3. உபனிஸஸுத்தவண்ணனா

23. ஜானதோ பஸ்ஸதோதி ஏத்த² த³ஸ்ஸனம் பஞ்ஞாசக்கு²னாவ த³ஸ்ஸனம் அதி⁴ப்பேதம், ந மம்ஸசக்கு²னாதி ஆஹ ‘‘த்³வேபி பதா³னி ஏகத்தா²னீ’’தி. ஏவம் ஸந்தேபீதி பத³த்³வயஸ்ஸ ஏகத்த²த்தேபி ஞாணலக்க²ணஞாணப்பபா⁴வவிஸயஸ்ஸ்ஸ ததா²த³ஸ்ஸனபா⁴வாவிரோத⁴னாதி அத்தோ². தேனாஹ ‘‘ஜானனலக்க²ணஞ்ஹி ஞாண’’ந்திஆதி³. ஞாணப்பபா⁴வந்தி ஞாணானுபா⁴வேன ஞாணகிச்சவிஸயோபா⁴ஸந்தி அத்தோ². தேனாஹ ‘‘ஞாணேன விவட்டே த⁴ம்மே பஸ்ஸதீ’’தி. ஜானதோ பஸ்ஸதோதி ச ஜானனத³ஸ்ஸனமுகே²ன புக்³க³லாதி⁴ட்டா²னா தே³ஸனா பவத்தாதி ஆஹ – ‘‘ஞாணலக்க²ணம் உபாதா³யா’’திஆதி³. ஜானதோதி வா புப்³ப³பா⁴க³ஞாணேன ஜானதோ, அபரபா⁴கே³ன ஞாணேன பஸ்ஸதோ. ஜானதோதி வா வத்வா ந ஜானனம் அனுஸ்ஸவாகாரபரிவிதக்கமத்தவஸேன இதா⁴தி⁴ப்பேதம், அத² கோ² ரூபானி விய சக்கு²விஞ்ஞாணேன ரூபாதீ³னி தேஸஞ்ச ஸமுத³யாதி³கே பச்சக்கே² கத்வா த³ஸ்ஸனந்தி விபா⁴வேதும் ‘‘பஸ்ஸதோ’’தி வுத்தந்தி ஏவம் வா ஏத்த² அத்தோ².

ஆஸவானம் க²யந்தி ஆஸவானம் அச்சந்தப்பஹானம். ஸோ பன தேஸம் அனுப்பாத³னிரோதோ⁴ ஸப்³பே³ன ஸப்³ப³ம் அபா⁴வோ ஏவாதி ஆஹ ‘‘அஸமுப்பாதோ³ கீ²ணாகாரோ நத்தி²பா⁴வோ’’தி. ஆஸவக்க²யஸத்³த³ஸ்ஸ கீ²ணாகாராதீ³ஸு ஆக³தட்டா²னம் த³ஸ்ஸேதும் ‘‘ஆஸவானம் க²யா’’திஆதி³ வுத்தம். உஜுமக்³கா³னுஸாரினோதி கிலேஸவங்ககாயவங்காதீ³னம் பஹானேன உஜுபூ⁴தே ஸவிபஸ்ஸனாஹேட்டி²மமக்³க³த⁴ம்மே அனுஸ்ஸரந்தஸ்ஸ. யதே³வ ஹிஸ்ஸ பரிக்கீ²ணம். க²யஸ்மிம் பட²மம் ஞாணம் ‘‘ததோ அஞ்ஞா அனந்தரா’’தி க²யஸங்கா²தே அக்³க³மக்³கே³ தப்பரியாபன்னமேவ ஞாணம் பட²மம் உப்பஜ்ஜதி, தத³னந்தரம் பன அஞ்ஞா அரஹத்தந்தி. யதி³பி கா³தா²ய ‘‘க²யஸ்மிம்’’இச்சேவ வுத்தம், ஸமுச்சே²த³வஸேன பன ‘‘ஆஸவே கீ²ணே மக்³கோ³ க²யோ’’தி வுச்சதீதி ஆஹ ‘‘மக்³கோ³ ஆஸவக்க²யோதி வுத்தோ’’தி. ஸமணோதி ஸமிதபாபோ அதி⁴ப்பேதோ, ஸோ பன கீ²ணாஸவோ ஹோதீதி. ‘‘ஆஸவானம் க²யா’’தி இத⁴ ப²லம், பரியாயேன பன ஆஸவக்க²யோ மக்³கோ³, தேன பத்தப்³ப³தோ ப²லம். ஏதேனேவ நிப்³பா³னஸ்ஸபி ஆஸவக்க²யபா⁴வோ வுத்தோதி வேதி³தப்³போ³.

