1. பு³த்³த⁴வக்³கோ³

1. படிச்சஸமுப்பாத³ஸுத்தவண்ணனா

1. து³தியஸுத்தாதீ³னிபி படிச்சஸமுப்பாத³வஸேனேவ தே³ஸிதானீதி ஆஹ ‘‘பட²மம் படிச்சஸமுப்பாத³ஸுத்த’’ந்தி. தத்ராதி பத³ம் யே தே³ஸகாலா இத⁴ விஹரணகிரியாய விஸேஸனபா⁴வேன வுத்தா, தேஸம் பரிதீ³பனந்தி த³ஸ்ஸேந்தோ ‘‘யம் ஸமயம்…பே… தீ³பேதீ’’தி ஆஹ. தம்-ஸத்³தோ³ ஹி வுத்தஸ்ஸ அத்த²ஸ்ஸ படினித்³தே³ஸோ, தஸ்மா இத⁴ தே³ஸஸ்ஸ காலஸ்ஸ வா படினித்³தே³ஸோ ப⁴விதும் அரஹதி, ந அஞ்ஞஸ்ஸ. அயம் தாவ தத்ரஸத்³த³ஸ்ஸ படினித்³தே³ஸபா⁴வே அத்த²விபா⁴வனா. யஸ்மா பன ஈதி³ஸேஸு டா²னேஸு தத்ரஸத்³தோ³ த⁴ம்மதே³ஸனாவிஸிட்ட²ம் தே³ஸம் காலஞ்ச விபா⁴வேதி, தஸ்மா வுத்தம் ‘‘பா⁴ஸிதப்³ப³யுத்தே வா தே³ஸகாலே’’தி. தேன தத்ராதி யத்த² ப⁴க³வா த⁴ம்மதே³ஸனத்த²ம் பி⁴க்கூ² ஆலபி அபா⁴ஸி, தாதி³ஸே தே³ஸே, காலே வாதி அத்தோ². ந ஹீதிஆதி³னா தமேவத்த²ம் ஸமத்தே²தி.

நனு ச யத்த² டி²தோ ப⁴க³வா ‘‘அகாலோ கோ² தாவா’’திஆதி³னா பா³ஹியஸ்ஸ த⁴ம்மதே³ஸனம் படிக்கி²பி, தத்தே²வ அந்தரவீதி²யம் டி²தோவ தஸ்ஸ த⁴ம்மம் தே³ஸேஸீதி? ஸச்சமேதம். அதே³ஸேதப்³ப³காலே அதே³ஸனாய ஹி இத³ம் உதா³ஹரணம். தேனாஹ ‘‘அகாலோ கோ² தாவா’’தி. யம் பன தத்த² வுத்தம் ‘‘அந்தரக⁴ரம் பவிட்ட²ம்ஹா’’தி, தம்பி தஸ்ஸ அகாலபா⁴வஸ்ஸேவ பரியாயேன த³ஸ்ஸனத்த²ம் வுத்தம். தஸ்ஸ ஹி ததா³ அத்³தா⁴னபரிஸ்ஸமேன ரூபகாயே அகம்மஞ்ஞதா அஹோஸி, ப³லவபீதிவேகே³ன நாமகாயே. தது³ப⁴யஸ்ஸ வூபஸமம் ஆக³மேந்தோ பபஞ்சபரிஹாரத்த²ம் ப⁴க³வா ‘‘அகாலோ கோ²’’தி பரியாயேன படிக்கி²பி. அதே³ஸேதப்³ப³தே³ஸே அதே³ஸனாய பன உதா³ஹரணம் ‘‘அத² கோ² ப⁴க³வா மக்³கா³ ஓக்கம்ம அஞ்ஞதரஸ்மிம் ருக்க²மூலே நிஸீதி³, விஹாரதோ நிக்க²மித்வா விஹாரபச்சா²யாயம் பஞ்ஞத்தே ஆஸனே நிஸீதீ³’’தி ஏவமாதி³கம் இத⁴ ஆதி³ஸத்³தே³ன ஸங்க³ஹிதம். ‘‘ஸ கோ² ஸோ பி⁴க்க²வே பா³லோ இத⁴ பாபானி கம்மானி கரித்வா’’தி ஏவமாதீ³ஸு (ம. நி. 3.248) பத³பூரணமத்தே கோ²-ஸத்³தோ³, ‘‘து³க்க²ம் கோ² அகா³ரவோ விஹரதி அப்பதிஸ்ஸோ’’திஆதீ³ஸு (அ. நி. 4.21) அவதா⁴ரணே, ‘‘கித்தாவதா நு கோ², ஆவுஸோ, ஸத்து² பவிவித்தஸ்ஸ விஹரதோ ஸாவகா விவேகம் நானுஸிக்க²ந்தீ’’திஆதீ³ஸு (ம. நி. 1.31) ஆதி³காலத்தே², வாக்யாரம்பே⁴தி அத்தோ². தத்த² பத³பூரணேன வசனாலங்காரமத்தம் கதம் ஹோதி, ஆதி³காலத்தே²ன வாக்யஸ்ஸ உபஞ்ஞாஸமத்தம், அவதா⁴ரணத்தே²ன பன நியமத³ஸ்ஸனம். ‘‘தஸ்மா ஆமந்தேஸி ஏவா’’தி ஆமந்தனே நியமோ த³ஸ்ஸிதோ ஹோதீதி.

‘‘ப⁴க³வாதி லோகக³ருதீ³பன’’ந்தி கஸ்மா வுத்தம், நனு புப்³பே³ ‘‘ப⁴க³வா’’தி பத³ம் வுத்தந்தி? யதி³பி புப்³பே³ வுத்தம், தம் பன யதா²வுத்தட்டா²னே விஹரணகிரியாய கத்துவிஸேஸத³ஸ்ஸனபரம், ந ஆமந்தனகிரியாய, இத⁴ பன ஆமந்தனகிரியாய, தஸ்மா தத³த்த²ம் புன ப⁴க³வாதி பாளியம் வுத்தந்தி. தஸ்ஸத்த²ம் த³ஸ்ஸேதும் ‘‘ப⁴க³வாதி லோகக³ருதீ³பன’’ந்தி ஆஹ. கதா²ஸவனயுத்தபுக்³க³லவசனந்தி வக்க²மானாய படிச்சஸமுப்பாத³தே³ஸனாய ஸவனயோக்³யபுக்³க³லவசனம். சதூஸுபி பரிஸாஸு பி⁴க்கூ² ஏவ ஏதி³ஸானம் தே³ஸனானம் விஸேஸேன பா⁴ஜனபூ⁴தாதி ஸாதிஸயேன ஸாஸனஸம்படிக்³கா³ஹகபா⁴வத³ஸ்ஸனத்த²ம் இத⁴ பி⁴க்கு²க³ஹணந்தி த³ஸ்ஸேத்வா இதா³னி ஸத்³த³த்த²ம் த³ஸ்ஸேதும் ‘‘அபிசா’’தி ஆஹ. தத்த² பி⁴க்க²கோதி பி⁴க்கூ²தி பி⁴க்க²னஸீலத்தா பி⁴க்க²னத⁴ம்மத்தா பி⁴க்கூ²தி அத்தோ². பி⁴க்கா²சரியம் அஜ்ஜு²பக³தோதி பு³த்³தா⁴தீ³ஹிபி அஜ்ஜு²பக³தம் பி⁴க்கா²சரியம் உஞ்சா²சரியம் அஜ்ஜு²பக³தத்தா அனுட்டி²தத்தா பி⁴க்கு². யோ ஹி கோசி அப்பம் வா மஹந்தம் வா போ⁴க³க்க²ந்த⁴ம் பஹாய அகா³ரஸ்மா அனகா³ரியம் பப்³ப³ஜிதோ, ஸோ கஸிகோ³ரக்கா²தீ³ஹி ஜீவிககப்பனம் ஹித்வா லிங்க³ஸம்படிச்ச²னேனேவ பி⁴க்கா²சரியம் அஜ்ஜு²பக³தத்தா பி⁴க்கு². பரபடிப³த்³த⁴ஜீவிகத்தா வா விஹாரமஜ்ஜே² காஜப⁴த்தம் பு⁴ஞ்ஜமானோபி பி⁴க்கா²சரியம் அஜ்ஜு²பக³தோதி பி⁴க்கு² பிண்டி³யாலோபபோ⁴ஜனம் நிஸ்ஸாய பப்³ப³ஜ்ஜாய உஸ்ஸாஹஜாதத்தா வா பி⁴க்கா²சரியம் அஜ்ஜு²பக³தோதி பி⁴க்கூ²தி ஏவமேத்த² அத்தோ² த³ட்ட²ப்³போ³.

ஆதி³னா நயேனாதி ‘‘பி⁴ன்னபடத⁴ரோதி பி⁴க்கு², பி⁴ந்த³தி பாபகே அகுஸலே த⁴ம்மேதி பி⁴க்கு², பி⁴ன்னத்தா பாபகானம் அகுஸலானம் த⁴ம்மானம் பி⁴க்கூ²’’திஆதி³னா விப⁴ங்கே³ (விப⁴. 509) ஆக³தனயேன. ஞாபனேதி அவபோ³த⁴னே, படிவேத³னேதி அத்தோ². பி⁴க்க²னஸீலதா, ந கஸிவாணிஜ்ஜாதீ³ஹி ஜீவனஸீலதா. பி⁴க்க²னத⁴ம்மதா ‘‘உத்³தி³ஸ்ஸ அரியா திட்ட²ந்தீ’’தி (ஜா. 1.7.59) ஏவம் வுத்தபி⁴க்க²னஸபா⁴வதா, ந யாசனாகோஹஞ்ஞஸபா⁴வதா. பி⁴க்க²னே ஸாது⁴காரிதா ‘‘உத்திட்டே² நப்பமஜ்ஜேய்யா’’தி (த⁴. ப. 168) வசனம் அனுஸ்ஸரித்வா தத்த² அப்பமஜ்ஜதா. அத² வா ஸீலம் நாம பகதிஸபா⁴வோ. இத⁴ பன ததா²தி⁴ட்டா²னம். த⁴ம்மோதி வதம். அபரே பன ‘‘ஸீலம் நாம வதவஸேன ஸமாதா³னம். த⁴ம்மோ நாம பவேணி-ஆக³தம் சாரித்தம். ஸாது⁴காரிதா ஸக்கச்சகாரிதா ஆத³ரகிரியா’’தி வண்ணேந்தி.

ஹீனாதி⁴கஜனஸேவிதவுத்திந்தி யே பி⁴க்கு²பா⁴வே டி²தாபி ஜாதிமதா³தி³வஸேன உத்³த⁴தா உன்னளா, யே ச கி³ஹிபா⁴வே பரேஸு அத்தி²கபா⁴வம்பி அனுபக³ததாய பி⁴க்கா²சரியம் பரமகாபஞ்ஞம் மஞ்ஞந்தி, தேஸம் உப⁴யேஸம்பி யதா²க்கமம் ‘‘பி⁴க்க²வோ’’தி வசனேன ஹீனஜனேஹி த³லித்³தே³ஹி பரமகாபஞ்ஞதம் பத்தேஹி பரகுலேஸு பி⁴க்கா²சரியாய ஜீவிகம் கப்பேந்தேஹி ஸேவிதம் வுத்திம் பகாஸேந்தோ உத்³த⁴தபா⁴வனிக்³க³ஹம் கரோதி, அதி⁴கஜனேஹி உளாரபோ⁴க³க²த்தியகுலாதி³தோ பப்³ப³ஜிதேஹி பு³த்³தா⁴தீ³ஹி ஆஜீவஸோத⁴னத்த²ம் ஸேவிதம் வுத்திம் பகாஸேந்தோ தீ³னபா⁴வனிக்³க³ஹம் கரோதீதி யோஜேதப்³ப³ம். யஸ்மா ‘‘பி⁴க்க²வோ’’தி வசனம் ஆமந்தனபா⁴வதோ அபி⁴முகீ²கரணம், பகரணதோ ஸாமத்தி²யதோ ச ஸுஸ்ஸூஸாஜனனம், ஸக்கச்சஸவனமனஸிகாரனியோஜனஞ்ச ஹோதி, தஸ்மா தமத்த²ம் த³ஸ்ஸேந்தோ ‘‘பி⁴க்க²வோதி இமினா’’திஆதி³மாஹ.

தத்த² ஸாது⁴கம் மனஸிகாரேபீதி ஸாது⁴கம் ஸவனே ஸாது⁴கம் மனஸிகாரே ச. கத²ம் பவத்திதா ஸவனாத³யோ ஸாது⁴கம் பவத்திதா ஹோந்தீதி? ‘‘அத்³தா⁴ இமாய படிபத்தியா ஸகலஸாஸனஸம்பத்தி ஹத்த²க³தா ப⁴விஸ்ஸதீ’’தி ஆத³ரகா³ரவயோகே³ன கதா²தீ³ஸு அபரிப⁴வாதி³னா ச. வுத்தஞ்ஹி ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஸுணந்தோ ஸத்³த⁴ம்மம் ப⁴ப்³போ³ நியாமம் ஓக்கமிதும் குஸலேஸு த⁴ம்மேஸு ஸம்மத்தம். கதமேஹி பஞ்சஹி? ந கத²ம் பரிபோ⁴தி, ந கதி²கம் பரிபோ⁴தி, ந அத்தானம் பரிபோ⁴தி, அவிக்கி²த்தசித்தோ த⁴ம்மம் ஸுணாதி ஏகக்³க³சித்தோ, யோனிஸோ ச மனஸி கரோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஸுணந்தோ ஸத்³த⁴ம்மம் ப⁴ப்³போ³ நியாமம் ஓக்கமிதும் குஸலேஸு த⁴ம்மேஸு ஸம்மத்த’’ந்தி (அ. நி. 5.151). தேனாஹ ‘‘ஸாது⁴கம் மனஸிகாராயத்தா ஹி ஸாஸனஸம்பத்தீ’’தி. ஸாஸனஸம்பத்தி நாம ஸீலாதி³னிப்ப²த்தி. பட²மம் உப்பன்னத்தா அதி⁴க³மவஸேன. ஸத்து²சரியானுவிதா⁴யகத்தா ஸீலாதி³கு³ணானுட்டா²னேன. திண்ணம் யானானம் வஸேன அனுத⁴ம்மபடிபத்திஸம்ப⁴வதோ ஸகலஸாஸனபடிக்³கா³ஹகத்தா.

