2. ஆஹாரவக்³கோ³

1. ஆஹாரஸுத்தவண்ணனா

11. ஆஹரந்தீதி ஆனேந்தி உப்பாதே³ந்தி, உபத்த²ம்பே⁴ந்தீதி அத்தோ². நிப்³ப³த்தாதி பஸுதா. பூ⁴தா நாம யஸ்மா ததோ பட்டா²ய லோகே ஜாதவோஹாரோ படிஸந்தி⁴க்³க³ஹணதோ பன பட்டா²ய யாவ மாதுகுச்சி²தோ நிக்க²ந்தோ, தாவ ஸம்ப⁴வேஸினோ, ஏஸ தாவ க³ப்³ப⁴ஸேய்யகேஸு பூ⁴தஸம்ப⁴வேஸிவிபா⁴கோ³, இதரேஸு பன பட²மசித்தாதி³வஸேன வுத்தோ. ஸம்ப⁴வ-ஸத்³தோ³ சேத்த² க³ப்³ப⁴ஸேய்யகானம் வஸேன பஸூதிபரியாயோ, இதரேஸம் வஸேன உப்பத்திபரியாயோ. பட²மசித்தபட²மஇரியாபத²க்க²ணேஸு ஹி தே ஸம்ப⁴வம் உப்பத்திம் ஏஸந்தி உபக³ச்ச²ந்தி நாம, ந தாவ பூ⁴தா உபபத்தியா ந ஸுப்பதிட்டி²தத்தா, பூ⁴தா ஏவ ஸப்³ப³ஸோ ப⁴வேஸனாய ஸமுச்சி²ன்னத்தா. ந புன ப⁴விஸ்ஸந்தீதி அவதா⁴ரணேன நிவத்திதமத்த²ம் த³ஸ்ஸேதி. யோ ச ‘‘காலக⁴ஸோ பூ⁴தோ’’திஆதீ³ஸு பூ⁴த-ஸத்³த³ஸ்ஸ கீ²ணாஸவவாசிதா த³ட்ட²ப்³பா³. வா-ஸத்³தோ³ சேத்த² ஸம்பிண்ட³னத்தோ² ‘‘அக்³கி³னா வா உத³கேன வா’’திஆதீ³ஸு விய.

யதா²ஸகம் பச்சயபா⁴வேன அத்தபா⁴வஸ்ஸ பட²பனமேவேத்த² ஆஹாரேஹி காதப்³ப³அனுக்³க³ஹோ ஹோதீதி அதி⁴ப்பாயேனாஹ ‘‘வசனபே⁴தோ³…பே… ஏகோ யேவா’’தி. ஸத்தஸ்ஸ உப்பன்னத⁴ம்மானந்தி ஸத்தஸ்ஸ ஸந்தானே உப்பன்னத⁴ம்மானம். யதா² ‘‘வஸ்ஸஸதம் திட்ட²தீ’’தி வுத்தே அனுப்பப³ந்த⁴வஸேன பவத்ததீதி வுத்தம் ஹோதி, ஏவம் டி²தியாதி அனுப்பப³ந்த⁴வஸேன பவத்தியாதி அத்தோ², ஸா பன அவிச்சே²தோ³தி ஆஹ ‘‘அவிச்சே²தா³யா’’தி. அனுப்பப³ந்த⁴த⁴ம்முப்பத்தியா ஸத்தஸந்தானோ அனுக்³க³ஹிதோ நாம ஹோதீதி ஆஹ ‘‘அனுப்பன்னானம் உப்பாதா³யா’’தி. ஏதானீதி டி²திஅனுக்³க³ஹபதா³னி. உப⁴யத்த² த³ட்ட²ப்³பா³னி ந யதா²ஸம்ப³ந்த⁴தோ.

வத்து²க³தா ஓஜா வத்து² விய தேன ஸத்³தி⁴ம் அஜ்ஜோ²ஹரிதப்³ப³தம் க³ச்ச²தீதி வுத்தம் ‘‘அஜ்ஜோ²ஹரிதப்³ப³கோ ஆஹாரோ’’தி, நிப்³ப³த்திதஓஜம் பன ஸந்தா⁴ய ‘‘கப³ளீகாரோ ஆஹாரோ ஓஜட்ட²மகரூபானி ஆஹரதீ’’தி வக்க²தி. ஓளாரிகதா அப்போஜதாய ந வத்து²னோ தூ²லதாய கதி²னதாய வா, தஸ்மா யஸ்மிம் வத்து²ஸ்மிம் பரித்தா ஓஜா ஹோதி, தம் ஓளாரிகம். ஸப்பாத³யோ து³க்கு²ப்பாத³கதாய ஓளாரிகா வேதி³தப்³பா³. விஸாணாதீ³னம் திவஸ்ஸச²ட்³டி³தானம் பூதிபூ⁴தத்தா முது³கதாதி வத³ந்தி. தரச்ச²கே²ளதேமிததாய பன ததா²பூ⁴தானம் தேஸம் முது³கதா. த⁴ம்மஸபா⁴வோ ஹேஸ. ஸஸானம் ஆஹாரோ ஸுகு²மோ தருணதிணஸஸ்ஸகா²த³னதோ. ஸகுணானம் ஆஹாரோ ஸுகு²மோ திணபீ³ஜாதி³கா²த³னதோ. பச்சந்தவாஸீனம் ஆஹாரோ ஸுகு²மோ மாஸமுக்³க³குராதி³போ⁴ஜனத்தா. தேஸந்தி பரனிம்மிதவஸவத்தீனம். ஸுகு²மோத்வேவாதி ந கிஞ்சி உபாதா³ய, அத² கோ² ஸுகு²மோஇச்சேவ நிட்ட²ம் பத்தோ ததோ பரமஸுகு²மஸ்ஸ அபா⁴வதோ.

வத்து²வஸேன பனேத்த² ஆஹாரஸ்ஸ ஓளாரிகஸுகு²மதா வுத்தா, ஸா சஸ்ஸ அப்போஜமஹோஜதாஹி வேதி³தப்³பா³தி த³ஸ்ஸேதும் ‘‘ஏத்த² சா’’திஆதி³மாஹ. பரிஸ்ஸயந்தி கு²தா³வஸேன உப்பன்னம் விஹிம்ஸம் ஸரீரத³ரத²ம். வினோதே³தீதி வத்து² தஸ்ஸ வினோத³னமத்தம் கரோதி. ந பன ஸக்கோதி பாலேதுந்தி ஸரீரம் யாபேதும் நப்பஹோதி நிரோஜத்தா. ந ஸக்கோதி பரிஸ்ஸயம் வினோதே³தும் ஆமாஸயஸ்ஸ அபூரணதோ.

ச²ப்³பி³தோ⁴பீதி இமினா கஸ்ஸசி ப²ஸ்ஸஸ்ஸ அனவஸேஸிதப்³ப³தமாஹ. தே³ஸனக்கமேனேவேத்த² ப²ஸ்ஸாதீ³னம் து³தியாதி³தா, ந அஞ்ஞேன காரணேனாதி ஆஹ ‘‘தே³ஸனானயோ ஏவ சேஸா’’திஆதி³. மனஸோ ஸஞ்சேதனா ந ஸத்தஸ்ஸாதி த³ஸ்ஸனத்த²ம் மனோக³ஹணம் யதா² ‘‘சித்தஸ்ஸ டி²தி, சேதோவிமுத்தி சா’’தி ஆஹ ‘‘மனோஸஞ்சேதனாதி சேதனாவா’’தி. சித்தந்தி யம் கிஞ்சி சித்தமேவ. ஏகராஸிம் கத்வாதி ஏகஜ்ஜ²ம் க³ஹேத்வா விபா⁴க³ம் அகத்வா, ஸாமஞ்ஞேன க³ஹிதாதி அத்தோ². தத்த² லப்³ப⁴மானம் உபாதி³ண்ணகாதி³விபா⁴க³ம் த³ஸ்ஸேதும் ‘‘கப³ளீகாரோ ஆஹாரோ’’திஆதி³ வுத்தம். ஆஹாரத்த²ம் ந ஸாதே⁴ந்தீதி தாதி³ஸஸ்ஸ ஆஹாரஸ்ஸ அனாஹரணதோ. ததா³பீதி பி⁴ஜ்ஜித்வா விக³தகாலேபி. உபாதி³ண்ணகாஹாரோதி வுச்சந்தீதி கேசி. இத³ம் பன ஆசரியானம் ந ருச்சதி ததா³ உபாதி³ண்ணகரூபஸ்ஸேவ அபா⁴வதோ. படிஸந்தி⁴சித்தேனேவ ஸஹஜாதாதி லக்க²ணவசனமேதம், ஸப்³பா³யபி கம்மஜரூபபரியாபன்னாய ஓஜாய அத்தி²பா⁴வஸ்ஸ அவிச்சே²த³ப்பவத்திஸம்ப⁴வத³ஸ்ஸனத்தோ². ஸத்தமாதி உப்பன்னதி³வஸதோ பட்டா²ய யாவ ஸத்தமதி³வஸாபி. ரூபஸந்ததிம் பாலேதி பவேணிக⁴டனவஸேன. அயமேவாதி கம்மஜஓஜா. கம்மஜஓஜம் பன படிச்ச உப்பன்னஓஜா அகம்மஜத்தா அனுபாதி³ண்ணஆஹாரோத்வேவ வேதி³தப்³போ³. அனுபாதி³ண்ணகா ப²ஸ்ஸாத³யோ வேதி³தப்³பா³தி ஆனேத்வா ஸம்ப³ந்தோ⁴. லோகுத்தரா ப²ஸ்ஸாத³யோ கத²ந்தி ஆஹ ‘‘லோகுத்தரா பன ருள்ஹீவஸேன கதி²தா’’தி. யஸ்மா தேஸம் குஸலானம் உபேதபரியாயோ நத்தி², தஸ்மா விபாகானம் உபாதி³ண்ணபரியாயோ நத்தே²வாதி அனுபாதி³ண்ணபரியாயோபி ருள்ஹீவஸேன வுத்தோதி வேதி³தப்³போ³.

புப்³பே³ ‘‘ஆஹாராதி பச்சயா’’தி வுத்தத்தா யதி³ பச்சயட்டோ² ஆஹாரட்டோ²திஆதி³னா சோதே³தி, அத² கஸ்மா இமே ஏவ சத்தாரோ வுத்தாதி அத² கஸ்மா சத்தாரோவ வுத்தா. இமே ஏவ ச வுத்தாதி யோஜனா. விஸேஸப்பச்சயத்தாதி ஏதேன யதா² அஞ்ஞே பச்சயத⁴ம்மா அத்தனோ பச்சயுப்பன்னஸ்ஸ பச்சயாவ ஹோந்தி, இமே பன ததா² ச ஹோதி அஞ்ஞதா² சாதி ஸமானேபி பச்சயத்தே அதிரேகபச்சயா ஹோந்தி, தஸ்மா ‘‘ஆஹாராதி வுத்தா’’தி இமமத்த²ம் த³ஸ்ஸேதி. இதா³னி தம் அதிரேகபச்சயதம் த³ஸ்ஸேதும் ‘‘விஸேஸபச்சயோ ஹீ’’திஆதி³ வுத்தம். விஸேஸப்பச்சயோ ரூபகாயஸ்ஸ கப³ளீகாரோ ஆஹாரோ உபத²ம்ப⁴கபா⁴வதோ. தேனாஹ அட்ட²கதா²யம் ‘‘ரூபாரூபானம் உபத²ம்ப⁴கத்தேன உபகாரகா சத்தாரோ ஆஹாரா ஆஹாரபச்சயோ’’தி (விஸுத்³தி⁴. 2.608; பட்டா². அட்ட². பச்சயுத்³தே³ஸவண்ணனா). உபத²ம்ப⁴கத்தஞ்ஹி ஸதீபி ஜனகத்தே அரூபீனம் ஆஹாரானம் ஆஹாரஜரூபஸமுட்டா²னகரூபாஹாரஸ்ஸ ச ஹோதி, அஸதி பன உபத²ம்ப⁴கத்தே ஆஹாரானம் ஜனகத்தம் நத்தீ²தி உபத²ம்ப⁴கத்தம் பதா⁴னம். ஜனயமானோபி ஹி ஆஹாரோ அவிச்சே²த³வஸேன உபத²ம்ப⁴யமானோ ஏவ ஜனேதீதி உபத²ம்ப⁴கபா⁴வோ ஏவ ஆஹாரபா⁴வோ. வேத³னாய ப²ஸ்ஸோ விஸேஸபச்சயோ. ‘‘ப²ஸ்ஸபச்சயா வேத³னா’’தி ஹி வுத்தம். ‘‘ஸங்கா²ரபச்சயா விஞ்ஞாண’’ந்தி வசனதோ விஞ்ஞாணஸ்ஸ மனோஸஞ்சேதனா. ‘‘சேதனா திவித⁴ம் ப⁴வம் ஜனேதீ’’தி ஹி வுத்தம். ‘‘விஞ்ஞாணபச்சயா நாமரூப’’ந்தி பன வசனதோ நாமரூபஸ்ஸ விஞ்ஞாணம் விஸேஸபச்சயோ. ந ஹி ஓக்கந்தவிஞ்ஞாணாபா⁴வே நாமரூபஸ்ஸ அத்தி² ஸம்ப⁴வோ. யதா²ஹ ‘‘விஞ்ஞாணஞ்ச ஹி, ஆனந்த³, மாதுகுச்சி²ஸ்மிம் ந ஓக்கமிஸ்ஸத², அபி நு கோ² நாமரூபம் மாதுகுச்சி²ஸ்மிம் ஸமுச்சிஸ்ஸதா²’’திஆதி³ (தீ³. நி. 2.115). வுத்தமேவத்த²ம் ஸுத்தேன ஸாதே⁴தும் ‘‘யதா²ஹா’’திஆதி³ வுத்தம்.

ஏவம் யதி³பி பச்சயத்தோ² ஆஹாரத்தோ², விஸேஸபச்சயத்தா பன இமேவ ஆஹாராதி வுத்தாதி தம் நேஸம் விஸேஸபச்சயதம் அவிபா⁴க³தோ த³ஸ்ஸேத்வா இதா³னி விபா⁴க³தோ த³ஸ்ஸேதும் ‘‘கோ பனேத்தா²’’திஆதி³ ஆரத்³த⁴ம். முகே² ட²பிதமத்தோ ஏவ அஸங்கா²தி³தோ, தத்தகேனாபி அப்³ப⁴ந்தரஸ்ஸ ஆஹாரஸ்ஸ பச்சயோ ஹோதி ஏவ. தேனாஹ ‘‘அட்ட² ரூபானி ஸமுட்டா²பேதீ’’தி. ஸுக²வேத³னாய ஹிதோ ஸுக²வேத³னீயோ. ஸப்³ப³தா²பீதி சக்கு²ஸம்ப²ஸ்ஸாதி³வஸேன. யத்தகா ப²ஸ்ஸஸ்ஸ பகாரபே⁴தா³, தேஸம் வஸேன ஸப்³ப³ப்பகாரோபி ப²ஸ்ஸாஹாரோ யதா²ரஹம் திஸ்ஸோ வேத³னா ஆஹரதி, அனாஹாரகோ நத்தி².

ஸப்³ப³தா²பீதி இதா⁴பி ப²ஸ்ஸாஹாரே வுத்தனயானுஸாரேன அத்தோ² வேதி³தப்³போ³. திஸந்ததிவஸேனாதி காயத³ஸகம் பா⁴வத³ஸகம் வத்து²த³ஸகந்தி திவித⁴ஸந்ததிவஸேன. ஸஹஜாதாதி³பச்சயனயேனாதி ஸஹஜாதாதி³பச்சயவிதி⁴னா. படிஸந்தி⁴விஞ்ஞாணஞ்ஹி அத்தனா ஸஹஜாதனாமஸ்ஸ ஸஹஜாதஅஞ்ஞமஞ்ஞவிபாகிந்த்³ரியஸம்பயுத்தஅத்தி²அவிக³தபச்சயேஹி பச்சயோ ஹோந்தோயேவ ஆஹாரபச்சயதாய தம் ஆஹாரேதி வுத்தம், ஸஹஜாதரூபேஸு பன வத்து²னோ ஸம்பயுத்தபச்சயம் ட²பேத்வா விப்பயுத்தபச்சயேன, ஸேஸரூபானம் அஞ்ஞமஞ்ஞபச்சயஞ்ச ட²பேத்வா இதரேஸம் பச்சயானம் வஸேன யோஜனா காதப்³பா³. தானீதி நபும்ஸகனித்³தே³ஸோ அனபும்ஸகானம்பி நபும்ஸகேஹி ஸஹ வசனதோ. ஸாஸவகுஸலாகுஸலசேதனாவ வுத்தா விஸேஸபச்சயபா⁴வத³ஸ்ஸனம் ஹேதந்தி, தேனாஹ ‘‘அவிஸேஸேன பனா’’திஆதி³. படிஸந்தி⁴விஞ்ஞாணமேவ வுத்தந்தி ஏத்தா²பி ஏஸேவ நயோ. யதா² தஸ்ஸ தஸ்ஸ ப²லஸ்ஸ விஸேஸதோ பச்சயதாய ஏதேஸம் ஆஹாரத்தோ², ஏவம் அவிஸேஸதோபீதி த³ஸ்ஸேதும் ‘‘அவிஸேஸேனா’’திஆதி³ வுத்தம். தத்த² தம்ஸம்பயுத்ததம்ஸமுட்டா²னத⁴ம்மானந்தி தேஹி ப²ஸ்ஸாதீ³ஹி ஸம்பயுத்தத⁴ம்மானஞ்சேவ தம்ஸமுட்டா²னரூபத⁴ம்மானஞ்ச. தத்த² ஸம்பயுத்தக்³க³ஹணம் யதா²ரஹதோ த³ட்ட²ப்³ப³ம், ஸமுட்டா²னக்³க³ஹணம் பன அவிஸேஸதோ.

