னவஸேன. ‘‘பு²ட்டோ² வேதே³தி, பு²ட்டோ² ஸஞ்ஜானாதி, பு²ட்டோ² சேதேதீ’’தி (ஸம். நி. 4.93) வசனதோ தீஸு வேத³னாதீ³ஸு க²ந்தே⁴ஸு ப²ஸ்ஸஸமுத³யாதி வத்தப்³ப³ம். விஞ்ஞாணப்பச்சயா நாமரூப’’ந்தி வசனதோ விஞ்ஞாணக்க²ந்தே⁴ நாமரூபஸமுத³யாதி வத்தப்³ப³ம். தேஸம்யேவ வஸேனாதி ‘‘அவிஜ்ஜானிரோதோ⁴ வேத³னானிரோதோ⁴’’திஆதி³னா தேஸம்யேவ அவிஜ்ஜாதீ³னம் வஸேன யோஜேதப்³ப³ம்.

உபாதா³னக்க²ந்தா⁴னம் ஸமுத³யத்த²ங்க³மவஸேன தித்தி²யானம் அவிஸயோபி ஸப்பதே³ஸோ ஸீஹனாதோ³ த³ஸ்ஸிதோ. இதா³னி நிப்பதே³ஸோ அனுலோமபடிலோமவஸேன ஸங்கே²பதோ வித்தா²ரதோ பச்சயாகாரவிஸயோ அனஞ்ஞஸாதா⁴ரணோ த³ஸ்ஸீயதீதி ஆஹ, ‘‘அயம்பி அபரோ ஸீஹனாதோ³’’தி. தஸ்ஸாதி ‘‘இமஸ்மிம் ஸதீ’’திஆதி³னா ஸங்கே²பதோ வுத்தபடிச்சஸமுப்பாத³பாளியா. ஏத்த² ச ‘‘இமஸ்மிம் ஸதி இத³ம் ஹோதி, இமஸ்ஸ நிரோதா⁴ இத³ம் நிருஜ்²தீ’’தி அவிஜ்ஜாதீ³னம் பா⁴வே ஸங்கா²ராதீ³னம் பா⁴வஸ்ஸ, அவிஜ்ஜாதீ³னம் நிரோதே⁴ ஸங்கா²ராதீ³னம் நிரோத⁴ஸ்ஸ கத²னேன புரிமஸ்மிம் பச்சயலக்க²ணே நியமோ த³ஸ்ஸிதோ ‘‘இமஸ்மிம் ஸதி ஏவ, நாஸதி, இமஸ்ஸ உப்பாதா³ ஏவ, நானுப்பாதா³, நிரோதா⁴ ஏவ, நானிரோதா⁴’’தி. தேனேத³ம் லக்க²ணம் அந்தோக³த⁴னியமம் இத⁴ படிச்சஸமுப்பாத³ஸ்ஸ வுத்தந்தி த³ட்ட²ப்³ப³ம். நிரோதோ⁴தி ச அவிஜ்ஜாதீ³னம் விராகா³ விக³மேன ஆயதிம் அனுப்பாதோ³ அப்பவத்தி. ததா² ஹி வுத்தம் ‘‘அவிஜ்ஜாய த்வேவ அஸேஸவிராக³னிரோதா⁴’’திஆதி³. நிரோத⁴விரோதீ⁴ ச உப்பாதோ³, யேன ஸோ உப்பாத³னிரோத⁴விபா⁴கே³ன வுத்தோ ‘‘இமஸ்ஸ நிரோதா⁴ இத³ம் நிருஜ்ஜ²தீ’’தி. தேனேதம் த³ஸ்ஸேதி ‘‘அஸதி நிரோதே⁴ உப்பாதோ³ நாம, ஸோ சேத்த² அத்தி²பா⁴வோதி வுச்சதீ’’தி. ‘‘இமஸ்மிம் ஸதி இத³ம் ஹோதீ’’தி இத³மேவ ஹி லக்க²ணம். பரியாயந்தரேன ‘‘இமஸ்ஸ உப்பாதா³ இத³ம் உப்பஜ்ஜதீ’’தி வத³ந்தேன பரேன புரிமம் விஸேஸிதம் ஹோதி. தஸ்மா ந வத்தமானம்யேவ ஸந்தா⁴ய ‘‘இமஸ்மிம் ஸதீ’’தி வுத்தம், அத² கோ² மக்³கே³ன அனிருஜ்ஜ²னஸபா⁴வஞ்சாதி விஞ்ஞாயதி. யஸ்மா ச ‘‘இமஸ்மிம் அஸதி இத³ம் ந ஹோதி, இமஸ்ஸ நிரோதா⁴ இத³ம் நிருஜ்ஜ²தீ’’தி த்³விதா⁴பி உத்³தி³ட்ட²ஸ்ஸ லக்க²ணஸ்ஸ நித்³தே³ஸம் வத³ந்தேன ப⁴க³வதா ‘‘அவிஜ்ஜாய த்வேவ அஸேஸவிராக³னிரோதா⁴ ஸங்கா²ரனிரோதோ⁴’’திஆதி³னா நிரோதோ⁴வ வுத்தோ, தஸ்மா நத்தி²பா⁴வோபி நிரோதோ⁴ ஏவாதி நத்தி²பா⁴வவிருத்³தோ⁴ அத்தி²பா⁴வோ அனிரோதோ⁴தி த³ஸ்ஸிதம் ஹோதி. தேன அனிரோத⁴ஸங்கா²தேன அத்தி²பா⁴வேன உப்பாத³ம் விஸேஸேதி. ததோ இத⁴ ந கேவலம் அத்தி²பா⁴வமத்தம் உப்பாதோ³தி அத்தோ² அதி⁴ப்பேதோ, அத² கோ² அனிரோத⁴ஸங்கா²தோ அத்தி²பா⁴வோ சாதி அயமத்தோ² விபா⁴விதோ ஹோதி. ஏவமேதம் லக்க²ணத்³வயவசனம் அஞ்ஞமஞ்ஞம் விஸேஸனவிஸேஸிதப்³ப³பா⁴வேன ஸாத்த²கந்தி வேதி³தப்³ப³ம். கோ பனாயம் அனிரோதோ⁴ நாம, யோ ‘‘அத்தி²பா⁴வோ, உப்பாதோ³’’தி ச வுத்தோதி? அப்பஹீனபா⁴வோ ச அனிப்³ப³த்திதப²லபா⁴வேன ப²லுப்பாத³னாரஹதா சாதி அயமேத்த² ஸங்கே²போ. வித்தா²ரோ பன பரமத்த²தீ³பனியம் உதா³னட்ட²கதா²யம் (உதா³. அட்ட². 1). வுத்தனயேன வேதி³தப்³போ³.