ஜானதோ ஏவ பஸ்ஸதோ ஏவாதி ஏவமேத்த² நியமோ இச்சி²தோ, ந அஞ்ஞதா² விஸேஸாபா⁴வதோ அனிட்டா²பன்னோவாதி தஸ்ஸ நியமஸ்ஸ ப²லம் த³ஸ்ஸேதும் ‘‘நோ அஜானதோ நோ அபஸ்ஸதோ’’தி வுத்தந்தி ஆஹ ‘‘யோ பன ந ஜானாதி, ந பஸ்ஸதி, தஸ்ஸ நோ வதா³மீதி அத்தோ²’’தி. இமினா க²ந்தா⁴னம் பரிஞ்ஞா ஆஸவக்க²யஸ்ஸ ஏகந்திககாரணந்தி த³ஸ்ஸேதி. ஏதேனாதி ‘‘நோ அஜானதோ, நோ அபஸ்ஸதோ’’தி ஏதேன வசனேன. தே படிக்கி²த்தாதி கே பன தேதி? ‘‘பா³லே ச பண்டி³தே ச ஸந்தா⁴வித்வா ஸம்ஸரித்வா து³க்க²ஸ்ஸந்தம் கரிஸ்ஸந்தி (தீ³. நி. 1.168; ம. நி. 2.228) அஹேதூ அப்பச்சயா ஸத்தா விஸுஜ்ஜ²ந்தீ’’தி (தீ³. நி. 1.168; ம. நி. 2.101, 227) ஏவமாதி³வாதா³. தேஸு கேசி அபி⁴ஜாதிஸங்கந்திமத்தேன ஸம்ஸாரஸுத்³தி⁴ம் படிஜானந்தி, அஞ்ஞே இஸ்ஸரபஜாபதிகாரணாதி³வஸேன. தயித³ம் ஸப்³ப³ம் ஸம்ஸாராதீ³ஹீதி ஏத்தே²வ ஸங்க³ஹிதந்தி த³ட்ட²ப்³ப³ம். புரிமேன பத³த்³வயேனாதி ‘‘ஜானதோ பஸ்ஸதோ’’தி இமினா பத³த்³வயேன. உபாயோ வுத்தோ ‘‘ஆஸவக்க²யா’’தி அதி⁴காரதோ. இமினாதி ‘‘நோ அஜானதோ, நோ அபஸ்ஸதோ’’தி இமினா பத³த்³வயேன. அனுபாயோ ஹோதி ஏஸ ஆஸவானம் க²யஸ்ஸ, யதி³த³ம் பஞ்சன்னம் க²ந்தா⁴னம் அபரிஞ்ஞாதி ‘‘ஜானதோ பஸ்ஸதோ’’தி இமினாவ அனியமவசனேன அனுபாயபடிஸேதோ⁴பி அத்த²தோ போ³தி⁴தோ ஹோதீதி. தமேவ ஹி அத்த²தோ போ³தி⁴தபா⁴வம் விபா⁴வேதும் ஏவம் ஸம்வண்ணனா கதாதி த³ட்ட²ப்³ப³ம்.

