1. பட²மவக்³கோ³

1. பட²மகஸ்ஸபஸுத்தவண்ணனா

82. தே³வஸ்ஸ புத்தோ தே³வபுத்தோ. தே³வானம் ஜனகஜனேதப்³ப³ஸம்ப³ந்தா⁴பா⁴வதோ கத²மயம் தே³வபுத்தோதி வுச்சதீதி ஆஹ ‘‘தே³வானம் ஹீ’’திஆதி³. ‘‘அபாகடோ அஞ்ஞதரோதி வுச்சதீ’’தி இத³ம் யேபு⁴ய்யவஸேன வுத்தம். பாகடோபி ஹி கத்த²சி ‘‘அஞ்ஞதரோ’’தி வுச்சதி. ஹேட்டா² தே³வதாஸம்யுத்தே ‘‘அபாகடா அஞ்ஞதரா தே³வதா’’தி வத்வா இத⁴ ‘‘பாகடோ தே³வபுத்தோ’’தி வுத்தம். ததா² ஹிஸ்ஸ கஸ்ஸபோதி கோ³த்தனாமம் க³ஹிதம், தஞ்ச கோ² புரிமஜாதிஸித்³த⁴ஸமஞ்ஞாவஸேன. அனுஸாஸனம் அனுஸாஸோ, தம் அனுஸாஸம். பி⁴க்கு²னித்³தே³ஸந்தி பி⁴க்கு²ஸத்³த³ஸ்ஸ நித்³தே³ஸம். பி⁴க்கு²ஓவாத³ந்தி பி⁴க்கு²பா⁴வாவஹம் ஓவாத³ம். யதி³ பன ந அஸ்ஸோஸி, கத²மயம் பஞ்ஹம் கதே²ஸீதி? அஞ்ஞதோ ஸுதம் நிஸ்ஸாய பஞ்ஹம் கதே²ஸி, ந பன ப⁴க³வதோ ஸம்முகா² ஸுதபா⁴வேன.

தேஸந்தி யதா²வுத்தானம் திண்ணம் புக்³க³லானம். ‘‘கதே²துகாமோ சேவா’’திஆதி³னா ஹி சதுத்த²ம் இத⁴ உத்³த⁴டம். தத்த² ஆதி³தோ திண்ணம் ப⁴க³வா பஞ்ஹம் பா⁴ரம் ந கரோதி ஏகேகங்க³வேகல்லதோ சேவ அங்க³த்³வயவேகல்லதோ ச, சதுத்த²ஸ்ஸ பன உப⁴யங்க³பாரிபூரத்தா பா⁴ரம் கரோதீதி ஆஹ ‘‘அயம் பனா’’திஆதி³.