பஞ்சக்க²ந்த⁴விப⁴ஜனாதி³வஸேனாதி பஞ்சன்னம் உபாதா³னக்க²ந்தா⁴னம் த்³வாத³ஸபதி³கஸ்ஸ பச்சயாகாரஸ்ஸ விப⁴ஜனவஸேன. இமஸ்மிஞ்ஹி த³ஸப³லஸுத்தே த⁴ம்மஸ்ஸ தே³ஸிதாகாரோ பஞ்சக்க²ந்த⁴பச்சயாகாரமத்தோ. தேனாஹ ‘‘பஞ்சக்க²ந்த⁴பச்சயாகாரத⁴ம்மோ’’தி. ஆசரியமுட்டி²யா அகரணேன விபூ⁴தோ, ஸோ பன அத்த²தோ ச ஸத்³த³தோ ச பிஹிதோ ஹேட்டா²முக²ஜாதோ வா ந ஹோதீதி ஆஹ ‘‘அனிகுஜ்ஜிதோ’’தி. விவடோதி விபா⁴விதோ. தேனாஹ ‘‘விவரித்வா ட²பிதோ’’தி. பகாஸிதோதி ஞாணோபா⁴ஸேன ஓபா⁴ஸிதோ ஆதீ³பிதோதி ஆஹ ‘‘தீ³பிதோ ஜோதிதோ’’தி. தத்த² தத்த² சி²ன்னபி⁴ன்னட்டா²னே. ஸிப்³பி³தக³ண்டி²தந்தி வாகம் க³ஹேத்வா ஸிப்³பி³தம், ஸிப்³பி³தும் அஸக்குணேய்யட்டா²னே வாகேன க³ண்டி²தஞ்ச. சி²ன்னபிலோதிகாபா⁴வேன விக³தபிலோதிகோ த⁴ம்மோ, தஸ்ஸ சி²ன்னபிலோதிகஸ்ஸ படிலோமதா சி²ன்னபி⁴ன்னதாபா⁴வேனாதி த³ஸ்ஸேந்தோ ‘‘ந ஹேத்தா²’’திஆதி³மாஹ. நிவாஸனபாருபனம் பரிக்³க³ஹணம். ஸயம் படிபா⁴னம் கப்பேத்வா. வட்³டே⁴ந்தா அத்தனோ ஸமயம். ஸமணகசவரந்தி ஸமணவேஸதா⁴ரணவஸேன ஸமணபடிரூபதாய ஸமணானம் கசவரபூ⁴தம். அத்தனோ ரூபபவத்தியா கரண்ட³ம் குச்சி²தம் து⁴த்தம் வாதி பவத்தேதீதி காரண்ட³வோ, து³ஸ்ஸீலோ. தம் காரண்ட³வம். நித்³த⁴மதா²தி நீஹரத². கஸம்பு³ந்தி ஸமணகஸடம். அபகஸ்ஸதா²தி அபகட்³ட⁴த² நந்தி அத்தோ². பலாபேதி பலாபஸதி³ஸே. ததா² ஹி தண்டு³லஸாரரஹிதோ த⁴ஞ்ஞபடிரூபகோ து²ஸமத்தகோ பலாபோதி வுச்சதி, ஏவம் ஸீலாதி³ஸாரரஹிதோ ஸமணபடிரூபகோ பலாபோ வியாதி பலாபோ, து³ஸ்ஸீலோ. தே பலாபே. வாஹேதா²தி அபனேத². பதிஸ்ஸதாதி பா³ள்ஹஸதிதாய பதிஸ்ஸதா ஹோதா²தி.