த³ப்³ப³ஜாதிகோதி த³ப்³ப³ரூபோ. ஸோ ஹி ‘‘த்³ரப்³யோ’’தி வுச்சதி ‘‘த்³ரப்³யம் வினஸ்ஸதி நாத்³ரப்³ய’’ந்திஆதீ³ஸு. த³ப்³ப³ஜாதிகோ வா ஸாரஸபா⁴வோ, ஸாருப்பஸீலாசாரோதி அத்தோ². யதா²ஹ ‘‘ந கோ² த³ப்³ப³ த³ப்³பா³ ஏவம் நிப்³பே³டே²ந்தீ’’தி (பாரா. 384). வத்தஸீஸே ட²த்வாதி வத்தம் உத்தமம் து⁴ரம் கத்வா. யோ ஹி பரிஸுத்³தா⁴ஜீவோ காதும் அஜானந்தானம் ஸப்³ரஹ்மசாரீனம் அத்தனோ வா வஸ்ஸவாதாதி³படிபா³ஹனத்த²ம் ச²த்தாதீ³னி கரோதி, ஸோ வத்தஸீஸே ட²த்வா கரோதி நாம. பத³ட்டா²னம் ந ஹோதீதி ந வத்தப்³ப³ம் நாத²கரணத⁴ம்மபா⁴வேன மக்³க³ப²லாதி⁴க³மஸ்ஸ உபனிஸ்ஸயபா⁴வதோ. வுத்தஞ்ஹி ‘‘யானி தானி ஸப்³ரஹ்மசாரீனம் உச்சாவசானி கிச்சகரணீயானி, தத்த² த³க்கோ² ஹோதீ’’திஆதி³ (தீ³. நி. 3.345). ஏவம் ஜானதோதி ஏவம் வேஜ்ஜகம்மாதீ³னம் ஜானனஹேது மிச்சா²ஜீவபச்சயா காமாஸவாத³யோ ஆஸவா வட்³ட⁴ந்தியேவ, ந பஹீயந்தி. ‘‘ஏவம் கோ²…பே… ஆஸவானம் க²யோ ஹோதீ’’தி இமாய பாளியா அரஹத்தஸ்ஸேவ க³ஹணம் யுத்தம் ப²லக்³க³ஹணேன ஹேதுனோ அவுத்தஸித்³த⁴த்தா. தேனாஹ ‘‘ஆஸவானம் க²யந்தே ஜாதத்தா’’தி.

ஆக³மனம் ஆக³மோ, தம் ஆவஹதீதி ஆக³மனீயா, புப்³ப³பா⁴க³படிபதா³. க²யஸ்மிந்தி பா⁴வேனபா⁴வலக்க²ணே பு⁴ம்மம், க²யேதி பன விஸயே. தேனாஹ ‘‘ஆஸவக்க²யஸங்கா²தே’’தி. உபனிஸீத³தி ப²லம் ஏத்தா²தி காரணம் உபனிஸா. அரஹத்தப²லவிமுத்தி உக்கட்ட²னித்³தே³ஸதோ. ஸாதி விமுத்தி. அஸ்ஸாதி பச்சவேக்க²ணஞாணஸ்ஸ. மனஸ்மிம் விவட்டனிஸ்ஸிதே பன அனந்தரூபனிஸ்ஸயாபி பச்சயா ஸம்ப⁴வந்தீதி ‘‘லப்³ப⁴மானவஸேன பச்சயபா⁴வோ வேதி³தப்³போ³’’தி வுத்தம்.