கா³தா²யம் ‘‘ஸுபா⁴ஸிதஸ்ஸா’’தி உபயோக³த்தே² ஸாமிவசனந்தி ஆஹ ‘‘ஸுபா⁴ஸிதம் ஸிக்கே²ய்யா’’தி. சதுஸச்சாதி³னிஸ்ஸிதம் பு³த்³த⁴வசனம் ஸிக்க²ந்தோ சதுப்³பி³த⁴ம் வசீஸுசரிதம் ஸிக்க²தி நாமாதி ஆஹ ‘‘சதுஸச்சனிஸ்ஸிதம்…பே… ஸிக்கே²ய்யா’’தி. அவதா⁴ரணேன தப்படிபக்க²ம் படினிவத்தேதி. உபாஸிதப்³ப³ந்தி ஆஸேவிதப்³ப³ம் பா⁴வேதப்³ப³ம் ப³ஹுலீகாதப்³ப³ம். அட்ட²திம்ஸபே⁴த³ம் கம்மட்டா²னந்தி இத³ம் தஸ்ஸ விபஸ்ஸனாபத³ட்டா²னதம் ஹத³யே ட²பேத்வா வுத்தம். ததா² ஹி வுத்தம் ‘‘து³தியபதே³ன அதி⁴பஞ்ஞாஸிக்கா² கதி²தா’’தி. யே பன ‘‘து³தியபதே³ன அதி⁴சித்தஸிக்கா² சித்தவூபஸமேன அதி⁴பஞ்ஞாஸிக்கா²’’தி பட²ந்தி, தேஸம் பதே³ன அட்ட²திம்ஸப்பபே⁴த³கம்மட்டா²னம் ஸுத்³த⁴ஸமத²கம்மட்டா²னஸ்ஸேவ க³ஹணம் த³ட்ட²ப்³ப³ம். யதி³ ஏவம் ‘‘அட்ட²ஸமாபத்திவஸேனா’’தி இத³ம் கத²ந்தி? ‘‘தம் விபஸ்ஸனாதி⁴ட்டா²னானம் ஸமாபத்தீனம் வஸேன கதி²த’’ந்தி வத³ந்தி. ஏவஞ்ச கத்வா ‘‘து³தியபதே³ன அதி⁴பஞ்ஞாஸிக்கா²’’தி இத³ம் வசனம் ஸமத்தி²தம் ஹோதி. ஸிக்க²னம் நாம ஆஸேவனந்தி ஆஹ ‘‘பா⁴வேய்யாதி அத்தோ²’’தி. உபாஸனந்தி பயிருபாஸனம். தஞ்ச கோ² அஸ்ஸுதபரியாபுணனகம்மட்டா²னுக்³க³ஹாதி³வஸேன த³ஸ்ஸேந்தோ ‘‘தம்பீ’’திஆதி³மாஹ. அதி⁴ஸீலஸிக்கா² கதி²தா லக்க²ணஹாரனயேன. வசீஸுசரிதஸ்ஸ ஹி ஸீலஸபா⁴வத்தா தக்³க³ஹணேனேவ ததே³கலக்க²ணம் காயஸுசரிதம்பி இதரம்பி க³ஹிதமேவாதி. ஏத்த² ச அதி⁴ஸீலஸிக்கா²ய சித்தவிவேகோ, அதி⁴பஞ்ஞாஸிக்கா²ய உபதி⁴விவேகோ, அதி⁴சித்தஸிக்கா²ய காயவிவேகோ கதி²தோ, காயவிவேகோ பன ஸரூபேனேவ பாளியம் க³ஹிதோதி திவித⁴ஸ்ஸபி விவேகஸ்ஸ பகாஸிதத்தம் த³ட்ட²ப்³ப³ம். ஸேஸம் ஸுவிஞ்ஞேய்யமேவ.

பட²மகஸ்ஸபஸுத்தவண்ணனா நிட்டி²தா.

2. து³தியகஸ்ஸபஸுத்தவண்ணனா

83. த்³வீஹி ஜா²னேஹீதி ஆரம்மணலக்க²ணூபனிஜ்ஜா²னலக்க²ணேஹி த்³வீஹி ஜா²னேஹி. கம்மட்டா²னவிமுத்தியாதி கம்மட்டா²னானுயோக³லத்³தா⁴ய விமுத்தியா. தேன தத³ங்க³விக்க²ம்ப⁴னவிமுத்தியோ வத³தி. ஸத்து²ஸாஸனஸ்ஸ ஹத³யத்தா அப்³ப⁴ந்தரத்தா ஹத³யஸ்ஸ மானஸஸ்ஸ, அனுபத்திம் படிலாப⁴மானஸம். தம் பன அத்த²தோ அஞ்ஞா ஏவாதி ஆஹ ‘‘அரஹத்த’’ந்தி. தம் பத்துகாமேன ஏகந்ததோ வஜ்ஜேதப்³ப³தண்ஹாதி³ட்டீ²னம் பா⁴வே தஸ்ஸ அனிஜ்ஜ²னதோ, தத³பா⁴வே இஜ்ஜ²னதோ ச தே உப்பாத³னவஸேன யத³க்³கே³ன நிஸ்ஸிதோ, தத³க்³கே³ன பனாயம்பி தேஹி நிஸ்ஸிதோ நாம ஹோதீதி ஆஹ ‘‘அனிஸ்ஸிதோ’’திஆதி³. அரஹத்தம் ஆனிஸம்ஸிதப்³ப³ட்டே²ன ஆனிஸம்ஸம் ஏதஸ்ஸாதி அரஹத்தானிஸம்ஸோ. அரஹத்தம் பத்துகாமஸ்ஸ புப்³ப³பா⁴க³படிபதா³ இச்சி²தப்³பா³. தத்த² ச ஸப்³ப³பட²மோ கம்மட்டா²னஅத்தானுயோகோ³, ஸோ இத⁴ ந க³ஹிதோதி ஆஹ ‘‘தந்தித⁴ம்மோ புப்³ப³பா⁴கோ³’’தி. தத்த² தந்தித⁴ம்மோதி பரியத்தித⁴ம்மோ.

