9. பா³லபண்டி³தஸுத்தவண்ணனா

19. அவிஜ்ஜா நீவரணா ப⁴வாதி³-ஆதீ³னவஸ்ஸ நிவாரிதபடிச்சா²தி³கா ஏதஸ்ஸாதி அவிஜ்ஜானீவரணோ, அவிஜ்ஜாய நிவுதோதி ஆஹ ‘‘அவிஜ்ஜாய நிவாரிதஸ்ஸா’’தி. அயம் காயோதி பா³லஸ்ஸ அப்பஹீனகிலேஸஸ்ஸ பச்சுப்பன்னம் அத்தபா⁴வம் ரக்க²ம் கத்வா அவிஜ்ஜாய படிச்சா²தி³தாதீ³னவே அயாதா²வத³ஸ்ஸனவஸேன தண்ஹாய படிலத்³த⁴சித்தஸ்ஸ தம்தம்ப⁴வூபகா³ ஸங்கா²ரா ஸங்க²ரீயந்தி. தேஹி ச அத்தபா⁴வஸ்ஸ அபி⁴னிப்³ப³த்தி, தஸ்மா அயஞ்ச அவிஜ்ஜாய காயோ நிப்³ப³த்தோதி. அஸ்ஸாதி பா³லஸ்ஸ. அயம் அத்தோ²தி ‘‘அயம் காயோ நாமரூபந்தி ச வுத்தோ’’தி அத்தோ² தீ³பேதப்³போ³ உபாதா³னக்க²ந்த⁴ஸளாயதனஸங்க³ஹதோ தேஸம் த⁴ம்மானம். ஏவமேதம் த்³வயந்தி ஏவம் அவிஜ்ஜாய நிவாரிதத்தா, தண்ஹாய ச ஸம்யுத்தத்தா ஏவம் ஸபரஸந்தானக³தஸவிஞ்ஞாணககாயஸங்கா²தம் த்³வயம் ஹோதி. அஞ்ஞத்தா²தி ஸுத்தந்தரேஸு. ‘‘சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாணம், திண்ணம் ஸங்க³தி ப²ஸ்ஸோ’’திஆதி³னா (ம. நி. 1.204, 400; 3.421, 425-426; ஸம். நி. 2.43-45; 4.60-61; கதா². 465, 467) அஜ்ஜ²த்திகபா³ஹிராயதனானி பி⁴ந்தி³த்வா சக்கு²ரூபாதி³த்³வயானி படிச்ச சக்கு²ஸம்ப²ஸ்ஸாத³யோ வுத்தா, இத⁴ பன அபி⁴ந்தி³த்வா ச² அஜ்ஜ²த்திகபா³ஹிராயதனானி படிச்ச சக்கு²ஸம்ப²ஸ்ஸாத³யோ வுத்தா ‘‘த்³வயம் படிச்ச ப²ஸ்ஸோ’’தி, தஸ்மா மஹாத்³வயம் நாம கிரேதம் அனவஸேஸதோ அஜ்ஜ²த்திகபா³ஹிராயதனானம் க³ஹிதத்தா. அஜ்ஜ²த்திகபா³ஹிரானி ஆயதனானீதி ஏத்தா²பி ஹி ஸளாயதனானி ஸங்க³ஹிதானேவ. ப²ஸ்ஸகாரணானீதி ப²ஸ்ஸபவத்தியா பச்சயானி. யேஹீதி ஹேதுத³ஸ்ஸனமத்தந்தி ஆஹ ‘‘யேஹி காரணபூ⁴தேஹீ’’தி. ப²ஸ்ஸோ ஏவ பு²ஸனகிச்சோ, ந ப²ஸ்ஸாயதனானீதி வுத்தம் ‘‘ப²ஸ்ஸேன பு²ட்டோ²’’தி. பரிபுண்ணவஸேனாதி அவேகல்லவஸேன. அபரிபுண்ணாயதனானம் ஹீனானி ப²ஸ்ஸஸ்ஸ காரணானி ஹோந்தி, தேஸம் வியாதி ‘‘ஏதேஸம் வா அஞ்ஞதரேனா’’தி வுத்தம். காயனிப்³ப³த்தனாதி³ம்ஹீதி ஸவிஞ்ஞாணகஸ்ஸ காயஸ்ஸ நிப்³ப³த்தனம் காயனிப்³ப³த்தனம், காயோ வா நிப்³ப³த்ததி ஏதேனாதி காயனிப்³ப³த்தனம், கிலேஸாபி⁴ஸங்கா²ரா. ஆதி³ஸத்³தே³ன ப²ஸ்ஸஸளாயதனாதி³ஸங்க³ஹோ. அதி⁴கம் பயஸதி பயுஞ்ஜதி ஏதேனாதி அதி⁴ப்பயாஸோ, விஸேஸகாரணந்தி ஆஹ ‘‘அதி⁴கபயோகோ³’’தி.

