3. ஜடாஸுத்தவண்ணனா

23. யேன அத்தே²ன தண்ஹா ‘‘ஜடா’’தி வுத்தா, தமேவத்த²ம் த³ஸ்ஸேதும் ‘‘ஜாலினியா’’தி வுத்தம். ஸா ஹி அட்ட²ஸததண்ஹாவிசரிதபபே⁴தா³ அத்தனோ அவயவபூ⁴தா ஏவ ஜாலா ஏதிஸ்ஸா அத்தீ²தி ஜாலினீதி வுச்சதி. இதா³னிஸ்ஸா ஜடாகாரேன பவத்திம் த³ஸ்ஸேதும் ‘‘ஸா ஹீ’’திஆதி³ வுத்தம். தத்த² ரூபாதீ³ஸு ஆரம்மணேஸூதி தஸ்ஸா பவத்திட்டா²னமாஹ ரூபாதி³ச²ளாரம்மணவினிமுத்தஸ்ஸ தண்ஹாவிஸயஸ்ஸ அபா⁴வதோ. ஹேட்டு²பரியவஸேனாதி கதா³சி ரூபாரம்மணே கதா³சி யாவ த⁴ம்மாரம்மணா, கதா³சி த⁴ம்மாரம்மணே கதா³சி யாவ ரூபாரம்மணாதி ஏவம் ஹேட்டா² ச உபரி ச பவத்திவஸேன. தே³ஸனாக்கமேன சேத்த² ஹேட்டு²பரியதா வேதி³தப்³பா³, காமராகா³தி³வஸேனபி அயமத்தோ² வேதி³தப்³போ³. ஸங்கா²ரானம் க²ணிகபா⁴வதோ அபராபருப்பத்தி ஏத்த² ஸம்ஸிப்³ப³னந்தி ஆஹ ‘‘புனப்புனம் உப்பஜ்ஜனதோ ஸம்ஸிப்³ப³னட்டே²னா’’தி. இத³ம் யேன ஸம்ப³ந்தே⁴ன ஜடா வியாதி ஜடாதி ஜடாதண்ஹானம் உபமூபமேய்யதா, தம்த³ஸ்ஸனம். அயஞ்ஹேத்த² அத்தோ² – யதா² ஜாலினீ வேளுகு³ம்ப³ஸ்ஸ ஸாகா², தாஸம் ஸஞ்சயாத³யோ ச அத்தனோ அவயவேஹி ஸம்ஸிப்³பி³தா வினத்³தா⁴ ‘‘ஜடா’’தி வுச்சந்தி, ஏவம் தண்ஹாபி ஸம்ஸிப்³ப³னஸபா⁴வேனாதி.

இமே ஸத்தா ‘‘மம இத³’’ந்தி பரிக்³க³ஹிதம் அத்தனிப்³பி³ஸேஸம் மஞ்ஞமானா அப்³ப⁴ந்தரிமம் கரோந்தி. அப்³ப⁴ந்தரட்டோ² ச அந்தோ-ஸத்³தோ³தி ஸகபரிக்கா²ரேஸு உப்பஜ்ஜனமானாபி தண்ஹா ‘‘அந்தோஜடா’’தி வுத்தா. பப்³ப³ஜிதஸ்ஸ பத்தாதி³, க³ஹட்ட²ஸ்ஸ ஹத்தி²ஆதி³ ஸகபரிக்கா²ரோ. அத்தாதி ப⁴வதி ஏத்த² அபி⁴மானோதி அத்தபா⁴வோ, உபாதா³னக்க²ந்த⁴பஞ்சகம். ஸரீரந்தி கேசி. ‘‘மம அத்தபா⁴வோ ஸுந்த³ரோ, அஸுகஸ்ஸ விய மம அத்தபா⁴வோ ப⁴வேய்யா’’திஆதி³னா ஸகஅத்தபா⁴வாதீ³ஸு தண்ஹாய உப்பஜ்ஜனாகாரோ வேதி³தப்³போ³. அத்தனோ சக்கா²தீ³னி அஜ்ஜ²த்திகாயதனானி, அத்தனோ ச பரேஸஞ்ச ரூபாதீ³னி பா³ஹிராயதனானி, பரேஸம் ஸப்³பா³னி வா. ஸபரஸந்ததிபரியாபன்னானி வா சக்கா²தீ³னி அஜ்ஜ²த்திகாயதனானி, ததா² ரூபாதீ³னி பா³ஹிராயதனானி. பரித்தமஹக்³க³தப⁴வேஸு பவத்தியாபி தண்ஹாய அந்தோஜடாப³ஹிஜடாபா⁴வோ வேதி³தப்³போ³. காமப⁴வோ ஹி கஸ்ஸசிபி கிலேஸஸ்ஸ அவிக்க²ம்பி⁴தத்தா கத்த²சிபி அவிமுத்தோ அஜ்ஜ²த்தக்³க³ஹணஸ்ஸ விஸேஸபச்சயோதி ‘‘அஜ்ஜ²த்தம் அந்தோ’’தி ச வுச்சதி, தப்³பி³பரியாயதோ ரூபாரூபப⁴வோ ‘‘ப³ஹித்³தா⁴ ப³ஹீ’’தி ச. தேனாஹ ப⁴க³வா – ‘‘அஜ்ஜ²த்தஸம்யோஜனோ புக்³க³லோ, ப³ஹித்³தா⁴ஸம்யோஜனோ புக்³க³லோ’’தி (அ. நி. 2.37).

