3. வித்தஸுத்தவண்ணனா

73. ஸத்³தா⁴யாதி ஸத்³தா⁴ஹேது. குலஸம்பதா³தி க²த்தியாதி³ஸம்பத்தியோ. ஸப்³ப³லோகியலோகுத்தரவித்தபடிலாப⁴ஹேதுதோ ஸத்³தா⁴வித்தமேவ. ஹேட்டா² திண்ணம் த்³வாரானம் வஸேன உப்பன்னகஸ்ஸ ஸப்³ப³ஸ்ஸபி அனவஜ்ஜத⁴ம்மஸ்ஸ ஸங்க³ண்ஹனதோ ‘‘த⁴ம்மோதி த³ஸகுஸலகம்மபதோ²’’தி வுத்தம். அஸம்கிலிட்ட²ஸுக²ந்தி. நிராமிஸம் ஸுக²ம். தமேவ ஸாமிஸம் உபனிதா⁴ய ஸம்பா⁴வேந்தோ ஆஹ ‘‘அஸம்கிலிட்ட²’’ந்தி. அஸேசனகபா⁴வேன அபி⁴ருசிஜனனதோ பியாகிச்ச²கரணதோ ப³ஹும் ஸுசிரம்பி காலம் ஆஸேவந்தஸ்ஸ அதோ³ஸாவஹதோ ஸச்சமேவ மது⁴ரதரம். ந ஹி தம் பிவிதப்³ப³தோ ஸாதி³தப்³ப³தோ அனுப⁴விதப்³ப³தோ ரஸோதி வத்தப்³ப³தம் அரஹதி. இதா³னி தஸ்ஸ கிச்சஸம்பத்திஅத்தே²ஹிபி மஹாரஹதம் த³ஸ்ஸேதும் ‘‘ஸச்சஸ்மிம் ஹீ’’திஆதி³ வுத்தம். தத்த² நதீ³னிவத்தனம் மஹாகப்பினவத்து²ஆதீ³ஹி (த⁴. ப. அட்ட². 1.மஹாகப்பினத்தே²ரவத்து²; அ. நி. அட்ட². 1.1.231; தே²ரகா³. அட்ட². 2.மஹாகப்பினத்தே²ரகா³தா²வண்ணனா) தீ³பேதப்³ப³ம், இதரானி கண்ஹதீ³பாயனஜாதக- (ஜா. 1.10.62 ஆத³யோ) ஸுதஸோம- (ஜா. 2.21.371 ஆத³யோ) மச்ச²ஜாதகேஹி (ஜா. 1.1.34, 75; 1.2.131 ஆத³யோ) தீ³பேதப்³பா³னி. நிம்மத்³தே³ந்தி அபி⁴ப⁴வந்தி. மது⁴ரதரந்தி ஸுந்த³ரதரம் ஸேட்டே²ஸூதி அத்தோ². பஞ்ஞாஜீவீதி பஞ்ஞாய ஜீவனஸீலோதி பஞ்ஞாஜீவீ, பஞ்ஞாபுப்³ப³ங்க³மசரியோதி அத்தோ². பஞ்ஞாஜீவீதி ச பஞ்ஞாவஸேன இரியதி வத்ததி ஜீவிதம் பவத்தேதீதி அத்தோ²தி த³ஸ்ஸேந்தோ ‘‘யோ பஞ்ஞாஜீவீ’’திஆதி³மாஹ. ‘‘ஜீவத’’ந்தி கேசி பட²ந்தி, ஜீவந்தானம் பஞ்ஞாஜீவிம் ஸேட்ட²மாஹூதி அத்தோ².

வித்தஸுத்தவண்ணனா நிட்டி²தா.