8. ககுத⁴ஸுத்தவண்ணனா

99. ‘‘நந்தா³மீ’’தி வுத்தே நந்தீ³ நாம பப்³ப³ஜிதஸ்ஸ மலந்தி சோதே³துகாமோ தே³வபுத்தோ ‘‘நந்த³ஸீ’’தி புச்சி². அத²ஸ்ஸ ப⁴க³வா தம் படிக்கி²பந்தோ ‘‘கிம் லத்³தா⁴’’தி? ஆஹ. தேன ‘‘தயா மம அதி⁴ப்பேதனந்தி³யா இத⁴ பச்சயோ ஏவ நத்தி², குதோ ஸா நந்தீ³’’தி த³ஸ்ஸேதி. தேனாஹ ‘‘துட்டி² நாமா’’திஆதி³. அத² தே³வபுத்தோ நந்தி³யா அஸதி ஸோகேன ப⁴விதப்³ப³ம், ஸோகோ ச பப்³ப³ஜிதஸ்ஸ மலந்தி சோதே³ந்தோ ஆஹ ‘‘தேன ஹி, ஸமண, ஸோசஸீ’’தி. ப⁴க³வா தம்பி படிக்கி²பந்தோ ‘‘கிம் ஜீயித்தா²’’திஆதி³மாஹ. கிம் மம் ஜினாதீதி அத்தோ²?

யதி³ தே நந்தி³ஸோகா ந ஸந்தி ஹாஸவத்து²னோ லாப⁴ஸ்ஸ ஜானியா ச அபா⁴வதோ, ஏகவிஹாரினோ பன அரதியா ப⁴விதப்³ப³ந்தி ஆஹ – ‘‘கச்சி தம் ஏகமாஸீனம், அரதீ நாபி⁴கீரதீ’’தி. தஸ்மிம்பி ப⁴க³வதா படிக்கி²த்தே அத² நேஸம்பி நந்தி³ஸோகாரதீனம் அபா⁴வே காரணம் புச்ச²ந்தோ ‘‘கத²ம் த்வ’’ந்தி கா³த²மாஹ? அத²ஸ்ஸ ப⁴க³வா தம் காரணம் பவேதே³ந்தோ ‘‘அக⁴ஜாதஸ்ஸா’’தி கா³த²மாஹ. தத்த² அக⁴ஜாதஸ்ஸாதி அகே⁴ ஜாதஸ்ஸ. தேனாஹ ‘‘வட்டது³க்கே² டி²தஸ்ஸா’’தி. ஜாததண்ஹஸ்ஸ அப்பஹீனதண்ஹஸ்ஸ வட்டது³க்க²ம் ஆக³தமேவ காரணஸ்ஸ அப்பஹீனத்தா. தஸ்ஸேவ ஹி காரணஸ்ஸ அப்பஹீனதம் த³ஸ்ஸேந்தோ ‘‘து³க்கீ² ஸுக²ம் பத்த²யதீதி ஹி வுத்த’’ந்தி ஆஹ. து³க்க²ப்பவத்தியா ஸாபி தண்ஹாப்பவத்தி தேன த³ஸ்ஸிதா. இதீதிஆதி³னா வுத்தமேவத்த²ம் நிக³மனவஸேன த³ஸ்ஸேதி.

ககுத⁴ஸுத்தவண்ணனா நிட்டி²தா.