விஸயபே⁴தே³ன பவத்திஆகாரபே⁴தே³ன அனேகபே⁴த³பி⁴ன்னம்பி தண்ஹம் ஜடாபா⁴வஸாமஞ்ஞேன ஏகந்தி க³ஹேத்வா ‘‘தாய ஏவம் உப்பஜ்ஜமானாய ஜடாயா’’தி வுத்தம். ஸா பன பஜாதி வுத்தஸத்தஸந்தானபரியாபன்னா ஏவ ஹுத்வா புனப்புனம் தம் ஜடேந்தீ வினந்த⁴ந்தீ பவத்ததீதி ஆஹ ‘‘ஜடாய ஜடிதா பஜா’’தி. ததா² ஹி பரமத்த²தோ யதி³பி அவயவப்³யதிரேகேன ஸமுதா³யோ நத்தி², ஏகதே³ஸோ பன ஸமுதா³யோ நாம ந ஹோதீதி அவயவதோ ஸமுதா³யம் பி⁴ன்னம் கத்வா உபமூபமேய்யம் த³ஸ்ஸேந்தோ ‘‘யதா² நாம வேளுஜடாதீ³ஹி…பே… ஸம்ஸிப்³பி³தா’’தி ஆஹ. இமம் ஜடந்தி ஸம்ப³ந்தோ⁴. தீஸு தா⁴தூஸு ஏகம்பி அஸேஸேத்வா ஸம்ஸிப்³ப³னேன தேதா⁴துகம் ஜடேத்வா டி²தம். தேனஸ்ஸா மஹாவிஸயதம் விஜடனஸ்ஸ ச ஸுது³க்கரபா⁴வமாஹ. விஜடேதும் கோ ஸமத்தோ²தி இமினா ‘‘விஜடயே’’தி பத³ம் ஸத்திஅத்த²ம், ந விதி⁴அத்த²ந்தி த³ஸ்ஸேதி.

ஏவம் ‘‘அந்தோஜடா’’திஆதி³னா புட்டோ² அத²ஸ்ஸ ப⁴க³வா தமத்த²ம் விஸ்ஸஜ்ஜேந்தோ ‘‘ஸீலே பதிட்டா²யா’’திஆதி³மாஹ. ஏத்த² ஸீலேதி குஸலஸீலே. தம் பன பாதிமோக்க²ஸம்வராதி³பே⁴தே³ஸு பரிஸுத்³த⁴மேவ இச்சி²தப்³ப³ந்தி ஆஹ ‘‘சதுபாரிஸுத்³தி⁴ஸீலே’’தி.