ஸத்³தா⁴ய பப்³ப³ஜிதேனாதி ராஜூபத்³த³வாதீ³ஹி அனுபத்³து³தேன ‘‘ஏவஞ்ஹி தம் ஓதிண்ணம் ஜாதிஆதி³ஸம்ஸாரப⁴யம் விஜினிஸ்ஸாமீ’’தி வட்டனிஸ்ஸரணத்த²ம் ஆக³தாய ஸத்³தா⁴ய வஸேன பப்³ப³ஜிதேன. ஆசாரகுலபுத்தோதி ஆசாரேன அபி⁴ஜாதோ. தேனாஹ ‘‘யதோ குதோசீ’’திஆதி³. ஜாதிகுலபுத்தோதி ஜாதிஸம்பத்தியா அபி⁴ஜாதோ. விஞ்ஞுப்பஸத்தா²னி அங்கா³னி ஸம்மாபதா⁴னியங்க³பா⁴வேன, காயே ச ஜீவிதே ச நிரபேக்க²பா⁴வேன வீரியம் ஆரப⁴ந்தஸ்ஸ ததா²பவத்தவீரியவஸேன ‘‘தசோ ஏகம் அங்க³’’ந்தி வுத்தம். ஏஸ நயோ ஸேஸேஸுபி. நவஸு டா²னேஸு ஸமாதா⁴தப்³ப³ந்தி ‘‘காலவஸேன பஞ்சஸு, இரியாபத²வஸேன சதூஸூ’’தி ஏவம் நவஸு டா²னேஸு வீரியம் ஸமாதா⁴தப்³ப³ம் பவத்தேதப்³ப³ம்.

ஸோ து³க்க²ம் விஹரதீதி குஸீதபுக்³க³லோ நிய்யானிகஸாஸனே வீரியாரம்ப⁴ஸ்ஸ அகரணேன ஸாமஞ்ஞத்த²ஸ்ஸ அனுப்பத்தியா து³க்க²ம் விஹரதி. ஸகம் வா அத்த²ம் ஸத³த்த²ம் க-காரஸ்ஸ த³-காரம் கத்வா. குஸீதஸ்ஸ அத்த²பரிஹாயனம் மூலதோ பட்டா²ய த³ஸ்ஸேதும் ‘‘ச² த்³வாரானீ’’திஆதி³ வுத்தம். நிஸஜ்ஜாவஸேன பீட²மத்³த³னதோ பீட²மத்³த³னோ, நிரஸ்ஸனவசனம் தஸ்ஸ, கஸ்ஸசிபத்த²ஸ்ஸ அதா⁴ரணதோ கேவலம் பீட²பா⁴ரபூ⁴தோதி அதி⁴ப்பாயோ. அஞ்ஞத்த² பன ‘‘மக²மத்³த³னோ’’தி வுச்சதி, தத்த² தா³னமிச்சா²ய பரேஸம் மக²ம் பஸ்ஸந்தோதி அத்தோ². லண்ட³பூரகோதி குச்சி²பூரம் பு⁴ஞ்ஜித்வா வச்சகுடிபூரகோ.

‘‘ஆரத்³த⁴வீரியோ’’திஆதீ³ஸு ‘‘குஸீதோ புக்³க³லோ’’தி ஏத்த² வுத்தவிபரியாயேன அத்தோ² வேதி³தப்³போ³, ஆஸீஸாய வஸேன தோ²மிதோ. ஆரத்³த⁴வீரியேதி பக்³க³ஹிதவீரியே. பஹிதத்தேதி நிப்³பா³னம் பதிபேஸிதசித்தே. ஏதேன ஸாவகானம் ஸம்மாபடிபத்திம் ஸத்து²வந்த³னானிஸம்ஸஞ்ச த³ஸ்ஸேஸி.

