6. த⁴ம்மகதி²கஸுத்தவண்ணனா

16. நிப்³பி³ந்த³னத்தா²யாதி நிப்³பி³தா³னுபஸ்ஸனாபடிலாபா⁴ய. ஸா ஹி ஜராமரணஸீஸேன வுத்தேஸு ஸங்க²தத⁴ம்மேஸு நிப்³பி³ந்த³னாகாரேன பவத்ததி. விரஜ்ஜனத்தா²யாதி விராகா³னுபஸ்ஸனாபடிலாபா⁴ய. ஸீலதோ பட்டா²யாதி விவட்டஸன்னிஸ்ஸிதஸீலஸமாதா³னதோ பட்டா²ய. ஸோதாபத்தியங்கே³ஹி ஸமன்னாக³தோ விவட்டஸன்னிஸ்ஸிதஸீலே பதிட்டி²தோ உபாஸகோபி பகே³வ சதுபாரிஸுத்³தி⁴ஸீலே பதிட்டி²தோ பி⁴க்கு² ஸம்மாபடிபன்னோ நாம. தேனாஹ ‘‘யாவ அரஹத்தமக்³கா³ படிபன்னோதி வேதி³தப்³போ³’’தி. நிப்³பா³னத⁴ம்மஸ்ஸாதி நிப்³பா³னாவஹஸ்ஸ அரியஸ்ஸ மக்³க³ஸ்ஸ. அனுரூபஸபா⁴வபூ⁴தந்தி நிப்³பா³னாதி⁴க³மஸ்ஸ அனுச்ச²விகஸபா⁴வபூ⁴தம். நிப்³பி³தா³தி இமினா வுட்டா²னகா³மினிபரியோஸானம் விபஸ்ஸனம் வத³தி. விராகா³ நிரோதா⁴தி பத³த்³வயேன அரியமக்³க³ம், இதரேன ப²லம். ஏத்தா²தி இமஸ்மிம் ஸுத்தே. ஏகேன நயேனாதி பட²மேன நயேன. தத்த² ஹி ப⁴க³வா தேன பி⁴க்கு²னா த⁴ம்மகதி²கலக்க²ணம் புச்சி²தோ தம் மத்த²கம் பாபேத்வா விஸ்ஸஜ்ஜேஸி. யோ ஹி விபஸ்ஸனம் மக்³க³ம் அனுபாதா³விமுத்திம் பாபேத்வா கதே²தும் ஸக்கோதி, ஸோ ஏகந்தத⁴ம்மகதி²கோ. தேனாஹ ‘‘த⁴ம்மகதி²கஸ்ஸ புச்சா² கதி²தா’’தி. த்³வீஹீதி து³தியததியனயேஹி. தந்தி புச்ச²ம். விஸேஸேத்வாதி விஸிட்ட²ம் கத்வா. யதா²புச்சி²தமத்தமேவ அகதே²த்வா அபுச்சி²தம்பி அத்த²ம் த³ஸ்ஸேந்தோ த⁴ம்மானுத⁴ம்மபடிபத்திம் அனுபாதா³ய விமுத்திஸங்கா²தம் விஸேஸம் பாபேத்வா. ப⁴க³வா ஹி அப்பம் யாசிதோ ப³ஹும் தே³ந்தோ உளாரபுரிஸோ விய த⁴ம்மகதி²கலக்க²ணம் புச்சி²தோ படிச்சஸமுப்பாத³முகே²ன தஞ்சேவ ததோ ச உத்தரிம் த⁴ம்மானுத⁴ம்மபடிபத்திம் அனுபாதா³விமுத்தஞ்ச விஸ்ஸஜ்ஜேஸி. தத்த² ‘‘நிப்³பி³தா³ய…பே… த⁴ம்மம் தே³ஸேதீ’’தி இமினா த⁴ம்மதே³ஸனம் வாஸனாபா⁴கி³யம் கத்வா த³ஸ்ஸேஸி. ‘‘நிரோதா⁴ய படிபன்னோ ஹோதீ’’தி இமினா நிப்³பே³த⁴பா⁴கி³யம், ‘‘அனுபாதா³விமுத்தோ ஹோதீ’’தி இமினா தே³ஸனம் அஸேக்க²பா⁴கி³யம் கத்வா த³ஸ்ஸேஸி. தேனாஹ ‘‘ஸேக்கா²ஸேக்க²பூ⁴மியோ நித்³தி³ட்டா²’’தி.

த⁴ம்மகதி²கஸுத்தவண்ணனா நிட்டி²தா.