5. ஸுபா⁴ஸிதஸுத்தவண்ணனா

213. அங்கீ³யந்தி ஹேதுபா⁴வேன ஆக³மபா⁴வேன அவயவபா⁴வேன வா ஞாயந்தீதி அங்கா³னி, காரணானி, அவயவா வாதி ஆஹ ‘‘அங்கே³ஹீதி காரணேஹி, அவயவேஹி வா’’தி. விரதியோ ஸுபா⁴ஸிதவாசாய புப்³ப³ம் பதிட்டி²தா ஹோந்தீதி முஸாவாதா³வேரமணிஆத³யோ தஸ்ஸா விஸேஸஹேதூதி ஆஹ ‘‘முஸாவாதா³…பே… காரணானீ’’தி. யஸ்மா அரியவோஹாரா விஸேஸதோ சேதனாஸபா⁴வா, தஸ்மா வசீஸுசரிதஸமுதா³யஸ்ஸ ஸச்சவாசாத³யோ அங்க³பூ⁴தாதி ஆஹ ‘‘ஸச்சவசனாத³யோ சத்தாரோ அவயவா’’தி. நிஸ்ஸக்கவசனந்தி ஹேதும்ஹி நிஸ்ஸக்கவசனம். தேனாஹ ‘‘ஸமனுஆக³தா பவத்தா’’தி. வாசா ஹி தாய விரதியா ஸம்மா அனுரூபதோ ஆக³தா பவத்தாதி ‘‘ஸமன்னாக³தா’’தி வுச்சதி. கரணவசனந்தி ஸஹயோகே³ கரணவசனம். தேனாஹ ‘‘யுத்தா’’தி. ஸஹஜாதாபி ஹி சேதனா யதா²ஸமாதி³ன்னாய விரதியா ஸம்மா அனுரூபதோ யுத்தாதி வத்தும் அரஹதி.

ஸமுல்லபனவாசாதி ஸத்³த³வாசா, ஸா வுச்சதீதி வாசா நாம. விஞ்ஞத்தி பன வுச்சதி ஏதாயாதி வாசா நாம, ததா² விரதி சேதனாவாசா. ந ஸா இத⁴ அதி⁴ப்பேதாதி ஸா சேதனாவாசா விஞ்ஞத்திவாசா விய இத⁴ இமஸ்மிம் ஸுத்தே ந அதி⁴ப்பேதா ‘‘ஸுபா⁴ஸிதா ஹோதீ’’தி வசனதோ. தேனாஹ ‘‘அபா⁴ஸிதப்³ப³தோ’’தி. ஸுட்டு² பா⁴ஸிதாதி ஸம்மா ஞாயேன பா⁴ஸிதா வசீஸுசரிதபா⁴வதோ. அத்தா²வஹதந்தி ஹிதாவஹகாலம் பதி ஆஹ. காரணஸுத்³தி⁴ந்தி யோனிஸோமனஸிகாரேன காரணவிஸுத்³தி⁴ம். தோ³ஸாபா⁴வந்தி அக³திக³மனாதி³தோ³ஸாபா⁴வம். ராக³தோ³ஸாதி³வினிமுத்தஞ்ஹி தம் பா⁴ஸதோ அனுரோத⁴விரோத⁴விவஜ்ஜனதோ அக³திக³மனம் தூ³ரஸமுக்³கா⁴டிதமேவாதி. அனுவாத³விமுத்தாதி அபவாத³விரஹிதா. ஸப்³பா³காரஸம்பத்திம் தீ³பேதி, அஸதி ஹி ஸப்³பா³காரஸம்பதியம் அனுவஜ்ஜதாபி.