உபத்த²ம்பே⁴ந்தோ ஆஹாரகிச்சம் ஸாதே⁴தீதி உபத்த²ம்பே⁴ந்தோ ஏவ ரூபம் ஸமுட்டா²பேதி, ஓஜட்ட²மகஸமுட்டா²பனேனேவ பனஸ்ஸ உபத²ம்ப⁴னகிச்சஸித்³தி⁴. பு²ஸந்தோயேவாதி பு²ஸனகிச்சம் கரோந்தோ ஏவ. ஆயூஹமானாவாதி சேதயமானா ஏவ அபி⁴ஸந்த³ஹந்தீ ஏவ. விஜானந்தமேவாதி உபபத்திபரிகப்பனவஸேன விஜானந்தமேவ ஆஹாரகிச்சம் ஸாதே⁴தீதி யோஜனா. ஸப்³ப³த்த² ஆஹாரகிச்சஸாத⁴னஞ்ச தேஸம் வேத³னாதி³உப்பத்திஹேதுதாய அத்தபா⁴வஸ்ஸ பவத்தனமேவ. காயட்ட²பனேனாதி கஸ்மா வுத்தம், நனு கம்மஜாதி³ரூபம் கம்மாதி³னாவ பவத்ததீதி சோத³னம் ஸந்தா⁴யாஹ ‘‘கம்மஜனிதோபீ’’திஆதி³.

உபாதி³ண்ணரூபஸந்ததியா உபத்த²ம்ப⁴னேனேவ உதுசித்தஜரூபஸந்ததீனம்பி உபத்த²ம்ப⁴னஸித்³தி⁴ ஹோதீதி ‘‘த்³வின்னம் ரூபஸந்ததீன’’ந்தி வுத்தம். உபத்த²ம்ப⁴னமேவ ஸந்தா⁴ய ‘‘அனுபாலகோ ஹுத்வா’’தி ச வுத்தம். ரூபகாயஸ்ஸ டி²திஹேதுதா ஹி யாபனா அனுபாலனா. ஸுகா²தி³வத்து²பூ⁴தந்தி ஸுகா²தீ³னம் பவத்திட்டா²னபூ⁴தம். ஆரம்மணம்பி ஹி வஸதி ஏத்த² ஆரம்மணகரணவஸேன ததா³ரம்மணா த⁴ம்மாதி வத்தூ²தி வுச்சதி. பு²ஸந்தோயேவாதி இத³ம் ப²ஸ்ஸஸ்ஸ பு²ஸனஸபா⁴வத்தா வுத்தம். ந ஹி த⁴ம்மானம் ஸபா⁴வேன வினா பவத்தி அத்தி², வேத³னாபவத்தியா வினா ஸத்தானம் ஸந்தா⁴வனதா நத்தீ²தி ஆஹ ‘‘ஸுகா²தி³…பே… ஹோதீ’’தி. ந சேத்த² ஸஞ்ஞீப⁴வகதா²யம் அஸஞ்ஞீப⁴வோ த³ஸ்ஸேதப்³போ³, தஸ்ஸாபி வா காரணபூ⁴தவேத³னாபவத்திவஸேனேவ டி²தியா ஹேதுனோ அப்³யாபிதத்தா, ததா² ஹி ‘‘மனோஸஞ்சேதனா…பே… ப⁴வமூலனிப்பா²த³னதோ ஸத்தானம் டி²தியா ஹோதீ’’தி வுத்தா. ததோ ஏவ விஞ்ஞாணம் விஜானந்தமேவாதி உபபத்திபரிகப்பனவஸேன விஜானந்தமேவாதி வுத்தோவாயமத்தோ².

சத்தாரி ப⁴யானி த³ட்ட²ப்³பா³னி ஆதீ³னவவிபா⁴வனதோ. நிகந்தீதி நிகாமனா, ரஸதண்ஹம் ஸந்தா⁴ய வத³தி. ஸா ஹி கப³ளீகாரே ஆஹாரே ப³லவதீ, தேனேவேத்த² அவதா⁴ரணம் கதம். பா⁴யதி ஏதஸ்மாதி ப⁴யம், நிகந்தியேவ ப⁴யம் மஹானத்த²ஹேதுதோ. உபக³மனம் விஸயிந்த்³ரியவிஞ்ஞாணேஸு விஸயவிஞ்ஞாணேஸு ச ஸங்க³திவஸேன பவத்தி, தம் வேத³னாதி³உப்பத்திஹேதுதாய ‘‘ப⁴ய’’ந்தி வுத்தம். அவதா⁴ரணே பயோஜனம் வுத்தனயமேவ. ஸேஸத்³வயேபி ஏஸேவ நயோ. ஆயூஹனம் அபி⁴ஸந்த³ஹனம், ஸம்விதா⁴னந்திபி வத³ந்தி. தம் ப⁴வூபபத்திஹேதுதாய ‘‘ப⁴ய’’ந்தி வுத்தம். அபி⁴னிபாதோ தத்த² தத்த² ப⁴வே படிஸந்தி⁴க்³க³ஹணவஸேன விஞ்ஞாணஸ்ஸ நிப்³ப³த்தி. ஸோ ப⁴வூபபத்திஹேதுகானம் ஸப்³பே³ஸம் அனத்தா²னம் மூலகாரணதாய ‘‘ப⁴ய’’ந்தி வுத்தம். இதா³னி நிகந்திஆதீ³னம் ஸப்படிப⁴யதம் வித்தா²ரதோ த³ஸ்ஸேதும் ‘‘கிம் காரணா’’திஆதி³ ஆரத்³த⁴ம். தத்த² நிகந்திம் கத்வாதி ஆலயம் ஜனேத்வா, தண்ஹம் உப்பாதே³த்வாதி அத்தோ². ஸீதாதீ³னம் புரக்க²தாதி ஸீதாதீ³னம் புரதோ டி²தா, ஸீதாதீ³ஹி பா³தி⁴யமானாதி அத்தோ².

ப²ஸ்ஸம் உபக³ச்ச²ந்தாதி சக்கு²ஸம்ப²ஸ்ஸாதி³பே⁴த³ம் ப²ஸ்ஸம் பவத்தேந்தா. ப²ஸ்ஸஸ்ஸாதி³னோதி காயஸம்ப²ஸ்ஸவஸேன போ²ட்ட²ப்³ப³ஸங்கா²தஸ்ஸ அஸ்ஸாத³னஸீலா. காயஸம்ப²ஸ்ஸவஸேன ஹி ஸத்தானம் போ²ட்ட²ப்³ப³தண்ஹா பவத்ததீதி த³ஸ்ஸேதும் ப²ஸ்ஸாஹாராதீ³னவத³ஸ்ஸனே போ²ட்ட²ப்³பா³ரம்மணம் உத்³த⁴டம் ‘‘பரேஸம் ரக்கி²தகோ³பிதேஸூ’’திஆதி³னா. ப²ஸ்ஸஸ்ஸாதி³னோதி வா ப²ஸ்ஸாஹாரஸ்ஸாதி³னோதி அத்தோ². ஸதி ஹி ப²ஸ்ஸாஹாரே ஸத்தானம் ப²ஸ்ஸாரம்மணே அஸ்ஸாதோ³, நாஸதி, தேனாஹ ‘‘ப²ஸ்ஸஸ்ஸாத³மூலக’’ந்திஆதி³.

ஜாதினிமித்தஸ்ஸ ப⁴யஸ்ஸ அபி⁴னிபாதஸபா⁴வேன க³ஹிதத்தா ‘‘தம்மூலக’’ந்தி வுத்தம். கம்மாயூஹனனிமித்தந்தி அத்தோ². ப⁴யம் ஸப்³ப³ந்தி பஞ்சவீஸதி, திவித⁴மஹாப⁴யம், அஞ்ஞஞ்ச ஸப்³ப³ப⁴யம் ஆக³தமேவ ஹோதி ப⁴யாதி⁴ட்டா²னஸ்ஸ அத்தபா⁴வஸ்ஸ நிப்பா²த³னதோ.

அபி⁴னிபததீதி அபி⁴னிப்³ப³த்ததி. பட²மாபி⁴னிப்³ப³த்தி ஹி ஸத்தானம் தத்த² தத்த² அங்கா³ரகாஸுஸதி³ஸே ப⁴வே அபி⁴னிபாதஸதி³ஸீ. தம்மூலகத்தாதி நாமரூபனிப்³ப³த்திமூலகத்தா. ஸப்³ப³ப⁴யானம் அபி⁴னிபாதோயேவ ப⁴யம் பா⁴யதி ஏதஸ்மாதி கத்வா.

அப்பேதி வியாதி ப²லஸ்ஸ அத்தலாப⁴ஹேதுபா⁴வதோ காரணம், தம் நிய்யாதே³தி விய. தந்தி ப²லம். ததோதி காரணதோ. ஏதேஸந்தி ஆஹாரானம். யதா²வுத்தேனாதி ‘‘ப²லம் நிதே³தீ’’திஆதி³னா வுத்தப்பகாரேன அத்தே²ன. ஸப்³ப³பதே³ஸூதி ‘‘வேத³னானிரோதே⁴னா’’திஆதீ³ஸு ஸப்³பே³ஸு பதே³ஸு.

படிஸந்தி⁴ம் ஆதி³ம் கத்வாதி படிஸந்தி⁴க்க²ணம் ஆதி³ம் கத்வா. உபாதி³ண்ணகஆஹாரே ஸந்தா⁴ய ‘‘அத்தபா⁴வஸங்கா²தானம் ஆஹாரான’’ந்தி வுத்தம். தே ஹி நிப்பரியாயதோ தண்ஹானிதா³னா. பரிபுண்ணாயதனானம் ஸத்தானம் ஸத்தஸந்ததிவஸேனாதி பரிபுண்ணாயதனானம் ஸபா⁴வகானம் சக்கு² ஸோதம் கா⁴னம் ஜிவ்ஹா காயோ பா⁴வோ வத்தூ²தி இமேஸம் ஸத்தன்னம் ஸந்ததீனம் வஸேன. ஸேஸானம் அபரிபுண்ணாயதனானம் அந்த⁴ப³தி⁴ரஅபா⁴வகானம். ஊனஊனஸந்ததிவஸேனாதி சக்கு²னா, ஸோதேன, தது³ப⁴யேன, பா⁴வேன ச ஊனஊனஸந்ததிவஸேன. படிஸந்தி⁴யம் ஜாதா படிஸந்தி⁴கா. பட²மப⁴வங்க³சித்தக்க²ணாதீ³தி ஆதி³-ஸத்³தே³ன ததா³ரம்மணசித்தஸ்ஸ ஸங்க³ஹோ த³ட்ட²ப்³போ³.

தண்ஹாயபி நிதா³னம் ஜானாதீதி யோஜனா. தண்ஹானிதா³னந்திபி பாடோ². வட்டம் த³ஸ்ஸேத்வாதி ஸரூபதோ நயதோ ச ஸகலமேவ வட்டம் த³ஸ்ஸேத்வா. இதா³னி தமத்த²ம் வித்தா²ரதோ விபா⁴வேதும் ‘‘இமஸ்மிஞ்ச பன டா²னே’’திஆதி³மாஹ. அதீதாபி⁴முக²ம் தே³ஸனம் கத்வாதி பச்சுப்பன்னப⁴வதோ பட்டா²ய அதீதத⁴ம்மாபி⁴முக²ம் தப்³பி³ஸயம் தே³ஸனம் கத்வா ததா²காரணேன. அதீதேன வட்டம் த³ஸ்ஸேதீதி அதீதப⁴வேன கம்மகிலேஸவிபாகவட்டம் த³ஸ்ஸேதி. அத்தபா⁴வோதி பச்சுப்பன்னோ அத்தபா⁴வோ. யதி³ ஏவம் கஸ்மா ‘‘அதீதேன வட்டம் த³ஸ்ஸேதீ’’தி வுத்தந்தி? நாயம் தோ³ஸோ ‘‘அதீதேனேவா’’தி அனவதா⁴ரணதோ, ஏவஞ்ச கத்வா அதீதாபி⁴முக²க்³க³ஹணம் ஜனககம்மம் க³ஹிதம், தண்ஹாஸீஸேன நானந்தரியபா⁴வதோ. ந ஹி கம்முனா வினா தண்ஹா ப⁴வனேத்தி யுஜ்ஜதி.

தம் கம்மந்தி தண்ஹாஸீஸேன வுத்தகம்மம். த³ஸ்ஸேதுந்தி தம் அதீதம் அத்தபா⁴வம் த³ஸ்ஸேதும். தஸ்ஸத்தபா⁴வஸ்ஸ ஜனகம் கம்மந்தி தஸ்ஸ யதா²வுத்தஸ்ஸ அத்தபா⁴வஸ்ஸ ஜனகம். ததோ பரம்பி அத்தபா⁴வம் ஆயூஹிதம் கம்மம் த³ஸ்ஸேதும் வுத்தம். அவிஜ்ஜா ச நாம தண்ஹா விய கம்மத்தாதி கம்மஸ்ஸேவ க³ஹணம். த்³வீஸு டா²னேஸூதி ஆஹாரக்³க³ஹணேன வேத³னாதி³க்³க³ஹணேனாதி த்³வீஸு டா²னேஸு. அத்தபா⁴வோதி பச்சுப்பன்னகாலிகோ அதீதகாலிகோ ச அத்தபா⁴வோ. புன த்³வீஸூதி தண்ஹாக்³க³ஹணே அவிஜ்ஜாஸங்கா²ரக்³க³ஹணேதி த்³வீஸு டா²னேஸு. தஸ்ஸ ஜனகந்தி பச்சுப்பன்னஸ்ஸ சேவ அதீதஸ்ஸ ச அத்தபா⁴வஸ்ஸ ஜனகம் கம்மம் வுத்தந்தி யோஜனா. கம்மக்³க³ஹணேன சேத்த² யத்த² தம் கம்மம் ஆயூஹிதம், ஸா அதீதா ஜாதி அத்த²தோ த³ஸ்ஸிதா ஹோதி. தேன ஸம்ஸாரவட்டஸ்ஸ அனமதக்³க³தம் தீ³பேதி. ஸங்கே²பேனாதி ஸங்கே²பேன ஹேதுபஞ்சகப²லபஞ்சகக்³க³ஹணம்பி ஹி ஸங்கே²போ ஏவ ஹேதுப²லபா⁴வேன ஸங்க³ஹேதப்³ப³த⁴ம்மானம் அனேகவித⁴த்தா.

யதி³ அதீதேன வட்டம் த³ஸ்ஸிதம், ஏவம் ஸதி ஸப்பதே³ஸா படிச்சஸமுப்பாத³த⁴ம்மதே³ஸனா ஹோதீதி த³ஸ்ஸேந்தோ ‘‘தத்ராய’’ந்திஆதி³மாஹ. தேன ஹி யதி³பி ஸரூபதோ அனாக³தேன வட்டம் இத⁴ ந த³ஸ்ஸிதம், நயதோ பன தஸ்ஸபி த³ஸ்ஸிதத்தா நிப்பதே³ஸா ஏவ படிச்சஸமுப்பாத³தே³ஸனாதி த³ஸ்ஸேதி. இதா³னி தமத்த²ம் உபமாய விபா⁴வேதும் ‘‘யதா² ஹீ’’திஆதி³ வுத்தம். உத³கபிட்டே² நிபன்னந்தி உத³கம் பரிப்லவவஸேன நிபன்னம். பரபா⁴க³ந்தி பரஉத்தமங்க³பா⁴க³ம். ஓரதோதி ததோ அபரபா⁴க³தோ ஓலோகேந்தோ. அபரிபுண்ணோதி விகலாவயவோ. ஏவம்ஸம்பத³ந்திஆதி³ உபமாய ஸம்ஸந்த³னம்.

யதா² ஹி கீ³வா ஸரீரஸந்தா⁴ரககண்ட³ரானம் மூலட்டா²னபூ⁴தா, ஏவம் அத்தபா⁴வஸந்தா⁴ரகானம் ஸங்கா²ரானம் மூலபூ⁴தா தண்ஹாதி வுத்தம் ‘‘கீ³வாய தி³ட்ட²காலோ’’தி. யதா² வேத³னாதி³அனேகாவயவஸமுதா³யபூ⁴தோ அத்தபா⁴வோ, ஏவம் பா²ஸுகபிட்டி²கண்ட³காதி³அனேகாவயவஸமுதா³யபூ⁴தா பிட்டீ²தி ‘‘பிட்டி²யா…பே… தஸ்ஸ தி³ட்ட²காலோ’’தி வுத்தம். தண்ஹாஸங்கா²தந்தி தண்ஹாய கதி²தம். இத⁴ தே³ஸனாய பச்சயா அவிஜ்ஜாஸங்கா²ரா வேதி³தப்³பா³தி ‘‘நங்கு³ட்ட²மூலஸ்ஸ தி³ட்ட²காலோ வியா’’தி வுத்தம். ததா² ஹி பரியோஸானே ‘‘நங்கு³ட்ட²மூலம் பஸ்ஸேய்யா’’தி உபமாத³ஸ்ஸனம் கதம். நயதோ பரிபுண்ணபா⁴வக்³க³ஹணம் வேதி³தப்³ப³ம். பாளியம் அனாக³தஸ்ஸாபி பச்சயவட்டஸ்ஸ ஹேதுவஸேன ப²லவஸேன வா பரிபுண்ணபா⁴வஸ்ஸ முக²மத்தத³ஸ்ஸனீயத்தா ஆதி³தோ ப²லஹேதுஸந்தி⁴, மஜ்ஜே² ஹேதுப²லஸந்தி⁴, அந்தேபி ப²லஹேதுஸந்தீ⁴தி ஏவம் திஸந்தி⁴கத்தா சதுஸங்கே²பமேவ வட்டம் த³ஸ்ஸிதந்தி.

