2. அரதிஸுத்தவண்ணனா

210. விஹாரக³ருகோ கிரேஸ தே²ரோதி ஏதேன தே²ரோ அத்தனோ ஸத்³தி⁴விஹாரிகம் வங்கீ³ஸம் ஓவதி³தும் அனவஸரோ. தேன அந்தரந்தரா தஸ்ஸ சித்தம் ராகோ³ அனுத்³த⁴ம்ஸேதீதி த³ஸ்ஸேதி. ஸாஸனே அரதிந்தி ஸீலபரிபூரணே ஸமத²விபஸ்ஸனாபா⁴வனாய ச அனபி⁴ரதிம். காமகு³ணேஸு ச ரதிந்தி பஞ்சஸு காமகோட்டா²ஸேஸு அஸ்ஸாத³ம். பாபவிதக்கந்தி காமஸங்கப்பம். ஸப்³பா³காரேனாதி ஸப்³பே³ தத³ங்க³விக்க²ம்ப⁴னஸமுச்சி²ந்த³னாகாரேன. யதா² மஹந்தம் அரஞ்ஞம் வனத²ந்தி, ஏவம் மஹந்தம் கிலேஸவனம் ‘‘வனத²’’ந்தி வுத்தம்.

பத²விஞ்ச வேஹாஸந்தி பு⁴ம்மத்தே² பச்சத்தவசனம், தஸ்மா பத²வியம் ஆகாஸே சாதி அத்தோ². தேனாஹ ‘‘பத²விட்டி²த’’ந்திஆதி³. ஜக³தீதி ச பத²வியா வேவசனம். தேனாஹ ‘‘அந்தோபத²விய’’ந்தி. பரிஜீரதீதி ஸப்³ப்³ப³ஸோ ஜரம் பாபுணாதி. ஸமாக³ந்த்வாதி ஞாணேன ஸமாக³ந்த்வாதி அத்தோ². தேனாஹ ‘‘முதத்தாதி விஞ்ஞாதத்தபா⁴வா’’தி.

படிக⁴பதே³ன க³ந்த⁴ரஸா க³ஹிதா கா⁴னஜிவ்ஹானம் படிஹனனவஸேன பவத்தனதோ. முதபதே³ன போ²ட்ட²ப்³பா³ரம்மணம் க³ஹிதம் முத்வா க³ஹேதப்³ப³தோ. ந லிப்பதீதி ந மக்கீ²யதி.

ஸட்டி²-ஸத்³தோ³ ச²-ஸத்³தே³ன ஸமானத்தோ²தி ‘‘ஸட்டி²னிஸ்ஸிதா’’தி பத³ஸ்ஸ ‘‘ச²ஆரம்மணனிஸ்ஸிதா’’தி அத்தோ² வுத்தோ. புதூ² அத⁴ம்மவிதக்காதி ரூபவிதக்காதி³வஸேன ப³ஹூ நானாவிதக்கா மிச்சா²ஸங்கப்பா. ஜனதாய நிவிட்டா²தி மஹாஜனே பதிட்டி²தா. தேஸம் வஸேனாதி தேஸம்பி மிச்சா²விதக்கானம் வஸேன. ந கத்த²சி ஆரம்மணே. கிலேஸவக்³க³க³தோதி கிலேஸஸங்க³ணிகம் உபக³தோ ந ப⁴வேய்ய, கிலேஸவிதக்கா ந உப்பாதே³தப்³பா³தி அத்தோ². து³ட்டு²ல்லவசனம் காமபடிஸம்யுத்தகதா².

த³ப்³ப³ஜாதிகோதி த³ப்³ப³ரூபோ. நேபக்கேனாதி கோஸல்லேன. நிப்³பா³னம் படிச்சாதி அஸங்க²ததா⁴தும் ஆரம்மணவஸேன படிச்ச. பரினிப்³பா³னகாலந்தி அனுபாதி³ஸேஸனிப்³பா³னகாலம்.

அரதிஸுத்தவண்ணனா நிட்டி²தா.