கிஞ்சாபி புப்³பே³ த⁴ம்மாதி⁴ட்டா²னா தே³ஸனா ஆரத்³தா⁴, புக்³க³லஜ்ஜா²ஸயதோ பன புக்³க³லாதி⁴ட்டா²னாய…பே… வசனமேதம். காமஞ்சேத்த² ‘‘அஞ்ஞதரனித்³தோ³ஸவசன’’ந்தி அவிஸேஸதோ வுத்தம், ‘‘த⁴ம்மம்யேவ பா⁴ஸதீ’’திஆதி³னா பன அத⁴ம்மதோ³ஸாதி³ரஹிதாய வாசாய வுச்சமானத்தா இதா⁴பி ஸுபா⁴ஸிதா வாசா அதி⁴ப்பேதாதி. ‘‘ஸுபா⁴ஸிதம்யேவா’’தி அவதா⁴ரணேன நிவத்திதம் ஸரூபதோ த³ஸ்ஸேதி ‘‘நோ து³ப்³பா⁴ஸித’’ந்தி இமினா. தேனாஹ ‘‘தஸ்ஸேவ வாசங்க³ஸ்ஸ படிபக்க²பா⁴ஸனனிவாரண’’ந்தி. படியோகீ³னிவத்தனத்தோ² ஹி ஏவ-ஸத்³தோ³, தேன பிஸுணவாசாபடிக்கே²போ த³ஸ்ஸிதோ. ‘‘ஸுபா⁴ஸித’’ந்தி வா இமினா சதுப்³பி³த⁴ம் வசீஸுசரிதம் க³ஹிதந்தி ‘‘நோ து³ப்³பா⁴ஸிதந்தி இமினா மிச்சா²வாசப்பஹானம் தீ³பேதீ’’தி வுத்தம். ஸப்³ப³வசீஸுசரிதஸாதா⁴ரணவசனஞ்ஹி ஸுபா⁴ஸிதந்தி. தேன பரபே⁴த³னாதி³கம் அஸப்³பா⁴தி³கஞ்ச போ³தி⁴ஸத்தானம் வசனம் அபிஸுணாதி³விஸயந்தி த³ட்ட²ப்³ப³ம். பா⁴ஸிதப்³ப³வசனலக்க²ணந்தி பா⁴ஸிதப்³ப³ஸ்ஸ வசனஸ்ஸ ஸபா⁴வலக்க²ணம் தீ³பேதீதி ஆனேத்வா ஸம்ப³ந்தோ⁴. யதி³ ஏவம் நனு அபா⁴ஸிதப்³ப³ம் பட²மம் வத்வா பா⁴ஸிதப்³ப³ம் பச்சா² வத்தப்³ப³ம் யதா² ‘‘வாமம் முஞ்ச, த³க்கி²ணம் க³ண்ஹா’’தி ஆஹ ‘‘அங்க³பரிதீ³பனத்த²ம் பனா’’திஆதி³.

பட²மேனாதி ‘‘ஸுபா⁴ஸித’’ந்தி பதே³ன. த⁴ம்மதோ அனபேதந்தி அத்தனோ பரேஸஞ்ச ஹிதஸுகா²வஹத⁴ம்மதோ அனபேதம். மந்தாவசனந்தி மந்தாய பவத்தேதப்³ப³வசனம். பஞ்ஞவா அவிகிண்ணவாசோ ஹி ந ச அனத்தா²வஹம் வாசம் பா⁴ஸதி. இதரேஹி த்³வீஹீதி ததியசதுத்த²பதே³ஹி. ‘‘இமேஹி கோ²திஆதீ³னீதி கரணே ஏதம் உபயோக³வசன’’ந்தி கேசி. தம் வாசந்தி யதா²வுத்தம் சதுரங்கி³கம். யஞ்ச வாசம் மஞ்ஞந்தீதி ஸம்ப³ந்தோ⁴. அஞ்ஞேதி இதோ பா³ஹிரகா ஞாயவாதி³னோ அக்க²ரசிந்தகா ச. ‘‘படிஞ்ஞாஹேதுஉதா³ஹரணூபனயனிக³மனானி அவயவா வாக்யஸ்ஸா’’தி வத³ந்தி. நாமாதீ³ஹீதி நாமாக்²யாதபதே³ஹி. லிங்க³ம் இத்தி²லிங்கா³தி³ வசனம் ஏகவசனாதி³. பட²மாதி³ விப⁴த்தி அதீதாதி³ காலம். கத்தா ஸம்பதா³னம் அபாதா³னம் கரணம் அதி⁴கரணம் கம்மஞ்ச காரகம். ஸம்பத்தீஹி ஸமன்னாக³தந்தி ஏதே அவயவாதி³கே ஸம்பாதே³த்வா வுத்தம். தம் படிஸேதே⁴தீதி தம் யதா²வுத்தவிஸேஸம்பி வாசம் ‘‘இமேஹி கோ²’’தி வத³ந்தோ ப⁴க³வா படிஸேதே⁴தி. கோ²-ஸத்³தோ³ ஹேத்த² அவதா⁴ரணத்தோ². தேனாஹ ‘‘அவயவாதீ³’’திஆதி³. யா காசி அஸபா⁴வனிருத்திலக்க²ணா. ஸா மிலக்கு²பா⁴ஸா. ஸீஹளகேனேவாதி ஸீஹளபா⁴ஸாய பரியாபன்னேன வசனேன. அரஹத்தம் பாபுணிம்ஸூதி ஸம்ஸாரே அதிவிய ஸஞ்ஜாதஸம்வேகா³ தன்னிஸ்ஸரணே நின்னபோணமானஸா ஹுத்வா விபஸ்ஸனம் உஸ்ஸுக்காபேத்வா மக்³க³படிபாடியா அரஹத்தம் பாபுணிம்ஸு.

பாதோவ பு²ல்லிதகோகனத³ந்தி பாதோவ ஸம்பு²ல்லபது³மம். பி⁴ஜ்ஜியதேதி நிப்³பி⁴ஜ்ஜியதி நிப்³பி⁴க்³கோ³ ஜாயதி. மனுஸ்ஸத்தம் க³தாதி மனுஸ்ஸத்தபா⁴வம் உபக³தா.

பு³த்³த⁴ந்தரேதி பு³த்³து⁴ப்பாத³ந்தரே த்³வின்னம் பு³த்³து⁴ப்பாதா³னம் அந்தரா. ததா³ ஹி பச்சேகபு³த்³தா⁴னம் ஸாஸனே, ந பு³த்³த⁴ஸாஸனே தி³ப்பமானே.