நரதி நேதீதி நரோ, புரிஸோ. காமம் இத்தீ²பி தண்ஹாஜடாவிஜடனே ஸமத்தா² அத்தி², பதா⁴னமேவ பன ஸத்தம் த³ஸ்ஸேந்தோ ‘‘நரோ’’தி ஆஹ யதா² ‘‘ஸத்தா² தே³வமனுஸ்ஸான’’ந்தி, அட்ட²கதா²யம் பன அவிபா⁴கே³ன புக்³க³லபரியாயோ அயந்தி த³ஸ்ஸேதும் ‘‘நரோதி ஸத்தோ’’தி வுத்தம். விபாகபூ⁴தாய ஸஹ பஞ்ஞாய ப⁴வதீதி ஸபஞ்ஞோ. தாய ஹி ஆதி³தோ பட்டா²ய ஸந்தானவஸேன ப³ஹுலம் பவத்தமானாய அயம் ஸத்தோ ஸவிஸேஸம் ஸபஞ்ஞோதி வத்தப்³ப³தம் அரஹதி. விபாகபஞ்ஞாபி ஹி ஸந்தானவிஸேஸேன பா⁴வனாபஞ்ஞுப்பத்தியா உபனிஸ்ஸயபச்சயோ ஹோதி அஹேதுகத்³விஹேதுகானம் தத³பா⁴வதோ. கம்மஜதிஹேதுகபடிஸந்தி⁴பஞ்ஞாயாதி கம்மஜாய திஹேதுகபடிஸந்தி⁴யம் பஞ்ஞாயாதி ஏவம் திஹேதுகஸத்³தோ³ படிஸந்தி⁴ஸத்³தே³ன ஸம்ப³ந்தி⁴தப்³போ³, ந பஞ்ஞாஸத்³தே³ன. ந ஹி பஞ்ஞா திஹேதுகா அத்தி². படிஸந்தி⁴தோ பபு⁴தி பவத்தமானா பஞ்ஞா ‘‘படிஸந்தி⁴யம் பஞ்ஞா’’தி வுத்தா தம்மூலகத்தா, ந படிஸந்தி⁴க்க²ணே பவத்தா ஏவ.

சிந்தேதி ஆரம்மணம் உபனிஜ்ஜா²யதீதி சித்தம், ஸமாதி⁴. ஸோ ஹி ஸாதிஸயம் உபனிஜ்ஜா²னகிச்சோ. ந ஹி விதக்காத³யோ வினா ஸமாதி⁴னா தமத்த²ம் ஸாதே⁴ந்தி, ஸமாதி⁴ பன தேஹி வினாபி ஸாதே⁴தீதி. பகு³ணப³லவபா⁴வாபாத³னேன பச்சயேஹி சித்தம், அத்தஸந்தானம் சினோதீதிபி சித்தம், ஸமாதி⁴. பட²மஜ்ஜா²னாதி³வஸேன சித்தவிசித்ததாய இத்³தி⁴விதா⁴தி³சித்தகரணேன ச ஸமாதி⁴ சித்தந்தி வினாபி பரோபதே³ஸேனஸ்ஸ சித்தபரியாயோ லப்³ப⁴தேவ. அட்ட²கதா²யம் பன சித்த-ஸத்³தோ³ விஞ்ஞாணே நிருள்ஹோதி கத்வா வுத்தம் ‘‘சித்தஸீஸேன ஹேத்த² அட்ட² ஸமாபத்தியோ கதி²தா’’தி. யதா²ஸபா⁴வம் பகாரேஹி ஜானாதீதி பஞ்ஞா. ஸா யதி³பி குஸலாதி³பே⁴த³தோ ப³ஹுவிதா⁴, ‘‘பா⁴வய’’ந்தி பன வசனதோ பா⁴வேதப்³பா³ இதா⁴தி⁴ப்பேதாதி தம் த³ஸ்ஸேந்தோ ‘‘பஞ்ஞானாமேன விபஸ்ஸனா கதி²தா’’தி. யதி³பி கிலேஸானம் பஹானம் ஆதாபனம், தம் ஸம்மாதி³ட்டி²ஆதீ³னம்பி அத்தே²வ, ஆதப்பஸத்³தோ³ விய பன ஆதாப-ஸத்³தோ³ வீரியே ஏவ நிருள்ஹோதி ஆஹ ‘‘ஆதாபீதி வீரியவா’’தி. யதா² கம்மட்டா²னம் தாய பஞ்ஞாய பரிதோ ஹரீயதி பவத்தீயதி, ஏவம் ஸாபி தத³த்த²ம் யோகி³னாதி ஆஹ ‘‘பாரிஹாரியபஞ்ஞா’’தி. அபி⁴க்கமாதீ³னி ஸப்³ப³கிச்சானி ஸாத்த²கஸம்பஜஞ்ஞாதி³வஸேன பரிச்சி²ஜ்ஜ நேதீதி ஸப்³ப³கிச்சபரிணாயிகா.