து³தியகஸ்ஸபஸுத்தவண்ணனா நிட்டி²தா.

3. மக⁴ஸுத்தவண்ணனா

84. மகோ⁴தி ஸக்கஸ்ஸேதம் நாமம் புரிமஜாதிஅனுக³தம். ஸ்வேவாதி ஸக்கோ ஏவ. வதேனாதி மாதாபிதுஉபட்டா²னாதி³சாரித்தத⁴ம்மேன. அஞ்ஞேதி உபதி⁴வேபக்கபாபத⁴ம்மே அபி⁴ப⁴வித்வா. அஸுரந்தி இந்த³ஸத்துபூ⁴தம் அஸுரம்.

மக⁴ஸுத்தவண்ணனா நிட்டி²தா.

4. மாக³த⁴ஸுத்தவண்ணனா

85. சதுத்த²ஸுத்தம் வுத்தத்த²மேவாதி தே³வதாஸம்யுத்தே ஸம்வண்ணிதத்த²மேவ, தஸ்மா இத⁴ ந வத்தப்³போ³ அத்தோ²தி அதி⁴ப்பாயோ.

மாக³த⁴ஸுத்தவண்ணனா நிட்டி²தா

5. தா³மலிஸுத்தவண்ணனா

86. தேன காரணேனாதி தேன பதா⁴னேன காரணபூ⁴தேன, பதா⁴னகரணனிமித்தந்தி அத்தோ². யம் கிஞ்சி கு²த்³த³கம்பி மஹந்தம்பி ஹீனம்பி பணீதம்பி ப⁴வம். ஆயதபக்³க³ஹோதி தீ³க⁴ரத்தஸ்ஸ வீரியாரம்போ⁴. கிச்சவோஸானந்தி கிச்சனிட்டா²னம். ததே²வாதி யதா² அரஹத்துப்பத்திதோ புப்³பே³, ததோ பச்சா²பி ததே²வ ‘‘பு³த்³தி⁴பக்³க³ஹோ’’தி வீரியம் த³ள்ஹம் கரோதூதி குப்பத⁴ம்மம் விய மஞ்ஞமானோ வத³தி. தி³ட்ட²த⁴ம்மஸுக²விஹாராதி³அத்த²ம் பன வீரியகரணம் இச்சி²தப்³ப³மேவ.

அஸம்கிண்ணாதி அவோமிஸ்ஸா ஏவம் அஞ்ஞத்த² அனாக³தத்தா. தேனாஹ ‘‘ப⁴க³வதா ஹீ’’திஆதி³. யதி³ ஏவம் இதே⁴வ கஸ்மா ஏதம் வுத்தந்தி ஆஹ ‘‘இத⁴ பனா’’திஆதி³. பதிட்ட²ந்தி நதீ³ நாம அனவட்டி²ததீரா, தத்த² பதிட்டா²தப்³ப³ட்டா²னம்.

தா³மலிஸுத்தவண்ணனா நிட்டி²தா.