ஜராய பரிமத்³தி³தந்தி யதா² ஹத்த²சரணாதி³அங்கா³னி ஸிதி²லானி ஹோந்தி, சக்கா²தீ³னி இந்த்³ரியானி ஸவிஸயக்³க³ஹணே அஸமத்தா²னி ஹோந்தி, யோப்³ப³னம் ஸப்³ப³ஸோ விக³தம், காயப³லம் அபக³தம், ஸதிமதிதி⁴திஆத³யோ விப்பயுத்தா, புப்³பே³ அத்தனோ ஓவாத³படிகரா புத்ததா³ராத³யோபி அபஸாத³கா, பரேஹி வுட்டா²பனீயஸம்வேஸனீயதா புனதே³வ பா³லபா⁴வப்பத்தி ச ஹோந்தி, ஏவம் ஜராய ஸப்³ப³ஸோ விமத்³தி³தம். ஏதந்தி ஸரீரம் வத³தி. மிலாதச²விசம்மனிஸ்ஸிதந்தி ஜிண்ணபா⁴வேன அப்பமம்ஸலோஹிதத்தா மிலாதேஹி க³தயோப்³ப³னேஹி த⁴ம்மேஹி ஸன்னிஸ்ஸிதம். கா⁴ஸமாமிஸந்தி கா⁴ஸபூ⁴தம் ஆமிஸம் மச்சுனா கி³லித்வா விய பதிட்ட²பேதப்³ப³தோ. கேஸலோமாதி³நானாகுணபபூரிதம். ததோ ஏவ அஸுசிபா⁴ஜனம் ஏதம். ஸப்³ப³தா²பி நிஸ்ஸாரதாய கத³லிக்க²ந்த⁴ஸமம்.

அனுச்ச²விகாஹீதி ஸம்மாஸம்பு³த்³த⁴ஸ்ஸ அனுரூபாஹி. ந தாபேய்யாதி சித்தஞ்ச காயஞ்ச ந தாபேய்ய. தாபனா சேத்த² ஸம்பதி ஆயதி ச விஸாத³னா. ந பா³தே⁴ய்யாதி ‘‘நாபி⁴ப⁴வேய்யா’’தி பத³ஸ்ஸ அத்த²த³ஸ்ஸனம். அபிஸுணவாசாவஸேனாதி ஸப்³ப³ஸோ பஹீனபிஸுணவாசதாவஸேன. பாபானீதி லாமகானி நிகிட்ட²கானி. தேனாஹ ‘‘அப்பியானீ’’திஆதி³. அனாதா³யாதி அக்³க³ஹேத்வா.

ஸாது⁴பா⁴வேனாதி நித்³தோ³ஸமது⁴ரபா⁴வேன. அமதஸதி³ஸாதி ஸதி³ஸே தப்³போ³ஹாரோதி, காரணே வாயம் காரியவோஹாரோதி ஆஹ ‘‘நிப்³பா³னாமதபச்சயத்தா வா’’தி. பச்சயவஸேன ஹி ஸா ததா³ த³ஸ்ஸனப்பவத்தி. சரியாதி சாரித்தம். போராணா நாம பட²மகப்பிகா, பு³த்³தா⁴த³யோ வா அரியா.

பதிட்டி²தாதி நிச்சலபா⁴வேன அட்டி²ம் கத்வா பச்சயாயத்தபா⁴வதோ அவிஸம்வாத³னகா. உப⁴யதா² படிபத்திம் ஆஹ ‘‘அத்தனோ ச பரேஸஞ்ச அத்தே² பதிட்டி²தா’’தி. அத்தே² தி³ட்ட²த⁴ம்மிகஸம்பராயிகாதி³ஹிதே பதிட்டி²தத்தா ஏவ த⁴ம்மே அவிஹிம்ஸாதி³த⁴ம்மே பதிட்டி²தா. அனுபரோத⁴கரந்தி ஏதேன ஹிதபரியாயோயம் அத்த²-ஸத்³தோ³தி த³ஸ்ஸேதி. த⁴ம்மிகந்தி த⁴ம்மதோ அனபேதம், அத்த²த⁴ம்மூபஸம்ஹிதம் வா.

நிப்³பா³னப்பத்தியாதி நிப்³பா³னப்பத்தியத்த²ம். து³க்க²ஸ்ஸ அந்தகிரியாய அந்தகரணத்த²ம். யஸ்மா பு³த்³தோ⁴ கே²மாய பா⁴ஸதி, தஸ்மா கே²முப்பத்திஹேதுயா கே²மா, தஸ்மா ஸா ஸப்³ப³வாசானம் உத்தமாதி ஏவம்பேத்த² அத்தோ² த³ட்ட²ப்³போ³. மந்தாவசனவஸேனாதி ஸப்³ப³தோ³ஸரஹிதவஸேன.

ஸுபா⁴ஸிதஸுத்தவண்ணனா நிட்டி²தா.