5. பி⁴க்கு²னீஸம்யுத்தம்

1. ஆளவிகாஸுத்தவண்ணனா

162. ஆளவியம் ஜாதாதி ஆளவியம் விஜாயித்வா ஸம்வட்³ட⁴மானா. தேனாஹ ‘‘ஆளவினக³ரதோயேவ ச நிக்க²ம்ம பப்³ப³ஜிதா’’தி. த⁴னம் ஸமாத³பேத்வாதி சேதியஸ்ஸ ராஜா ஏகம் முக²ம், ராஜபுத்தோ ஏகம், அமச்சானம் ஜேட்ட²கோ ஹுத்வா ஸேனாபதி ஏகம், ஜனபதா³னம் ஜேட்ட²கோ ஹுத்வா ஸேட்டி² ஏகந்தி ஏவம் சதூஸு முகே²ஸு நவகம்மே கயிரமானே ஸேட்டி²னா க³ஹிதமுகே² கம்மே ஓலீயமானே ஏகோ உபாஸகோ அரியஸாவகோ பஞ்ச ஸகடஸதானி யோஜாபேத்வா ஜனபத³ம் க³ந்த்வா ‘‘யோ யம் தா³தும் உஸ்ஸஹதி ஹிரஞ்ஞம் வா ஸுவண்ணம் வா ஸத்தவித⁴ரதனம் வா ஹரிதாலம் வா மனோஸிலம் வா, ஸோ த⁴னம் தே³தூ’’தி ஸமாத³பேத்வா யதா²லத்³த⁴ம் பட²மம் கம்மட்டா²னம் பேஸேத்வா ‘‘நவகம்மம் நிட்டி²த’’ந்தி ஸுத்வா ஏககம் ஆக³ச்ச²ந்தம் அந்தராமக்³கே³ சோரா பலிபு³ந்தி⁴த்வா ததோ கிஞ்சிபி த⁴னம் அலப⁴ந்தா ‘‘ஸசே நம் முஞ்சிஸ்ஸாம, அனத்த²ம் நோ கரேய்யா’’தி ஜீவிதா வோரோபேஸும். அனபராதே⁴ அரியஸாவகே அபராத⁴கா தே சோரா அந்தா⁴ ஜாதா, தஸ்மா தம் டா²னம் ‘‘அந்த⁴வன’’ந்தி பஞ்ஞாயித்தா²தி அட்ட²கதா²யம் வுத்தம். கீ²ணாஸவானம் யஸ்மா யத்த² கத்த²சி சித்தவிவேகோ ஹோதியேவ உபதி⁴விவேகஸ்ஸ ஸித்³த⁴த்தா. தஸ்மா ‘‘காயவிவேகத்தி²னீ’’தி வுத்தம்.

நிஸ்ஸரணந்தி நிப்³பா³னம் ஸப்³ப³ஸங்க²தஸ்ஸ நிஸ்ஸடத்தா. பச்சவேக்க²ணஞாணேனாதி பச்சவேக்க²ணஞாணேன, பகே³வ மக்³க³ப²லஞாணேஹீதி அதி⁴ப்பாயோ. நிப்³பா³னபத³ந்தி நிப்³பா³னஸங்கா²தம் த⁴ம்மகோட்டா²ஸம். வினிவிஜ்ஜ²னட்டே²னாதி ஹத³யம் வினிவித்³தே⁴ன ஹத³யம்ஹி விஜ்ஜி²த்வா து³க்கு²ப்பாத³னேன க²ந்தா⁴னம் ஏதே பஞ்ச காமா ஸத்திஸூலஸதி³ஸா. அதி⁴குட்டனப⁴ண்டி³காதி ஆகா⁴தனக⁴டிகா.

ஆளவிகாஸுத்தவண்ணனா நிட்டி²தா.