ஸந்திகத்தாதி ஸமீபபா⁴வதோ. ஸந்திகாவசரத்தாதி ஸப்³ப³காலம் ஸம்வுத்திபா⁴வதோ. யதா²னுஸிட்ட²ந்தி அனுஸாஸனியானுரூபம், அனுஸாஸனிம் அனவஸேஸதோ படிக்³க³ஹேத்வாதி அத்தோ². ஏகச்சே பி⁴க்கூ²தி யே படிச்சஸமுப்பாத³த⁴ம்மே தே³ஸனாபஸுதா, தே. புப்³பே³ ‘‘ஸப்³ப³பரிஸஸாதா⁴ரணா ஹி ப⁴க³வதோ த⁴ம்மதே³ஸனா’’திஆதி³னா பி⁴க்கூ²னம் ஏவ ஆமந்தனகாரணம் த³ஸ்ஸேத்வா இதா³னி பி⁴க்கூ² ஆமந்தேத்வா த⁴ம்மதே³ஸனாய பயோஜனம் த³ஸ்ஸேதும் கிமத்த²ம் பன ப⁴க³வாதி சோத³னம் ஸமுட்டா²பேதி. தத்த² அஞ்ஞம் சிந்தேந்தாதி அஞ்ஞவிஹிதா. விக்கி²த்தசித்தாதி அஸமாஹிதசித்தா. த⁴ம்மம் பச்சவேக்க²ந்தாதி ஹிய்யோ ததோ பரதி³வஸேஸு வா ஸுதத⁴ம்மம் பதி மனஸா அவேக்க²ந்தா. பி⁴க்கூ² ஆமந்தேத்வா த⁴ம்மே தே³ஸியமானே ஆதி³தோ பட்டா²ய தே³ஸனம் ஸல்லக்கே²தும் ஸக்கோதீதி இமமேவத்த²ம் ப்³யதிரேகமுகே²ன த³ஸ்ஸேதும் ‘‘தே அனாமந்தேத்வா’’திஆதி³ வுத்தம்.

பி⁴க்க²வோதி ச ஸந்தி⁴வஸேன இ-காரலோபோ த³ட்ட²ப்³போ³ ‘‘பி⁴க்க²வோ இதீ’’தி, அயஞ்ஹி இதிஸத்³தோ³ ஹேதுபரிஸமாபனாதி³பத³த்த²விபரியாயபகாராவதா⁴ரணனித³ஸ்ஸனாதி³அனேகத்த²பபே⁴தோ³. ததா² ஹேஸ ‘‘ருப்பதீதி கோ², பி⁴க்க²வே, தஸ்மா ‘ரூப’ந்தி வுச்சதீ’’திஆதீ³ஸு (ஸம். நி. 3.79) ஹேதும்ஹி தி³ஸ்ஸதி, ‘‘தஸ்மாதிஹ மே, பி⁴க்க²வே, த⁴ம்மதா³யாதா³ ப⁴வத², மா ஆமிஸதா³யாதா³’’திஆதீ³ஸு (ம. நி. 1.29) பரிஸமாபனே, ‘‘இதி வா ஏவரூபா விஸூகத³ஸ்ஸனா படிவிரதோ’’திஆதீ³ஸு (தீ³. நி. 1.13) ஆதி³அத்தே² ‘‘மாக³ண்டி³யோதி தஸ்ஸ ப்³ராஹ்மணஸ்ஸ ஸங்கா² ஸமஞ்ஞா பஞ்ஞத்தி வோஹாரோ நாமம் நாமகம்மம் நாமதே⁴ய்யம் நிருத்தி ப்³யஞ்ஜனம் அபி⁴லாபோ’’திஆதீ³ஸு (மஹானி. 73, 75) பத³த்த²விபரியாயே, ‘‘இதி கோ², பி⁴க்க²வே, ஸப்படிப⁴யோ பா³லோ, அப்படிப⁴யோ பண்டி³தோ. ஸஉபத்³த³வோ பா³லோ, அனுபத்³த³வோ பண்டி³தோ’’திஆதீ³ஸு (ம. நி. 3.124) பகாரே, ‘‘அத்தி² இத³ப்பச்சயா ஜராமரணந்தி இதி புட்டே²ன ஸதா, ஆனந்த³, அத்தீ²திஸ்ஸ வசனீயம். கிம் பச்சயா ஜராமரணந்தி இதி சே வதே³ய்ய, ஜாதிபச்சயா ஜராமரணந்தி இச்சஸ்ஸ வசனீய’’ந்திஆதீ³ஸு (தீ³. நி. 2.96) அவதா⁴ரணே, ‘‘ஸப்³ப³மத்தீ²தி கோ², கச்சான, அயமேகோ அந்தோ, ஸப்³ப³ம் நத்தீ²தி அயம் து³தியோ அந்தோ’’திஆதீ³ஸு (ஸம். நி. 2.15; 3.90) நித³ஸ்ஸனே. இதா⁴பி நித³ஸ்ஸனே ஏவ த³ட்ட²ப்³போ³. பி⁴க்க²வோதி ஆமந்தனாகாரோ தமேஸ இதி-ஸத்³தோ³ நித³ஸ்ஸேதி ‘‘பி⁴க்க²வோதி ஆமந்தேஸீ’’தி. இமினா நயேன ப⁴த்³த³ந்தேதிஆதீ³ஸுபி யதா²ரஹம் இதிஸத்³த³ஸ்ஸ அத்தோ² வேதி³தப்³போ³.

புப்³பே³ ‘‘ப⁴க³வா ஆமந்தேஸீ’’தி வுத்தத்தா ப⁴க³வதோ பச்சஸ்ஸோஸுந்தி இத⁴ ப⁴க³வதோதி ஸாமிவசனம் ஆமந்தனமேவ ஸம்ப³ந்தீ⁴அந்தரம் அபேக்க²தீதி இமினா அதி⁴ப்பாயேன ‘‘ப⁴க³வதோ ஆமந்தனம் படிஅஸ்ஸோஸு’’ந்தி வுத்தம். ப⁴க³வதோதி இத³ம் பன படிஸ்ஸவஸம்ப³ந்தே⁴ன ஸம்பதா³னவசனம். ஏத்தாவதா யம் காலதே³ஸதே³ஸகபரிஸாபதே³ஸபடிமண்டி³தம் நிதா³னம் பா⁴ஸிதந்தி ஸம்ப³ந்தோ⁴. ஏத்தா²ஹ – கிமத்த²ம் பன த⁴ம்மவினயஸங்க³ஹே கரியமானே நிதா³னவசனம், நனு ப⁴க³வதா பா⁴ஸிதவசனஸ்ஸேவ ஸங்க³ஹோ காதப்³போ³தி? வுச்சதே – தே³ஸனாய டி²திஅஸம்மோஸஸத்³தே⁴ய்யபா⁴வஸம்பாத³னத்த²ம். காலதே³ஸதே³ஸகனிமித்தபரிஸாபதே³ஸேஹி உபனிப³ந்தி⁴த்வா ட²பிதா ஹி தே³ஸனா சிரட்டி²திகா ஹோதி அஸம்மோஸத⁴ம்மா ஸத்³தே⁴ய்யா ச, தே³ஸகாலகத்துஸோதுனிமித்தேஹி உபனிப³ந்தோ⁴ விய வோஹாரவினிச்ச²யோ. தேனேவ சாயஸ்மதா மஹாகஸ்ஸபேன ‘‘படிச்சஸமுப்பாத³ஸுத்தம், ஆவுஸோ ஆனந்த³, கத்த² பா⁴ஸித’’ந்திஆதி³னா தே³ஸாதி³புச்சா²ஸு கதாஸு தாஸம் விஸ்ஸஜ்ஜனம் கரோந்தேன த⁴ம்மப⁴ண்டா³கா³ரிகேன ‘‘ஏவம் மே ஸுத’’ந்தி ஆயஸ்மதா ஆனந்தே³ன இமஸ்ஸ ஸுத்தஸ்ஸ நிதா³னம் பா⁴ஸிதம்.

அபிச ஸத்து² ஸம்பத்திபகாஸனத்த²ம் நிதா³னவசனம். ததா²க³தஸ்ஸ ஹி ப⁴க³வதோ புப்³ப³ரசனானுமானாக³மதக்காபா⁴வதோ ஸம்மாஸம்பு³த்³த⁴பா⁴வஸித்³தி⁴. ந ஹி ஸம்மாஸம்பு³த்³த⁴ஸ்ஸ புப்³ப³ரசனாதீ³ஹி அத்தோ² அத்தி², ஸப்³ப³த்த² அப்படிஹதஞாணசாரதாய ஏகப்பமாணத்தா ச ஞேய்யத⁴ம்மேஸு. ததா² ஆசரியமுட்டி²த⁴ம்மமச்ச²ரியஸத்து²ஸாவகானுரோதா⁴பா⁴வதோ கீ²ணாஸவத்தஸித்³தி⁴. ந ஹி ஸப்³ப³ஸோ கீ²ணாஸவஸ்ஸ தே ஸம்ப⁴வந்தீதி ஸுவிஸுத்³தா⁴ சஸ்ஸ பரானுக்³க³ஹப்பவத்தி, ஏவம் தே³ஸகஸம்கிலேஸபூ⁴தானம் தி³ட்டி²ஸீலஸம்பதா³தூ³ஸகானம் அவிஜ்ஜாதண்ஹானம் அச்சந்தாபா⁴வஸம்ஸூசகேஹி ஞாணஸம்பதா³பஹானஸம்பதா³பி⁴ப்³யஞ்ஜனகேஹி ச ஸம்பு³த்³த⁴விஸுத்³த⁴பா⁴வேஹி புரிமவேஸாரஜ்ஜத்³வயஸித்³தி⁴, ததோ ஏவ ச அந்தராயிகனிய்யானிகத⁴ம்மேஸு ஸம்மோஹாபா⁴வஸித்³தி⁴தோ பச்சி²மவேஸாரஜ்ஜத்³வயஸித்³தீ⁴தி ப⁴க³வதோ சதுவேஸாரஜ்ஜஸமன்னாக³மோ அத்தஹிதபரஹிதபடிபத்தி ச நிதா³னவசனேன பகாஸிதா ஹோதி, தத்த² தத்த² ஸம்பத்தபரிஸாய அஜ்ஜா²ஸயானுரூபம் டா²னுப்பத்திகபடிபா⁴னேன த⁴ம்மதே³ஸனாதீ³பனதோ, இத⁴ பன மூலத்³வயவஸேன அந்தத்³வயரஹிதஸ்ஸ திஸந்தி⁴காலப³ந்த⁴ஸ்ஸ சதுப்³பி³த⁴னயஸங்கே²பக³ம்பீ⁴ரபா⁴வயுத்தஸ்ஸ படிச்சஸமுப்பாத³ஸ்ஸ போ³தி⁴யா நித³ஸ்ஸனதோ சாதி யோஜேதப்³ப³ம். தேன வுத்தம் ‘‘ஸத்து² ஸம்பத்திபகாஸனத்த²ம் நிதா³னவசன’’ந்தி.

ததா² ஸாஸனஸம்பத்திபகாஸனத்த²ம் நிதா³னவசனம். ஞாணகருணாபரிக்³க³ஹிதஸப்³ப³கிரியஸ்ஸ ஹி ப⁴க³வதோ நத்தி² நிரத்தி²கா பவத்தி, அத்தஹிதத்தா² வா, தஸ்மா பரேஸம் ஏவ அத்தா²ய பவத்தஸப்³ப³கிரியஸ்ஸ ஸம்மாஸம்பு³த்³த⁴ஸ்ஸ ஸகலம்பி காயவசீமனோகம்மம் யதா²பவத்தம் வுச்சமானம் தி³ட்ட²த⁴ம்மிகஸம்பராயிகபரமத்தே²ஹி யதா²ரஹம் ஸத்தானம் அனுஸாஸனட்டே²ன ஸாஸனம், ந கப்³ப³ரசனா. தயித³ம் ஸத்து²சரிதம் காலதே³ஸதே³ஸகபரிஸாபதே³ஸேஹி ஸத்³தி⁴ம் தத்த² தத்த² நிதா³னவசனேஹி யதா²ரஹம் பகாஸீயதி, இத⁴ பன த்³வாத³ஸபதி³கபச்சயாகாரவிபா⁴வனேன தேன. தேன வுத்தம் ‘‘ஸாஸனஸம்பத்திபகாஸனத்த²ம் நிதா³னவசன’’ந்தி.

அபிச ஸத்து² பமாணபா⁴வப்பகாஸனேன ஸாஸனஸ்ஸ பமாணபா⁴வத³ஸ்ஸனத்த²ம் நிதா³னவசனம், தஞ்சஸ்ஸ பமாணபா⁴வத³ஸ்ஸனம் ஹேட்டா² வுத்தனயானுஸாரேன ‘‘ப⁴க³வா’’தி ச இமினா பதே³ன விபா⁴விதந்தி வேதி³தப்³ப³ம். ‘‘ப⁴க³வா’’தி ச இமினா ததா²க³தஸ்ஸ ராக³தோ³ஸமோஹாதி³-ஸப்³ப³ஸம்கிலேஸமலது³ச்சரிதாதி³தோ³ஸப்பஹானதீ³பனேன வசனேன அனஞ்ஞஸாதா⁴ரணஸுபரிஸுத்³த⁴ஞாணகருணாதி³கு³ணவிஸேஸயோக³பரிதீ³பனேன ததோ ஏவ ஸப்³ப³ஸத்துத்தமபா⁴வதீ³பனேன அயமத்தோ² ஸப்³ப³தா² பகாஸிதோ ஹோதீதி. இத³மேத்த² நிதா³னவசனே பயோஜனனித³ஸ்ஸனம்.