ஆஹாரஸுத்தவண்ணனா நிட்டி²தா.

2. மோளியப²க்³கு³னஸுத்தவண்ணனா

12. இமஸ்மிம்யேவ டா²னேதி ‘‘சத்தாரோமே பி⁴க்கு²…பே… ஆஹாரா’’தி ஏவம் சத்தாரோ ஆஹாரே ஸரூபதோ த³ஸ்ஸேத்வா ‘‘இமே கோ² பி⁴க்க²வே…பே… அனுக்³க³ஹாயா’’தி நிக³மனவஸேன த³ஸ்ஸிதே இமஸ்மிம்யேவ டா²னே. தே³ஸனம் நிட்டா²பேஸி சதுஆஹாரவிபா⁴க³தீ³பகம் தே³ஸனம் உத்³தே³ஸவஸேனேவ நிட்டா²பேஸி, உபரி ஆவஜ்ஜேத்வா துண்ஹீ நிஸீதி³. தி³ட்டி²க³திகோதி அத்ததி³ட்டி²வஸேன தி³ட்டி²க³திகோ. வரக³ந்த⁴வாஸிதந்தி ஸபா⁴வஸித்³தே⁴ன சந்த³னக³ந்தே⁴ன சேவ தத³ஞ்ஞனானாக³ந்தே⁴ன ச பரிபா⁴விதத்தா வரக³ந்த⁴வாஸிதம். ரதனசங்கோடவரேனாதி ரதனமயேன உத்தமசங்கோடகேன. தே³ஸனானுஸந்தி⁴ம் க⁴டேந்தோதி யதா²தே³ஸிதாய தே³ஸனாய அனுஸந்தி⁴ம் க⁴டேந்தோ, யதா² உபரிதே³ஸனா வத்³தே⁴ய்ய, ஏவம் உஸ்ஸாஹம் கரோந்தோ. விஞ்ஞாணாஹாரம் ஆஹாரேதீதி தஸ்ஸ ஆஹாரணகிரியாய வுத்தபுச்சா²ய தம் தி³ட்டி²க³தம் உப்பாடேந்தோ ‘‘யோ ஏதம்…பே… பு⁴ஞ்ஜதி வா’’தி ஆஹ.

விஞ்ஞாணாஹாரே நாம இச்சி²தே தஸ்ஸ உபபு⁴ஞ்ஜகேனபி ப⁴விதப்³ப³ம், ஸோ ‘‘கோ நு கோ²’’தி அயம் புச்சா²ய அதி⁴ப்பாயோ. உதுஸமயேதி க³ப்³ப⁴வுட்டா²னஸமயே. ஸோ ஹி உதுஸமயஸ்ஸ மத்தகஸமயத்தா ததா² வுத்தோ. ‘‘உத³கேன அண்டா³னி மா நஸ்ஸந்தூ’’தி மஹாஸமுத்³த³தோ நிக்க²மித்வா. கி³ஜ்ஜ²போதகா விய ஆஹாரஸஞ்சேதனாய தானி கச்ச²பண்டா³னி மனோஸஞ்சேதனாஹாரேன யாபேந்தீதி அயம் தஸ்ஸ தே²ரஸ்ஸ லத்³தி⁴. கிஞ்சாபி அயம் லத்³தீ⁴தி ப²ஸ்ஸமனோஸஞ்சேதனாஹாரேஸு கிஞ்சாபி தே²ரஸ்ஸ யுத்தா அயுத்தா வா அயம் லத்³தி⁴. இமம் பஞ்ஹந்தி ‘‘கோ நு கோ², ப⁴ந்தே, விஞ்ஞாணாஹாரம் ஆஹாரேதீ’’தி இமம் பஞ்ஹம் ஏதாய யதா²வுத்தாய லத்³தி⁴யா ந பன புச்ச²தி, அத² கோ² ஸத்துபலத்³தி⁴யா புச்ச²தீதி அதி⁴ப்பாயோ. ஸோதி தி³ட்டி²க³திகோ. ந நிக்³க³ஹேதப்³போ³ உம்மத்தகஸதி³ஸத்தா அதி⁴ப்பாயம் அஜானித்வா புச்சா²ய கதத்தா. தேனாஹ ‘‘ஆஹாரேதீதி நாஹம் வதா³மீ’’திஆதி³.

தஸ்மிம் மயா ஏவம் வுத்தேதி தஸ்மிம் வசனே மயா ‘‘ஆஹாரேதீ’’தி ஏவம் வுத்தே ஸதி. அயம் பஞ்ஹோதி ‘‘கோ நு கோ², ப⁴ந்தே, விஞ்ஞாணாஹாரம் ஆஹாரேதீ’’தி அயம் பஞ்ஹோ யுத்தோ ப⁴வேய்ய. ஏவம் புச்சி²தே பஞ்ஹேதி ஸத்துபலத்³தி⁴ம் அனாதா³ய ‘‘கதமஸ்ஸ த⁴ம்மஸ்ஸ பச்சயோ’’தி ஏவம் த⁴ம்மபவத்தவஸேனேவ பஞ்ஹே புச்சி²தே. தேனேவ விஞ்ஞாணேனாதி தேனேவ படிஸந்தி⁴விஞ்ஞாணேன ஸஹ உப்பன்னம் நாமஞ்ச ரூபஞ்ச அதீதப⁴வே தி³ட்டி²க³திகஸ்ஸ வஸேன ஆயதிம் புனப்³ப⁴வாபி⁴னிப்³ப³த்தீதி இதா⁴தி⁴ப்பேதம். நாமரூபே ஜாதே ஸதீதி நாமரூபே நிப்³ப³த்தே தப்பச்சயபூ⁴தம் பி⁴ந்தி³த்வா ஸளாயதனம் ஹோதி.

தத்ராயம் பச்சயவிபா⁴கோ³ – நாமந்தி வேத³னாதி³க²ந்த⁴த்தயம் இதா⁴தி⁴ப்பேதம், ரூபம் பன ஸத்தஸந்ததிபரியாபன்னம், நியமதோ சத்தாரி பூ⁴தானி ச² வத்தூ²னி ஜீவிதிந்த்³ரியம் ஆஹாரோ ச. தத்த² விபாகனாமம் படிஸந்தி⁴க்க²ணே ஹத³யவத்து²னோ ஸஹாயோ ஹுத்வா ச²ட்ட²ஸ்ஸ மனாயதனஸ்ஸ ஸஹஜாதஅஞ்ஞமஞ்ஞனிஸ்ஸயஸம்பயுத்தவிபாகஅத்தி²அவிக³தபச்சயேஹி ஸத்ததா⁴ பச்சயோ ஹோதி. கிஞ்சி பனேத்த² ஹேதுபச்சயேன கிஞ்சி ஆஹாரபச்சயேனாதி ஏவம் உக்கம்ஸாவகம்ஸோ வேதி³தப்³போ³. இதரேஸம் பன பஞ்சாயதனானம் சதுன்னம் மஹாபூ⁴தானம் ஸஹாயோ ஹுத்வா ஸஹஜாதனிஸ்ஸயவிபாகவிப்பயுத்தஅத்தி²அவிக³தவஸேன ச²தா⁴ பச்சயோ ஹோதி. கிஞ்சி பனேத்த² ஹேதுபச்சயேன கிஞ்சி ஆஹாரபச்சயேனாதி ஸப்³ப³ம் புரிமஸதி³ஸம். பவத்தே விபாகனாமம் விபாகஸ்ஸ ச²ட்டா²யதனஸ்ஸ வுத்தனயேன ஸத்ததா⁴ பச்சயோ ஹோதி, அவிபாகம் பன அவிபாகஸ்ஸ ச²ட்ட²ஸ்ஸ ததோ விபாகபச்சயம் அபனேத்வா பச்சயோ ஹோதி. சக்கா²யதனாதீ³னம் பன பச்சுப்பன்னம் சக்கு²பஸாதா³தி³வத்து²கம்பி இதரம்பி விபாகனாமம் பச்சா²ஜாதவிப்பயுத்தஅத்தி²அவிக³தபச்சயேஹி சதுதா⁴ பச்சயோ ஹோதி, ததா² அவிபாகம்பி வேதி³தப்³ப³ம். ரூபதோ பன வத்து²ரூபம் படிஸந்தி⁴யம் ச²ட்ட²ஸ்ஸ ஸஹஜாதஅஞ்ஞமஞ்ஞனிஸ்ஸயவிப்பயுத்தஅத்தி²அவிக³தபச்சயேஹி ச²தா⁴ பச்சயோ ஹோதி. சத்தாரி பன பூ⁴தானி சக்கா²யதனாதீ³னம் பஞ்சன்னம் ஸஹஜாதனிஸ்ஸயஅத்தி²அவிக³தபச்சயேஹி சதுதா⁴ பச்சயோ ஹோதி. ரூபஜீவிதம் அத்தி²அவிக³திந்த்³ரியவஸேன திதா⁴ பச்சயோ ஹோதீதி அயஞ்ஹேத்த² ஸங்கே²போ, வித்தா²ரோ பன விஸுத்³தி⁴மக்³க³தோ (விஸுத்³தி⁴. 2.594) க³ஹேதப்³போ³.

பஞ்ஹஸ்ஸ ஓகாஸம் தே³ந்தோதி ‘‘கோ நு கோ², ப⁴ந்தே, பு²ஸதீ’’தி இமஸ்ஸ தி³ட்டி²க³திகபஞ்ஹஸ்ஸ ஓகாஸம் தே³ந்தோ. ததோ விவேசேதுகாமோதி அதி⁴ப்பாயோ. ஸப்³ப³பதே³ஸூதி தி³ட்டி²க³திகேன ப⁴க³வதா ச வுத்தபதே³ஸு. ஸத்தோதி அத்தா. ஸோ பன உச்சே²த³வாதி³னோபி யாவ ந உச்சி²ஜ்ஜதி, தாவ அத்தே²வாதி லத்³தி⁴, பகே³வ ஸஸ்ஸதவாதி³னோ. பூ⁴தோதி விஜ்ஜமானோ. நிப்ப²த்தோதி நிப்ப²ன்னோ. ந தஸ்ஸ தா³னி நிப்பா²தே³தப்³ப³ம் கிஞ்சி அத்தீ²தி லத்³தி⁴. இத³ப்பச்சயா இத³ந்தி இமஸ்மா விஞ்ஞாணாஹாரபச்சயா இத³ம் நாமரூபம். புன இத³ப்பச்சயா இத³ந்தி இமஸ்மா நாமரூபபச்சயா இத³ம் ஸளாயதனந்தி ஏவம் ப³ஹூஸு டா²னேஸு ப⁴க³வதா கதி²தத்தா யதா² பச்சயதோ நிப்³ப³த்தம் ஸங்கா²ரமத்தமித³ந்தி ஸஞ்ஞத்திம் உபக³தோ. தேனாபீதி ஸஞ்ஞத்துபக³தேனாபி. ஏகாப³த்³த⁴ம் கத்வாதி யதா² புச்சா²ய அவஸரோ ந ஹோதி, ததா² ஏகாப³த்³த⁴ம் கத்வா. தே³ஸனாருள்ஹந்தி யதோ ஸளாயதனபத³தோ பட்டா²ய ‘‘ஸளாயதனபச்சயா ப²ஸ்ஸோ’’திஆதி³னா தே³ஸனா படிச்சஸமுப்பாத³வீதி²ம் ஆருள்ஹமேவ. தமேவாதி ஸளாயதனபத³மேவ க³ஹேத்வா. விவஜ்ஜேந்தோதி விவட்டேந்தோ. ஏவமாஹாதி ‘‘ச²ன்னம்த்வேவா’’திஆதி³ஆகாரேன ஏவம் தே³ஸிதே, ‘‘வினேய்யஜனோ படிவிஜ்ஜ²தீ’’தி ஏவமாஹ. விஞ்ஞாணாஹாரோ ஆயதிம் புனப்³ப⁴வாபி⁴னிப்³ப³த்தியாதி ஏவம் புரிமப⁴வதோ ஆயதிப⁴வஸ்ஸ பச்சயவஸேன மூலகாரணவஸேன ச தே³ஸிதத்தா ‘‘விஞ்ஞாணனாமரூபானம் அந்தரே ஏகோ ஸந்தீ⁴’’தி வுத்தம். தத³மினா விஞ்ஞாணக்³க³ஹணேன அபி⁴ஸங்கா²ரவிஞ்ஞாணஸ்ஸாபி க³ஹணம் கதந்தி த³ட்ட²ப்³ப³ம்.

மோளியப²க்³கு³னஸுத்தவண்ணனா நிட்டி²தா.

3. ஸமணப்³ராஹ்மணஸுத்தவண்ணனா

13. யே பச்சயஸமவாயே தேனத்தபா⁴வேன ஸச்சானி படிவிஜ்ஜி²தும் ஸமத்தா², தே பா³ஹிரகலிங்கே³ டி²தாபி தேனேவ தத்த² ஸமத்த²தாயோகே³ன பா⁴வினம் ஸமிதபா³ஹிதபாபதம் அபேக்கி²த்வா ஸமணஸம்மதாயேவ ப்³ராஹ்மணஸம்மதாயேவாதி தே நிவத்தேதும் ‘‘ஸச்சானி படிவிஜ்ஜி²தும் அஸமத்தா²’’தி வுத்தம். து³க்க²ஸச்சவஸேனாதி து³க்க²அரியஸச்சவஸேன. அஞ்ஞதா² கத²ம் பா³ஹிரகாபி ஜராமரணம் து³க்க²ந்தி ந ஜானந்தி. ஸச்சதே³ஸனாபா⁴வதோ ‘‘ஸஹ தண்ஹாயா’’தி வுத்தந்தி கேசி. தம் ந ஸுட்டு². யஸ்மா தத்த² தத்த² ப⁴வே பட²மாபி⁴னிப்³ப³த்தி, இத⁴ ஜாதீதி அதி⁴ப்பேதா, ஸா ச தண்ஹா ஏவ ஸந்தானேன, தண்ஹேவ ஸா ஜாதி. ஜராமரணஞ்சேத்த² பாகடமேவ அதி⁴ப்பேதம், ந க²ணிகம், தஸ்மா ஸதண்ஹா ஏவ ஜாதிஜராமரணஸ்ஸ ஸமுத³யோதி பூ⁴தகத²னமேதம் த³ட்ட²ப்³ப³ம். ஸமுத³யஸச்சவஸேன ந ஜானந்தீதி யோஜனா. ஏஸ நயோ ஸேஸபதே³ஸுபி. ஸப்³ப³பதே³ஸூதி யத்த² தண்ஹா விஸேஸனபா⁴வேன வத்தப்³பா³, தேஸு ஸப்³ப³பதே³ஸு. யேன ஸமன்னாக³தத்தா புக்³க³லோ பரமத்த²தோ ஸமணோ ப்³ராஹ்மணோதி வுச்சதி, தம் ஸாமஞ்ஞம் ப்³ரஹ்மஞ்ஞஞ்சாதி ஆஹ ‘‘அரிய…பே… ப்³ரஹ்மஞ்ஞஞ்சா’’தி. யேன ஹி பவத்தினிமித்தேன ஸமண-ஸத்³தோ³ ப்³ராஹ்மண-ஸத்³தோ³ ச ஸகே அத்தே² நிருள்ஹோ, தஸ்ஸ வஸேன அபி⁴ன்னோபி வேனேய்யஜ்ஜா²ஸயதோ த்³விதா⁴ கத்வா வத்தும் அரஹதீதி வுத்தம் ‘‘உப⁴யத்தா²பீ’’தி. ஏகாத³ஸஸு டா²னேஸு சத்தாரி ஸச்சானி கதே²ஸி அவிஜ்ஜாஸமுத³யஸ்ஸ அனுத்³த⁴டத்தா.

ஸமணப்³ராஹ்மணஸுத்தவண்ணனா நிட்டி²தா.

4. து³தியஸமணப்³ராஹ்மணஸுத்தவண்ணனா

14. இமே த⁴ம்மே கதமே த⁴ம்மேதி ச ஏத்த² இதி-ஸத்³தோ³ ஆதி³அத்தோ². தேன ‘‘இமேஸம் த⁴ம்மானம் கதமேஸம் த⁴ம்மான’’ந்தி இமேஸம் பதா³னம் ஸங்க³ஹோ. ஏதானி ஹி பதா³னி ஜராமரணாதீ³னம் ஸாதா⁴ரணபா⁴வேன வுத்தானி இமிஸ்ஸா தே³ஸனாய பபஞ்சபூ⁴தானீதி ஆஹ ‘‘ஏத்தகம் பபஞ்சம் கத்வா கதி²தம், தே³ஸனம்…பே… அஜ்ஜா²ஸயேனா’’தி. இமினா தானேவ ஜராமரணாதீ³னி க³ஹேத்வா புக்³க³லஜ்ஜா²ஸயவஸேன ஆதி³தோ ‘‘இமே த⁴ம்மே’’திஆதி³னா ஸப்³ப³பத³ஸாதா⁴ரணதோ தே³ஸனா ஆரத்³தா⁴. யதா²னுலோமஸாஸனஞ்ஹி ஸுத்தந்ததே³ஸனா, ந யதா²த⁴ம்மஸாஸனந்தி.