ப⁴க³வா அம்ஹாகம் உப்பாத³கபா⁴வேன மூலபா⁴வேன ப⁴க³வம்மூலகா. இமே த⁴ம்மாதி இமே காரணத⁴ம்மா. யேஹி மயம் பா³லபண்டி³தானம் ஸமானேபி காயனிப்³ப³த்தனாதி³ம்ஹி விஸேஸம் ஜானேய்யாம, தேனாஹ ‘‘புப்³பே³ கஸ்ஸபஸம்மாஸம்பு³த்³தே⁴ன உப்பாதி³தா’’திஆதி³. ஆஜானாமாதி அபி⁴முக²ம் பச்சக்க²தோ ஜானாம. படிவிஜ்ஜா²மாதி தஸ்ஸேவ வேவசனம், அதி⁴க³ச்சா²மாதி அத்தோ². நேதாதி அம்ஹாகம் ஸந்தானே பாபேதா. வினேதாதி யதா² அலமரியஞாணத³ஸ்ஸனவிஸேஸோ ஹோதி, ஏவம் விஸேஸதோ நேதா, தத³ங்க³வினயாதி³வஸேன வா வினேதா. அனுனேதாதி அனுரூபம் நேதா. அந்தரந்தரா யதா²த⁴ம்மபஞ்ஞத்தியா பஞ்ஞாபிதானம் த⁴ம்மானம் அனுரூபதோ த³ஸ்ஸனம் ஹோதீதி ஆஹ ‘‘யதா²ஸபா⁴வதோ …பே… த³ஸ்ஸேதா’’தி. ஆபாத²ம் உபக³ச்ச²ந்தானம் ப⁴க³வா படிஸரணம் ஸமோஸரணட்டா²னந்தி ப⁴க³வம்படிஸரணா த⁴ம்மா. தேனாஹ ‘‘சதுபூ⁴மகத⁴ம்மா’’திஆதி³. படிஸரதி படிவிஜ்ஜ²தீதி படிஸரணம், தஸ்மா படிவிஜ்ஜ²னவஸேன ப⁴க³வா படிஸரணம் ஏதேஸந்தி ப⁴க³வம்படிஸரணா. தேனாஹ ‘‘அபி சா’’திஆதி³. ப²ஸ்ஸோ ஆக³ச்ச²தீதி படிவிஜ்ஜ²னகவஸேன ப²ஸ்ஸோ ஞாணஸ்ஸ ஆபாத²ம் ஆக³ச்ச²தி, ஆபாத²ம் ஆக³ச்ச²ந்தோயேவ ஸோ அத்த²தோ ‘‘அஹம் கின்னாமோ’’தி நாமம் புச்ச²ந்தோ விய, ப⁴க³வா சஸ்ஸ நாமம் கரோந்தோ விய ஹோதீதி வுத்தம் ‘‘அஹம் ப⁴க³வா’’திஆதி³. உபட்டா²தூதி ஞாணஸ்ஸ பச்சுபட்டா²து. ப⁴க³வந்தம்யேவ படிபா⁴தூதி ப⁴க³வதோ ஏவ பா⁴கோ³ ஹோது, ப⁴க³வாவ நம் அத்தனோ பா⁴க³ம் கத்வா விஸ்ஸஜ்ஜேதூதி அத்தோ², ப⁴க³வதோ பா⁴கோ³ யதி³த³ம் த⁴ம்மஸ்ஸ அக்கா²னம், அம்ஹாகம் பன ஸவனம் பா⁴கோ³தி அயமேத்த² அதி⁴ப்பாயோ. ஏவஞ்ஹி ஸத்³த³லக்க²ணேன ஸமேதி. கேசி பன படிபா⁴தூதி அத்த²ம் வத³ந்தி ஞாணேன தி³ஸ்ஸது தே³ஸீயதூதி வா அத்தோ². தேனாஹ ‘‘தும்ஹேயேவ நோ கதே²த்வா தே³தா²தி அத்தோ²’’தி.

