4. வுட்டி²ஸுத்தவண்ணனா

74. உப்பதந்தானந்தி பத²விம் பி⁴ந்தி³த்வா உட்ட²ஹந்தானம். ‘‘ஸேட்ட²’’ந்தி வுச்சமானத்தா ‘‘ஸத்தவித⁴’’ந்தி வுத்தம், இதரேஸம் வா தத³னுலோமதோ. கே²மோ ஹோதி து³ப்³பி⁴க்கு²பத்³த³வாபா⁴வதோ. தேனாஹ ‘‘ஸுபி⁴க்கோ²’’தி. நிபதந்தானந்தி அதோ⁴முக²ம் பவத்தந்தானம். பவஜமானானந்தி வஜனஸீலானம். தே பன யஸ்மா ஜங்க³மா நாம ஹோந்தி, ந ருக்கா²த³யோ விய தா²வரா, தஸ்மா ஆஹ ‘‘ஜங்க³மான’’ந்தி. கா³வோதி தே⁴னுயோ. தேன மஹிம்ஸாதி³கானம்பி ஸங்க³ஹோ த³ட்ட²ப்³போ³. வத³ந்தானந்தி உப்பன்னம் அத்த²ம் வத³ந்தானம்.

அத்தனோ க²ந்தியாதி அத்தனோ க²ந்தியா ருசியா க³ஹிதபா⁴வேன. இதரா தே³வதா தஸ்ஸா விஸ்ஸஜ்ஜனே அபரிதுஸ்ஸமானா ஆஹ. யாவ பத⁴ம்ஸீதி கு³ணத⁴ம்ஸீ ஸத்து²தே³ஸனாய லத்³த⁴ப்³ப³கு³ணனாஸனதோ. பக³ப்³பா³தி பாக³ப்³பி³யேன ஸமன்னாக³தா, யதா² வசீபாக³ப்³பி³யேன அக²ரா, ததா² வாசாய ப⁴விதப்³ப³ம். முக²ராதி முக²க²ரா. த³ஸப³லம் புச்சி² ஸண்ஹம் ஸுகு²மம் ரதனத்தயஸம்ஹிதம் அத்த²ம் ஸோதுகாமா. அஸ்ஸா தே³வதாய விஸ்ஸஜ்ஜேந்தோ அஜ்ஜா²ஸயானுரூபம். உப்பதமானாதி உப்பதந்தீ ஸமுக்³கா⁴டேதி ஓதி⁴ஸோ. வட்டமூலகமஹாஅவிஜ்ஜாதி தஸ்ஸா ஆதீ³னவத³ஸ்ஸனத்த²ம் பூ⁴தகத²னவிஸேஸனம். ஓஸீத³ந்தானந்தி படிபக்க²வஸேன அதோ⁴ ஸீத³ந்தானம், உஸ்ஸாத³யமானானந்தி அத்தோ². புஞ்ஞக்கே²த்தபூ⁴தோதி இத³ம் ‘‘பத³ஸா சரமானான’’ந்தி பத³ஸ்ஸ அத்த²விவரணவஸேன பூ⁴தகத²னவிஸேஸனம். யாதி³ஸோ புத்தோ வா ஹோதூதி இத³ம் புரிமபதே³ தே³வதாய புத்தக³ஹணஸ்ஸ கதத்தா வுத்தம்.

வுட்டி²ஸுத்தவண்ணனா நிட்டி²தா.