விரஜ்ஜதி அஸேஸஸங்கா²ரதோ ஏதேனாதி விராகோ³, மக்³கோ³. நிப்³பி³ந்த³தி ஏதாயாதி நிப்³பி³தா³, ப³லவவிபஸ்ஸனா. தேனாஹ ‘‘ஏதேனா’’திஆதி³. படிஸங்கா²னுபஸ்ஸனாபி முச்சிதுகம்யதாபக்கி²கா ஏவாதி அதி⁴ப்பாயேன ‘‘சதுன்னம் ஞாணானம் அதி⁴வசன’’ந்தி வுத்தம். ‘‘யாவ மக்³கா³மக்³க³ஞாணத³ஸ்ஸனவிஸுத்³தி⁴, தாவ தருணவிபஸ்ஸனா’’தி ஹி வசனதோ உபக்கிலேஸவிமுத்தஉத³யப்³ப³யஞாணதோ பரம் ப³லவவிபஸ்ஸனா. ரூபாரூபத⁴ம்மானம் விஸேஸபூ⁴தோ ஸாமஞ்ஞபூ⁴தோ ச யோ யோ ஸபா⁴வோ யதா²ஸபா⁴வோ, தஸ்ஸ ஜானனம் யதா²ஸபா⁴வஜானனம். ததே³வ த³ஸ்ஸனம். பச்சக்க²கரணத்தே²ன ஞாதபரிஞ்ஞா தீரணபரிஞ்ஞா ச க³ஹிதா ஹோதி. தேனாஹ ‘‘தருணவிபஸ்ஸன’’ந்திஆதி³. ஸங்கா²ரபரிச்சே²தே³ஞாணந்தி நாமரூபபரிக்³க³ஹஞாணம் வத³தி. கங்கா²விதரணம் பச்சயபரிக்³க³ஹோ த⁴ம்மட்டி²திஞாணந்திபி வுச்சதி. நயவிபஸ்ஸனாதி³கம் அனுபஸ்ஸனாஞாணம் ஸம்மஸனம். மக்³கா³மக்³கே³ஞாணந்தி மக்³கா³மக்³க³ம் வவத்த²பேத்வா டி²தம் ஞாணம். ஸோ ஹி பாத³கஜ்ஜா²னஸமாதி⁴ தருணவிபஸ்ஸனாய பச்சயோ ஹோதி. ‘‘ஸமாஹிதோ யதா²பூ⁴தம் பஜானாதி பஸ்ஸதீ’’தி (ஸம். நி. 3.5.; 4.99; 5.1071) ஹி வுத்தம்.

புப்³ப³பா⁴க³ஸுக²ந்தி உபசாரஜ்ஜா²னஸஹிதஸுக²ம். த³ரத² படிப்பஸ்ஸத்³தீ⁴தி காமச்ச²ந்தா³தி³கிலேஸத³ரத²ஸ்ஸ படிபஸ்ஸம்ப⁴னம். ‘‘ஸுக²ம்பாஹம், பி⁴க்க²வே, ஸஉபனிஸம் வதா³மீ’’தி ஏத்த² அதி⁴ப்பேதஸுக²ம் த³ஸ்ஸேதும் ‘‘அப்பனாபுப்³ப³பா⁴க³ஸ்ஸ ஸுக²ஸ்ஸா’’தி வுத்தம். ‘‘பஸ்ஸத்³த⁴காயோ ஸுக²ம் வேதே³தீ’’தி (தீ³. நி. 1.466;3.359; அ.நி. 1.3.96) வுத்தஅப்பனாஸுக²ஸ்ஸ பஸ்ஸத்³தி⁴யா பச்சயத்தே வத்தப்³ப³மேவ நத்தி². ஸுக²ந்தி ஏத்தா²பி ஏஸேவ நயோ. ப³லவபீதீதி ப²ரணலக்க²ணப்பத்தா பீதி. தாதி³ஸா ஹி விதக்கவிசாரஸுக²ஸமாதீ⁴ஹி லத்³த⁴ப்பச்சயா நீவரணம் விக்க²ம்ப⁴ந்தீ தம்னிமித்தம் த³ரத²ம் பரிளாஹம் படிபஸ்ஸம்பே⁴தி. தேனாஹ ‘‘ஸா ஹி த³ரத²ப்பஸ்ஸத்³தி⁴யா