ஹீனேனாதி வட்டனிஸ்ஸிதேன த⁴ம்மேன. தேனாஹ ‘‘ஹீனாய ஸத்³தா⁴யா’’திஆதி³. அக்³கே³னாதி ஸேட்டே²ன விவட்டனிஸ்ஸிதேன த⁴ம்மேன, ஈஸகம்பி கதகாலுஸியவிக³தட்டே²ன மண்ட³ட்டே²ன ச பஸன்னம்பி ஸுராதி³ ந பாதப்³ப³ம். ஸாஸனந்தி பரியத்திபடிபத்திபடிவேத⁴லக்க²ணம் ஸாஸனம். பஸன்னம் விக³ததோ³ஸமலத்தா பஸாத³னியத்தா ச. பாதப்³ப³ஞ்ச பத்தேன விய ஸுகே²ன பரிபு⁴ஞ்ஜிதப்³ப³தோ து³ச்சரிதஸப்³ப³கிலேஸகஸாவமலபங்கதோ³ஸரஹிதத்தா ச.

மண்ட³பூ⁴தா போ³தி⁴பக்கி²யத⁴ம்மதே³ஸனாபி தே³ஸனாமண்டோ³. தஸ்ஸ ஏகஸ்ஸேவ பன தே³ஸனாமண்ட³ஸ்ஸ படிக்³கா³ஹகா ஸுப்படிபன்னா தோ³ஸரஹிதா சதஸ்ஸோ பரிஸா படிக்³க³ஹமண்டோ³. மக்³க³ப்³ரஹ்மசரியம் தக்³க³திகத்தா ஸகலோபி போ³தி⁴பக்கி²யத⁴ம்மராஸி ப்³ரஹ்மசரியமண்டோ³. தேனாஹ ‘‘கதமோ தே³ஸனாமண்டோ³’’திஆதி³. தத்த² விஞ்ஞாதாரோதி ஸச்சானம் அபி⁴ஸமேதாவினோ. ததா² ஹி ஆதி³தோ ‘‘சதுன்னம் அரியஸச்சானம் ஆசிக்க²ணா’’திஆதி³ வுத்தம். புப்³ப³பா⁴கே³ ‘‘அத்தி² அயம் லோகோ’’திஆதி³னா இத⁴லோகபரலோகக³தஸம்மோஸவிக³மேன பவத்தோ அதி⁴மோக்கோ²வ அதி⁴மோக்க²மண்டோ³. ச²ட்³டே³த்வா ஸமுச்சே²த³வஸேன விஜஹித்வா. சதுபூ⁴மகஸ்ஸ ஸத்³தி⁴ந்த்³ரியஸ்ஸ அதி⁴மோக்க²மண்டே³ன மண்ட³பூ⁴தம் அதி⁴மோக்க²ம். ஆதி³-ஸத்³தே³ன ‘‘பக்³க³ஹமண்டோ³ வீரியிந்த்³ரியம் கோஸஜ்ஜகஸட’’ந்திஆதி³ம் பாளிஸேஸம் ஸங்க³ண்ஹாதி. ஏத்தா²தி ஏதஸ்மிம் ஸாஸனே, ‘‘மண்ட³ஸ்மி’’ந்தி வா வசனே. காரணவசனம், தேன ‘‘ஸத்தா² ஸம்முகீ²பூ⁴தோ’’தி ஸம்முக²பா⁴வனாயோகோ³ நிராஸங்கப²லாவஹோதி த³ஸ்ஸேதி. தேனாஹ ‘‘அஸம்முகா²’’திஆதி³. பமாணந்தி அனுரூபம் பே⁴ஸஜ்ஜஸ்ஸ பமாணம். உக்³க³மனந்தி பே⁴ஸஜ்ஜஸ்ஸ வமனம் விரேசனம், தஸ்ஸ வா வஸேன தோ³ஸதா⁴தூனம் வமனம் விரேசனம். ஏவமேவாதி யதா² பே⁴ஸஜ்ஜமண்ட³ம் வேஜ்ஜஸம்முகா² நிராஸங்கா பிவந்தி, ஏவமேவ ‘‘ஸத்தா² ஸம்முகீ²பூ⁴தோ’’தி நிராஸங்கா வீரியம் கத்வா, மண்ட³பேய்ய ஸாஸனம் பிவதா²தி யோஜனா. அபி⁴ஞ்ஞாஸமாபத்திபடிலாபே⁴ன ஸானிஸம்ஸா. மக்³க³ப²லாதி⁴க³மனேன ஸவட்³டி⁴. பரத்த²ந்தி அத்தனோ தி³ட்டா²னுக³திஆபத்தியா, ததா² ஸம்மாபடிபஜ்ஜந்தானம் பரேஸம் அத்த²ந்தி ஏவமேத்த² அத்தோ² த³ட்ட²ப்³போ³.

து³தியத³ஸப³லஸுத்தவண்ணனா நிட்டி²தா.