நிக்கி²த்தஸ்ஸாதி தே³ஸிதஸ்ஸ. தே³ஸனாபி ஹி தே³ஸேதப்³ப³ஸ்ஸ ஸீலாதி³அத்த²ஸ்ஸ வினேய்யஸந்தானேஸு நிக்கி²பனதோ ‘‘நிக்கே²போ’’தி வுச்சதீதி ‘‘ஸுத்தனிக்கே²பம் தாவ விசாரேத்வா வுச்சமானா பாகடா ஹோதீ’’தி ஸாமஞ்ஞதோ ப⁴க³வதோ தே³ஸனாய ஸமுட்டா²னஸ்ஸ விபா⁴க³ம் த³ஸ்ஸேத்வா ‘‘ஏத்தா²யம் தே³ஸனா ஏவம்ஸமுட்டா²னா’’தி தே³ஸனாய ஸமுட்டா²னே த³ஸ்ஸிதே ஸுத்தஸ்ஸ ஸம்மதே³வ நிதா³னபரிஜானனேன வண்ணனாய ஸுவிஞ்ஞேய்யத்தா வுத்தம். ததோ ஹேட்டா² ‘‘கஸ்மா ப⁴க³வதா படிச்சஸமுப்பாத³வஸேனேவ தே³ஸனா ஆரத்³தா⁴’’தி கேனசி சோத³னாய கதாய ‘‘பரஜ்ஜா²ஸயோயம் ஸுத்தனிக்கே²போ’’தி பரிஹாரோ ஸுகதி²தோ ஹோதி. தத்த² யதா² அனேகஸதஅனேகஸஹஸ்ஸபே⁴தா³னிபி ஸுத்தந்தானி ஸம்கிலேஸபா⁴கி³யாதி³பதா⁴னனயேன ஸோளஸவித⁴தம் நாதிவத்தந்தி, ஏவம் அத்தஜ்ஜா²ஸயாதி³ஸுத்தனிக்கே²பவஸேன சதுப்³பி³த⁴பா⁴வந்தி ஆஹ ‘‘சத்தாரோ ஹி ஸுத்தனிக்கே²பா’’தி. ஏத்த² ச யதா² அத்தஜ்ஜா²ஸயஸ்ஸ அட்டு²ப்பத்தியா ச பரஜ்ஜா²ஸயபுச்சா²ஹி ஸத்³தி⁴ம் ஸம்ஸக்³க³பே⁴தோ³ ஸம்ப⁴வதி ‘‘அத்தஜ்ஜா²ஸயோ ச பரஜ்ஜா²ஸயோ ச, அத்தஜ்ஜா²ஸயோ ச புச்சா²வஸிகோ ச, அத்தஜ்ஜா²ஸயோ ச பரஜ்ஜா²ஸயோ ச புச்சா²வஸிகோ ச, அட்டு²ப்பத்திகோ ச பரஜ்ஜா²ஸயோ ச, அட்டு²ப்பத்திகோ ச புச்சா²வஸிகோ ச, அட்டு²ப்பத்திகோ ச பரஜ்ஜா²ஸயோ ச புச்சா²வஸிகோ சா’’தி அஜ்ஜா²ஸயபுச்சா²னுஸந்தி⁴ஸம்ப⁴வதோ, ஏவம் யதி³பி அட்டு²ப்பத்தியா அஜ்ஜா²ஸயேனபி ஸம்ஸக்³க³பே⁴தோ³ ஸம்ப⁴வதி, அத்தஜ்ஜா²ஸயாதீ³ஹி பன புரதோ டி²தேஹி அட்டு²ப்பத்தியா ஸம்ஸக்³கோ³ நத்தீ²தி. நயித⁴ நிரவஸேஸோ வித்தா²ரனயோ ஸம்ப⁴வதீதி ‘‘சத்தாரோ ஹி ஸுத்தனிக்கே²பா’’தி வுத்தம். தத³ந்தோக³த⁴த்தா வா ஸம்ப⁴வந்தானம் ஸேஸனிக்கே²பானம் மூலனிக்கே²பவஸேன சத்தாரோவ த³ஸ்ஸிதா, ததா²த³ஸ்ஸனஞ்சேத்த² அயம் ஸம்ஸக்³க³பே⁴தோ³ க³ஹேதப்³போ³தி.

தத்ராயம் வசனத்தோ² – நிக்கி²பீயதீதி நிக்கே²போ, ஸுத்தம் ஏவ நிக்கே²போ ஸுத்தனிக்கே²போ. அத² வா நிக்கி²பனம் நிக்கே²போ, ஸுத்தஸ்ஸ நிக்கே²போ ஸுத்தனிக்கே²போ, ஸுத்ததே³ஸனாதி அத்தோ². அத்தனோ அஜ்ஜா²ஸயோ அத்தஜ்ஜா²ஸயோ, ஸோ அஸ்ஸ அத்தி² காரணபூ⁴தோதி அத்தஜ்ஜா²ஸயோ. அத்தனோ அஜ்ஜா²ஸயோ ஏதஸ்ஸாதி வா அத்தஜ்ஜா²ஸயோ. பரஜ்ஜா²ஸயேபி ஏஸேவ நயோ. புச்சா²ய வஸேன பவத்தத⁴ம்மோ ஏதஸ்ஸ அத்தீ²தி, புச்சா²வஸிகோ. ஸுத்ததே³ஸனாய வத்து²பூ⁴தஸ்ஸ அத்த²ஸ்ஸ உப்பத்தி அத்து²ப்பத்தி, அத்து²ப்பத்தியேவ அட்டு²ப்பத்தி, ஸா ஏதஸ்ஸ அத்தீ²தி அட்டு²ப்பத்திகோ. அத² வா நிக்கி²பீயதி ஸுத்தம் ஏதேனாதி ஸுத்தனிக்கே²போ, அத்தஜ்ஜா²ஸயாதி³ ஏவ. ஏதஸ்மிம் பன அத்த²விகப்பே அத்தனோ அஜ்ஜா²ஸயோ அத்தஜ்ஜா²ஸயோ. பரேஸம் அஜ்ஜா²ஸயோ பரஜ்ஜா²ஸயோ. புச்சீ²யதீதி புச்சா², புச்சி²த்வா ஞாதப்³போ³ அத்தோ². தஸ்ஸ புச்சா²வஸேன பவத்தம் த⁴ம்மபடிக்³கா³ஹகானம் வசனம் புச்சா²வஸிகம், ததே³வ நிக்கே²பஸத்³தா³பேக்கா²ய புல்லிங்க³வஸேன ‘‘புச்சா²வஸிகோ’’தி வுத்தம். ததா² அட்டு²ப்பத்தி ஏவ அட்டு²ப்பத்திகோதி ஏவம்பேத்த² அத்தோ² வேதி³தப்³போ³.

அபிசேத்த² பரேஸம் இந்த்³ரியபரிபாகாதி³காரணனிரபேக்க²த்தா அத்தஜ்ஜா²ஸயஸ்ஸ விஸும் ஸுத்தனிக்கே²பபா⁴வோ யுத்தோ கேவலம் அத்தனோ அஜ்ஜா²ஸயேனேவ த⁴ம்மதந்திட²பனத்த²ம் பவத்திததே³ஸனத்தா. பரஜ்ஜா²ஸயபுச்சா²வஸிகானம் பன பரேஸம் அஜ்ஜா²ஸயபுச்சா²னம் தே³ஸனாபவத்திஹேதுபூ⁴தானம் உப்பத்தியம் பவத்திதானம் கத²ம் அட்டு²ப்பத்தியம் அனவரோதோ⁴, புச்சா²வஸிகஅட்டு²ப்பத்திகானம் வா பரஜ்ஜா²ஸயானுரோதே⁴ன பவத்திதானம் கத²ம் பரஜ்ஜா²ஸயே அனவரோதோ⁴தி? ந சோதே³தப்³ப³மேதம். பரேஸஞ்ஹி அபி⁴னீஹாரபரிபுச்சா²தி³வினிமுத்தஸ்ஸேவ ஸுத்ததே³ஸனாகாரணுப்பாத³ஸ்ஸ அட்டு²ப்பத்திபா⁴வேன க³ஹிதத்தா பரஜ்ஜா²ஸயபுச்சா²வஸிகானம் விஸும் க³ஹணம். ததா² ஹி ப்³ரஹ்மஜாலத⁴ம்மதா³யாத³ஸுத்தாதீ³னம் வண்ணாவண்ணஆமிஸுப்பாதா³தி³தே³ஸனானிமித்தம் ‘‘அட்டு²ப்பத்தீ’’தி வுச்சதி. பரேஸம் புச்ச²ம் வினா அஜ்ஜா²ஸயம் ஏவ நிமித்தம் கத்வா தே³ஸிதோ பரஜ்ஜா²ஸயோ, புச்சா²வஸேன ஏவ தே³ஸிதோ புச்சா²வஸிகோதி பாகடோவாயமத்தோ²தி. அத்தனோ அஜ்ஜா²ஸயேனேவ கதே²தி த⁴ம்மதந்திட²பனத்த²ந்தி த³ட்ட²ப்³ப³ம். த³ஸப³லஸுத்தந்தஹாரகோதி த³ஸப³லவக்³கே³ அனுபுப்³பே³ன நிக்கி²த்தானம் ஸுத்தானம் ஆவலி, ததா² சந்தோ³பமஹாரகாத³யோ.

விமுத்திபரிபாசனீயா த⁴ம்மா ஸத்³தி⁴ந்த்³ரியாத³யோ. அஜ்ஜா²ஸயந்தி அதி⁴முத்திம். க²ந்திந்தி தி³ட்டி²னிஜ்ஜா²னக்க²ந்திம். மனந்தி சித்தம். அபி⁴னீஹாரந்தி பணிதா⁴னம். பு³ஜ்ஜ²னபா⁴வந்தி பு³ஜ்ஜ²னஸபா⁴வம், படிவிஜ்ஜ²னாகாரம் வா.

உக்³க⁴டிதஞ்ஞூதி உக்³க⁴டனம் நாம ஞாணுக்³க⁴டனம், ஞாணேன உக்³க⁴டிதமத்தே ஏவ த⁴ம்மம் ஜானாதீதி அத்தோ². விபஞ்சிதம் வித்தா²ரிதமேவ அத்த²ம் ஜானாதீதி விபஞ்சிதஞ்ஞூ. உத்³தே³ஸாதீ³ஹி நேதப்³போ³தி நேய்யோ. ப்³யஞ்ஜனபத³ம் பரமம் அஸ்ஸாதி பத³பரமோ. ஸஹ உதா³ஹடவேலாயாதி உதா³ஹாரத⁴ம்மஸ்ஸ உத்³தே³ஸே உதா³ஹடமத்தே ஏவ. த⁴ம்மாபி⁴ஸமயோதி சதுஸச்சத⁴ம்மஸ்ஸ ஞாணேன ஸத்³தி⁴ம் அபி⁴ஸமாயோகோ³. அயம் வுச்சதீதி அயம் ‘‘சத்தாரோ ஸதிபட்டா²னா’’திஆதி³னா நயேன ஸம்கி²த்தேன மாதிகாய ட²பியமானாய தே³ஸனானுஸாரேன ஞாணம் பேஸேத்வா அரஹத்தம் க³ண்ஹிதும் ஸமத்தோ² புக்³க³லோ ‘‘உக்³க⁴டிதஞ்ஞூ’’தி வுச்சதி. அயம் வுச்சதீதி அயம் ஸம்கி²த்தேன மாதிகம் ட²பேத்வா வித்தா²ரேன அத்தே² விப⁴ஜியமானே அரஹத்தம் பாபுணிதும் ஸமத்தோ² புக்³க³லோ ‘‘விபஞ்சிதஞ்ஞூ’’தி வுச்சதி. உத்³தே³ஸதோதி உத்³தே³ஸஹேது, உத்³தி³ஸந்தஸ்ஸ உத்³தி³ஸாபேந்தஸ்ஸ வாதி அத்தோ², ‘‘உத்³தி³ஸதோ’’திபி பாடோ², அயமேவத்தோ². பரிபுச்ச²தோதி பரிபுச்ச²ந்தஸ்ஸ. அனுபுப்³பே³ன த⁴ம்மாபி⁴ஸமயோ ஹோதீதி அனுக்கமேன அரஹத்தப்பத்தி ஹோதி. ந தாய ஜாதியா த⁴ம்மாபி⁴ஸமயோ ஹோதீதி தேன அத்தபா⁴வேன மக்³க³ம் வா ப²லம் வா அந்தமஸோ ஜா²னம் வா விபஸ்ஸனம் வா நிப்³ப³த்தேதும் ந ஸக்கோதி. அயம் வுச்சதீதி அயம் புக்³க³லோ ப்³யஞ்ஜனபத³மேவ பரமம் கத்வா டி²தத்தா ‘‘பத³பரமோ’’தி வுச்சதி.

ஏகசராதி விவேகாபி⁴ரதியா ஏகவிஹாரினோ. த்³விசராதி த்³வே ஏகஜ்ஜா²ஸயா ஹுத்வா ஞாணசரியாதி³வஸேன விசரந்தா. ஏஸ நயோ ஸேஸேஸு. ஸத்தஸுஞ்ஞதாபகாஸனேன ஸுஞ்ஞதம். ததோ ஏவ ஸண்ஹம் ஸுகு²மம். ‘‘பரேஸம் அஜ்ஜா²ஸயவஸேன ப⁴க³வா இத³ம் ஸுத்தம் ஆரபீ⁴’’தி வத்வா தே பன ‘‘பரே’’தி வுத்தபுக்³க³லா அபரிகம்மிகா ஸுபரிஸோதி⁴தபுப்³ப³பா⁴க³படிபதா³ சாதி து³விதா⁴, தது³ப⁴யேஸு ஸத்து² படிபத்திம் உபமாமுகே²ன பகாஸேந்தோ யதா² ஹீதிஆதி³மாஹ. ரூபம் ந ஸமுட்டா²பேதி லிக²னவஸேன ந உப்பாதே³தி. அகதாபி⁴னிவேஸந்தி விபஸ்ஸனாபா⁴வனாய அகதானுயோக³ம். ஸீல…பே… ஸம்பதா³யாதி அஸமாதி³ன்னஸீலம் ஸீலஸம்பதா³ய, ஸுபரிஸுத்³த⁴ஸீலம் ஸமாதி⁴ஸம்பதா³ய, அனுஜுகததி³ட்டி²ஜுகம்மம் தி³ட்டி²ஸம்பதா³ய யோஜேந்தோதி யோஜனா.

யந்தி யம் புப்³ப³பா⁴க³படிபத³ம் ஸந்தா⁴ய. ஸீலந்தி சதுபாரிஸுத்³தி⁴ஸீலம். தி³ட்டி² சாதி கம்மஸ்ஸகதாதி³ட்டி² சேவ கம்மபத²ஸம்மாதி³ட்டி² ச. திவிதே⁴னாதி அஜ்ஜ²த்தம் ப³ஹித்³தா⁴ அஜ்ஜ²த்தப³ஹித்³தா⁴தி ஏவம் விஸயபா⁴வதோ திப்பகாரேன. யதா²வுத்ததி³ட்டி²விஸுத்³தி⁴யா விஸேஸபச்சயம் ஸீலம்யேவ பா⁴வனாய அதி⁴ட்டா²னந்தி வுத்தம் ‘‘ஸீலம் நிஸ்ஸாய ஸீலே பதிட்டா²யா’’தி.

ஸுத⁴ந்தஸுவண்ணம் அபக³தஸப்³ப³காளகம். சதுரஸ்ஸாதி³தோ⁴தோ ஸுபரிமஜ்ஜிதமணிக்க²ந்தோ⁴. பச்சயத⁴ம்மானம் அவிஜ்ஜாதீ³னம் தஸ்ஸ தஸ்ஸ பச்சயுப்பன்னஸ்ஸ ஹேதுபச்சயாதி³பா⁴வோ பச்சயாகாரோ. ஸோ பன அத்த²தோ அவிஜ்ஜா ஏவாதி ஆஹ ‘‘படிச்சஸமுப்பாத³ந்தி பச்சயாகார’’ந்தி. தேனாஹ ‘‘பச்சயாகாரோ ஹீ’’திஆதி³.

காமம் வோ-ஸத்³தோ³ பத³பரட்டி²தோ படியோகீ³அத்த²விஸேஸவாசகோ, நாமபரபூ⁴தோ பன தம் தம் கத்துகம்மகரணாதி³ஸாத⁴னவிஸிட்ட²மேவ பபோ³தே⁴தி, ஹி-நிபாதபரபூ⁴தோ பன வசனாலங்காரமத்தமேவாதி ஆஹ ‘‘வோதி…பே… தி³ஸ்ஸதீ’’தி. தம்தே³ஸனந்தி தஸ்ஸ படிச்சஸமுப்பாத³ஸ்ஸ தே³ஸனம். ஸா ஹி இத⁴ த-ஸத்³தே³ன பச்சாமஸீயதி. ‘‘ஸுணாதா²’’தி ஸோதவிஞ்ஞேய்யதாவசனதோ ந கேவலம் படிச்சஸமுப்பாதோ³.