2. ஸோமாஸுத்தவண்ணனா

163. டா²னந்தி இஸ்ஸரியட்டா²னம் விஸயஜ்ஜ²த்தம். து³ப்பஸஹம் அகம்பியபா⁴வத்தா. த்³வங்கு³லபஞ்ஞாயாதி ஏத்த² இத்தி²யோ ஹி த³ஹரகுமாரிகாகாலதோ பட்டா²ய ஓத³னபசனவிதி⁴ம் அனுதிட்ட²ந்தியோ உக்க²லியம் உத³கம் தாபேத்வா தண்டு³லே பக்கி²பித்வா அத்தனோ பு³த்³தி⁴யா தேஸம் பாககாலப்பமாணம் பரிச்சி²ந்தி³தும் தானி த³ப்³பி³யா உத்³த⁴ரித்வாபி வண்ணஸண்டா²னக்³க³ஹணமத்தேன பக்காபக்கபா⁴வம் ஜானிதும் ந ஸக்கோந்தி, கேவலம் பன த்³வீஹி அங்கு³லீஹி உப்பீளிதகாலே ஏவ ஜானந்தி, தஸ்மா த்³வீஹங்கு³லிகேஹி து³ப்³ப³லபஞ்ஞத்தா ‘‘த்³வங்கு³லபஞ்ஞா’’தி வுச்சந்தி. ப²லஸமாபத்திஞாணப்பவத்திகித்தனேன சதூஸு ஸச்சேஸு அஸம்மோஹவிஹாரோ தீ³பிதோ ஹோதீதி ஆஹ ‘‘ஞாணம்ஹி வத்தமானம்ஹீதி ப²லஸமாபத்திஞாணே பவத்தமானே’’தி. விபஸ்ஸந்தஸ்ஸாதி அஸம்மோஹபடிவேத⁴தோ விஸேஸேன பஸ்ஸந்தஸ்ஸ க²ந்த⁴பஞ்சகமேவ ஸச்சாபி⁴ஸமயதோ புப்³ப³பா⁴கே³ விபஸ்ஸந்தஸ்ஸ. அஞ்ஞம் வாதி இத்தி²புரிஸதோ அஞ்ஞம் வா கிஞ்சி வத்து²ம். ‘‘அஹம் அஸ்மீ’’தி மானதி³ட்டி²கா³ஹதண்ஹாகா³ஹவஸேன க³ஹிதவத்து²ஸ்மிம் யேவாதி ஆஹ ‘‘அஹம் அஸ்மீதி தண்ஹாமானதி³ட்டி²வஸேனா’’தி.

ஸோமாஸுத்தவண்ணனா நிட்டி²தா.

3. கிஸாகோ³தமீஸுத்தவண்ணனா

164. ‘‘கிஸாகோ³தமீ’’தி ஏத்த² கா பனாயம் கிஸாகோ³தமீ, கிஸ்ஸ அயம் பி⁴க்கு²னீ ஹுத்வா ஸமணத⁴ம்மம் மத்த²கம் பாபேஸீதி தமத்த²ம் விபா⁴வேதும் ‘‘புப்³பே³ கிரா’’திஆதி³மாரத்³த⁴ம். அங்கா³ராவாதி அத்³தா³ரிட்ட²கவண்ணஅங்கா³ரா ஏவ ஜாதா. தா³ருஸாகந்தி அத்³த⁴மாஸகேன தா³ரும் ஸாகஞ்ச ஆஹரிஸ்ஸாமீதி அந்தராபணே அந்தரவீதி²ம் க³தா.

ஸித்³த⁴த்த²கந்தி ஸாஸபம். ஸாலாயந்தி அனாத²ஸாலாயம். கு²ரக்³கே³யேவாதி கு²ரஸிகே² ஏவ, கேஸோரோஹனக்க²ணே ஏவாதி அத்தோ².