து³தியஸமணப்³ராஹ்மணஸுத்தவண்ணனா நிட்டி²தா.

5. கச்சானகோ³த்தஸுத்தவண்ணனா

15. யஸ்மா இத⁴ ஜானந்தாபி ‘‘ஸம்மாதி³ட்டீ²’’தி வத³ந்தி அஜானந்தாபி பா³ஹிரகாபி ஸாஸனிகாபி அனுஸ்ஸவாதி³வஸேனபி அத்தபச்சக்கே²னபி, தஸ்மா தம் ப³ஹூனம் வசனம் உபாதா³ய ஆமேடி³தவஸேன ‘‘ஸம்மாதி³ட்டி² ஸம்மாதி³ட்டீ²தி, ப⁴ந்தே, வுச்சதீ’’தி ஆஹ. ததா²னித்³தி³ட்ட²தாத³ஸ்ஸனத்த²ம் ஹிஸ்ஸ அயம் ஆமேடி³தபயோகோ³. அயஞ்ஹேத்த² அதி⁴ப்பாயோ – ‘‘அபரேஹிபி ஸம்மாதி³ட்டீ²தி வுச்சதி, ஸா பனாயம் ஏவம் வுச்சமானா அத்த²ஞ்ச லக்க²ணஞ்ச உபாதா³ய கித்தாவதா நு கோ², ப⁴ந்தே, ஸம்மாதி³ட்டி² ஹோதீ’’தி. அட்ட²கதா²யம் பன ‘‘ஸம்மாதி³ட்டீ²’’தி வசனே யஸ்மா விஞ்ஞூ ஏவ பமாணம், ந அவிஞ்ஞூ, தஸ்மா ‘‘யம் பண்டி³தா’’திஆதி³ வுத்தம். த்³வே அவயவா அஸ்ஸாதி த்³வயம், து³வித⁴ம் தி³ட்டி²கா³ஹவத்து², த்³வயம் தி³ட்டி²கா³ஹவஸேன நிஸ்ஸிதோ அபஸ்ஸிதோதி த்³வயனிஸ்ஸிதோ. தேனாஹ ‘‘த்³வே கோட்டா²ஸே நிஸ்ஸிதோ’’தி. யாய தி³ட்டி²யா ‘‘ஸப்³போ³யம் லோகோ அத்தி² விஜ்ஜதி ஸப்³ப³காலம் உபலப்³ப⁴தீ’’தி தி³ட்டி²க³திகோ க³ண்ஹாதி, ஸா தி³ட்டி² அத்தி²தா, ஸா ஏவ ஸதா³ ஸப்³ப³காலம் லோகோ அத்தீ²தி பவத்தகா³ஹதாய ஸஸ்ஸதோ, தம் ஸஸ்ஸதம். யாய தி³ட்டி²யா ‘‘ஸப்³போ³யம் லோகோ நத்தி² ந ஹோதி உச்சி²ஜ்ஜதீ’’தி தி³ட்டி²க³திகோ க³ண்ஹாதி, ஸா தி³ட்டி² நத்தி²தா, ஸா ஏவ உச்சி²ஜ்ஜதீதி உப்பன்னகா³ஹதாய உச்சே²தோ³, தம் உச்சே²த³ம். லோகோ நாம ஸங்கா²ரலோகோ தம்ஹி க³ஹேதப்³ப³தோ. ஸம்மப்பஞ்ஞாயாதி அவிபரீதபஞ்ஞாய யதா²பூ⁴தபஞ்ஞாய. தேனாஹ ‘‘ஸவிபஸ்ஸனா மக்³க³பஞ்ஞா’’தி. நிப்³ப³த்தேஸு த⁴ம்மேஸூதி யதா² பச்சயுப்பன்னேஸு ரூபாரூபத⁴ம்மேஸு. பஞ்ஞாயந்தே ஸ்வேவாதி ஸந்தானனிப³ந்த⁴னவஸேன பஞ்ஞாயமானேஸு ஏவ. யா நத்தீ²தி யா உச்சே²த³தி³ட்டி² தத்த² தத்தே²வ ஸத்தானம் உச்சி²ஜ்ஜனதோ வினஸ்ஸனதோ கோசி டி²தோ நாம ஸத்தோ த⁴ம்மோ வா நத்தீ²தி ஸங்கா²ரலோகே உப்பஜ்ஜேய்ய. ‘‘நத்தி² ஸத்தா ஓபபாதிகா’’தி பவத்தமானாபி மிச்சா²தி³ட்டி² ததா²பவத்தஸங்கா²ராரம்மணாவ. ஸா ந ஹோதீதி கம்மாவிஜ்ஜாதண்ஹாதி³பே⁴த³ம் பச்சயம் படிச்ச ஸங்கா²ரலோகஸ்ஸ ஸமுத³யனிப்³ப³த்திம் ஸம்மப்பஞ்ஞாய பஸ்ஸதோ, ஸா உச்சே²த³தி³ட்டி², ந ஹோதி, நப்பவத்ததி அவிச்சே²தே³ன ஸங்கா²ரானம் நிப்³ப³த்தித³ஸ்ஸனதோ. லோகனிரோத⁴ந்தி ஸங்கா²ரலோகஸ்ஸ க²ணிகனிரோத⁴ம். தேனாஹ ‘‘ஸங்கா²ரானம் ப⁴ங்க³’’ந்தி. யா அத்தீ²தி ஹேதுப²லஸம்ப³ந்தே⁴ன பவத்தமானஸ்ஸ ஸந்தானானுபச்சே²த³ஸ்ஸ ஏகத்தக்³க³ஹணேன ஸங்கா²ரலோகே யா ஸஸ்ஸததி³ட்டி² ஸப்³ப³காலம் லோகோ அத்தீ²தி உப்பஜ்ஜேய்ய. ஸா ந ஹோதீதி உப்பன்னுப்பன்னானம் நிரோத⁴ஸ்ஸ நவனவானஞ்ச உப்பாத³ஸ்ஸ த³ஸ்ஸனதோ, ஸா ஸஸ்ஸததி³ட்டி² ந ஹோதி.

லோகோ ஸமுதே³தி ஏதஸ்மாதி லோகஸமுத³யோதி ஆஹ ‘‘அனுலோமபச்சயாகார’’ந்தி. பச்சயத⁴ம்மானஞ்ஹி அத்தனோ ப²லஸ்ஸ பச்சயபா⁴வோ அனுலோமபச்சயாகாரோ. படிலோமம் பச்சயாகாரந்தி ஆனேத்வா ஸம்ப³ந்தோ⁴. தம்தம்ஹேதுனிரோத⁴தோ தம்தம்ப²லனிரோதோ⁴ ஹி படிலோமபச்சயாகாரோ. யோ ஹி அவிஜ்ஜாதீ³னம் பச்சயத⁴ம்மானம் ஹேதுஆதி³பச்சயபா⁴வோ, ஸோ நிப்பரியாயதோ லோகஸமுத³யோ. பச்சயுப்பன்னஸ்ஸ ஸங்கா²ராதி³கஸ்ஸ. அனுச்சே²த³ம் பஸ்ஸதோதி அனுச்சே²த³த³ஸ்ஸனஸ்ஸ ஹேது. அயம்பீதி ந கேவலம் க²ணதோ உத³யவயனீஹரணனயோ, அத² கோ² பச்சயதோ உத³யவயனீஹரணனயோபி.

உபக³மனட்டே²ன தண்ஹாவ உபயோ. ததா² தி³ட்டு²பயோ. ஏஸேவ நயோதி இமினா உபயேஹி உபாதா³னாதீ³னம் அனத்த²ந்தரதம் அதிதி³ஸதி. ததா² ச பன தேஸு து³வித⁴தா உபாதீ³யதி. நனு ச சத்தாரி உபாதா³னானி அஞ்ஞத்த² வுத்தானீதி? ஸச்சம் வுத்தானி, தானி ச கோ² அத்த²தோ த்³வே ஏவாதி இத⁴ ஏவம் வுத்தம். காமம் ‘‘அஹம் மம’’ந்தி அயதா²னுக்கமேன வுத்தம், யதா²னுக்கமம்யேவ பன அத்தோ² வேதி³தப்³போ³. ஆதி³-ஸத்³தே³ன பரோபரஸ்ஸ ஸுப⁴ம் அஸுப⁴ந்திஆதீ³னஞ்ச ஸங்க³ஹோ வேதி³தப்³போ³. தே த⁴ம்மேதி தேபூ⁴மகத⁴ம்மே. வினிவிஸந்தீதி விரூபம் நிவிஸந்தி, அபி⁴னிவிஸந்தீதி அத்தோ². தாஹீதி தண்ஹாதி³ட்டீ²ஹி. வினிப³த்³தோ⁴தி விரூபம் விமுச்சிதும் வா அப்பதா³னவஸேன நியமேத்வா ப³த்³தோ⁴.

‘‘அபி⁴னிவேஸோ’’தி உபயுபாதா³னானம் பவத்திஆகாரவிஸேஸோ வுத்தோதி ஆஹ ‘‘தஞ்சாயந்தி தஞ்ச உபயுபாதா³ன’’ந்தி. சித்தஸ்ஸாதி அகுஸலசித்தஸ்ஸ. பதிட்டா²னபூ⁴தந்தி ஆதா⁴ரபூ⁴தம். தோ³ஸமோஹவஸேனபி அகுஸலசித்தப்பவத்தி தண்ஹாதி³ட்டா²பி⁴னிவேஸூபனிஸ்ஸயா ஏவாதி தண்ஹாதி³ட்டி²யோ அகுஸலஸ்ஸ சித்தஸ்ஸ அதி⁴ட்டா²னந்தி வுத்தா. தஸ்மிந்தி அகுஸலசித்தே. அபி⁴னிவிஸந்தீதி ‘‘ஏதம் மம, ஏஸோ மே அத்தா’’திஆதி³னா அபி⁴னிவேஸனம் பவத்தேந்தி. அனுஸேந்தீதி தா²மக³தா ஹுத்வா அப்பஹானபா⁴வேன அனுஸேந்தி. தது³ப⁴யந்தி தண்ஹாதி³ட்டி²த்³வயம். ந உபக³ச்ச²தீதி ‘‘ஏதம் மமா’’திஆதி³னா தண்ஹாதி³ட்டி²க³தியா ந உபஸங்கமதி ந அல்லீயதி. ந உபாதி³யதீதி ந த³ள்ஹக்³கா³ஹம் க³ண்ஹாதி. ந அதி⁴ட்டா²தீதி ந தண்ஹாதி³ட்டி²கா³ஹேன அதி⁴ட்டா²ய பவத்ததி. அத்தனியகா³ஹோ நாம ஸதி அத்தகா³ஹே ஹோதீதி வுத்தம் ‘‘அத்தா மே’’தி. இத³ம் து³க்க²க்³க³ஹணம் உபாதா³னக்க²ந்தா⁴பஸ்ஸயம் தப்³பி³னிமுத்தஸ்ஸ து³க்க²ஸ்ஸ அபா⁴வாதி வுத்தம் ‘‘து³க்க²மேவாதி பஞ்சுபாதா³னக்க²ந்த⁴மத்தமேவா’’தி. ‘‘ஸம்கி²த்தேன பஞ்சுபாதா³னக்க²ந்தா⁴ து³க்கா²’’தி (தீ³. நி. 2.387; ம. நி. 1.120; 3.373; விப⁴. 190) ஹி வுத்தம். கங்க²ம் ந கரோதீதி ஸம்ஸயம் ந உப்பாதே³தி ஸப்³ப³ஸோ விசிகிச்சா²ய ஸமுச்சி²ந்த³னதோ.

ந பரப்பச்சயேனாதி பரஸ்ஸ அஸத்³த³ஹனேன. மிஸ்ஸகஸம்மாதி³ட்டி²ம் ஆஹாதி நாமரூபபரிச்சே²த³தோ பட்டா²ய ஸம்மாதி³ட்டி²யா வுத்தத்தா லோகியலோகுத்தரமிஸ்ஸகம் ஸம்மாதி³ட்டி²ம் அவோச. நிகூடந்தோதி நிஹீனந்தோ. நிஹீனபரியாயோ ஹி அயம் நிகூட-ஸத்³தோ³. தேனாஹ ‘‘லாமகந்தோ’’தி. பட²மகந்தி ச க³ரஹாயம் க-ஸத்³தோ³. ஸப்³ப³ம் நத்தீ²தி யதா²ஸங்க²தம் ப⁴ங்கு³ப்பத்தியா நத்தி² ஏவ, ஸப்³ப³ம் நத்தி² உச்சி²ஜ்ஜதி வினஸ்ஸதீதி அதி⁴ப்பாயோ. ஸப்³ப³மத்தீ²தி ச யதா² அஸங்க²தம் அத்தி² விஜ்ஜதி, ஸப்³ப³காலம் உபலப்³ப⁴தீதி அதி⁴ப்பாயோ. ஸப்³ப³ந்தி சேத்த² ஸக்காயஸப்³ப³ம் வேதி³தப்³ப³ம் ‘‘ஸப்³ப³த⁴ம்மமூலபரியாய’’ந்திஆதீ³ஸு (ம. நி. 1.1) விய. தஞ்ஹி பரிஞ்ஞாஞாணானம் பச்சயபூ⁴தம். இதி-ஸத்³தோ³ நித³ஸ்ஸனே. கிம் நித³ஸ்ஸேதி? அத்தி²-ஸத்³தே³ன வுத்தம். ‘‘அத்தி²த’’ந்தி நிச்சதம். ஸஸ்ஸதக்³கா³ஹோ ஹி இத⁴ பட²மோ அந்தோதி அதி⁴ப்பேதோ. உச்சே²த³க்³கா³ஹோ து³தியோதி தது³ப⁴யவினிமுத்தா ச இத³ப்பச்சயதா. ஏத்த² ச உப்பன்னனிரோத⁴கத²னதோ ஸஸ்ஸததம், நிருஜ்ஜ²ந்தானம் அஸதி நிப்³பா³னப்பத்தியம் யதா²பச்சயம் புனூபக³மனகத²னதோ உச்சே²த³தஞ்ச அனுபக³ம்ம மஜ்ஜி²மேன ப⁴க³வா த⁴ம்மம் தே³ஸேதி இத³ப்பச்சயதானயேன. தேன வுத்தம் ‘‘ஏதே…பே… அந்தே’’திஆதி³.

கச்சானகோ³த்தஸுத்தவண்ணனா நிட்டி²தா.

6. த⁴ம்மகதி²கஸுத்தவண்ணனா

16. நிப்³பி³ந்த³னத்தா²யாதி நிப்³பி³தா³னுபஸ்ஸனாபடிலாபா⁴ய. ஸா ஹி ஜராமரணஸீஸேன வுத்தேஸு ஸங்க²தத⁴ம்மேஸு நிப்³பி³ந்த³னாகாரேன பவத்ததி. விரஜ்ஜனத்தா²யாதி விராகா³னுபஸ்ஸனாபடிலாபா⁴ய. ஸீலதோ பட்டா²யாதி விவட்டஸன்னிஸ்ஸிதஸீலஸமாதா³னதோ பட்டா²ய. ஸோதாபத்தியங்கே³ஹி ஸமன்னாக³தோ விவட்டஸன்னிஸ்ஸிதஸீலே பதிட்டி²தோ உபாஸகோபி பகே³வ சதுபாரிஸுத்³தி⁴ஸீலே பதிட்டி²தோ பி⁴க்கு² ஸம்மாபடிபன்னோ நாம. தேனாஹ ‘‘யாவ அரஹத்தமக்³கா³ படிபன்னோதி வேதி³தப்³போ³’’தி. நிப்³பா³னத⁴ம்மஸ்ஸாதி நிப்³பா³னாவஹஸ்ஸ அரியஸ்ஸ மக்³க³ஸ்ஸ. அனுரூபஸபா⁴வபூ⁴தந்தி நிப்³பா³னாதி⁴க³மஸ்ஸ அனுச்ச²விகஸபா⁴வபூ⁴தம். நிப்³பி³தா³தி இமினா வுட்டா²னகா³மினிபரியோஸானம் விபஸ்ஸனம் வத³தி. விராகா³ நிரோதா⁴தி பத³த்³வயேன அரியமக்³க³ம், இதரேன ப²லம். ஏத்தா²தி இமஸ்மிம் ஸுத்தே. ஏகேன நயேனாதி பட²மேன நயேன. தத்த² ஹி ப⁴க³வா தேன பி⁴க்கு²னா த⁴ம்மகதி²கலக்க²ணம் புச்சி²தோ தம் மத்த²கம் பாபேத்வா விஸ்ஸஜ்ஜேஸி. யோ ஹி விபஸ்ஸனம் மக்³க³ம் அனுபாதா³விமுத்திம் பாபேத்வா கதே²தும் ஸக்கோதி, ஸோ ஏகந்தத⁴ம்மகதி²கோ. தேனாஹ ‘‘த⁴ம்மகதி²கஸ்ஸ புச்சா² கதி²தா’’தி. த்³வீஹீதி து³தியததியனயேஹி. தந்தி புச்ச²ம். விஸேஸேத்வாதி விஸிட்ட²ம் கத்வா. யதா²புச்சி²தமத்தமேவ அகதே²த்வா அபுச்சி²தம்பி அத்த²ம் த³ஸ்ஸேந்தோ த⁴ம்மானுத⁴ம்மபடிபத்திம் அனுபாதா³ய விமுத்திஸங்கா²தம் விஸேஸம் பாபேத்வா. ப⁴க³வா ஹி அப்பம் யாசிதோ ப³ஹும் தே³ந்தோ உளாரபுரிஸோ விய த⁴ம்மகதி²கலக்க²ணம் புச்சி²தோ படிச்சஸமுப்பாத³முகே²ன தஞ்சேவ ததோ ச உத்தரிம் த⁴ம்மானுத⁴ம்மபடிபத்திம் அனுபாதா³விமுத்தஞ்ச விஸ்ஸஜ்ஜேஸி. தத்த² ‘‘நிப்³பி³தா³ய…பே… த⁴ம்மம் தே³ஸேதீ’’தி இமினா த⁴ம்மதே³ஸனம் வாஸனாபா⁴கி³யம் கத்வா த³ஸ்ஸேஸி. ‘‘நிரோதா⁴ய படிபன்னோ ஹோதீ’’தி இமினா நிப்³பே³த⁴பா⁴கி³யம், ‘‘அனுபாதா³விமுத்தோ ஹோதீ’’தி இமினா தே³ஸனம் அஸேக்க²பா⁴கி³யம் கத்வா த³ஸ்ஸேஸி. தேனாஹ ‘‘ஸேக்கா²ஸேக்க²பூ⁴மியோ நித்³தி³ட்டா²’’தி.