பச்சயோ ஹோதீ’’தி. து³ப்³ப³லபீதீதி தருணபீதி. தேனாஹ ‘‘ஸா ஹி ப³லவபீதியா பச்சயோ ஹோதீ’’தி. ஸத்³தா⁴தி ரதனத்தயகு³ணானம் கம்மப²லஸ்ஸ ச ஸத்³த³ஹனவஸேன பவத்தோ அதி⁴மோக்கோ², ஸா பன யஸ்மா அத்தனோ விஸயே புனப்புனம் உப்பஜ்ஜதி, ந ஏகவாரமேவ, தஸ்மா ஆஹ ‘‘அபராபரம் உப்பஜ்ஜனஸத்³தா⁴’’தி. யஸ்மா ஸத்³த³ஹந்தோ ஸத்³தே⁴ய்யவத்து²ஸ்மிம் பமுதி³தோ ஹோதி, தஸ்மா ஆஹ ‘‘ஸா ஹி து³ப்³ப³லபீதியா பச்சயோ ஹோதீ’’தி. து³க்க²து³க்கா²தி³பே⁴த³ஸ்ஸ ஸப்³ப³ஸ்ஸபி து³க்க²ஸ்ஸ வட்டது³க்க²ந்தோக³த⁴த்தா தஸ்ஸ ச இதா⁴தி⁴ப்பேதத்தா வுத்தம் ‘‘து³க்க²ந்தி வட்டது³க்க²’’ந்தி. ஜராமரணது³க்க²ந்தி கேசி, ஸோகாத³யோ சாதி அபரே. தது³ப⁴யஸ்ஸபி ஸங்க³ண்ஹனதோ பட²மோ ஏவத்தோ² யுத்தோ. யஸ்மா து³க்க²ப்பத்தோ கம்மஸ்ஸ ப²லானி ஸத்³த³ஹதி, ரதனத்தயே ச பஸாத³ம் உப்பாதே³தி, தஸ்மா வுத்தம் ‘‘தஞ்ஹி அபராபரஸத்³தா⁴ய பச்சயோ ஹோதீ’’தி. யஸ்மா ‘‘ஆசரியானம் ஸந்திகே த⁴ம்மம் ஸுத்வா பவத்திது³க்க²’’ந்தி சிந்தயதோ ‘‘ஏகந்ததோ அயம் த⁴ம்மோ இமஸ்ஸ து³க்க²ஸ்ஸ ஸமதிக்கமாய ஹோதீ’’தி ஸத்³தா⁴ உப்பஜ்ஜதி. தேனாஹ ‘‘த⁴ம்மம் ஸுத்வா ததா²க³தே ஸத்³த⁴ம் படிலப⁴தீ’’திஆதி³ (தீ³. நி. 1.191). ஸவிகாராதி உப்பாத³விகாரேன ஸவிகாரா க²ந்த⁴ஜாதி ஜாயனட்டே²ன. ஜாதியா பன அஸதி தத்த² தத்த² ப⁴வே நத்தி² து³க்க²ஸ்ஸ ஸம்ப⁴வோதி ஆஹ ‘‘ஸா ஹி வட்டது³க்க²ஸ்ஸ பச்சயோ’’தி. கம்மப⁴வோதி கம்மப⁴வாதி³கோ திவிதோ⁴பி கம்மப⁴வோ. ஸோ ஹி உபபத்திப⁴வஸ்ஸ பச்சயோ. ஏவமாதி³ம் ஸந்தா⁴யாஹ ‘‘ஏதேனுபாயேனா’’தி. ஸேஸபதா³னீதி உபாதா³னாதி³பதா³னி. அனுலோமஞாணம் ஸங்கா²ருபேக்கா²பக்கி²கத்தா நிப்³பா³னக்³க³ஹணேன க³ஹிதம், கோ³த்ரபு⁴ஞாணம் பட²மமக்³க³ஸ்ஸ ஆவஜ்ஜனம். ஸோ ஹி தேன விபஸ்ஸனாய கிஞ்சி கிஞ்சி விஸேஸட்டா²னம் கயிரதீதி தம் அனாமஸித்வா நிப்³பி³தூ³பனிஸோ விராகோ³தி ‘‘விராகோ³’’இச்சேவ வுத்தம்.