ஏகமாஸீதி ஏத்த² ம-காரோ பத³ஸந்தி⁴கரோ. ஸம்ஹிதாவஸேன ச புரிமபதே³ வா ரஸ்ஸத்தம். பரபதே³ வா தீ³க⁴த்தந்தி ஆஹ ‘‘ஏகா ஆஸீ’’தி. பா⁴வனபும்ஸகமேதம் ‘‘ஏகமந்தம் நிஸீதீ³’’திஆதீ³ஸு விய. புத்தமரணம் அந்தம் அதீதம் இதா³னி புத்தமரணஸ்ஸ அபா⁴வதோ. தேனேவாஹ ‘‘புத்தமரணம் நாம நத்தீ²’’தி. புரிஸம் க³வேஸிதுந்தி யதா² மய்ஹம் புரிஸக³வேஸனா நாம ஸப்³ப³ஸோ நத்தி², ததா² ஏவ புத்தக³வேஸனாபி நத்தி², தஸ்மா மே புத்தமரணம் ஏதத³ந்தம், ஸப்³பே³ஸு க²ந்தா⁴தீ³ஸு ப⁴வாதீ³ஸு ச தண்ஹானந்தி³யா அபா⁴வகத²னேன ஸப்³ப³ஸத்தேஸு தண்ஹா ஸப்³ப³ஸோ விஸோஸிதா, தஸ்ஸாயேவ காரகஅவிஜ்ஜாக்க²ந்தோ⁴ பதா³லிதோதி அத்தனோ நிக்கிலேஸதம் பவேதே³ந்தீ தே²ரீ ஸீஹனாத³ம் நதீ³தி.

கிஸாகோ³தமீஸுத்தவண்ணனா நிட்டி²தா.

4. விஜயாஸுத்தவண்ணனா

165. பஞ்ச அங்கா³னி ஏதஸ்ஸாதி பஞ்சங்க³ம், பஞ்சங்க³மேவ பஞ்சங்கி³கம், தேன பஞ்சங்கி³கேன. ஆததந்திஆதீ³ஸு ஆததம் நாம சம்மபரியோனத்³தே⁴ஸு பே⁴ரிஆதீ³ஸு ஏகதலம் தூரியம். விததம் நாம உப⁴யதலம். ஆததவிததம் நாம தந்திப³த்³த⁴வீணாதி³. ஸுஸிரம் வம்ஸாதி³. க⁴னம் ஸம்மாதி³. ததஆதி³விஸேஸோபி ஆததமேவாதி ‘‘சம்மபரியோனத்³தே⁴ஸூ’’தி விஸேஸனம். ஏகதலம் கும்ப⁴தூ²ணத³த்³த³ராதி³. உப⁴யதலம் பே⁴ரிமுதி³ங்கா³தி³. சம்மபரியோனத்³த⁴ம் ஸேஸம் தந்திப³த்³த⁴ம் ஸப்³ப³ம் ஆததவிததம் நாம, கோ³முகீ²ஆதீ³னம்பி ஏத்தே²வ ஸங்க³ஹோ த³ட்ட²ப்³போ³. வம்ஸாதீ³தி ஆதி³ஸத்³தே³ன ஸங்க²ஸிங்கா³னம்பி ஸங்க³ஹோ. ஸம்மதாள-கம்ஸதாள-ஸிலாதாள-ஸலாகதாளாதி³ ஸம்மாதி³ நாம. தத்த² ஸம்மதாளம் நாம த³ண்ட³மயதாளம், கம்ஸமயதாளம் கம்ஸதாளம், ஸிலாயம் அயோபத்தேன ச தாளனதாளம். ஸப்³பே³ காமகு³ணே. உக்³க⁴ரிதபக்³க⁴ரிதட்டே²னாதி உபரி க⁴ரணேன ச விஸ்ஸந்த³னேன ச. ஏவந்தி ‘‘இமினா பூதிகாயேனா’’தி. அரூபட்டா²யினோதி ஸத்தாதி⁴ட்டா²னேனாயம் த⁴ம்மதே³ஸனாதி ஆஹ ‘‘ஸப்³ப³த்தா²தி ஸப்³பே³ஸு ரூபாரூபப⁴வேஸூ’’தி. தேஸம் த்³வின்னம் ரூபாரூபப⁴வானம் க³ஹிதத்தா. ப⁴வபா⁴வஸாமஞ்ஞதோ, தத³தி⁴ட்டா²னதோ க³ஹிதே காமப⁴வே. அவிஜ்ஜாதமோ விஹதோ அக்³க³மக்³கே³ன ஸமுக்³கா⁴திதத்தா.

விஜயாஸுத்தவண்ணனா நிட்டி²தா.