த⁴ம்மகதி²கஸுத்தவண்ணனா நிட்டி²தா.

7. அசேலகஸ்ஸபஸுத்தவண்ணனா

17. லிங்கே³ன அசேலகோதி பப்³ப³ஜிதலிங்கே³ன அசேலகோ. தேன அசேலகசரணேன அசேலோ, ந நிச்சேலதாமத்தேனாதி த³ஸ்ஸேதி. நாமேனாதி கோ³த்தனாமேன கஸ்ஸபோதி. தே³ஸேதி பவேதே³தி ஸம்ஸயவிக³மனம் ஏதேனாதி தே³ஸோ, நிச்ச²யஹேதூதி ஆஹ ‘‘கிஞ்சிதே³வ தே³ஸ’’ந்திஆதி³. ஸோ ஹி ஸம்ஸயவிக³மனம் கரோதீதி காரணம். ஓகாஸந்தி அவஸம்ஸந்த³னபதே³ஸம். தேனாஹ ‘‘க²ணம் கால’’ந்தி. அந்தரக⁴ரம் அந்தோனிவேஸனம். அந்தரே க⁴ரானி ஏதஸ்ஸாதி அந்தரக⁴ரம், அந்தோகா³மோ. யதா³கங்க²ஸீதி யம் ஆகங்க²ஸி. இதி ப⁴க³வா ஸப்³ப³ஞ்ஞுபவாரணாய பவாரேதி. தேனாஹ ‘‘யம் இச்ச²ஸீ’’தி. யதா³கங்க²ஸீதி யம் ஆகங்க²ஸி, கஸ்ஸப, திக்க²த்தும் படிக்கி²பந்தோபி புச்ச²ஸி, யம் ஆகங்க²ஸி, தமேவ புச்சா²தி அத்தோ².

‘‘யாவததியம் படிக்கி²பீ’’தி வுத்தத்தா ‘‘ததியம்பி கோ²’’திஆதி³னா பாடே²ன ப⁴விதப்³ப³ம். ஸோ பன நயவஸேன ஸம்கி²த்தோதி த³ட்ட²ப்³போ³. யேன காரணேன ப⁴க³வா அசேலகஸ்ஸ திக்க²த்தும் யாசாபேத்வா சஸ்ஸ பஞ்ஹம் கதே²ஸி, தம் த³ஸ்ஸேதும் ‘‘கஸ்மா பனா’’திஆதி³மாஹ. கா³ரவஜனனத்த²ம் யாவததியம் படிக்கி²பி தஞ்ச த⁴ம்மஸ்ஸ ஸுஸ்ஸூஸாய. த⁴ம்மக³ருகா ஹி பு³த்³தா⁴ ப⁴க³வந்தோ. ஸத்தானம் ஞாணபரிபாகம் ஆக³மயமானோ யாவததியம் யாசாபேதீதி விப⁴த்திவிபரிணாமவஸேன ஸாதா⁴ரணதோ பத³ம் யோஜேத்வா புன ‘‘ஏத்தகேன காலேனா’’தி கஸ்ஸபஸ்ஸ வஸேன யோஜேதப்³ப³ம்.

மாதி படிஸேதே⁴ நிபாதோ. ப⁴ணீதி புனவசனவஸேன கிரியாபத³ம் வத³தி. மா ஏவம் ப⁴ணி, கதே²ஸீதி அத்தோ². ‘‘இதி ப⁴க³வா அவோசா’’தி பன ஸங்கீ³திகாரவசனம். ஸயம்கதம் து³க்க²ந்தி புரிஸஸ்ஸ உப்பஜ்ஜமானது³க்க²ம், தேன கதம் நாம தஸ்ஸ காரணஸ்ஸ புப்³பே³ தேனேவ கம்மஸ்ஸ உபசிதத்தாதி அயம் நயோ அனவஜ்ஜோ. தி³ட்டி²க³திகோ பன பஞ்சக்க²ந்த⁴வினிமுத்தம் நிச்சம் காரகவேத³கலக்க²ணம் அத்தானம் பரிகப்பேத்வா தஸ்ஸ வஸேன ‘‘ஸயம்கதம் து³க்க²’’ந்தி புச்ச²தீதி ப⁴க³வா ‘‘மா ஹேவ’’ந்தி அவோச, தேனாஹ ‘‘ஸயம்கதம் து³க்க²ந்தி வத்தும் ந வட்டதீ’’திஆதி³. ஏத்த² ச யதி³ பா³ஹிரகேஹி பரிகப்பிதோ அத்தா நாம கோசி அத்தி², ஸோ ச நிச்சோ, தஸ்ஸ நிப்³பி³காரதாய, புரிமரூபாவிஜஹனதோ கஸ்ஸசி விஸேஸாதா⁴னஸ்ஸ காதும் அஸக்குணேய்யதாய அஹிததோ நிவத்தனத்த²ம், ஹிதே ச வத்தனத்த²ம் உபதே³ஸோ ச நிப்பயோஜனோ ஸியா அத்தவாதி³னோ. கத²ம் வா ஸோ உபதே³ஸோ பவத்தீயதி? விகாராபா⁴வதோ. ஏவஞ்ச அத்தனோ அஜடாகாஸஸ்ஸ விய தா³னாதி³கிரியா ஹிம்ஸாதி³கிரியா ச ந ஸம்ப⁴வதி, ததா² ஸுக²ஸ்ஸ து³க்க²ஸ்ஸ ச அனுப⁴வனப³ந்தோ⁴ ஏவ அத்தவாதி³னோ ந யுஜ்ஜதி கம்மப³ந்தா⁴பா⁴வதோ. ஜாதிஆதீ³னஞ்ச அஸம்ப⁴வதோ குதோ விமோக்கோ². அத² பன ‘‘த⁴ம்மமத்தம் தஸ்ஸ உப்பஜ்ஜதி சேவ வினஸ்ஸதி ச. யஸ்ஸ வஸேனாயம் கிரியாவோஹாரோ’’தி வதே³ய்ய, ஏவம்பி புரிமரூபாவிஜஹனேன அவட்டி²தஸ்ஸ அத்தனோ த⁴ம்மமத்தந்தி ந ஸக்கா ஸம்பா⁴வேதும். தே வா பனஸ்ஸ த⁴ம்மா அவத்தா²பூ⁴தா, ததோ அஞ்ஞே வா ஸியும் அனஞ்ஞே வா. யதி³ அஞ்ஞே, ந தாஹி தஸ்ஸ உப்பன்னாஹிபி கோசி விஸேஸோ அத்தி². யோ ஹி கரோதி படிஸம்வேதே³தி சவதி உபபஜ்ஜதி சாதி இச்சி²தம், தஸ்மா தத³த்தோ² ஏவ யதா²வுத்ததோ³ஸோ. கிஞ்ச த⁴ம்மகப்பனாபி நிரத்தி²கா ஸியா. அத² அனஞ்ஞே, உப்பாத³வினாஸவந்தீஹி அவத்தா²ஹி அனஞ்ஞஸ்ஸ அத்தனோ தாஸம் விய உப்பாத³வினாஸஸம்ப⁴வதோ குதோ நிச்சதாவகாஸோ. தாஸம்பி வா அத்தனோ விய நிச்சதாபத்தீதி ப³ந்த⁴விமோக்கா²னம் அஸம்ப⁴வோ ஏவாதி ந யுஜ்ஜதேவாயம் அத்தவாதோ³. தேனாஹ ‘‘அத்தா நாம கோசி து³க்க²ஸ்ஸ காரகோ நத்தீ²தி தீ³பேதீ’’தி. பரதோதி ‘‘பரம்கதம் து³க்க²’’ந்திஆதி³கே பரஸ்மிம் திவிதே⁴பி நயே. அதி⁴ச்சஸமுப்பன்னந்தி அதி⁴ச்ச யதி³ச்சா²ய கிஞ்சி காரணம் கஸ்ஸசி வா புப்³ப³ம் வினா ஸமுப்பன்னம். தேனாஹ ‘‘அகாரணேன யதி³ச்சா²ய உப்பன்ன’’ந்தி. கஸ்மா ஏவமாஹாதி ஏவம் வக்க²மானோதி அதி⁴ப்பாயோ. அஸ்ஸாதி அசேலஸ்ஸ. அயந்தி ப⁴க³வந்தம் ஸந்தா⁴ய வத³தி. ஸோதே⁴ந்தோதி ஸயம் விஸுத்³த⁴ம் கத்வா புச்சி²தமத்த²ம் ஏவ அத்தனோ புச்சா²ய ஸுத்³தி⁴ம் த³ஸ்ஸேந்தோ. லத்³தி⁴யா ‘‘ஸயம்கதம் து³க்க²’’ந்தி மிச்சா²க³ஹணஸ்ஸ படிஸேத⁴னத்தா²ய.

ஸோ கரோதீதி ஸோ கம்மம் கரோதி. ஸோ படிஸம்வேத³யதீதி காரகவேத³கானம் அனஞ்ஞத்தத³ஸ்ஸனபரம் ஏதம், ந பன கம்மகிரியாப²லானம் படிஸம்வேத³னானம் ஸமானகாலதாத³ஸ்ஸனபரம். இதீதி நித³ஸ்ஸனத்தே² நிபாதோ. கோ²தி அவதா⁴ரணே. ‘‘ஸோ ஏவா’’தி த³ஸ்ஸிதோ. அனியதாதே³ஸா ஹி ஏதே நிபாதா. ஆதி³தோதி பு⁴ம்மத்தே² நிஸ்ஸக்கவசனந்தி ஆஹ ‘‘ஆதி³ம்ஹியேவா’’தி. ‘‘ஸயம்கதம் து³க்க²’’ந்தி லத்³தி⁴யா பகே³வ ‘‘ஸோ கரோதி, ஸோ படிஸம்வேத³யதீ’’தி ஸஞ்ஞாசித்தவிபல்லாஸா ப⁴வந்தி. ஸஞ்ஞாவிபல்லாஸதோ ஹி சித்தவிபல்லாஸோ, சித்தவிபல்லாஸதோ தி³ட்டி²விபல்லாஸோ, தேனாஹ ‘‘ஏவம் ஸதி பச்சா² ஸயம்கதம் து³க்க²ந்தி அயம் லத்³தி⁴ ஹோதீ’’தி. ஏவம் ஸதி ஸஞ்ஞாசித்தவிபல்லாஸானம் ப்³ரூஹிதோ மிச்சா²பி⁴னிவேஸோ, யதி³த³ம் ‘‘ஸயம்கதம் து³க்க²’’ந்தி லத்³தி⁴. தஸ்மா படினிஸ்ஸஜ்ஜேதும் பாபகம் தி³ட்டி²க³தந்தி த³ஸ்ஸேதி. தேனாஹ ப⁴க³வா ‘‘ஸயம்கதம்…பே… ஏதம் பரேதீ’’தி. வட்டது³க்க²ம் அதி⁴ப்பேதம் அவிஸேஸதோ அத்தீ²தி ச வுத்தத்தா. ஸஸ்ஸதம் ஸஸ்ஸதகா³ஹம் தீ³பேதி பரேஸம் பகாஸேதி, ததா²பூ⁴தோ ச ஸஸ்ஸதம் த³ள்ஹக்³கா³ஹம் க³ண்ஹாதீதி. தஸ்ஸாதி தி³ட்டி²க³திகஸ்ஸ. தம் ‘‘ஸயம்கதம் து³க்க²’’ந்தி ஏவம் பவத்தம் விபரீதத³ஸ்ஸனம். ஏதம் ஸஸ்ஸதக்³க³ஹணம். பரேதி உபேதி. தேனாஹ ‘‘காரகஞ்ச…பே… அத்தோ²’’தி. ஏகமேவ க³ண்ஹந்தந்தி ஸதிபி வத்து²பே⁴தே³ அயோனிஸோ உப்பஜ்ஜனேன ஏகமேவ கத்வா க³ண்ஹந்தம்.

இத⁴ ‘‘ஆதி³ம்ஹியேவா’’தி பதே³. ‘‘பரம்கதம் து³க்க²’’ந்தி லத்³தி⁴யா பகே³வாதிஆதி³னா ஹேத்த² வுத்தனயானுஸாரேன அத்தோ² வேதி³தப்³போ³. அயஞ்ஹேத்த² யோஜனா – ‘‘பரம்கதம் து³க்க²’’ந்தி லத்³தி⁴யா பகே³வ அஞ்ஞோ கரோதி, அஞ்ஞோ படிஸம்வேத³யதீதி ஸஞ்ஞாசித்தவிபல்லாஸா ப⁴வந்தீதி ஸப்³ப³ம் ஹேட்டா² வுத்தனயேனேவ யோஜேதப்³ப³ம். ஏவம் ஸதீதி ஏவம் முது³கே உச்சே²த³விபல்லாஸே பட²முப்பன்னே ஸதி பச்சா² ‘‘பரம்கதம் து³க்க²’’ந்தி அயம் லத்³தி⁴ ஹோதீதி ஸம்ப³ந்தோ⁴. காரகோதி கம்மஸ்ஸ காரகோ. தேன கதந்தி கம்மகாரகேன கதம். கம்முனா ஹி ப²லஸ்ஸ வோஹாரோ அபே⁴தோ³பசாரகத்தா. ஏவந்தி தி³ட்டி²ஸஹக³தா வேத³னா ஸாதஸபா⁴வா கிலேஸபரிளாஹாதி³னா ஸபரிஸ்ஸயா ஸஉபாயாஸா, ஏவம். ‘‘பகே³வ இதரே’’தி வுத்தவேத³னாய அபி⁴துன்னஸ்ஸ வித்³த⁴ஸ்ஸ. ‘‘வுத்தனயேன யோஜேதப்³ப³’’ந்தி வத்வா தம் யோஜனம் த³ஸ்ஸேந்தோ ‘‘தத்ராய’’ந்திஆதி³மாஹ. உச்சே²த³ந்தி ஸதோ ஸத்தஸ்ஸ உச்சே²த³ம் வினாஸம், விப⁴வந்தி அத்தோ². அஸதோ ஹி வினாஸாஸம்ப⁴வதோ அத்தி²பா⁴வனிப³ந்த⁴னோ உச்சே²தோ³. யதா² ஹேதுப²லபா⁴வேன பவத்தமானானம் ஸபா⁴வத⁴ம்மானம் ஸதிபி ஏகஸந்தானபரியாபன்னானம் பி⁴ன்னஸந்ததிபதிதேஹி விஸேஸே ஹேதுப²லானம் பரமத்த²தோ அவினாபா⁴வத்தா பி⁴ன்னஸந்தானபதிதானம் விய அச்சந்தபே⁴த³ஸன்னிட்டா²னேன நானத்தனயஸ்ஸ மிச்சா²க³ஹணம் உச்சே²தா³பி⁴னிவேஸஸ்ஸ காரணம். ஏவம் ஹேதுப²லபூ⁴தானம் த⁴ம்மானம் விஜ்ஜமானேபி ஸபா⁴வபே⁴தே³ ஏகஸந்ததிபரியாபன்னதாய ஏகத்தனயேன அச்சந்தாபே⁴த³க³ஹணம்பி காரணமேவாதி த³ஸ்ஸேதும் ‘‘ஸத்தஸ்ஸா’’தி வுத்தம் பாளியம். ஸந்தானவஸேன ஹி வத்தமானேஸு க²ந்தே⁴ஸு க⁴னவினிப்³போ⁴கா³பா⁴வேன ஏகத்தக³ஹணனிப³ந்த⁴னோ ஸத்தக்³கா³ஹோ, ஸத்தஸ்ஸ ச அத்தி²பா⁴வக்³கா³ஹனிப³ந்த⁴னோ உச்சே²த³க்³கா³ஹோ, யாவாயம் அத்தா ந உச்சி²ஜ்ஜதி, தாவாயம் விஜ்ஜதியேவாதி க³ஹணதோ நிருத³யவினாஸோ இத⁴ உச்சே²தோ³தி அதி⁴ப்பேதோதி ‘‘உச்சே²த³’’ந்தி வுத்தம். விஸேஸேன நாஸோ வினாஸோ, அபா⁴வோ. ஸோ பன மம்ஸசக்கு²பஞ்ஞாசக்கூ²னம் த³ஸ்ஸனபதா²திக்கமோயேவ ஹோதீதி வுத்தம் ‘‘அத³ஸ்ஸன’’ந்தி. அத³ஸ்ஸனே ஹி நாஸஸத்³தோ³ லோகே நிருள்ஹோதி. ஸபா⁴வவிக³மோ ஸபா⁴வாபக³மோ விப⁴வோ. யோ ஹி நிருத³யவினாஸேன உச்சி²ஜ்ஜதி, ந ஸோ அத்தனோ ஸபா⁴வேன திட்ட²தி.