6. காமத³ஸுத்தவண்ணனா

87. புப்³ப³யோகா³வசரோதி புப்³பே³ யோகா³வசரோ புரிமத்தபா⁴வே பா⁴வனமனுயுத்தோ. அயம் கிர கஸ்ஸபஸ்ஸ ப⁴க³வதோ ஸாஸனே பப்³ப³ஜித்வாவ ப³ஹூனி வஸ்ஸஸஹஸ்ஸானி ஸமணத⁴ம்மம் அகாஸி, ந பன விஸேஸம் நிப்³ப³த்தேஸி. தமத்த²ம் காரணேன ஸத்³தி⁴ம் த³ஸ்ஸேதும் ‘‘ப³ஹலகிலேஸதாயா’’திஆதி³ வுத்தம். ஏகந்தபரிஸுத்³த⁴ஸ்ஸாதி யதா² விஸேஸாவஹோ ஹோதி, ஏவம் ஏகந்தேன பரிஸுத்³த⁴ஸ்ஸ ஸப்³ப³ஸோ அனுபக்கிலிட்ட²ஸ்ஸ. ஸீலேன ஸமாஹிதாதி யதா² ஸீலம் உபரூபரி விஸேஸாவஹம் நிப்³பே³த⁴பா⁴கி³யஞ்ச ஹோதி, ஏவம் ஸம்மதே³வ ஆஹிதசித்தா ஸுட்டு² ஸம்பன்னசித்தா. ததா²பூ⁴தா தேன ஸமன்னாக³தா ஹோந்தீதி ஆஹ ‘‘ஸமுபேதா’’தி. பதிட்டி²தஸபா⁴வாதி ஸேக்க²த்தா ஏவ யதா²தி⁴க³தத⁴ம்மேன நிச்சலபா⁴வேன அதி⁴ட்டி²தஸபா⁴வா. மயா துட்டி²யா க³ஹிதாய தே³வபுத்தோ ‘‘து³ல்லபா⁴ துட்டீ²’’தி வக்க²தீதி ப⁴க³வா ‘‘துட்டி² ஹோதி ஸுகா²வஹா’’தி அவோசாதி ஆஹ ‘‘உபரி பஞ்ஹஸமுட்டா²பனத்த²’’ந்தி. பப்³ப³ஜிதோ ருக்க²மூலிகோ அப்³போ⁴காஸிகோ வா அனகா³ரியுபேதோ நாம ஹோதி, ஸேனாஸனே பன வஸந்தோ கத²ந்தி ஆஹ ‘‘ஸத்தபூ⁴மிகே’’திஆதி³. சதுபச்சயஸந்தோஸோதி பா⁴வனாபி⁴யோக³ஸித்³தோ⁴ சதூஸு பச்சயேஸு ஸந்தோஸோ. தேன சித்தவூபஸமேன துட்டி² லத்³தா⁴தி த³ஸ்ஸேதி. சித்தவூபஸமபா⁴வனாயாதி சித்தகிலேஸானம் வூபஸமகரபா⁴வனாய, மனச்ச²ட்டா²னம் இந்த்³ரியானம் நிப்³பி³ஸேவனபா⁴வகரணேன ஸவிஸேஸம் சித்தஸ்ஸ வூபஸமகரபா⁴வனாய ரதோ மனோதி யோஜனா.

ஏத்த² ச இந்த்³ரியூபஸமேன சித்தஸமாதா⁴னம் பரிபுண்ணம் ஹோதி இந்த்³ரியபா⁴வனாய சித்தஸமாதா⁴னஸ்ஸ அகாரகானம் தூ³ரீகரணதோ. அதி⁴சித்தஸமாதா⁴னேன சதுபச்சயஸந்தோஸோ ஸவிஸேஸம் பரிஸுத்³தோ⁴ பரிபுண்ணோ ச ஹோதி பச்சயானம் அலாப⁴லாபே⁴ஸு பரிச்சாக³ஸபா⁴வதோ. வுத்தனயேன பன ஸந்துட்ட²ஸ்ஸ யதா²ஸமாதி³ன்னம் ஸீலம் விஸுஜ்ஜ²தி பாரிபூரிஞ்ச உபக³ச்ச²தி, ததா²பூ⁴தோ சதுஸச்சகம்மட்டா²னே யுத்தோ மக்³க³படிபாடியா ஸப்³ப³ஸோ கிலேஸே ஸமுச்சி²ந்த³ந்தோ நிப்³பா³னதி³ட்டோ² ஹோதீதி இமமத்த²ம் த³ஸ்ஸேதி ‘‘யே ரத்திந்தி³வ’’ந்திஆதி³னா. கிம் ந க³ச்சி²ஸ்ஸந்தி? க³மிஸ்ஸந்தேவாதி அரியமக்³க³பா⁴வனம் பஹாய ஸம்மாபடிபத்தியா து³க்கரபா⁴வம் ஸந்தா⁴ய ஸாஸங்கம் வத³தி. தேனாஹ ‘‘அயம் பன து³க்³க³மோ ப⁴க³வா விஸமோ மக்³கோ³’’தி.