கேன உத³கேன விதா³ரயித்வா க³தபதே³ஸோதி கத்வா கந்த³ரோ. நிதம்போ³திபி உத³கஸ்ஸ. யதா² நின்னம் உத³கம் பவத்ததி, ததா² நிவத்தனபா⁴வேன நதீ³குஞ்சோ²திபி வுச்சதி. ஹேமந்தகி³ம்ஹஉதுவஸேன அட்ட² மாஸே பவத்தோ பத²வீவிவரோதி கத்வா பத³ரோ. கு²த்³தி³கா உத³கவாஹினியோ ஸாகா² வியாதி ஸாகா², கு²த்³த³கா ஸோப்³பா⁴ குஸுப்³பா⁴ ஓ-காரஸ்ஸ உ-காரம் கத்வா. ஏவமேவ கோ²திஆதி³ ‘‘ஸேய்யதா²பி, பி⁴க்க²வே’’திஆதி³னா உபனீதாய உபமாய உபமேய்யேன ஸம்ஸந்த³னந்தி, தம் யோஜேத்வா த³ஸ்ஸேதும் ‘‘அவிஜ்ஜா பப்³ப³தோதி த³ட்ட²ப்³பா³’’திஆதி³ வுத்தம். தத்த² அவிஜ்ஜா ச ஸந்தானவஸேன சிரம்தனகாலப்பவத்தனதோ பசுரஜனேஹி து³ப்பஜஹனதோ ‘‘பப்³ப³தோ’’தி வுத்தா. லோகத்தயாபி⁴ப்³யாபனதோ அபி⁴ஸந்த³னதோ ச அபி⁴ஸங்கா²ரா மேக⁴ஸதி³ஸா. அபி⁴ஸங்கா²ரா மேகோ⁴தி த³ட்ட²ப்³பா³தி ஆனேத்வா ஸம்ப³ந்தோ⁴. ததா² ஸேஸபத³த்³வயேபி. விஞ்ஞாணாதி³வட்டம் அனுபவத்திதோ பரம்பரபச்சயதோ ச கந்த³ராதி³ஸதி³ஸா. விமுத்தி ஏகரஸத்தா, ஹானிவுத்³தி⁴அபா⁴வதோ ச ஸாக³ரஸதி³ஸாதி உபமாஸம்ஸந்த³னம்.