ஏதே தேதி வா யே இமே தயா ‘‘ஸயம்கதம் து³க்க²’’ந்தி ச புட்டே²ன மயா ‘‘ஸோ கரோதி, ஸோ படிஸம்வேத³யதீ’’திஆதி³னா, ‘‘அஞ்ஞோ கரோதி, அஞ்ஞோ படிஸம்வேத³யதீ’’திஆதி³னா ச படிக்கி²த்தா ஸஸ்ஸதுச்சே²த³ஸங்கா²தா அந்தா, தே உபோ⁴ அந்தேதி யோஜனா. அத² வா ஏதே தேதி யத்த² புதூ² அஞ்ஞதித்தி²யா அனுபசிதஞாணஸம்பா⁴ரதாய பரமக³ம்பீ⁴ரம் ஸண்ஹம் ஸுகு²மம் ஸுஞ்ஞதம் அப்பஜானந்தா ஸஸ்ஸதுச்சே²தே³ நிமுக்³கா³ ஸீஸம் உக்கி²பிதும் ந விஸஹந்தி, ஏதே தே உபோ⁴ அந்தே அனுபக³ம்மாதி யோஜனா. தே³ஸேதீதி பட²மம் தாவ அனஞ்ஞஸாதா⁴ரணே படிபத்தித⁴ம்மே ஞாணானுபா⁴வேன மஜ்ஜி²மாய படிபதா³ய டி²தோ, கருணானுபா⁴வேன தே³ஸனாத⁴ம்மே மஜ்ஜி²மாய படிபதா³ய டி²தோ த⁴ம்மம் தே³ஸேதி. ஏத்த² ஹீதி ஹி-ஸத்³தோ³ ஹேதுஅத்தோ². யஸ்மா காரணதோ…பே… நித்³தி³ட்டோ², தஸ்மா மஜ்ஜி²மாய படிபதா³ய டி²தோ த⁴ம்மம் தே³ஸேதீதி யோஜனா. காரணதோ ப²லம் தீ³பிதந்தி யோஜனா, அபி⁴தே⁴ய்யானுரூபஞ்ஹி லிங்க³வசனானி ஹோந்தி. அஸ்ஸாதி ப²லஸ்ஸ. ந கோசி காரகோ வா வேத³கோ வா நித்³தி³ட்டோ², அஞ்ஞத³த்து² படிக்கி²த்தோ ஹேதுப²லமத்ததாத³ஸ்ஸனதோ கேவலம் து³க்க²க்க²ந்த⁴க³ஹணதோதி. ஏத்தாவதாதி ‘‘ஏதே தே, கஸ்ஸப…பே… து³க்க²க்க²ந்த⁴ஸ்ஸ நிரோதோ⁴ ஹோதீ’’தி ஏத்தகேன தாவ பதே³ன. ஸேஸபஞ்ஹாதி ‘‘ஸயம்கதஞ்ச பரம்கதஞ்ச து³க்க²’’ந்திஆதி³கா ஸேஸா சத்தாரோ பஞ்ஹா. அட்ட²கதா²யம் பன ‘‘கிம் நு கோ², போ⁴ கோ³தம, நத்தி² து³க்க²’’ந்தி பஞ்ஹோ பாளியம் ஸரூபேனேவ படிக்கி²த்தோதி ந உத்³த⁴தோ. படிஸேதி⁴தா ஹோந்தீதி ததியபஞ்ஹோ, தாவ பட²மது³தியபஞ்ஹபடிக்கே²பேனேவ படிக்கி²த்தோ, ஸோ ஹி பஞ்ஹோ விஸும் விஸும் படிக்கே²பேன ஏகஜ்ஜ²ம் படிக்கே²பேன ச. தேனாஹ ‘‘உபோ⁴…பே… படிக்கி²த்தோ’’தி. ஏத்த² ச யஸ்ஸ அத்தா காரகோ வேத³கோ வா இச்சி²தோ, தேன விபரிணாமத⁴ம்மோ அத்தா அனுஞ்ஞாதோ ஹோதி. ததா² ச ஸதி அனுபுப்³ப³த⁴ம்மப்பவத்தியா ரூபாதி³த⁴ம்மானம் விய, ஸுகா²தி³த⁴ம்மானம் விய சஸ்ஸ பச்சயாயத்தவுத்திதாய உப்பாத³வந்ததா ஆபஜ்ஜதி. உப்பாதே³ ச ஸதி அவஸ்ஸம்பா⁴வீ நிரோதோ⁴தி அனவகாஸா நிச்சதாதி. தஸ்ஸ ‘‘ஸயம்கத’’ந்தி பட²மபஞ்ஹபடிக்கே²போ பச்சா² சே அத்தனோ நிருள்ஹஸ்ஸ ஸமுத³யோ ஹோதீதி புப்³பே³ விய அனேன ப⁴விதப்³ப³ம், புப்³பே³ விய வா பச்சா²பி. ஸேஸபஞ்ஹாதி ததியபஞ்ஹாத³யோ. ததியபஞ்ஹோ படிக்கி²த்தோதி ஏவஞ்ச ததியபஞ்ஹோ படிக்கி²த்தோ வேதி³தப்³போ³ – ‘‘அவிஜ்ஜாபச்சயா ஸங்கா²ரா’’திஆதி³னா ஸததம் ஸமிதம் பச்சயாயத்தஸ்ஸ தீ³பனேன து³க்க²ஸ்ஸ அதி⁴ச்சஸமுப்பன்னதா படிக்கி²த்தா, ததோ ஏவ தஸ்ஸ அஜானனஞ்ச படிக்கி²த்தம். தேனாஹ ப⁴க³வா ‘‘ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதீ’’தி (ம. நி. 3.126; ஸம். நி. 2.39-40; மஹாவ. 1; உதா³. 1).

யம் பரிவாஸம் ஸமாதி³யித்வா பரிவஸதீதி யோஜனா. வசனஸிலிட்ட²தாவஸேனாதி ‘‘ப⁴க³வதோ ஸந்திகே பப்³ப³ஜ்ஜம் லபே⁴ய்யம் உபஸம்பத³’’ந்தி யாசந்தேன தேன வுத்தவசனஸிலிட்ட²தாவஸேன. கா³மப்பவேஸனாதீ³னீதி ஆதி³-ஸத்³தே³ன நாதிதி³வாபடிக்கமனம், நவேஸியாதி³கோ³சரதா, ஸப்³ரஹ்மசாரீனம் கிச்சேஸு த³க்க²தாதி³, உத்³தே³ஸாதீ³ஸு திப்³ப³ச்ச²ந்த³தா, தித்தி²யானம் அவண்ணப⁴ணனே அத்தமனதா, பு³த்³தா⁴தீ³னம் அவண்ணப⁴ணனே அனத்தமனதா, தித்தி²யானம் வண்ணப⁴ணனே அனத்தமனதா, பு³த்³தா⁴தீ³னம் வண்ணப⁴ணனே அத்தமனதாதி (மஹாவ. 87) இமேஸம் ஸங்க³ஹோ. அட்ட² வத்தானீதி இமானி அட்ட² தித்தி²யவத்தானி பூரேந்தேன. ஏத்த² ச நாதிகாலேன கா³மப்பவேஸனா தத்த² விஸுத்³த⁴காயவசீஸமாசாரேன பிண்டா³ய சரித்வா நாதிதி³வாபடிக்கமனந்தி இத³மேகம் வத்தம்.

அயமேத்த² பாடோ²தி ஏதஸ்மிம் கஸ்ஸபஸுத்தே அயம் பாடோ². அஞ்ஞத்தா²தி ஸீஹனாத³ஸுத்தாதீ³ஸு (தீ³. நி. 1.402-403). க⁴ம்ஸித்வா கோட்டேத்வாதி யதா² ஸுவண்ணம் நிக⁴ம்ஸித்வா அதி⁴கரணியா கோட்டேத்வா நித்³தோ³ஸமேவ க³ய்ஹதி, ஏவம் பரிவாஸவத்தசரணேன க⁴ம்ஸித்வா ஸுத்³த⁴பா⁴வவீமம்ஸனேன கோட்டேத்வா ஸுத்³தோ⁴ ஏவ அஞ்ஞதித்தி²யபுப்³போ³ இத⁴ க³ய்ஹதி. திப்³ப³ச்ச²ந்த³தந்தி ஸாஸனம் அனுபவிஸித்வா ப்³ரஹ்மசரியவாஸே திப்³ப³ச்ச²ந்த³தம் த³ள்ஹதராபி⁴ருசிதம். அஞ்ஞதரம் பி⁴க்கு²ம் ஆமந்தேஸீதி நாமகோ³த்தேன அபாகடம் ஏகம் பி⁴க்கு²ம் ஆணாபேஸி ஏஹிபி⁴க்கு²உபஸம்பதா³ய உபனிஸ்ஸயாபா⁴வதோ. க³ணே நிஸீதி³த்வாதி பி⁴க்கூ² அத்தனோ ஸந்திகே பத்தாஸனவஸேன க³ணே நிஸீதி³த்வா.

அசேலகஸ்ஸபஸுத்தவண்ணனா நிட்டி²தா.

8. திம்ப³ருகஸுத்தவண்ணனா

18. யஸ்மா திம்ப³ருகோ ‘‘வேத³னா அத்தா. அத்தாவ வேத³யதீ’’தி ஏவம்லத்³தி⁴கோ, தஸ்மா தாய லத்³தி⁴யா ‘‘ஸயம்கதம் ஸுக²து³க்க²’’ந்தி வத³தி, தம் படிஸம்ஹரிதும் ப⁴க³வா ‘‘ஸா வேத³னா’’திஆதி³ம் அவோச. தேனாஹ ‘‘ஸா வேத³னாதிஆதி³ ஸயம்கதம் ஸுக²து³க்க²ந்தி லத்³தி⁴யா நிஸேத⁴னத்த²ம் வுத்த’’ந்தி. ஏத்தா²பீதி இமஸ்மிம்பி ஸுத்தே. தத்ராதி யம் வுத்தம் ‘‘ஸா வேத³னா…பே… ஸுக²து³க்க²’’ந்தி, தஸ்மிம் பாடே². ஆதி³ம்ஹியேவாதி ஏத்த² பு⁴ம்மவசனேன ‘‘ஆதி³தோ’’தி தோ-ஸத்³தோ³ ந நிஸ்ஸக்கவசனே. ஏவ-காரேன கோ²-ஸத்³தோ³ அவதா⁴ரணேதி த³ஸ்ஸேதி. யம் பனேத்த² வத்தப்³ப³ம், தம் அனந்தரஸுத்தே வுத்தமேவ. தத்த² பன ‘‘வேத³னாதோ அஞ்ஞோ அத்தா, வேத³னாய காரகோ’’தி லத்³தி⁴கஸ்ஸ தி³ட்டி²க³திகஸ்ஸ வாதோ³ படிக்கி²த்தோ, இத⁴ ‘‘வேத³னா அத்தா’’தி ஏவம்லத்³தி⁴கஸ்ஸாதி அயமேவ விஸேஸோ. தேனாஹ ‘‘ஏவஞ்ஹி ஸதி வேத³னாய ஏவ வேத³னா கதா ஹோதீ’’திஆதி³. இமிஸ்ஸாதி யாய வேத³னாய ஸுக²து³க்க²ம் கதம், இமிஸ்ஸா. புப்³பே³பீதி ஸஸ்ஸதாகாரதோ புப்³பே³பி. புரிமஞ்ஹி அத்த²ந்தி அனந்தரஸுத்தே வுத்தம் அத்த²ம். அட்ட²கதா²யந்தி போராணட்ட²கதா²யம். தந்தி புரிமஸுத்தே வுத்தமத்த²ம். அஸ்ஸாதி இமஸ்ஸ ஸுத்தஸ்ஸ. யஸ்மா திம்ப³ருகோ ‘‘வேத³னாவ அத்தா’’தி க³ண்ஹாதி, தஸ்மா வுத்தம் ‘‘அஹம் ஸா வேத³னா…பே… ந வதா³மீ’’தி.

அஞ்ஞா வேத³னாதிஆதீ³ஸுபி யம் வத்தப்³ப³ம், தம் அனந்தரஸுத்தே வுத்தனயமேவ. காரகவேத³னாதி கத்துபூ⁴தவேத³னா. வேத³னாஸுக²து³க்க²ந்தி வேத³னாபூ⁴தஸுக²து³க்க²ம் கதி²தம், ந வட்டஸுக²து³க்க²ம். ‘‘விபாகஸுக²து³க்க²மேவ வட்டதீ’’தி வுத்தம் ‘‘ஸயம்கதம் ஸுக²ம் து³க்க²’’ந்திஆதி³வசனதோ.

திம்ப³ருகஸுத்தவண்ணனா நிட்டி²தா.

9. பா³லபண்டி³தஸுத்தவண்ணனா

19. அவிஜ்ஜா நீவரணா ப⁴வாதி³-ஆதீ³னவஸ்ஸ நிவாரிதபடிச்சா²தி³கா ஏதஸ்ஸாதி அவிஜ்ஜானீவரணோ, அவிஜ்ஜாய நிவுதோதி ஆஹ ‘‘அவிஜ்ஜாய நிவாரிதஸ்ஸா’’தி. அயம் காயோதி பா³லஸ்ஸ அப்பஹீனகிலேஸஸ்ஸ பச்சுப்பன்னம் அத்தபா⁴வம் ரக்க²ம் கத்வா அவிஜ்ஜாய படிச்சா²தி³தாதீ³னவே அயாதா²வத³ஸ்ஸனவஸேன தண்ஹாய படிலத்³த⁴சித்தஸ்ஸ தம்தம்ப⁴வூபகா³ ஸங்கா²ரா ஸங்க²ரீயந்தி. தேஹி ச அத்தபா⁴வஸ்ஸ அபி⁴னிப்³ப³த்தி, தஸ்மா அயஞ்ச அவிஜ்ஜாய காயோ நிப்³ப³த்தோதி. அஸ்ஸாதி பா³லஸ்ஸ. அயம் அத்தோ²தி ‘‘அயம் காயோ நாமரூபந்தி ச வுத்தோ’’தி அத்தோ² தீ³பேதப்³போ³ உபாதா³னக்க²ந்த⁴ஸளாயதனஸங்க³ஹதோ தேஸம் த⁴ம்மானம். ஏவமேதம் த்³வயந்தி ஏவம் அவிஜ்ஜாய நிவாரிதத்தா, தண்ஹாய ச ஸம்யுத்தத்தா ஏவம் ஸபரஸந்தானக³தஸவிஞ்ஞாணககாயஸங்கா²தம் த்³வயம் ஹோதி. அஞ்ஞத்தா²தி ஸுத்தந்தரேஸு. ‘‘சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாணம், திண்ணம் ஸங்க³தி ப²ஸ்ஸோ’’திஆதி³னா (ம. நி. 1.204, 400; 3.421, 425-426; ஸம். நி. 2.43-45; 4.60-61; கதா². 465, 467) அஜ்ஜ²த்திகபா³ஹிராயதனானி பி⁴ந்தி³த்வா சக்கு²ரூபாதி³த்³வயானி படிச்ச சக்கு²ஸம்ப²ஸ்ஸாத³யோ வுத்தா, இத⁴ பன அபி⁴ந்தி³த்வா ச² அஜ்ஜ²த்திகபா³ஹிராயதனானி படிச்ச சக்கு²ஸம்ப²ஸ்ஸாத³யோ வுத்தா ‘‘த்³வயம் படிச்ச ப²ஸ்ஸோ’’தி, தஸ்மா மஹாத்³வயம் நாம கிரேதம் அனவஸேஸதோ அஜ்ஜ²த்திகபா³ஹிராயதனானம் க³ஹிதத்தா. அஜ்ஜ²த்திகபா³ஹிரானி ஆயதனானீதி ஏத்தா²பி ஹி ஸளாயதனானி ஸங்க³ஹிதானேவ. ப²ஸ்ஸகாரணானீதி ப²ஸ்ஸபவத்தியா பச்சயானி. யேஹீதி ஹேதுத³ஸ்ஸனமத்தந்தி ஆஹ ‘‘யேஹி காரணபூ⁴தேஹீ’’தி. ப²ஸ்ஸோ ஏவ பு²ஸனகிச்சோ, ந ப²ஸ்ஸாயதனானீதி வுத்தம் ‘‘ப²ஸ்ஸேன பு²ட்டோ²’’தி. பரிபுண்ணவஸேனாதி அவேகல்லவஸேன. அபரிபுண்ணாயதனானம் ஹீனானி ப²ஸ்ஸஸ்ஸ காரணானி ஹோந்தி, தேஸம் வியாதி ‘‘ஏதேஸம் வா அஞ்ஞதரேனா’’தி வுத்தம். காயனிப்³ப³த்தனாதி³ம்ஹீதி ஸவிஞ்ஞாணகஸ்ஸ காயஸ்ஸ நிப்³ப³த்தனம் காயனிப்³ப³த்தனம், காயோ வா நிப்³ப³த்ததி ஏதேனாதி காயனிப்³ப³த்தனம், கிலேஸாபி⁴ஸங்கா²ரா. ஆதி³ஸத்³தே³ன ப²ஸ்ஸஸளாயதனாதி³ஸங்க³ஹோ. அதி⁴கம் பயஸதி பயுஞ்ஜதி ஏதேனாதி அதி⁴ப்பயாஸோ, விஸேஸகாரணந்தி ஆஹ ‘‘அதி⁴கபயோகோ³’’தி.