தத்த² கேசி ‘‘அயம் பனாதி தே³வபுத்தோ. ஸோ ஹி ப⁴க³வதோ ‘அரியா க³ச்ச²ந்தீ’தி வசனம் ஸுத்வா ‘து³க்³க³மோ ப⁴க³வா’திஆதி³மாஹா’’தி வத³ந்தி, தம் ந யுஜ்ஜதி. யஸ்மா ‘‘ஸச்சமேத’’ந்தி ஏவமாதி³பி தஸ்ஸேவ வேவசனம் கத்வா த³ஸ்ஸிதம், தஸ்மா ‘‘யேன மக்³கே³ன அரியா க³ச்ச²ந்தீ’’தி தும்ஹேஹி வுத்தம், அயம் பன ‘‘து³க்³க³மோ ப⁴க³வா விஸமோ மக்³கோ³’’தி ஆஹ தே³வபுத்தோ. அரியமக்³கோ³ காமம் கதா³சி அதிது³க்கா² படிபதா³திபி வுச்சதி, தஞ்ச கோ² புப்³ப³பா⁴க³படிபதா³வஸேன, அயம் பன அதீவ ஸுக³மோ ஸப்³ப³கிலேஸது³க்³க³விவஜ்ஜனதோ காயது³ச்சரிதாதி³விஸமஸ்ஸ ராகா³தி³விஸமஸ்ஸ ச தூ³ரீகரணதோ ந விஸமோ. தேனாஹ ‘‘புப்³ப³பா⁴க³படிபதா³யா’’திஆதி³. அஸ்ஸாதி அரியமக்³க³ஸ்ஸ. அரியமக்³க³ஸ்ஸ ஹி அதி⁴ஸீலஸிக்கா²தீ³னம் பரிபு³ந்தி⁴தப்³ப³பா⁴கே³ன ப³ஹூ பரிஸ்ஸயா ஹோந்தீதி. ஏவம் வுத்தோதி ‘‘து³க்³க³மோ விஸமோ’’தி ச ஏவம் வுத்தோ.

அவம்ஸிராதி அனுட்ட²ஹனேன அதோ⁴பூ⁴தஉத்தமங்கா³. குஸலங்கே³ஸு ஹி ஸம்மாதி³ட்டி² உத்தமங்கா³ ஸப்³ப³ஸேட்ட²த்தா, தஞ்ச அனரியா பதந்தி ந உட்ட²ஹந்தி மிச்சா²படிபஜ்ஜனதோ. தேனாஹ ‘‘ஞாணஸிரேனா’’திஆதி³. அனரியமக்³கே³தி மிச்சா²மக்³கே³. தேனாஹ ‘‘விஸமே மக்³கே³’’தி. தம் மக்³க³னதோ அனரியா அரியானம் மக்³க³தோ அபாபுணனேன பரிச்சத்தா ஹுத்வா அபாயே ஸகலவட்டது³க்கே² ச பதந்தி. ஸ்வேவாதி ஸ்வாயம் அனரியேஹி கதா³சிபி க³ந்தும் அஸக்குணேய்யோ மக்³கோ³ அரியானம் விஸுத்³த⁴ஸத்தானம் ஸப்³ப³ஸோ ஸமதி⁴க³மேன ஸமோ ஹோதி. காயவிஸமாதீ³ஹி ஸமன்னாக³தத்தா விஸமே ஸத்தகாயே தேஸம் ஸப்³ப³ஸோவ பஹானேன ஸப்³ப³த்த² ஸமாயேவ.

காமத³ஸுத்தவண்ணனா நிட்டி²தா.

7. பஞ்சாலசண்ட³ஸுத்தவண்ணனா

88. ஸம்பா³தே⁴தி ஸம்பீளிததண்ஹாகிலேஸாதி³னா ஸஉப்பீளதாய பரமஸம்பா³தே⁴. அதிவிய ஸங்காரட்டா²னபூ⁴தோ ஹி நீவரணஸம்பா³தோ⁴ அதி⁴ப்பேதோ. ஸோ ஹி து³க்³க³ஹனோ தஸ்மிம் அஸதி காமகு³ணஸம்பா³தோ⁴ அனவஸரோ ஏவ ஸேய்யதா²பி மஹாகஸ்ஸபாதீ³னம். ஓகாஸந்தி ஜா²னஸ்ஸேதம் நாமம் நீவரணஸம்பா³தா⁴பா⁴வதோ. அஸம்பா³த⁴பா⁴வேன ஹி ஜா²னம் இத⁴ ‘‘ஓகாஸோ’’தி வுத்தம், தஞ்ச கோ² அச்சந்தாஸம்பா³த⁴ட்டா²னதாய விபஸ்ஸனாபாத³கதாய. ததா² ஹி பாளியம் ‘‘அவிந்தீ³’’திஆதி³ வுத்தம். தத்த² அவிந்தீ³தி விந்தி³ படிலபி⁴. பூ⁴ரிமேத⁴ஸோதி மஹாபஞ்ஞோ, ஸபஞ்ஞோதி அத்தோ². அபு³ஜ்ஜீ²தி பு³ஜ்ஜி² படிவிஜ்ஜி². படிலீனோ ஹுத்வா ஸேட்டோ², படிலீனானம் வா ஸேட்டோ²தி படிலீனஸேட்டோ². மானுஸ்ஸயவஸேன உன்னதபா⁴வதோ படிலீனோ நாம பஹீனமானோ. படிலபி⁴ம்ஸூதி காமகு³ணஸம்பா³தே⁴பி ‘‘இமே காமகு³ணா மாதி³ஸானம் கிம் கரிஸ்ஸந்தீ’’தி? தே அபி⁴பு⁴ய்ய நிப்³பா³னப்பத்தியா ஸம்மாஸதிம் படிலபி⁴ம்ஸு. தேன ஸம்பயுத்தேன லோகுத்தரஸமாதி⁴னாபி ஸுட்டு² ஸமாஹிதா.