ஏகத்த²மேதம் பத³ம் க-ஸத்³தே³ன பத³வட்³ட⁴னமத்தஸ்ஸ கதத்தா, தஸ்மா ஸாது⁴ஸத்³த³ஸ்ஸ கதோ அத்து²த்³தா⁴ரோ ஸாது⁴கஸத்³த³ஸ்ஸபி கதோ ஏவ ஹோதீதி அதி⁴ப்பாயோ. ஸாது⁴ ப⁴ந்தேதி யாசாமஹம் ப⁴ந்தேதி அயமேத்த² அத்தோ²தி ஆஹ ‘‘ஆயாசனே’’தி. புன ஸாது⁴ ப⁴ந்தேதி ஏவம் ப⁴ந்தேதி அயமேத்த² அத்தோ²தி ஆஹ ‘‘ஸம்படிச்ச²னே’’தி. ஸாது⁴ ஸாதூ⁴தி அஹோ அஹோதி அயமேத்த² அத்தோ²தி வுத்தம் ‘‘ஸம்பஹம்ஸனே’’தி. ஸாது⁴ த⁴ம்மருசீதி புஞ்ஞகாமோ ஸுந்த³ரோதி அத்தோ². பஞ்ஞாணவாதி பஞ்ஞவா. அத்³து³ப்³போ⁴தி அதூ³ஸகோ. த³ள்ஹீகம்மேதி தி²ரீகரணே ஸக்கச்சகிரியாயம். ஆணத்தியந்தி ஆணாபனே. ‘‘ஸுணாத² ஸாது⁴கம் மனஸி கரோதா²’’தி ஹி வுத்தே ஸாது⁴கஸத்³தே³ன ஸவனமனஸிகாரானம் ஸக்கச்சகிரியா விய ததா³ணாபனம்பி வுத்தம் ஹோதி. ஆயாசனத்த²தா விய சஸ்ஸ ஆணாபனத்த²தா வேதி³தப்³பா³.

இதா³னேத்த² ஏவம் யோஜனா வேதி³தப்³பா³தி ஸம்ப³ந்தோ⁴. ஸோதிந்த்³ரியவிக்கே²பனிவாரணம் ஸவனே நியோஜனவஸேன கிரியந்தரபடிஸேத⁴னபா⁴வதோ, ஸோதம் ஓத³ஹதா²தி ஹி அத்தோ². மனிந்த்³ரியவிக்கே²பனிவாரணம் அஞ்ஞசிந்தாபடிஸேத⁴னதோ. புரிமந்தி ‘‘ஸுணாதா²’’தி பத³ம். ஏத்தா²தி ‘‘ஸுணாத², மனஸி கரோதா²’’தி பத³த்³வயே, ஏதஸ்மிம் வா அதி⁴காரே. ப்³யஞ்ஜனவிபல்லாஸக்³கா³ஹனிவாரணம் ஸோதத்³வாரே விக்கே²பபடிபா³ஹகத்தா. ந ஹி யாதா²வதோ ஸுணந்தஸ்ஸ ஸத்³த³தோ விபல்லாஸக்³கா³ஹோ ஹோதி. அத்த²விபல்லாஸக்³கா³ஹனிவாரணம் மனிந்த்³ரியவிக்கே²பபடிபா³ஹகத்தா. ந ஹி ஸக்கச்சம் த⁴ம்மம் உபதா⁴ரேந்தஸ்ஸ அத்த²விபல்லாஸக்³கா³ஹோ ஹோதி. த⁴ம்மஸ்ஸவனே நியோஜேதி ‘‘ஸுணாதா²’’தி வித³ஹனதோ. தா⁴ரணூபபரிக்கா²ஸூதி ஏத்த² உபபரிக்க²க்³க³ஹணேனேவ துலனதீரணாதி³கே தி³ட்டி²யா ச ஸுப்படிவேத⁴ம் ஸங்க³ண்ஹாதி. ஸப்³யஞ்ஜனோதி ஏத்த² யதா²தி⁴ப்பேதமத்த²ம் ப்³யஞ்ஜயதீதி ப்³யஞ்ஜனம், ஸபா⁴வனிருத்தி. ஸஹ ப்³யஞ்ஜனேஹீதி ஸப்³யஞ்ஜனோ, ப்³யஞ்ஜனஸம்பன்னோதி அத்தோ². அரணீயதோ உபக³ந்தப்³ப³தோ அத்தோ², சதுபாரிஸுத்³தி⁴ஸீலாதி³கோ. ஸஹ அத்தே²னாதி ஸாத்தோ², அத்த²ஸம்பன்னோதி அத்தோ². த⁴ம்மக³ம்பீ⁴ரோதிஆதீ³ஸு த⁴ம்மோ நாம தந்தி. தே³ஸனா நாம தஸ்ஸா மனஸா வவத்த²பிதாய தந்தியா தே³ஸனா கத²னம். அத்தோ² நாம தந்தியா அத்தோ². படிவேதோ⁴ நாம தந்தியா தந்திஅத்த²ஸ்ஸ ச யதா²பூ⁴தாவபோ³தோ⁴. யஸ்மா சேதே த⁴ம்மதே³ஸனாஅத்த²படிவேதா⁴ ஸஸாதீ³ஹி விய மஹாஸமுத்³தோ³ மந்த³பு³த்³தீ⁴ஹி து³க்கோ²கா³ள்ஹா அலப்³ப⁴னேய்யபதிட்டா² ச, தஸ்மா க³ம்பீ⁴ரா. தேன வுத்தம் ‘‘யஸ்மா அயம் த⁴ம்மோ…பே… ஸாது⁴கம் மனஸி கரோதா²’’தி.

ஏத்த² ச படிவேத⁴ஸ்ஸ து³க்கரபா⁴வதோ த⁴ம்மத்தா²னம் தே³ஸனாஞாணஸ்ஸ து³க்கரபா⁴வதோ தே³ஸனாய து³க்கோ²கா³ஹதா, படிவேத⁴ஸ்ஸ பன உப்பாதே³தும் அஸக்குணேய்யத்தா தப்³பி³ஸயஞாணுப்பத்தியா ச து³க்கரபா⁴வதோ து³க்கோ²கா³ஹதா வேதி³தப்³பா³. தே³ஸனம் நாம உத்³தி³ஸனம் ஸங்கே²பத³ஸ்ஸனஸதி³ஸம். ததா² ஹி விப⁴ங்க³ஸுத்தே ‘‘தே³ஸேஸ்ஸாமீ’’தி வத்வா புன ‘‘பா⁴ஸிஸ்ஸாமீ’’தி வுத்தம். தஸ்ஸ நித்³தி³ஸனம் பா⁴ஸனந்தி இதா⁴தி⁴ப்பேதந்தி ஆஹ ‘‘வித்தா²ரதோபி நம் பா⁴ஸிஸ்ஸாமீதி வுத்தம் ஹோதீ’’தி. பரிப்³யத்தம் கத²னம் வா பா⁴ஸனம்.

ஸாளிகாயிவ நிக்³கோ⁴ஸோதி ஸாளிகாய ஆலாபோ விய மது⁴ரோ கண்ணஸுகோ² பேமனீயோ. படிபா⁴னம் ஸத்³தோ³. உதீ³ரயீதி உச்சாரீயதி, வுச்சதீதி அத்தோ². ஏவம் வுத்தே உஸ்ஸாஹஜாதாதி ஏவம் ‘‘ஸுணாத² ஸாது⁴கம் மனஸி கரோத², பா⁴ஸிஸ்ஸாமீ’’தி வுத்தே ‘‘ந கிர ஸத்தா² ஸங்கே²பேனேவ தே³ஸேஸ்ஸதி, வித்தா²ரேனபி பா⁴ஸிஸ்ஸதீ’’தி ஸஞ்ஜாதுஸ்ஸாஹா ஹட்ட²துட்டா² ஹுத்வா.

கதமோதி தஸ்ஸ பத³ஸ்ஸ ஸாமஞ்ஞதோ புச்சா²பா⁴வோ ஞாயதி, ந விஸேஸதோதி தஸ்ஸ புச்சா²விஸேஸபா⁴வம் கதே²ந்தோ ‘‘கதே²துகம்யதாபுச்சா²’’தி வத்வா தேனேவ பஸங்கே³ன மஹானித்³தே³ஸே ஆக³தா ஸப்³பா³பி புச்சா² அத்து²த்³தா⁴ரனயேன த³ஸ்ஸேதி ‘‘பஞ்சவிதா⁴ ஹி புச்சா²’’திஆதி³னா. தத்த² அதி³ட்ட²ம் ஜோதேதி ஏதாயாதி அதி³ட்ட²ஜோதனா. தி³ட்ட²ம் ஸம்ஸந்தீ³யதி ஏதாயாதி தி³ட்ட²ஸம்ஸந்த³னா. ஸம்ஸந்த³னஞ்சேத்த² ஸாகச்சா²வஸேன வினிச்ச²யகரணம். விமதிம் சி²ந்த³தி ஏதாயாதி விமதிச்சே²த³னா. அனுமதியா புச்ச²னம் அனுமதிபுச்சா². ‘‘தம் கிம் மஞ்ஞத² பி⁴க்க²வே’’திஆதி³புச்சா²ய ஹி ‘‘கா தும்ஹாகம் அனுமதீ’’தி அனுமதி புச்சி²தா ஹோதி. கதே²துகம்யதா கதே²துகம்யதாய.

லக்க²ணந்தி ஞாதும் புச்சி²தோ யோ கோசி ஸபா⁴வோ. அஞ்ஞாதந்தி யேன கேனசி ஞாணேன அஞ்ஞாதபா⁴வமாஹ. அதி³ட்ட²ந்தி த³ஸ்ஸனபூ⁴தேன ஞாணேன சக்கு²னா விய ந தி³ட்ட²தம். அதுலிதந்தி ‘‘ஏத்தகம் இத³’’ந்தி துலனபூ⁴தேன ஞாணேன ந துலிததம். அதீரிதந்தி தீரணபூ⁴தேன ஞாணேன அகதஞாணகிரியாஸமாபனதம். அவிபூ⁴தந்தி ஞாணஸ்ஸ அபாகடபா⁴வம். அவிபா⁴விதந்தி ஞாணேன அபாகடீகதபா⁴வம்.

பஞ்சஸு புச்சா²ஸு யா பு³த்³தா⁴னம் ஸப்³ப³தோ ந ஸந்தி, தா த³ஸ்ஸேத்வா இதா⁴தி⁴ப்பேதபுச்ச²ம் நிக³மேதும் ‘‘தத்தா²’’திஆதி³ வுத்தம். தம் ஸுவிஞ்ஞேய்யமேவ. யதி³ படிச்சஸமுப்பாதோ³ பச்சயாகாரோ, அத² கஸ்மா ப⁴க³வதா படிச்சஸமுப்பாத³தே³ஸனாய ஸங்கா²ராத³யோ பச்சயுப்பன்னா கதி²தாதி ஆஹ ‘‘ஏத்த² சா’’திஆதி³. பச்சயுப்பன்னம்பி கதே²தி பச்சயுப்பன்னத³ஸ்ஸனேன பச்சயத⁴ம்மானம் பச்சயபா⁴வஸ்ஸ கதி²தபா⁴வதோ. ஆஹாரவக்³க³ஸ்ஸாதிஆதி³ ‘‘பச்சயாகாரோ படிச்சஸமுப்பாதோ³’’தி த³ஸ்ஸனத்த²ம் வுத்தம். ‘‘ஸம்ப⁴வந்தீ’’தி பாளியம் பரதோ வுத்தம் கிரியாபத³ம் ஆனேத்வா யோஜேதி, அஞ்ஞதா² ஸங்கா²ரா கிம் கதாதி வா கரோந்தீதி வா ந ஞாயேய்ய. பவத்தியா அனுலோமதோ ‘‘அவிஜ்ஜாபச்சயா’’திஆதி³கா அனுலோமபடிச்சஸமுப்பாத³கதா².

‘‘அவிஜ்ஜாய த்வேவா’’திஆதி³கா பன தஸ்ஸ விலோமதோ படிலோமகதா². அச்சந்தமேவ ஸங்கா²ரே விரஜ்ஜதி ஏதேனாதி விராகோ³, மக்³கோ³. அஸேஸனிரோதா⁴தி அஸேஸேத்வா நிரோதா⁴ ஸமுச்சி²ந்த³னா. ஏவம் நிரோதா⁴னந்தி ஏவம் அனுப்பாத³னிரோதே⁴ன நிருத்³தா⁴னம் ஸங்கா²ரானம் நிரோதா⁴. இதி அவிஜ்ஜாதீ³னம் நிரோத⁴வசனேன அரஹத்தம் வத³தி. ஸகலஸ்ஸாதி அனவஸேஸஸ்ஸ. ஸத்தவிரஹிதஸ்ஸாதி பரபரிகப்பிதஜீவரஹிதஸ்ஸ. வினிவத்தேத்வாதி அனுப்பாத³னிரோத⁴த³ஸ்ஸனவஸேன விபரிவத்தேத்வா.

அத்தமனாதி பீதிஸோமனஸ்ஸேன க³ஹிதசித்தா. ததா²பூ⁴தா ச ஹட்ட²சித்தா நாம ஹோந்தீதி ஆஹ ‘‘துட்ட²சித்தா’’தி. ‘‘தஸ்ஸ வசனம் அபி⁴னந்தி³தப்³ப³’’ந்தி ஏத்த² அபி⁴னந்த³னஸத்³தோ³ அனுமோத³னத்தோ². ‘‘அபி⁴னந்தி³த்வா’’தி ஏத்த² ஸம்படிச்ச²னத்தோ². இத⁴ பன உப⁴யத்தோ²பி வட்டதீதி ஆஹ ‘‘அனுமோதி³ம்ஸு சேவ ஸம்படிச்சி²ம்ஸு சா’’தி.

படிச்சஸமுப்பாத³ஸுத்தவண்ணனா நிட்டி²தா.

