9. துரூப்³ரஹ்மஸுத்தவண்ணனா

180. ஆபா³தோ⁴ ஏதஸ்ஸ அத்தீ²தி ஆபா³தி⁴கோ. அனந்தரஸுத்தேதி அனாக³தானந்தரே ஸுத்தே. வராகோதி அனுக்³க³ஹவசனமேவ, ந நிப்பரியாயேன வுத்தவசனம். பியஸீலாதி இமினா ஏதஸ்மிம் அத்தே² நிருத்தினயேன ‘‘பேஸலா’’தி பத³ஸித்³தீ⁴தி த³ஸ்ஸேதி. கப³ரக்கீ²னீதி ப்³யாதி⁴ப³லேன பரிபி⁴ன்னவண்ணதாய கப³ரபூ⁴தானி அக்கீ²னி. யத்தகந்தி யம் த்வம் ப⁴க³வதோ வசனம் அஞ்ஞதா² கரோஸி, தத்தகம் தயா அபரத்³த⁴ம், தஸ்ஸ பமாணம் நத்தீ²தி அத்தோ². யஸ்மா அனாகா³மினோ நாம காமச்ச²ந்த³ப்³யாபாதா³ பஹீனா ஹோந்தி, த்வஞ்ச தி³ட்டோ² காமச்ச²ந்த³ப்³யாபாத³வஸேன இதா⁴க³தோ, தஸ்மா யாவ தே இத³ம் அபரத்³த⁴ந்தி அயமேவேத்த² அத்தோ² த³ட்ட²ப்³போ³.

அதி³ட்டி²ப்பத்தோதி அப்பத்ததி³ட்டி²னிமித்தோ. கி³லவிஸோ விய விஸம் கி³லித்வா டி²தோ விய. குடா²ரிஸதி³ஸா மூலபச்சி²ந்த³னட்டே²ன. உத்தமத்தே²தி அரஹத்தே. கீ²ணாஸவோதி வத³தி ஸுனக்க²த்தோ விய அசேலம் கோரக்க²த்தியம். யோ அக்³க³ஸாவகோ விய பஸம்ஸிதப்³போ³ கீ²ணாஸவோ, தம் ‘‘து³ஸ்ஸீலோ அய’’ந்தி யோ வா வத³தி. ஸமகோவ விபாகோதி பஸம்ஸியனிந்தா³ விஜ்ஜமானகு³ணபரித⁴ம்ஸனவஸேன பவத்தா யாவ மஹாஸாவஜ்ஜதாய கடுகதரவிபாகா, தாவ நிந்தி³யபஸம்ஸாபி மஹாஸாவஜ்ஜதாய ஸமவிபாகா தத்த² அவிஜ்ஜமானகு³ணஸமாரோபனேன அத்தனோ பரேஸம் மிச்சா²படிபத்திஹேதுபா⁴வதோ பஸம்ஸியேன தஸ்ஸ ஸமபா⁴வகரணதோ ச. லோகேபி ஹி அயம் புரே ஸமணகா³ரய்ஹோ ஹோதி, பகே³வ து³ப்படிபன்னது³ப்படிபன்னோதி ஸமம் கரோந்தீதி.

ஸகேனாதி அத்தனோ ஸாபதேய்யேன. அயம் அப்பமத்தகோ அபராதோ⁴ தி³ட்ட²த⁴ம்மிகத்தா ஸப்பதிகாரத்தா ச தஸ்ஸ. அயம் மஹந்ததரோ கலி கதூபசிதஸ்ஸ ஸம்பராயிகத்தா அப்பதிகாரத்தா ச.

‘‘நிரப்³பு³தோ³’’தி க³ணனாவிஸேஸோ ஏகோதி ஆஹ ‘‘நிரப்³பு³த³க³ணனாயா’’தி, ஸதஸஹஸ்ஸம் நிரப்³பு³தா³னந்தி அத்தோ². நிரப்³பு³த³பரிக³ணனம் பன ஹேட்டா² வுத்தமேவ. யமரியக³ரஹீ நிரயம் உபேதீதி ஏத்த² யதா²வுத்தம் ஆயுப்பமாணம் பாகதிகேன அரியூபவாதி³னா வுத்தந்தி வேதி³தப்³ப³ம். ‘‘அக்³க³ஸாவகானம் பன கு³ணமஹந்ததாய ததோபி அதிவிய மஹந்ததரா ஏவா’’தி வத³ந்தி.

துரூப்³ரஹ்மஸுத்தவண்ணனா நிட்டி²தா.