அயம் கிர தே³வபுத்தோ இதோ புரிமவாரே அத்தபா⁴வே பட²மஜ்ஜா²னலாபீ⁴ ஹுத்வா ததோ சவித்வா ப்³ரஹ்மகாயிகாஸு நிப்³ப³த்தித்வா தத்த² ஜா²னஸுக²ம் அனுப⁴வித்வா ததோ சுதோ இதா³னி காமப⁴வே நிப்³ப³த்தோ, தஸ்மா தம் ஜா²னம் ஸம்பா⁴வேந்தோ ‘‘தாதி³ஸஸ்ஸ நாம ஜா²னஸுக²ஸ்ஸ லாபீ⁴ ப⁴க³வா’’தி தேன கு³ணேன ப⁴க³வந்தம் அபி⁴த்த²வந்தோ ‘‘ஸம்பா³தே⁴ வதா’’தி கா³த²ம் அபா⁴ஸி. அத²ஸ்ஸ ப⁴க³வா யதா² நாம அட்ட²ஸட்டி²யோஜனஸதஸஹஸ்ஸுப்³பே³த⁴ஸினேருபப்³ப³தராஜம் உபாதா³ய ஸாஸபோ ந கிஞ்சி ஹோதி, ஏவம் அனந்தாபரிமேய்யபு³த்³த⁴கு³ணே உபாதா³ய ரூபாவசரபட²மஜ்ஜா²னம் ந கிஞ்சி ஹோதீதி த³ஸ்ஸேந்தோ ‘‘யே ஸதி’’ந்திஆதி³னா அனுத்தரகு³ணாதி⁴க³மம் பவேதே³ஸி. தத்த² ஸதிந்தி விபஸ்ஸனாஸதியா ஸத்³தி⁴ம் அரியமக்³க³ஸதிம். ஸுஸமாஹிதாதி லோகியஸமாதி⁴னா சேவ லோகுத்தரஸமாதி⁴னா ச ஸுட்டு² ஸமாஹிதா. தே ஹி அச்சந்தம் ஸுஸமாஹிதா, ந ஜா²னமத்தலாபி⁴னோ அகுப்பத⁴ம்மத்தா. கேசி ‘‘கம்மந்தே ஸுஸமாஹிதா’’தி பாட²ம் வத்வா ‘‘மக்³க³ஸமாஹிதா’’தி அத்த²ம் வத³ந்தி.

பஞ்சாலசண்ட³ஸுத்தவண்ணனா நிட்டி²தா.

8. தாயனஸுத்தவண்ணனா

89. அதீதஜாதியம் ஸயம்காரவஸேன தாய தி³ட்டி²யா உப்பாதி³தத்தா புப்³பே³ தித்த²கரோ. தேனாஹ ‘‘தி³ட்டி² உப்பாதே³த்வா’’தி. அபரே ஆஹு ‘‘அயம் மே ஸத்தா²தி க³ஹணவஸேன தித்த²கரோ அஸ்ஸ அத்தீ²தி புப்³பே³ தித்த²கரோ, அதீதத்தபா⁴வே தித்த²கரஸாவகோ’’தி. தே ‘‘தி³ட்டி²ம் உப்பாதே³த்வாதி தஸ்ஸ ஸத்து²னோ தி³ட்டி²ம் ஆதா³ய க³ஹேத்வாதி அத்தோ²’’தி வத³ந்தி. தித்த²ம் நாம த்³வாஸட்டி² தி³ட்டி²யோ தப்³பி³னிமுத்தஸ்ஸ மிச்சா²வாத³ஸ்ஸ அபா⁴வதோ. தித்தே² நியுத்தாதி தித்தி²கா, தே ஏவ தித்தி²யாதி வுத்தா க-காரஸ்ஸ ய-காரம் கத்வா. தஸ்ஸாதி யதா²வுத்தஸ்ஸ கல்யாணகம்மஸ்ஸ. நிஸ்ஸந்தே³னாதி ப²லபா⁴வேன. வீரியப்படிஸம்யுத்தாதி வீரியதீ³பனாதி அத்தோ².