பா³லஸ்ஸ பண்டி³தஸ்ஸ ச காயஸ்ஸ நிப்³ப³த்தியா பச்சயபூ⁴தா அவிஜ்ஜா ச தண்ஹா ச. தேனாஹ ‘‘கம்மம்…பே… நிருத்³தா⁴’’தி. ஜவாபேத்வாதி க³ஹிதஜவனம் கத்வா, யதா² படிஸந்தி⁴ம் ஆகட்³டி⁴தும் ஸமத்த²ம் ஹோதி, ஏவம் கத்வா. யதி³ நிருத்³தா⁴, கத²ம் அப்பஹீனாதி வுத்தந்தி ஆஹ ‘‘யதா² பனா’’திஆதி³. ப⁴வதி ஹி தம்ஸதி³ஸேபி தப்³போ³ஹாரோ யதா² ‘‘ஸா ஏவ தித்திரீ, தானேவ ஓஸதா⁴னி, தஸ்ஸேவ கம்மஸ்ஸ விபாகாவஸேஸேனா’’தி ச. து³க்க²க்க²யாயாதி தத³த்த²விஸேஸனத்த²ந்தி ஆஹ ‘‘க²யத்தா²யா’’தி. படிஸந்தி⁴காயந்தி படிஸந்தி⁴க³ஹணபுப்³ப³கம் காயம். பாளியம் ‘‘பா³லேனா’’தி கரணவசனம் நிஸ்ஸக்கேதி ஆஹ ‘‘பா³லதோ’’தி. பா⁴வினா ஸஹ படிஸந்தி⁴னா ஸப்படிஸந்தி⁴கோ. யோ பன ஏகந்ததோ தேனத்தபா⁴வேன அரஹத்தம் பத்தும் ப⁴ப்³போ³, ஸோ பா⁴வினா படிஸந்தி⁴னா ‘‘அப்படிஸந்தி⁴கோ’’தி, ததோ விஸேஸனத்த²ம் ‘‘ஸப்படிஸந்தி⁴கோ’’தி வுத்தம். கிஞ்சாபி வுத்தம், ஸோ ச யாவ அரியபூ⁴மிம் ந ஓக்கமதி, தாவ பா³லத⁴ம்மஸமங்கீ³ ஏவாதி கத்வா ‘‘ஸப்³போ³பி புது²ஜ்ஜனோ பா³லோ’’தி வுத்தம். ததா² ஹி ‘‘அப்படிஸந்தி⁴கோ கீ²ணாஸவோ பண்டி³தோ’’தி கீ²ணாஸவ-ஸத்³தே³ன அப்படிஸந்தி⁴கோ விஸேஸிதோ. யதி³ ஏவம் ஸேக்கா² கத²ந்தி ஆஹ ‘‘ஸோதாபன்னா’’திஆதி³. தே ஹி ஸிகா²பத்தபண்டி³ச்சபா⁴வலக்க²ணாபா⁴வதோ பண்டி³தாதி ந வத்தப்³பா³ கீ²ணாஸவா விய, ப³லவதரானம் பன பா³லத⁴ம்மானம் பஹீனத்தா பா³லாதிபி ந வத்தப்³பா³ புது²ஜ்ஜனா விய. ப⁴ஜியமானா பன சதுஸச்சஸம்படிவேத⁴ம் உபாதா³ய பண்டி³தபக்க²ம் ப⁴ஜந்தி, ந பா³லபக்க²ம் வுத்தகாரணேனாதி.

பா³லபண்டி³தஸுத்தவண்ணனா நிட்டி²தா.