2. விப⁴ங்க³ஸுத்தவண்ணனா

2. து³தியேபீதி து³தியஸுத்தேபி. பி-ஸத்³தே³ன தத³ஞ்ஞேஸு ஸுத்தேஸுபீதி அத்தோ². ‘‘விஸுத்³தி⁴மக்³கே³ வுத்தா ஏவா’’தி வத்வாபி ததே³கதே³ஸம் இத⁴ வினியோக³க்க²மம் த³ஸ்ஸேதும் ‘‘யதா² ஹீ’’திஆதி³ வுத்தம். தந்தி மூலம். வித்தா²ரதே³ஸனந்தி ‘‘விப⁴ஜிஸ்ஸாமீ’’தி பத³ஸ்ஸ அத்த²ஸ்ஸ த³ஸ்ஸனவஸேன பவத்தம் விப⁴ங்க³தே³ஸனம். உத்³தே³ஸதே³ஸனா பட²மஸுத்தே அனுலோமதே³ஸனாஸதி³ஸாவ. புன வட்டவிவட்டம் த³ஸ்ஸேந்தோதி ‘‘இதி கோ², பி⁴க்க²வே’’திஆதி³னா பவத்திம் நிவத்திஞ்ச த³ஸ்ஸேந்தோ. பட²மம் உத்³தே³ஸவஸேன விப⁴ஜனவஸேன விவட்டம் த³ஸ்ஸிதம், ததோ ஏவ ப்³யதிரேகனயேன விவட்டம்பி த³ஸ்ஸிதமேவ ஹோதீதி புனக்³க³ஹணம்.

தேஸம் தேஸம் ஸத்தானந்தி இத³ம் கிஞ்சி பகாரதோ அனாமஸித்வா ஸப்³பே³பி ஸத்தே ஸாமஞ்ஞதோ ப்³யாபேத்வா க³ஹணந்தி ஆஹ ‘‘ஸங்கே²பதோ…பே… நித்³தே³ஸோ’’தி. க³திஜாதிவஸேனாதி பஞ்சக³திவஸேன, தத்தா²பி ஏகேகாய க³தியா க²த்தியாதி³பு⁴ம்மதே³வாதி³ஹத்தி²ஆதி³ஜாதிவஸேன ச. ‘‘சித்தம் மனோ’’திஆதீ³ஸு விய கிச்சவிஸேஸம், ‘‘மானஸ’’ந்திஆதீ³ஸு விய ஸமானே அத்தே² ஸத்³த³விஸேஸம், ‘‘பண்ட³ர’’ந்திஆதீ³ஸு விய கு³ணவிஸேஸம், ‘‘சேதஸிகம் ஹத³ய’’ந்திஆதீ³ஸு விய நிஸ்ஸயவிஸேஸம், ‘‘சித்தஸ்ஸ டி²தீ’’திஆதீ³ஸு விய அஞ்ஞஸ்ஸ அவத்தா²பா⁴வவிஸேஸம், ‘‘அலுப்³ப⁴னா’’திஆதீ³ஸு விய அஞ்ஞஸ்ஸ கிரியாபா⁴வவிஸேஸம், ‘‘அலுப்³பி⁴தத்த’’ந்திஆதீ³ஸு விய அஞ்ஞஸ்ஸ அபா⁴வதாவிஸேஸந்தி ஏவமாதி³கம் அனபேக்கி²த்வா த⁴ம்மமத்தம் வா தீ³பனா ஸபா⁴வனித்³தே³ஸோ. ஜிண்ணஸ்ஸ ஜீரணவஸேன பவத்தனாகாரோ ஜீரணதாதி ஆஹ ‘‘ஆகாரனித்³தே³ஸோ’’தி.

காலாதிக்கமே கிச்சனித்³தே³ஸாதி கலலகாலதோ பபு⁴தி புரிமரூபானம் ஜராபத்தக்க²ணே உப்பஜ்ஜமானானி பச்சி²மரூபானி பரிபக்கரூபானுரூபானி பரிணதபரிணதானி உப்பஜ்ஜந்தீதி அனுக்கமேன ஸுபரிணதரூபானம் பரிபாககாலே உப்பஜ்ஜமானானி க²ண்டி³ச்சாதி³ஸபா⁴வானி உப்பஜ்ஜந்தீதி ‘‘க²ண்டி³ச்ச’’ந்திஆத³யோ காலாதிக்கமே ஜராய கிச்சனித்³தே³ஸா. பகதினித்³தே³ஸாதி ப²லவிபச்சனபகதியா நித்³தே³ஸா, ஜராய வா பாபுணிதப்³ப³ப²லமேவ பகதி, தஸ்ஸா நித்³தே³ஸா, ந ச க²ண்டி³ச்சாதீ³னேவ ஜராதி உத³காதி³க³தமக்³கே³ஸு திணருக்க²ஸம்ப⁴க்³க³தாத³யோ விய பரிபாகக³தமக்³க³ஸங்கா²தேஸு பரிபுண்ணரூபேஸு லப்³ப⁴மானா க²ண்டி³ச்சாத³யோ ஜராய க³தமக்³கா³இச்சேவ வேதி³தப்³பா³, ந ஜராதி.

யஸ்மா ஜரம் பத்தஸ்ஸ ஆயு ஹாயதி, இந்த்³ரியானி ஜஜ்ஜரானி ஹோந்தீதி ஆயுஹானாத³யோ பகதினித்³தே³ஸா, தஸ்மா வுத்தம் ‘‘பச்சி²மா த்³வே பகதினித்³தே³ஸா’’தி. தேனாஹ ‘‘இமேஹி பனா’’திஆதி³.

அவிஞ்ஞாயமானந்தரத்தா அவீசிஜரா மணிஆதீ³ஸு மந்த³த³ஸகாதீ³ஸு ஏகேகத³ஸகேஸு ச க²ணே க²ணே ஜிண்ணவிகாராதீ³னம் து³விஞ்ஞேய்யத்தா. ததோ அஞ்ஞேஸூதி மணிஆதி³தோ அஞ்ஞேஸு அஹிச்ச²த்தகாதீ³ஸு, பாணீனம் ஏகப⁴வபரியாபன்னே ஸகலஆயுஸ்மிம் க³ஹிததருணயுவாஜராகாலேஸு, ஏகத்³வித்திதி³வஸாதிக்கமேஸு புப்பா²தீ³ஸு வாதி அத்தோ². தத்த² ஹி ஜராவிஸேஸஸ்ஸ ஸுவிஞ்ஞேய்யத்தா ஸவீசிஜரா நாம.

சவனகவஸேனாதி சவனகானம் க²ந்தா⁴னம் வஸேன. ஏகசதுபஞ்சக்க²ந்தா⁴ய சுதியா சவனமேவ சவனதாதி ஆஹ ‘‘பா⁴வவசனேன லக்க²ணனித³ஸ்ஸன’’ந்தி, பாளியம் ‘‘சுதீ’’தி வுத்தஸ்ஸ மரணஸ்ஸ ஸபா⁴வத³ஸ்ஸனந்தி அத்தோ². ப⁴ங்கு³ப்பத்தி பி⁴ஜ்ஜமானதா. தேன ‘‘பே⁴தோ³’’தி இமினா க²ந்தா⁴னம் பி⁴ஜ்ஜமானதா பே⁴த³ஸமங்கி³தா வுத்தாதி த³ஸ்ஸேதி. டா²னாபா⁴வபரிதீ³பனந்தி கேனசிபி ஆகாரேன அவட்டா²னாபா⁴வதீ³பனம். க⁴டஸ்ஸேவாதி ஹி விஸதி³ஸூதா³ஹரணம். யதா² க⁴டே பி⁴ன்னே கபாலாதி³அவயவஸேஸோ லப்³ப⁴தி, ந ஏவம் சுதிக்க²ந்தே⁴ஸு ப⁴ங்கே³ஸு, ந கோசி விஸேஸோ திட்ட²தீதி த³ஸ்ஸேதும் ‘‘அந்தரதா⁴ன’’ந்தி வுத்தம். மச்சுஸங்கா²தம் மரணந்தி மச்சுஸஞ்ஞிதம் மரணம். ‘‘காலமரண’’ந்தி வத³ந்தி. ஸந்தானஸ்ஸ அச்சந்தஸமுச்சே²த³பூ⁴தம் கீ²ணாஸவானம் மரணம் ஸமுச்சே²த³மரணம். ஆதி³-ஸத்³தே³ன க²ணிகமரணம் ஸங்க³ண்ஹாதி. தஸ்ஸ கிரியாதி அந்தகஸ்ஸ கிரியா, யா லோகே வுச்சதி ‘‘மச்சூ’’தி, மரணந்தி அத்தோ². சவனகாலோ ஏவ வா அனதிக்கமனீயத்தா விஸேஸேன காலோதி வுத்தோதி தஸ்ஸ கிரியா அத்த²தோ சுதிக்க²ந்தா⁴னம் பே⁴த³பவத்தியேவ. ‘‘மச்சு மரண’’ந்தி வா ஏத்த² ஸமாஸம் அகத்வா யோ ‘‘மச்சூ’’தி வுச்சதி பே⁴தோ³, தமேவ மரணம் ‘‘பாணசாகோ³’’தி ஏவமேத்த² அத்தோ² த³ட்ட²ப்³போ³.

சதுவோகாரவஸேனாதி சதுவோகாரப⁴வவஸேன. தத்த² ஹி ரூபகாயஸஞ்ஞிதோ களேவரோ நத்தி², யம் நிக்கி²பேய்ய. கிஞ்சாபி ஏகவோகாரப⁴வேபி களேவரனிக்கே²போ நத்தி², ரூபகாயஸ்ஸ பன தத்த² அத்தி²தாமத்தம் க³ஹேத்வா ‘‘ஏகவோகாரவஸேன களேவரஸ்ஸ நிக்கே²போ’’தி வுத்தோ. சதுவோகாரவஸேன சாதி ச-ஸத்³தே³ன ‘‘ஸேஸத்³வயவஸேன க²ந்தா⁴னம் பே⁴தோ³’’தி இமமத்த²ம் த³ஸ்ஸேதி ஸப்³ப³த்தே²வ க²ந்த⁴பே⁴த³ஸப்³பா⁴வதோ. ஸேஸத்³வயவஸேனாதி ஸேஸப⁴வத்³வயவஸேனேவ களேவரஸ்ஸ நிக்கே²போ. யதி³பி ஏகவோகாரப⁴வே ரூபகாயோ விஜ்ஜதி, களேவரனிக்கே²போ பன நத்தீ²தி ‘‘களேவரஸ்ஸ ஸப்³பா⁴வதோ’’இச்சேவ வுத்தம். யஸ்மா மனுஸ்ஸாதீ³ஸு களேவரனிக்கே²போ அத்தி², தஸ்மா மனுஸ்ஸாதீ³ஸு களேவரஸ்ஸ நிக்கே²போதி யோஜனா. களேவரம் நிக்கி²பீயதி ஏதேனாதி மரணம் களேவரஸ்ஸ நிக்கே²போ. ஏகதோ கத்வாதி ஏகஜ்ஜ²ம் கத்வா, ஏகஜ்ஜ²ம் க³ஹணமத்தேன.

ஜாயனட்டே²னாதிஆதி³ ஆயதனவஸேன யோனிவஸேன ச த்³வீஹி பதே³ஹி ஸப்³ப³ஸத்தே பரியாதி³யித்வா பரியாதி³யித்வா ஜாதிம் த³ஸ்ஸேதும் வுத்தம். கேசி பன ‘‘கத்துபா⁴வவஸேன பத³த்³வயம் வுத்த’’ந்தி வத³ந்தி. ‘‘தேஸம் தேஸம் ஸத்தானம் ஜாதி ஸஞ்ஜாதீ’’தி பன கத்தரி ஸாமினித்³தே³ஸஸ்ஸ கதத்தா உப⁴யத்தா²பி பா⁴வனித்³தே³ஸோ. ஸம்புண்ணா ஜாதி ஸஞ்ஜாதி. பாகடா நிப்³ப³த்தி அபி⁴னிப்³ப³த்தி. தேஸம் தேஸம் ஸத்தானம்…பே… அபி⁴னிப்³ப³த்தீதி ஸத்தவஸேன பவத்தத்தா வோஹாரதே³ஸனா.

தத்ர தத்ராதி ஏகசதுவோகாரப⁴வேஸு த்³வின்னம் ஸேஸரூபதா⁴துயம் படிஸந்தி⁴க்க²ணே உப்பஜ்ஜமானானம் பஞ்சன்னம், காமதா⁴துயம் விகலாவிகலிந்த்³ரியானம் வஸேன ஸத்தன்னம் நவன்னம் த³ஸன்னம் புன த³ஸன்னம் ஏகாத³ஸன்னஞ்ச ஆயதனானம் வஸேன ஸங்க³ஹோ வேதி³தப்³போ³. ஸந்ததியந்தி யேன கம்முனா க²ந்தா⁴னம் பாதுபா⁴வோ, தேன அபி⁴ஸங்க²தஸந்ததியம். தஞ்ச கோ² படிஸந்தி⁴க்க²ணவஸேன வேதி³தப்³ப³ம்.

கம்மம்யேவ கம்மப⁴வோ ‘‘ப⁴வதி ஏதஸ்மா உபபத்திப⁴வோ’’தி கத்வா. கம்மேன நிய்யாதி³தஅத்தபா⁴வுபபத்திவஸேன ப⁴வதீதி ப⁴வோ, ததா² ததா² நிப்³ப³த்தவிபாகோ கடத்தாரூபஞ்ச. அட்ட²கதா²யம் பன ‘‘ப⁴வதீதி கத்வா ப⁴வோ’’தி உபபத்திப⁴வஸ்ஸ வக்க²மானத்தா ‘‘கம்மம் ப²லவோஹாரேன ப⁴வோதி வுத்த’’ந்தி கதி²தம்.

உபாதி³யந்தி ஸத்தா த³ள்ஹக்³கா³ஹம் க³ண்ஹந்தி ஏதேன கிலேஸகாமேன. ந கேவலம் இத⁴ கரணஸாத⁴னமேவ, அத² கோ² கத்துஸாத⁴னம்பி லப்³ப⁴தீதி வுத்தம் ‘‘ஸயம் வா’’தி. தந்தி வத்து²காமம். காமோ ச ஸோ காமனட்டே²ன, உபாதா³னஞ்ச பு⁴ஸமாதா³னட்டே²னாதி காமுபாதா³னம். ஏதந்தி காமுபாதா³னபத³ம். புன ஏதந்தி காமுபாதா³னஸங்கா²தம்.

ஸஸ்ஸதோ அத்தாதி இத³ம் புரிமதி³ட்டி²ம் உபாதி³யமானம் உத்தரதி³ட்டி²ம் த³ஸ்ஸேதும் வுத்தம். யதா² ஏஸா தி³ட்டி² த³ள்ஹீகரணவஸேன புரிமம் உத்தரா உபாதி³யதி, ஏவம் ‘‘நத்தி² தி³ன்ன’’ந்திஆதி³காபீதி. அத்தக்³க³ஹணம் பன ‘‘அத்தவாது³பாதா³ன’’ந்தி இத³ம் ந தி³ட்டு²பாதா³னத³ஸ்ஸனந்தி த³ட்ட²ப்³ப³ம். லோகோ சாதி அத்தக்³க³ஹணவினிமுத்தக்³க³ஹணம் தி³ட்டு²பாதா³னபூ⁴தம் இத⁴ புரிமதி³ட்டி²உத்தரதி³ட்டி²வசனேஹி வுத்தந்தி த³ட்ட²ப்³ப³ம்.

