4. ஆனந்த³ஸுத்தவண்ணனா

212. ராகோ³தி ஏத்த² ஆயஸ்மதோ வங்கீ³ஸஸ்ஸ ராக³ஸ்ஸ உப்பத்தியா காரணம் விபா⁴வேதும் ‘‘ஆயஸ்மா ஆனந்தோ³’’திஆதி³ வுத்தம். தந்தி ஆனந்த³த்தே²ரம். ஆரம்மணம் பரிக்³க³ஹேதுந்தி காயவேத³னாதி³பே⁴த³ம் ஆரம்மணம் ஸதிகோ³சரம். அஸுப⁴து³க்கா²தி³தோ, ரூபாதி³ஏகேகமேவ வா ச²ளாரம்மணம் அனிச்சது³க்கா²தி³தோ பரிக்³க³ண்ஹிதும் பரிச்சி²ஜ்ஜ ஜானிதும். இத்தி²ரூபாரம்மணேதி இத்தி²ஸந்தானே ரூபஸபா⁴வே ஆரம்மணே.

நிப்³பா³பனந்தி நிப்³பா³பயதி ஏதேனாதி நிப்³பா³பனம். விபல்லாஸேனாதி அஸுபே⁴ ‘‘ஸுப⁴’’ந்தி விபல்லாஸபா⁴வஹேது. ராக³ட்டா²னியந்தி ராகு³ப்பத்திஹேது. இட்டா²ரம்மணந்தி ஸுபா⁴ரம்மணம். ஏத்த² ச இட்டா²ரம்மணஸீஸேன தத்த² இட்டா²காரக்³க³ஹணம் வத³தி. தஞ்ஹி வஜ்ஜனீயம். பரதோதி அவஸவத்தனத்தே²ன அஞ்ஞதோ. ஸங்கா²ரா ஹி ‘‘மா பி⁴ஜ்ஜந்தூ’’தி இச்சி²தாபி பி⁴ஜ்ஜந்தேவ, தஸ்மா தே அவஸவத்தித்தா பரோ நாம, ஸா ச நேஸம் பரதா அனிச்சத³ஸ்ஸனேன பாகடா ஹோதீதி வுத்தம் ‘‘பரதோ பஸ்ஸாதி அனிச்சதோ பஸ்ஸா’’தி. காமம் விபஸ்ஸனா ஸங்கா²ரனிமித்தம் ந பரிச்சஜதி ஸங்கா²ரே ஆரப்³ப⁴ வத்தனதோ, யேஸம் பன நிமித்தானம் அக்³க³ஹணேன அனிமித்தாதி க³ஹிதும் அரஹதி, தம் த³ஸ்ஸேதும் ‘‘நிச்சாதீ³னம் நிமித்தான’’ந்திஆதி³ வுத்தம். ஸலக்க²ண-ஸாமஞ்ஞலக்க²ண-த³ஸ்ஸனவஸேன மானஸ்ஸ த³ஸ்ஸனாபி⁴ஸமயோ, விபஸ்ஸனாய பஹானாபி⁴ஸமயோ. ‘‘மக்³கே³னா’’தி வத³ந்தி, மக்³கே³னேவ பன அஸம்மோஹதோ பரிஞ்ஞாபடிவேத⁴வஸேன த³ஸ்ஸனாபி⁴ஸமயோ, பஹானபடிவேத⁴வஸேன பஹானாபி⁴ஸமயோ. ராகா³தி³ஸந்ததாயாதி ராகா³தீ³னம் ஸமுச்சே²த³வஸேன படிப்பஸ்ஸத்³தி⁴வஸேன வூபஸமேதப்³ப³தோ ஸந்தபா⁴வேன.

ஆனந்த³ஸுத்தவண்ணனா நிட்டி²தா.