தத்த² யஸ்மா புரிமஸித்³தா⁴ய அவிஜ்ஜாய ஸதி அபி⁴ஸங்கா²ரா, நாஸதி, தஸ்மா தே உபரிபப்³ப³தே பவத்தா விய ஹோந்தீதி வுத்தம் ‘‘அவிஜ்ஜா…பே… வஸ்ஸனம் வேதி³தப்³ப³’’ந்தி. அஸ்ஸுதவா ஹீதிஆதி³ வுத்தஸ்ஸேவ அத்த²ஸ்ஸ ஸமத்த²னம். தண்ஹாய அபி⁴லாஸம் கத்வாதி ஏதேன ஸப்³ப³ஸ்ஸபி அபி⁴ஸங்கா²ரவுட்டி²தேமனத்த²ம் தீ³பேதி. தண்ஹா ஹி ‘‘ஸ்னேஹோ’’தி வுத்தா. அந்திமப⁴விகஸ்ஸ அந்தப⁴வனிப்³ப³த்தகோ அபி⁴ஸங்கா²ரோ நிப்³பா³னம் ந பத்தோ, தத³ந்தஸ்ஸ பா⁴க³ஸ்ஸ நிப்³பா³னம் ஆஹச்ச டி²தோ விய ஹோதீதி ‘‘மஹாஸமுத்³த³ம் ஆஹச்ச டி²தகாலோ வியா’’தி உபமானித³ஸ்ஸனம் கதம். விஞ்ஞாணாதி³வட்டம் பூரேத்வாபி இமினாபி ஹி அந்திமப⁴விகஸ்ஸேவ விஞ்ஞாணப்பவத்தி த³ஸ்ஸிதா. ஸா ஹி பூரிதாதி வத்தப்³பா³ ததோ பரம் விஞ்ஞாணாதி³வட்டஸ்ஸேவ அபா⁴வதோ. ஜாதஸ்ஸ புக்³க³லஸ்ஸ ஜாதிபச்சயவட்டது³க்க²வேத³னாய த⁴ம்மஸ்ஸவனம் இச்சி²தப்³ப³ம், தம் பன யதி³பி இமஸ்மிம் ஸுத்தே ந ஆக³தம், ஸுத்தந்தரேஸு பன ஆக³தமேவாதி ததோ ஆஹரித்வா தம் வத்தப்³ப³ந்தி த³ஸ்ஸேந்தோ ‘‘பு³த்³த⁴வசனம் பனா’’திஆதி³மாஹ. தயித³ம் ஸாவகபோ³தி⁴ஸத்தானம் வஸேனாயம் தே³ஸனாதி கத்வா வுத்தம். இதரேஸம் பன வஸேன வுச்சமானம் ஸுத்தந்தரக்³க³ஹணத்த²ம் பயோஜனம் நத்தீ²தி ‘‘யா ஹீ’’திஆதி³மாஹ. பாளியா வஸேன க³ஹிதமேவாதி ஸங்கே²பதோ வுத்தஅத்த²ஸ்ஸ வித்தா²ரதோ த³ஸ்ஸனம். நிப்³ப³த்தீதி நிப்³ப³த்தமானா க²ந்தா⁴ க³ஹிதாதி ஆஹ ‘‘ஸவிகாரா’’தி. அனிச்சதாலக்க²ணாதி³தீ³பனதோ லக்க²ணாஹடம். கம்மாகம்மந்தி வினிச்ச²யம். நிஜ்ஜடந்தி நிக்³கு³ம்ப³ம், ஸுத்³த⁴ந்தி அத்தோ². பத²வீகஸிணாதீ³ஸு கம்மம் ஆரப⁴தீதிஆதி³ பாளியம் ஸமத²புப்³ப³ங்க³மா விபஸ்ஸனா த³ஸ்ஸிதாதி கத்வா வுத்தம். ஏவஞ்ஹி பாமோஜ்ஜாதி³த³ஸ்ஸனம் ஸம்ப⁴வதீதி. தே³வஸ்ஸாதி மேக⁴ஸ்ஸ. கஸ்மா பனேத்த² ‘‘கீ²ணாஸவஸ்ஸ…பே… டி²தகாலோ வேதி³தப்³போ³’’தி வுத்தம், நனு புப்³பே³ தே³வட்டா²னியோ அபி⁴ஸங்கா²ரோ வுத்தோ, ந அபி⁴ஸங்கா²ரோ கீ²ணாஸவோதி? நாயம் தோ³ஸோ, காரணூபசாரேன ப²லஸ்ஸ வுத்தத்தா. அபி⁴ஸங்கா²ரமூலகோ ஹி க²ந்த⁴ஸந்தானோ க²ந்த⁴ஸந்தானே ச உச்சி²ன்னஸம்யோகே³ கீ²ணாஸவஸமஞ்ஞாதி.

உபனிஸஸுத்தவண்ணனா நிட்டி²தா.