5. உப்பலவண்ணாஸுத்தவண்ணனா

166. அக்³க³தோ பட்டா²யாதி ஸப்³ப³அக்³க³தோ பபு⁴தி யாவ மூலா அந்தராயுத்தம் ஸம்மதே³வ புப்பி²தம் ஸாலருக்க²ம். வண்ணதா⁴துஸீஸேன வண்ணதா⁴துஸம்பன்னம் து³தியம் பி⁴க்கு²னிம் வத³தீதி ஆஹ ‘‘தயா ஸதி³ஸா அஞ்ஞா பி⁴க்கு²னீ நத்தீ²’’தி. பகு²மஸீஸேன அக்கி²ப⁴ண்ட³ம் வுச்சதீதி ஆஹ ‘‘பகு²மந்தரிகாயந்தி த்³வின்னம் அக்கீ²னம் மஜ்ஜே²’’தி. நாஸவம்ஸேதி நாஸவம்ஸமூலே. ‘‘ந பஸ்ஸஸீ’’தி வத்வா அத³ஸ்ஸனே காரணம் ஆஹ ‘‘வஸீபூ⁴தம்ஹீ’’தி.

உப்பலவண்ணாஸுத்தவண்ணனா நிட்டி²தா.

6. சாலாஸுத்தவண்ணனா

167. இத³ந்தி இத³ம் த³ஸ்ஸனம். கா³ஹாபேஸீதி ஸமாதா³பேஸி ‘‘ஜாதிம் மா ரோசா’’தி. அஞ்ஞந்தி ப³ந்த⁴வத⁴தோ அஞ்ஞம் சே²த³னாதி³ம். நிவேஸேஸீதி பவிஸாபேஸி.

சாலாஸுத்தவண்ணனா நிட்டி²தா.

7. உபசாலாஸுத்தவண்ணனா

168. புனப்புனம்…பே… ஆக³ச்ச²ந்தி காரணஸ்ஸ அஸமூஹதத்தா. ஸந்தாபிதோ கிலேஸஸந்தாபேஹி. அக³தீதி அவிஸயோ.

உபசாலாஸுத்தவண்ணனா நிட்டி²தா.

8. ஸீஸுபசாலாஸுத்தவண்ணனா

169. ஸமணிஸதி³ஸாதி ஸமணலிங்க³ஸ்ஸ தா⁴ரணேன ஸமணிஸதி³ஸா, கஸ்ஸசிபி பாஸண்ட³ஸ்ஸ அருச்சனதோ மோனமக்³க³ஸ்ஸ அப்படிபஜ்ஜனதோ தவ ஸமணிபா⁴வம் நானுபஸ்ஸாமீதி அதி⁴ப்பாயோ. பாஸம் டே³ந்தீதி பாஸம் ஸஜ்ஜேந்தி, யதா² தத்த² தி³ட்டி²பாஸே ஸத்தானம் சித்தம் படிமுக்கம் ஹோதி, ஏவம் ஸஜ்ஜேந்தீதி அத்தோ². ததா²பூ⁴தா ச தே ஸத்தானம் சித்தே கி²த்தா விய ஹோந்தீதி ஆஹ ‘‘சித்தேஸு தி³ட்டி²பாஸம் கி²பந்தீதி அத்தோ²’’தி. பாஸே மோசேதீதி தி³ட்டி²பாஸே ஸத்தானம் சித்தஸந்தானதோ நீஹரதி த⁴ம்மஸுத⁴ம்மதாய. தஸ்மாதி பாஸமோசனதோ பாஸண்டோ³தி ந வுச்சதி. ‘‘இதோ ப³ஹித்³தா⁴யேவ பாஸண்டா³ ஹோந்தீ’’தி வுத்தஸ்ஸ அத்த²ஸ்ஸ நிக³மனம். ஏவஞ்ச கத்வா ஸப்³பே³பி பா³ஹிரகஸமயே ஸந்தா⁴ய சூளஸீஹனாத³ஸுத்தே ‘‘ச²ன்னவுதி பாஸண்டா³’’தி வுத்தம். பஸீத³ந்தீதி தி³ட்டி²பங்கே ஸம்ஸாரபங்கே ச பகாரேஹி அகா³தா⁴ ஓஸீத³ந்தி.