யேன மிச்சா²பி⁴னிவேஸேன கோ³ஸீலகோ³வதாதி³ம் ஸமாதி³யதி சேவ அனுதிட்ட²தி ச, ஸோ கோ³ஸீலகோ³வதாதீ³னீதி அதி⁴ப்பேதானி. தேனாஹ ‘‘கோ³ஸீல…பே… ஸயமேவ உபாதா³னானீ’’தி. அபி⁴னிவேஸதோதி அபி⁴னிவேஸனதோ.

அத்தவாது³பாதா³னந்தி ‘‘அத்தா’’தி வாத³ஸ்ஸ பஞ்ஞாபனஸ்ஸ க³ஹணஸ்ஸ காரணபூ⁴தா தி³ட்டீ²தி அத்தோ². அத்தவாத³மத்தமேவாதி அத்தஸ்ஸ அபா⁴வா ‘‘அத்தா’’தி இத³ம் வசனமத்தமேவ. உபாதி³யந்தி த³ள்ஹம் க³ண்ஹந்தி.

சக்கு²த்³வாராதீ³ஸு பவத்தாயாதி இத³ம் தண்ஹாய ரூபதண்ஹாதி³பா⁴வஸ்ஸ காரணவசனம் ச²த்³வாராரம்மணிகத⁴ம்மானம் படினியதாரம்மணத்தா. ஜவனவீதி²யா பவத்தாயாதி இத³ம் தஸ்ஸா பவத்திட்டா²னத³ஸ்ஸனம். ஸபா⁴வேனேவ உட்டா²தும் அஸக்கோந்தஸ்ஸ வேளு விய நிஸ்ஸயோ அஹுத்வா ஓலும்ப⁴கபா⁴வேன பா⁴வோ உபாதா³னஸ்ஸ பச்சயபா⁴வதோ ஆரம்மணம்பி தம்ஸதி³ஸம் வுத்தம். ரூபேதி விஸயே பு⁴ம்மம். ஸா திவிதா⁴ ஹோதீதி ஸம்ப³ந்தோ⁴. காமதண்ஹா காமஸ்ஸாத³பா⁴வேன பவத்தியா. ஏவம் அஸ்ஸாதே³ந்தீதி ஸஸ்ஸததி³ட்டி²யா ஸஹஜாதனிஸ்ஸயஸம்பயுத்தஅத்தி²அவிக³தாதி³பச்சயபூ⁴தாய ஸம்ஸட்ட²த்தா நிச்சது⁴வஸஸ்ஸதாபி⁴னிவேஸமுகே²ன அஸ்ஸாதே³ந்தீ. ப⁴வஸஹக³தா தண்ஹா ப⁴வதண்ஹா. ப⁴வதி திட்ட²தி ஸப்³ப³காலந்தி ஹி ப⁴வதி³ட்டி² ப⁴வோ உத்தரபத³லோபேன, ப⁴வஸ்ஸாத³வஸேன பவத்தியா ச. இமினா நயேன விப⁴வதண்ஹாதி ஏத்த² அத்தோ² வேதி³தப்³போ³. விப⁴வதி உச்சி²ஜ்ஜதி வினஸ்ஸதீதி ஏவம் பவத்தா தி³ட்டி² விப⁴வோ உத்தரபத³லோபேன. ஏவம் தானி அட்டா²ரஸாதி யா ச² காமதண்ஹா, ச² ப⁴வதண்ஹா, ச² விப⁴வதண்ஹா வுத்தா, ஏதானி அட்டா²ரஸ தண்ஹாவிசரிதானி தண்ஹாபச்சயோ. அஜ்ஜ²த்தந்தி ஸகஸந்ததியம். ப³ஹித்³தா⁴தி ததோ ப³ஹித்³தா⁴. அதீதாரம்மணானி வா ஹோந்து இதராரம்மணானி வா, ஸயம் பன அதீதானி ச²த்திம்ஸ தண்ஹாவிசரிதானி. ஸேஸபத³த்³வயேபி ஏஸேவ நயோ. ‘‘அட்ட²ஸதம் தண்ஹாவிசரிதானீ’’திஆதி³னா ஸம்ப³ந்தோ⁴. இதா³னி அபரேனபி பகாரேன அட்ட²ஸதம் தண்ஹாவிசரிதானி த³ஸ்ஸேதும் ‘‘அஜ்ஜ²த்திகஸ்ஸா’’திஆதி³மாஹ. தத்த² அஜ்ஜ²த்திகஸ்ஸாதி அஜ்ஜ²த்திகக²ந்த⁴பஞ்சகம். உபயோக³த்தே² ஹி இத³ம் ஸாமிவசனம். உபாதா³யாதி க³ஹேத்வா. அஸ்மீதி ஹோதீதி யதே³தம் அஜ்ஜ²த்திகம் க²ந்த⁴பஞ்சகம் உபாதா³ய தண்ஹாமானதி³ட்டி²வஸேன ஸமுதா³யக்³கா³ஹதோ அஸ்மீதி கா³ஹோ ஹோதி, தஸ்மிம் ஸதீதி அத்தோ². இத⁴ பன ரூபாதி³ஆரம்மணவஸேன அத்தோ² வேதி³தப்³போ³. இத்த²மஸ்மீதி ஹோதீதி க²த்தியாதீ³ஸு ‘‘இத³ம்பகாரோ அஹ’’ந்தி ஏவம் தண்ஹாமானதி³ட்டி²வஸேன ஹோதீதி அத்தோ². இத³ம் தாவ அனுபனிதா⁴ய க³ஹணம்.

ஏவமாதீ³னீதி ஆதி³-ஸத்³தே³ன ‘‘ஏவமஸ்மி, அஞ்ஞதா²ஸ்மி, அஹம் ப⁴விஸ்ஸம், இத்த²ம் ப⁴விஸ்ஸம், ஏவம் ப⁴விஸ்ஸம், அஞ்ஞதா² ப⁴விஸ்ஸம், அஸஸ்மி, ஸதஸ்மி, அஹம் ஸியம், இத்த²ம் ஸியம், ஏவம் ஸியம், அஞ்ஞதா² ஸியம், அபாஹம் ஸியம், அபாஹம் இத்த²ம் ஸியம், அபாஹம் ஏவம் ஸியம், அபாஹம் அஞ்ஞதா² ஸிய’’ந்தி ஏதேஸம் ஸங்க³ஹோ. உபனிதா⁴ய க³ஹணம்பி து³வித⁴ம் ஸமதோ அஸமதோ வாதி தம் த³ஸ்ஸேதும் ‘‘ஏவமஸ்மி, அஞ்ஞதா²ஸ்மீ’’தி ச வுத்தம். தத்த² ஏவமஸ்மீதி இத³ம் ஸமதோ உபனிதா⁴ய க³ஹணம், யதா² அயம் க²த்தியோ, ஏவம் அஹமஸ்மீதி அத்தோ². அஞ்ஞதா²ஸ்மீதி இத³ம் பன அஸமதோ க³ஹணம், யதா²யம் க²த்தியோ ததோ அஞ்ஞதா² அஹம் ஹீனோ வா அதி⁴கோ வாதி அத்தோ². இமானி தாவ பச்சுப்பன்னவஸேன சத்தாரி தண்ஹாவிசரிதானி. ப⁴விஸ்ஸந்திஆதீ³னி பன சத்தாரி அனாக³தவஸேன வுத்தானி, தேஸம் புரிமசதுக்கே வுத்தனயேனேவ அத்தோ² வேதி³தப்³போ³. அஸஸ்மீதி ஸஸ்ஸதோ அஸ்மி, நிச்சஸ்ஸேதம் அதி⁴வசனம். ஸதஸ்மீதி அஸஸ்ஸதோ அஸ்மி, அனிச்சஸ்ஸேதம் அதி⁴வசனம். இதி இமானி த்³வே ஸஸ்ஸதுச்சே²த³வஸேன வுத்தானி. இதோ பரானி ஸியந்திஆதீ³னி சத்தாரி ஸம்ஸயபரிவிதக்கவஸேன வுத்தானி, தானி புரிமசதுக்கே வுத்தனயேன அத்த²தோ வேதி³தப்³பா³னி. அபாஹம் ஸியந்திஆதீ³னி பன சத்தாரி ‘‘அபி நாமாஹம் ப⁴வேய்ய’’ந்தி ஏவம் பத்த²னாகப்பனவஸேன வுத்தானி, தானிபி புரிமசதுக்கே வுத்தனயேனேவ வேதி³தப்³பா³னி. ஏவமேதேஸு –

த்³வே தி³ட்டி²ஸீஸா சத்தாரோ, ஸுத்³த⁴ஸீஸா ஸீஸமூலகா;

தயோ தயோதி ஏதானி, அட்டா²ரஸ விபா⁴வயே.

ஏதே ஹி ஸஸ்ஸதுச்சே²த³வஸேன வுத்தா த்³வே தி³ட்டி²ஸீஸா நாம, ‘‘அஸ்மி, ப⁴விஸ்ஸம் ஸியம், அபாஹம் ஸிய’’ந்தி ஏதே சத்தாரோ ஸுத்³த⁴ஸீஸா நாம, ‘‘இத்த²மஸ்மீ’’திஆத³யோ தயோ தயோதி த்³வாத³ஸ ஸீஸமூலகா நாமாதி வேதி³தப்³ப³ம். இத⁴ பாளியம் ரூபாரம்மணாதி³வஸேன தண்ஹா ஆக³தாதி ஆஹ ‘‘அஜ்ஜ²த்திகரூபாதி³னிஸ்ஸிதானீ’’தி. அட்டா²ரஸ தண்ஹாவிசரிதானீதி ஆனேத்வா ஸம்ப³ந்தோ⁴. இமினா அஸ்மீதி இமினா அபி⁴ஸேகஸேனாபச்சாதி³னா ‘‘க²த்தியோ அஹ’’ந்தி மூலபா⁴வதோ ‘‘அஸ்மீ’’தி ஹோதி. ஸேஸம் புப்³பே³ வுத்தனயேனேவ வேதி³தப்³ப³ம். ஸங்க³ஹேதி தண்ஹாய யதா²வுத்தவிபா⁴க³ஸ்ஸ ஸம்கி²பனவஸேன ஸங்க³ண்ஹனே கரியமானே. ‘‘ச²யிமே, பி⁴க்க²வே, தண்ஹாகாயா’’திஆதி³ நித்³தே³ஸோ. ‘‘ரூபே தண்ஹா ரூபதண்ஹா’’திஆதி³ நித்³தே³ஸத்தோ². ‘‘காமராக³பா⁴வேனா’’திஆதி³கோ, ‘‘அஜ்ஜ²த்திகஸ்ஸுபாதா³யா’’திஆதி³கோ ச நித்³தே³ஸவித்தா²ரோ. ‘‘ரூபாதீ³ஸு ஆரம்மணேஸு ச²ளேவா’’திஆதி³கோ ஸங்க³ஹோ.

யஸ்மா சக்கு²த்³வாராதீ³ஸு ஏகேகஸ்மிம் த்³வாரே உப்பஜ்ஜனகவிஞ்ஞாணானி விய அனேகா ஏவ வேத³னா, தஸ்மா தா ராஸிவஸேன ஏகஜ்ஜ²ம் க³ஹேத்வா ‘‘ச² வேத³னாகாயா’’தி வுத்தந்தி ஆஹ ‘‘வேத³னாஸமூஹா’’தி. நிஸ்ஸயபா⁴வேன உப்பத்தித்³வாரபா⁴வேன நானாபச்சயா ஹோந்தி சக்கு²தா⁴துஆத³யோ, தா குச்சி²னா தா⁴ரேந்தியோ விய போஸேந்தியோ விய ச ஹோந்தீதி தாஸம் மாதுஸதி³ஸதா வுத்தா. சக்கு²ஸம்ப²ஸ்ஸஹேதூதி நிஸ்ஸயாதி³சக்கு²ஸம்ப²ஸ்ஸபச்சயா. அயந்தி அயம் வேத³னா ‘‘சக்கு²ஸம்ப²ஸ்ஸஜா வேத³னா’’திஆதி³னா ஸாதா⁴ரணதோ வுத்தா. ஏத்தா²தி ஏதஸ்மிம் வேத³னாபதே³. ஸப்³ப³ஸங்கா³ஹிகாதி குஸலாகுஸலவிபாககிரியானம் வஸேன ஸப்³ப³ஸங்கா³ஹிகா. ஏவம் விப⁴ங்கே³ ஆக³தனயேன ஸாதா⁴ரணதோ வத்வாபி இதா⁴தி⁴ப்பேதவேத³னமேவ த³ஸ்ஸேதும் ‘‘விபாகவஸேன பனா’’திஆதி³மாஹ. சக்கு²ம்ஹி ஸம்ப²ஸ்ஸோதி சக்கு²ம்ஹி நிஸ்ஸயபூ⁴தே உப்பன்னப²ஸ்ஸோ. ஏஸ நயோ ஸேஸேஸு. யஸ்மா சக்கா²தீ³னி விஸுத்³தி⁴மக்³கே³ க²ந்த⁴னித்³தே³ஸே லக்க²ணாதி³விபா⁴க³தோ, ஆயதனனித்³தே³ஸே விஸேஸதோ, ஸாமஞ்ஞதோ ச ஸத்³த³த்த²த³ஸ்ஸனாதி³வஸேன விபா⁴விதானி, தஸ்மா ‘‘யம் வத்தப்³ப³ம்…பே… வுத்தமேவா’’தி ஆஹ.