அனியமிதஆணத்தீதி அனியமவிதா⁴னம் அனியமவஸேன விதி⁴வசனம். தண்ஹாஸோதந்தி தண்ஹாப்பப³ந்த⁴னம். நீஹராதி ஸமேஹி பஜஹ. ஏகத்தந்தி ஏகக்³க³ம். தேனாஹ ‘‘ஜா²ன’’ந்தி. உபபஜ்ஜதீதி ந உப்பஜ்ஜதி ந பாபுணாதீதி ஆஹ ‘‘ந படிலப⁴தீ’’தி. ந ஓஸக்கேய்யாதி ந ஸங்கோசம் ஆபஜ்ஜேய்ய. க⁴ராவாஸதோ பரிப்³ப³ஜனம் பரிதோ அபக³மோதி பரிப்³ப³ஜோ. பப்³ப³ஜிதவதஸமாதா³னஸ்ஸ அத³ள்ஹதாய ச தத்த² ச அஸக்கச்சகிரியாய ஸிதி²லக³ஹிதா. அதிரேகந்தி பப்³ப³ஜ்ஜாய புரிமகாலதோபி அதி⁴கம். உபரீதி உபரூபரி. து³க்கடம் அகதமேவ ஸேய்யோதி து³ச்சரிதம் நாம ஸப்³பே³ன ஸப்³ப³ம் அகதமேவ ஹிதாவஹம்.

யம் கிஞ்சீதி யம் கிஞ்சி கம்மம். ஸிதி²லம் கதந்தி அஸக்கச்சகாரிதாய ஸிதி²லம் கத்வா பவத்திதம். ஏவரூபமேவாதி ஏவரூபம் பராமட்ட²ஸாமஞ்ஞஸதி³ஸமேவ பச்சா²னுதாபசரியாதி³படிபா⁴க³தோ. ஸம்கிலிட்ட²மேவ தண்ஹாஸம்கிலேஸஉபக்கிலிட்ட²த்தா. ஆஸங்கிதபரிஸங்கிதந்திஆதி³தோ ஸமந்ததோபி பரேஹி ஸங்கிதம். ப்³ரஹ்மசரியஸ்ஸ ஆதி³ ஆதி³ப்³ரஹ்மசரியம், தத்த² நியுத்தாதி ஆதி³ப்³ரஹ்மசரியிகா, மக்³க³ப்³ரஹ்மசரியஸ்ஸ புப்³ப³பா⁴க³படிபதா³தி அத்தோ². தேனாஹ ‘‘மக்³க³ப்³ரஹ்மசரியஸ்ஸ ஆதி³பூ⁴தா’’தி. புப்³ப³பதா⁴னபூ⁴தாதி பட²மாரம்ப⁴பூ⁴தா.

தாயனஸுத்தவண்ணனா நிட்டி²தா.

9. சந்தி³மஸுத்தவண்ணனா

90. விமானே க³ஹிதே தம்னிவாஸீபி க³ஹிதோ ஹோதீதி வுத்தம் ‘‘சந்த³விமானவாஸீ தே³வபுத்தோ’’தி. ஸப்³ப³தீ⁴தி ஸப்³ப³ஸ்மா து³க்³க³ட்டா²னா விப்பமுத்தோஸி ப⁴க³வா த்வம், தஸ்மா மய்ஹம்பி இதோ ஸம்பா³த⁴ட்டா²னதோ விப்பமோக்க²ம் கரோஹீதி அதி⁴ப்பாயோ. தேனாஹ ‘‘தஸ்ஸ மே ஸரணம் ப⁴வா’’தி. லோகானுகம்பகாதி ஸப்³ப³ஸ்ஸ லோகஸ்ஸ அனுக்³க³ஹா, தஸ்மா துய்ஹம்பி ஏதஸ்ஸபி சந்த³ஸ்ஸ. தாதி³ஸா ஏவாதி ஸமானா ஏவ. பமுஞ்சஸீதி பமுஞ்சித்த². தேனாஹ ‘‘அதீதத்தே² வத்தமானவசன’’ந்தி.