அபி⁴ப⁴வித்வாதி ஸப்³ப³ஸம்கிலேஸப்பஹானேன அபி⁴பு⁴ய்ய அதிக்கமித்வா. அஜிதோதி அஜினி அவிஜயத்தா. ஸப்³பா³னி அகுஸலகம்மானி குஸலகம்மானி ச கீ²ணானி ஏத்தா²தி ஸப்³ப³கம்மக்க²யோ, அரஹத்தம். உபத⁴யோ ஸம்மதே³வ கீ²யந்தி ஏத்தா²தி உபதி⁴ஸங்க²யோ, நிப்³பா³னம்.

ஸீஸுபசாலாஸுத்தவண்ணனா நிட்டி²தா.

9. ஸேலாஸுத்தவண்ணனா

170. கேனித³ம் பகதம் பி³ம்ப³ந்தி இத³ம் அத்தபா⁴வஸஞ்ஞிதம் பி³ம்ப³ம் ப்³ரஹ்மா-விஸணுபுரிஸ-பஜாபதிஆதீ³ஸு கேன கதம் நிம்மிதம் நிப்³ப³த்திதந்தி கத்தப்³ப³மோஹம் நாம காதுகாமோ புச்ச²தி. அக⁴ந்தி அக⁴வத்து². தேனாஹ ‘‘து³க்க²பதிட்டா²னத்தா’’தி. ஹேதுனிரோதே⁴னாதி தண்ஹாஸங்க²தஸ்ஸ ஹேதுனோ அனுப்பாத³னிரோதே⁴ன. பச்சயவேகல்லேனாதி தத³வஸிட்ட²கிலேஸாபி⁴ஸங்கா²ராதி³பச்சயஸ்ஸ வேகல்லபா⁴வேன, அபச்சயபா⁴வூபக³மனேனாதி அத்தோ².

ஸேலாஸுத்தவண்ணனா நிட்டி²தா.

10. வஜிராஸுத்தவண்ணனா

171. ஸுத்³த⁴ஸங்கா²ரபுஞ்ஜேதி ரூபாரூபவிபா⁴கே³ கிலேஸஸங்கா²ரஸமூஹே. பரமத்த²தோதி ஸபா⁴வேன. யதா² ந ஹி ஸத்தஸஞ்ஞிதஸங்கா²ரபுஞ்ஜோ நாம பரமத்த²தோ உபலப்³ப⁴தி, ஏவம் தப்³பி³னிமுத்தோ நாம கோசி ந உபலப்³ப⁴தி அவிஜ்ஜமானத்தா. விஜ்ஜமானேஸூதி யதா²பச்சயஸம்பத்தியா லப்³ப⁴மானேஸு. தேனாகாரேனாதி இத்தி²புரிஸாதி³ஆகாரேன. வவத்தி²தேஸூதி பச்சேகம் பச்சயவிஸேஸஸமுட்டி²தம் ஸண்டா²னவிஸேஸம் உபாதா³ய ‘‘புரிஸோ ஹத்தீ² அஸ்ஸோ’’திஆதி³னா அபி⁴ஸங்க³தோ பவத்தேஸு. ஸம்முதீதி ஸத்தோதி வோஹாரோ. தேனாஹ ‘‘ஸமஞ்ஞாமத்தமேவா’’தி. பஞ்சக்க²ந்த⁴து³க்க²ந்தி பஞ்சக்க²ந்த⁴ஸஞ்ஞிதம் து³க்க²ம். வுத்தம் ஹேதம் ப⁴க³வதா ‘‘ஸம்கி²த்தேன பஞ்சுபாதா³னக்க²ந்தா⁴ து³க்கா²’’தி (தீ³. நி. 2.387; ம. நி. 1.120; 3.373; விப⁴. 202) அஞ்ஞோ நேவ ஸம்போ⁴தி யதா²வுத்தது³க்க²தோ அஞ்ஞஸ்ஸ ஸங்க²தத⁴ம்மஸ்ஸ அபா⁴வதோ. ந நிருஜ்ஜ²தீதி ததோ அஞ்ஞம் ந நிருஜ்ஜ²தி, உப்பாத³தோ ஹோதி நிரோதோ⁴தி.

வஜிராஸுத்தவண்ணனா நிட்டி²தா.

ஸாரத்த²ப்பகாஸினியா ஸம்யுத்தனிகாய-அட்ட²கதா²ய

பி⁴க்கு²னீஸம்யுத்தவண்ணனாய லீனத்த²ப்பகாஸனா ஸமத்தா.