ப⁴க³வா அம்ஹாகம் உப்பாத³கபா⁴வேன மூலபா⁴வேன ப⁴க³வம்மூலகா. இமே த⁴ம்மாதி இமே காரணத⁴ம்மா. யேஹி மயம் பா³லபண்டி³தானம் ஸமானேபி காயனிப்³ப³த்தனாதி³ம்ஹி விஸேஸம் ஜானேய்யாம, தேனாஹ ‘‘புப்³பே³ கஸ்ஸபஸம்மாஸம்பு³த்³தே⁴ன உப்பாதி³தா’’திஆதி³. ஆஜானாமாதி அபி⁴முக²ம் பச்சக்க²தோ ஜானாம. படிவிஜ்ஜா²மாதி தஸ்ஸேவ வேவசனம், அதி⁴க³ச்சா²மாதி அத்தோ². நேதாதி அம்ஹாகம் ஸந்தானே பாபேதா. வினேதாதி யதா² அலமரியஞாணத³ஸ்ஸனவிஸேஸோ ஹோதி, ஏவம் விஸேஸதோ நேதா, தத³ங்க³வினயாதி³வஸேன வா வினேதா. அனுனேதாதி அனுரூபம் நேதா. அந்தரந்தரா யதா²த⁴ம்மபஞ்ஞத்தியா பஞ்ஞாபிதானம் த⁴ம்மானம் அனுரூபதோ த³ஸ்ஸனம் ஹோதீதி ஆஹ ‘‘யதா²ஸபா⁴வதோ …பே… த³ஸ்ஸேதா’’தி. ஆபாத²ம் உபக³ச்ச²ந்தானம் ப⁴க³வா படிஸரணம் ஸமோஸரணட்டா²னந்தி ப⁴க³வம்படிஸரணா த⁴ம்மா. தேனாஹ ‘‘சதுபூ⁴மகத⁴ம்மா’’திஆதி³. படிஸரதி படிவிஜ்ஜ²தீதி படிஸரணம், தஸ்மா படிவிஜ்ஜ²னவஸேன ப⁴க³வா படிஸரணம் ஏதேஸந்தி ப⁴க³வம்படிஸரணா. தேனாஹ ‘‘அபி சா’’திஆதி³. ப²ஸ்ஸோ ஆக³ச்ச²தீதி படிவிஜ்ஜ²னகவஸேன ப²ஸ்ஸோ ஞாணஸ்ஸ ஆபாத²ம் ஆக³ச்ச²தி, ஆபாத²ம் ஆக³ச்ச²ந்தோயேவ ஸோ அத்த²தோ ‘‘அஹம் கின்னாமோ’’தி நாமம் புச்ச²ந்தோ விய, ப⁴க³வா சஸ்ஸ நாமம் கரோந்தோ விய ஹோதீதி வுத்தம் ‘‘அஹம் ப⁴க³வா’’திஆதி³. உபட்டா²தூதி ஞாணஸ்ஸ பச்சுபட்டா²து. ப⁴க³வந்தம்யேவ படிபா⁴தூதி ப⁴க³வதோ ஏவ பா⁴கோ³ ஹோது, ப⁴க³வாவ நம் அத்தனோ பா⁴க³ம் கத்வா விஸ்ஸஜ்ஜேதூதி அத்தோ², ப⁴க³வதோ பா⁴கோ³ யதி³த³ம் த⁴ம்மஸ்ஸ அக்கா²னம், அம்ஹாகம் பன ஸவனம் பா⁴கோ³தி அயமேத்த² அதி⁴ப்பாயோ. ஏவஞ்ஹி ஸத்³த³லக்க²ணேன ஸமேதி. கேசி பன படிபா⁴தூதி அத்த²ம் வத³ந்தி ஞாணேன தி³ஸ்ஸது தே³ஸீயதூதி வா அத்தோ². தேனாஹ ‘‘தும்ஹேயேவ நோ கதே²த்வா தே³தா²தி அத்தோ²’’தி.

பா³லஸ்ஸ பண்டி³தஸ்ஸ ச காயஸ்ஸ நிப்³ப³த்தியா பச்சயபூ⁴தா அவிஜ்ஜா ச தண்ஹா ச. தேனாஹ ‘‘கம்மம்…பே… நிருத்³தா⁴’’தி. ஜவாபேத்வாதி க³ஹிதஜவனம் கத்வா, யதா² படிஸந்தி⁴ம் ஆகட்³டி⁴தும் ஸமத்த²ம் ஹோதி, ஏவம் கத்வா. யதி³ நிருத்³தா⁴, கத²ம் அப்பஹீனாதி வுத்தந்தி ஆஹ ‘‘யதா² பனா’’திஆதி³. ப⁴வதி ஹி தம்ஸதி³ஸேபி தப்³போ³ஹாரோ யதா² ‘‘ஸா ஏவ தித்திரீ, தானேவ ஓஸதா⁴னி, தஸ்ஸேவ கம்மஸ்ஸ விபாகாவஸேஸேனா’’தி ச. து³க்க²க்க²யாயாதி தத³த்த²விஸேஸனத்த²ந்தி ஆஹ ‘‘க²யத்தா²யா’’தி. படிஸந்தி⁴காயந்தி படிஸந்தி⁴க³ஹணபுப்³ப³கம் காயம். பாளியம் ‘‘பா³லேனா’’தி கரணவசனம் நிஸ்ஸக்கேதி ஆஹ ‘‘பா³லதோ’’தி. பா⁴வினா ஸஹ படிஸந்தி⁴னா ஸப்படிஸந்தி⁴கோ. யோ பன ஏகந்ததோ தேனத்தபா⁴வேன அரஹத்தம் பத்தும் ப⁴ப்³போ³, ஸோ பா⁴வினா படிஸந்தி⁴னா ‘‘அப்படிஸந்தி⁴கோ’’தி, ததோ விஸேஸனத்த²ம் ‘‘ஸப்படிஸந்தி⁴கோ’’தி வுத்தம். கிஞ்சாபி வுத்தம், ஸோ ச யாவ அரியபூ⁴மிம் ந ஓக்கமதி, தாவ பா³லத⁴ம்மஸமங்கீ³ ஏவாதி கத்வா ‘‘ஸப்³போ³பி புது²ஜ்ஜனோ பா³லோ’’தி வுத்தம். ததா² ஹி ‘‘அப்படிஸந்தி⁴கோ கீ²ணாஸவோ பண்டி³தோ’’தி கீ²ணாஸவ-ஸத்³தே³ன அப்படிஸந்தி⁴கோ விஸேஸிதோ. யதி³ ஏவம் ஸேக்கா² கத²ந்தி ஆஹ ‘‘ஸோதாபன்னா’’திஆதி³. தே ஹி ஸிகா²பத்தபண்டி³ச்சபா⁴வலக்க²ணாபா⁴வதோ பண்டி³தாதி ந வத்தப்³பா³ கீ²ணாஸவா விய, ப³லவதரானம் பன பா³லத⁴ம்மானம் பஹீனத்தா பா³லாதிபி ந வத்தப்³பா³ புது²ஜ்ஜனா விய. ப⁴ஜியமானா பன சதுஸச்சஸம்படிவேத⁴ம் உபாதா³ய பண்டி³தபக்க²ம் ப⁴ஜந்தி, ந பா³லபக்க²ம் வுத்தகாரணேனாதி.

பா³லபண்டி³தஸுத்தவண்ணனா நிட்டி²தா.

10. பச்சயஸுத்தவண்ணனா

20. ஸப்³ப³ம்பி ஸங்க²தம் அப்படிச்ச உப்பன்னம் நாம நத்தீ²தி பச்சயத⁴ம்மோபி அத்தனோ பச்சயத⁴ம்மம் உபாதா³ய பச்சயுப்பன்னோ, ததா² பச்சயுப்பன்னத⁴ம்மோபி அத்தனோ பச்சயுப்பன்னம் உபாதா³ய பச்சயத⁴ம்மோதி யதா²ரஹம் த⁴ம்மானம் பச்சயபச்சயுப்பன்னதா. யேஸம் வினேய்யானம் படிச்சஸமுப்பாத³தே³ஸனாயேவ ஸுபோ³த⁴தோ உபட்டா²தி, தேஸம் வஸேன ஸுட்டு² விபா⁴க³ம் கத்வா படிச்சஸமுப்பாதோ³ தே³ஸிதோ. யேஸம் பன வினேய்யானம் தது³ப⁴யஸ்மிம் விப⁴ஜ்ஜ ஸுதே ஏவ த⁴ம்மாபி⁴ஸமயோ ஹோதி, தே ஸந்தா⁴ய ப⁴க³வா தது³ப⁴யம் விப⁴ஜ்ஜ த³ஸ்ஸேந்தோ ‘‘படிச்சஸமுப்பாத³ஞ்ச வோ, பி⁴க்க²வே, தே³ஸேஸ்ஸாமி படிச்சஸமுப்பன்னே ச த⁴ம்மே’’தி இமம் தே³ஸனம் ஆரபீ⁴தி இமமத்த²ம் விபா⁴வேந்தோ ‘‘ஸத்தா² இமஸ்மிம் ஸுத்தே’’திஆதி³மாஹ. பச்சயஸ்ஸ பா⁴வோ பச்சயத்தம், பச்சயனிப்³ப³த்ததா. அஸபா⁴வத⁴ம்மே ந லப்³ப⁴தீதி ‘‘ஸபா⁴வத⁴ம்மே’’தி வுத்தம். நனு ச ஜாதி ஜரா மரணஞ்ச ஸபா⁴வத⁴ம்மோ ந ஹோதி, யேஸம் பன க²ந்தா⁴னம் ஜாதி ஜரா மரணஞ்ச, தே ஏவ ஸபா⁴வத⁴ம்மா, அத² கஸ்மா தே³ஸனாய தே க³ஹிதாதி? நாயம் தோ³ஸோ, ஜாதி ஜரா மரணஞ்ஹி பச்சயனிப்³ப³த்தானம் ஸபா⁴வத⁴ம்மானம் விகாரமத்தம், நஞ்ஞேஸம், தஸ்மா தே க³ஹிதாதி. உப்பாதா³ வா ததா²க³தானந்தி ந வினேய்யபுக்³க³லானம் மக்³க³ப²லுப்பத்தி விய ஜாதிபச்சயா ஜராமரணுப்பத்தி ததா²க³துப்பாதா³யத்தா, அத² கோ² ஸா ததா²க³தானம் உப்பாதே³பி அனுப்பாதே³பி ஹோதியேவ. தஸ்மா ஸா காமம் அஸங்க²தா விய தா⁴து ந நிச்சா, ததா²பி ‘‘ஸப்³ப³காலிகா’’தி ஏதேன ஜாதிபச்சயதோ ஜராமரணுப்பத்தீதி த³ஸ்ஸேதி. தேனாஹ ‘‘ஜாதியேவ ஜராமரணஸ்ஸ பச்சயோ’’தி. ஜாதிபச்சயாதி ச ஜாதிஸங்கா²தபச்சயா. ஹேதும்ஹி நிஸ்ஸக்கவசனம். டி²தாவ ஸா தா⁴து, யாயம் இத³ப்பச்சயதா ஜாதியா ஜராமரணஸ்ஸ பச்சயதா தஸ்ஸ ப்³யபி⁴சாராபா⁴வதோ. இதா³னி ந கதா³சி ஜாதி ஜராமரணஸ்ஸ பச்சயோ ந ஹோதி ஹோதியேவாதி ஜராமரணஸ்ஸ பச்சயபா⁴வே நியமேதி. உப⁴யேனபி யதா²வுத்தஸ்ஸ பச்சயபா⁴வோ யத்த² ஹோதி, தத்த² அவஸ்ஸம்பா⁴விதம் த³ஸ்ஸேதி. தேனாஹ ப⁴க³வா ‘‘டி²தாவ ஸா தா⁴தூ’’தி. த்³வீஹி பதே³ஹி. திட்ட²ந்தீதி யஸ்ஸ வஸேன த⁴ம்மானம் டி²தி, ஸா இத³ப்பச்சயதா த⁴ம்மட்டி²ததா. த⁴ம்மேதி பச்சயுப்பன்னே த⁴ம்மே. நியமேதி விஸேஸேதி. ஹேதுக³தவிஸேஸஸமாயோகோ³ ஹி ஹேதுப²லஸ்ஸ ஏவம் த⁴ம்மதானியாமோ ஏவாதி.

அபரோ நயோ – டி²தாவ ஸா தா⁴தூதி யாயம் ஜராமரணஸ்ஸ இத³ப்பச்சயதா ‘‘ஜாதிபச்சயா ஜராமரண’’ந்தி, ஏஸா தா⁴து ஏஸ ஸபா⁴வோ. ததா²க³தானம் உப்பாத³தோ புப்³பே³ உத்³த⁴ஞ்ச அப்படிவிஜ்ஜி²யமானோ, மஜ்ஜே² ச படிவிஜ்ஜி²யமானோ ந ததா²க³தேஹி உப்பாதி³தோ, அத² கோ² ஸம்ப⁴வந்தஸ்ஸ ஜராமரணஸ்ஸ ஸப்³ப³காலம் ஜாதிபச்சயதோ ஸம்ப⁴வோதி டி²தாவ ஸா தா⁴து, கேவலம் பன ஸயம்பு⁴ஞாணேன அபி⁴ஸம்பு³ஜ்ஜ²னதோ ‘‘அயம் த⁴ம்மோ ததா²க³தேன அபி⁴ஸம்பு³த்³தோ⁴’’தி பவேத³னதோ ச ததா²க³தோ ‘‘த⁴ம்மஸாமீ’’தி வுச்சதி, ந அபுப்³ப³ஸ்ஸ உப்பாத³னதோ. தேன வுத்தம் ‘‘டி²தாவ ஸா தா⁴தூ’’தி. ஸா ஏவ ‘‘ஜாதிபச்சயா ஜராமரண’’ந்தி ஏத்த² விபல்லாஸாபா⁴வதோ ஏவம் அவபு³ஜ்ஜ²மானஸ்ஸ ஏதஸ்ஸ ஸபா⁴வஸ்ஸ, ஹேதுனோ வா ததே²வ பா⁴வதோ டி²ததாதி த⁴ம்மட்டி²ததா, ஜாதி வா ஜராமரணஸ்ஸ உப்பாத³ட்டி²தி பவத்தஆயூஹன-ஸம்யோக³-பலிபோ³த⁴-ஸமுத³ய-ஹேதுபச்சயட்டி²தீதி தது³ப்பாதா³தி³பா⁴வேனஸ்ஸா டி²ததா ‘‘த⁴ம்மட்டி²ததா’’தி ப²லம் பதி ஸாமத்தி²யதோ ஹேதுமேவ வத³தி. தா⁴ரீயதி பச்சயேஹீதி வா த⁴ம்மோ, திட்ட²தி தத்த² ததா³யத்தவுத்திதாய ப²லந்தி டி²தி, த⁴ம்மஸ்ஸ டி²தி த⁴ம்மட்டி²தி. த⁴ம்மோதி வா காரணம் பச்சயபா⁴வேன ப²லஸ்ஸ தா⁴ரணதோ, தஸ்ஸ டி²தி ஸபா⁴வோ, த⁴ம்மதோ ச அஞ்ஞோ ஸபா⁴வோ நத்தீ²தி த⁴ம்மட்டி²தி, பச்சயோ. தேனாஹ ‘‘பச்சயபரிக்³க³ஹே பஞ்ஞா த⁴ம்மட்டி²திஞாண’’ந்தி (படி. ம. மாதிகா 4). த⁴ம்மட்டி²தி ஏவ த⁴ம்மட்டி²ததா. ஸா ஏவ தா⁴து ‘‘ஜாதிபச்சயா ஜராமரண’’ந்தி இமஸ்ஸ ஸபா⁴வஸ்ஸ, ஹேதுனோ வா அஞ்ஞத²த்தாபா⁴வதோ, ‘‘ந ஜாதிபச்சயா ஜராமரண’’ந்தி விஞ்ஞாயமானஸ்ஸ ச தப்³பா⁴வாபா⁴வதோ நியாமதா வவத்தி²தபா⁴வோதி த⁴ம்மனியாமதா. ப²லஸ்ஸ வா ஜராமரணஸ்ஸ ஜாதியா ஸதி ஸம்ப⁴வோ த⁴ம்மே ஹேதும்ஹி டி²ததாதி த⁴ம்மட்டி²ததா, அஸதி அஸம்ப⁴வோ த⁴ம்மனியாமதாதி ஏவம் ப²லேன ஹேதும் விபா⁴வேதி, தம் ‘‘டி²தாவ ஸா தா⁴தூ’’திஆதி³னா வுத்தம். இமேஸம் ஜராமரணாதீ³னம் பச்சயதாஸங்கா²தம் இத³ப்பச்சயதம் அபி⁴ஸம்பு³ஜ்ஜ²தி பச்சக்க²கரணேன அபி⁴முக²ம் பு³ஜ்ஜ²தி யாதா²வதோ படிவிஜ்ஜ²தி, ததோ ஏவ அபி⁴ஸமேதி அபி⁴முக²ம் ஸமாக³ச்ச²தி, ஆதி³தோ கதே²ந்தோ ஆசிக்க²தி, உத்³தி³ஸதீதி அத்தோ². தமேவ உத்³தே³ஸம் பரியோஸாபேந்தோ தே³ஸேதி. யதா²உத்³தி³ட்ட²மத்தம் நித்³தி³ஸனவஸேன பகாரேஹி ஞாபேந்தோ பஞ்ஞாபேதி. பகாரேஹி ஏவ பதிட்ட²பேந்தோ பட்ட²பேதி. யதா²னித்³தி³ட்ட²ம் படினித்³தே³ஸவஸேன விவரதி விப⁴ஜதி. விவடஞ்ஹி விப⁴த்தஞ்ச அத்த²ம் ஹேதூதா³ஹரணத³ஸ்ஸனேஹி பாகடம் கரோந்தோ உத்தானீகரோதி. உத்தானீகரோந்தோ ததா² பச்சக்க²பூ⁴தம் கத்வா நிக³மனவஸேன பஸ்ஸதா²தி சாஹ.