நமனலக்க²ணந்தி ஆரம்மணாபி⁴முக²ம் ஹுத்வா நமனஸபா⁴வம் தேன வினா அப்பவத்தனதோ. ருப்பனலக்க²ணம் ஹேட்டா² வுத்தமேவ. வேத³னாக்க²ந்தோ⁴ பன ஏகாவ வேத³னா. ஸப்³ப³து³ப்³ப³லசித்தானி நாம பஞ்சவிஞ்ஞாணானி. நனு தத்த² ஜீவிதசித்தட்டி²தியோ ச ஸந்தீதி? ஸச்சம், தாஸம் பன கிச்சம் ந ததா² பாகடம், யதா² சேதனாதீ³னந்தி தே ஏவேத்த² பாளியம் உத்³த⁴டா. யேன மஹந்தபாதுபா⁴வாதி³னா காரணேன. ஏத்தா²தி ஏதஸ்மிம் மஹாபூ⁴தனித்³தே³ஸே. அஞ்ஞோ வினிச்ச²யனயோதி ‘‘வசனத்த²தோ கலாபதோ’’திஆதி³னா லக்க²ணாதி³னிச்ச²யதோ அஞ்ஞோ வினிச்ச²யனயோ. நனு ஸோ சதுதா⁴துவவத்தா²னே வுத்தோ, ந ரூபக்க²ந்த⁴னித்³தே³ஸேதி? தத்த² வுத்தேபி ‘‘சதுதா⁴துவவத்தா²னே வுத்தானீ’’தி அதிதே³ஸவஸேன வுத்தத்தா ‘‘ரூபக்க²ந்த⁴னித்³தே³ஸே வுத்தோ’’தி வுத்தம். உபாதா³யாதி படிச்ச. பூ⁴தானி ஹி படிச்ச உப்பஜ்ஜமானம் உபாதா³ரூபம் ‘‘தானி க³ஹேத்வா’’தி வுத்தம் அவிஸ்ஸஜ்ஜனதோ. நிஸ்ஸாயாதிபி ஏகே தேஸம் நிஸ்ஸயபச்சயபா⁴வதோ. புப்³ப³காலகிரியா நாம ஏகம்ஸதோ அபரகாலகிரியாபேக்கா²தி பாட²ஸேஸேன அத்த²ம் வத³தி. விப⁴த்திவிபல்லாஸேன வினா ஏவ அத்த²ம் த³ஸ்ஸேதும் ‘‘ஸமூஹத்தே² வா’’திஆதி³ வுத்தம். ஸமூஹஸம்ப³ந்தே⁴ ஸாமினித்³தே³ஸேன ஸமூஹத்தோ² தீ³பிதோதி தம் த³ஸ்ஸேந்தோ ஆஹ ‘‘ஸமூஹம் உபாதா³யா’’தி. த⁴ம்மஸங்க³ணியம் (த⁴. ஸ. 584) ஆக³தனயேன ‘‘தேவீஸதிவித⁴’’ந்தி வுத்தம். தத்த² ஹி ஹத³யவத்து² ந நித்³தி³ட்ட²ம், ‘‘யம் ரூபம் நிஸ்ஸாயா’’தி வா பட்டா²னே (பட்டா²ன. 1.1.8) ஆக³தத்தா ஹத³யவத்து²ம்பி க³ஹேத்வா ஜாதிரூபபா⁴வேன உபசயஸந்ததியோ ஏகதோ கத்வா ‘‘தேவீஸதிவித⁴’’ந்தி வுத்தம்.

சக்கு²ஸ்ஸ விஞ்ஞாணந்தி வா சக்கு²விஞ்ஞாணம். அஸாதா⁴ரணகாரணேன சாயம் நித்³தே³ஸோ. ‘‘ஸங்கா²ரபச்சயா விஞ்ஞாண’’ந்தி ஏத்த² ஸப்³ப³லோகியவிபாகவிஞ்ஞாணஸ்ஸ க³ஹேதப்³ப³த்தா ‘‘தேபூ⁴மகவிபாகசித்தஸ்ஸேதம் அதி⁴வசன’’ந்தி வுத்தம்.

அபி⁴ஸங்க²ரணலக்க²ணோதி ஆயூஹனஸபா⁴வோ. சோபனவஸேனாதி விஞ்ஞத்திஸம்சோபனவஸேன, காயவிஞ்ஞத்தியா ஸமுட்டா²பனவஸேனாதி அத்தோ². வசனபே⁴த³வஸேனாதி வசீபே⁴து³ப்பாத³வஸேன, வசீவிஞ்ஞத்தியா ஸமுட்டா²பனவஸேனாதி அத்தோ². ஏவம் சோபனம் ந ப⁴வேய்யாதி த³ஸ்ஸேதும் ‘‘ரஹோ நிஸீதி³த்வா சிந்தேந்தஸ்ஸா’’தி வுத்தம். ஏகூனதிம்ஸாதி ஏத்த² அபி⁴ஞ்ஞாசேதனாவினிமுத்தா ஏவ ஏகூனதிம்ஸ சேதனா வேதி³தப்³பா³ தஸ்ஸா விபாகவிஞ்ஞாணஸ்ஸ பச்சயத்தாபா⁴வதோ.

து³க்கே²தி ஏகம்பி இத³ம் பு⁴ம்மவசனம் ஸம்ஸிலேஸனனிஸ்ஸயவிஸயப்³யாபனவஸேன அத்தானம் பி⁴ந்தி³த்வா வினியோக³ம் க³ச்ச²தீதி ‘‘சதூஹி காரணேஹீ’’திஆதி³ வுத்தம். ஏகோபி ஹி விப⁴த்தினித்³தே³ஸோ அனேகதா⁴ வினியோக³ம் க³ச்ச²தி யதா² தத்³தி⁴தத்தே² உத்தரபத³ஸமாஹாரேதி. தந்தி அஞ்ஞாணம். து³க்க²ஸச்சந்தி ஹத³யவத்து²லக்க²ணம் து³க்க²ஸச்சம். அஸ்ஸாதி அஞ்ஞாணஸ்ஸ. நிஸ்ஸயபச்சயபா⁴வேனாதி புரேஜாதனிஸ்ஸயபா⁴வேன. ஸஹஜாதனிஸ்ஸயபச்சயபா⁴வேன பன தம்ஸஹஜாதா ப²ஸ்ஸாத³யோ வத்தப்³பா³. ஆரம்மணபச்சயபா⁴வேன து³க்க²ஸச்சம் அஸ்ஸ ஆரம்மணந்தி யோஜனா. து³க்க²ஸச்சந்தி உபயோக³ஏகவசனம். ஏதந்தி அஞ்ஞாணம். தஸ்ஸாதி து³க்க²ஸச்சஸ்ஸ. ‘‘படிச்சா²தே³தீ’’தி ஏத்த² வுத்தம் படிச்சா²த³னாகாரம் த³ஸ்ஸேதும் ‘‘யாதா²வா’’திஆதி³ வுத்தம். ஞாணவிப்பயுத்தசித்தேனபி ஏகதே³ஸேன யாதா²வதோ லக்க²ணபடிவேதோ⁴ ஹோதியேவாதி ‘‘யாதா²வலக்க²ணபடிவேத⁴னிவாரணேனா’’தி வத்வா ‘‘ஞாணபவத்தியா சேத்த² அப்பதா³னேனா’’தி வுத்தந்தி வத³ந்தி. புரிமம் பன படிவேத⁴ஞாணுப்பத்தியா நிஸேத⁴கதா²த³ஸ்ஸனம், பச்சி²மம் அனுபோ³த⁴ஞாணுப்பத்தியா. ஏவமேத்த² அத்தோ² வேதி³தப்³போ³. ஏத்தா²தி து³க்க²ஸச்சே.

ஸஹஜாதஸ்ஸ அஞ்ஞாணஸ்ஸ ஸமுத³யஸச்சம் வத்து² ஹோதி நிஸ்ஸயபச்சயபா⁴வதோதி வுத்தம் ‘‘வத்து²தோ’’தி. ஆரம்மணதோதி ஆரம்மணபச்சயபா⁴வேன. யஸ்மா ஸமுத³யஸச்சம் அஞ்ஞாணஸ்ஸ ஆரம்மணம் ஹோதி, தஸ்மா ‘‘து³க்க²ஸமுத³யே அஞ்ஞாண’’ந்தி வுத்தந்தி அத்தோ². படிச்சா²த³னம் து³க்க²ஸச்சே வுத்தனயமேவ ஏகேனேவ காரணேன இதரேஸம் திண்ணம் அஸம்ப⁴வதோ, கிம் பன ஏதம் ஏகம் காரணந்தி ஆஹ ‘‘படிச்சா²த³னதோ’’தி. இத³ம் வித்தா²ரதோ விபா⁴வேதும் ‘‘நிரோத⁴படிபதா³னம் ஹீ’’திஆதி³ வுத்தம். ததா³ரப்³பா⁴தி தம் ஆரப்³ப⁴ தம் ஆரம்மணம் கத்வா. பச்சி²மஞ்ஹி ஸச்சத்³வயந்தி நிரோதோ⁴ மக்³கோ³. தஞ்ஹி நயக³ம்பீ⁴ரத்தா. து³த்³த³ஸந்தி ஸண்ஹஸுகு²மத⁴ம்மத்தா ஸபா⁴வேனேவ க³ம்பீ⁴ரதாய து³த்³த³ஸம் து³விஞ்ஞேய்யம் து³ரவக்³கா³ஹம். தத்தா²தி புரிமே ஸச்சத்³வயே. அந்த⁴பூ⁴தந்தி அந்த⁴காரபூ⁴தம். ந பவத்ததி ஆரம்மணம் காதும் ந விஸஹதி. வசனீயத்தேனாதி வாசகபா⁴வேன ததா² உபட்டா²னதோ. ஸபா⁴வலக்க²ணஸ்ஸ து³த்³த³ஸத்தாதி பீளனாதி³ஆயூஹனாதி³வஸேன ‘‘இத³ம் து³க்க²ம், அயம் ஸமுத³யோ’’தி (ம. நி. 484; 3.104) யாதா²வதோ ஸபா⁴வலக்க²ணஸ்ஸ து³த்³த³ஸத்தா து³விஞ்ஞேய்யத்தா புரிமத்³வயம் க³ம்பீ⁴ரம். தத்தா²தி புரிமஸ்மிம் ஸச்சத்³வயே. விபல்லாஸக்³கா³ஹவஸேன பவத்ததீதி ஸுபா⁴தி³விபரீதக்³கா³ஹானம் பச்சயபா⁴வவஸேன அஞ்ஞாணம் பவத்ததி.

இதா³னி ‘‘து³க்கே² அஞ்ஞாண’’ந்திஆதீ³ஸு பகாரந்தரேனபி அத்த²ம் த³ஸ்ஸேதும் ‘‘அபிசா’’திஆதி³ வுத்தம். தத்த² து³க்கே²தி ஏத்தாவதாதி ‘‘அஞ்ஞாணந்தி வுச்சமானாய அவிஜ்ஜாய து³க்கே²’’தி ஏத்தகேன. ஸங்க³ஹதோதி ஸமோதா⁴னதோ. கிச்சதோதி அஸம்படிவேத⁴கிச்சதோ. அஞ்ஞாணமிவாதி விஸயஸபா⁴வம் யாதா²வதோ படிவிஜ்ஜி²தும் அப்பதா³னகிச்சமிவ. ‘‘து³க்கே²’’திஆதி³னா தத்த² அவிஜ்ஜா பவத்ததி, விஸேஸதோ நித்³தி³ட்ட²ம் ஹோதீதி கத்வா ஸப்³ப³த்தே²வ ததா² அவிஸிட்ட²ஸபா⁴வத³ஸ்ஸனம் இத³ந்தி த³ஸ்ஸேதும் ‘‘அவிஸேஸதோ பனா’’திஆதி³ வுத்தம்.

க²ணிகனிரோத⁴ஸ்ஸ இத⁴ அனதி⁴ப்பேதத்தா அயுஜ்ஜமானத்தா விராக³க்³க³ஹணதோ ச அவிஜ்ஜாதீ³னம் படிபக்க²வஸேன படிபா³ஹனம் இத⁴ ‘‘நிரோதோ⁴’’தி அதி⁴ப்பேதோ, ஸோ ச நேஸம் ஸப்³ப³ஸோ அனுப்பஜ்ஜனமேவாதி ஆஹ ‘‘நிரோதோ⁴ ஹோதீதி அனுப்பாதோ³ ஹோதீ’’தி. ‘‘அவிஜ்ஜா நிருஜ்ஜ²தி ஏத்தா²தி அவிஜ்ஜானிரோதோ⁴, ஸங்கா²ரா நிருஜ்ஜ²ந்தி ஏத்தா²தி ஸங்கா²ரனிரோதோ⁴’’தி ஏவம் ஸப்³பே³ஹி ஏதேஹி நிரோத⁴பதே³ஹி நிப்³பா³னஸ்ஸ தே³ஸிதத்தா த³ட்ட²ப்³பா³. தேனாஹ ‘‘நிப்³பா³னம் ஹீ’’திஆதி³. வட்டவிவட்டந்தி வட்டஞ்ச விவட்டஞ்ச. ‘‘த்³வாத³ஸஹீ’’தி இத³ம் பச்சேகம் யோஜேதப்³ப³ம் ‘‘அனுலோமதோ த்³வாத³ஸஹி பதே³ஹி வட்டம், படிலோமதோ த்³வாத³ஸஹி விவட்டம் இத⁴ த³ஸ்ஸித’’ந்தி.

விப⁴ங்க³ஸுத்தவண்ணனா நிட்டி²தா.

3. படிபதா³ஸுத்தவண்ணனா

3. மிச்சா² படிபஜ்ஜதி ஏதாயாதி மிச்சா²படிபதா³, வட்டகா³மிமக்³கோ³ து³க்கா²வஹத்தா. தம் மிச்சா²படிபத³ம். தேனாஹ ‘‘அனிய்யானிகபடிபதா³’’தி. ஸோ புஞ்ஞாபி⁴ஸங்கா²ரோ கத²ம் மிச்சா²படிபதா³ ஹோதீதி? ஸம்பத்திப⁴வே ஸுகா²வஹோவ ஹோதீதி அதி⁴ப்பாயோ. வட்டஸீஸத்தாதி வட்டபக்கி²யானம் உத்தமங்க³பா⁴வதோ. அந்தமஸோதி உக்கம்ஸபரியந்தம் ஸந்தா⁴ய வத³தி அவகம்ஸபரியந்ததோ. ‘‘இத³ம் மே புஞ்ஞம் நிப்³பா³னாதி⁴க³மாய பச்சயோ ஹோதூ’’தி ஏவம் நிப்³பா³னம் பத்தே²த்வா பவத்திதம். பண்ணமுட்டி²தா³னமத்தந்தி ஸாகபண்ணமுட்டி²தா³னமத்தம். அப்பத்வாதி அந்தோக³த⁴ஹேது ஏஸ நித்³தே³ஸோ, அபாபேத்வாதி அத்தோ². யத³க்³கே³ன வா படிபஜ்ஜனதோ அரஹத்தம் பத்தோதி வுச்சதி, தத³க்³கே³ன ததா³வஹா படிபதா³பி பத்தாதி வுச்சதீதி ‘‘அப்பத்வா’’தி வுத்தம். அனுலோமவஸேனாதி அனுலோமபடிச்சஸமுப்பாத³வஸேன. படிலோமவஸேனாதி ஏத்தா²பி ஏஸேவ நயோ. படிபதா³ புச்சி²தாதி ஏதேன படிபதா³ தே³ஸேதும் ஆரத்³தா⁴தி அயம்பி அத்தோ² ஸங்க³ஹிதோ யதா²ரத்³த⁴ஸ்ஸ அத்த²ஸ்ஸ கதே²துகம்யதாபுச்சா²ய இதா⁴க³தத்தா. அனுலோமபடிச்சஸமுப்பாத³தே³ஸனாயம்பேத்த² ப்³யதிரேகமுகே²ன அவிஜ்ஜாதி³னிரோதா⁴ பன விஜ்ஜாய ஸதி ஹோதி ஸங்கா²ரானம் அஸம்ப⁴வோதி வுத்தம் ‘‘நிப்³பா³னம் பா⁴ஜித’’ந்தி. ஸரூபேன பன தாய வட்டமேவ பகாஸிதம். வக்க²தி ஹி பரியோஸானே ‘‘வட்டவிவட்டமேவ கதி²த’’ந்தி. நிய்யாதனேதி நிக³மனே. ப²லேனாதி பத்தப்³ப³ப²லேன படிபதா³ய ஸம்பாபகஹேதுனோ த³ஸ்ஸிதத்தா. யதா² ஹி திவிதோ⁴ ஹேது ஞாபகோ, நிப்³ப³த்தகோ, ஸம்பாபகோதி, ஏவம் திவித⁴ம் ப²லம் ஞாபேதப்³ப³ம், நிப்³ப³த்தேதப்³ப³ம், ஸம்பாபேதப்³ப³ந்தி. தஸ்மா பத்தப்³ப³ப²லேன நிப்³பா³னேன தம்ஸம்பாபகஹேதுபூ⁴தாய படிபதா³ய த³ஸ்ஸிதத்தாதி அத்தோ². தேனாஹ ‘‘ப²லேன ஹேத்தா²’’திஆதி³. அயம் வுச்சதீதி ஏவம் நிப்³பா³னப²லா அயம் ‘‘ஸம்மாபடிபதா³’’தி வுச்சதி. அஸேஸவிராகா³ அஸேஸனிரோதா⁴தி ஸமுச்சே²த³ப்பஹானவஸேன அவிஜ்ஜாய அஸேஸவிரஜ்ஜனதோ அஸேஸனிருஜ்ஜ²னதோ ச. பத³த்³வயேனபி அனுப்பாத³னிரோத⁴மேவ வத³தி. தஞ்ஹி நிப்³பா³னம். து³தியவிகப்பே அயம் ஏத்த² அதி⁴ப்பாயோ – யேன மக்³கே³ன கரணபூ⁴தேன அஸேஸனிரோதோ⁴ ஹோதி, அவிஜ்ஜாய அஸேஸனிரோதோ⁴ யம் ஆக³ம்ம ஹோதி, தம் மக்³க³ம் த³ஸ்ஸேதுந்தி. ஏவஞ்ஹி ஸதீதி ஏவம் பத³பா⁴ஜனஸ்ஸ நிப்³பா³னஸ்ஸ பத³த்தே² ஸதி. ஸானுபா⁴வா படிபதா³ விப⁴த்தா ஹோதீதி அவிஜ்ஜாய அஸேஸனிரோத⁴ஹேதுபடிபதா³ தத்த² ஸாதிஸயஸாமத்தி²யஸமாயோக³தோ ஸானுபா⁴வா விப⁴த்தா ஹோதி. மிச்சா²படிபதா³க³ஹணேனேத்த² வட்டஸ்ஸபி விப⁴த்தத்தா வுத்தம் ‘‘வட்டவிவட்டமேவ கதி²த’’ந்தி.