யஸ்மா புக்³க³லாதி⁴ட்டா²னேன கா³தா² பா⁴ஸிதா, தஸ்மா புக்³க³லாதி⁴ட்டா²னமேவ உபமம் த³ஸ்ஸேந்தோ ‘‘யதா² நாம புரிஸோ’’திஆதி³மாஹ. தத்த² ஸுனிஸிதந்தி ஸுட்டு² நிஸிதம், அதிவிய திகி²ணந்தி அத்தோ². ஸத்த²ஸ்ஸ நிஸிததரபா⁴வகரணம் நிஸானஸிலாயம், பா³ஹுப³லேன சஸ்ஸ உக்கி²பனந்தி உப⁴யம்பேதம் அத்தா²பன்னம் கத்வா உபமா வுத்தாதி தது³ப⁴யம் உபமேய்யம் த³ஸ்ஸேந்தோ ‘‘ஸமாதி⁴ஸிலாயம் ஸுனிஸிதம்…பே… பஞ்ஞாஹத்தே²ன உக்கி²பித்வா’’தி ஆஹ. ஸமாதி⁴கு³ணேன ஹி பஞ்ஞாய திக்க²பா⁴வோ. யதா²ஹ ‘‘ஸமாஹிதோ யதா²பூ⁴தம் பஜானாதீ’’தி (ஸம். நி. 3.5; 4.99; 5.1071). வீரியஞ்சஸ்ஸா உபத்த²ம்ப⁴கம் பக்³க³ண்ஹனதோ. விஜடேய்யாதி விஜடேதும் ஸக்குணேய்ய. வுட்டா²னகா³மினிவிபஸ்ஸனாய ஹி வத்தமானாய யோகா³வசரோ தண்ஹாஜடம் விஜடேதும் ஸமத்தோ² நாம. விஜடனஞ்சேத்த² ஸமுச்சே²த³வஸேன பஹானந்தி ஆஹ – ‘‘ஸஞ்சி²ந்தே³ய்ய ஸம்பதா³லேய்யா’’தி.

மக்³க³க்க²ணே பனேஸ விஜடேதி நாம, அக்³க³ப²லக்க²ணே ஸப்³ப³ஸோ விஜடிதஜடோ நாம. தேனாஹ ‘‘இதா³னீ’’திஆதி³. யஸ்மா ஜடாய விஜடனம் அரியமக்³கே³ன, தஞ்ச கோ² நிப்³பா³னம் ஆக³ம்ம, தஸ்மா தம் ஸந்தா⁴யாஹ ‘‘ஜடாய விஜடனோகாஸ’’ந்தி. யத்த² பன ஸா விஜடீயதி, தம் த³ஸ்ஸேதும் ‘‘யத்த² நாமஞ்சா’’திஆதி³ வுத்தம். ‘‘படிக⁴ம் ரூபஸஞ்ஞா சா’’தி கா³தா²ஸுக²த்த²ம் ஸானுனாஸிகம் கத்வா நித்³தே³ஸோ, ‘‘படிக⁴ரூபஸஞ்ஞா’’தி வுத்தம் ஹோதி. படிக⁴ஸஞ்ஞாவஸேன காமப⁴வோ க³ஹிதோ காமப⁴வபரியாபன்னத்தா தாய. பத²வீகஸிணாதி³ரூபே ஸஞ்ஞா ரூபஸஞ்ஞா. உப⁴யத்தா²பி ஸஞ்ஞாஸீஸேன சித்துப்பாத³ஸ்ஸேவ க³ஹணம். ப⁴வஸங்கே²பேனாதி ப⁴வபா⁴வேன ஸங்கி²பிதப்³ப³தாய, ப⁴வலக்க²ணேன ஏகலக்க²ணத்தாதி அத்தோ². ரூபே வா விரஜ்ஜனவஸேன ச வத்தும் ஸக்குணேய்யா இத⁴ ரூபஸஞ்ஞாதி வுத்தா, ஏவம்பேத்த² அரூபப⁴வஸ்ஸ ச க³ஹிததா வேதி³தப்³பா³. ‘‘நாமஞ்ச ரூபஞ்சா’’தி அனவஸேஸதோ நாமரூபம் க³ஹிதந்தி அரூபப⁴வ-அஸஞ்ஞப⁴வானம்பேத்த² க³ஹணம் ஸித்³த⁴ந்தி அபரே. பரியாதி³யனட்டா²னேதி பரியாதி³யனகாரணே ஸப்³ப³ஸோ கே²பனனிமித்தே நிப்³பா³னே. தேனாஹ ‘‘நிப்³பா³னம்…பே… த³ஸ்ஸிதோ ஹோதீ’’தி.

ஜடாஸுத்தவண்ணனா நிட்டி²தா.