ஜாதிபச்சயா ஜராமரணந்திஆதீ³ஸூதி ஜாதிஆதீ³னம் ஜராமரணபச்சயபா⁴வேஸு. தேஹி தேஹி பச்சயேஹீதி யாவதகேஹி பச்சயேஹி யம் ப²லம் உப்பஜ்ஜமானாரஹம், அவிகலேஹி தேஹேவ தஸ்ஸ உப்பத்தி, ந ஊனாதி⁴கேஹீதி. தேனாஹ ‘‘அனூனாதி⁴கேஹேவா’’தி. யதா² தம் சக்கு²ரூபாலோகமனஸிகாரேஹி சக்கு²விஞ்ஞாணஸ்ஸ ஸம்ப⁴வோதி. தேன தம்தம்ப²லனிப்பா²த³னே தஸ்ஸா பச்சயஸாமக்³கி³யா தப்பகாரதா தத²தாதி வுத்தாதி த³ஸ்ஸேதி. ஸாமக்³கி³ந்தி ஸமோதா⁴னம், ஸமவாயந்தி அத்தோ². அஸம்ப⁴வாபா⁴வதோதி அனுப்பஜ்ஜனஸ்ஸ அபா⁴வதோ. ததா²வித⁴பச்சயஸாமக்³கி³யஞ்ஹி ஸதிபி ப²லஸ்ஸ அனுப்பஜ்ஜனே தஸ்ஸாவிதத²தா ஸியா. அஞ்ஞத⁴ம்மபச்சயேஹீதி அஞ்ஞஸ்ஸ ப²லத⁴ம்மஸ்ஸ பச்சயேஹி. அஞ்ஞத⁴ம்மானுப்பத்திதோதி ததோ அஞ்ஞஸ்ஸ ப²லத⁴ம்மஸ்ஸ அனுப்பஜ்ஜனதோ. ந ஹி கதா³சி சக்கு²ரூபாலோகமனஸிகாரேஹி ஸோதவிஞ்ஞாணஸ்ஸ ஸம்ப⁴வோ அத்தி². யதி³ ஸியா, தஸ்ஸா ஸாமக்³கி³யா அஞ்ஞத²தா நாம ஸியா, ந சேதம் அத்தீ²தி ‘‘அனஞ்ஞத²தா’’தி வுத்தம். பச்சயதோதி பச்சயபா⁴வதோ. பச்சயஸமூஹதோதி ஏத்தா²பி ஏஸேவ நயோ. இத³ப்பச்சயா ஏவ இத³ப்பச்சயதாதி தா-ஸத்³தே³ன பத³ம் வட்³டி⁴தம் யதா² ‘‘தே³வோயேவ தே³வதா’’தி, இத³ப்பச்சயானம் ஸமூஹோ இத³ப்பச்சயதாதி ஸமூஹத்தோ² தாஸத்³தோ³ யதா² ‘‘ஜனானம் ஸமூஹோ ஜனதா’’தி இமமத்த²ம் ஸந்தா⁴யாஹ ‘‘லக்க²ணம் பனேத்த² ஸத்³த³ஸத்த²தோ வேதி³தப்³ப³’’ந்தி.

ந நிச்சம் ஸஸ்ஸதந்தி அனிச்சம். ஜராமரணம் ந அனிச்சம் ஸங்கா²ரானம் விகாரபா⁴வதோ அனிப்ப²ன்னத்தா, ததா²பி ‘‘அனிச்ச’’ந்தி பரியாயேன வுத்தம். ஏஸ நயோ ஸங்க²தாதீ³ஸுபி. ஸமாக³ந்த்வா கதம் ஸஹிதேஹேவ பச்சயேஹி நிப்³ப³த்தேதப்³ப³தோ யதா²ஸபா⁴வம் ஸமேச்ச ஸம்பு⁴ய்ய பச்சயேஹி கதந்தி ஸங்க²தம். பச்சயாரஹம் பச்சயம் படிச்ச ந வினா தேன ஸஹிதஸமேதமேவ உப்பன்னந்தி படிச்சஸமுப்பன்னம். தேனாஹ ‘‘பச்சயே நிஸ்ஸாய உப்பன்ன’’ந்தி. க²யஸபா⁴வந்தி பி⁴ஜ்ஜனஸபா⁴வம். விக³ச்ச²னகஸபா⁴வந்தி ஸகபா⁴வதோ அபக³ச்ச²னகஸபா⁴வம். விரஜ்ஜனகஸபா⁴வந்தி பலுஜ்ஜனகஸபா⁴வம். நிருஜ்ஜ²னகஸபா⁴வந்தி க²ணப⁴ங்க³வஸேன பப⁴ங்கு³ஸபா⁴வம். வுத்தனயேனாதி ஜராய வுத்தனயேன. ஜனகப்பச்சயானம் கம்மாதீ³னம். கிச்சானுபா⁴வக்க²ணேதி ஏத்த² கிச்சானுபா⁴வோ நாம யதா² பவத்தமானே பச்சயே தஸ்ஸ ப²லம் உப்பஜ்ஜதி, ததா² பவத்தி, ஏவம் ஸந்தஸ்ஸ பவத்தனக்க²ணே. இத³ம் வுத்தம் ஹோதி – யஸ்மிம் க²ணே பச்சயோ அத்தனோ ப²லுப்பாத³னம் பதி ப்³யாவடோ நாம ஹோதி, இமஸ்மிம் க²ணே யே த⁴ம்மா ரூபாத³யோ உபலப்³ப⁴ந்தி ததோ புப்³பே³, பச்சா² ச அனுபலப்³ப⁴மானா, தேஸம் ததோ உப்பத்தி நித்³தா⁴ரீயதி, ஏவம் ஜாதியாபி ஸா நித்³தா⁴ரேதப்³பா³ தம்க²ணூபலத்³த⁴தோதி. யதி³ ஏவம் நிப்பரியாயதோவ ஜாதியா குதோசி உப்பத்தி ஸித்³தி⁴, அத² கஸ்மா ‘‘ஏகேன பரியாயேனா’’தி வுத்தந்தி? ஜாயமானத⁴ம்மானம் விகாரபா⁴வேன உபலத்³த⁴ப்³ப³த்தா. யதி³ நிப்ப²ன்னத⁴ம்மா விய ஜாதி உபலப்³பே⁴ய்ய, நிப்பரியாயதோவ தஸ்ஸா குதோசி உப்பத்தி ஸியா, ந சேவம் உபலப்³ப⁴தி, அத² கோ² அனிப்ப²ன்னத்தா விகாரபா⁴வேன உபலப்³ப⁴தி. தஸ்மா ‘‘ஏகேன பரியாயேனேத்த² அனிச்சாதிஆதீ³னி யுஜ்ஜந்தீ’’தி வுத்தம். ந பன ஜராமரணே, ஜனகப்பச்சயானம் கிச்சானுபா⁴வக்க²ணே தஸ்ஸ அலப்³ப⁴னதோ. தேனேவ ‘‘ஏத்த² ச அனிச்சந்தி…பே… அனிச்சம் நாம ஜாத’’ந்தி வுத்தம்.

ஸவிபஸ்ஸனாயாதி ஏத்த² ஸஹ-ஸத்³தோ³ அப்பதா⁴னபா⁴வதீ³பனோ ‘‘ஸமக்கி²கம், ஸமகஸ’’ந்திஆதீ³ஸு விய. அப்பதா⁴னபூ⁴தா ஹி விபஸ்ஸனா, யதா²பூ⁴தத³ஸ்ஸனமக்³க³பஞ்ஞா பஜானாதி. ‘‘புரிமம் அந்த’’ந்தி வுச்சமானே பச்சுப்பன்னபா⁴வஸ்ஸபி க³ஹணம் ஸியாதி ‘‘புரிமம் அந்தம் அதீத’’ந்தி வுத்தம். விஜ்ஜமானதஞ்ச அவிஜ்ஜமானதஞ்சாதி ஸஸ்ஸதாஸங்கம் நிஸ்ஸாய ‘‘அஹோஸிம் நு கோ² அஹமதீதமத்³தா⁴ன’’ந்தி அதீதே அத்தனோ விஜ்ஜமானதம், அதி⁴ச்சஸமுப்பத்திஆஸங்கம் நிஸ்ஸாய ‘‘யதோ பபு⁴தி அஹம், ததோ புப்³பே³ ந நு கோ² அஹோஸி’’ந்தி அதீதே அத்தனோ அவிஜ்ஜமானதஞ்ச கங்க²தி. கஸ்மா? விசிகிச்சா²ய ஆகாரத்³வயாவலம்ப³னதோ. தஸ்ஸா பன அதீதவத்து²தாய க³ஹிதத்தா ஸஸ்ஸதாதி⁴ச்சஸமுப்பத்திஆகாரனிஸ்ஸிததா த³ஸ்ஸிதா ஏவ. ஆஸப்பனபரிஸப்பனபவத்திகம் கத்த²சிபி அப்படிவத்திஹேதுபூ⁴தம் விசிகிச்ச²ம் கஸ்மா உப்பாதே³தீதி ந விசாரேதப்³ப³மேதந்தி த³ஸ்ஸேந்தோ ஆஹ ‘‘கிம்காரணந்தி ந வத்தப்³ப³’’ந்தி. காரணம் வா விசிகிச்சா²ய அயோனிஸோமனஸிகாரோ, தஸ்ஸ அந்த⁴பா³லபுது²ஜ்ஜனபா⁴வோ, அரியானம் அத³ஸ்ஸாவிதா சாதி த³ட்ட²ப்³ப³ம். ஜாதிலிங்கு³பபத்தியோதி க²த்தியப்³ராஹ்மணாதி³ஜாதிம், க³ஹட்ட²பப்³ப³ஜிதாதி³லிங்க³ம், தே³வமனுஸ்ஸாதி³உபபத்திஞ்ச. நிஸ்ஸாயாதி உபாதா³ய. தஸ்மிம் காலே யம் ஸந்தானம் மஜ்ஜி²மம் பமாணம், தேன யுத்தோ பமாணிகோ, தத³பா⁴வதோ அதி⁴கபா⁴வதோ வா ‘‘அப்பமாணிகோ’’தி வேதி³தப்³போ³. கேசீதி ஸாரஸமாஸாசரியா. தே ஹி ‘‘கத²ம் நு கோ²’’தி இஸ்ஸரேன வா ப்³ரஹ்முனா வா புப்³ப³கதேன வா அஹேதுதோ வா நிப்³ப³த்தோதி சிந்தேதீதி வத³ந்தி. அஹேதுதோ நிப்³ப³த்திகங்கா²பி ஹி ஹேதுபராமஸனமேவாதி. பரம்பரந்தி புப்³பா³பரப்பவத்திம். அத்³தா⁴னந்தி காலாதி⁴வசனம், தஞ்ச பு⁴ம்மத்தே² உபயோக³வசனம் த³ட்ட²ப்³ப³ம். விஜ்ஜமானதஞ்ச அவிஜ்ஜமானதஞ்சாதி ஸஸ்ஸதாஸங்கம் நிஸ்ஸாய ‘‘ப⁴விஸ்ஸாமி நு கோ² அஹம் அனாக³தமத்³தா⁴ன’’ந்தி அனாக³தே அத்தனோ விஜ்ஜமானதம், உச்சே²தா³ஸங்கம் நிஸ்ஸாய ‘‘யஸ்மிஞ்ச அத்தபா⁴வே உச்சே²த³னகங்கா², ததோ பரம் நு கோ² ப⁴விஸ்ஸாமீ’’தி அனாக³தே அத்தனோ அவிஜ்ஜமானதஞ்ச கங்க²தீதி ஹேட்டா² வுத்தனயேன யோஜேதப்³ப³ம்.

பச்சுப்பன்னம் அத்³தா⁴னந்தி அத்³தா⁴பச்சுப்பன்னஸ்ஸ இதா⁴தி⁴ப்பேதத்தா ‘‘படிஸந்தி⁴மாதி³ம் கத்வா’’திஆதி³ வுத்தம். ‘‘இத³ம் கத²ம், இத³ம் கத²’’ந்தி பவத்தனதோ கத²ம்கதா², விசிகிச்சா², ஸா அஸ்ஸ அத்தீ²தி கத²ம்கதீ². தேனாஹ ‘‘விசிகிச்சீ²’’தி. கா ஏத்த² சிந்தா? உம்மத்தகோ விய பா³லபுது²ஜ்ஜனோதி படிகச்சேவ வுத்தந்தி அதி⁴ப்பாயோ. தம் மஹாமாதாய புத்தம். முண்டே³ஸுந்தி முண்டே³ன அனிச்ச²ந்தம் ஜாக³ரணகாலே ந ஸக்காதி ஸுத்தம் முண்டே³ஸும் குலத⁴ம்மவஸேன யதா² ஏகச்சே குலதாபஸா. ராஜப⁴யேனாதி ச வத³ந்தி. ஸீதிபூ⁴தந்தி இத³ம் மது⁴ரகபா⁴வப்பத்தியா காரணவசனம். ‘‘ஸேதபூ⁴த’’ந்திபி பாடோ², உத³கே சிரட்டா²னேன ஸேதபா⁴வம் பத்தந்தி அத்தோ².

அத்தனோ க²த்தியபா⁴வம் கங்க²தி கண்ணோ விய ஸூதபுத்தஸஞ்ஞீ, ஸூதபுத்தஸஞ்ஞீதி ஸூரியதே³வபுத்தஸ்ஸ புத்தஸஞ்ஞீ. ஜாதியா விபா⁴வியமானாய ‘‘அஹ’’ந்தி தஸ்ஸ அத்தனோ பராமஸனம் ஸந்தா⁴யாஹ ‘‘ஏவம்பி ஸியா கங்கா²’’தி. மனுஸ்ஸாபி ச ராஜானோ வியாதி மனுஸ்ஸாபி ச கேசி ஏகச்சே ராஜானோ வியாதி அதி⁴ப்பாயோ. வுத்தனயமேவ ‘‘ஸண்டா²னாகாரம் நிஸ்ஸாயா’’திஆதி³னா. ஏத்தா²தி ‘‘கத²ம் நு கோ²ஸ்மீ’’தி பதே³. அப்³ப⁴ந்தரே ஜீவோதி பரபரிகப்பிதம் அந்தரத்தானம் வத³தி. ஸோளஸம்ஸாதீ³னந்தி ஆதி³-ஸத்³தே³ன ஸரீரபரிமாணஅங்கு³ட்ட²-யவபரமாணுபரிமாணதாதி³கே ஸங்க³ண்ஹாதி. ஸத்தபஞ்ஞத்தி ஜீவவிஸயாதி தி³ட்டி²க³திகானம் மதிமத்தம், பரமத்த²தோ பன ஸா அத்தபா⁴வவிஸயாவாதி ஆஹ ‘‘அத்தபா⁴வஸ்ஸ ஆக³திக³திட்டா²ன’’ந்தி. யதாயம் ஆக³தோ, யத்த² ச க³மிஸ்ஸதி, தம் டா²னந்தி அத்தோ². ஸோதாபன்னோ அதி⁴ப்பேதோ விசிகிச்சா²பஹானஸ்ஸ தி³ட்ட²த்தா. இதரேபி தயோதி ஸகதா³கா³மீஆத³யோ அவாரிதா ஏவ. ‘‘அயஞ்ச…பே… ஸுதி³ட்டா²’’தி நிப்பதே³ஸதோ ஸச்சஸம்படிவேத⁴ஸ்ஸ ஜோதிதத்தா.

பச்சயஸுத்தவண்ணனா நிட்டி²தா.

ஆஹாரவக்³க³வண்ணனா நிட்டி²தா.