படிபதா³ஸுத்தவண்ணனா நிட்டி²தா.

4. விபஸ்ஸீஸுத்தவண்ணனா

4. விப்ப²ந்த³ந்தீதி நிமிஸனவஸேன. அனிமிஸேஹீதி விக³தனிமிஸேஹி உம்மீலந்தேஹேவ. தேன வுத்தம் மஹாபதா³னே. ஏத்தா²தி ஏதஸ்மிம் ‘‘விபஸ்ஸீ’’தி பதே³, ஏதஸ்மிம் வா ‘‘அனிமிஸேஹீ’’திஆதி³கே யதா²க³தே ஸுத்தந்தே.

மஹாபுரிஸஸ்ஸ அனிமிஸலோசனதோ ‘‘விபஸ்ஸீ’’தி ஸமஞ்ஞாபடிலாப⁴ஸ்ஸ காரணம் வுத்தம், தம் அகாரணம் அஞ்ஞேஸம்பி மஹாஸத்தானம் சரிமப⁴வே அனிமிஸலோசனத்தாதி சோத³னம் ஸந்தா⁴ய ‘‘ஏத்த² சா’’திஆதி³ம் வத்வா ததோ பன அஞ்ஞமேவ காரணம் த³ஸ்ஸேதும் ‘‘அபிசா’’திஆதி³ வுத்தம். பலாளயமானஸ்ஸாதி தோஸேந்தஸ்ஸ. அனாத³ரே சேதம் ஸாமிவசனம். அட்டஸ்ஸாதி அத்த²ஸ்ஸ.

புஞ்ஞுஸ்ஸயஸங்கா²தோ ப⁴கோ³ அஸ்ஸ அதிஸயேன அத்தீ²தி ப⁴க³வாதி ‘‘பா⁴க்³யஸம்பன்னஸ்ஸா’’தி வுத்தம். ஸம்மாதி ஸம்மதே³வ யாதா²வதோ, ஞாயேன காரணேனாதி வுத்தம் ஹோதீதி ஆஹ ‘‘நயேன ஹேதுனா’’தி. ஸம்-ஸத்³தோ³ ‘‘ஸாம’’ந்தி இமினா ஸமானத்தோ²தி ஆஹ ‘‘ஸாமம் பச்சத்தபுரிஸகாரேனா’’தி, ஸயம்பு⁴ஞாணேனாதி அத்தோ². ஸம்மா, ஸாமம் பு³ஜ்ஜி² ஏதேனாதி ஸம்போ³தோ⁴ வுச்சதி மக்³க³ஞாணம், ‘‘பு³ஜ்ஜ²தி ஏதேனா’’தி கத்வா இத⁴ ஸப்³ப³ஞ்ஞுதஞ்ஞாணஸ்ஸபி ஸங்க³ஹோ. போ³தி⁴மா ஸத்தோ போ³தி⁴ஸத்தோ, புரிமபதே³ உத்தரபத³லோபோ யதா² ‘‘ஸாகபத்த²வோ’’தி. பு³ஜ்ஜ²னகஸத்தோதி ஏத்த² மஹாபோ³தி⁴யானபடிபதா³ய பு³ஜ்ஜ²தீதி போ³தி⁴ ச ஸோ ஸத்தவிஸேஸயோக³தோ ஸத்தோ சாதி போ³தி⁴ஸத்தோ. பத்த²யமானோ பவத்ததீதி ‘‘குதா³ஸ்ஸு நாம மஹந்தம் போ³தி⁴ம் பாபுணிஸ்ஸாமீ’’தி ஸஞ்ஜாதச்ச²ந்தோ³ படிபஜ்ஜதி. து³க்க²ந்தி ஜாதிஆதி³மூலகம் து³க்க²ம். காமம் சுதுபபாதாபி மரணஜாதியோ, ‘‘ஜாயதி மீயதீ’’தி பன வத்வா ‘‘சவதி உபபஜ்ஜதீ’’தி வசனம் ந ஏகப⁴வபரியாபன்னானம் தேஸம் க³ஹணம், அத² கோ² நானாப⁴வபரியாபன்னானம் ஏகஜ்ஜ²ம் க³ஹணந்தி த³ஸ்ஸேந்தோ ஆஹ ‘‘இத³ம்…பே… வுத்த’’ந்தி. தஸ்ஸ நிஸ்ஸரணந்தி தஸ்ஸ ஜராமரணஸ்ஸ நிஸ்ஸரணந்தி வுச்சதி. யஸ்மா மஹாஸத்தோ ஜிண்ணப்³யாதி⁴மதே தி³ஸ்வா பப்³ப³ஜிதோ, தஸ்மாஸ்ஸ ஜராமரணமேவ ஆதி³தோ உபட்டா²ஸி.

உபாயமனஸிகாரேனாதி உபாயேன விதி⁴னா ஞாயேன மனஸிகாரேன பதே²ன மனஸிகாரஸ்ஸ பவத்தனதோ. ஸமாயோகோ³ அஹோஸீதி யாதா²வதோ படிவிஜ்ஜ²னவஸேன ஸமாக³மோ அஹோஸி. யோனிஸோ மனஸிகாராதி ஹேதும்ஹி நிஸ்ஸக்கவசனந்தி தஸ்ஸ ‘‘யோனிஸோ மனஸிகாரேனா’’தி ஹேதும்ஹி கரணவசனேன ஆஹ. ஜாதியா கோ² ஸதி ஜராமரணந்தி ‘‘கிம்ஹி நு கோ² ஸதி ஜராமரணம் ஹோதி, கிம் பச்சயா ஜராமரண’’ந்தி ஜராமரணே காரணம் பரிக்³க³ண்ஹந்தஸ்ஸ போ³தி⁴ஸத்தஸ்ஸ ‘‘யஸ்மிம் ஸதி யம் ஹோதி, அஸதி ச ந ஹோதி, தம் தஸ்ஸ காரண’’ந்தி ஏவம் அப்³யபி⁴சாரஜாதிகாரணபரிக்³க³ண்ஹனேன ‘‘ஜாதியா கோ² ஸதி ஜராமரணம் ஹோதி, ஜாதிபச்சயா ஜராமரண’’ந்தி யா ஜராமரணஸ்ஸ காரணபரிக்³கா³ஹிகா பஞ்ஞா உப்பஜ்ஜி, தாய உப்பஜ்ஜந்தியா சஸ்ஸ அபி⁴ஸமயோ படிவேதோ⁴ அஹோஸீதி அத்தோ².

இதீதி வுத்தப்பகாரபராமஸனம். ஹீதி நிபாதமத்தம். இத³ந்தி யதா²வுத்தஸ்ஸ வட்டஸ்ஸ பச்சக்க²தோ க³ஹணம். தேனாஹ ‘‘ஏவமித³’’ந்தி. இத⁴ அவிஜ்ஜாய ஸமுத³யஸ்ஸ ஆக³தத்தா ‘‘ஏகாத³ஸஸு டா²னேஸூ’’தி வுத்தம். ஸமுத³யம் ஸம்பிண்டே³த்வாதி ஸங்கா²ராதீ³னம் ஸமுத³யம் ஏகஜ்ஜ²ம் க³ஹேத்வா. அனேகவாரஞ்ஹி ஸமுத³யத³ஸ்ஸனவஸேன ஞாணஸ்ஸ பவத்தத்தா ‘‘ஸமுத³யோ ஸமுத³யோ’’தி ஆமேடி³தவசனம். அத² வா ‘‘ஏவம் ஸமுத³யோ ஹோதீ’’தி இத³ம் ந கேவலம் நிப்³ப³த்தித³ஸ்ஸனபரம், அத² கோ² படிச்சஸமுப்பாத³ஸத்³தோ³ விய படிச்சஸமுப்பாத³முகே²ன இத⁴ ஸமுத³யஸத்³தோ³ நிப்³ப³த்திமுகே²ன பச்சயத்தம் வத³தி. விஞ்ஞாணாத³யோ ச யாவந்தோ இத⁴ பச்சயத⁴ம்மா நித்³தி³ட்டா², தே ஸாமஞ்ஞரூபேன ப்³யாபனிச்சா²வஸேன க³ண்ஹந்தோ ‘‘ஸமுத³யோ ஸமுத³யோ’’தி அவோச. தேனாஹ ‘‘அவிஜ்ஜாபச்சயா ஸங்கா²ரானம் ஸமுத³யோ ஹோதீ’’தி. த³ஸ்ஸனட்டே²ன சக்கூ²தி ஸமுத³யஸ்ஸ பச்சக்க²தோ த³ஸ்ஸனபா⁴வோ சக்கு². ஞாதட்டே²னாதி ஞாதபா⁴வேன. பஜானனட்டே²னாதி ‘‘அவிஜ்ஜாஸங்கா²ராதி³தம்தம்பச்சயத⁴ம்மபவத்தியா ஏதஸ்ஸ து³க்க²க்க²ந்த⁴ஸ்ஸ ஸமுத³யோ’’தி பகாரதோ வா ஜானனட்டே²ன. படிவேத⁴னட்டே²னாதி ‘‘அயம் அவிஜ்ஜாதி³ பச்சயத⁴ம்மோ இமஸ்ஸ ஸங்கா²ராதி³கஸ்ஸ பச்சயபா⁴வதோ ஸமுத³யோ’’தி படிவிஜ்ஜ²னட்டே²ன. ஓபா⁴ஸனட்டே²னாதி ஸமுத³யபா⁴வபடிச்சா²த³கஸ்ஸ மோஹந்த⁴காரஸ்ஸ கிலேஸந்த⁴காரஸ்ஸ வித⁴மனவஸேன அவபா⁴ஸனவஸேன. தம் பனேதம் ‘‘சக்கு²’’ந்திஆதி³னா வுத்தம் ஞாணம். நிரோத⁴வாரேதி படிலோமவாரே. ஸோ ஹி ‘‘கிஸ்ஸ நிரோதா⁴ ஜராமரணனிரோதோ⁴’’தி நிரோத⁴கித்தனவஸேன ஆக³தோ.

விபஸ்ஸீஸுத்தவண்ணனா நிட்டி²தா.

5-10. ஸிகீ²ஸுத்தாதி³வண்ணனா

5-10. ந ஏவம் யோஜேத்வாதி ‘‘ஸிகி²ஸ்ஸபீ’’திஆதி³னா ஸமுச்சயவஸேன ஏவம் ந யோஜேத்வா. கஸ்மாதிஆதி³னா தத்த² காரணம் வத³தி. ஏகாஸனே அதே³ஸிதத்தாதி வுத்தமேவத்த²ம் பாகடம் காதும் ‘‘நானாடா²னேஸு ஹீ’’திஆதி³ வுத்தம். யதி³பி தானி விஸும் விஸும் வுத்தபா⁴வேன தே³ஸிதானி, அத்த²வண்ணனா பன ஏகஸதி³ஸா தத³த்த²ஸ்ஸ அபி⁴ன்னத்தா. ‘‘பு³த்³தா⁴ ஜாதா’’தி ந அஞ்ஞோ ஆசிக்க²தீதி யோஜனா. ந ஹி மஹாபோ³தி⁴ஸத்தானம் பச்சி²மப⁴வே பரோபதே³ஸேன பயோஜனம் அத்தி². க³தமக்³கே³னேவாதி படிபத்திக³மனேன க³தமக்³கே³னேவ பச்சி²மமஹாபோ³தி⁴ஸத்தா க³ச்ச²ந்தி, அயமேத்த² த⁴ம்மதா. க³ச்ச²ந்தீதி சதூஸு ஸதிபட்டா²னேஸு பதிட்டி²தசித்தா ஸத்த போ³ஜ்ஜ²ங்கே³ யாதா²வதோ பா⁴வேத்வா ஸம்மாஸம்போ³தி⁴யா அபி⁴ஸம்பு³ஜ்ஜ²னவஸேன பவத்தந்தீதி அத்தோ². யதா² பன தேஸம் பட²மவிபஸ்ஸனாபி⁴னிவேஸோ ஹோதி, தம் த³ஸ்ஸேதும் ‘‘ஸப்³ப³போ³தி⁴ஸத்தா ஹீ’’திஆதி³ வுத்தம். பு³த்³த⁴பா⁴வானம் விபஸ்ஸனா, பு³த்³த⁴த்தா²ய வா விபஸ்ஸனா பு³த்³த⁴விபஸ்ஸனா.

ஸிகீ²ஸுத்தாதி³வண்ணனா நிட்டி²தா.

பு³த்³த⁴வக்³க³வண்ணனா நிட்டி²தா.