சந்தி³மஸுத்தவண்ணனா நிட்டி²தா.

10. ஸூரியஸுத்தவண்ணனா

91. அந்த⁴பா⁴வகரணேதி லோகஸ்ஸ அந்த⁴கரணேதிபி அபரே. தேனாஹ ‘‘தமஸீ’’தி. விரோசதீதி விஜ்ஜோததி. காமம் தே³வபுத்தவஸேன பட²மம் தே³வதா உத்³த⁴டா, ராஹுனோ பன பயோகோ³ தஸ்ஸ விமானேதி ஆஹ ‘‘மண்ட³லீதி மண்ட³லஸண்டா²னோ’’தி. வத³தி ததா³ முகே²ன க³ஹிதத்தா. முகே²ன க³ஹணஞ்சேத்த² ‘‘கி³லீ’’தி அதி⁴ப்பேதம், ந ச அஜ்ஜோ²ஹரணந்தி ஆஹ ‘‘கி³லீதி வத³தீ’’தி. இதா³னி தஸ்ஸ முகே²ன க³ஹணஸமத்த²தம் த³ஸ்ஸேதும் ‘‘ராஹுஸ்ஸ ஹீ’’திஆதி³ வுத்தம். ஸோதிஆதி³ தஸ்ஸ சந்தி³மஸூரியானம் க³ஹணகாரணத³ஸ்ஸனம். அதி⁴வத்தா² தே³வதாதி சந்தி³மஸூரியானம் பரிசாரகதே³வதா. வேக³ந்தி ஜவம். ஸோ ஹி கேனசி அபி⁴முக²ம் அதிது³ன்னிவாரோ கம்மனியாமஸித்³தோ⁴. மத்த²கந்தி கண்ட²ஸ்ஸ உபரிமதே³ஸம். கேசி ‘‘ஸீஸமத்த²கமேவா’’தி வத³ந்தி. நிக்க²மேய்ய வேக³ஸ்ஸ திக்க²ஸீக⁴தா²மபா⁴வதோ. ஆகட்³டி⁴த்வாதி அத்தனோ க³மனதி³ஸாபி⁴முக²ம் ஆகட்³டி⁴த்வா. நந்தி ராஹும். உத்³த⁴ம் உல்லங்கே⁴துகாமம்பி ஓனமேய்ய. பத³த்³வயேனபி ஸோ மஹாஸரீரோ மஹாப³லோ, சந்தி³மஸூரியானம் பன க³மனவேகோ³ தேன ஸப்³ப³தா²பி து³ன்னிவாரியோவாதி த³ஸ்ஸேதி. விமானேனாதி சந்த³க்³க³ஹே சந்த³விமானேன, ஸூரியக்³க³ஹே ஸூரியவிமானேன உபி⁴ன்னம்பி விமானேன ஸஹேவ. அமாவாஸியஞ்ஹி த்³வே விமானானி யோஜனமத்தந்தரிதானி ஹுத்வா ஸஹேவ பவத்தந்தி. யதி³ த்³வேபி தே³வபுத்தா ஸோதாபத்திப²லம் பத்தா, அத² கஸ்மா ஸூரியஸுத்தே ஏவ ‘‘பஜம் மம’’ந்தி வுத்தம், ந சந்த³ஸுத்தேதி? ‘‘ஸோ ச கிர ந சிரஸ்ஸேவ ததோ சவித்வா அஞ்ஞத்த² நிப்³ப³த்தோ, அஞ்ஞா ஏவ ச தே³வதா தத்த² வஸி, யஸ்மிம் சந்த³க்³க³ஹே ப⁴க³வா தம் கா³த²ம் அபா⁴ஸி, ந ததா² ஸூரியோ, அபரபா⁴கே³ பன தத்த²பி காலேன காலம் ராஹுக்³க³ஹோ ஹோதீ’’தி வத³ந்தி.

ஸூரியஸுத்தவண்ணனா நிட்டி²தா.

பட²மவக்³க³வண்ணனா நிட்டி²தா.